Leksyon 35

Doktrina ug mga Pakigsaad 29:1–29

Pasiuna

Sa wala pa ang komperensya sa Simbahan nga gipahigayon niadtong Septyembre 26, 1830, si Propeta Joseph Smith nakadawat og pagpadayag sa atubangan sa unom ka mga elder. Pinaagi sa pagpadayag, kini nga mga elder nasayud mahitungod sa pagpundok sa mga pinili sa Manluluwas sa Iyang Ikaduhang Pag-anhi.

Mga Sugyot alang sa Pagtudlo

Dapita ang Espiritu Santo

Awhaga ang mga estudyante sa pagdapit sa impluwensya sa Espiritu Santo samtang magdungan sila sa pagtuon sa mga kasulatan. Pipila sa mga buhat nga magdapit sa Espiritu mao ang sinsero nga pag-ampo, pagtudlo gikan sa mga kasulatan, pagpakigbahin sa pagpamatuod, pagpangutana og dinasig nga mga pangutana, pagpahayag og gugma alang sa Dios ug sa uban, ug pagpaambit og espirituhanong mga kasinatian. Kon makahigayon, mahimong maaghat ka sa pagtabang sa mga estudyante nga makaila sa impluwensya sa Espiritu Santo atol sa mga leksyon.

Doktrina ug mga Pakigsaad 29:1–13

Ang Ginoo mipamatuod sa Iyang Pag-ula ug sa Iyang tinguha sa pagpundok sa Iyang katawhan

Sa dili pa magklase, isulat ang mosunod diha sa pisara: “Ipataas ang inyong mga kasingkasing ug pagmaya” (D&P 29:5).

• Nganong lisud man usahay ang pagsunod niini nga tambag? Unsa ang pipila ka pamaagi nga inyong nakaplagan aron sa pagsunod niini nga tambag?

Ipasabut nga ang Doktrina ug mga Pakigsaad 29:1–3 naglakip sa mga pulong sa Manluluwas nga makatabang kanato nga “ipataas ang [atong] mga kasingkasing ug [mag]maya.”

I-display ang litrato nga Kristo ug ang mga Bata (Libro sa mga Hulagway sa Ebanghelyo [2009], nu. 47; tan-awa usab sa LDS.org) ug, kon posible, litrato sa himungaan nga nagpundok sa iyang mga pisu. Pangutana kon aduna bay makahulagway kon unsaon ug nganong pundukon sa himungaan ang iyang mga pisu. (Kon wala masayud ang mga estudyante, ipasabut nga kon ang himungaan makabantay og peligro, iyang tawagon ang iyang mga pisu. Sa ilang pagduol kaniya, pundukon niya sila ilawom sa iyang mga pako aron sa pagpanalipod kanila.) Hangyoa ang usa ka estudyante sa pagbasa og kusog sa Doktrina ug mga Pakigsaad 29:2.

• Sa unsang paagi nga ang Manluluwas sama sa usa ka himungaan nga nagpundok ug nagprotekta sa iyang mga pisu?

• Unsay kinahanglang buhaton sa mga pisu aron luwas nga mapundok ilawom sa proteksyon sa mga pako sa ilang inahan? (Kon gikinahanglan, ipasabut nga ang mga pisu kinahanglan nga maningkamot sa pag-adto sa ilang inahan.)

Isulat ang mosunod sa pisara: Si Jesukristo mopundok kanato samtang kita …

• Sumala sa Doktrina ug mga Pakigsaad 29:2, unsa ang atong kinahanglan nga buhaton aron mapundok sa Ginoo? (Gamita ang mga tubag sa mga estudyante sa pagkompleto sa baruganan sa pisara: Si Jesukristo mopundok kanato samtang kita maminaw sa Iyang tingog, magmapainubsanon, ug motawag Kaniya sa pag-ampo.)

Ipasabut nga gikan sa sinugdanan, ang mga propeta nanagna mahitungod sa pagpundok sa Israel. Ang balay ni Israel—ang katawhan sa pakigsaad sa Ginoo—pagapundukon sa ulahing mga adlaw sa dili pa moabut si Kristo (tan-awa sa Mga Artikulo sa Hugot nga Pagtuo 1:10). Ang Ginoo mopundok sa Iyang katawhan samtang mopakita sila og hugot nga pagtuo diha Kaniya ug mosunod sa Iyang mga sugo.

Aron matabangan ang mga estudyante nga makasabut ug mabati ang kamatuoran ug ang kaimportante niini nga baruganan, hisguti ang mosunod nga mga pangutana:

• Unsa ang pipila ka mga paagi nga atong madungog ang tingog sa Manluluwas? (Ang mga tubag mahimong maglakip nga atong madungog ang Iyang tingog pinaagi sa mga kasulatan, mga pagtulun-an sa buhi nga mga propeta ug apostoles, ug sa pagdasig sa Espiritu Santo.)

• Sa unsang paagi ang pagpatalinghug sa tingog sa Manluluwas lahi kay sa pagkadungog lang sa Iyang tingog?

• Ngano kaha nga kinahanglan kitang magmapainubsanon aron mapundok sa Manluluwas?

Dapita ang mga estudyante sa paghunahuna og mga higayon dihang mibati sila nga duol sa Manluluwas pinaagi sa pagtuon sa kasulatan, pagsunod sa mga pulong sa buhing mga propeta, o pag-ampo ngadto sa Langitnong Amahan. Hatagi ang pipila ka estudyante og oportunidad sa pagpaambit niini nga mga kasinatian, nga pahinumduman sila nga ang ubang mga kasinatian sagrado o personal ra kaayo aron ipaambit.

Hisguti ang kasulatan nga imong gisulat sa pisara sa wala pa magklase.

• Sa unsang paagi ang paghunahuna nga pundukon kita sa Manluluwas makatabang ninyo sa pagpataas sa inyong kasingkasing ug pagmaya?

Dapita ang usa ka estudyante sa pagbasa sa Doktrina ug mga Pakigsaad 29:1, 3. Hangyoa ang klase sa pagsunod, nga mangita og rason nga ipataas ang atong mga kasingkasing ug magmaya. Dayon hangyoa ang mga estudyante sa pag-ila og baruganan gikan niini nga mga bersikulo nga nagpasabut nganong makahimo kita sa pagpataas sa atong mga kasingkasing ug pagmaya.

Human sa igong panahon, dapita ang pipila ka mga estudyante sa pagpaambit sa baruganan nga ilang nailhan. (Ang ilang mga tubag kinahanglang magpakita sa mosunod nga baruganan: Tungod kay ang Manluluwas mitubos sa atong mga sala, mahimo kitang mopataas sa atong mga kasingkasing ug magmaya.)

• Sa unsang paagi ang inyong pagpamatuod sa Pag-ula ni Jesukristo nakadala og kalipay sa inyong kinabuhi? (Human makatubag ang mga estudyante niini nga pangutana, mahimo usab nimong ipaambit ang imong tubag.)

Ipasabut nga usa ka paagi nga ang Manluluwas mopundok sa mga tawo mao ang pinaagi sa atong mga paningkamot sa pagpaambit sa ebanghelyo. Sa pinadayag nga narekord sa Doktrina ug mga Pakigsaad 29, namulong Siya pinaagi ni Joseph Smith ngadto sa unom ka mga elder ug misugo kanila sa pagpahayag sa Iyang ebanghelyo.

Dapita ang mga estudyante nga hilum nga mobasa sa Doktrina ug mga Pakigsaad 29:4–6. Awhaga sila sa pagpangita sa mga pulong nga may kalabutan sa misyonaryo nga buhat. Dayon ipangutana ang mosunod:

• Unsa nga mga pulong ang inyong nakit-an? Unsa ang gitudlo niini nga mga pulong mahitungod sa kasinatian sa pagpaambit sa ebanghelyo?

Dapita ang usa ka estudyante sa pagbasa og kusog sa Doktrina ug mga Pakigsaad 29:7–8. Hangyoa ang klase sa pagsunod, nga mangita sa pagpasabut sa Manluluwas kon unsa ang gipabuhat niining unom ka mga elder ug ngano.

• Unsa man ang gipabuhat sa Manluluwas niini nga mga elder? (“Sa pagpahinabo sa pagpundok sa [Iyang] pinili.”) Giunsa paghulagway sa Manluluwas ang Iyang pinili? (Kadtong “maminaw sa [Iyang] tingog ug dili magpatig-a sa ilang mga kasingkasing.”)

• Sa unsang paagi ang mga misyonaryo nagtabang nga mahitabo ang pagpundok sa pinili?

Ipasabut nga sa dihang gihatag kini nga pagpadayag, ang mga miyembro sa Simbahan diyutay pa. Ang mga Santos nahimo nga “pagapundukon ngadto sa usa ka dapit” (D&P 29:8). Hinoon, sa pagtubo sa Simbahan, ang Ginoo misugo sa mga Santos nga magpundok sa lain-laing mga dapit. Karon kita magpundok sa mga stake sa Zion kon asa kita nagpuyo.

• Sa unsa nga mga dapit kita magpundok karon? (Ang mga tubag mahimong maglakip sa mga panimalay, mga meetinghouse, ug mga templo.)

I-summarize ang Doktrina ug mga Pakigsaad 29: 9–13 pinaagi sa pagpasabut nga niini nga mga bersikulo ang Manluluwas mipahayag nga Siya moanhi pag-usab sa yuta uban sa gahum ug himaya. Ang mga panon nga moabut uban sa Manluluwas diha sa himaya sa Iyang Ikaduhang Pag-anhi mao ang matinud-anong mga Santos kinsa nakapuyo sa tanang panahon sa kasaysayan sa yuta. Ang mga matarung nga namatay pagabanhawon, ug ang mga dautan pagalaglagon. Si Jesukristo “mopuyo diha sa pagkamatarung uban sa mga tawo dinhi sa yuta sa kaliboan ka mga tuig” (D&P 29:11).

Doktrina ug mga Pakigsaad 29:14–21

Si Jesukristo mihulagway sa mga timailhan nga mag-una sa Iyang Ikaduhang Pag-anhi

Ipasabut nga ang pagpundok sa Israel kabahin sa atong pagpangandam alang sa pagbalik sa Manluluwas. Ang Ginoo mipadayag og ubang mga timailhan nga mahitabo sa dili pa ang Iyang Ikaduhang Pag-anhi. Hangyoa ang mga estudyante nga hilum nga mobasa sa Doktrina ug mga Pakigsaad 19:14–21, nga mangita sa mga timailhan nga mahitabo sa dili pa ang Ikaduhang Pag-anhi. Mahimo nimong isugyot nga markahan sa mga estudyante kini nga mga timailhan diha sa ilang mga kasulatan o ilista kini sa ilang mga class notebook o mga scripture study journal.

Sa dili pa basahon sa mga estudyante kini nga mga bersikulo, ipasabut og maayo nga wala kita masayud kon sa unsang paagi o kanus-a kini nga mga panagna matuman.

Human ang mga estudyante makabaton og panahon sa pagtuon niini nga mga bersikulo, ipasabut nga bisan tuod kini nga mga timailhan moabut tungod sa pagkadautan, kini moapekto sa tanang katawhan dinhi sa yuta, bisan sa mga matarung. Mahimo nimong basahon ang mosunod nga pamahayag ni Propeta Joseph Smith:

“Mahitungod sa pagbalik sa Anak sa Tawo … usa ka sayop nga pagtuo nga ang mga Santos makalingkawas sa tanang mga paghukom, samtang ang dautan mag-antus; kay ang tanang tawo ubos sa pag-antus, ug ‘ang matarung maglisud sa pag-ikyas’ [tan-awa sa D&P 63:34 bisan pa man daghang mga Santos makaikyas, kay ang matarung mabuhi pinaagi sa hugot nga pagtuo Habacuc 2:4 unya daghang mga matarung mabiktima sa sakit, sa katalagman, ug uban pa, nga ang hinungdan gumikan sa kahuyang sa unod, ug bisan pa niana mangaluwas ngadto sa Gingharian sa Dios” (Mga Pagtulun-an sa mga Presidente sa Simbahan: Joseph Smith [2007], 304).

• Nganong gusto man ninyo nga mapundok isip usa sa pinili sa Manluluwas kon mahitabo na kining mga butanga?

Ipasabut nga kon kita adunay hugot nga pagtuo kang Jesukristo ug mosunod Kaniya, kanunay kita nga adunay kalinaw, bisan sa mga panahon sama sa gihulagway niini nga pagpadayag. Sa pagpasabut og maayo niini nga kamatuoran, mahimo nimong dapiton ang mga estudyante sa pagbasa og pipila o tanan sa mosunod nga mga bersikulo: Juan 14:27; 16:33; Doktrina ug mga Pakigsaad 59:23.

Dapita ang usa ka estudyante sa pagbasa og kusog sa Doktrina ug mga Pakigsaad 29:17. Hangyoa ang klase sa pagpangita sa sangputanan sa pagdumili sa paghinulsol.

• Unsa ang sangputanan sa pagdumili nga maghinulsol? (Ang mga estudyante kinahanglang mopahayag sa mosunod nga baruganan: Kon dili kita maghinulsol, ang maulaong dugo ni Jesukristo dili makalimpyo kanato. Mahimo nimong isugyot nga markahan sa mga estudyante kini nga baruganan diha sa Doktrina ug mga Pakigsaad 29:17.)

Pasaligi ang mga estudyante nga ang labing importante nga pagpangandam nga atong mahimo alang sa Ikaduhang Pag-anhi mao ang pagduol sa Manluluwas, maghinulsol, ug malimpyohan sa atong mga sala. Dapita ang mga estudyante sa paghunahuna kon duna ba silay angay hinulsulan ug unsay angay gayud nilang buhaton aron malimpyohan sa sala.

Doktrina ug mga Pakigsaad 29:22–29

Ang Manluluwas nagpadayag og mga kamatuoran mahitungod sa unsay mahitabo human sa Milenyum, lakip na ang Katapusang Paghukom

Pag-assign sa matag estudyante og usa sa mosunod nga mga tudling gikan sa Doktrina ug mga Pakigsaad 29: bersikulo 22, bersikulo 26, o mga bersikulo 27–28. Dapita ang mga estudyante nga hilum nga mobasa sa gi-assign kanila nga bersikulo o mga bersikulo ug ilhon ang usa ka butang nga mahitabo sa pagtapos sa Milenyum. (Alang sa mga estudyante nga gi-assign sa pagtuon sa Doktrina ug mga Pakigsaad 29:26, mahimo nimong ipasabut nga si Miguel, ang arkanghel, mao si Adan. Tan-awa sa D&P 107:54.) Human sa igong panahon nga nasiksik na sa mga estudyante ang gi-assign kanila nga bersikulo o mga bersikulo, hangyoa sila sa pag-report unsay ilang nadiskubrihan, sugod sa bersikulo 22.

Dapita ang usa ka estudyante sa pagbasa og kusog sa Doktrina ug mga Pakigsaad 29:27, ug hangyoa ang klase sa pagpangita sa panalangin nga ihatag ngadto sa mga matarung sa Katapusang Paghukom.

• Unsa nga panalangin ang moabut kanato kon kita mipundok ngadto sa Manluluwas? (Ang mga estudyante kinahanglang mahibalo sa mosunod nga doktrina: Kadtong nagpuyo nga matarung ug moduol kang Jesukristo makadawat og kinabuhing dayon. Mahimo nimo silang awhagon sa pagmarka niini nga kamatuoran diha sa Doktrina ug mga Pakigsaad 29:27.)

Tapusa pinaagi sa pagbutang sa hulagway ni Jesukristo uban sa mga bata diha sa pisara. Dayon isulat ang pulong nga Ako diha sa pisara. Dapita ang mga estudyante sa paghunahuna kon asa nila ibutang ang pulong nga Ako kon ang nahimutangan niini nagrepresentar sa ilang kasuod ngadto sa Manluluwas. Hangyoa ang mga estudyante sa pagpaambit sa ilang mga kasinatian sa diha nga misunod sila sa mga aghat nga mas mipaduol kanila ngadto sa Manluluwas. Dapita sila sa pagpili og usa ka butang nga ilang mabuhat aron molihok sumala sa ilang nakat-unan karon ug mas mapaduol Kaniya.

Komentaryo ug Background nga Impormasyon

Doktrina ug mga Pakigsaad 29:7. “Kamo gitawag sa pagpahinabo sa pagpundok sa akong pinili”

Si Elder Neil L. Andersen sa Korum sa Napulog Duha ka mga Apostoles, namulong ngadto sa mga young men sa Simbahan, mimatuod sa atong responsibilidad sa pagpundok sa pinili sa Dios:

“Ang inyong misyon mahimong usa ka sagrado nga oportunidad sa pagdala sa uban ngadto ni Kristo ug sa pagtabang sa pag-andam alang sa Ikaduhang Pag-anhi sa Manluluwas.

“Ang Ginoo dugay nang misulti kalabut sa gikinahanglan nga mga pagpangandam alang sa Iyang Ikaduhang Pag-anhi. Ngadto kang Enoch, Siya namahayag, ‘Pagkamatarung Ako mopakanaog gikan sa langit; ug kamatuoran Ako mopadala gikan sa yuta, … ug pagkamatarung ug kamatuoran Ako mosugo nga mosilhig sa yuta ingon sa usa ka lunop, aron pagpundok sa akong pinili gikan sa upat ka mga suok sa yuta.’ [Moises 7:62.] Si propeta Daniel nanagna nga sa ulahing mga adlaw ang ebanghelyo mokaylap ngadto sa mga kinatumyan sa yuta, sama sa usa ka ‘bukid [nga] gisapsap nga walay kamot ang [usa ka] bato.’ [Daniel 2:45.] Si Nephi naghisgut mahitungod sa Simbahan sa ulahing mga adlaw ingon ang gidaghanon diyutay ra, mikatap sa tibuok yuta. [Tan-awa sa 1 Nephi 14:12–14.] Ang Ginoo namahayag niini nga dispensasyon, ‘Kamo gitawag sa pagpahinabo sa pagpundok sa akong pinili.’ [Doktrina ug mga Pakigsaad 132:7.] … Ang inyong misyon usa ka talagsaon nga oportunidad ug responsibilidad, nga importante niining gisaad nga pagpundok ug may kalabutan sa inyong mahangturong padulngan” (Pag-andam sa Kalibutan alang sa Ikaduhang Pag-anhi,” Liahona, Mayo 2011, 50–51).

Doktrina ug mga Pakigsaad 29:7–9. Ang mga Santos kinahanglang magpundok sa mga stake sa Zion

Si Elder Bruce R. McConkie (1915–85) sa Korum sa Napulog Duha ka mga Apostoles mipasabut kon asa kinahanglang magpundok ang mga Santos:

“Ang mga stake sa Zion … gi-organisar sa tibuok kalibutan. Niini nga koneksyon, atong pamalandungan kini nga mga kamatuoran: Ang usa ka stake sa Zion usa ka bahin sa Zion. Dili kamo makahimo og usa ka stake sa Zion nga dili makahimo og usa ka bahin sa Zion. Ang Zion mao ang putli og kasingkasing; makaangkon kita og kaputli sa kasingkasing pinaagi sa bunyag ug pinaagi sa pagkamasulundon. Ang stake adunay hiyograpikanhong mga utlanan. Ang paghimo og usa ka stake susama sa pagtukod og usa ka Dakbayan sa Pagkabalaan. Ang matag stake dinhi sa yuta mao ang dapit nga pundokanan alang sa nawala nga karnero sa Israel kinsa nagpuyo niana nga dapit.

“Ang dapit nga pundokanan alang sa mga Peruvians mao ang mga stake sa Zion sa Peru, o sa mga dapit nga sa dili madugay mahimong mga stake. Ang dapit nga pundokanan sa mga taga-Chile anaa sa Chile; alang sa mga Bolivians anaa kini sa Bolivia; alang sa mga Koreano anaa kini sa Korea; ug mao kini sa tibuok yuta. Ang nagkatibulaag nga Israel sa matag nasud gitawag sa pagpundok ngadto sa panon ni Kristo, ngadto sa mga stake sa Zion, ingon nga nagtukod diha sa ilang mga nasud” (“Come: Let Israel Build Zion,” Ensign, Mayo 1977, 118).