Sa Septyembre 12, 1831, si Joseph Smith ug ang iyang pamilya mibalhin gikan sa Kirtland, Ohio, ngadto sa Hiram, Ohio, mga 48 ka kilometro habagatan-silangan sa Kirtland. Gihimo nila kining pagbalhin agi og tubag sa tambag gikan sa Ginoo (tan-awa sa D&P 63:65). Ang Propeta ug ang iyang pamilya mibalhin sa pamilya ni John ug Alice Johnson, bag-ong mga kinabig ngadto sa Simbahan. Usa ka dakong rason sa pagbalhin gikan sa Kirtland mao ang pagpadayon og trabaho sa dinasig nga hubad sa Biblia. Sa dihang didto na sa Hiram, gisugdan kana nga trabaho ni Joseph. Sa Oktubre 30, 1831, nadawat ni Joseph Smith ang pagpadayag nga gi-rekord diha sa Doktrina ug mga Pakigsaad 65. Niini nga pagpadayag, gitudlo sa Ginoo nga ang ebanghelyo maadto sa tanang kanasuran agi og pangandam alang sa Ikaduhang Pag-anhi sa Manluluwas ug nga ang mga Santos gikinahanglan nga mag-ampo alang sa pagtubo sa gingharian sa Dios.
Ang Ginoo nagpahayag nga ang ebanghelyo mopuno sa tibuok yuta
Hangyoa ang mga estudyante sa pagsulat diha sa ilang mga class notebook o sa mga scripture study journal og pipila ka mga butang nga kanunay nilang giampo. Mahimo kang mohangyo og pipila ka mga estudyante nga mopakigbahin unsa ang ilang gisulat kon komportable silang mobuhat sa mao.
Dapita ang usa ka estudyante sa pagbasa og kusog sa pasiuna nga seksyon sa Doktrina ug mga Pakigsaad 65. Ipasabut nga niini nga pagpadayag, nagsulti kanato ang Ginoo og usa ka butang nga kinahanglang atong i-ampo—ilabi na kon kita nagsaksi sa katumanan sa mga panghitabo nga gipanagna nga mahitabo sa ulahing mga adlaw.
Dapita ang usa ka estudyante sa pagbasa og kusog sa Doktrina ug mga Pakigsaad 65:1–2. Hangyoa ang klase sa pagsunod, nga mangita sa unsa nga paagi ang Ginoo naghulagway sa pagkaylap sa ebanghelyo.
Asa padulong ang ebanghelyo ni Jesukristo? (Ang mga estudyante kinahanglang moila sa mosunod nga doktrina: Ang ebanghelyo ni Jesukristo mokaylap ngadto sa mga kinatumyan sa yuta. Isulat kini nga doktrina diha sa pisara.)
Sumala sa bersikulo 2, unsa ang “gitugyan [sa Ginoo] ngadto sa tawo” nga makahimo sa ebanghelyo sa pagpuno sa tibuok yuta? (Ang mga yawe sa gingharian sa Dios. Mahimo nimong pahinumduman ang mga estudyante nga ang “mga yawe sa gingharian” nagpasabut ngadto sa awtoridad sa priesthood sa pagdumala diha sa Simbahan. Uban niini nga mga yawe, ang Presidente sa Simbahan naggiya sa atong mga paninguha sa pagsangyaw sa ebanghelyo. Nagtugyan siya sa pipila ka mga yawe ngadto sa kinatibuk-an ug lokal nga mga lider sa priesthood.)
Imahe
Daniel Interprets Nebuchadnezzar’s Dream
Ipakita sa mga estudyante ang hulagway ni Daniel nga Naghubad sa Damgo ni Nabucodonosor (Libro sa mga Hulagway sa Ebanghelyo [2009], nu. 24; tan-awa usab sa LDS.org). Dapita ang mga estudyante sa pagpasabut kon unsa ang ilang nahibaloan mahitungod sa paghubad ni Daniel sa damgo ni Haring Nabucodonosor. (Mahimo nimong ikonsiderar ang pagbasa o pag-summarize sa Daniel 2:31–45. Tabangi ang mga estudyante sa pagsabut nga si Haring Nabucodonosor nahasol sa usa ka damgo ug nga ang Ginoo mipadayag sa damgo ug ang kahulugan niini ngadto ni Daniel. Diha sa damgo, usa ka dako kaayong estatuwa, nga mirepresentar og lain-laing mga gingharian, gilumpag sa usa ka bato nga gipikas gikan sa bukid nga walay gigamit nga mga kamot. Misugod ang bato sa gamay apan midako hangtud kini mipuno sa tibuok yuta.)
Sumala sa Doktrina ug mga Pakigsaad 65:2, unsa ang bato nga gipikas gikan sa bukid nga walay gigamit nga mga kamot? (Ang gingharian sa Dios. Ipasabut nga niini nga bersikulo, ang mga pulong “gingharian sa Dios” nagpasabut ngadto sa gingharian sa Dios dinhi sa yuta—Ang Simbahan ni Jesukristo sa mga Santos sa Ulahing mga Adlaw. Mahimo nimong isugyot nga ang mga estudyante mosulat niini nga pagpasabut diha sa ilang mga kasulatan duol sa bersikulo 2.)
Kon mahimo, hatagi ang mga estudyante og kopya sa mosunod nga pamahayag aron ilang mabutang kini sa ilang mga kasulatan. Kon dili kini mahimo, imong isulat ang pamahayag diha sa pisara sa wala pay klase ug dapita ang mga estudyante sa pagsulat niini diha sa ilang mga class notebook o mga scripture study journal. Dapita ang usa ka estudyante sa pagbasa og kusog sa pamahayag.
Si Presidente Gordon B. Hinckley miingon:
Imahe
President Gordon B. Hinckley
“Kita mga tagilungsod sa labing dako nga gingharian sa yuta—usa ka gingharian nga dili kaalam sa mga tawo ang naggiya apan giniyahan ni Ginoong Jesukristo. Ang pagkaanaa niini tinuod. Ang padulngan niini sigurado. Kini mao ang gingharian nga gisulti ni Daniel—usa ka bato, ingon nga mao, nga kinahanglang pikason gikan sa bukid nga walay kamot nga gamiton ug mokaylap ug mopuno sa yuta. (Tan-awa sa Dan. 2:34–35.)
“Walay mortal nga tawo nga naglalang niini nga gingharian” (“Pillars of Truth,” Ensign, Ene. 1994, 4).
Unsa nga mga ebidensya ang inyong nakita nga ang panagna ni Daniel nangatuman karon?
Giunsa niini nga ebidensya paglig-on ang inyong pagpamatuod sa Ang Simbahan ni Jesukristo sa mga Santos sa Ulahing mga Adlaw?
Unsay inyong pagsabut nga mahimong kabahin sa gingharian sa Dios dinhi sa yuta?
Basaha og kusog ang mosunod nga pamahayag ni Elder Neil L. Andersen sa Korum sa Napulog Duha ka mga Apostoles. Sa dili pa nimo basahon, sultihi ang mga estudyante nga mohunong ka og basa sa tunga-tunga sa katapusang sentence sa pamahayag. Hangyoa sila sa pagpaminaw og maayo ug sa paghunahuna kon unsaon kaha nila pagkompleto ang katapusang sentence.
Imahe
Elder Neil L. Andersen
“Nakahunahuna ba kamo kon nganong gipadala kamo dinhi sa yuta niining panahona? Wala kamo matawo sa panahon nila ni Adan ug Eva o sa panahon nga ang mga paraon mao ang nagmando sa Ehipto o sa panahon sa Ming dynasty. Mianhi kamo sa yuta niining panahona, 20 ka siglo human sa unang pag-anhi ni Kristo. Ang priesthood sa Dios gipahiuli dinhi sa yuta, ug ang Ginoo mipahimutang sa Iyang kamot sa pag-andam sa kalibutan alang sa Iyang mahimayaong pagbalik. Mao kini ang mga adlaw sa dagkong oportunidad ug importante nga mga responsibilidad. Mao kini ang inyong mga adlaw. … Usa sa inyong importante nga mga responsibilidad mao ang …” (“Pag-andam sa Kalibutan alang sa Ikaduhang Pag-anhi,”Liahona, Mayo 2011, 49).
Dapita ang pipila ka mga estudyante sa pagsulti kon unsaon nila sa pagkompleto ang katapusang sentence sa pamahayag ni Elder Andersen. Dayon dapita ang usa ka estudyante sa pagbasa og kusog sa Doktrina ug mga Pakigsaad 65:3. Hangyoa ang klase sa pagsunod, nga mangita sa gimando sa Ginoo kanato isip mga miyembro sa Iyang gingharian.
Unsa ang gipasabut nga kita kinahanglang mag-andam sa agianan sa Ginoo ug sa panihapon sa Kordero ug mangandam alang sa Pamanhonon? (Kini nga mga pulong nagpasabut ngadto sa responsibilidad sa pag-andam sa kalibutan alang sa Ikaduhang Pag-anhi ni Jesukristo.)
Isulat ang mosunod nga kamatuoran diha sa pisara: Kita adunay responsibilidad sa pag-andam sa atong mga kaugalingon ug sa uban alang sa Ikaduhang Pag-anhi ni Jesukristo. Mahimo kang mosugyot nga ang mga estudyante mosulat niini nga kamatuoran diha sa ilang mga kasulatan duol sa Doktrina ug mga Pakigsaad 65:3. Ipasabut nga si Elder Neil L. Andersen mipamatuod niini nga kamatuoran. Basaha ang kompletong katapusan nga sentence gikan sa iyang pamahayag: “Usa sa inyong importanting mga responsibilidad mao ang pagtabang sa pag-andam sa kalibutan alang sa Ikaduhang Pag-anhi sa Manluluwas” (“Pag-andam sa Kalibutan,” 49).
Samtang maghunahuna kamo mahitungod sa inyong responsibilidad sa pag-andam sa inyong kaugalingon ug sa uban alang sa Ikaduhang Pag-anhi, unsa nga mga hunahuna ug mga pagbati ang anaa kaninyo?
Dapita ang usa ka estudyante sa pagbasa og kusog sa Doktrina ug mga Pakigsaad 65:4 ug hangyoa ang klase sa pagpangita alang sa unsay atong mabuhat aron sa pag-andam sa atong mga kaugalingon ug sa uban alang sa Ikaduhang Pag-anhi. Hangyoa ang mga estudyante sa pag-report kon unsay ilang makit-an.
Sa unsa nga mga paagi kita “[makahimo] nga mahibaloan ang kahibulongan nga mga buhat [sa Ginoo] diha sa mga katawhan”?
Dapita ang usa ka estudyante sa pagbasa og kusog sa Doktrina ug mga Pakigsaad 65:5–6 ug hangyoa ang klase sa pagpangita og mga butang nga kinahanglan natong i-ampo.
Sumala niini nga mga bersikulo, unsa ang kinahanglan natong i-ampo samtang kita nangandam alang sa Ikaduhang Pag-anhi? (Samtang ang mga estudyante nagtubag niini nga pangutana, mahimo nimo silang dapiton sa pagtandi sa bersikulo 6 ngadto sa mga pulong sa pag-ampo sa Ginoo diha sa Mateo 6:10.)
Sa unsa kaha nga paagi nga ang pag-ampo alang niini nga mga butang nagtabang kanato sa pag-andam sa atong mga kaugalingon ug sa uban alang sa Ikaduhang Pag-anhi?
Dapita ang usa ka estudyante sa pagbasa og kusog sa mosunod nga pamahayag ni Presidente Thomas S. Monson, ug hangyoa ang klase sa pagpaminaw alang sa usa ka butang nga kinahanglang atong i-apil sa atong mga pag-ampo.
Imahe
President Thomas S. Monson
“Ako naghangyo nga ang inyong hugot nga pagtuo ug mga pag-ampo magpadayon nga ihalad alang niadtong mga dapit diin ang atong impluwensya gilimitahan ug diin kita wala tuguti sa gawasnong pagpakigbahin sa ebanghelyo niining higayon. Mga milagro mahitabo samtang gibuhat nato kini” (“Welcome sa Komperensya,”Liahona, Nob. 2009, 6).
Sumala ni Presidente Monson, unsa ang kinahanglan nato nga i-ampo? Sa unsang paagi nga kini nga mga pag-ampo nagtabang sa pag-andam sa dalan alang sa Ikaduhang Pag-anhi?
Hangyoa ang klase sa pagbalik ngadto sa Doktrina ug mga Pakigsaad 65:1–2, ug hangyoa ang usa ka estudyante sa pagbasa og kusog niini nga mga bersikulo.
Sa unsa nga mga paagi kita makaapil diha sa buluhaton sa Ginoo sa pagpuno sa yuta sa Iyang ebanghelyo? (Samtang ang mga estudyante nagtubag niini nga pangutana, tabangi sila nga makakita nga mahimo silang moapil niini nga buluhaton isip full-time nga mga misyonaryo. Usab tabangi sila nga makakita nga sila nag-apil niini nga buluhaton karon, pinaagi sa ilang impluwensya diha sa ilang mga panimalay, sa ilang mga ward ug mga branch, sa ilang mga eskwelahan, ug sa ilang mga komunidad.)
Awhaga ang mga estudyante sa pag-andam sa ilang mga kaugalingon ug sa uban alang sa Ikaduhang Pag-anhi.
Usa ka nag-unang manuskrito sa pagpadayag nga gi-rekord diha sa Doktrina og mga Pakigsaad 65 naglakip sa mosunod nga mga pulong sa pasiuna: “Usa ka pagpadayag ni Joseph ang Manalagna sa Oktubre 30 1831 diha sa ika-6 sa Mateo 10 nga bersikulo” (William E. McLellin kopya sa Pinadayag, Okt. 30, 1831 [D&P 65], sa William E. McLellin Papers, 1831–1878, Church History Library). Ang Mateo 6:10 naglankob og bahin sa pag-ampo sa Ginoo: “Paanhia ang imong gingharian. Pagabuhaton unta ang imong kabubut-on dinhi sa yuta maingon sa langit.” Ang pagpadayag diha sa Doktrina ug mga Pakigsaad 65 nagpakita og nagkalain-laing mga paagi nga ang gingharian sa Ginoo miabut sa yuta ug mopadayon sa pag-uswag. Ug kini matapos uban sa mga pulong nga susama sa katapusang mga pulong diha sa Pag-ampo sa Ginoo: “Kay imo ang dungog, gahum, ug himaya, hangtud sa kahangturan. Amen” (D&P 65:6; tan-awa usab sa Mateo 6:13).
Bisan og ang Simbahan diyutay kaayo sulod sa unang pipila ka mga tuig human kini matukod, si Joseph Smith adunay usa ka propetikanhong panghunahuna sa halangdong padulngan niini. Misulti si Wilford Woodruff kalabut sa usa ka pamahayag sa Propeta nga gihimo diha sa usa ka miting sa priesthood sa Kirtland, Ohio, niadtong Abril 1834:
Imahe
President Wilford Woodruff
“Ang Propeta nanawagan ngadto sa tanan kinsa naghupot sa Priesthood sa pagpundok ngadto sa gamayng eskwelahan nga hinimo sa troso nga gihimo nila didto. Gamay kini nga balay, tingali mga 14 pye kwadrado. Apan nakapahiluna kini sa tibuok Priesthood sa Simbahan ni Jesukristo sa mga Santos sa Ulahing mga Adlaw sa dihang didto pa sa lungsod sa Kirtland. … Kon magkapundok kami ang Propeta manawagan sa mga Elder sa Israel uban kaniya sa paghatag og pagpamatuod niini nga buhat. … Sa dihang nahuman na sila ang Propeta miingon, ‘Mga kaigsoonan, napalig-on kaayo ako ug natudloan sa inyong mga pagpamatuod dinhi karong gabhiona, apan gusto ko nga mosulti kaninyo sa atubangan sa Ginoo, nga kamo wala nay nahibaloan kalabut sa dangatan niini nga Simbahan ug sa gingharian kaysa usa ka gamay nga bata diha sa sabakan sa inahan. Wala ninyo kini masabti.’ Ingon og nakalitan ako. Miingon siya, ‘Dyutay ra kaayo nga priesthood ang inyong makita dinhi karong gabhiona, apan kini nga Simbahan mopuno sa Amihanan ug Habagatang Amerika—pun-on niini ang kalibutan.’”(sa Mga Pagtulun-an sa mga Presidente sa Simbahan: Joseph Smith [2007], 161).