Doktrina ug mga Pakigsaad 133–135 (Unit 29)

Materyal sa Pagpangandam alang sa Home-Study Teacher

Summary sa mga Leksyon sa Daily Home-Study

Ang mosunod mao ang summary sa mga doktrina ug mga baruganan nga nakat-unan sa mga estudyante samtang sila nagtuon sa Doktrina ug mga Pakigsaad 133–135 (unit 29). Kini nga summary dili tuyo nga itudlo isip kabahin sa imong leksyon. Ang leksyon nga imong itudlo alang sa unit 29 magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.

Day 1 (Doktrina ug mga Pakigsaad 133:1–35)

Samtang gitun-an sa mga estudyante ang mga pagtulun-an sa Ginoo kalabut sa Iyang Ikaduhang Pag-anhi, ilang nakat-unan nga sa Iyang Ikaduhang Pag-anhi, Siya moabut agi og paghukom batok sa dili diosnon. Nahibaloan usab sa mga estudyante ang mga paagi nga kita makaandam sa atong kaugalingon ug sa uban alang sa Ikaduhang Pag-anhi. Kini nga pagpangandam naglakip sa paghinulsol ug dili na mobalik sa naandan nga mga sala.

Day 2 (Doktrina ug mga Pakigsaad 133:35–74)

Niini nga leksyon, mipadayon ang mga estudyante sa ilang pagtuon sa mga pagtulun-an sa Ginoo kalabut sa Iyang Ikaduhang Pag-anhi. Ilang nakat-unan nga isip mga sulugoon sa Dios, sila makatabang sa uban nga makaandam sa Ikaduhang Pag-anhi pinaagi sa pagpakigbahin sa ebanghelyo ngadto kanila. Nadiskubrihan usab sa mga estudyante nga ang Ginoo nag-andam og dagkong mga panalangin alang niadtong kinsa maghulat Kaniya ug nga kadtong kinsa maghinulsol ug mobalaan sa ilang mga kaugalingon makadawat og kinabuhing dayon.

Day 3 (Doktrina ug mga Pakigsaad 134)

Samtang gitun-an sa mga estudyante kining pamahayag mahitungod sa mga gituohan sa Simbahan kalabut sa pangagamhanan ug mga balaod, ilang nahibaloan ang mosunod nga mga kamatuoran: Ang mga pangagamhanan gipasiugdahan sa Dios alang sa kaayohan sa tawo, ug ang mga pangagamhanan adunay tulubagon sa Dios sa pagpanalipod sa mga katungod sa mga indibidwal, lakip na sa relihiyosong kagawasan. Nakat-unan usab nila nga kita kinahanglang mopaluyo ug mosuporta sa pangagamhanan diin kita nagpuyo ug manubag kita sa Dios sa pagsupak sa Iyang balaod ug sa balaod sa tawo.

Day 4 (Doktrina ug mga Pakigsaad 135)

Isip kabahin niini nga leksyon, nakat-unan sa mga estudyante ang mahitungod sa mga panghitabo nga may kalabutan sa pagkamartir ni Joseph ug Hyrum Smith ug natun-an ang pahibalo nga nahisulat mahitungod sa ilang kamatayon. Sa pagbuhat sa ingon, nadiskubrihan sa mga estudyante nga si Joseph ug Hyrum Smith misilyo sa ilang pagsaksi sa kamatuoran sa gipahiuli nga ebanghelyo sa ilang mga kinabuhi.

Pasiuna

Kini nga leksyon makatabang sa mga estudyante nga makasabut sa pipila sa buhat nga nahimo ni Joseph Smith alang sa kaluwasan sa katawhan. Makaangkon usab og oportunidad ang mga estudyante sa pagpakigbahin sa ilang mga pagpamatuod ni Propeta Joseph Smith ug sa Pagpahiuli sa ebanghelyo.

Mga Sugyot alang sa Pagtudlo

Doktrina ug mga Pakigsaad 135:1–7

Ang pagkamartir nilang Joseph ug Hyrum Smith gipahibalo

Sa dili pa magklase, i-display ang usa ka litrato ni Joseph Smith (tan-awa sa Libro sa mga Hulagway sa Ebanghelyo [2009], nu. 87; tan-awa usab sa LDS.org). Mahimo nimong ikonsiderar nga ipakanta sa klase ang “Praise to the Man” (Hymns, nu. 27) alang sa debosyonal nga himno. Sa dili pa ang debosyonal, ipasabut nga si W. W. Phelps misulat niining mga pulong sa himno agig paghandum ni Joseph Smith wala madugay human sa pagkamartir sa Propeta.

Sugdi ang leksyon pinaagi sa pagpangutana sa mosunod:

Nakaistorya na ba kamo og tawo kinsa dili miyembro sa Simbahan mahitungod ni Propeta Joseph Smith? Kon mao, unsa man ang inyong nahisgutan? (Kon walay usa nga nakasinati niini, pangutan-a ang mga estudyante kon unsay gusto nilang isulti sa mga tawo mahitungod ni Joseph Smith.)

Pahinumdumi ang mga estudyante nga ang Doktrina ug mga Pakigsaad 135 naglakip sa usa ka pahibalo sa pagkamartir ni Joseph ug Hyrum Smith. Dapita ang usa ka estudyante sa pagbasa og kusog sa unang sentence sa Doktrina ug mga Pakigsaad 135:3. Hangyoa ang klase sa pagsunod.

Unsa ang mensahe niini nga bersikulo? (Kinahanglang ipahayag sa mga estudyante nga si Joseph Smith nakahimo og daghan pa, gawas lamang kang Jesukristo, alang sa kaluwasan sa mga tawo niini nga kalibutan, kay ni bisan kinsa nga tawo nga nakapuyo dinhi.)
Unsa ang nabuhat ni Propeta Joseph Smith alang sa atong kaluwasan ug kahimayaan? (Isulat ang mga tubag sa mga estudyante diha sa pisara.)

Dapita ang usa ka estudyante sa pagbasa og kusog sa nahibilin sa Doktrina ug mga Pakigsaad 135:3. Hangyoa ang klase sa pagsunod, nga mangita sa mga pulong nga naghulagway kon unsay nahimo ni Joseph Smith alang sa atong kaluwasan. Hangyoa ang mga estudyante sa pagpangita og dugang nga mga item aron ipuno ngadto sa lista sa pisara.

Dapita ang usa ka estudyante sa pagbasa sa mosunod nga pamahayag ni Presidente Joseph F. Smith. Hangyoa ang klase sa pagpaminaw kon si kinsa ang naimpluwensya sa buhat ni Propeta Joseph Smith.

“Ang buhat nga gihimo ni Joseph Smith dili lamang kutob niining kinabuhia, apan may kalabutan usab kini ngadto sa umaabut nga kinabuhi, ug sa kinabuhi nga nanglabay na. Sa laing pagkasulti, may kalabutan kini niadtong nakapuyo sa kalibutan, niadtong kasamtangang namuyo ug niadtong umaabut pa nga mamuyo human kanato. Dili lang kini butang nga may kalabutan sa tawo samtang siya buhi pa, apan sa tanang tawhanong pamilya gikan sa tibuok kahangturan” (Gospel Doctrine, 5th ed. [1939], 481).

I-refer ngadto sa paghulagway bahin ni Joseph Smith nga mipagawas sa Basahon ni Mormon ug sa Doktrina ug mga Pakigsaad diha sa bersikulo 3. Aron matabangan ang mga estudyante nga mas makasabut sa kamahinungdanon niining buhat, dapita ang usa ka estudyante sa pagbasa og kusog sa Doktrina ug mga Pakigsaad 135:6. Hangyoa ang klase sa pagsunod, nga mangita og rason sa pagpagawas sa Basahon ni Mormon ug sa Doktrina ug mga Pakigsaad.

Sumala sa bersikulo 6, nganong gipagawas ang Basahon ni Mormon ug ang Doktrina ug mga Pakigsaad? (Ang mga estudyante mahimong mogamit og laing mga pulong, apan kinahanglan silang mahibalo sa mosunod nga kamatuoran: Ang Basahon ni Mormon ug ang Doktrina ug mga Pakigsaad gipagawas alang sa kaluwasan sa kalibutan.)
Sa unsang paagi nga kining mga basahon nakatampo ngadto sa kaluwasan sa kalibutan?
Sumala sa bersikulo 6, unsa ang nakapahimo sa Basahon ni Mormon ug sa Doktrina ug Pakigsaad nga malakip sa labing bililhon nga mga basahon nga mahimo ninyong maangkon?

Hangyoa ang mga estudyante sa pagpamalandong sa unsay ilang nahimo sa Basahon ni Mormon ug sa Doktrina ug mga Pakigsaad sa ilang kinabuhi.

Unsay atong mahimo aron ikapakita ang atong pagpasalamat alang sa gihimong sakripisyo ni Joseph ug ni Hyrum Smith sa pagpagawas niining mga basahon?

Dapita ang mga estudyante sa pagsulat diha sa ilang mga class notebook o mga scripture study journal og usa ka piho nga paagi nga sila makapakita sa ilang kamapasalamaton alang sa mga sakripisyo nga nahimo aron mapagawas kining mga basahon.

I-refer ngadto sa nalista sa pisara sa sayong bahin sa leksyon. Ipamatuod nga pinaagi sa pagtabang sa pagpahiuli sa kasulatan, sa tinuod nga doktrina, sa awtoridad ug mga yawe sa priesthood, sa mga ordinansa, ug sa organisasyon sa Simbahan ni Jesukristo, si Joseph Smith mitabang sa tanang mga anak sa Dios nga makabaton sa mga panalangin sa Pag-ula.

Ipasabut nga pipila sa mga tawo mahimong masayop sa pagsabut sa pagbati o gituohan sa mga Santos sa Ulahing mga Adlaw bahin ni Propeta Joseph Smith. Dapita ang usa ka estudyante sa pagbasa og kusog sa mosunod nga pamahayag ni Presidente Gordon B. Hinckley. Hangyoa ang klase sa pagpaminaw kon unsa ang pagtan-aw sa mga miyembro ngadto ni Joseph Smith kalabut sa Langitnong Amahan ug ni Jesukristo. Kon posible, mahimo nimong hatagan og kopya ang matag estudyante og kopya niining pamahayag.

“Kita wala magsimba sa Propeta. Nagsimba kita sa Dios ang atong Mahangturon nga Amahan ug sa nabanhaw nga Ginoong si Jesukristo. Apan atong giila ang Propeta; kita nagsangyaw kaniya; kita mitahud kaniya; mitamud kita kaniya isip usa ka instrumento diha sa mga kamot sa makagagahum sa pagpahiuli diha sa yuta ang karaan nga mga kamatuoran sa balaan nga ebanghelyo, uban sa priesthood diin pinaagi ang awtoridad sa Dios gigamit diha sa mga kalihokan sa Iyang Simbahan ug alang sa mga panalangin sa Iyang mga katawhan” (Joseph Smith Jr.—Prophet of God, Mighty Servant,” Liahona, Dis. 2005, 2).

Sa inyong kaugalingong mga pulong, unsaon ninyo sa pagpasabut ang mga pagbati sa mga miyembro sa Simbahan mahitungod ni Propeta Joseph Smith?

Dapita ang mga estudyante sa paghunahuna mahitungod sa epekto sa pagpangalagad ni Propeta Joseph Smith diha sa ilang mga kinabuhi ug sa mga kinabuhi sa minilyon sa tibuok kalibutan. Isulat ang mosunod nga mga pangutana diha sa pisara, ug hangyoa ang mga estudyante sa pagtubag niini diha sa ilang mga scripture study journal:

Sa unsang piho nga mga paagi nga ang inyong kinabuhi mahimong lahi kon wala pa ang pagpangalagad ni Propeta Joseph Smith?

Sa unsang paagi nga si Propeta Joseph Smith nakaimpluwensya sa inyong kahibalo ug relasyon ngadto sa Langitnong Amahan ug ni Jesukristo?

Dapita ang mga estudyante sa paggahin sa nahibilin nga oras sa klase sa pagpakigbahin sa ilang mga pagbati ug mga pagpamatuod mahitungod ni Propeta Joseph Smith ug sa Pagpahiuli sa ebanghelyo. Dapita sila sa pagkonsiderar gamit ang ilang mga tubag gikan sa kalihokan sa pagsulat sa sayo pa samtang sila mopahayag sa ilang mga pagbati ug mga pagpamatuod.

Tapusa kini pinaagi sa pagpakigbahin sa imong pagpamatuod kang Propeta Joseph Smith ug sa Pagpahiuli. Dapita ang mga estudyante sa pagpangita og mga oportunidad sa mosunod nga pipila ka adlaw sa pagpakigbahin sa ilang pagpamatuod ngadto sa uban mahitungod ni Propeta Joseph Smith ug sa iyang tahas sa pagpahiuli sa ebanghelyo. Mahimo nimong awhagon sila sa pagrekord sa ilang mga pagpamatuod ni Propeta Joseph Smith ug sa Pagpahiuli sa ebanghelyo diha sa ilang personal nga mga journal.

Pahinumdom: Ang paghatag sa mga estudyante og igong panahon sa pagpakigbahin sa ilang mga pagpamatuod sa katapusan niining leksyon mas importante kay sa pagkompleto sa mosunod nga kalihokan. Kon mahurot ang oras sa inyong klase sa pagpamatuod sa mga estudyante, mahimo nimong gamiton kini nga kalihokan sa laing adlaw kon ikaw duna pay daghang oras.

Hatagi ang mga estudyante og lista sa 25 ka mga scripture mastery reference sa Doktrina ug mga Pakigsaad ug kasaysayan sa Simbahan. Dapita sila sa pagkonsiderar kon hain sa mga scripture mastery passage ang mahimo nilang magamit sa pagtudlo sa usa ka tawo mahitungod sa Pagpahiuli sa ebanghelyo pinaagi ni Propeta Joseph Smith. Hangyoa ang mga estudyante sa pagsulat og usa ka mubo nga leksyon o pakigpulong gamit ang pipila sa mga scripture mastery passage nga ilang nahibaloan. Mahimo nilang masulat ang ilang mga leksyon o mga pakigpulong diha sa piraso nga papel o sa ilang mga scripture study journal. Ikonsiderar ang pagdapit og pipila ka mga estudyante sa pagtudlo sa ilang mga leksyon o sa pagbasa sa ilang mga pakigpulong ngadto sa klase isip kabahin sa umaabut nga mga debosyonal sa klase.

Sunod nga Unit (Ang Pagbaktas Padulong sa Kasadpan)

Hangyoa ang mga estudyante sa paghunahuna nga ang propeta naghangyo kanila sa pag-impake sa pipila nila ka mga kagamitan ug mobiyahe og gatusan ka milya diha sa usa ka karwahe o magtulod og kariton ngadto sa kayutaan nga wala pa mapuy-i. Ipasabut nga sa sunod nga unit, makakat-on sila bahin sa pagbaktas sa mga Santos padulong sa kasadpan. Makat-unan usab nila kon sa unsang paagi nga ang Ginoo nagpadayon sa paggiya sa Simbahan, lakip na sa pag-establisar sa sunod nga lider human sa kamatayon ni Propeta Joseph Smith.