Leksyon 34: Doktrina ug mga Pakigsaad 28

Leksyon 34

Doktrina ug mga Pakigsaad 28

Pasiuna

Niadtong 1830, si Propeta Joseph Smith nakasinati og problema tungod kay ang mga miyembro sa Simbahan wala makasabut sa paagi sa pagdawat og pagpadayag sa Simbahan. Si Hiram Page nangangkon nga nakadawat og pagpadayag alang sa Simbahan pinaagi sa usa ka espesyal nga bato, ug pipila ka mga miyembro sa Simbahan, lakip ni Oliver Cowdery, mituo kaniya. Sa wala pa ang komperensya sa Simbahan nga gipahigayon sa Septyembre 26, 1830, ang Ginoo mipadayag og mga kamatuoran nga nakatabang ni Oliver Cowdery ug sa uban nga makasabut sa paagi sa pagdawat og pagpadayag sa Simbahan.

Mga Sugyot alang sa Pagtudlo

Doktrina ug mga Pakigsaad 28:1–7

Ang Ginoo mideklarar nga ang Presidente sa Simbahan mao lang ang bugtong tawo nga makadawat og pagpadayag sa pagdumala sa Simbahan

Isulat ang imitasyon diha sa pisara.

Unsa ang pipila ka mga ehemplo sa mga butang nga mga imitasyon lamang? (Isip kabahin niini nga diskusyon, mahimo nimong i-display ang usa ka ehemplo sa butang nga imitasyon, sama sa kinopya nga artwork, dulaanan nga kwarta, o usa ka piraso nga plastik nga prutas.)
Ngano kaha nga makadaot nga masaypan ang imitasyon isip ang tinuod nga butang?

Dapita ang usa ka estudyante sa pagbasa og kusog sa mosunod nga pasidaan ni Elder Dallin H. Oaks sa Korum sa Napulog Duha ka mga Apostoles:

Ang yawa mao ang amahan sa mga bakak, ug siya matinguhaon gayud sa pagpugong sa buhat sa Dios pinaagi sa iyang minaro nga mga pagsundog [imitasyon]” (“Duha ka Linya sa Komunikasyon,” Liahona, Nob. 2010, 84).

Dapita ang usa ka estudyante sa pagbasa og kusog sa pasiuna sa seksyon sa Doktrina ug mga Pakigsaad 28. Hangyoa ang klase sa pagsunod ug pag-ila sa imitasyon nga gigamit ni Satanas sa paglingla sa ubang mga miyembro sa bag-o pa ang Simbahan.

Unsa nga imitasyon ang gigamit ni Satanas aron sa paglingla sa mga miyembro sa Simbahan? (Kon ang mga estudyante dili mohisgut sa similaridad tali sa bato ni Hiram ug sa Urim ug Thummim nga usahay gigamit ni Joseph Smith, hisguti kini nga similaridad.)

Ipasabut nga ang pipila ka mga miyembro sa Simbahan nagtuo sa bakak nga mga pagpadayag nga gihatag ni Satanas kang Hiram Page. Samtang ang mga estudyante magtuon ug maghisgut sa pinadayag sa Doktrina ug mga Pakigsaad 28, awhaga sila sa pagpangita og mga kamatuoran nga makatabang kanila sa paglikay nga mailad sa mga imitasyon ni Satanas. Pahibaloa ang mga estudyante nga imong isulat kini nga mga kamatuoran diha sa pisara samtang sila modiskubre niini sa tibuok nga leksyon. Mahimo nimong isugyot nga ang mga estudyante mosulat niini nga mga kamatuoran sa margin sa ilang mga kasulatan.

Dapita ang usa ka estudyante sa pagbasa og kusog sa Doktrina ug mga Pakigsaad 28:1–4, ug dapita ang klase sa pag-ila kon sa unsang paagi ang mga responsibilidad ni Oliver Cowdery sa Simbahan lahi kay sa mga responsibilidad ni Joseph Smith.

Sa unsang paagi nga ang mga responsibilidad ni Oliver Cowdery lahi kay sa kang Joseph Smith? (Si Joseph ang responsable sa pagdawat sa mga sugo ug mga pagpadayag alang sa Simbahan. Si Oliver ang responsable sa pagtudlo pinaagi sa Maghuhupay mahitungod sa mga sugo ug mga pagpadayag nga nadawat ni Joseph.)
Unsang importante nga kamatuoran mahitungod sa Presidente sa Simbahan ang atong makat-unan gikan sa Doktrina ug mga Pakigsaad 28:2? (Ang mga estudyante kinahanglang moila sa mosunod nga doktrina: Ang Presidente sa Simbahan mao lang ang bugtong tawo nga makadawat og pagpadayag alang sa tibuok Simbahan. Isulat kini nga pamahayag sa pisara.)
Sa unsang paagi ang atong pagkasayud niini nga kamatuoran makatabang kanato nga makalikay sa pagkalingla?

Samtang maghisgot ang mga estudyante niini nga mga pangutana, mahimo nimong isiguro kanila nga makasalig kita kanunay sa mga pagtulun-an ug tambag sa Presidente sa Simbahan tungod kay ang Ginoo dili gayud motugot sa Presidente nga mopahisalaag kanato. (Hinumdumi nga kini nga saad makita sa usa ka pamahayag ni Presidente Wilford Woodruff. Kana nga pamahayag gilakip sa Doktrina ug mga Pakigsaad, sa dugang nga materyal human sa Opisyal nga Pahayag 1.)

Ipasabut nga sa dili pa dugay una gipadayag sa Ginoo ang mga kamatuoran nga karon narekord diha sa Doktrina ug mga Pakigsaad 28, si Oliver Cowdery dunay gibuhat nga nagpakita nga wala pa siya hingpit nga makasabut sa kalainan tali sa iyang mga responsibilidad diha sa Simbahan ug sa mga responsibilidad ni Joseph isip Presidente sa Simbahan. Dapita ang usa ka estudyante sa pagbasa sa mosunod nga istorya:

Si Joseph Smith nagpuyo sa Harmony, Pennsylvania, sa dihang nakadawat siya og sulat gikan ni Oliver Cowdery, kinsa didto sa Fayette, New York, mga 100 ka milya (160 ka kilometro) ang gilay-on. Miingon si Oliver nga nakakita siya og sayop sa pinadayag nga atong gitawag karon og Doktrina ug mga Pakigsaad 20. Misulat si Oliver: “Mosugo ko nimo sa ngalan sa Dios sa pagpapas niadto nga mga pulong.” Si Joseph mibiyahe ngadto sa Fayette ug nahibaloan nga ang pamilyang Whitmer miuyon ni Oliver mahitungod sa gituohan nga sayop diha sa pinadayag. Misulat si Joseph, “Nagkinahanglan og pagkugi ug paningkamot una nako sila nahaylo nga kalmadong hunahunaon ang hilisgutan.” Sa kadugayan, ang Propeta “milampos sa pagkumbinser dili lamang sa pamilyang Whitmer, apan … si Oliver Cowdery usab sa pag-angkon nga sila nasayop” (Histories, Volume 1: 1832 – 1844, vol. 1 sa Histories nga serye sa The Joseph Smith Papers [2012], 426; tan-awa usab sa mga pahina 424–25).

Dapita ang mga estudyante nga hilum nga mobasa sa Doktrina ug mga Pakigsaad 19:23, nga mangita sa saad sa Ginoo ngadto kang Martin Harris.

Unsa ang gitudlo sa Ginoo kang Oliver Cowdery? (Human makatubag ang mga estudyante, isulat ang mosunod nga doktrina diha sa pisara: Sa Simbahan ni Jesukristo, ang mga indibidwal dili makadawat og pagpadayag aron sa pagtudlo sa tawo nga nag-preside kanila.)
Sa unsang paagi kini nga kamatuoran may kalabutan sa istorya nga bag-o lang natong nabasa?
Sa unsang paagi kini nga kamatuoran makatabang kanato karon?

Doktrina ug mga Pakigsaad 28:8–10

Ang Ginoo mitawag kang Oliver Cowdery sa pagsangyaw sa ebanghelyo ngadto sa mga Lamanite

Dapita ang usa ka estudyante sa pagbasa og kusog sa Doktrina ug mga Pakigsaad 28:8, ug hangyoa ang klase sa pagpangita sa mga rason nganong ang Ginoo mitugot sa yawa sa pagtintal kanato.

Unsa ang gipabuhat sa Ginoo kang Oliver? (Isangyaw ang ebanghelyo ngadto sa mga Lamanite.)
Unsay atong makat-unan mahitungod sa personal nga pagpadayag gikan sa Doktrina ug mga Pakigsaad 28:8? (Human makatubag ang mga estudyante, isulat sa pisara ang mosunod nga baruganan: Mahimo kitang makadawat og pagpadayag alang sa atong kaugalingong kaayohan ug sa pagtabang kanato sa mga katungdanan ug buluhaton nga gihatag kanato.)

Aron matabangan ang mga estudyante nga makasabut niini nga baruganan, hangyoa ang usa ka estudyante sa pagbasa og kusog sa mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:

“May katungod kita sa personal nga pagpadayag. Hinoon, gawas kon kita gi-set apart alang sa pagdumala og office, dili kita makadawat og pagpadayag kabahin sa unsay angay buhaton sa uban. …

“Ang dili kasarangan nga espirituhanong kasinatian dili angay nga tagdon isip usa ka personal nga tawag sa pagtudlo sa uban. Akong konbiksyon nga pang-personal ang mga kasinatian nga espesyal, sagrado nga matang ug kinahanglang tipigan sa kaugalingon” (“Revelation in a Changing World,” Ensign, Nob. 1989, 14–15).

Sa dili pa magklase, isulat ang mosunod nga mga tahas ug mga calling sa managlahing piraso sa papel: ginikanan, General Authority, bishop, misyonaryo, magtutudlo sa Sunday School, presidente sa Mia Maid, home teacher, visiting teacher. Ibutang ang mga papel sa usa ka sudlanan.

Dapita ang mga estudyante sa pagpili og mga papel gikan sa sudlanan ug basahon kini ngadto sa klase, sa tagsa-tagsa. Samtang gibasa ang matag papel, hangyoa ang mga estudyante sa pagsugyot sa matang sa pagpadayag nga mahimong dawaton sa mga indibidwal sa pagtabang kanila nga matuman kana nga tahas o calling.

Mahimo nimong dapiton ang mga estudyante sa pagpaambit og mga kasinatian diin nakadawat sila og pagpadayag diha sa usa ka buluhaton o responsibilidad. Mahimo ka usab nga mopaambit og kasinatian diin nakadawat ka og pagpadayag aron sa pagtabang kanimo sa usa ka calling o buluhaton. Pahinumdumi ang mga estudyante nga ang ubang mga kasinatian hilabihan ka sagrado o personal aron ipakigbahin.

Awhaga ang mga estudyante sa pag-ampo alang sa pagpadayag aron matabangan sila sa ilang personal nga kinabuhi ug sa ilang mga calling ug buluhaton sa Simbahan. Awhaga usab sila sa pag-ampo nga ang mga lider sa Simbahan mapanalanginan og kahimsog ug kasiguroan ug sa inspirasyon nga ilang gikinahanglan sa pagtuman sa ilang mga responsibilidad.

Doktrina ug mga Pakigsaad 28:11–16

Ang Ginoo misugo kang Oliver Cowdery sa pagkorehir ni Hiram Page ug sa pagtabang nga mahan-ay ang Simbahan

Pahinumdumi ang mga estudyante sa mini nga mga pagpadayag nga gipresentar ni Hiram Page ngadto sa pipila ka mga miyembro sa Simbahan. Dapita ang mga estudyante nga hilum nga mobasa sa Doktrina ug mga Pakigsaad 28:11–14 aron masayran unsa ang gisugo sa Ginoo nga buhaton ni Oliver Cowdery sa pagtabang nga masulbad kini nga problema.

Unsa ang gisugo sa Ginoo nga buhaton ni Oliver sa pagtabang nga masulbad ang problema kabahin ni Hiram Page?
Unsa ang atong makat-unan gikan niini nga mga bersikulo mahitungod sa mga responsibilidad sa mga lider sa Simbahan? (Ang mga estudyante mahimong moila og lain-laing mga baruganan, apan siguroha ang paghatag og gibug-aton sa mosunod: Ang mga lider sa Simbahan adunay responsibilidad sa pagkorihir niadtong nagpahisalaag sa uban. Isulat sa pisara kini nga baruganan.)
Unsa ang atong makat-unan gikan sa Doktrina ug mga Pakigsaad 28:13 mahitungod sa paagi sa paggiya sa Ginoo sa Iyang Simbahan? (Ang mga estudyante mahimong mogamit og lain-laing mga pulong, apan siguroha nga ilang mahibaloan ang mosunod nga baruganan: Sa Simbahan ni Jesukristo, ang tanang butang kinahanglang buhaton diha sa kahusay. Isulat kini nga baruganan diha sa pisara.)

Ipasabut nga ang usa ka paagi nga atong mabuhat ang mga butang “sa kahusay, ug pinaagi sa pag-uyon sa tanan” mao ang pagpaluyo diha sa publiko sa mga indibidwal diha sa mga calling sa Simbahan.

Ngano kaha nga importante nga ang mga indibidwal paluyohan diha sa publiko sa ilang mga calling?

Aron matabangan ang mga estudyante nga makasabut sa unsang paagi ang pag-uyon sa kadaghanan naghatag og kahusay ug proteksyon alang sa Simbahan, hangyoa ang usa ka estudyante sa pagbasa sa mosunod nga pamahayag ni Presidente Packer:

“Ang pagpadayag diha sa Simbahan moabut ngadto niadtong gitawag, gi-sustain, gi-orden, o gi-set apart sa hustong paagi. Ang usa ka bishop, sama pananglit, dili makadawat og pagpadayag mahitungod sa silingan nga ward, tungod kay kana gawas sa iyang hurisdiksyon.

“Usahay adunay moangkon nga nakadawat og awtoridad sa pagtudlo ug sa pagpanalangin bisan wala matawag ug ma-set apart. …

“Mao kana nga ang proseso sa pagpaluyo niadtong gitawag sa katungdanan mainampingon nga gipanalipdan sa Simbahan—aron ang tanan masayud kinsa ang adunay awtoridad sa pagtudlo ug sa pagpanalangin” (“Revelation in a Changing World,” 15).

Sumala ni Presidente Packer, nganong paluyohan man nato diha sa publiko kadtong modawat og mga calling sa Simbahan?
Human nga atong giisa ang atong mga kamot sa pag-ingon nga atong paluyohan ang mga tawo sa ilang mga calling, unsay kinahanglan natong buhaton aron tinud-anay nga mopaluyo kanila?

Aron matabangan ang mga estudyante nga makagamit sa mga baruganan nga ilang nakat-unan sa leksyon karon, basaha og kusog ang mosunod nga mga sitwasyon ug pangutan-a sila kon unsaon nila sa pagtubag ang matag usa:

Nakadawat kamo og elektronik nga komunikasyon nga nangangkon nga bag-ong pagpadayag. Naglangkob kini og mga pagtulun-an nga wala mahiuyon sa mga kasulatan o sa mga pulong sa buhi nga mga propeta.
Nakabantay kamo nga usa ka sakop sa inyong ward mihimo og usa ka pamahayag nga sayop nga doktrina samtang mipamatuod siya atol sa sakrament miting. Nabalaka mo nga kon ang mensahe masaypan isip kamatuoran, tingali duna kini makadaut nga epekto sa uban. Kinsa man ang mokorehir sa miyembro nga nakasulti og sayop?

Dapita ang usa ka estudyante sa pagbasa og kusog sa Doktrina ug mga Pakigsaad 28:15–16, ug hangyoa ang klase sa pagkahibalo sa panapos nga tambag sa Ginoo ngadto ni Oliver Cowdery niini nga pagpadayag.

Ipasabut nga human madawat ni Joseph Smith kini nga pagpadayag, mipahigayon siya og usa ka komperensya ug gihan-ay ang Simbahan. Diha sa komperensya, “Si Brother Page, ingon man usab ang tibuok simbahan nga mitambong, misalikway sa giingon nga bato, ug sa tanang mga butang nga kabahin niadto” (Histories, Volume 1: 1832–1844, 452). Sa pagtapos niini nga leksyon, pagpamatuod sa kamatuoran nga imong gihisgutan ug sa ilang bili sa pagtabang kanato nga makalikay nga mapahisalaag.

Komentaryo ug Background nga Impormasyon

Doktrina ug mga Pakigsaad 28:1–4. Ang mga responsibilidad ni Oliver Cowdery

Ang Ginoo mihatag kang Oliver Cowdery og mga responsibilidad agi og dugang niadtong nalista sa Doktrina ug mga Pakigsaad 28:1–4. Si Oliver Cowdery ug Joseph Smith naghupot sa mga yawe sa gasa sa paghubad sa Basahon ni Mormon (tan-awa sa D&P 6:25–28). Si Oliver miserbisyo usab isip “apostol ni Jesukristo” ug “ikaduha nga anciano [sa] simbahan” (D&P 20:3).

Doktrina ug mga Pakigsaad 28:1–2, 8. Personal nga pagpadayag ug pagpadayag pinaagi sa propeta sa Ginoo

Sa usa ka pagpadayag ngadto ni Propeta Joseph Smith, ang Ginoo misulti kang Oliver Cowdery nga ang Presidente sa Simbahan lamang ang “[maka]dawat og mga sugo ug mga pagpadayag” alang sa tibuok Simbahan (tan-awa sa D&P 28:1–2). Ang Ginoo miingon usab nga si Oliver Cowdery “makadawat og mga pagpadayag” sa iyang piho nga mga responsibilidad (tan-awa sa D&P 28:8). Si Elder Dallin H. Oaks sa Korum sa Napulog Duha ka mga Apostoles mitudlo mahitungod sa balanse tali sa personal nga pagpadayag ug pagpadayag nga gihatag pinaagi sa mga lider sa prieshood:

“Ang Ginoo mihatag sa Iyang mga anak og duha ka linya sa komunikasyon uban kaniya―ang gitawag nato og personal nga linya ug priesthood nga linya. Ang tanan kinahanglan makasabut ug magiyahan niining duha ka mahinungdanong mga linya sa komunikasyon. …

“… Sa kinatibuk-an niini ang personal nga linya dili makalihok nga wala ang linya sa priesthood. Ang gasa sa Espiritu Santo—ang tinubdan sa komunikasyon gikan sa Dios ngadto sa tawo—nga gitugyan pinaagi sa awtoridad sa priesthood, ingon sa gitugot niadtong naghupot sa mga yawe sa priesthood. …

“… Ang makapasubo kay, kini kasagaran ngadto sa mga tawo nga nakalapas sa mga sugo sa Dios o dili masulundon sa tambag sa ilang mga priesthood lider sa pagpahayag nga ang Dios mipadayag ngadto kanila nga sila dili apil sa pagsunod sa pipila ka sugo o sa pagsunod sa pipila ka tambag. Ang ingon nga mga tawo mahimo nga nakadawat og pagpadayag o inspirasyon, apan dili kini gikan sa tinubdan nga ilang gituohan. Ang yawa mao ang amahan sa mga bakak, ug siya matinguhaon gayud sa pagpugong sa buhat sa Dios pinaagi sa iyang minaro nga mga pagsundog” (“Duha ka Linya sa Komunikasyon,” Liahona, Nob. 2010, 83–84).

Doktrina ug mga Pakigsaad 28:2. Ang tahas sa Presidente sa Simbahan

Si Presidente James E. Faust sa Unang Kapangulohan mipamatuod nga ang Presidente sa Simbahan mao lang ang bugtong tawo nga makadawat og pagpadayag alang sa tibuok Simbahan. Gipasabut niya kon sa unsang paagi kini naghatag og kahusay ug proteksyon alang sa mga Santos sa Ulahing mga Adlaw:

“Ang pipila nangangkon og mas taas nga espirituhanong mga gasa o awtoridad gawas sa awtoridad sa priesthood nga naestablisar sa Simbahan. Moingon sila nga nagtuo sila sa mga baruganan ug mga ordinansa sa ebanghelyo ug modawat sa Presidente sa Simbahan isip legal nga tigdumala niini, apan nangangkon nga aduna silay mas taas nga han-ay nga wala sa Presidente. Kasagaran kining buhaton aron ipangatarungan ang usa ka kalihokan nga wala mahisubay sa mga doktrina sa Simbahan. Wala nay mas taas nga han-ay, hinoon, tungod kay ang Presidente sa Simbahan naghupot ug naggamit sa tanang mga yawe sa gingharian sa Dios dinhi sa yuta. Ang Ginoo miingon kabahin sa Presidente sa Simbahan ‘nga walay lain nga itudlo [sa pagdawat sa mga sugo ug mga pagpadayag] gawas nga kini pinaagi kaniya.’ [D&P 43:4]. …

“… Ang padayon nga pagpadayag ug pagpangulo sa Simbahan moabut pinaagi sa Presidente sa Simbahan, ug dili gayud siya mopahisalaag sa mga Santos” (“The Prophetic Voice,” Ensign, Mayo 1996, 6–7).

Doktrina ug mga Pakigsaad 28:6. “Ikaw dili momando kaniya kinsa imong pangulo”

Si Propeta Joseph Smith mitudlo nga ang mga indibidwal dili makadawat og pagpadayag sa pagsugo sa usa ka tawo nga nangulo kanila sa Simbahan:

“Supak kini sa mga lagda sa Dios alang ni bisan kinsa nga miyembro sa Simbahan, o ni bisan kinsa, sa pagdawat og mga panudlo alang niadtong may awtoridad, nga mas taas pa kay sa ilang kaugalingon’ [Mga Pagtulun-an sa mga Presidente sa Simbahan: Joseph Smith [2007], 236).

Doktrina ug mga Pakigsaad 28:8–10. Ang mga Lamanites

Ang termino nga mga Lamanite nagpasabut sa usa ka grupo sa mga tawo diha sa Basahon ni Mormon, diin ang kadaghanan kanila mga kaliwat ni Laman, ang kamagulangan nga anak ni Lehi. Ang paggamit sa Ginoo sa termino nga mga Lamanite diha sa Doktrina ug mga Pakigsaad 28:9 nagpasabut nga ang pipila sa mga kaliwat ni Lehi anaa taliwala sa mga American Indian nga, niana nga panahon, nagpuyo sa unsay gihunahuna niadto nga utlanan sa kasadpan sa Estados Unidos. Niadtong Mayo 1830, ang Kongreso sa Estados Unidos mipasa sa Indian Removal Bill, nga nagkinahanglan sa tanang mga American Indian sa pagbalhin ngadto sa federal nga Indian Territory sa kasadpan sa estado sa Missouri. Sa ingon, si Oliver Cowdery ug ang iyang mga kauban mibiyahe ngadto sa kasadpang Missouri, “diha sa mga utlanan sa mga Lamanite” (D&P 28:9), sa pagtudlo sa ebanghelyo ngadto sa mga American Indian.

Ang Basahon ni Mormon wala mangangkon nga ang mga American Indian naggikan lamang sa pamilya ni Lehi. Si Presidente Anthony W. Ivins sa Unang Kapangulohan miingon:

“Kinahanglan gayud kita nga magmatngon sa mga konklusyon nga atong makab-ut. Ang Basahon ni Mormon nagtudlo sa kasaysayan sa tulo ka managlahi nga mga katawhan … kinsa miabut gikan sa karaang kalibutan padulong dinhi niini nga kontinente. Kini wala magsulti kanato nga walay tawo dinhi sa wala pa sila. Kini wala magsulti kanato nga walay mga katawhan nga miabut human kanila. Ug busa kon may nahimong mga pagdiskubre nga nagsugyot og kalainan sa gigikanan sa kaliwat, kini sayon kaayo nga masaysay, kay kita nagtuo nga ubang mga tawo mianhi dinhi niini nga kontinente” (sa Conference Report, Abr. 1929, 15).

Doktrina ug mga Pakigsaad 28:11. “Kadtong mga butang nga siya misulat gikan niana nga bato dili gikan kanako”

Sa amihanang kasadpan sa New York sa sayong bahin sa mga 1800, daghan ang mituo nga ang mga indibidwal makadawat og kahibalo sa dili natural nga paagi pinaagi sa usa ka instrumento sama sa usa ka bato o tukon sa pagpanagna. Si Hiram Page nangangkon nga ang mga pulong mopakita diha sa bato nga iyang gipanag-iya. Miingon siya nga human niya idiktar ang mga pulong ug masulat kini sa papel, ang mga pulong mawala gikan sa bato ug laing mga pulong mopakita (tan-awa sa Documents: Volume 1: Hulyo 1828-Hunyo 1831, vol. 1 sa Documents nga serye sa The Joseph Smith Papers [2013], 184). Gipanghimaraut sa Ginoo ang bakak nga mga pagpadayag ni Hiram Page. Agig dugang sa paggamit sa Urim ug Thummim, si Joseph tingali migamit og bato sa manalagna nga iyang nakit-an sa iyang kabatan-on aron sa paghubad og usa ka bahin sa Basahon ni Mormon. Adunay pipila ka mga teyoriya kon giunsa paggamit sa Propeta ang Urim ug Thummim sa paghubad sa Basahon ni Mormon ug sa uban pang mga detalye sa proseso sa paghubad, apan si Elder Neal A. Maxwell sa Korum sa Napulog Duha ka mga Apostoles miingon, “Wala gayud kita masayud sa mga detalye” (“By the Gift and Power of God,” Ensign, Ene. 1997, 39). Usa ka importante kaayo nga kalainan tali ni Joseph Smith ug ni Hiram Page mao nga ang Dios mitawag ni Joseph Smith sa pagpahigayon sa buhat sa paghubad ug sa pagdawat og pagpadayag alang sa Simbahan (tan-awa sa D&P 21:1–6). Agig kalainan, ang Ginoo klarong mipahayag nga si Satanas milingla ni Hiram Page ug niadtong mituo sa mga pulong nga iyang gidiktar (tan-awa sa D&P 28:11).

Si Presidente James E. Faust sa Unang Kapangulohan mipasidaan kanato sa paglikay og mga kalihokan nga tingali nagdapit sa impluwensya ni Satanas sa atong kinabuhi:

“Si Satanas dili makapalamdag nga hilisgutan. Gikonsiderar nako siya nga mao ang dakong manunundog [imitator]. …

Dili maayo nga ma-intriga kita kang Satanas ug sa iyang mga misteryo. Walay kaayohan ang makuha sa pagpaduol sa dautan. Sama sa pagdula sa kalayo, sayon ra kaayo kita nga mapaso. … Ang bugtong luwas nga dalan mao ang pagpalayo kaniya ug sa bisan unsang dautan niya nga mga kalihokan o yawan-on nga mga binuhatan. Ang dautang epekto sa pagsimba sa yawa, pagpamarang [barang], salamangka, voodooismo, pagyamyam, paggamit og mga anting-anting, ug tanang mga matang sa pagsimba sa demonyo kinahanglan likayan gayud kanunay” (“Ang mga Pwersa nga Mosalbar Kanato,” Liahona, Ene. 2007, 5).