Doktrina ug mga Pakigsaad 72–74

Pasiuna

Ang pagkaylap sa Simbahan ngadto sa Missouri ug ang pagbalhin og puyo ni Bishop Edward Partridge didto mihimo og panginahanglan alang sa laing bishop nga pagatawgon didto sa Ohio. Sa Disyembre 4, 1831, nadawat ni Propeta Joseph Smith ang tulo ka pagpadayag, nga gitipon diha sa Doktrina ug mga Pakigsaad 72. Kini nga mga pagpadayag mipahibalo sa calling ni Newel K. Whitney isip ang bag-ong bishop sa Ohio, mipadayag sa pipila ka mga katungdanan ni Bishop Whitney, ug mihatag og mga panudlo kalabut sa pagpundok ngadto sa Zion. Ang pagpadayag nga gi-rekord diha sa Doktrina ug mga Pakigsaad 73, gihatag sa Enero 1832, naglangkub sa direksyon sa Ginoo ngadto ni Joseph Smith ug Sidney Rigdon sa pagsugod sa ilang trabaho sa paghubad sa Biblia. Ang pagpadayag diha sa Doktrina ug mga Pakigsaad 74 nadawat sa 1830, sa wala pa mapahiuli ang Simbahan. Kini naglangkub sa pagpasabut sa Ginoo kabahin sa 1 Mga Taga-Corinto 7:14, usa ka kasulatan nga gigamit sa pipila ka mga tawo sa paghatag og katarungan sa bunyag sa bata.

Mga Sugyot alang sa Pagtudlo

Doktrina ug mga Pakigsaad 72:1–8

Gitawag sa Ginoo si Newel K. Whitney isip bishop sa Ohio

Pangutan-a ang mga estudyante hain nga mga calling sa Simbahan ang ilang gihunahuna nga hilabihan ka lisud.

Nakadawat ba kamo sukad og calling o gihangyo sa pagbuhat og lisud nga butang diha sa Simbahan ug gibati nga kini dako ra o dili makahimo sa pagbuhat niini? Kon oo, ngano?

Hangyoa ang mga estudyante sa pagsiksik og hilum sa Doktrina ug mga Pakigsaad 72:1–2 ug sa pag-ila sa calling nga nagkinahanglan nga pagahimoon diha sa Simbahan. Mahimo nimong ipasabut nga ang mga pulong “niini nga bahin sa ubasan sa Ginoo” nagpasabut sa Ohio.)

Unsa nga calling ang kinahanglang himoon diha sa Ohio?

Aron matabangan ang mga estudyante sa pagsabut kon nganong ang usa ka bag-ong bishop gikinahanglan sa Ohio, hangyoa sila sa paghinumdom kon kinsa ang gitawag isip ang unang bishop sa Simbahan (Edward Partridge; tan-awa sa D&P 41:9). Ipasabut nga uban sa pagkaylap sa Simbahan ngadto sa Missouri ug ang pagbalhin og puyo ni Bishop Partridge ngadto sa Independence, Missouri (duol sa 1,600 ka kilometro gikan sa Kirtland), mipadayag ang Ginoo nga usa ka bag-ong bishop ang gikinahanglan sa Ohio. Dapita ang pipila ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 72:3–6. Hangyoa ang klase sa pagsunod ug sa pagpangita sa mga pulong nga nagpasabut kon nganong ang mga Santos sa Ohio nagkinahanglan og usa ka bishop.

Sumala sa mga bersikulo 3 ug 5, ngano nga ang mga Santos sa Ohio nagkinahanglan og usa ka bishop ? (Aron sila manubag ngadto sa bishop alang sa ilang mga pagkatinugyanan.)
Sa unsa nga paagi kini susama sa atong pagkamay tulubagon ngadto sa usa ka bishop o branch president karon?

Dapita ang usa ka estudyante sa pagbasa og kusog sa Doktrina ug mga Pakigsaad 72:7–8. Hangyoa ang klase sa pagsunod ug sa pag-ila kon kinsa ang gitawag isip ang bag-ong bishop sa Ohio ug kinsa ang mipili kaniya sa pagtuman niini nga calling.

Kinsa ang gitawag isip ang bag-ong bishop sa Ohio?
Kinsa ang mipili ni Newel K. Whitney isip ang bag-ong bishop?
Unsa nga doktrina ang atong makat-unan gikan sa bersikulo 8 kalabut sa mga calling sa pagserbisyo diha sa Simbahan sa Ginoo? (Ang mga tubag sa mga estudyante mahimong magpakita sa mosunod nga doktrina: Ang mga calling sa pagserbisyo diha sa Simbahan ni Jesukristo nagagikan sa Manluluwas.)

Hangyoa ang mga estudyante sa pagkonsiderar kon unsa kaha ang ilang bation kon sila tawagon ngadto sa usa ka malisud nga calling sa Simbahan. Dapita ang usa ka estudyante sa pagbasa og kusog sa mosunod nga istorya, nga gisulti sa apong lalaki ni Newel K. Whitney nga si Elder Orson F. Whitney sa Korum sa Napulog Duha ka mga Apostoles. Hangyoa ang klase sa pagpaminaw kon unsay gibati ni Brother Whitney sa dihang gitawag siya isip usa ka bishop ug unsay iyang nakat-unan mahitungod kon diin gikan ang iyang tawag.

“Ang hunahuna sa pagdawat niining importanting responsibilidad (ang katungdanan sa bishop) hapit labaw kay sa maagwanta ni [Newel K. Whitney]. … Siya … wala mosalig sa iyang abilidad, ug [gibati] nga dili makahimo sa pagtuman sa dako ug balaang pagsalig. Sa iyang kalibog, mihangyo siya ngadto sa Propeta:

“‘Dili ako makahunahuna sa akong kaugalingon nga usa ka Bishop, Brother Joseph, apan kon ikaw moingon nga kini kabubut-on sa Ginoo, ako maninguha.’

“‘Dili kinahanglan nga motuo ka lamang sa akong pulong;’ mitubag ang Propeta, nga mabination, ‘Lakaw ug pangutan-a sa imong kaugalingon ang Amahan.’

“Si Newel … determinado sa pagbuhat ingon nga [ang Propeta] mitambag. Ang iyang mapainubsanon, kinasingkasing nga pag-ampo gitubag. Diha sa kahilum sa kagabhion ug kamingaw sa iyang lawak, nakadungog siya og usa ka tingog gikan sa langit: ‘ang imong kalig-on ania kanako.’ Ang mga pulong diyutay ug yano, apan dako kaayo og kahulugan. Ang iyang mga pagduda nawagtang sama sa yamog sa wala pa ang kaadlawon. Diha-diha dayon miadto siya sa Propeta, gisultihan niya nga siya nakasabut, ug andam sa pagdawat sa katungdanan nga siya gitawag ” (“The Aaronic Priesthood,” Contributor, Ene. 1885, 126).

Unsay nagtabang ni Newel K. Whitney aron andam nga dawaton ang iyang tawag sa pagserbisyo isip usa ka bishop?
Unsay atong makat-unan gikan sa iyang kasinatian nga makatabang kanato kon atong bation ang kadako sa usa ka calling o buluhaton diha sa Simbahan?
Sa unsa nga paagi nga ang pagsabut niana nga mga calling nga moserbisyo diha sa Simbahan nagagikan sa Manluluwas nagtabang kaninyo sa pagdawat ug makugihong maninguha sa pagtuman sa inyong mga calling?

Ikonsiderar ang pagpakigbahin og kasinatian nga nakapalig-on sa inyong pagpamatuod nga ang mga calling sa pagserbisyo diha sa Simbahan sa Ginoo nagagikan Kaniya.

Doktrina ug mga Pakigsaad 72:9–26

Nagpasabut ang Ginoo sa mga katungdanan sa usa ka bishop

Isulat ang mosunod nga kamatuoran diha sa pisara: Ang mga bishop ug mga branch president nagdumala sa temporal ug espirituhanon nga mga butang sa Simbahan diha sa ilang mga ward ug mga branch. (Mahimo nimong ipasabut nga ang temporal nagpasabut ngadto sa mga butang kalabut sa pisikal nga kinabuhi. Sama pananglit, ang mga bishop ug mga branch president nagdumala sa kabtangan sa Simbahan, mga pundo sa Simbahan, ug ang paggamit sa mga butang diha sa balay tipiganan sa bishop.)

I-summarize ang Doktrina ug mga Pakigsaad 72:9–26 pinaagi sa pagpasabut nga kini nga mga bersikulo naghulagway sa pipila ka mga katungdanan ni Bishop Whitney. Ipasabut nga ang mga katungdanan sa usa ka bishop nga gihulagway sa Ginoo niini nga pagpadayag una sa tanan kalabut ngadto sa tahas sa bishop ubos sa balaod sa pagpahinungod. Atol niini nga panahon, ang Simbahan wala mabahin ngadto sa mga ward nga may bishop nga nagdumala sa kada ward sama niini karon. Niana nga panahon dihay duha lamang ka bishop: Si Bishop Whitney mao ang bishop sa mga Santos sa Ohio, ug si Bishop Partridge mao ang bishop niadtong tua sa Missouri.

Doktrina ug mga Pakigsaad 73

Nagsugo ang Ginoo ni Joseph Smith ug Sidney Rigdon sa pagpadayon sa paghubad sa Biblia

I-summarize ang Doktrina ug mga Pakigsaad 73:1–2 pinaagi sa pagpasabut nga ang Ginoo nagtudlo nga ang mga elder kinsa nagsangyaw mopadayon sa pagbuhat sa mao hangtud sa sunod nga komperensya, nga pagahimoon sa sunod nga duha ka semana. Si Propeta Joseph Smith ug Sidney Rigdon kanunay nga nagsangyaw aron matabangan og kontra ang dili husto nga impormasyon mahitungod sa Simbahan nga miresulta gikan sa pagmantala sa mga sulat ni Ezra Booth. Dapita ang usa ka estudyante sa pagbasa og kusog sa Doktrina ug mga Pakigsaad 73:3–4. Hangyoa ang klase sa pagsunod, nga mangita sa unsay gimando sa Ginoo ni Joseph Smith ug Sidney Rigdon nga tutukan human sa komperensya.

Unsay gisugo sa Ginoo ni Joseph Smith ug Sidney Rigdon nga tutukan sa ilang mga paningkamot? Unsa nga “buluhaton sa paghubad” ang gipasabut sa Ginoo? (Ang pag-usab sa Biblia.)

Doktrina ug mga Pakigsaad 74

Nagpasabut ang Ginoo sa kahulugan sa 1 Mga Taga-Corinto 7:14

Dapita ang mga estudyante sa paghanduraw nga sila nagserbisyo isip full-time nga mga misyonaryo alang sa Simbahan. Samtang nakigsulti sa usa ka magtiayon kinsa nag-investigate sa Simbahan, ilang nahibaloan nga sila adunay anak kinsa namatay nga pipila lamang ka bulan ang panuigon. Ang magtiayon gisultihan sa ilang lider sa relihiyon nga ang gamayng bata dili makaadto sa langit tungod kay siya wala mabunyagi sa wala pa mamatay. Gibati ang tumang kaguol sa mga ginikanan tungod sa pagkawala sa ilang bata ug sa ilang pagtuo nga ang ilang gamay nga bata nawad-an sa iyang kaluwasan.

Hangyoa ang mga estudyante sa paghunahuna mahitungod sa usaon nila sa pagtubag niini nga sitwasyon, ug pahibaloon sila nga makabaton sila og oportunidad sa pagtubag sa dili madugay diha sa leksyon.

Ipasabut nga ang Doktrina ug mga Pakigsaad 74 naglangkob sa pagpasabut sa Ginoo sa 1 Mga Taga-Corinto 7:14. Dapita ang usa ka estudyante sa pagbasa og kusog sa Doktrina ug mga Pakigsaad 74:1, nga mao ang mga pulong ni Apostol Pablo gikan sa 1 Mga Taga-Corinto 7:14. Pahibaloa ang mga estudyante nga kini nga bersikulo sa 1 Mga Taga-Corinto gigamit sa pagsuporta sa nabatasan nga bunyag sa gagmayng bata. (Mahimo usab nimong ipasabut nga ang mga pulong nga walay pagtuo diha sa bersikulo 1 nagpasabut ngadto sa mga Judeo kinsa wala modawat sa ebanghelyo ni Jesukristo. Wala magsulti si Pablo nga ang usa ka tawo maluwas pinaagi sa pagkamatarung sa iyang kapikas apan nga ang pagkakabig sa usa ka kapikas makadala og makabalaang impluwensya ngadto sa pamilya.)

Dapita ang pipila ka mga estudyante sa pagpuli-puli sa pagbasa og kusog sa Doktrina ug mga Pakigsaad 74:2–6. Hangyoa ang klase sa pagsunod ug sa pagpangita og mga problema nga namugna sa panahon ni Apostol Pablo kon ang kapikas sa kaminyoon nakabig ngadto sa ebanghelyo ni Jesukristo ug ang laing kapikas nagsunod pa sa balaod ni Moises.

Unsa nga mga kalisud ang nasinati niini nga matang sa mga kaminyoon? (Ang mga magtiayon maglalis kon ang ilang mga anak pagatudloan ba sa pagtuo ug pagsunod sa ebanghelyo ni Jesukristo o sa balaod ni Moises [ tan-awa sa bersikulo 3]; ang mga bata kinsa gipadako nga nagsunod sa balaod ni Moises nagtubo nga wala magtuo sa ebanghelyo ni Jesukristo [tan-awa sa bersikulo 4].)
Sa unsa nga paagi nga ang panaglahi og relihiyoso nga mga tinuohan sulod sa kaminyoon nakaapekto niana nga pamilya sa magtiayon?

Ipasabut nga ang Pag-ula ni Jesukristo mitapos sa balaod ni Moises ug ang sirkumsisyon wala na kinahanglana. Bisan pa niana, ang mga Judeo kinsa misunod sa balaod ni Moises mituo nga ang usa ka batang lalaki hugaw gawas kon siya isirkunsidar [ipatuli]. Kini nga pagtuo nakamugna og mga problema sa mga pamilya diin ang usa sa ginikanan mituo sa ebanghelyo ni Jesukristo ug ang lain mituo sa balaod ni Moises. Susama nga panagbangi sa relihiyosong mga tinuohan ug mga nabatasan mahimong mahitabo karon sa mga pamilya diin ang usa sa mga kapikas miyembro sa Simbahan ug ang laing kapikas dili miyembro.

Dapita ang usa ka estudyante sa pagbasa og kusog sa Doktrina ug mga Pakigsaad 74:7. Hangyoa ang klase sa pagsunod, nga mangita sa unsay gitudlo sa Manluluwas mahitungod sa gagmayng mga bata.

Unsa ang gitudlo sa Ginoo kalabut sa gagmayng mga bata? (Ang mga estudyante mahimong mogamit og lahi nga mga pulong, apan ang ilang mga tubag kinahanglan nga magpakita sa mosunod: Ang gagmayng mga bata mga balaan, ingon nga nabalaan pinaagi sa Pag-ula ni Jesukristo. Mahimo nimong isugyot nga markahan sa mga estudyante kini nga kamatuoran diha sa ilang mga kasulatan.)

Pahinumdumi ang mga estudyante sa misyonaryo nga sitwasyon nga gipresentar sa sinugdanan sa leksyon. Dapita ang mga estudyante sa pagsulat sa Moroni 8:8–12 ug sa Doktrina ug mga Pakigsaad 29:46–50 isip mga cross-reference sunod sa Doktrina ug mga Pakigsaad 74:7. I-assign sa mga estudyante ang pagbasa sa Moroni 8:8–12 ug sa Doktrina ug mga Pakigsaad 29:46–50 kauban ang pares ug dayon mag-uban og hisgot sa mosunod nga pangutana:

Naggamit sa unsay inyong nakat-unan mahitungod sa kaluwasan sa gagmayng mga bata diha sa Doktrina ug mga Pakigsaad 74:7 ug sa Moroni 8:8–12, unsa ang inyong itudlo sa magtiayon kinsa mibati nga ang ilang namatay nga bata wala makaadto sa langit?

Dapita ang usa o duha ka mga pares sa pagpasabut unsay ilang itudlo. Tapusa pinaagi sa pagpamatuod sa gahum sa Pag-ula sa Manluluwas sa pagtubos sa gagmayng mga bata.

Komentaryo ug Background nga Impormasyon

Doktrina ug mga Pakigsaad 72:13. Miserbisyo si Bishop Whitney ubos sa pagpangulo ni Bishop Partridge

Si Bishop Edward Partridge gitawag isip ang unang bishop sa Simbahan. Si Bishop Whitney naglihok ubos sa pagpangulo ni Bishop Partridge. Si Presidente Joseph Fielding Smith mipasabut:

“Ang bishop sa Kirtland [Newel K. Whitney] ‘mohatag’ ngadto sa bishop sa Zion [Edward Partridge], sa rekord sa mga pagkatinugyanan, diin ang permanenting mga rekord kinahanglan nga pagatipigan. Tungod niini nga responsibilidad si Newel K. Whitney gitawag sa paglihok isip bishop. Gikinahanglan nga iyang pagabantayan ang balay tipiganan sa Ginoo diha sa Kirtland, ug sa pagdawat og mga salapi niana nga bahin sa ubasan, ug sa pagkuha og husay sa mga elder ingon nga siya gisugo; sa pagpangalagad sa ilang mga gikinahanglan, tanan niadtong kinsa kinahanglang mobayad alang niana nga ilang nadawat, tungod kay niana sila adunay ikabayad. Kining mga salapi nga nadawat ipahinungod ngadto sa kaayohan sa Simbahan, ‘ngadto sa kabus ug sa timawa.’ Kon adunay bisan kinsa nga dili makabayad, usa ka husay ang pagahimoon ‘ug ihatag ngadto sa bishop sa Zion, kinsa mobayad sa utang gikan niana diin ang Ginoo mobutang nganha sa iyang mga kamot’” (Church History and Modern Revelation, 2 ka mga bol. [1953], 1:270). (Tan-awa usab ang Doctrine and Covenants Student Manual, 2nd ed. [manwal sa Church Educational System, 2001], 152–53.)

Doktrina ug mga Pakigsaad 72:9–26. Ang balaod sa pagpahinungod sa Ohio ug ang mga katungdanan ni Bishop Whitney

Ang balaod sa pagpahinugod wala gayud sa hingpit gisunod didto a Ohio, sa kompleto nga porma, nga naglakip sa tibuok komunidad. Gisulayan kini sa mga Santos sa Colesville sa Thompson, Ohio, apan wala sila molampos tungod sa daghang nagkalain-laing mga hinungdan, lakip ang pagbakwi ni Leman Copley sa iyang tanyag nga tugutan ang mga Santos sa Colesville sa pagpuyo diha sa iyang yuta (tan-awa sa D&P 54). Bisan pa niana, ang mga baruganan ug ang mga naandan sa balaod sa pagpahinungod gisunod gihapon. Ang pipila sa mga miyembro naghupot og mga pagkatinugyanan, ug usa ka balay tipiganan gitukod aron sa pagtabang sa pag-amuma sa kabus ug timawa ingon man sa temporal nga mga panginahanglan sa Simbahan. Si Bishop Newel K. Whitney mao ang mobantay ug modumala niini nga mga elemento sa balaod sa pagpahinungod kauban sa ubang temporal nga mga butang sa Simbahan sa Ohio. Kini naglakip sa responsibilidad sa pagdumala sa mga kabtangan sa Simbahan sa diha nga dapit.

Usa sa unang mga responsibilidad ni Bishop Whitney mao ang pagtabang sa pag-amuma sa kabus ug sa timawa. Usa ka paagi nga gihimo niya kini mao ang paghatag og pagkaon nga hinatag sa mga miyembro kinsa naghimo og “mga miting sa puasa” alang sa katuyoan sa paghatag og pagkaon alang niadtong nagkinahanglan. Diha sa iyang calling, si Bishop Whitney mihatag sa iyang mga kahanas isip usa ka negosyante ug misakripisyo og daghan sa iyang temporal nga mga kapanguhaan alang sa Simbahan ug alang sa pag-amuma sa uban. Miserbisyo siya sa matinud-anong paagi isip bishop hangtud sa katapusan sa iyang kinabuhi—usa ka yugto nga hapit 19 ka tuig—atol sa panahon nga siya miserbisyo usab isip Presiding Bishop sa Simbahan, naghulip sa posisyon nga orihinal nga gihuptan ni Edward Partridge.

Doktrina ug mga Pakigsaad 72:20–22. Ang Literary Firm

Human sa Nobyembre 1831 nga komperensya sa Hiram, Ohio, unom ka lalaki gitawag sa pagpahinungod sa ilang panahon ug mga paningkamot sa pagdumala sa pagmantala, pag-imprinta, ug pag-apud-apod sa mga mantalaan sa Simbahan, lakip ang mga kasulatan (tan-awa sa D&P 70:3–4). Kini nga grupo sa mga lalaki—Joseph Smith, Martin Harris, Oliver Cowdery, John Whitmer, Sidney Rigdon, ug William W. Phelps—nailhan isip ang Literary Firm. Ang Ginoo mihatag og awtoridad niini nga mga lalaki sa pagpangayo og panabang alang sa kabuhian gikan sa bishop (tan-awa sa D&P 72:20), uban sa katuyoan nga kining pagmantala nga negosyo sa kadugayan mohatag og igong abut nga mahimong makabarug sa kaugalingon. Ang mga miyembro sa Literary Firm pagasuportahan pinaagi sa kita sa negosyo, samtang ang bisan unsang sobra nga ganansya ipahinungod og balik ngadto sa balay tipiganan sa Ginoo (tan-awa sa D&P 70:5–8). Bisan tuod og ang Literary Firm wala molungtad og pipila ka tuig, mihimo kini og importanting kontribusyon ngadto sa kalibutan pinaagi sa pagmantala sa Book of Commandments ug ang nagsunod niini nga ang Doktrina ug mga Pakigsaad, ingon man ang mga pamantalaan sa Simbahan sama sa Evening and the Morning Star. (Tan-awa sa Documents, Volume 2: Hulyo 1831–Enero 1833, vol. 2 sa Documents series sa The Joseph Smith Papers (2013), xxv–xxvi).

Doktrina ug mga Pakigsaad 74:4–6. Sayop nga mga tradisyon

Si Elder Richard G. Scott sa Korum sa Napulog Duha ka mga Apostoles naghatag og tambag alang sa pagtagad sa mga tradisyon o mga kustombre nga mga supak sa ebanghelyo ni Jesukristo:

“Ang pagdayeg sa etniko, kultural, o nasudnong kabilin mahimong makaayo ug makatabang apan kini makapalungtad usab og mga sundanan sa kinabuhi nga kinahanglan nga isalikway sa usa ka matinud-anon nga Santos sa Ulahing mga Adlaw. …

“Si [Presidente Howard W. Hunter miingon]: ‘Ako nagsugyot nga inyong hatagan og labing taas nga prayoridad ang inyong pagka-miyembro diha sa Simbahan ni Jesukristo. Tinoa ang bisan unsay ipabuhat kaninyo ni bisan kinsa pa, maggikan man kini sa pamilya, sa hinugugma, sa inyong kultural nga kabilin, o sa mga tradisyon nga inyong nasunod—tinoa ang tanan batok sa mga pagtulun-an sa Manluluwas. Kon inyong makita nga ang gipabuhat kaninyo nahisupak niadto nga mga pagtulun-an, isalikway kana nga butang ug ayaw kana pagtinguhaa. Dili kana magdala kaninyo og kalipay’ (“Counsel to Students and Faculty,” Church College of New Zealand, 12 Nob. 1990)” (“Removing Barriers to Happiness,” Ensign, Mayo 1998, 85).