Home-Study nga Leksyon

Ang Sentro nga Dapit sa Zion; Doktrina ug mga Pakigsaad 57–59 (Unit 13)

Materyal sa Pagpangandam alang sa Home-Study Teacher

Summary sa Daily Home-Study nga mga Leksyon

Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang gitun-an nila ang leksyon nga “Ang Sentro nga Dapit sa Zion” ug ang Doktrina ug mga Pakigsaad 57–59 (unit 13) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.

Day 1 (Ang Sentro nga Dapit sa Zion)

Niini nga leksyon nadawat sa mga estudyante ang kinatibuk-ang pagpasabut sa konsepto sa Zion. Ilang nadiskubrihan nga ang Zion nagpasabut sa usa ka yuta ug usa ka siyudad ug usa ka grupo sa katawhan kinsa putli og kasingkasing. Nakat-unan sa mga estudyante ang mahitungod sa nahimutangan sa siyudad sa Zion ug nga ang Zion kinahanglang matukod gayud diha sa mga baruganan sa pagkamatarung. Natun-an usab sa mga estudyante ang mahitungod sa mga panlimbasug nga nasinati sa mga Santos samtang sila misulay sa pag-establisar sa Zion didto sa Lalawigan sa Jackson, Misouri.

Day 2 (Doktrina ug mga Pakigsaad 57)

Isip kabahin niining leksyon, nakat-unan sa mga estudyante nga ang siyudad sa Zion mahimutang diha sa Independence, Lalawigan sa Jackson, Missouri, ug nga usa ka templo ang pagatukuron didto. Ang Ginoo naghatag og mga instruksyon sa mga indibidwal kinsa natawag sa pagtabang sa pag-establisar sa Zion. Samtang nagkat-on ang mga estudyante mahitungod niining mga indibidwal, ilang nadiskubrihan nga kinahanglan atong gamiton ang atong indibidwal nga kalig-on aron sa pagtabang sa pagtukod sa gingharian sa Ginoo samtang nanawagan Siya kanato sa pagbuhat sa ingon.

Day 3 (Doktrina ug mga Pakigsaad 58)

Pinaagi sa pagtuon sa tambag sa Ginoo nga nahatag ngadto sa mga elder kinsa nag-atubang sa bug-at nga buluhaton sa pagtukod sa Zion, nadiskubrihan sa mga estudyante ang mosunod nga mga baruganan: Mapanalanginan kita kon motuman kita sa mga sugo sa Ginoo, ang atong mahangturon nga ganti mas dako pa kon magpabilin kitang matinud-anon diha sa mga kalisdanan, ug kon mogamit kita sa atong kabubut-on sa pagbuhat sa mga butang aron sa pagpahinabo sa pagkamatarung, magantihan kita. Gipamalandungan usab sa mga estudyante ang saad sa Ginoo nga kon kita maghinulsol sa atong mga sala, mopasaylo Siya kanato ug dili na mohinumdom sa atong mga sala.

Day 4 (Doktrina ug mga Pakigsaad 59)

Pinaagi sa pagtuon sa mga instruksyon sa Ginoo ngadto sa mga Santos kinsa mibiyahe ngadto sa Missouri, nakat-unan sa mga estudyante nga kinahanglan gayud kita nga mohigugma sa Dios sa tibuok natong kasingkasing, gahum, hunahuna, ug kusog ug kon kita mobalaan sa adlawng Igpapahulay, makatabang kini kanato sa pagbatok sa tintasyon ug mabuntog ang sala. Nakat-unan usab nila nga makapasilo kita sa Dios kon kita dili mopadayag sa atong pagpasalamat ngadto Kaniya ug motuman sa Iyang mga sugo. Nahibaloan usab sa mga estudyante ang mga panalangin nga ilang madawat kon ilang tumanon ang mga sugo sa Ginoo.

Pasiuna

Kini nga leksyon makatabang sa mga estudyante nga mas makasabut sa mga baruganan sa paghinulsol. Samtang nagkat-on ang mga estudyante niining mga baruganan, mahimo nilang ikonsiderar unsay kinahanglan nilang buhaton sa paghinulsol ug sa unsang paagi nga ang saad sa Ginoo sa pagpasaylo makapanalangin sa ilang mga kinabuhi. Samtang ang pipila niining materyal gitumong ngadto sa inadlaw-adlaw nga mga leksyon, kini nga leksyon makahatag og oportunidad alang kanimo sa pagtabang sa mga estudyante nga mas makasabut sa mga baruganan sa paghinulsol ug unsaon sa paggamit niini diha sa ilang mga kinabuhi.

Mga Sugyot alang sa Pagtudlo

Doktrina ug mga Pakigsaad 58:34–43

Ang Ginoo naghatag og mga instruksyon kalabut sa Zion ug nagtudlo og mga baruganan sa paghinulsol

Sa dili pa magsugod ang klase, isulat ang mosunod nga mga pangutana diha sa pisara: Unsa ang gipasabut sa paghinulsol? Unsaon nako sa pagkahibalo kon hingpit ba ang akong paghinulsol? Sa pagsugod sa klase, ipangutana sa mga estudyante kon unsaon nila sa pagtubag ang mga pangutana.

Isulat ang mosunod nga mga pangalan diha sa pisara: Martin Harris, William W. Phelps, ug Ziba Peterson.

Dapita ang usa ka estudyante sa pagbasa og kusog sa Doktrina ug mga Pakigsaad 58:38–41, 60. Hangyoa ang klase sa pagsunod, nga mangita sa tambag nga gihatag sa Ginoo niadtong mga kalalakin-an samtang sila nangandam sa pagtukod sa Zion. Samtang motubag ang mga estudyante sa mosunod nga mga pangutana, isulat ang ilang mga tubag ubos sa tukma nga pangalan diha sa pisara.

• Unsa nga sala ang gisulti sa Ginoo nga si Martin sad-an? Unsa ang gisulti sa Ginoo nga iyang buhaton?

• Unsa nga mga sala ang gisulti sa Ginoo nga si William W. Phelps sad-an? Unsa ang gisulti sa Ginoo nga iyang buhaton? (Tingali kinahanglan nimong ipasabut nga ang mga pulong nga “nagtinguha og gahum” [bersikulo 41] wala magpasabut sa paghimo sa atong labing maayo o pagpaningkamot sa paglambo. Hinoon, kini nga mga pulong nagpasabut ngadto sa dili matarung, mapasigarbuhon nga tinguha aron mas maayong tan-awon o mas importante kay sa ubang mga tawo.)

• Unsa ang gipaningkamutan nga buhaton ni Ziba Peterson bahin sa iyang mga sala?

Ipasabut nga ang mga sala niining mga tawhana nakahulga sa pagpugong kanila sa pagtabang sa pagtukod sa Zion.

• Unsa ang pipila ka mga paagi nga malimitahan sa atong mga sala ang atong abilidad sa pagserbisyo sa Ginoo?

Dapita ang usa ka estudyante sa pagbasa og kusog sa Doktrina ug mga Pakigsaad 58:42. Hangyoa ang klase sa pagsunod, nga mangita sa unsay gitudlo sa Ginoo bahin sa paghinulsol.

• Sumala niining bersikulo, unsa ang gisaad sa Ginoo kanato kon kita maghinulsol sa atong mga sala? (Kinahanglang mahibaloan sa mga estudyante ang mosunod nga baruganan: Kon maghinulsol kita sa atong mga sala, ang Ginoo mopasaylo kanato ug dili na mohinumdom sa atong mga sala. Isulat kini nga baruganan diha sa pisara. Mahimo nimong isugyot sa mga estudyante nga markahan ang mga pulong nga nagtudlo niining baruganan sa bersikulo 42.)

• Hain sa atong mga sala nga magamit kini nga saad? (Ang tanan niini.)

Dapita ang usa ka estudyante sa pagbasa og kusog sa mosunod nga pamahayag ni Presidente Boyd K. Packer sa Korum sa Napulog Duha ka mga Apostoles. Hangyoa ang klase sa pagpaminaw sa mga pulong nga may kalabutan sa baruganan nga nasulat diha sa pisara.

“Bisan unsa man ang atong mga sayop, bisan unsa ka sakit ang nahimo nato sa uban, kana nga sala tanan mapapas. Alang nako, tingali ang labing matahum nga pulong diha sa tanang kasulatan mao ang giingon sa Ginoo, ‘Tan-awa, siya kinsa naghinulsol sa iyang mga sala, ang mao gipasaylo, ug Ako, ang Ginoo, dili na mahinumdom kanila.’ [ [D&P 58:42]

“Mao kana ang saad sa ebanghelyo ni Jesukristo ug sa Pag-ula” (“Ang Pag-ula,”Liahona, Nob. 2012, 77).

• Sa unsang paagi nga ang pagkahibalo nga kamo mapasaylo sa tanan ninyong mga sala nakapanalangin sa inyong kinabuhi?

Ipasabut nga ang pipila ka mga tawo nasayop sa paghunahuna nga kon sila makahinumdom pa gihapon sa ilang mga sala, sila dili hingpit nga nakahinulsol. Ipasalig kanila nga ang paghinumdom sa ilang mga sala makatabang kanila nga makalikay nga masubli ang mao gihapon nga mga sayop.

Dapita ang usa ka estudyante sa pagbasa og kusog sa mosunod nga pamahayag ni Presidente Harold°B. Lee. Hangyoa ang klase sa pagpaminaw sa unsay iyang gitudlo mahitungod sa kalinaw sa tanlag nga moabut pinaagi sa paghinulsol.

“Kon ang panahon moabut nga kamo nakabuhat na sa tanan nga inyong mahimo sa paghinulsol sa inyong mga sala, bisan kinsa kamo, bisan asa kamo, ug mihimo sa pagpahiuli kutob sa inyong mahimo; kon kini makaapekto sa inyong estado sa Simbahan ug kamo miduol sa tukma nga mga awtoridad, dayon gusto ninyo ang kumpirmasyon nga tubag kon ang Ginoo midawat ba kaninyo o wala. Sa inyong paghinuklog, kon kamo nagtinguha ug inyong nakaplagan kana nga kalinaw sa tanlag, pinaagi niana nga timaan kamo masayud nga ang Ginoo midawat sa inyong paghinulsol.” (Stand Ye in Holy Places [1974], 185).

Ipasabut nga ang saad nga nasulat diha sa pisara adunay kondisyon. Makadawat lamang kita sa kapasayloan sa Ginoo kon buhaton nato ang tanan kutob sa atong mahimo nga mahinulsulan sa hingpit ang atong mga sala.

Dapita ang usa ka estudyante sa pagbasa og kusog sa mosunod nga pamahayag gikan sa booklet nga Alang sa Kalig-on sa mga Kabatan-onan. Hangyoa ang klase sa pagpaminaw sa mga butang nga mahimo nilang makat-unan mahitungod kon unsay gipasabut sa paghinulsol.

“Ang paghinulsol sobra pa kay sa pag-ila lamang sa nahimong mga sayop. Usa kini ka kausaban sa hunahuna ug kasingkasing. Naglakip kini sa pagpalayo sa sala ug pagpaduol ngadto sa Dios alang sa kapasayloan. Nadasig kini sa gugma alang sa Dios ug sa kinasingkasing nga tinguha sa pagsunod sa Iyang mga sugo” (Alang sa Kalig-on sa mga Kabatan-onan [booklet, 2011], 28).

Dapita ang usa ka estudyante sa pagbasa og kusog sa Doktrina ug mga Pakigsaad 58:43. Hangyoa ang klase sa pagsunod, nga mangita sa duha ka butang nga kinahanglan gayud natong buhaton aron hingpit nga makahinulsol sa atong mga sala.

• Sumala niining bersikulo, unsa ang duha ka butang nga kinahanglan gayud natong buhaton aron hingpit nga makahinulsol sa atong mga sala? (Isulat ang mosunod nga doktrina diha sa pisara: Sa paghinulsol, kinahanglan gayud kita nga mokumpisal sa atong mga sala.

• Sa unsang paagi nga kining doktrina nakatabang kanato nga matubag ang pangutana nga “Unsaon nako sa pagkahibalo kon hingpit ba ang akong paghinulsol?” (Tabangi ang mga estudyante nga makasabut nga ang pagkumpisal ug pagsalikway sa mga sala mahinungdanon sa hingpit nga paghinulsol.)

• Unsay gipasabut sa pagkumpisal sa atong mga sala?

Aron matabangan ang mga estudyante nga mas makasabut kon unsay kahulugan sa pagkumpisal sa atong mga sala, dapita ang usa ka estudyante sa pagbasa og kusog sa mosunod nga pamahayag ni Elder D. Todd Christofferson sa Korum sa Napulog Duha ka mga Apostoles:

“Pagkumpisal ug pagbiya gamhanan nga mga konsepto. Labaw pa kini sa pag-ingon lang og ‘Giangkon ko kini; Pasayloa ko.’ Ang pagkumpisal usa ka lawom, usahay sakit nga pag-angkon sa sayop ug kalapasan ngadto sa Dios ug sa tawo” (“Ang Balaanong Gasa sa Paghinulsol,”Liahona, Nob. 2011, 40).

• Sa unsang paagi nga ang pagkumpisal sa atong mga sala makatabang kanato nga matalikdan ang mga sala ug mobalik ngadto sa Dios alang sa kapasayloan?

Isip kabahin niining hilisgutan, mahimong maghunahuna ang mga estudyante kon unsa ang mga sala nga kinahanglang ikumpisal ug ngadto kang kinsa. Ipasabut nga kita kinahanglang mokumpisal sa tanan natong mga sala ngadto sa Langitnong Amahan. Ang bug-at nga mga sala, sama sa sekswal nga kalapasan (lakip na sa paggamit sa pornograpiya), kinahanglang ikumpisal ngadto sa bishop o sa branch president.

I-refer usab ang mga estudyante ngadto sa katapusang doktrina nga imong gisulat sa pisara.

• Unsay gipasabut sa pagsalikway sa atong mga sala? (Hingpit nga pagpalayo gikan sa atong mga sala ug ang paghunog sa pagbuhat niini.)

Ipamatuod ang mahitungod sa Pag-ula sa Manluluwas ug ang mga baruganan sa paghinulsol ug ang kapasayloan nga imong nahisgutan. Dapita ang mga estudyante sa pagpamalandong kon aduna bay mga sala nga kinahanglan nilang hinulsulan, ug awhaga sila sa paghinulsol pinaagi sa pagbuhat sa mga kamatuoran nga ilang nakat-unan.

Pahinumdumi ang mga estudyante nga ang Doktrina ug mga Pakigsaad 58:42–43 usa ka scripture mastery passage. Dapita sila sa pag-report kon kumusta na ang ilang mga paningkamot sa pagmemorya niini.

Sunod nga Unit (Doktrina ug mga Pakigsaad 60–64)

Aron maandam ang mga estudyante sa ilang pagtuon sa Doktrina ug mga Pakigsaad 60–64, mahimo nimo silang dapiton sa pagkonsiderar sa mosunod: Kon ang usa ka tawo mapakyas sa pagpasaylo sa laing tawo tungod sa sayop nga iyang nabuhat, kinsa ang sad-an sa mas dakong sala? Dapita ang mga estudyante sa pagkonsiderar kon unsaon nila pagtubag kon sila nasakitan pinaagi sa mga linihukan o mga pulong sa laing tawo. Bisan sa grabe nga mga kahimtang, kinsa ang kinahanglan natong pasayluon? Ipasabut nga sa sunod nga unit makat-unan sa mga estudyante kon unsa ang gitudlo sa Ginoo mahitungod niining butanga ug unsaon sa pagtubag sa mga pagpangsilo sa ubang tawo.