Doktrina ug mga Pakigsaad 93:21–53

Pasiuna

Kini ang ikaduha sa duha ka mga leksyon kabahin sa Doktrina ug mga Pakigsaad 93. Si Propeta Joseph Smith nakadawat niini nga pinadayag niadtong Mayo 6, 1833. Sa ulahing bahin sa pinadayag ang Ginoo mipadayag og importanting mga kamatuoran kabahin sa atong premortal nga kinabuhi. Sa panahon nga nadawat kini nga pinadayag, daghang tawo ang nagtuo nga ang atong kinabuhi nagsugod sa pagpanamkon o sa pagkatawo. Kini nga panghunahuna kasagaran gihapon kaayo karon. Ang Ginoo mitudlo ni Joseph Smith nga “ang tawo mao usab diha sa sinugdanan uban sa Dios” (D&P 93:29) ug nga ang atong mga espiritu mahangturon. Mitudlo usab Siya kon sa unsang paagi kita makadawat og kamatuoran ug kahayag ug gisugo ang Propeta ug ang ubang mga lider sa Simbahan sa pagpahimutang sa ilang mga panimalay diha sa kahusay aron ang ilang mga pamilya malig-on ug mapanalipdan.

Mga Sugyot alang sa Pagtudlo

Doktrina ug mga Pakigsaad 93:21–39

Ang Ginoo mitudlo sa Iyang mga sulugoon kon unsaon sa pagdawat sa kamatuoran ug kahayag

Hangyoa ang mga estudyante nga maoy unang natawo nga anak sa ilang pamilya sa pagbarug.

Unsa kaha ang pipila sa mga responsibilidad sa unang natawo?

Hangyoa ang mga estudyante sa paglingkod. Dapita ang usa ka estudyante sa pagbasa og kusog sa Doktrina ug mga Pakigsaad 93:21–23. Hangyoa ang klase sa pagsunod ug sa pagpangita kon unsay gipadayag ni Jesukristo mahitungod sa Iyang Kaugalingon.

Sumala sa bersikulo 21, unsay nakalahi ni Jesukristo sa tanang mga espiritu nga anak sa Langitnong Amahan? (Ang mga estudyante kinahanglang mahibalo sa mosunod nga doktrina: Si Jesukristo mao ang unang natawo sa tanang espiritu nga mga anak sa Langitnong Amahan.)

Ipasabut nga tungod kay si Jesukristo mao ang Unang Natawo sa Amahan, Siya mao ang “gitudlo nga manununod” sa tanan nga anaa sa Amahan (Mga Hebreohanon 1:2). Hinoon, gusto Niya nga ang tanang mga anak sa Langitnong Amahan makaambit niini nga kabilin. Kita adunay oportunidad nga mahimong “isigkamanununod uban kang Kristo” (Mga Taga-Roma 8:17) ug pagaiphon nga apil sa “simbahan sa Unang Natawo” (D&P 93:22; tan-awa usab sa D&P 76:51–54). Niini nga paagi kita usab mahimong makadawat sa tanan nga anaa sa Amahan (tan-awa sa D&P 76:55; 84:37–38).

Sumala sa Doktrina ug mga Pakigsaad 93:22, unsa ang kinahanglan gayud natong buhaton aron mahimong mag-aambit sa himaya sa Unang Natawo?
Unsa ang gipasabut nga gipanamkon pinaagi kang Jesukristo? (Magpakatawo pag-usab sa espirituhanong paagi ug malimpyohan sa tanang sala pinaagi sa gahum sa Pag-ula.)
Timan-i sa bersikulo 21 nga si Jesukristo miingon nga Siya “diha na sa sinugdanan uban sa Amahan.” Sumala sa bersikulo 23, kinsa pa ang diha sa sinugdanan uban sa Amahan? (Ang pulong nga kamo niini nga bersikulo nagpasabut sa tanang espirituhanong anak sa Langitnong Amahan. Mahimo nimong isugyot nga pulihan sa mga estudyante sa ilang kaugalingong ngalan ang pulong nga kamo diha sa bersikulo 23 ug isulat kini diha sa margin sa ilang mga kasulatan.)

Ipasabut nga samtang nagpuyo kita uban sa Langitnong Amahan ug ni Jesukristo sa premortal nga kinabuhi, gitudloan kita sa Amahan ug sa Anak ug adunay oportunidad sa pagdawat o pagsalikway sa kamatuoran. Dapita ang usa ka estudyante sa pagbasa og kusog sa Doktrina ug mga Pakigsaad 93:24–26. Hangyoa ang klase sa pagsunod, nga mangita sa unsay gitudlo sa Manluluwas bahin sa kamatuoran niini nga mga bersikulo.

Unsay inyong nakat-unan gikan sa pagpatin-aw sa Ginoo sa kamatuoran diha sa bersikulo 24?
Kinsa ang gihulagway diha sa bersikulo 25 (Si Satanas.)
Sa unsang paagi nagtinguha si Satanas sa pag-impluwensya sa atong kahibalo sa kamatuoran? (Ang mga pulong nga “bisan unsa ang mokapin o mokulang pa niini” nagpasabut nga si Satanas nagtinguha sa pagtuis ug pagpaminos sa atong kahibalo sa kamatuoran.)
Unsay atong nakat-unan gikan sa bersikulo 26 mahitungod ni Jesukristo?

Dapita ang mga estudyante nga hilum nga mobasa sa Doktrina ug mga Pakigsaad 93:36–37 ug motino og dugang nga mga kamatuoran nga gipadayag sa Ginoo mahitungod sa kahayag ug kamatuoran.

Unsa ang gipadayag sa Ginoo mahitungod sa kahayag ug kamatuoran niini nga mga bersikulo? (Tabangi ang mga estudyante nga makasabut nga ang kahayag ug kamatuoran, nga gitawag usab og salabutan, maoy mga hiyas ni Jesukristo ug sa Langitnong Amahan.)
Sa unsang paagi kita mahatagan og kaayohan pinaagi sa pagdawat sa kahayag ug kamatuoran? (Ang mga estudyante mahimong mohatag og lain-laing mga tubag. Samtang motubag sila, tabangi sila nga mahibalo sa mosunod nga baruganan: Pinaagi sa pagdawat sa kahayag ug kamatuoran, mahimo kitang sama ni Jesukristo ug sa Langitnong Amahan.)

Kopyaha ang nag-uban nga diagram diha sa pisara, apan ayaw ilakip ang mga pamahayag diha sa duha ka kahon. Ang mga estudyante makadiskubre niini nga mga baruganan samtang magpadayon ang leksyon. Mahimo nimong dapiton ang mga estudyante sa pagkopya sa diagram diha sa ilang mga class notebook o scripture study journal.

Dapita ang usa ka estudyante sa pagbasa og kusog sa Doktrina ug mga Pakigsaad 93:26–28. Hangyoa ang klase sa pagsunod ug sa pagpangita kon unsay kinahanglan gayud natong buhaton aron makadawat sa kamatuoran ug kahayag.

Unsay kinahanglan gayud natong buhaton aron makadawat sa kamatuoran ug kahayag? (Ang mga estudyante kinahanglang mahibalo sa mosunod nga baruganan: Makadawat kita sa kamatuoran ug kahayag samtang mosunod kita sa mga sugo. Isulat kini nga baruganan diha sa kahon sa tuo nga bahin sa diagram diha sa pisara.)
Sa unsang paagi ang pagsunod sa mga sugo makatabang kanato nga makadawat sa kamatuoran ug kahayag?
Kanus-a kamo mibati nga nakadawat kamo sa kamatuoran ug kahayag pinaagi sa pagsunod sa mga sugo?

Ipasabut nga sa dihang nagpuyo kita uban sa Dios sa wala pa kita matawo, aduna kitay kabubut-on—ang abilidad sa pagpili ug paglihok alang sa atong kaugalingon. Dapita ang usa ka estudyante sa pagbasa og kusog sa Doktrina ug mga Pakigsaad 93:29–32. Hangyoa ang klase sa pagsunod, nga mangita kon sa unsang paagi ang atong paggamit sa kabubut-on makaapekto sa atong abilidad sa pagdawat sa kahayag ug kamatuoran. Dayon hangyoa ang mga estudyante nga mo-report sa unsay ilang nakat-unan.

Sumala sa mga bersikulo 31–32, unsa man ang sangputanan kon pilion nato nga dili modawat sa kahayag? (Atong gibutang ang atong mga kaugalingon ubos sa panghimaraut. Nagpasabut kini nga atong gipugngan ang atong espirituhanong pag-uswag pinaagi sa pagbalibad sa pagdawat sa kahayag nga giandam alang kanato.)

Dapita ang mga estudyante sa pagpamalandong sa mosunod nga mga pangutana:

Mawala ba nato ang kahayag ug kamatuoran nga nadawat na nato? (Aron matabangan ang mga estudyante nga matubag kini nga pangutana, dapita sila sa pagsiksik sa Doktrina ug mga Pakigsaad 93:39. Mahimo usab nimo silang dapiton sa pagsiksik sa Alma 12:10–11.)
Unsay hinungdan nga mawala kanato ang kahayag ug kamatuoran? (Ang mga estudyante kinahanglang mahibalo sa mosunod nga baruganan: Ang pagkamasinupakon ug sayop nga mga tradisyon maoy hinungdan nga mawala kanato ang kahayag ug kamatuoran. Isulat kini nga baruganan diha sa kahon sa wala nga bahin sa diagram diha sa pisara.)
Unsa ang pipila ka mga ehemplo sa mga tradisyon, o mga kalihokan nga kasagarang gihimo sa daghang mga tawo, nga makahimo kanato nga mawad-an sa kahayag ug kamatuoran gikan sa atong Langitnong Amahan?

Ang mosunod nga kalihokan makatabang sa paghulagway kon sa unsang paagi ang atong personal nga mga pagpili sa pagsunod o pagsupak sa mga sugo sa Dios makaapekto sa atong abilidad nga makadawat sa kahayag ug kamatuoran o mawad-an niini. Ipakita ang mosunod nga impormasyon diha sa pisara, o kopyaha kini sa usa ka handout alang sa matag estudyante. Dapita ang usa ka estudyante sa pagbasa og kusog sa unang paragraph. Hangyoa ang klase sa pagpasabut kon sa unsang paagi ug nganong ang mga pagpili ni Maria makaapekto sa iyang abilidad sa pagdawat sa kahayag ug kamatuoran. Human maka-report ang mga estudyante sa unsay ilang nakit-an, balika kini nga proseso sa mga paragraph 2–4.

Si Maria nag-ampo matag buntag ug gabii. Mibati siya og kalipay sa pagserbisyo, pagtuman sa iyang mga pakigsaad, ug pagsiksik sa mga kasulatan kada adlaw. Kanunay siyang motabang sa pagpundok sa iyang pamilya alang sa pagtuon sa kasulatan ug pag-ampo. Maghinam-hinam siya nga moambit sa sakrament matag semana sa simbahan.
Si Maria kasagaran mag-ampo ug magtuon sa kasulatan apan dili kada adlaw. Hapit kanunay siyang mosimba ug kasagarang maminaw niadtong mamulong ug motudlo. Motambong siya sa mga kalihokan sa Young Women kon makahibalo siya nga anaa ang iyang mga higala.
Mag-ampo si Maria kon wala siya gikapoy o wala magdali. Magpanuko siya sa pagtabang diha sa balay ug mobasa lamang sa mga kasulatan uban sa pamilya kon makahigayon. Kasagaran dili siya motambong sa mga kalihokan sa simbahan ug sa Young Women. Usahay dili siya mosunod sa Pulong sa Kaalam.
Si Maria dili gayud mag-ampo, mobasa sa mga kasulatan, o motambong og mga miting sa Simbahan. Ang bishop mihangyo nga makigkita niya, apan si Maria dili makigsulti kaniya. Kanunay niyang dili sundon ang Pulong sa Kaalam. Kanunay siyang makiglalis sa mga sakop sa pamilya. Gibati niya nga layo sa Langitnong Amahan.

Base niini nga mga ehemplo, unsaon ninyo pag-summarize ang ka-importante sa inadlaw natong mga desisyon ug ang mga epekto niini diha sa kahayag ug kamatuoran nga atong madawat?

Doktrina ug mga Pakigsaad 93:40–53

Ang Ginoo mitambag sa Iyang mga sulugoon nga ipahimutang sa kahusay ang ilang mga panimalay

Dapita ang mga estudyante sa paghisgot sa mosunod nga pangutana nga may ka partner:

Sa unsang paagi ang inyong mga inter-aksyon sa inyong mga ginikanan o ubang mga sakop sa pamilya makatabang kaninyo nga molambo diha sa kahayag ug kamatuoran?

Human mahisguti sa mga estudyante ang pangutana, dapita ang pipila kanila sa pagpaambit sa ilang mga tubag diha sa klase. Dapita ang usa ka estudyante sa pagbasa og kusog sa Doktrina ug mga Pakigsaad 93:40. Hangyoa ang klase sa pagsunod, nga mangita sa responsibilidad nga gihatag sa Dios ngadto sa mga ginikanan.

Unsa nga responsibilidad ang gihatag sa Dios ngadto sa mga ginikanan?
Unsaon man sa mga ginikanan sa pagpadako sa ilang mga anak diha “sa kahayag ug kamatuoran”?

I-summarize ang Doktrina ug mga Pakigsaad 93:41–48 pinaagi sa pagpasabut nga ang Ginoo misugo ni Frederick G. Williams, Sidney Rigdon, ug Joseph Smith Jr. nga maninguha og mas maayo sa pagtudlo sa ilang mga anak sa kahayag ug kamatuoran ug sa pagpahimutang og kahusay diha sa ilang mga pamilya. Dapita ang usa ka estudyante sa pagbasa og kusog sa Doktrina ug mga Pakigsaad 93:49–50. Hangyoa ang klase sa pagsunod, nga mangita sa usa ka pasidaan nga magamit ngadto sa atong mga pamilya.

Unsa nga pasidaan ang gihatag sa Ginoo dinhi niini nga mga bersikulo? (Tabangi ang mga estudyante nga mahibalo sa mosunod nga baruganan: Kinahanglan kitang mag-ampo kanunay ug magmakugihon ug mabuhaton diha sa panimalay, o ang usa nga dautan makabaton og gahum diha kanato.)
Unsa kaha ang gipasabut nga mahimong “makugihon ug mabuhaton diha sa panimalay”?

Ipasabut nga bisan tuod kini nga pahimangno gihatag ngadto sa mga amahan, magamit usab kini ngadto sa ilang mga pamilya. Dapita ang mga estudyante sa pagsugyot og mga paagi nga ang kabatan-onan mahimong makugihon ug mabuhaton diha sa panimalay. Dapita ang usa ka estudyante sa pagsulat sa mga tubag gikan sa klase diha sa pisara.

Tapusa kini nga leksyon pinaagi sa pagpamatuod sa mga doktrina ug mga baruganan nga nakat-unan sa mga estudyante niini nga leksyon. Isulat ang mosunod nga mga pangutana diha sa pisara, ug dapita ang mga estuyante sa pagtubag og usa niini diha sa ilang mga class notebook o mga scripture study journal:

Pag-ila og usa ka sugo nga mas matinud-anon ninyong masunod aron nga kamo molambo diha sa kahayag ug kamatuoran. Unsay inyong buhaton aron mahimong mas matinud-anon sa pagsunod niana nga sugo?
Unsaon ninyo nga mahimong mas makugihon ug mabuhaton diha sa panimalay? Pagsulat og usa ka tumong nga nagsulti og usa ka paagi nga magtinguha kamo nga molambo sa sunod semana.

Komentaryo ug Background nga Impormasyon

Doktrina ug mga Pakigsaad 93:40–50. Pagpadako sa mga anak diha sa kahayag ug kamatuoran

Ang Unang Kapangulohan mihatag sa mosunod nga tambag:

“Nanawagan kami sa mga ginikanan sa paggahin sa ilang pinakamaayong paningkamot sa pagtudlo ug pagmatuto sa ilang mga anak diha sa mga baruganan sa ebanghelyo nga maoy magpabilin kanila nga maduol sa Simbahan. Ang panimalay mao ang basihan sa usa ka matarung nga kinabuhi, ug walay laing himan ang makahulip sa dapit niini o makatuman sa importanting mga gamit niini sa pagpadayon niining hinatag sa Dios nga responsibilidad.

“Motambag kami sa mga ginikanan ug mga anak sa paghatag og pinakataas nga prayoridad sa pag-ampo sa pamilya, family home evening, pagtuon ug panudlo sa ebanghelyo, ug maayo nga mga kalingawan sa pamilya. Bisan unsa ka takus ug angay ang ubang mga buluhaton o mga kalihokan, kini kinahanglang dili tugutan sa pagkuha sa balaang hinatag nga responsibilidad nga ang mga ginikanan ug mga pamilya lamang ang igong makabuhat” (Sulat sa Unang Kapangulohan, Peb. 11, 1999, gikutlo diha sa Handbook 2: Administering the Church [2010], 1.4.1).