Leksyon 152
Ang Pagtungha sa Perlas nga Labing Bililhon
Pasiuna
Niadtong 1851, si Elder Franklin D. Richards, usa ka sakop sa Korum sa Napulog Duha ka mga Apostoles ug ang presidente sa British Mission, mimantala sa pipila ka mga pinadayag, mga hinubad, ug mga sinulat ni Joseph Smith ug gitawag ang koleksyon nga Perlas nga Labing Bililhon. Atol sa kinatibuk-ang komperensya sa Simbahan niadtong Oktubre 1880, ang Simbahan midawat sa Perlas nga Labing Bililhon isip kasulatan—kabahin sa sumbanang mga basahon. “Ang Perlas nga Labing Bililhon mao ang usa ka pinili [seleksyon] sa mga pinili nga basahon nga naghisgot mahitungod sa daghan nga makahuluganon nga mga aspekto sa hugot nga pagtuo ug doktrina sa Ang Simbahan ni Jesukristo sa mga Santos sa Ulahing mga Adlaw” (Pasiuna sa ang Perlas nga Labing Bililhon).
Mga Sugyot alang sa Pagtudlo
Ang pagtungha sa Perlas nga Labing Bililhon
Ipakita o pagdrowing og hulagway sa usa ka perlas. Pangutan-a ang mga estudyante kon nakahibalo ba sila kon giunsa paghimo ang perlas. Kon wala sila makahibalo, ipasabut nga ang usa ka perlas nahimo sa sulod sa talaba samtang ang talaba naningkamot nga mawala ang iritasyon tungod sa nasulod nga butang, sama sa usa ka grano sa balas. Ang talaba mopagawas og usa ka butang nga moputos sa grano, nga sa katapusan maporma og perlas. Talagsaon ang natural nga mga perlas ug giisip nga bililhon.
Ipasabut nga karon ang mga estudyante makakat-on mahitungod sa gigikanan sa basahon sa kasulatan nga giulohan og ang Perlas nga Labing Bililhon. Makadiskobre sila og pipila ka mga rason nga dako og bili ang Perlas nga Labing Bililhon.
Dapita ang usa ka estudyante sa pagbasa og kusog sa unang paragraph diha sa pasiuna sa Perlas nga Labing Bililhon. Hangyoa ang klase sa pagpangita kon unsay anaa sa Perlas nga Labing Bililhon. Sa dili pa sila mobasa, mahimo nimong ipasabut nga ang pulong nga mga peryodiko nagpasabut sa mga pamantalaan o magasin—mga publikasyon nga gipang-apud-apod sa regular nga paagi, sama sa inadlaw-adlaw, sinemana, o binulan.
-
Sa unsa nga mga paagi kaha nga ang Perlas nga Labing Bililhon talagsaon ug bililhon?
Dapita ang usa ka estudyante sa pagbasa og kusog sa ikaduhang paragraph sa pasiuna. Hangyoa ang klase sa pagsunod, nga mangita kon nganong nahugpong ang Perlas nga Labing Bililhon. Dapita sila sa pag-report unsay ilang nakit-an.
I-summarize ang ikatulo nga paragraph sa pasiuna pinaagi sa pagpasabut nga sukad sa unang pag-imprinta sa ang Perlas nga Labing Bililhon, ang pipila sa mga sulod nadugang o nabalhin. Ang pipila sa mga sulod niini gidugang ug sa kaulahian gibalhin ngadto sa Doktrina ug mga Pakigsaad.
Dapita ang usa ka estudyante sa pagbasa og kusog sa paragraph nga gisugdan sa mga pulong nga “Mga pinili gikan sa Basahon ni Moises.” Hangyoa ang klase sa pagpangita kon sa unsang paagi nga nadawat ni Joseph Smith ang mga pagpadayag niining basahon.
Dapita ang mga estudyante sa pagbasa sa daklit sa basahon ni Moises ug mangita og bisan usa ka bersikulo nga naglakip sa usa ka kamatuoran nga ilang gikonsiderar nga bililhon. Human sa igong panahon, hangyoa ang mga estudyante nga ipakigbahin ang mga bersikulo ngadto sa ilang mga pares o sa tibuok klase.
Dapita ang mga estudyante sa pagbalik ngadto sa pasiuna sa Perlas nga Labing Bililhon. Dapita ang usa ka estudyante sa pagbasa og kusog sa paragraph nga gisugdan sa mga pulong nga “Ang Basahon ni Abraham.” Hangyoa ang klase sa pagsunod ug mangita kon sa unsang paagi nga nadawat ni Joseph Smith ang mga sinulat sa basahon ni Abraham. Dapita ang mga estudyante sa pag-report kon unsay ilang makit-an.
Aron matabangan sa pagpasabut kon sa unsang paagi nabatunan ni Joseph Smith ang karaang mga sinulat sa basahon ni Abraham, mahimong basahon o dapita ang usa ka estudyante sa pagbasa sa mosunod:
“Niadtong 3 sa Hulyo 1835 usa ka tawo nga ginganlan og Michael Chandler midala sa upat ka mga Egyptian mummy ug pipila ka mga linukot nga papyrus sa karaang sinulat nga Ehiptohanon ngadto sa Kirtland, Ohio. Ang mga mummy ug papyrus nadiskubrihan sa Ehipto pipila ka mga tuig ang milabay pinaagi ni Antonio Lebolo. Ang Kirtland usa sa mga tagboanan didto sa silangang bahin sa Estados Unidos aron ipasundayag ang mga mummy ni Chandler. Si Chandler nagtanyag sa pagbaligya sa mga mummy ug mga linukot nga papyrus ug, sa pag-awhag ni Propeta Joseph Smith, pipila ka mga miyembro sa Simbahan miamut og kwarta aron mapalit kini. Diha sa usa ka pamahayag nga pinetsahan og Hulyo 5, 1835, si Joseph Smith, nga mideklarar sa kaimportante niining karaang Ehiptohanong mga sinulat, mirekord: ‘Mipadayon ko sa paghubad sa pipila ka mga karakter o mga hieroglypics, ug dako kaayo ang among kalipay nga usa sa mga linukot gilangkuban sa mga sinulat ni Abraham. … Tinuod kaming nakaingon nga, ang Ginoo nagsugod na sa pagbutyag sa abunda nga kalinaw ug kamatuoran’ (History of the Church, 2:236)” (The Pearl of Great Price Student Manual [manwal sa Church Educational System, 2000], 28).
Ang uban nahibulong kon giunsa sa Propeta paghubad ang karaang mga sinulat. Ipasabut nga “si Propeta Joseph Smith wala gayud mipahibalo sa iyang pamaagi sa paghubad niining mga rekord. Sama sa tanang mga kasulatan, ang pagpamatuod sa katinuod niining mga sinulat usa ka butang nga nagkinahanglan og hugot nga pagtuo. Ang labing dakong ebidensya sa kamatuoran sa basahon ni Abraham dili makit-an sa pag-analisar sa pisikal nga ebidensya ingon man sa kasaysayan, apan sa mainampuon nga pagkonsiderar sa sulod ug gahum niini” (The Pearl of Great Price Student Manual, 28). Bisan og wala kita makahibalo sa eksakto nga pamaagi nga gigamit ni Joseph Smith sa paghubad sa mga sinulat, nakahibalo kita nga gihubad niya ang basahon ni Abraham pinaagi sa gasa ug gahum sa Dios.
-
Nganong importante nga makabaton og usa ka espiritwal nga pagsaksi sa pagkatinuod sa basahon ni Abraham?
Alang sa mosunod nga porsyon sa leksyon, ikonsiderar ang pagdapit sa duha ka mga estudyante sa pagduol sa atubangan sa classroom ug mo-role play sa pagka-reporter nga nag-interbyu og usa ka iskolar kinsa mipahinungod og dakong pagtuon sa sulod ug gigikanan sa mga basahon diha sa Perlas nga Labing Bililhon. Hangyoa sila sa pagbasa sa mosunod nga script:
-
Reporter:Nganong miingon si Joseph Smith nga siya mihubad sa mga sinulat ni Abraham bisan og ang mga manuskrito walay petsa gikan sa panahon ni Abraham?
-
Iskolar:Si Propeta Joseph Smith wala gayud miangkon nga ang mga papyrus mao gyud ang mga sinulat ni Abraham. Miingon siya nga ang basahon ni Abraham “usa ka hubad sa pipila ka karaang mga Rekord nga miabut sa among mga kamot, gikan sa mga Lubnganan sa Ehipto, nga gituohang mga sinulat ni Abraham, samtang didto siya sa Ehipto” (Times and Seasons, Mar. 1, 1842, 704).
“Niadtong 1966 onse ka mga piraso sa mga papyrus nga sa makausa gipanag-iya ni Propeta Joseph Smith nadiskubrihan didto sa Metropolitan Museum of Art sa Siyudad sa New York. Gihatag kini ngadto sa Simbahan ug gianalisar sa mga iskolar kinsa mibana-bana sa petsa niini sa tunga-tunga sa mga 100 B.C. ug A.D. 100. Usa ka komon nga pagsupak sa katinuod sa basahon ni Abraham mao nga ang mga manuskrito dili igo ang kakaraan nga nahimong nasulat ni Abraham, kinsa nabuhi hapit duha ka libo na ka mga tuig sa wala pa si Kristo. Si Joseph Smith wala gayud miangkon nga ang mga papyrus autographic (sinulat mismo ni Abraham), ni nga kini sukad pa sa panahon ni Abraham. Komon kini nga i-refer ang usa ka buhat sa tagsulat isip ‘iyang’ mga sinulat, siya man ang nagsulat niini, gidiktar kini ngadto sa lain, o ang uban mikopya sa iyang mga sinulat sa kaulahian” (The Pearl of Great Price Student Manual, 28).
-
Reporter:Unsa man ang gibuhat ni Joseph Smith sa iyang hubad?
-
Iskolar:“Ang basahon ni Abraham sa sinugdanan gianam sa pagmantala nga pipila ka mga pinili usa ka higayon sa Times and Seasons, usa ka publikasyon sa Simbahan, nga nagsugod niadtong Marso 1842 sa Nauvoo, Illinois (tan-awa [sa pasiuna] sa sinugdanan sa ang Perlas nga Labing Bililhon). Gisulti ni Propeta Joseph Smith nga siya momantala og dugang pa sa basahon ni Abraham sa kaulahian, apan siya gipatay sa wala pa siya makahimo sa ingon. Kalabut sa potensyal nga gitas-on sa nahuman nga hubad, si Oliver Cowdery makausa miingon nga ‘mga volume’ ang gikinahanglan aron mapaigo kini (tan-awa sa Messenger and Advocate, Dis. 1835, 236).
“Dugang pa ngadto sa hieroglyphic nga mga sinulat, ang manuskrito naglangkob usab og mga Ehiptohanon nga mga drowing. Pagka-23 sa Pebrero 1842, si Propeta Joseph Smith mihangyo ni Reuben Hedlock, usa ka propesyunal nga mangungulit ug miyembro sa Simbahan, sa pag-andam og mga kinulit nga kahoy niadtong tulo ka mga drowing aron kini maimprinta. Nahuman ni Hedlock ang mga kinulit sulod sa usa ka semana, ug si Joseph Smith mimantala sa mga kopya (facsimiles) kauban sa basahon ni Abraham. Ang pagpasabut ni Joseph Smith bahin sa mga drowing kauban sa mga facsimile” (The Pearl of Great Price Student Manual, 28–29).
-
Reporter:Unsa ang nahitabo sa mga mummy ug sa mga papyrus?
-
Iskolar:“Human sa kamatayon ni Propeta Joseph Smith, ang upat ka mga mummy ug ang ga papyrus napanag-iya sa balo nga inahan ni Joseph, si Lucy Mack Smith” (The Pearl of Great Price Student Manual, 29). Human namatay si Lucy Mack Smith, ang koleksyon nabaligya ngadto sa usa ka tawo nga ginganlan og Abel Combs. Ang koleksyon mahimong nabaligya sa asawa ni Joseph Smith nga si Emma, o mahimong nabaligya kini sa iyang igsoon nga si William. Si Mr. Combs mibaligya sa pipila sa koleksyon ngadto sa museum didto sa St. Louis, Missouri. Iyang gipabilin ang ubang porsyon ug sa kaulahian gipanghatag ang pipila niini. (Tan-awa sa The Pearl of Great Price Student Manual, 29; H. Donl Peterson, The Story of the Book of Abraham: Mummies, Manuscripts, and Mormonism [1995], 204–9, 257.)
“Pipila ka mga teyoriya ang nagtanyag kalabut sa unsay nahitabo … ngadto sa mga mummy ug sa mga papyrus. Gituohan kini nga duha sa mga mummy ang naapil sa dakong sunog sa Chicago niadtong 1871 (tan-awa sa B. H. Roberts, New Witnesses for God, 3 vols. [1909–11], 2:380–382).
“Sa sayong bahin sa tingpamulak sa 1966, si Dr. Aziz S. Atiya, usa ka propesor sa University of Utah, [mipahibalo ngadto sa Simbahan bahin sa pipila ka mga piraso sa mga papyrus ni Joseph Smith] nga nahimutang sa Metropolitan Museum of Art didto sa Siyudad sa New York. Kini nga mga piraso gipakita ngadto sa Simbahan pinaagi sa direktor sa museum pagka-Nobyembre 27, 1967. Ang kasamtangang nahimutangan sa lain pang mga mummy ug sa laing mga porsyon sa mga papyrus wala na mahibaloi [tan-awa sa H. Donl Peterson, “Some Joseph Smith Papyri Rediscovered (1967),” sa Studies in Scripture, Volume Two: The Pearl of Great Price, ed. Robert L. Millett ug Kent P. Jackson (1985), 183–85]” (The Pearl of Great Price Student Manual, 29).
Dapita ang mga estudyante sa pagbasa sa daklit sa basahon ni Abraham ug mangita og bisan usa ka bersikulo nga ilang gikonsiderar nga bililhon. Human sa igong panahon, dapita ang mga estudyante nga ipakigbahin ang mga bersikulo ngadto sa ilang mga pares o sa tibuok klase.
Hangyoa ang mga estudyante sa pagbalik ngadto sa pasiuna. Dapita ang usa ka estudyante sa pagbasa og kusog sa paragraph nga gisugdan sa mga pulong nga “Joseph Smith—Mateo.” Hangyoa ang klase sa pagsunod ug sa pagpangita kon sa unsang paagi nadawat ni Joseph Smith kining pinadayag. Dapita ang mga estudyante sa pagreport sa ilang mga nakit-an.
Ipasabut nga usa sa rason ang Joseph Smith—Mateo bililhon kay naglakip kini sa usa sa mga diskurso sa Manluluwas bahin sa Ikaduhang Pag-anhi.
Dapita ang usa ka estudyante sa pagbasa og kusog sa paragraph nga gisugdan sa mga pulong nga “Joseph Smith—Kasaysayan.” Hangyoa ang klase sa pagsunod aron masuta kon kanus-a giandam ni Joseph Smith kini nga kasaysayan.
Dapita ang mga estudyante sa pagbasa sa daklit sa Joseph Smith—Kasaysayan ug sa pagpangita og bisan usa ka bersikulo nga ilang gikonsiderar nga bililhon. Human sa igong panahon, dapita ang mga estudyante sa pagpakigbahin sa mga bersikulo ngadto sa ilang mga pares o sa tibuok klase.
Dapita ang mga estudyante sa paghunahuna nga ang usa ka higala naghangyo kanila sa pagpasabut sa mga gituohan sa Ang Simbahan ni Jesukristo sa mga Santos sa Ulahing mga Adlaw sa duha ka minutos. Hangyoa ang klase sa pagsulat diha sa ilang mga class notebook o mga scripture study journal kon sa unsa nga paagi sila motubag. Human sa pipila ka minutos, dapita ang duha ka estudyante sa pagbasa sa ilang nasulat.
Ipasabut nga ang Mga Artikulo sa Hugot nga Pagtuo naghatag og maayong summary sa atong mga gituohan. Aron matabangan ang mga estudyante nga makasabut sa gigikanan sa Mga Artikulo sa Hugot nga Pagtuo, ipasabut nga niadtong Marso 1, 1842, si Propeta Joseph Smith mitubag sa usa ka hangyo gikan ni John Wentworth, usa ka editor sa pamantalaan, sa paghatag og impormasyon mahitungod sa iyang kaugalingon ug sa kasaysayan ug mga gituohan sa Simbahan. Naila kini isip ang Wentworth Letter. Sa sulod niini, gipahayag ni Joseph ang 13 ka sukaranang mga baruganan sa ebanghelyo. Kini nga mga gituohan nalakip diha sa ang Perlas nga Labing Bililhon isip ang Mga Artikulo sa Hugot nga Pagtuo. Bisan og kini dili usa ka pamahayag sa tanan natong mga gituohan, importante kini nga hugpong sa mga doktrina ug mga baruganan.
Ipares-pares ang mga estudyante. I-assign ang matag parisan og bisan usa ka artikulo sa hugot nga pagtuo. (Base sa mga panginahanglan sa mga estudyante ug sa gidak-on sa imong klase, mahimo nimong i-assign ang matag parisan sa usa o dugang pa sa mga artikulo sa hugot nga pagtuo.) Hangyoa ang matag parisan sa pagbasa sa artikulo sa hugot nga pagtuo nga gi-assign ngadto nila ug sa pagsunod sa mga direksyon sa ubos. Mahimo nimong pakopyahan kining mga direksyon o isulat kini sa pisara. Ang mga estudyante mahimong mosunod niining mga direksyon diha sa ilang mga class notebook o mga scripture study journal.
-
Pagkahuman og basa sa gi-assign nganha ninyo nga artikulo sa hugot nga pagtuo, isulat ang doktrina o baruganan gamit ang inyong kaugalingong mga pulong.
-
Pangita og usa ka kasulatan nga makasuporta o magpasabut sa doktrina o baruganan sa artikulo sa hugot nga pagtuo nga na-assign diha ninyo. Isulat ang mga ideya nga nadugang sa kasulatan diha sa inyong pagsabut niining baruganan.
-
I-lista ang mga pamaagi nga ang pagsabut ug pagtuo niining artikulo sa hugot nga pagtuo mahimong makadala og mga panalangin ngadto sa kinabuhi sa usa ka tawo.
Human nga ang mga estudyante nakaangkon og igong panahon sa pagkompleto sa ilang assignment, dapita sila sa pag-report kon unsay ilang nasulat. Mahimo nimong isulat ang pipila sa mga kamatuoran nga ilang nahibaloan diha sa pisara.
-
Ngano nga ang Mga Artikulo sa Hugot nga Pagtuo bililhon diha nimo?
Dapita ang mga estudyante sa pagpakigbahin og mga kasinatian nga ilang naagian sa dihang ang Mga Artikulo sa Hugot nga Pagtuo o ang mga kamatuoran nga anaa niini nakatabang kanila sa pagpasabut sa ebanghelyo ngadto sa usa ka tawo. Mahimo usab nimong ipakigbahin ang imong kaugalingong kasinatian.
Hagita ang mga estudyante sa pagtuon ug pagmemorya sa Mga Artikulo sa Hugot nga Pagtuo. Mahimo nimong gamiton ang usa sa mga kalilhokan sa pagmemorya nga makit-an diha sa appendix niining manwal aron matabangan ang mga estudyante sa pagmemorya sa Mga Artikulo sa Hugot nga Pagtuo isip usa ka klase. Awhaga ang mga estuyante sa paggamit sa ilang kahibalo sa Mga Artikulo sa Hugot nga Pagtuo samtang sila mopasabut sa ilang mga gituohan ngadto sa uban.
Isulat ang mosunod nga dili kompleto nga pamahayag diha sa pisara: Ang Perlas nga Labing Bililhon mao ang ebidensya nga si Joseph Smith usa ka …
Tabangi ang mga estudyante sa pagkompleto sa pamahayag pinaagi sa pagpangutana sa mosunod:
-
Unsay gitudlo ngari kanato bahin sa katinuod sa bililhong mga kamatuoran nga anaa sa ang Perlas nga Labing Bililhon bahin ni Joseph Smith? (Kompletuha ang kamatuoran diha sa pisara sama sa mosunod: Ang Perlas nga Labing Bililhon mao ang ebidensya nga si Joseph Smith usa ka propeta, manalagna, ug tigpadayag.)
-
Sa unsa nga mga paagi kaha nga ang Perlas nga Labing Bililhon mao ang ebidensya sa pagkatawag ni Joseph Smith isip usa ka propeta?
Ipamatuod nga ang Perlas nga Labing Bililhon mao ang ebidensya nga si Joseph smith usa ka propeta, manalagna, ug tigpadayag. Kini nga basahon nagtudlo kanato sa mahinungdanong mga kamatuoran mahitungod sa Langitnong Amahan ug ni Jesukristo.
Komentaryo ug Background nga Impormasyon
Ang basahon ni Abraham: ebidensya sa balaang tawag ni Joseph Smith
“Ang basahon ni Abraham usa ka ebidensya sa dinasig nga pagtawag ni Propeta Joseph Smith. Migawas kini sa usa ka panahon sa dihang ang pagtuon bahin sa karaang Ehiptohanon nga pinulongan ug kultura bag-o lang nasugdan. Ang mga iskolar sa mga 1800 wala kaayo makasuhid sa natad sa Ehiptolohiya, ug gani, bisan walay pormal nga training sa karaang mga pinulongan ug wala kahibalo sa karaang Ehipto (gawas lang sa iyang buhat sa Basahon ni Mormon), si Joseph Smith misugod sa iyang paghubad sa karaang mga manuskrito. Ang Iyang kahibalo ug abilidad miabut pinaagi sa gahum ug gasa sa Dios, inubanan sa iyang kaugalingong determinasyon ug hugot nga pagtuo” (The Pearl of Great Price Student Manual [manwal sa Church Educational System, 2000], 29).
Ang mga Artikulo sa Hugot nga Pagtuo ug ang Wentworth Letter
Si Joseph Smith misulat ngadto ni John Wentworth, editor ug tigpatigayon sa Chicago Democrat, usa newspaper sa Illinois. Diha sa sulat mihatag si Propeta Joseph Smith sa usa ka istorya bahin sa mga doktrina ug kasaysayan sa mga Santos sa Ulahing mga Adlaw. Ang Mga Arktikulo sa Hugot nga Pagtuo usa ka bahin niana nga sulat. Alang sa teksto sa tibuok sulat, tan-awa ang “The Wentworth Letter,” Ensign, Hulyo 2002, 26–32.