Leksyon 1

Ang Plano sa Kaluwasan

Pasiuna

Si Presidente Boyd K. Packer, sa Korum sa Napulog Duha ka mga Apostoles, misugo sa mga seminary teacher sa pagpresentar og mubo nga overview sa plano sa kaluwasan sa sinugdanan sa matag tuig nga ting-eskwela:

“Usa ka mubo nga overview sa ‘plano sa kalipay’ … , kon ihatag kini sa pagsugod gyud ug panagsang balikan, mahimong dako kaayo og bili ngadto sa imong mga estudyante. …

“Ang mga batan-on matingala ‘ngano?’—Ngano nga kita gisugo sa pagbuhat sa pipila ka mga butang, ug ngano nga kita gisugo sa dili pagbuhat sa ubang mga butang? Ang kahibalo sa plano sa kalipay, bisan sa outline nga porma, makahatag sa batan-ong mga hunahuna og ‘ngano’” (“The Great Plan of Happiness” [pakigpulong ngadto sa mga CES religious educator, Ago. 10, 1993], LDS.org).

Kini nga leksyon naghatag og usa ka mubo nga overview sa plano sa kaluwasan. Nagtutok kini sa Pag-ula ni Jesukristo, nga mao ang “punoan nga kamatuoran, ang labing mahinungdanon nga pundasyon, ug ang labaw sa tanan nga doktrina sa mahinungdanon ug mahangturon nga plano sa kaluwasan” (Jeffrey R. Holland, “Missionary Work and the Atonement,” Liahona, Okt. 2001, paragraph 4).

Mga Sugyot alang sa Pagtudlo

Itudlo ang mahitungod sa plano sa kaluwasan sa tibuok tuig

Sa tibuok tuig, mahimo nimong ipakita matag karon og unya ang diagram sa plano sa kaluwasan nga lakip niini nga leksyon. Tabangi ang mga estudyante sa pag-ila sa mga dapit diin ang mga pagpadayag diha sa Doktrina ug mga Pakigsaad nagdugang sa atong pagsabut sa plano sa kaluwasan. Dayon hangyoa ang mga estudyante sa pagpasabut kon sa unsa nga paagi ang mga pagtulun-an gikan niadtong mga pagpadayag mihaum ngadto sa diagram.

Ang plano sa kalipay sa Langitnong Amahan

Dapita ang usa ka estudyante sa pagbasa og kusog sa Moises 1:39. (O mahimong mo-recite ang estudyante kon siya nakamemorya niini.) Hangyoa ang mga estudyante sa pagsunod, mangita sa unsay gipahayag sa Langitnong Amahan nga katuyoan sa Iyang buhat. Isulat ang mosunod nga pamahayag diha sa pisara: Ang katuyoan sa plano sa Langitnong Amahan mao ang paghatag og paagi alang kanato sa pagdawat og imortalidad ug kinabuhing dayon.

• Unsa ang kalainan tali sa imortalidad ug kinabuhing dayon? (Ang imortalidad mao ang pagpuyo sa kahangturan diha sa nabanhaw nga kahimtang; pinaagi sa Pag-ula ni Jesukristo, ang tanan makadawat niini nga gasa. Ang kinabuhing dayon, o kahimayaan, mao ang pagpuyo diha sa presensya sa Dios sa kahangturan uban sa atong mga pamilya; kini nga gasa maangkon usab pinaagi sa Pag-ula ni Jesukristo, apan alang lamang niadtong kinsa nagsunod sa mga balaod ug mga ordinansa sa ebanghelyo.)

Aron matabangan ang mga estudyante nga makasabut sa pulong “kinabuhing dayon,” dapita ang usa ka estudyante sa pagbasa sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles:

Ang kinabuhi sa Dios mao ang kinabuhing dayon; ang kinabuhing dayon mao ang kinabuhi sa Dios —ang mga panultihon sama og kahulugan” (Mormon Doctrine, 2nd ed. [1966], 237).

• Unsa ang pipila ka mga panalangin nga gihatag ngadto niadtong kinsa nakadawat og kinabuhing dayon?

I-drowing ang kauban nga diagram diha sa pisara. Dapita ang mga estudyante sa pagkopya sa diagram o sa paghimo og mga note diha sa ilang mga class notebook o mga scripture study journal samtang nagkat-on sila mahitungod sa plano sa kaluwasan dinhi niini nga leksyon.

Mga scripture study journal

Ang scripture study journal mahimong usa ka bound journal, notebook, o mga pahina sa usa ka binder. Mahimo usab ang notes ug journal tool diha sa LDS.org o usa ka note-taking app diha sa smartphone o tablet device. Diha sa mga scripture study journal, ang mga estudyante mahimong mosulat og mga note ug mo-rekord og mga panghunahuna atol sa mga leksyon sa seminary, atol sa ilang personal nga pagtuon, ug atol sa mga miting sa Simbahan. Samtang sila nagrekord ug naghan-ay sa ilang mga hunahuna ug mga impresyon, sila mouswag sa ilang pagsabut sa ebanghelyo, makadawat og personal nga pagpadayag, ug mas maandam sa pag-apil sa klase.

Ipasabut nga sa atong kinabuhi nga wala pa dinhi sa yuta, mipuyo kita isip mga espiritu didto sa presensya sa atong Langitnong Amahan. Didto nakat-unan nato ang mahitungod sa plano sa atong Langitnong Amahan alang sa atong kalipay ug sa unsa nga paagi kana nga plano motabang kanato sa pagtuman sa Iyang mga katuyoan alang kanato (tan-awa sa D&P 138:55–56; Abraham 3:22–28).

• Sa unsa nga paagi kita lahi sa atong Langitnong Amahan didto sa kinabuhi nga wala pa dinhi sa yuta? (Siya adunay perpekto nga lawas ug kinaiya. Kita wala.)

• Sa kinabuhi nga wala pa dinhi sa yuta, unsa ang gipresentar sa Langitnong Amahan ngari kanato aron sa pagtabang kanato sa pagdawat og imortalidad ug kinabuhing dayon? (Ang plano sa kaluwasan.)

Ipasabut nga atong gigamit ang pulong mortalidad sa pagpasabut sa atong kinabuhi dinhi sa yuta. Ingon sa gipakita diha sa kauban nga diagram, idugang diha sa pisara ang oval nga nagrepresentar og kinabuhi sa yuta, ug butangi kini og pulong Mortalidad. Pagdrowing og arrow gikan sa Kinabuhi nga wala pa dinhi sa yuta ngadto sa Mortalidad.

Hatagi ang mga estudyante og panahon nga makapamalandong sa mosunod nga pangutana:

• Nganong gikinahanglan nga kita mobiya sa presensya sa Dios aron mas mahimong sama Kaniya? (Ang mga tubag sa mga etudyante mahimong mag-apil sa mosunod: aron makabaton og lawas; aron makakat-on ug molambo pinaagi sa paggamit sa atong kabubut-on.)

Human makatubag ang mga estuyante, dapita ang usa ka estudyante sa pagbasa og kusog sa mosunod nga pagpasabut ni Presidente Spencer W. Kimball:

“Ang Dios naghatag kanato og usa ka plano. Kitang tanan Iyang gipadala nganhi sa yuta aron sa pagbaton og lawas ug sa pag-angkon og kasinatian ug paglambo”.(The Teachings of Spencer W. Kimball, ed. Edward L. Kimball [1982], 25).

• Sumala ni Presidente Kimball, unsa ang pipila ka mga rason nga kita gipadala sa Dios nganhi sa yuta? (Samtang ang mga estudyante nagtubag, kinahanglan ilang ilhon ang mosunod nga kamatuoran: Gipadala kita sa Dios nganhi sa yuta aron sa pagbaton og lawas ug sa pag-angkon og kasinatian ug paglambo.)

• Unsa ang tahas sa mga hagit sa tintasyon, sakit, kaguol, kasakitan, kawala sa kadasig, kakulangan, ug ubang mortal nga mga kalisud diha sa atong mga paningkamot sa pagdawat og kinabuhing dayon?

Dapita ang usa ka estudyante sa pagbasa og kusog sa Doktrina ug mga Pakigsaad 20:19–20. Hangyoa ang klase sa pagsunod ug sa pag-ila sa mga babag nga makapugong kanato sa pagdawat og kinabuhing dayon.

• Unsa ang pipila ka mga babag nga atong giatubang sa mortalidad nga makapugong kanato sa pagdawat og kinabuhing dayon? (Samtang ang mga estudyante nagtubag, tabangi sila sa pag-ila sa mosunod nga kamatuoran: Ang sala nagpugong kanato nga mahisama sa Langitnong Amahan ug sa pagbalik og puyo uban Kaniya. Tan-awa usab ang Moises 6:57, nga nagtudlo nga pinaagi sa paghinulsol, makabalik kita sa pagpuyo uban sa Dios.)

Diha sa pisara, isulat ang Sala diha sa diagram duol sa pulong Mortalidad. Dapita ang usa ka estudyante sa pagbasa og kusog sa 1 Nephi 10:21, ang lain sa pagbasa sa Moises 6:57, ug ang lain sa pagbasa sa Alma 41:10–11. Hangyoa ang klase sa pagsunod, nga mangita sa mga rason kon ngano ang sala nagpugong kanato nga mahisama sa Langitnong Amahan ug sa pagdawat og kinabuhing dayon.

• Sumala niini nga mga bersikulo, ngano nga ang sala nagpugong kanato nga mahisama sa Langitnong Amahan ug sa pagdawat og kinabuhing dayon? (Ang mga estudyante mahimong mohatag og lain-laing mga tubag. Tabangi sila sa pag-ila sa mosunod nga kamatuoran: Walay hugaw nga butang ang makapuyo sa presensya sa Dios.)

Pagdapit og duha ka estudyante sa pag-adto sa atubangan sa klase. Hangyoa ang usa sa paggunit sa hulagway ni Jesus nga Nag-ampo sa Getsemani (Libro sa mga Hulagway sa Ebanghelyo [2009], nu. 56; tan-awa usab sa LDS.org) ug ang lain sa paggunit sa hulagway sa Paglansang didto sa Krus (nu. 57). Dapita ang ikatulo nga estudyante sa pagbasa og kusog sa Doktrina ug mga Pakigsaad 76:40–42. Hangyoa ang klase sa pagsunod ug sa pag-ila kon unsa ang gihatag sa Langitnong Amahan aron kita makabuntog sa sala.

• Sumala sa Doktrina ug mga Pakigsaad 76:40–42, unsay nakahimong posible alang kanato nga mabuntog ang sala? (Mahimong motubag ang mga estudyante og lahi nga mga pulong, apan siguroha nga ilang mailhan ang mosunod nga kamatuoran: Si Jesukristo nag-antus ug gilansang sa krus tungod sa mga sala sa tanang katawhan.)

Dapita ang mga estudyante nga naggunit sa mga hulagway sa pagpasabut kon unsa ang kalabutan sa mga panghitabo nga gipakita sa ilang mga hulagway ngadto sa atong abilidad sa pagbuntog sa mga epekto sa sala. Ipakita ang mga hulagway diha sa pisara ingon nga gipakita diha sa kauban nga diagram.

Isulat ang mosunod nga mga scripture reference diha sa pisara: D&P 18:22–23; D&P 25:13, 15. Ipares-pares ang mga estudyante sa pagtrabaho. Hangyoa ang usa ka pares sa pagbasa sa Doktrina ug mga Pakigsaad 128:22–23, ug hangyoa ang lain nga pares sa pagbasa sa Doktrina ug mga Pakigsaad 25:13, 15. Hangyoa silang duha sa pagpangita kon unsa gayud ang kinahanglan natong buhaton aron makagamit sa makalimpyo nga gahum sa Pag-ula ug makadawat sa kinabuhing dayon. Dapita sila sa pagpakigbahin sa ilang mga pares kon unsay ilang nakit-an.

• Unsa ang kinahanglan gayud natong buhaton kon moduol ngadto ni Jesukristo ug modawat sa mga panalangin sa Iyang maulaong sakripisyo? (Ang mga tubag mahimong maglakip og pagpakita og hugot nga pagtuo diha ni Jesukristo, paghinulsol, pagpabunyag, pagdawat sa Espiritu Santo, paglahutay diha sa hugot nga pagtuo, pagtuman sa mga pakigsaad, ug pagsunod sa mga sugo. Sama sa gipakita sa sunod nga diagram, pagdrowing og arrow gikan sa wala ngadto sa tuo atbang sa ubos nga oval. Isulat sa pisara ang tubag sa mga estudyante subay sa arrow.)

I-summarize ang mga tubag sa mga estudyante pinaagi sa pagpamatuod nga kon kita masulundon sa mga baruganan ug mga ordinansa sa ebanghelyo, makabuntog kita sa sala pinaagi sa Pag-ula ni Jesukristo. Ipasabut nga kon kita naghimo ug nagsunod sa pakigsaad sa bunyag, kita sa kalooy pasayloon sa atong mga sala kon kita maghinulsol. Agi og dugang, pinaagi sa gasa sa Espiritu Santo, kita adunay inadlaw nga kaduolan aron matabangan subay sa dalan paingon sa kinabuhing dayon.

• Sa unsa nga paagi ang Dios mitabang kaninyo pinaagi sa Espiritu Santo diha sa inyong inadlaw nga mga paningkamot sa pagsunod sa ebanghelyo?

Ipasabut nga agi og dugang sa sala, adunay ikaduhang babag nga kinahanglan gayud nga buntugon aron kita makadawat og kinabuhing dayon. Pangutan-a ang mga estudyante kon sila makaila ba niini nga babag.

Human tubaga sa mga estudyante, isulat ang Pisikal nga Kamatayon diha sa diagram tupad sa pulong nga Sala. Dapita ang usa ka estudyante sa pagpasabut kon unsa ang mahitabo sa atong mga espiritu ug mga lawas human kita mamatay. Dapita ang usa ka estudyante sa pagbasa og kusog sa Doktrina ug mga Pakigsaad 93:33–34 ug laing estudyante sa pagbasa og kusog sa Doktrina ug mga Pakigsaad 130:22. Hangyoa ang klase sa pagsunod ug sa pagpangita og tubag sa mosunod nga pangutana:

• Sa unsa nga paagi nga ang permanente nga pagkabulag sa atong mga espiritu ug mga lawas mahimong babag nga mahisama sa Dios? (Ang mga estudyante kinahanglan nga makaila sa mosunod nga doktrina: Dili kita mahisama sa Langitnong Amahan nga walay unod ug mga bukog.)

Ipakita sa klase ang hulagway ni Maria ug ang Nabanhaw nga si Jesukristo (Libro sa mga Hulagway sa Ebanghelyo, nu. 59; tan-awa usab sa LDS.org), ug hangyoa ang usa ka estudyante sa pagpasabut kon unsa ang nahitabo diha sa hulagway. Dayon dapita ang usa ka estudyante sa pagbasa og kusog sa Alma 11:42–44. Hangyoa ang klase sa pagsunod ug sa pag-ila kon unsa ang gihimo ni Jesukristo aron kita makabuntog sa babag sa pisikal nga kamatayon.

• Sumala niini nga mga bersikulo, unsa ang nabuhat ni Jesukristo sa pagsiguro nga kita makabuntog sa pisikal nga kamatayon? (Tabangi ang mga estudyante sa pag-ila sa mosunod nga doktrina: Tungod sa Pagkabanhaw ni Jesukristo, ang tanang katawhan mabanhaw ug mabuhi sa kahangturan.)

Dapita ang pipila ka mga estudyante sa pagpuli-pulig basa og kusog sa Doktrina ug mga Pakigsaad 138:14–17.

• Sa unsa nga paagi nga ang “paglaum sa usa ka mahimayaong pagkabanhaw” magdala og hingpit nga kalipay nganha kaninyo ug sa inyong pamilya?

Pahinumdumi ang mga estudyante nga ang imortalidad usa ka gasa nga madawat sa tanang katawhan. Ang kinabuhing dayon, hinoon, mao ang gasa sa Ginoo ngadto lamang kinsa nagsunod sa mga balaod ug mga ordinansa sa Iyang ebanghelyo. Ibutang ang hulagway ni Maria ug ang Nabanhaw nga si Jesukristo diha sa pisara tupad sa ubang mga hulagway. Isulat Ang Pag-ula ni Jesukristo ibabaw sa tulo ka mga hulagway.

Pagdrowing og lain nga lingin ibabaw sa initlog og dagway ug butangi kini og ngalan Kinabuhing Dayon. Pagdrowing og pinatindog nga arrow gikan sa tumoy sa arrow diha sa ubos sa diagram ngadto sa mga pulong Kinabuhing Dayon.

Hangyoa ang mga estudyante sa pag-summarize kon unsay ilang nakat-unan mahitungod sa plano sa Langitnong Amahan alang sa atong kalipay. Dapita sila sa pagpangita og oportunidad sa pagtudlo sa plano sa kalipay ngadto sa usa ka miyembro sa pamilya o higala.

Sa pagtapos niini nga leksyon, ipasabut ngadto sa mga estudyante nga sa ilang pagtuon sa Doktrina ug mga Pakigsaad, makat-unan nila ang daghan pang mga kamatuoran kalabut ngadto sa plano sa kalipay. Kini nga leksyon naghatag lamang og mubo nga overview. Ipaambit ang imong pagpamatuod bahin sa mga kamatuoran nga gihisgutan niini nga leksyon.

Komentaryo ug Background nga Impormasyon

Ang Pag-ula mao ang kinauyokan sa plano sa kaluwasan

Si Elder Dallin H. Oaks sa Korum sa Napulog Duha ka mga Apostoles mipamatuod:

“Ang maulaong sakripisyo ni Jesukristo gitawag og ang ‘pinakalabaw sa tanang mga hitabo gikan sa sinugdanan sa paglalang ngadto sa walay katapusang panahon sa kahangturan.’ [Bruce R. McConkie, The Promised Messiah: The First Coming of Christ (1981), 218.] …

“Kana nga sakripisyo—ang Pag-ula ni Jesukristo—anaa sa sentro sa plano sa kaluwasan” (“Sakripisyo,” Liahona, Mayo 2012, 19).

Ang mga leksyon sa mortalidad

Si Elder Joseph B. Wirthlin sa Korum sa Napulog Duha Ka mga Apostoles mitudlo nga ang mga hagit sa mortalidad makahashas kanato:

“Ang pagkakat-on sa paglahutay sa mga panahon sa pagkawalay kadasig, pag-antus, ug kasubo kabahin sa atong aktwal nga pagbansay sa kinabuhi. Kini nga mga kasinatian, samtang kanunay lisud nga antuson niana nga panahon, mao ang tukma nga mga matang sa mga kasinatian nga molugway sa atong panabut, molig-on sa atong kinaiya, ug modugang sa atong kalooy alang sa uban” (“Bisan Unsa ang Mahitabo, ug Dawata Kini,” Liahona, Nob. 2008, 27).

Ang Basahon ni Mormon nagtudlo nga usa sa mga katuyoan sa mortalidad mao ang pagsinati og hingpit nga kalipay: “Si Adan napukan aron ang mga tawo mahimo, nga unta sila makabaton og hingpit nga kalipay” (2 Nephi 2:25).

Naghulat ang Langitnong Amahan sa atong pagbalik

Mipamatuod si Presidente Thomas S. Monson kabahin sa tinguha sa Dios alang sa tanan Niyang mga anak nga mobalik ngadto sa Iyang presensya:

“Ang celestial nga himaya mao ang atong gipangita. Kita nagtinguha sa pagpuyo diha sa presensya sa Dios. Gusto kitang mahimong miyembro sa mahangturong pamilya. Ang mao nga mga panalangin maangkon pinaagi sa tibuok nga kinabuhing paninguha, paningkamot, paghinulsol, ug sa katapusan naglampos. …

“Ang atong Langitnong Amahan nagmaya alang niadtong kinsa nagsunod sa Iyang mga sugo. Nabalaka usab Siya alang sa nawala nga bata, sa langayan nga tin-edyer, sa badlungon nga batan-on, sa masalaypon nga ginikanan. Malumo nga namulong ang Manluluwas niini, ug ngadto sa tanan: ‘Balik. Saka. Dali sulod. Pauli na. Duol ngari kanako.’

“… Isip Iyang linain nga saksi, ako mopamatuod nganha kaninyo nga Siya buhi ug nagpaabut sa atong madaugong pagbalik” (“Ang Lumba sa Kinabuhi,” Liahona, Mayo 2012, 93).

“Mahimo nga unsay gitinguha sa atong Langitnong Amahan nga kita mamahimo”

Si Elder Dallin H. Oaks mitudlo:

“Ang Katapusang Paghukom dili lamang usa ka pagtimbang-timbang sa gidaghanon sa maayo ug sa dautan nga mga buhat—nga atong nahimo. Kini maoy usa ka pagdawat sa katapusang sangputanan sa atong mga buhat ug mga hunahuna—unsa ang atong gidangatan. Dili igo alang ni bisan kinsa nga mobuhat lamang nga dili maghunahuna. Ang mga sugo, mga ordinansa, ug mga pakigsaad sa ebanghelyo dili listahan sa mga nahimo nga gikinahanglan aron adunay mapundo didto sa langit. Ang ebanghelyo ni Jesukristo usa ka plano nga nagpakita kanato kon unsaon nga mahimo sa unsay gitinguha sa atong Langitnong Amahan nga kita mamahimo.”(“The Challenge to Become,” Ensign, Nob. 2000, 32).

Unsa ang kalainan tali sa imortalidad ug kinabuhing dayon?

Si Elder Joseph B. Wirthlin mitudlo:

“Ang kinabuhing dayon … maoy usa ka butang nga sa hingpit lahi [kay sa imortalidad]. Ang imortalidad mahitungod sa gidaghanon. Ang kinabuhing dayon mahitungod sa kalidad. …

“Ang kinabuhing dayon mao ang kinatas-ang punto sa pagpakabuhi. Isip espirituhanong mga anak sa Dios, ikaw ug ako mga manununod niining bililhon kaayo nga bahandi, mga magtatabang ngadto sa usa ka mahimayaong kaugmaon, mga tigdawat og grasya.

“Kon ang imortalidad buhat sa Dios, nan ang kinabuhing dayon mao ang himaya sa Dios” (“What Is the Difference between Immortality and Eternal Life?” New Era, Nob. 2006, 8.)

Dugang nga Ideya sa Pagtudlo

Tabangi ang mga estudyante nga magkailhanay sa usag usa

Ang mosunod nga kalihokan motabang sa mga estudyante nga magkailhanay sa usag usa ug magsugod og hunahuna mahitungod sa plano sa kaluwasan. Hatagi ang matag estudyante og kopya sa mosunod nga tsart. Hatagi sila og lima ka minuto sa pagpakig-uban ug sa pagpangita og mga classmate kang kinsa ang mga pamahayag diha sa tsart mga tinuod. Kon ang mga estudyante makasulti nga ang usa ka pamahayag tinuod mahitungod sa ilang mga kaugalingon, kinahanglan silang mopirma niana nga kahon diha sa mga tsart sa ilang mga classmate. Sama pananglit, usa ka estudyante tingali mangutana sa usa ka classmate kon nabasa ba niya ang tibuok Doktrina ug mga Pakigsaad. Kon ang classmate moingon og oo, ang iyang ngalan mahimong isulat sa tukma nga kahon diha sa tsart.

Ako makapasabut sa katuyoan sa kinabuhi.	Ako nakahibalo sa unang mga baruganan ug mga ordinansa sa ebanghelyo.	Ako mialagad og usa ka tawo karong adlawa.	Akong nabasa ang tibuok Doktrina ug mga Pakigsaad.
Ako nahibalo ngano nga ang Langitnong Amahan naghatag kanato og mga sugo.	Ako nakaila sa ngalan sa tanang estudyante niini nga klase.	Ako nahibalo og usa ka kasulatan nga nagtudlo mahitungod sa Pag-ula ni Jesukristo.	Ako makapasabut unsay mahitabo human kita mamatay.
Ako nagtuo nga ako ang may kinadak-ang pamilya ni bisan kinsa sa klase.	Ako makapamatuod nga gihigugma ako sa Manluluwas.	Ako makapasabut unsay nagpugong kanato sa pagbalik og puyo uban sa Dios.	Ako adunay kasinatian sa dihang ang akong pagsunod sa usa ka sugo naghimo kanako nga mas malipayon.
Ako makapamatuod nga buhi ang Manluluwas.	Ako makapasabut unsay gibuhat ni Jesukristo aron sa pagluwas kanato.	Ako nagtuo nga ako mao ang kinamanghuran sa klase.	Ako nahibalo nganong gikinahanglan kitang moanhi sa yuta.

Human sa igong panahon, pangutan-a ang mga estudyante pila ka mga kwadrado ang napirmahan sa ilang mga papel. Aron sa pagribyu sa ilang mga tubag, ug aron sa pagtabang sa mga estudyante nga mas makaila, hunahunaa ang pagpangutana hain nga mga estudyante ang mipirma sa kwadrado nga “kinamanghuran sa klase,” o dapita ang usa ka tawo sa pagpakita nga sila “nakaila sa tanang estudyante” diha sa klase.

Hangyoa ang pipila ka mga estudyante sa pagbasa og kusog sa mga ngalan nga ilang nasulat diha sa kwadrado nga mabasa, “Ako makapasabut sa katuyoan sa kinabuhi.” Dapita ang usa o duha sa mga estudyante nga ilang ginganlan sa pagpasabut sa ilang pagsabut sa katuyoan sa kinabuhi. Kon ang mga estudyante maglisud sa pagtubag, mahimo nimong isugyot nga basahon sa mga estudyante ang Moises 1:39 ug pangitaon ang unsay gipahayag sa Dios nga katuyoan sa Iyang buhat. (Sa panahon niini nga kalihokan, ayaw pugsa ang mga estudyante sa pagtubag kon dili sila komportable nga mobuhat niini.)