Doktrina ug mga Pakigsaad 66

Pasiuna

Human bunyagi si William E. McLellin sa ting-init sa 1831, gidawat niya ang tawag sa pagsangyaw sa ebanghelyo. Sa Oktubre, mibiyahe siya ngadto sa Ohio aron sa pagtambong og komperensya sa Simbahan. Didto iyang gikahimamat si Propeta Joseph Smith, ug sa Oktubre 29, 1831, mihangyo siya ni Joseph Smith sa pagpangutana sa Ginoo alang kaniya. Agi og tubag sa iyang hangyo, gihatag sa Ginoo ngadto ni Joseph Smith ang pagpadayag nga gi-rekord diha sa Doktrina ug mga Pakigsaad 66. Kini nga pagpadayag naglangkub og piho nga tambag kabahin sa espirituhanong kahimtang ni Brother McLellin, sa iyang tawag sa pagsangyaw sa ebanghelyo, ug sa iyang potensyal nga makadawat og dagkong mga panalangin.

Mga Sugyot alang sa Pagtudlo

Doktrina ug mga Pakigsaad 66:1–3

Nagpahayag ang Ginoo nga si William E. McLellin gipanalanginan tungod kay iyang gidawat ang ebanghelyo

Sa wala pay klase, kopyaha ang mosunod nga diagram diha sa pisara.

Sa pagsugod sa klase, dapita ang mga estudyante sa pag-eksamen sa diagram diha sa pisara. Hangyoa sila sa pagpamalandong og hilum kon asa man nila ibutang ang ilang kaugalingon diha sa diagram. Isugyot usab nga ilang ikonsiderar kon asa nga direksyon sila mopaingon—mas magpaduol sa Dios o mas magpalayo gikan Kaniya. Dayon dapita ang usa ka estudyante sa pagbasa og kusog sa mosunod nga pamahayag ni Presidente Henry B. Eyring sa Unang Kapangulohan. Hangyoa ang klase sa pagpaminaw sa mga paagi nga kita makapaduol ngadto sa Dios.

“Kon gusto kamo nga magpaduol sa usa ka tawo kinsa inyong gipangga, apan kamo nahimulag sa maong tawo, nasayud kamo kon unsaon kini pagbuhat. Mangita kamo og paagi nga ika-istorya sila, maminaw kamo kanila, ug makadiskubre kamo og mga paagi sa pagbuhat sa mga butang alang sa usag usa. Kon mas kanunay kana nga mahitabo, mas magpadayon kini og dugay, mahimong mas halawom ang kalig-on sa pagbati. Kon dako ang panahon nga molabay nga walay panag-istorya, pagpaminaw, ug pagbuhat, ang bugkos magkahuyang.

“Ang Dios hingpit ug makagagahum sa tanan, ug kamo ug ako mga mortal. Apan siya ang atong Amahan, siya nahigugma kanato, ug siya nagtanyag og samang oportunidad sa pagpaduol ngadto kaniya sama sa usa ka mahigugmaon nga higala. Ug buhaton ninyo kini sa sama gayud nga paagi: pagkig-istorya, pagpaminaw, ug pagbuhat” (“To Draw Closer to God,” Ensign, Mayo 1991, 66).

Sumala ni Presidente Eyring, unsaon nato nga mas mapaduol sa Dios? Unsa kaha ang gipasabut sa pagsinultihay, pagpaminaway, ug pagtinabangay?

Ipasabut nga sa unang mga adlaw sa Simbahan, usa ka tawo nga ginganlan og William E. McLellin mas napaduol sa Dios sa dihang iyang nahibaloan ang mahitungod sa gipahiuli nga ebanghelyo. Siya nabunyagan niadtong Agosto 20, 1831. Wala madugay human niana, naordinahan siya nga usa ka elder, ug siya miuban ni Hyrum Smith sulod sa pipila ka mga semana isip usa ka misyonaryo. Niadtong Oktubre 1831, mibiyahe siya ngadto sa Ohio alang sa usa ka komperensya sa Simbahan. Samtang didto, nahimamat niya si Propeta Joseph Smith. Sa Oktubre 29, nag-ampo sa tago si Brother McLellin, naghangyo sa Ginoo sa pagpadayag sa mga tubag sa lima ka piho nga mga pangutana pinaagi ni Joseph Smith. Sa walay pagsulti ni Joseph Smith sa mga pangutana, mihangyo si Brother McLellin og usa ka pagpadayag. Samtang gidiktar sa Propeta ang pagpadayag nga makita diha sa Doktrina ug mga Pakigsaad 66, nahibaloan ni Brother McLellin nga ang kada niya pangutana natubag. Gihatagan siya sa Ginoo og mga panudlo ug mga pahimangno aron makatabang nga magpabilin siya nga matinud-anon ug sa kadugayan madawat ang kinabuhing dayon.

Dapita ang usa ka estudyante sa pagbasa og kusog sa Doktrina ug mga Pakigsaad 66:1–2. Hangyoa ang klase sa pagsunod, nga mangita sa mga rason sa pagpanalangin sa Ginoo ni Brother McLellin sa panahon niini nga pagpadayag.

Nganong si Brother McLellin nakadawat man sa mga panalangin gikan sa Ginoo? (Tungod kay siya mibiya sa iyang mga sala, midawat sa mga kamatuoran sa Ginoo, ug midawat sa kahingpitan sa ebanghelyo.)

Dapita ang mga estudyante sa pagbasa og hilum sa Doktrina ug mga Pakigsaad 66:3, mangita sa unsay gisulti sa Ginoo nga kinahanglan pa nga buhaton ni Brother McLellin aron ikahimuot Niya. Hangyoa ang mga estudyante sa pag-report sa unsay ilang nakat-unan.

Unsa kaha ang gipasabut sa “limpyo, apan dili tanan”? (Mahimong kinahanglan nimong tabangan ang mga estudyante nga masabtan nga bisan si Brother McLellin nakahimo og dakong pag-uswag ug napanalanginan tungod sa iyang mga paningkamot, kinahanglan gihapon siya nga maghinulsol sa pipila ka mga sala.)
Unsa ang atong makat-unan gikan sa tambag sa Ginoo diha sa bersikulo 3? (Ang mga estudyante kinahanglang moila sa mosunod nga doktrina: Kita gimandoan sa paghinulsol sa tanan natong mga sala. Isulat kini nga doktrina diha sa pisara.)
Ngano nga mahinungdanon ang paghinulsol sa tanan natong mga sala, ug dili lamang ang pipila niini?

Dapita ang mga estudyante sa pagbasa pag-usab sa hilum sa bersikulo 3 nga mangita sa unsay buhaton sa Ginoo sa pagtabang ni William E. McLellin sa paghinulsol sa iyang tanan nga mga sala.

Unsa ang atong makat-unan gikan niining bersikulo mahitungod sa paagi nga ang Ginoo motabang kanato sa atong paghinulsol? (Kinahanglan nga ang mga estudyante mopahayag sa mosunod nga baruganan: Ang Ginoo mopakita kanato sa mga butang nga kinahanglan natong hinulsulan. Isulat sa pisara kini nga kamatuoran.)
Unsa ang pipila ka mga paagi ang Ginoo mopakita kanato sa mga butang nga kinahanglan natong hinulsulan?

Dapita ang usa ka estudyante sa pagbasa og kusog sa mosunod nga pamahayag ni Presidente Henry B. Eyring. Hangyoa ang klase sa pagpaminaw sa usa ka paagi nga kita makapangayo sa Ginoo og tabang sa atong paghinulsol.

“Usa sa mga pangutana nga kinahanglan gayud natong ipangutana sa atong Langitnong Amahan diha sa pribado nga pag-ampo mao kini: ‘Unsa man ang akong nabuhat karon, o wala nabuhat, nga wala Nimo ikahimuot? Kon masayud lang ko, maghinulsol ko sa tibuok nakong kasingkasing sa walay paglangay.’ Kanang mapainubsanon nga pag-ampo matubag” (“Do Not Delay,” Ensign, Nob. 1999, 34).

Awhaga ang mga estudyante sa paghunahuna mahitungod sa mga panalangin nga ilang nadawat samtang sila mibiya gikan sa sala ug midawat sa ebanghelyo. Dapita sila sa pagpaninguha nga mahibalo sa mga butang nga ilang gikinahanglan nga pagahinulsulan aron sila makadawat og mas dako nga mga panalangin.

Doktrina ug mga Pakigsaad 66:4–13

Nagmando ang Ginoo ni William E. McLellin sa pagsangyaw sa ebanghelyo, sa pagbiya sa tanang dili matarung, ug sa pagpadayon sa matinud-anong paagi hangtud sa katapusan

Balik og dangup ngadto sa saad sa Ginoo nga ipakita ang mga sala ni William E. McLellin nga gikinahanglan niyang hinulsulan. Dapita ang usa ka estudyante sa pagbasa og kusog sa Doktrina ug mga Pakigsaad 66:4. Hangyoa ang klase sa pagsunod, nga mangita kon unsa pay gisaad sa Ginoo nga ipakita ngadto ni Brother McLellin. Hangyoa ang mga estudyante sa pag-report kon unsay ilang makit-an.

Nganong panalangin kini nga mahibalo sa kabubut-on sa Dios alang kanato?

Ipares-pares ang mga estudyante. Hangyoa ang parisan nga magdungan og basa sa Doktrina ug mga Pakigsaad 66:5–9, mangita sa unsay gusto sa Ginoo nga buhaton ni Brother McLellin. Hangyoa ang mga estudyante sa pag-report kon unsay ilang makit-an. Hangyoa ang mga estudyante sa pag-report kon unsay ilang makit-an.

Sumala sa mga bersikulo 8–9, unsa nga mga panalangin ang madawat ni Brother McLellin kon siya matinud-anong mobuhat sa kabubut-on sa Ginoo? (Ang Ginoo magauban kaniya ug mopanalangin kaniya aron makalig-on sa matinud-anon ug makaayo sa masakiton.)
Unsa ang atong makat-unan gikan niini nga mga bersikulo mahitungod sa mga panalangin nga atong madawat kon kita mosunod sa kabubut-on sa Ginoo alang kanato? (Kinahanglang mahibaloan sa mga estudyante ang mosunod nga baruganan: Kon kita matinud-anon sa pagbuhat sa kabubut-on sa Ginoo, Siya magauban kanato ug mopanalangin kanato aron atong matuman kon unsa ang Iyang gipangayo gikan kanato. Isulat sa pisara kini nga baruganan.)

Ipasabut nga agi og dugang sa paghatag ni Brother McLellin og mga panudlo mahitungod sa unsay buhaton, ang Ginoo mihatag kaniya og usa ka pahimangno. Hangyoa ang usa ka estudyante sa pagbasa og kusog sa unang duha ka mga sentence sa Doktrina ug mga Pakigsaad 66:10. Sa dili pa siya mobasa, ipasabut nga ang unang sentence naglakip sa pulong nga masamok. Ipasabut nga dunay butang nga makasamok nato kon kini mobabag sa atong agianan o mohimo sa usa ka buluhaton nga lisud kaayong matuman.

Gimandoan sa Ginoo si Brother McLellin nga “biya[an] ang tanan nga dili matarung.” Sa unsa nga paagi nga ang pagkadili matarung, o ang sala, nagsamok sa misyonaryong buhat ni Brother McLellin? Sa unsa nga paagi nga ang pagkadili matarung magsamok kanato sa espirituhanong paagi?

Human motubag ang mga estudyante, isulat ang mosunod nga baruganan diha sa pisara: Ang Ginoo gusto kanato nga mobiya sa tanang mga butang nga nagsamok sa atong espirituhanong paglambo.

Awhaga ang mga estudyante sa paghunahuna sa hilum sa mga butang diha sa ilang mga kinabuhi nga mahimong nagsamok kanila.

Basaha og kusog ang ikatulong sentence sa Doktrina ug mga Pakigsaad 66:10 ug dapita ang klase sa pagpangita og usa ka pihong pahimangno nga gihatag sa Ginoo ngadto ni Brother McLellin.

Sumala sa bersikulo 10, unsa nga tintasyon nga gipanlimbasugan ni Brother McLellin?
Gikan sa bersikulo 10, unsa ang atong makat-unan mahitungod sa kahibalo sa Ginoo sa kada usa kanato? (Tabangi ang mga estudyante nga makita nga ang Ginoo nasayud sa atong piho nga mga hagit ug mga tintasyon, sama nga Siya nasayud sa mga hagit ug mga tintasyon ni Brother McLellin. Ikonsiderar ang pagdapit sa mga estudyante sa pagsulat niini nga kamatuoran tupad sa bersikulo 10.)
Ngano sa inyong hunahuna importante nga masabtan nga ang Ginoo nahibalo sa atong piho nga mga hagit ug mga tintasyon?

Ipasabut nga agi ug dugang sa pagkahibalo sa atong mga hagit ug mga tintasyon, nahibalo ang Ginoo sa atong mga kalig-on ug mga abilidad. Nakahibalo Siya sa tanan mahitungod kanato. Uban ang pagsabut nga nahigugma Siya kanato ug nakaila kanato sa hingpit, kita makapaninguha ug makasunod sa Iyang kabubut-on uban ang kompyansa ug pagsalig diha Kaniya.

Dapita ang usa ka estudyante sa pagbasa og kusog sa Doktrina ug mga Pakigsaad 66:11–13. Hangyoa ang klase sa pagsunod, nga mangita sa dugang nga tambag nga gihatag sa Ginoo ngadto ni William McLellin. Hangyoa usab ang klase sa pagpangita sa mga panalangin nga gisaad sa Ginoo ngadto ni Brother McLellin kon sundon kana nga tambag. Hangyoa ang mga estudyante sa pag-report kon unsay ilang makit-an.

Sumala sa bersikulo 12, unsay kinahanglan natong buhaton aron makadawat og kinabuhing dayon? (Tabangi ang mga estudyante sa pag-ila nga kon magpadayon kitang magmatinud-anon hangtud sa katapusan, makadawat kita og kinabuhing dayon. Isulat sa pisara kini nga baruganan.)
Unsa ang kahulugan niini nganha kaninyo ang magpadayong matinud-anon hangtud sa katapusan?

Ipasabut nga sa dihang gihatag kini nga pagpadayag, nadawat ni Brother McLellin ang usa ka pagpamatuod sa gipahiuli nga ebanghelyo. Human mahatag ang pagpadayag, mipamatuod siya sa propetikanhong calling ni Joseph Smith. Miingon siya, “Si Joseph Smith usa ka tinuod nga Propeta … sa Ginoo ug … adunay gahum ug nagdawat og mga pagpadayag gikan sa Dios” (Sulat gikan ni William E. McLellin ngadto sa mga paryente, Ago. 4, 1832, RLDS Archives, 4; gikutlo diha sa M. Russell Ballard, “What Came from Kirtland” [Church Educational System fireside alang sa mga young adult, Nob. 6, 1994], 8, speeches.byu.edu). Si Brother McLellin matinud-anong miserbisyo sulod sa pipila ka mga tuig ug natawag sa pagserbisyo isip usa sa unang mga sakop sa Korum sa Napulog Duha ka mga Apostoles niining dispensasyon. Hinoon, wala siya magpadayon nga matinud-anon hangtud sa katapusan. Sa tinuod, mibatok siya ni Propeta Joseph Smith, ug siya gipahimulag sa 1838. Mahimo nimong basahon og kusog ang mosunod nga paragraph:

“Samtang gipriso si Joseph didto sa Richmond, Mo., si McLellin, kinsa dako ug aktibo nga tawo, miadto sa hepe sa mga pulis ug nangayo sa pribiliheyo sa pagbunal sa Propeta. Gitugutan ang hangyo sa kondisyon nga mobalos si Joseph. Gipahibalo sa hepe sa mga pulis … ang matinguhaong hangyo ni McLellin, nga si Joseph misugot, kon ang iyang mga posas kuhaon. Niana midumili si McLellin sa pakig-away gawas kon siya adunay bunal, nga si Joseph hingpit nga miuyon, apan ang hepe sa mga pulis dili motugot kanila sa pag-away diha sa dili patas nga kondisyon” (“History of Brigham Young,” Millennial Star, Dis. 17, 1864, 808).

Giyahi ang atensyon sa mga estudyante ngadto sa diagram diha sa pisara, ug isugyot nga sila sa makausa na usab mokonsiderar asa nila ibutang ang ilang mga kaugalingon diha niana nga diagram. Dapita sila sa pagpamalandong sa mosunod nga pangutana:

Unsay inyong buhaton nga mas maduol ngadto sa Dios ug sa pagpadayon nga matinud-anon hangtud sa katapusan?

Pagpamatuod kalabut sa mga doktrina ug mga baruganan nga inyong nahisgutan, ug awhaga ang mga estudyante sa pagbuhat niini.

Komentaryo ug Background nga Impormasyon

Doktrina ug mga Pakigsaad 66. Ang lima ka mga pangutana ni William E. McLellin

Napulo ka tuig human si William McLellin napahimulag sa Simbahan, misulat siya mahitungod sa pagpadayag nga nadawat ni Joseph Smith nga sa karon gi-rekord diha sa Doktrina ug mga Pakigsaad 66:

“Nadawat nako pinaagi kaniya, ug gisulat unsay iyang gisulti sa usa ka pagpadayag kalabut sa akong kaugalingon. Gipaabut ug gituohan nako nga sa panahon nga makita ko si Bro. Joseph, makadawat ako og usa; ug nag-ampo ako sa Ginoo sa tago, ug nagluhod naghangyo kaniya nga ipadayag ang tubag sa lima ka mga pangutana pinaagi sa iyang Propeta, ug kana usab wala niya hibaloi ang akong paghimo sa maong hangyo. Ako karon nagpamatuod diha sa kahadlok sa Dios, nga ang kada pangutana nga akong gipangutana niini nga paagi sa Ginoo sa mga Panon, natubag sa akong hingpit ug tibuok nga katagbawan. Gitinguha ko kini alang sa usa ka pagpamatuod sa inspirasyon ni Joseph. Ug ako hangtud niining adlawa nagkonsiderar niini ngari kanako nga ebidensya nga dili nako malalis” (sa Ensign of Liberty, of the Church of Christ, Ene. 1848, 61).

Wala kita mahibalo unsay lima ka pangutana ni Brother McLellin. Hinoon, base sa iyang pamahayag nga ang pagpadayag mitubag sa iyang mga pangutana, atong mahunahuna nga siya nabalaka sa iyang kahimtang sa atubangan sa Ginoo ug nga buot siyang mahibalo unsay gusto sa Ginoo nga ipabuhat kaniya.