Leksyon 50
Doktrina ug mga Pakigsaad 43–44
Pasiuna
Niadtong Pebrero 1831, si Joseph Smith miabut sa Kirtland, Ohio. Sa iyang pag-abut, iyang nakita nga ang mga Santos sa Kirtland nalingla sa sayop nga mga pagpadayag. Pananglitan, usa ka babaye nga ginganlan og Mrs. Hubble ang nangangkon nga usa ka babaye nga propeta ug nakadawat og pagpadayag alang sa Simbahan. Nabalaka bahin sa mga impluwensya nga miabut sa mga Santos sa Kirtland, nangutana si Joseph sa Ginoo kon unsay angayang buhaton. Agig tubag, nadawat niya ang pagpadayag nga narekord karon diha sa Doktrina ug mga Pakigsaad 43. Niana nga pagpadayag, ang Ginoo mimando sa mga Santos sa unsay kinahanglan nilang buhaton aron malikayan nga malingla. Ang pagpadayag diha sa Doktrina ug mga Pakigsaad 44 nadawat usab niadtong Pebrero 1831, nagahatag og instruksyon ngadto sa priesthood sa pagsangyaw sa ebanghelyo ug sa pagpangalagad ngadto sa mga kabus.
Mga Sugyot alang sa Pagtudlo
Doktrina ug mga Pakigsaad 43:1–7
Namahayag ang Ginoo nga ang mga pagpadayag ug mga sugo moabut lamang pinaagi sa Iyang gitudlo nga propeta
Pagpili og duha ka himno aron kantahon sa klase. Aron matabangan ang mga estudyante nga makasabut sa kalisud sa pagsunod sa duha ka lain-laing mga lider sa samang higayon, hangyoa ang duha ka estudyante sa pagbarug sa atubangan sa klase ug mangulo sa klase sa pagkanta sa duha ka himno sa samang higayon. Human sa pipila ka linya sa duha ka himno, ipahunong ang pagkanta ug ipangutana ang mosunod:
-
Nganong lisud ang pagsunod sa duha ka lain-laing mga lider ug mga kanta sa samang higayon?
Ipasabut nga niadtog Pebrero 1831, usa ka babaye nga ginganlan og Mrs. Hubble ang miabut ngadto sa mga Santos sa Kirtland, Ohio. Nangangkon siya nga usa siya ka babaye nga propeta, nga nakadawat siya og mga pagpadayag alang sa Simbahan, nga nasayud siya nga ang Basahon ni Mormon tinuod, ug nga kinahanglan siya nga mahimong magtutudlo sa Simbahan. Nakahimo siya sa paglingla sa ubang mga Santos. Si Joseph Smith ug ang uban nabalaka bahin sa iyang impluwensya ug bahin sa ubang sayop nga mga pagpadayag diha sa mga Santos. Ang Propeta nakahukom nga mangutana sa Ginoo kon unsay kinahanglang buhaton, ug nakadawat siya og pagpadayag. Si John Whitmer, kinsa bag-ohay lang usab nga miabut sa Kirtland, misulat, “Ang Ginoo mihatag [niini] nga Pagpadayag aron ang mga santos dili unta malingla” (Documents, Volume 1: July 1828–June 1831, vol. 1 sa Documents series sa The Joseph Smith Papers [2013], 257).
Dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 43:1–5. Hangyoa ang klase sa pagsunod, nga mangita sa pagpasabut sa Ginoo kon kinsa ang makadawat og pagpadayag alang sa tibuok Simbahan.
-
Kinsa ang gitudlo nianang higayuna nga makadawat sa mga sugo ug mga pagpadayag alang sa tibuok Simbahan? (Joseph Smith.) Kinsa ang gitudlo ngadto niana nga posisyon karon? (Ang Presidente sa Simbahan.)
-
Unsa ang atong makat-unan gikan niining mga bersikulo? (Ang mga estudyante mahimong mogamit og lain-laing mga pulong, apan kinahanglang mahibaloan nila ang mosunod nga doktrina: Ang Presidente lamang sa Simbahan maoy makadawat og mga pagpadayag alang sa tibuok Simbahan. Mahimo nimong isugyot nga ang mga estudyante mosulat niini nga kamatuoran diha sa ilang mga kasulatan tupad sa mga bersikulo 3–4. Aron mahatagan og gibug-aton ang kaimportante niini nga doktrina, dapita ang mga estudyante sa pagbasa sa Doktrina ug mga Pakigsaad 21:4–6; 28:2–7.)
Ipasabut nga sama ni Mrs. Hubble ug sa uban pa sa unang mga adlaw sa Simbahan, ang ubang mga tawo sa atong panahon magtinguha nga mokumbinsir sa uban sa pagsunod kanila ug sa pagdawat sa ilang mga pagtulun-an. Dapita ang usa ka estudyante sa pagbasa og kusog sa Doktrina ug mga Pakigsaad 43:6–7. Hangyoa ang klase sa pagtino sa sumbanan sa Ginoo nga manalipod kanato gikan sa pagkalingla pinaagi niadtong dili awtorisado nga mangulo sa Simbahan.
Doktrina ug mga Pakigsaad 43:8–16
Ang mga elder gimanduan sa pagtudlo ug sa paglig-on sa usag usa ug mahimong balaan
Hangyoa ang mga estudyante sa paglista diha sa pisara sa ubang mga miting nga ilang gitambungan isip mga miyembro sa Simbahan. Dapita dayon ang mga estudyante nga magpares-pares ug maghisgot sa mosunod nga pangutana:
-
Unsa ang ubang mga katuyoan niining mga miting?
Human mahisguti sa mga estudyante kini nga pangutana, mahimo nimong hangyuon ang pipila kanila sa pagpakigbahin sa ilang mga tubag ngadto sa tibuok klase. Hangyoa dayon ang usa ka estudyante sa pagbasa og kusog sa Doktrina ug mga Pakigsaad 43:8, ug dapita ang klase sa pagtino kon unsay gitudlo niining bersikulo bahin sa mga katuyoan sa mga miting sa Simbahan.
-
Unsa ang gisulti sa Ginoo sa mga elder sa Simbahan nga angayang buhaton kon magpundok sila? Unsa ang buot ipasabut sa maghatag og kaayohan sa usag usa? (Modasig sa usag usa ug molig-on sa usag usa.)
-
Sumala sa bersikulo 8, unsay atong makat-unan samtang kita magtudlo ug maghatag og kaayohan sa usag usa? (Ang mga tubag sa mga estudyante mahimong magkalain-lain, apan kinahanglan silang mopahayag sa mosunod nga baruganan: Kon kita magkapundok, kinahanglan kitang motudlo ug mohatag og kaayohan sa usag usa aron kita makakat-on unsaon sa pagbuhat ug sa pagdumala sa Simbahan.)
Dapita ang mga estudyante sa pagbasa og hilum sa Doktrina ug mga Pakigsaad 43:9, 11 ug mahibalo kon unsay kinahanglan natong buhaton human kita makakat-on unsaon sa pagbuhat.
-
Unsay kinahanglan natong buhaton human kita natudloan ug nahatagan og kaayohan diha sa atong mga miting sa Simbahan? (Ang mga estudyante kinahanglang mahibalo sa mosunod nga baruganan: Kinahanglan kitang maghiusa sa atong kaugalingon sa pagbuhat diha sa kahibalo nga atong nadawat. Mahimo nimong isugyot nga markahan sa mga estudyante kini nga baruganan diha sa bersikulo 9.)
-
Sumala niini nga mga bersikulo, sa unsang paagi kita mapanalanginan samtang madawat nato ang kahibalo ug mobuhat niini? (Samtang maghisgot ang mga estudyante niini nga pangutana, siguroa nga mahatagan og gibug-aton ang mosunod nga baruganan: Mabalaan kita samtang mobuhat kita sa mga kamatuoran nga atong nakat-unan. (Mahimo usab nimong ipasabut nga ang mabalaan mao ang mahimong balaan, malimpyuhan gikan sa sala.)
Drowinga ang kauban nga diagram diha sa pisara.
-
Unsa kaha ang gipasabut sa “maghiusa sa [atong] mga kaugalingon sa pagbuhat”?
-
Sa unsang paagi nga ang kahibalo nga atong nadawat sa mga miting sa Simbahan makatabang kanato nga mabalaan?
Dapita ang klase sa paghunahuna sa mga panalangin nga ilang nadawat sa dihang mibuhat sila sa unsay ilang nakat-unan diha sa mga miting sa Simbahan. Hangyoa ang pipila ka estudyante sa pagpakigbahin niining mga kasinatian ug sa pagpasabut kon sa unsang paagi sila napanalanginan tungod sa pagbuhat sa unsay ilang nakat-unan.
I-summarize ang Doktrina ug mga Pakigsaad 43:12–14 pinaagi sa pagpasabut nga gisultihan sa Ginoo ang mga Santos nga kon ganahan silang makadawat sa mga kamatuoran sa ebanghelyo, kinahanglan silang mopaluyo kang Joseph Smith sa iyang calling.
Ipasabut nga gipadayag sa Ginoo ang mga kamatuoran diha sa Doktrina ug mga Pakigsaad 43:15–16 ngadto sa mga Santos sa Ulahing mga Adlaw kinsa nangandam nga moserbisyo isip mga misyonaryo. Dapita dayon ang usa ka estudyante sa pagbasa og kusog niining mga bersikulo.
-
Sa unsa kaha nga paagi nga kining mga bersikulo magamit sa buhat sa full-time nga mga misyonaryo?
Doktrina ug mga Pakigsaad 43:17–35
Ang mga sulugoon sa Dios kinahanglang magsangyaw og paghinulsol agig pagpangandam alang sa Ikaduhang Pag-anhi ug sa Milenyum
Hangyoa ang mga estudyante sa paglista sa mga kalihokan o mga panghitabo nga nagkinahanglan og mainampingong pagpangandam. Ang mga estudyante mahimong mopakigbahin og ipila ka ehemplo, sama sa full-time nga mga misyon, mga kalihokan sa sports, mga pasundayag sa musika, mga assignment sa pagtudlo diha sa simbahan, ug mga test sa eskwelahan.
-
Unsa kaha ang gibati sa mga tawo kon dili sila andam kon moabut ang panahon alang nila nga mosalmot sa maong mga kalihokan?
Dapita ang usa ka estudyante sa pagbasa og kusog sa Doktrina ug mga Pakigsaad 43:17–18. Hangyoa ang klase sa pagsunod, nga mangita sa usa ka kalihokan nga nagkinahanglan og pagpangandam. (“Ang mahinungdanon nga adlaw sa Ginoo,” o, sa laing pagkasulti, ang Ikaduhang Pag-anhi.)
Ipares-pares ang mga estudyante. Hangyoa ang matag parisan sa pagbasa og dungan sa Doktrina ug mga Pakigsaad 43:17–22, nga mangita kon unsay gisugo sa Ginoo nga buhaton sa mga elder aron sa pagtabang sa katawhan nga maandam alang sa Ikaduhang Pag-anhi. Kon mahatagan na og panahon ang mga grupo nga makabasa, pangutan-a ang klase sa mosunod nga mga pangutana:
-
Unsa ang gisugo sa Ginoo nga itudlo sa mga elder? Unsa nga kamatuoran ang atong makat-unan gikan niining mga bersikulo? (Ang mga estudyante kinahanglang mopahayag nga aron maandam ang atong kaugalingon alang sa Ikaduhang Pag-anhi ni Jesukristo, kinahanglan kitang maghinulsol. Mahimo nimong isulat sa pisara kini nga baruganan.)
Pahinumdumi ang mga estudyante nga ang Ginoo misaad sa pagpundok sa Iyang katawhan sama sa usa ka himongaan nga nagpundok sa iyang mga piso ilawom sa iyang mga pako apan daghang tawo ang nagdumili sa paghinulsol o sa pag-andam sa ilang kaugalingon alang sa Ikaduhang Pag-anhi (tan-awa sa D&P 43:23–24; tan-awa usab sa D&P 29:1–2 ug sa leksyon 35 niini nga manwal).
Hangyoa ang mga parisan sa mga estudyante sa pagbasa og dungan sa Doktrina ug mga Pakigsaad 43:25–27, nga mangita sa lain-laing “mga tingog” nga gigamit sa Ginoo sa pagtawag sa katawhan nga moduol ngadto Kaniya. Human nila mabasa, ipangutana ang mosunod:
-
Unsa nga “mga tingog” ang inyong natino? Ngano kaha nga kining lain-laing mga tingog gikinahanglan man?
Dapita ang mga estudyante sa pagpamalandong sa piho nga mga butang nga kinahanglan nilang buhaton aron makahinulsol ug makaandam alang sa Ikaduhang Pag-anhi. Dapita dayon ang usa ka estudyante sa pagbasa og kusog sa Doktrina ug mga Pakigsaad 43:28–31, ug hangyoa ang klase sa pagpangita sa mahinungdanong hitabo nga gipanagna niining mga bersikulo.
-
Unsa man ang mahinungdanong hitabo nga gipanagna niining mga bersikulo? (Ang Milenyum.)
-
Unsay mahitabo atol sa Milenyum? (Ang mga estudyante kinahanglang mahibalo sa mosunod nga doktrina: Atol sa Milenyum, si Satanas pagagapuson ug si Jesukristo ang mohari uban sa Iyang katawhan dinhi sa yuta. Mahimo nimong isugyot nga markahan sa mga estudyante ang mga pulong nga nagtudlo niining kamatuoran diha sa mga bersikulo 28–31. Aron matabangan ang mga estudyante nga mas makasabut kon unsaon si Satanas paggapos, ikonsiderar ang pagdapit nila sa pagbasa sa 1 Nephi 22:26.)
Basaha og kusog ang mosunod nga mga pamahayag ni Presidente George Q. Cannon sa Unang Kapangulohan, nga nagpasabut kon unsaon paggapos si Satanas atol sa Milenyum:
“Gihisgutan nato ang mahitungod ni Satanas nga gigapos. Si Satanas gapuson pinaagi sa gahum sa Dios; apan gapuson usab siya pinaagi sa determinasyon sa katawhan sa Dios sa dili pagpaminaw kaniya, nga sila dili madumala kaniya” (Gospel Truth: Discourses and Writings of President George Q. Cannon, comp. Jerreld L. Newquist, 2 vols. [1957–74], 1:86).
-
Unsaon nato pag-andam karon aron maihap apil sa mga matarung kon moanhi pag-usab ang Manluluwas? (Samtang motubag ang mga estudyante niini nga pangutana, mahimo nimong ribyuhon ug pamatud-an ang mga kamatuoran nga gihisgutan niini nga leksyon.)
Doktrina ug mga Pakigsaad 44
Gimanduan sa Ginoo ang Iyang mga sulugoon nga magpundok
I-summarize ang Doktrina ug mga Pakigsaad 44:1–6 pinaagi sa pagpasabut nga ang Ginoo mimando sa mga elder nga magpundok alang sa usa ka komperensya. Ang Ginoo misaad sa mga elder nga kon magmatinud-anon sila ug mopakita og hugot nga pagtuo diha Kaniya, Siya mobu-bu sa Iyang Espiritu diha kanila ug mopanalangin kanila aron ang ilang mga kaaway walay gahum batok kanila. Ang Ginoo mimando kanila sa pagsangyaw og paghinulsol, pagpangalagad og kahupayan ngadto sa mga kabus, ug pag-organisar sa ilang kaugalingon sumala sa mga balaod sa yuta.
Komentaryo ug Background nga Impormasyon
Doktrina ug mga Pakigsaad 43:6–7. “Kinsa Ako mitudlo”
Si Presidente Boyd K. Packer sa Korum sa Napulog Duha ka mga Apostoles miawhag kanato sa pagsunod sa tambag sa Presidente sa Simbahan ug dili madala sa mga tiglingla:
“‘Ug usab Ako moingon nganha kaninyo, nga kini dili ikahatag ngadto ni bisan kinsa ang paglakaw sa pagsangyaw sa akong ebanghelyo o sa pagtukod sa akong simbahan, gawas kon siya ma-orden pinaagi sa usa kinsa adunay pagtugot, ug nahibaloan sa simbahan nga siya adunay pagtugot ug na-orden pinaagi sa mga pangulo sa simbahan.’ (D&P 42:11.)
“Adunay pipila kanato karon kinsa walana-orden sa mga pangulo sa Simbahan kinsa mosulti bahin sa nagsingabut nga politikal ug ekonomikanhong kasamok, ang katapusan sa kalibutan. …
“Kadtong mga tiglingla moingon nga ang Kaigsoonan wala masayud kon unsay nahitabo sa kalibutan o nga ang Kaigsoonan miaprubar sa ilang pagtulun-an apan dili gustong mamulong bahin niini diha sa pulpito. Walay usa niini nga tinuod. Ang Kaigsoonan, tungod sa kanunay nga pagbiyahe bisan asa sa kalibutan, sigurado nga nasayud kon unsay nahitabo, ug tungod sa propetikanhong panabut makahimo sila sa pagbasa sa mga timailhan sa mga panahon.
“Ayaw pagpalingla kanila—niadtong mga tiglingla. Kon adunay bisan unsa nga pangpundok, ipahibalo kini niadtong na-orden ug kinsa nailhan sa Simbahan nga adunay awtoridad.
“Palayo sa bisan unsa pa. Sunda ang inyong mga lider kinsa tukmang na-orden ug gipaluyohan sa kadaghanan, ug dili kamo mahisalaag” (“To Be Learned Is Good If … ,” Ensign, Nob. 1992, 73). (Tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 87.)
Doktrina ug mga Pakigsaad 43:7. “Mosulod sa ganghaan”
Ang Ginoo miingon, “Siya nga gi-orden … mosulod sa ganghaan” (D&P 43:7). Si Presidente Joseph Fielding Smith mipasabut niini nga pamahayag:
“Gusto sa Ginoo nga atong masayran nga nagbuhat siya sa tanang butang diha sa kahan-ay, ug kon motawag siya og tawo nga mangulo sa Simbahan, kana nga tawo mosulod sa ganghaan ug ordinahan niadtong kinsa adunay awtoridad. Mao na kana gikan sa sinugdanan ug magpadayon hangtud sa katapusan” (Church History and Modern Revelation, 2 vols. [1953], 1:138).
Doktrina ug mga Pakigsaad 43:22–31. Ang Ikaduhang Pag-anhi, ang Milenyum, ug “mubo nga panahon”
Ang Ginoo miingon nga paingon sa katapusan sa Milenyum, si Satanas “buhian pag-usab” apan “maghari lamang sa mubo nga panahon” (D&P 43:31). Ang mosunod nga diagram usa ka visual organizer aron makatabang sa pagpahimutang sa “mubo nga panahon” diha sa konteksto.