Doktrina ug mga Pakigsaad 102

Pasiuna

Pagka Enero 1834 ang Simbahan mitubo ngadto sa labaw sa 3,000 ka mga miyembro. Kini nga pagtubo nakapatungha sa panginahanglan alang sa dugang nga pagpangulo aron modumala sa mga kalihokan sa Simbahan. Niadtong Pebrero 17, 1834, baynte kwatro ka mga halangdong pari nagpundok sa balay ni Joseph Smith alang sa komperensya diin ang unang high council sa Simbahan naorganisar. Si Orson Hyde, ang klerk sa miting, misulat nga ang halangdong konseho nakahimo tingali og pipila ka mga sayop sa minutes sa miting. Busa, ang konseho mibotar nga ang Propeta kinahanglan mohimo og bisan unsa nga gikinahanglan nga mga koreksyon. Si Joseph Smith migahin pagkasunod adlaw, Pebrero 18, naghimo sa dinasig nga kausaban niadtong inisyal nga mga minute. Ang mga minute giusab ug gidawat pagkasunod adlaw, Pebrero 19. Karon makita sa Doktrina ug mga Pakigsaad 102, kini nga mga minute milatid sa pagkatukod sa mga halangdon nga konseho ug naghatag og direksyon sa mga stake presidency ug halangdon nga konseho kanus-a sila mohimo og pagdisiplina sa mga tawo nga nakabuhat og seryoso nga mga kalapasan. (Pahinumdom nga ang mga district presidency ug mga district council mahimong tugutan nga mosunod niini nga mga pamaagi.)

Mga Sugyot alang sa Pagtudlo

Doktrina ug mga Pakigsaad 102:1–5

Ang unang halangdon nga konseho sa Simbahan naorganisar

Basaha pagkusog ang mosunod nga istorya nga giistorya ni Presidente Harold B. Lee:

“Pipila ka tuig na ang milabay … nagserbisyo ako isip stake president. Kami dunay seryoso kaayo nga kaso nga miabut atubangan sa halangdon nga konseho ug sa kapangulohan sa stake nga miresulta sa excommunication sa usa ka tawo nga miamong-among sa usa ka matahum nga batan-ong babaye. Human sa hapit mahurot ang tibuok gabii nga sesyon nga miresulta niana nga aksyon, miadto ako sa akong opisina nga gikapoy pagkasunod buntag ug gisukmatan sa igsoon niining tawhana nga among [gipaatubang sa halangdon nga konseho] sa miaging gabii. Kining tawhana miingon, ‘Gusto kong sultihan ko ikaw nga ang akong igsoon walay sala sa inyong gipasangil kaniya.’

“‘Giunsa nimo sa pagkahibalo nga siya walay sala?’ Nangutana ko.

“‘Tungod kay nag-ampo ko, ug ang Ginoo miingon nako nga siya inosente,’ tubag sa tawo” (Teachings of Harold B. Lee, ed. Clyde J. Williams [1996], 420–21).

Sa inyong opinyon, sa unsa nga paagi nga ang tawo nakadawat og tubag nga lahi sa desisyon nga nahimo sa kapangulohan sa stake ug sa halangdon nga konseho?

Ipasabut nga ang Doktrina ug mga Pakigsaad 102 adunay mga baruganan nga makatabang nato nga makasabut kon sa unsa nga paagi nga ang mga kapangulohan sa stake ug mga halangdon nga konseho magtinguha sa kabubut-on sa Ginoo mahitungod kon unsaon sa pagtabang ang mga miyembro sa Simbahan kinsa nakahimo og seryoso nga mga kalapasan.

Dapita ang usa ka estudyante sa pagbasa og kusog sa Doktrina ug mga Pakigsaad 102:1. Hangyoa ang klase sa pagsunod ug sa pag-ila kon unsa ang halangdon nga konseho.

Unsa ang halangdon nga konseho? (Usa ka grupo sa 12 ka halangdon nga mga pari nga dumalahon sa “usa o tulo ka mga presidente.” Ang presidente sa stake ug ang iyang mga magtatambag modumala sa halangdon nga konseho.)

Ipasabut nga ang halangdon nga konseho nga gihulagway sa Doktrina ug mga Pakigsaad 102 lahi sa pipila ka paagi gikan sa mga halangdon nga konseho sa mga stake karon. Kini adunay kinatibuk-ang hurisdiksyon sa Kirtland, Ohio, ug sa naglibut nga mga dapit ug gidumala sa Unang Kapangulohan. Hinoon, sa pagdaghan sa mga miyembro sa Simbahan, ang mga stake giorganisar ug mga kapangulohan sa stake ug mga halangdon nga konseho gitawag sa pagpangalagad sa Simbahan diha sa mga utlanan sa indibidwal nga stake.

Dapita ang usa ka estudyante sa pagbasa og kusog sa Doktrina ug mga Pakigsaad 102:2. Hangyoa ang klase sa pagsunod, nga mangita sa katuyoan sa halangdon nga konseho ug sa unsa nga paagi kini matudlo.

Sa unsa nga paagi itudlo ang halangdon nga konseho? Unsa ang katuyoan niini?

Human makatubag ang mga estudyante sa pangutana sa ibabaw, isulat sa pisara ang mosunod nga kamatuoran: Ang halangdon nga konseho itudlo pinaagi sa pagpadayag sa paghusay sa importante nga mga kalisud nga moabut diha sa Simbahan. Ipasabut nga ang “importante nga mga kalisud” sa kinatibuk-an nagpasabut sa mga sitwasyon diin ang mga miyembro nakabuhat og seryoso nga kalapasan.

Ipasabut nga ang istorya ni Presidente Lee sa sinugdanan sa leksyon naghatag og ehemplo sa responsibilidad sa halangdon nga konseho: sa paglihok isip usa ka konseho sa pagdisiplina sa Simbahan, ubos sa direksyon sa kapangulohan sa stake. Aron matabangan ang klase nga makasabut sa katuyoan sa mga konseho sa pagdisiplina, dapita ang usa ka estudyante sa pagbasa og kusog sa mosunod nga pamahayag. Hangyoa ang klase sa pagpaminaw sa tulo ka katuyoan sa mga konseho sa pagdisiplina sa Simbahan.

“Ang pinakabug-at nga mga kalapasan, sama sa grabe nga mga paglapas sa sibil nga balaod, pag-abuso sa kapikas, pag-abuso sa bata, panapaw, pakighilawas nga dili minyo, panglugos, ug pakighilawas sa duol nga kabanay, sa sagad nagkinahanglan og pormal nga disiplina sa Simbahan. Ang pormal nga disiplina sa Simbahan mahimo nga maglakip sa pagdili sa mga kahigayunan sa pagkamiyembro sa Simbahan o pagtangtang sa pagkamiyembro sa Simbahan.

“… Ang mga katuyoan sa mga konseho sa pagdisiplina sa Simbahan mao ang [1] pagluwas sa mga kalag sa mga malapason, [2] pagpanalipud sa inosente, ug [3] pagpanalipud sa kalimpyo, kaligdong, ug sa maayong pangalan sa Simbahan.

“Ang disiplina sa Simbahan maoy usa ka dinasig nga proseso nga nahitabo sa nanglabay’ng tagal sa panahon. Pinaagi niini nga proseso ug pinaagi sa Pag-ula ni Jesukristo, ang usa ka miyembro mahimo nga makadawat og pasaylo sa mga sala, makabaton pag-usab og kalinaw sa hunahuna, ug makabaton og kalig-on sa paglikay sa umaabot nga kalapasan” (Matinud-anon sa Tinuhoan: Usa ka Pakisayran sa Ebanghelyo [2004], 37–38).

Unsa ang tulo ka katuyoan sa mga konseho sa pagdisiplina sa Simbahan?

Dapita ang usa ka estudyante sa pagbasa og kusog sa Doktrina ug mga Pakigsaad 102:4. Hangyoa ang klase sa pagsunod, nga mangita sa mga pulong nga naghulagway kon unsaon sa mga sakop sa halangdon nga konseho pagtuman sa ilang tawag. Dayon hangyoa ang mga estudyante sa pag-report unsay ilang nakit-an.

Doktrina ug mga Pakigsaad 102:6–34

Ang proseso alang sa konseho sa pagdisiplina gihatag

I-summarize ang Doktrina ug mga Pakigsaad 102:6–11 pinaagi sa pagsulti sa mga estudyante nga kini nga mga bersikulo nagpasabut kon unsaon sa halangdon nga konseho pagpalakaw kon ang tanang sakop wala diha. Dapita ang mga estudyante sa pagbasa og hilum sa Doktrina ug mga Pakigsaad 102:12–14 aron makat-unan sa unsa nga paagi nga ang mga sakop sa halangdon nga konseho pilion sa pagsulti diha sa konseho sa pagdisiplina. Dayon hangyoa ang mga estudyante sa pagreport unsay ilang nakit-an.

Unsa ang gipasabut sa pagripa? (Kining bahina, nagpasabut kini nga ang mga sakop sa konseho mohulbot og numero gikan sa 1 hangtud 12.)

Dapita ang usa ka estudyante sa pagbasa og kusog sa Doktrina ug mga Pakigsaad 102:15–18, ug hangyoa ang klase sa pagpangita sa mga rason ngano nga ang halangdon nga konseho mohulbot og mga numero.

Unsay atong makat-unan gikan sa bersikulo 15–16 mahitungod sa paagi sa pagpahigayon sa mga konseho sa pagdisiplina? (Human makatubag ang mga estudyante, isulat ang mosunod diha sa pisara: Sa Simbahan ni Jesukristo, ang mga konseho sa pagdisiplina ipahigayon sumala sa katarung ug kaangayan.)
Kon ang usa ka halangdon nga konseho makahulbot og even nga numero atol sa konseho sa pagdisiplina, unsa ang iyang responsibilidad? Sa unsa nga paagi kini nagpakita nga nagpakabana ang Ginoo sa mga miyembro sa Simbahan nga nakahimo og seryoso nga sala?

Dapita ang usa ka estudyante sa pagbasa og kusog sa Doktrina ug mga Pakigsaad 102:19. Hangyoa ang klase sa pagsunod, ug sa pag-ila unsay buhaton sa presidente sa konseho human mapaminaw ang duha ka habig sa kaso. Dayon hangyoa ang mga estudyante sa pagreport unsay ilang nakit-an.

Sa unsa nga paagi kini makatabang sa presidente sa stake sa paghimo og desisyon sa pagpaminaw pag-una sa mga sakop sa konseho nga mosulti alang sa sinumbong ingon man usab sa interes sa Simbahan?

Dapita ang usa ka estudyante sa pagbasa og kusog sa mosunod nga pamahayag ni Presidente Gordon B. Hinckley, ug dapita ang klase sa pag-obserbar unsay buhaton sa presidente sa konseho agig dugang sa pagpaminaw sa duha ka habig sa kaso:

“Akong ipaniguro kaninyo … nga wala gayuy paghukom nga ihatag hangtud human makaampo. Ang aksyon batok sa usa ka miyembro seryoso kaayo nga butang nga moresulta gikan sa paghukom sa mga tawo lamang, ug ilabi na sa usa ka tawo lamang. Kinahanglang dunay giya sa Espiritu, nga gitinguha pag-ayo ug dayon sundon, kon kinahanglang dunay kaangayan” (“In … Counsellors There Is Safety,” Ensign, Nob. 1990, 50).

Unsa ang buhaton sa presidente sa stake dugang sa pagpaminaw sa duha ka habig sa kaso?
Sumala sa bersikulo 19, unsay giawhag sa presidente nga buhaton sa konseho human siya mohimo og desisyon?

I-summarize ang Doktrina ug mga Pakigsaad 102:20–22 pinaagi sa pagpasabut nga kini nga mga bersikulo naghatag og instruksyon kon unsay buhaton kon adunay kalibug mahitungod sa desisyon.

Dapita ang usa ka estudyante sa pagbasa og kusog sa Doktrina ug mga Pakigsaad 102:23. Hangyoa ang klase sa pagsunod ug sa pag-ila unsay angay buhaton kon ang mga isyu sa doktrina dili klaro. Dapita ang mga estudyante sa pagreport unsay ilang nakat-unan.

Unsa nga kamatuoran ang gitudlo sa bersikulo 23? (Human makatubag ang mga estudyante, isulat sa pisara ang mosunod nga kamatuoran: Ang Ginoo mipadayag sa Iyang hunahuna niadtong kinsa modumala sa mga konseho sa pagdisiplina.)

I-summarize ang Doktrina ug mga Pakigsaad 102:27–34 pinaagi sa pagpasabut nga ang mga desisyon sa konseho sa pagdisiplina sa stake mahimong i-apelar sa Unang Kapangulohan.

Ribyuha uban sa mga estudyante ang istorya nga gisulti ni Presidente Harold B. Lee sa sinugdanan niini nga leksyon.

Kinsa ang inyong mas saligan—ang kapangulohan sa stake ug halandon nga konseho o ang tawo nga mibatok sa ilang desisyon?
Base sa mga kamatuoran nga inyong nakat-unan sa inyong pagtuon sa Doktrina ug mga Pakigsaad 102, nganong makasalig kita sa mga desisyon nga gihimo sa mga konseho sa Simbahan sa pagdisiplina?

Human makatubag ang mga estudyante, mahimo kang modapit og usa ka estudyante sa pagbasa og kusog sa nahibilin nga istorya ni Presidente Lee:

“Gihangyo nako siya nga mosulod sa opisina ug nanglingkod kami, ug nangutana ko, ‘Mahimo ba kong mangutana nimo og pipila ka personal nga mga pangutana?’

“Miingon siya, ‘Nganong dili.’ …

“‘Pilay imong edad?’

“‘Kwarenta y siete.’

“‘Unsa nga priesthood ang imong gihuptan?’

“Miingon siya nga basin usa siya ka teacher.

“‘Ikaw ba nagsunod sa Pulong sa Kaalam?’

“‘Ahh, wala.’ …

“‘Nagbayad ka ba sa imong ikapulo?’

“Miingon siya, ‘Wala’—ug dili gayud siya mobayad kon kana … nga tawo mao gihapon ang bishop sa Thirty-Second Ward.

“Miingon ko, ‘Motambong ka ba sa imong mga miting sa priesthood?’

“Mitubag siya, ‘Wala, sir!’ …

“‘Wala sad ka motambong sa imong miting sa sakrament?’

“‘Wala, sir.’

“‘Duna ba kamoy pag-ampo sa pamilya?’ ug miingon siya nga wala.

“‘Nagtuon ka ba sa mga kasulatan?’ Miingon siya nga, daut na ang iyang mga mata, ug dili na kaayo siya makabasa. …

“‘Karon,’ miingon ko, ‘kinse sa labing maayong mga tawo nga nagpuyo sa Pioneer Stake nag-ampo kagabii. … Karon ikaw, nga wala mobuhat niining mga butanga, miingon ka nga ikaw nag-ampo ug nakadawat og lahi nga tubag. Unsaon man nimo sa pagpasabut niana?’

“Dayon ang tawo mihatag sa iyang tubag nga sa akong pagtuo usa ka classic. Miingon siya, ‘Aw, Presidente Lee, nagtuo ko nga akong nakuha ang akong tubag sa sayop nga tinubdan’” (Teachings of Harold B. Lee, 421–22).

Ikonsiderar ang pagpakigbahin sa inyong pagpamatuod mahitungod ngano nga kita makasalig sa mga desisyon sa kapangulohan sa stake ug sa mga halangdon nga konseho sa Simbahan.

Komentaryo ug Background nga Impormasyon

Doktrina ug mga Pakigsaad 102. Mga konseho sa disiplina sa Simbahan

Si Elder M. Russell Ballard sa Korum sa Napulog Duha ka mga Apostoles mipasabut sa mosunod mahitungod sa mga konseho sa pagdisiplina sa Simbahan:

“Ang mga miyembro usahay mangutana ngano nga himoon ang mga konseho sa pagdisiplina sa Simbahan. Ang mga katuyoan adunay tulo ka bahin: pagluwas sa mga kalag sa mga malapason, pagpanalipud sa inosente, ug pagpanalipud sa kalimpyo, kaligdong, ug sa maayong pangalan sa Simbahan.

“Ang Unang Kapangulohan mitudlo nga ang mga konseho sa pagdisiplina kinahanglang himoon kon dunay pagpatay, panghilawas sa kabanay, [pag-abuso sa bata (sekswal o pisikal),] o apostasiya. Ang konseho sa pagdisiplina kinahanglan usab nga himoon kon dunay prominente nga lider sa Simbahan nga nakahimo og seryoso nga kalapasan, kon ang malapason usa ka madagmalon nga tingali hulga ngadto sa ubang mga tawo, kon ang tawo nagpakita og sunod-sunod nga seryoso nga mga kalapasan, [ug] kon ang seryoso nga kalapasan nahibaloan sa kadaghanan. …

“Ang mga konseho sa disiplina mahimo usab nga himoon sa pagkonsiderar sa kahimtang sa miyembro diha sa Simbahan human sa seryoso nga kalapasan, sama sa aborsyon, operasyon sa pag-usab sa sekso, pagsulay sa pagpatay, paglugos, sekswal nga pang-abuso, tinuyo nga pagpahamtang og seryoso nga pisikal nga kadaot ngadto sa uban, panapaw, o panghilawas sa dili minyo, homosexual nga mga relasyon, … pag-abuso sa kapikas, tinuyo nga pagbiya sa mga responsibilidad sa pamilya, panulis, panglungkab, paghilabot og kwarta, pangawat, pagbaligya og ilegal nga mga drugas, pangilad, pamakak, o bakak nga panumpa. [Ang konseho sa pagdisiplina mahimo usab nga himoon kon ang malapason sad-an sa seryoso nga bakak nga mga binuhatan, dili tinuod nga mga representasyon, o ubang mga matang sa pangilad o dili matinuoron sa mga transaksyon sa negosyo.]

“Ang mga konseho sa pagdisiplina dili himoon sa paghusay sa sibil o kriminal nga mga kaso. Ang desisyon sa sibil nga korte mahimong makatabang sa pagtino kon himoon ba ang konseho sa pagdisiplina sa Simbahan. Hinoon, ang sibil nga korte dili makadiktar sa desisyon sa konseho sa pagdisiplina.

“Ang mga konseho sa pagdisiplina dili himoon alang sa mga butang nga pagkapakyas sa pagbayad sa ikapulo, sa pagsunod sa Pulong sa Kaalam, sa pagtambong sa simbahan, o sa pagdawat og mga home teacher. Dili kini himoon tungod sa pagkabangkaruta sa negosyo o wala makabayad sa mga utang. Wala kini himoa aron mohusay sa mga panagbangi sa mga miyembro. Ni himoon kini alang sa mga miyembro kinsa nagdemanda nga kuhaon ang ilang mga pangalan gikan sa mga rekord sa Simbahan o [nahimong dili kaayo aktibo]. …

“Ang konseho sa pagdisiplina sugdan og pangbukas nga pag-ampo, sundan sa pamahayag sa rason nga gihimo ang konseho. Ang miyembro hangyoon sa pagsulti sa yanong mga termino mahitungod sa kalapasan ug sa pagpasabut sa iyang mga pagbati ug unsa nga mga lakang sa paghinulsol ang nabuhat na niya. Ang miyembro motubag sa mga pangutana gikan sa mga lider. Dayon siya pagawason, ug ang mga lider magtinambagay, mag-ampo, ug mohimo og desisyon.

“Ang konseho mohimo og daghang mga konsiderasyon, sama kon nasupak ba ang mga pakigsaad sa kaminyoon sa templo, naabusohan ba ang pagsalig o awtoridad; ang pagbalik-balik, kaseryoso, ug gidak-on sa kalapasan; ang edad, kahingkod, ug kasinatian sa malapason; ang mga interes sa inosente nga mga biktima ug inosente nga mga sakop sa pamilya; ang panahon tali sa kalapasan ug paghinulsol; kon boluntaryo ba ang pagkumpisal o dili; ug ebidensya sa paghinulsol.

“Kadtong kinsa molingkod diha sa konseho kinahanglang mohimo sa tanan nga kompidensyal kaayo ug sa pagdumala niini pinaagi sa espiritu sa gugma. Ang ilang tumong dili ang pagpanimalos, hinoon, pagtabang kini sa miyembro sa paghimo sa mga kausaban nga gikinahanglan aron makabarug nga limpyo sa atubangan sa Dios sa makausa pa.

“Ang mga desisyon sa konseho kinahanglang himoon pinaagi sa inspirasyon. Ang konseho makahimo sa usa sa upat ka mga desisyon: (1) walay aksyon, (2) pormal nga pagsulay, (3) pag-disfellowship, o (4) excommunication.

“Bisan kon ang kalapasan nahimo, ang konseho mahimong mohukom nga walay aksyon nianang higayuna. (Ang miyembro awhagon sa pagdawat og dugang nga tambag gikan sa iyang bishop.)

Ang “pormal nga pagsulay usa ka temporaryo nga kahimtang sa disiplina, gipahamtang isip pamaagi sa pagtabang sa miyembro nga makahinulsol sa hingppit. Ang tigdumalang opisyal sa konseho motino sa mga kondisyon diin mahimong hunungon na ang pagsulay. Atol sa pagsulay, ang bishop o presidente sa stake magkontakay aron sa pagtabang nga mouswag ang indibidwal.

“Ang ikatulo nga desisyon mao ang pag-disfellowship sa miyembro. Ang disfellowshipment [gipasabut] nga temporaryo, apan dili sabton nga kadiyot ra. Ang na-disfellowship nga mga tawo magpabilin nga miyembro sa Simbahan. Giawhag sila sa pagtambong og pampublikong mga miting sa Simbahan, apan dili mahimong mohatag og mga pag-ampo sa publiko o mohatag og mga pakigpulong. Dili sila makaangkon og katungdanan sa Simbahan, dili makaambit sa sakrament, dili makabotar sa pagpaluyo sa mga opisyales sa Simbahan, dili makaangkon og temple recommend, o makagamit sa priesthood. Hinoon, sila mahimong mobayad sa mga ikapulo ug mga halad sa puasa ug mopadayon sa pagsul-ob sa temple garment kon na-endowed na.

Ang “Excommunication mao ang pinaka-grabe nga paghukom nga mapahamtang sa konseho sa pagdisiplina sa Simbahan. Ang na-excommunicated nga mga tawo dili na miyembro sa Simbahan. Busa, gihikawan sila sa mga pribilehiyo sa pagkamiyembro sa Simbahan, lakip na sa pagsul-ob sa mga temple garments ug sa pagbayad sa ikapulo ug mga halad. Mahimo silang motambong sa pampubliko nga mga miting sa Simbahan, apan, sama sa na-disfellowship nga mga tawo, ang ilang pag-apil sa mao nga mga miting limitado. Ang na-excommunicate nga mga tawo giawhag sa paghinulsol ug pagpuyo nga matarung aron mokwalipay alang sa bunyag” (“A Chance to Start Over: Church Disciplinary Councils and the Restoration of Blessings,” Ensign, Sept. 1990, 15–16).

Doktrina ug mga Pakigsaad 102:18. Mga katungod sa nag-akusar ug sa akusado

Niadtong 1840, si Propeta Joseph Smith mihatag og instruksyon alang sa halangdon nga mga konseho mahitungod sa mga katungod niadtong giakusahan sa sala. Ang mga baruganan nga iyang gitudlo padayon nga gamiton sa mga konseho sa pagdisiplina sa Simbahan karon. Mitudlo siya:

“Ang Konseho kinahanglang dili mohusay sa kaso nga wala ang duha ka habig, o walay oportunidad nga makatambong; ni sila modungog sa reklamo sa usa ka tawo sa dili pa ang iyang kaso mahusay; ni sila motugot nga ang karakter bisan hain sa usa nga mahisgutan sa atubangan sa Halangdon nga Konseho nga wala ang tawo ug andam sa pagpanalipod sa iyang kaugalingon; aron ang mga hunahuna sa mga konsehal dili ma-bias alang ni o batok ni bisan kinsa kansang kaso kinahanglan nilang aksyunan” (sa History of the Church, 4:154). Kon ang usa ka habig o importante nga saksi dili makatambong sa konseho sa disiplina, ang tigdumalang opisyal modapit kaniya sa pagsumiter og sinulat nga pamahayag.