Leksyon 157: Opisyal nga Pamahayag 2

Leksyon 157

Opisyal nga Pamahayag 2

Pasiuna

Atol sa Ika-20 nga siglo, ang misyonaryo nga buhat mikatap sa tibuok kalibutan. Ang mga lider sa Simbanan nag-ampo alang sa giya kalabut sa restriksyon sa ordinasyon sa priesthood ug mga ordinansa sa templo alang sa mga miyembro sa Simbahan nga African ang kaliwat. Usa ka klaro nga pagpadayag ang miabut ngadto sa Presidente sa Simbahan nga si Spencer W. Kimballug namatud-an sa iyang duha ka magtatambag ug sa mga sakop sa Korum sa Napulog Duha ka mga Apostoles sa Templo sa Salt Lake pagka-Hunyo 1, 1978. Sa usa ka sulat nga gipetsahan og Hunyo 8, 1978, ilang gipahibalo ang pinadayag.

Mga Sugyot alang sa Pagtudlo

Opisyal nga Pamahayag 2

Ang Ginoo mipadayag nga ang priesthood ug mga panalangin sa templo mahimong ihatag sa tanang takus nga miyembro sa Simbahan

Dapita ang klase sa paghunahuna nga sila adunay usa ka higala kinsa usa ka Santos sa Ulahing mga Adlaw ug nanglimbasug sa pipila ka mga pangutana mahitungod sa Simbahan.

Unsay inyong i-awhag nga buhaton sa inyong higala?

Human makatubag ang mga estudyante, basaha og kusog ang mosunod nga pamahayag ni Presidente Dieter F. Uchtdorf sa Unang Kapangulohan:

“Akong minahal nga batan-ong mga higala, kita ang mga tigpangutana nga mga katawhan tungod kay nasayud kita nga ang pagpangutana modala ngadto sa kamatuoran. …

“… Ang pagpangutana mao ang sinugdanan sa pagpamatuod. Ang uban tingali mobati og kaulaw o nga dili takus tungod kay aduna silay seryuso nga mga pangutana mahitungod sa ebanghelyo, apan dili sila kinahanglan nga mobati niana. Ang pagpangutana dili timailhan sa kahuyang; mag-una kini sa paglambo.

“Ang Dios nagsugo kanato nga tinguhaon ang mga tubag ngadto sa atong mga pangutana (tan-awa sa Santiago 1:5–6) ug naghangyo lamang nga magtinguha kita nga ‘kinasingkasing, uban sa tinuod nga katuyoan, nga may hugot nga pagtuo kang Kristo’ (Moroni 10:4). Kon mobuhat kita sa ingon, ang kamatuoran sa tanang butang mapakita ngari kanato ‘pinaagi sa gahum sa Espiritu Santo’ (Moroni 10:5).

“Ayaw kahadlok; pangutana. Mahimong kuryuso, apan ayaw pagduha-duha! Kanunayng maghupot og maayo sa hugot nga pagtuo ug ngadto sa kahayag nga inyo nang nadawat” (“The Reflection in the Water” [debosyonal sa Church Educational System, Nob. 1, 2009], LDS.org).

Unsa ang gitudlo ni Presidente Uchtdorf nga makatabang sa usa ka tawo kinsa adunay mga pangutana bahin sa Simbahan?

Hangyoa ang usa ka estudyante sa pagbasa og kusog sa mosunod nga istorya sa duha ka indibidwal, sila si Helvécio ug Rudá Martins, kinsa nagtinguha sa pagdawat ug pagsabut sa kamatuoran pinaagi sa pagpangutana:

“Nianang malinawong gabii niadtong Abril 1972 … si Helvécio Martins namalandong sa kamatuoran nga gipangita sa iyang pamilya. Siya ug ang iyang asawa, si Rudá, nag-investigate og daghang mga relihiyon, apan ingon og walay nakatagbaw sa ilang espiritwal nga kahaw-ang. ‘Nakig-istorya ko sa Dios nianang gabhiuna, nangayo og tabang,’ siya miingon” (“Elder Helvécio Martins of the Seventy,” Ensign, Mayo 1990, 106).

Pipila ka adlaw ang milabay miabut sa ilang panimalay ang mga misyonaryo didto sa Rio de Janeiro, Brazil. Si Elder Martins nahinumdom, “Sa higayon nga kadtong duha ka mga batan-ong lalaki misulod sa among apartment, ang tanan nakong mga kaguol ug espiritwal nga kahasol kalit lang nahanaw ug napulihan sa kakalma ug kalinaw nga karon akong nahibaloan nga gikan sa impluwensya sa Balaang Espiritu” (uban ni Mark Grover, The Autobiography of Elder Helvécio Martins [1994], 43).

Samtang si Helvécio ug Rudá, kinsa mga African ang kaliwat, nakig-istorya sa mga misyonaryo, si Helvécio nangutana mahitungod sa papel sa mga itum diha sa Simbahan. Ang mga Martins nakahibalo nga nianang panahona, ang polisiya sa Simbahan nagdili sa itum nga mga lalaki nga African ang kaliwatan gikan sa pagka-orden ngadto sa priesthood. Kini nakapaaghat kanila sa pagpangutana sa mga misyonaryo og dugang pang mga pangutana.

Kon kamo pa ang anaa sa kahimtang sa pamilyang Martins, unsa man ang inyong mga pangutana kon nakahibalo na kamo sa restriksyon sa priesthood?

I-display ang mosunod nga pamahayag, nga usa ka porsyon sa pasiuna sa Opisyal nga Pamahayag 2. (Mahimo nimong pakopyahan kining pasiunaalang sa mga estudyante kon sila walay 2013 nga edisyon sa mga kasulatan.) Dapita ang usa ka estudyante sa pagbasa og kusog sa pamahayag, ug hangyoa ang klase sa pagpangita sa mga tubag sa mga pangutana sa mga indibidwal mahitungod sa restriksyon sa priesthood.

“Ang Basahon ni Mormon nagtudlo nga ‘ang tanan managsama ngadto sa Dios,’ lakip sa ‘itum ug puti, ulipon ug gawasnon, lalaki ug babaye’ (2 Nephi 26:33). Sa tibuok kasaysayan sa Simbahan, ang mga tawo sa kada kaliwat ug matang sa katawhan sa daghang mga nasud nabunyagan ug nagpakabuhi isip matinud-anong mga miyembro sa Simbahan. Atol sa tibuok kinabuhi ni Joseph Smith, ang pipila ka itum nga mga lalaki nga mga miyembro sa Simbahan gi-orden ngadto sa priesthood. Sa sayo nga bahin sa kasaysayan niini, ang mga lider sa Simbahan mihunong sa pagtugyan sa priesthood ngadto sa itum nga mga lalaki nga African ang kaliwat. Ang mga rekord sa Simbahan wala maghatag og klarong mga ideya sa gigikanan niini nga buhat.”

Unsa ang mga pangutana bahin sa restriksyon sa priesthood ang mahimong matubag pinaagi niining pamahayag?

Ipasabut ang linya nga namahayag og, “Ang mga rekord sa Simbahan wala maghatag og klarong mga ideya sa gigikanan niini nga buhat.” Siguroa nga makasabut ang mga estudyante nga samtang ang pipila ka mga tawo mahimong magsugyot og mga rason kon nganong ang mga lalaki nga African ang kaliwat wala ma-orden sa priesthood sulod sa usa ka panahon, kadto nga mga rason mahimong dili tukma. Ang pamahayag nga bag-o lang nabasa nagrepresentar sa opisyal nga posisyon sa Simbahan.

Dapita ang laing estudyante sa pagbasa sa mosunod nga paragraph nga naghulagway kon unsa ang gibuhat sa pamilyang Martins human sila nakahibalo sa gipahiuli nga ebanghelyo:

Ang pamilyang Martins nabunyagan pagka-Hulyo 2, 1972 ug matinud-anong miserbisyo sa Simbahan. Sa dihang ang ilang kinamagulangang anak nga lalaki, nga si Marcus, nakadawat sa iyang patriyarkal nga panalangin, misaad kini nga magsangyaw siya sa ebanghelyo. Bisan ang restriksyon sa priesthood nianang panahona nagpugong kang Marcus sa pagserbisyo og full-time nga misyon, ang iyang mga ginikanan mi-open og usa ka savings account sa misyonaryo. Niadtong 1975 ang Simbahan mipahibalo nga usa ka templo ang pagatukuron didto sa São Paulo, Brazil. Aron makatabang sa pagtigom og kwarta, si Sister Martins mibaligya sa iyang mga alahas. Si Brother Martins matinud-anong miserbisyo isip usa ka sakop sa komite sa publisidad alang sa templo. Ang pamilyang Martines mihimo niining mga sakripisyo bisan nagtuo sila nga sila dili makabaton og oportunidad nga makadawat og mga ordinansa sa priesthood diha sa templo.

Ngano kaha nga ang pamilyang Martins andam nga magpabunyag ug matinud-anong nagserbisyo sa Simbahan, bisan og sila naapektuhan sa restriksyon sa priesthood nianang panahona?

Human mahisguti sa mga estudyante kini nga pangutana, basaha og kusog ang tubag ni Brother Martins:

“‘Nakaplagan namo ang kamatuoran, ug walay makapugong kanamo sa pagtuman niini.’ … ‘Kon ang Espiritu magsulti kaninyo nga ang ebanghelyo tinuod, unsaon man ninyo sa paglimud niini?’” (sa “Elder Helvécio Martins of the Seventy,” 106).

Ipasabut nga tungod kay ang pamilyang Martins nakadawat og pagpamatuod pinaagi sa Espiritu Santo, nakahimo sila sa pagpadayon, nagsalig diha sa Ginoo, bisan sa mga butang nga wala nila masabti.

Sa unsang paagi nga ang pamilyang Martins nagsilbing ehemplo alang kaninyo kon kamo adunay mga pangutana? (Makahupot kita kanunay sa unsay ato nang nasayran ug magbarug nga lig-on hangtud nga moabut ang dugang nga kahibalo.)

Ipasabut nga agig dugang sa pamilyang Martins, liboan ka mga tawo nga African ang kaliwat sa nagkadaiyang mga nasud nakahibalo sa kamatuoran sa gipahiuli nga ebanghelyo sa mga dekada nga wala pa ang 1978 nga pagpadayag. Ang mga lider sa Simbahan sa Siyudad sa Salt Lake nakadawat og daghan kaayong mga sulat gikan sa wala mabunyagi nga mga kinabig didto sa Nigeria ug Ghana naghangyo nga magpadala og mga misyonaryo ngadto sa Africa. Sulod sa katuigan, ang mga lider sa Simbahan mainampuon nga mikonsiderar sa maong butang apan mibati nga wala pa moabut ang panahon nga magpadala og mga misyonaryo didto sa Africa, diin ang lokal nga mga miyembro dili makadumala o makapahigayon og mga ordinansa.

Pahibaloa ang mga estudyante nga ang Opisyal nga Pamahayag 2 naglangkob sa opisyal nga pahibalo sa usa ka pinadayag nga nadawat ni Presidente Spencer W. Kimball pagka-Hunyo 1, 1978. Dapita ang usa ka estudyante sa pagbasa og kusog sa unang paragraph ubos sa mga pulong nga “Minahal kong mga Kaigsoonan.” Dapita ang klase sa pagsunod, nga mangita kon unsay gisulti sa mga lider sa Simbahan nga ilang nasaksihan.

Unsa ang nasaksihan sa mga lider sa Simbahan sa tibuok kalibutan?
Unsa ang nakapadasig sa mga lider sa Simbahan samtang sila nakasaksi sa pagpalapad sa buhat sa Ginoo? (Usa ka tinguha sa paghatag sa tanang panalangin sa ebanghelyo ngadto sa tanang takus nga mga miyembro.)

Dapita ang usa ka estudyante sa pagbasa og kusog sa sunod nga paragraph (nga magsugod sa “Nakahibalo sa mga saad”). Dapita ang klase sa pagtan-aw kon giunsa sa mga lider sa paglihok sa mga tinguha nga nakapadasig kanila.

Sa unsang paagi nga si Presidente Spencer W. Kimball ug ang ubang mga lider sa Simbahan milihok ilang dinasig nga mga tinguha?
Unsa ang gitudlo niini kanato mahitungod sa mga propeta? (Human makatubag ang mga estudyante, mahimo nimong isulat ang mosunod nga kamatuoran diha sa pisara: Ang mga propeta nagtinguha sa giya sa Ginoo sa pagdumala sa Simbahan.)

Ipasabut ang mga pulong nga “Nakahibalo sa mga saad nga gihimo sa mga propeta.”

Unsa man ang gitudlo kanato niining mga pulong ug sa sentence nga gipaila niini mahitungod sa unsay nahibaloan sa mga lider sa Simbahan kalabut sa restriksyon sa priesthood? (Nasayud sila nga sa usa ka panahon, ang tanang takus nga kalalakin-an makabaton og oportunidad sa pagdawat sa priesthood.)

Ipasabut nga sulod sa daghang katuigan sa wala pa ang 1978, ang Unang Kapangulohan ug ang Korum sa Napulog Duha ka mga Apostoles naghisgot ug nag-ampo mahitungod sa restriksyon sa priesthood. Ang mga lider sa Simbahan mibati nga ang pagpadayag gikinahanglan aron sa pag-usab sa restriksyon, nga naestablisar na og kapin sa usa ka siglo. Sulod sa dugay nga panahon ang pangutana nakahasol kaayo sa hunahuna ni Presidente Kimball, ug kanunay siyang miadto sa templo nga mag-inusara aron mag-ampo bahin niini.

Dapita ang usa ka estudyante sa pagbasa og kusog sa nagsunod nga duha ka mga paragraph, nga gisugdan sa “Siya nakadungog sa atong mga pag-ampo.” Hangyoa ang klase sa pagsunod, nga mangita sa tubag sa Ginoo ngadto sa mga pag-ampo ni Presidente Kimball, sa iyang mga magtatambag sa Unang Kapangulohan, ug sa mga sakop sa Korum sa Napulog Duha ka mga Apostoles.

Unsa ang tubag sa Ginoo ngadto sa mga pag-ampo sa Iyang mga propeta?
Unsay gitudlo niini ngari kanato mahitungod kon sa unsang paagi ang Ginoo naggiya sa Iyang Simbahan? (Human makatubag ang mga estudyante, isulat ang mosunod nga doktrina diha sa pisara: Ang Ginoo mogiya sa Iyang Simbahan pinaagi sa pagpadayag ngadto sa Iyang mga propeta.)

Ipasabut nga kining pagpadayag adunay dakong epekto sa mga tawo sa tibuok kalibutan. Dapita ang usa ka estudyante sa pagbasa mahitungod sa reaksyon nila ni Helvécio Martins ug sa iyang asawa, nga si Ruda, sa dihang sila nakahibalo mahitungod niini:

“Dili nako mapugngan ang akong mga gibati. Si Rudá ug ako misulod sa among kwarto, nangluhod, ug nag-ampo. Naghilak mi samtang nagpasalamat sa among Amahan sa Langit alang sa panghitabo nga igo lamang namong gipangandoy. Miabut gayud ang adlaw, ug diha sa among mortal nga kinabuhi” (Autobiography, 69–70). Ang pamilyang Martins na-sealed didto sa templo. Ang ilang anak nga lalaki nga si Marcus mao ang unang miyembro sa Simbahan nga African ang kaliwatan nga miserbisyo og misyon human sa pagpadayag nga mitapos sa restriksyon sa priesthood. Si Helvécio Martins nahimong lokal nga lider sa priesthood ug sa katapusan natawag sa pagserbisyo isip usa ka sakop sa Ikaduhang Korum sa Seventy.

Ipasabut nga sa wala madugay human nadawat ang pagpadayag nga mitapos sa restriksyon sa priesthood, ang mga misyonaryo gipadala ngadto sa Africa. Sukad niadto natukod ang mga templo niana nga kontinente, ug gatusan ka libo ka mga katawhan didto ang nakadawat sa mga ordinansa sa ebanghelyo alang sa ilang kaugalingon ug alang sa ilang mga katigulangan nga namatay na.

Ipasabut nga ang mga estudyante mahimong mangutana kon nganong ang Simbahan wala mag-orden og mga kalalakin-an nga African ang kaliwat ngadto sa priesthood sulod sa usa ka panahon. Dapita sila sa pagkonsiderar kon unsaon nila sa pagtubag kini nga pangutana.

Siguroa nga tukma ang pagpasabut ngadto sa uban nga kita wala makahibalo kon nganong ang restriksyon nasugdan. Agig dugang, mahimo kitang mopakigbahin ug mopamatuod sa mga kamatuoran nga atong nahibaloan. (Mahimo nimong i-refer ngadto sa mga kamatuoran nga nasulat diha sa pisara.) Tapusa pinaagi sa pagdapit sa mga estudyante sa pagpakigbahin sa ilang mga pagbati ug mga pagpamatuod. Mahimo usab nimong ipakigbahin ang imong pagpamatuod.

Komentaryo ug Background nga Impormasyon

Opisyal nga Pamahayag 2. Ang mga panalangin sa priesthood mahimong madawat sa tanang anak sa Dios

Si Elder M. Russell Ballard sa Korum sa Napulog Duha ka mga Apostoles mipasabut nga bisan og ang awtoridad sa priesthood gihatag sa kalalakin-an, ang tanang anak sa Langitnong Amahan—lalaki ug babaye—makadawat sa mga panalangin sa priesthood:

“Sa plano sa atong Langitnong Amahan nga naghatag og gahum sa priesthood, ang kalalakin-an dunay responsibilidad sa pagpangalagad sa priesthood, apan dili sila ang priesthood. Ang kalalakin-an ug kababayen-an dunay lain-lain apan parehas nga bililhong tahas. Ingon nga ang babaye dili magsabak kon wala ang lalaki, ang lalaki dili hingpit nga makagamit sa gahum sa priesthood sa pagtukod og mahangturong pamilya kon wala ang babaye. Sa ato pa, sa mahangturong panglantaw, ang gahum sa pagpasanay ug ang gahum sa priesthood pagaambitan sa bana ug asawa. Ug isip magtiayon, ang lalaki ug ang babaye maninguha gyud sa pagsunod sa atong Langitnong Amahan. Ang Kristohanong hiyas sa gugma, pagpaubos, ug pailub maoy ilang focus sa ilang pagtinguha sa panalangin sa priesthood sa ilang kinabuhi ug sa ilang pamilya.

“Mahinungdanon kaayo nga kita makasabut nga ang Langitnong Amahan naghatag og paagi sa tanan Niyang mga anak nga makaangkon sa mga panalangin ug malig-on sa gahum sa priesthood.” (“Kini Ang Akong Buhat ug Himaya,” Liahona, Mayo 2013, 19).

Opisyal nga Pamahayag 2. Likayi ang paglakip sa mga rason sa tawo ngadto sa mga pinadayag sa Dios

“Sa usa ka interbyu niadtong 1988 sa ikanapulo nga anibersaryo sa pagpadayag sa priesthood, [si Elder Dallin H. Oaks sa Korum sa Napulog Duha ka mga Apostoles] mipasabut sa [iyang] kinaiya ngadto sa pagsulay og hatag og mortal nga mga rason alang sa balaang pagpadayag:

“‘Kon basahon ninyo ang mga kasulatan uban niining pangutana sa hunahuna, “Nganong nagsugo ang Ginoo niini o nganong nagsugo man Siya niana,” inyong masuta nga wala kaabut sa usa diha sa gatusan ka mga sugo nga adunay rason nga nahatag. Dili kana ang sumbanan sa Ginoo nga mohatag og mga rason. Makapangatarungan kitang [mga mortal] ngadto sa pinadayag. Makapangatarungan kita ngadto sa mga sugo. Kon ato kanang buhaton, kita ang mag-igo. Ang pipila ka mga tawo magbutang og mga rason sa atong nahisgutan dinhi, ug moresulta gayud sa sayop. Adunay leksyon niana. … Nakahukom ko kaniadto nga magbaton ko og pagtuo diha sa sugo ug wala koy pagtuo sa mga rason nga gisugyot alang niini.’

“Sa dihang gipangutana kon nagpasabut ba [siya] ngadto sa mga rason nga gihatag sa mga General Authority, [siya] mitubag:

“‘Nagpasabut ko ngadto sa mga rason nga gihatag sa mga general authority ug sa detalyadong mga rason … sa ubang tawo. Ang kinatibuk-ang hugpong sa mga rason para nako ingon og dili angay morisgo. … Dili nato buhaton ang sayop nga nahimo sa una, dinhi ug sa laing mga dapit, sa pagsulay og butang og mga rason ngadto sa pinadayag. Ang mga rason dakong hinimo-himo sa tawo. Ang mga pagpadayag mao ang atong gipaluyohan isip ang kabubut-on sa Ginoo ug anaa diha nahimutang ang kasiguroan’ [“Apostles Talk about Reasons for Lifting Ban,” Daily Herald, Provo, Utah, Hunyo 5, 1988, 21 (AP)]” (Dallin H. Oaks, Life’s Lessons Learned [2011], 68–69).

Opisyal nga Pamahayag 2. Wala kinahanglana nga masayud kita sa tanang mga tubag, apan kinahanglan nga masayud kita kon unsay labing bag-o nga atong nahibaloan

Si Elder Paul V. Jonhson sa Seventy mihatag sa mosunod nga tambag ngadto sa mga magtutudlo sa ebanghelyo:

“Luwas ra para sa usa ka estudyante nga makita ang magtutudlo nga wala makahibalo sa tubag sa tanang butang apan nakahibalo sa tubag sa importanting mga pangutana ug adunay lig-on nga pagpamatuod. Sa dihang nangutana ang usa ka anghel kang Nephi kon nasayud ba siya sa pagpakig-angay sa Dios, ‘Ako nasayud nga siya nahigugma sa iyang mga anak; bisan pa niana, ako wala masayud sa kahulugan sa tanan nga mga butang’ (1 Nephi 11:17). Bisan kon wala kita makahibalo sa tubag sa piho nga pangutana, makapahinumdom kita sa atong mga estudyante sa mga butang nga atong nahibaloan.

“Laing hagit nga atong giatubang, ilabi na kon dugay-dugay na kita nga nagtudlo, mao ang paghupot lang gihapon sa daan nga mga dokumento ug daan nga mga pagpasabut. Mas maayo gyud nga maghupot kita sa kasamtangang gibarugan sa Simbahan. Usa sa labing maayo nga mga paagi sa pagbuhat niini mao ang mahimong pamilyar sa materyal diha sa newsroom sa LDS.org (mormonnewsroom.org). …

“Nadawat ako sa seminaries and institute niadtong summer sa 1978. Pagka-Hunyo niana nga summer, ang pinadayag gipahibalo nga ang priesthood mahatag na ngadto sa tanang takus nga kalalakin-an. Pagka-Agosto nianang tuiga, si Elder Bruce R McConkie, usa ka sakop sa Korum sa Napulog Duha ka mga Apostoles, namulong ngadto sa mga kawani sa seminary ug institute sa usa ka miting nga susama niini. Gipasabut niya kon sa unsang paagi nga ang pagpadayag nakapausab sa atong panabut bahin sa isyu. Miingon siya:

“‘Kalimti ang tanan nga akong gisulti, o kon unsay nasulti ni Presidente Brigham Young o ni Presidente George Q. Cannon o bisan kinsa man ang nakapamulong kaniadto nga sukwahi sa kasamtangan nga pagpadayag. Namulong kami uban sa limitado nga panabut ug wala ang kahayag ug kahibalo nga karon miabut na sa kalibutan.

“‘Atong nakuha ang atong kamatuoran ug atong kahayag pagtulun-an ngadto sa lain nga pagtulun-an ug lagda ngadto sa lain nga lagda. Gidugangan kita karon og daghan kaayong bag-ong salabutan ug kahayag bahin niining partikular nga hilisgutan, ug kini mag-iway sa tanang kangitngit ug sa tanang panglantaw ug tanang mga hunahuna nga nanglabay na. Dili na kini importante.

“‘Dili kini makahimo og gamayng kalainan kon unsa ang nasulti ni bisan kinsang tawo mahitungod sa … butang sa wala pa ang unang adlaw sa Hunyo niining tuiga (1978)’ (“All Are Alike unto God” [CES symposium on the Book of Mormon, Ago. 18, 1978], 2; LDS.org).

“Magpakisayud kita sa labing bag-ong kahayag nga nahatag kanato” (“A Pattern for Learning Spiritual Things” [pakigpulong ngadto sa mga CES religious educator, Ago. 7, 2012], LDS.org).

Opisyal nga Pamahayag 2. “Ang Ginoo karon mipadayag sa iyang kabubut-on”

Pipila ka sakop sa Korum sa Napulog Duha ka mga Apostoles sa kaulahian mihulagway sa ilang kasinatian sa dihang ang pinadayag nadawat pagka-Hunyo 1, 1978. Sama pananglit, si Presidente Gordon B. Hinckley, usa ka sakop sa Korum sa Napulog Duha niadtong 1978, mipamatuod:

“Adunay balaanon nga pagbati diha sa kwarto. Para nako, nga kini daw sama sa agianan paingon sa langit nga mibukas tali sa langitnong trono ug sa nagluhod, nangamuyo nga propeta sa Dios kinsa giubanan sa iyang mga Kaigsoonan. … Pinaagi sa gahum sa Espiritu Santo adunay miabut ngadto niana nga propeta nga usa ka pasalig nga ang butang nga iyang giampo matarung, nga ang panahon miabut na , ug nga karon ang talagsaong mga panalangin sa priesthood kinahanglang mahatag ngadto sa takus nga kalalakin-an sa bisan asa nga dapit sa walay pag-isip sa kaliwat.

“Ang matag usa nianang nag-alirong nga mga lalaki, pinaagi sa gahum sa Espiritu Santo, nasayud sa samang butang. …

“… Walay usa kanamo nga anaa niana nga okasyon nga mao lang gihapon human niana. Mao usab ang Simbahan dili na sama sa una” (“Priesthood Restoration,” Ensign, Okt. 1988, 70).

Si Elder Bruce R. McConkie sa Korum sa Napulog Duha ka mga Apostoles mipamatuod sa samang paagi:

“Niining okasyon [dihang ang pagpadayag nga anaa sa Opisyal nga Pamahayag 2 nadawat], tungod sa pagkamakanunayon ug sa hugot nga pagtuo, ug tungod kay ang oras ug ang panahon miabut na, ang Ginoo sa iyang kamadagayaon mibu-bu sa Espiritu Santo diha sa Unang Kapangulohan ug sa Napulog Duha sa milagruso ug katingalahang paagi, labaw pa sa bisan unsang butang nga nasinati sukad ni bisan kinsa nga mitambong. Ang pagpadayag miabut ngadto sa Presidente sa Simbahan; miabut usab kini ngadto sa indibidwal nga anaa” (“All Are Alike unto God” [pakigpulong ngadto sa mga CES religious educator, Ago. 18, 1978], 3, LDS.org).

Opisyal nga Pamahayag 2. Alang sa dugang nga impormasyon

Alang sa dugang nga impormasyon bahin sa Opisyal nga Pamahayag 2, adto sa Gospel Topics sa LDS.org ug pangita sa “race and the priesthood.”