Leksyon 27: Doktrina ug mga Pakigsaad 20:38–67

Leksyon 27

Doktrina ug mga Pakigsaad 20:38–67

Pasiuna

Sa pagpadayag ngadto ni Propeta Joseph Smith nga makita sa Doktrina ug mga Pakigsaad 20, ang Ginoo misugo nga ang Iyang gipahiuli nga Simbahan ma-organisar sa Abril 6, 1830. Mihatag usab Siya og mga instruksyon kabahin sa pagdumala sa Iyang Simbahan, lakip ang pagpasabut sa nagkalain-laing mga katungdanan sa priesthood ug ang mga buluhaton niadtong naghupot niadto nga mga katungdanan. Tungod kay napahimutang na kini nga mga katungdanan, ang mga anak sa Langitnong Amahan makadawat sa mga ordinansa sa priesthood ug makahimo og mga pakigsaad.

Mga Sugyot alang sa Pagtudlo

Doktrina ug mga Pakigsaad 20:38–59

Ang mga buluhaton sa mga katungdanan sa priesthood gihan-ay

Isulat ang mosunod diha sa pisara sa dili pa magklase: pagsangyaw, pagtudlo, pagpatin-aw, pag-awhag, pagpasidaan, pagdapit sa tanan sa pagduol kang Kristo

Sa pagsugod sa klase, hisguti ang mga pulong sa pisara ug ipangutana ang mosunod:

Kinsay aduna niini nga mga responsibilidad? (Tingali kinahanglan nimong ipasabut nga ang pulong nga pagpatin-aw nagpasabut sa pagtudlo og usa ka butang nga mas detalyado ug nga ang pulong nga pag-awhag nagpasabut sa kusganong pagdasig og tawo sa pagbuhat og butang.)

Ang mga estudyante mahimong mosulti nga ang mga propeta, mga apostoles, ubang mga lider sa Simbahan, ug full-time nga mga misyonaryo aduna niini nga mga responsibilidad. Mahimo usab nilang isulti nga mga katungdanan kini nga buhaton sa tanang mga tighupot sa priesthood, lakip ang mga naghupot sa Aaronic Priesthood. Kon dili nila hisgutan ang mga tighupot sa Aaronic Priesthood, hisguti kini nga kamatuoran. Ipasabut og maayo nga ang mga tighupot sa Aaronic Priesthood diha sa imong klase gisaligan og makahuluganong mga oportunidad sa pagserbisyo.

Bahina ang klase ngadto sa tulo ka grupo. Ipasabut nga kalabut sa pag-organisar sa Simbahan, ang Ginoo mipadayag kang Joseph Smith sa kadaghanan sa mga katungdanan sa mga tighupot sa priesthood. Hangyoa ang usa ka grupo sa pagtuon sa Doktrina ug mga Pakigsaad 20:38–45, nga mangita sa mga katungdanan sa mga elder [anciano]. Dapita ang ikaduhang grupo sa pagtuon sa Doktrina ug mga Pakigsaad 20:46–52, nga mangita sa mga katungdanan sa mga priest [pari]. Dapita ang ikatulong grupo sa pagtuon sa Doktrina ug mga Pakigsaad 20:53–59, nga mangita sa mga katungdanan sa mga teacher [magtutudlo] ug mga deacon [deakono]. Samtang magtuon sila, isulat ang mosunod diha sa ibabaw sa pisara:

Mga Elder	Mga Priest	Mga Teacher ug Deacon
D&P 20:38–45	D&P 20:46–52	D&P 20:53–59

Human sa igong panahon, dapita ang usa o duha ka representante gikan sa matag grupo nga moduol sa pisara ug ilista ang mga buluhaton sa katungdanan o mga katungdanan nga ilang gitun-an.

Unsa nga kalainan ang inyong namatikdan tali sa mga katungdanan sa mga elder, priest, teacher, ug deacon? Unsa nga pagkasusama ang inyong nakita?
Unsa nga katungdanan ang adunay awtoridad sa paghatag sa gasa sa Espiritu Santo? (Elder; tan-awa sa bersikulo 41.) Unsa nga mga katungdanan ang adunay awtoridad sa pagpahigayon sa sakrament? (Elder ug priest; tan-awa sa mga bersikulo 40 ug 46.) Unsa nga mga katungdanan ang adunay awtoridad sa pag-orden og mga priest, teacher, ug mga deacon? (Elder ug priest; tan-awa sa mga bersikulo 39 ug 48.) Unsa nga mga katungdanan ang adunay awtoridad sa pagpatin-aw, pag-awhag, ug pagtudlo? (Elder, priest, teacher, ug deacon; tan-awa sa mga bersikulo 42, 46, ug 59.)
Unsa nga mga kamatuoran ang atong makat-unan mahitungod sa mga katungdanan sa priesthood pinaagi sa pagkumpara ug pagtan-aw sa kalainan sa ilang mga katungdanan?

Ang mga estudyante mahimong moila og lain-laing mga baruganan, apan siguroha nga maklaro ang mosunod:

Samtang ang mga anak nga lalaki sa Langitnong Amahan modawat og mas taas nga mga katungdanan sa priesthood, modawat sila og dugang nga mga responsibilidad ug mga oportunidad sa pagserbisyo sa uban.

Samtang ang usa ka naghupot sa priesthood gi-orden ngadto sa dugang nga mga katungdanan sa priesthood, magpabilin kaniya ang mas ubos nga mga katungdanan ug ang kaabin nga mga responsibilidad niini.

Ang tanang mga tighupot sa priesthood adunay responsibilidad sa pagpahigayon sa mga ordinansa ug sa pagbantay sa mga miyembro sa Simbahan ug pagpangalagad ngadto kanila.

Human nimo matabangan ang mga estudyante nga mahibalo sa katapusan nga kamatuoran sa nag-una nga lista, isulat kini diha sa pisara ubos sa lista sa mga responsibilidad sa priesthood. Tingali kinahanglan nimong hisgutan nga ang pulong pangalagad nagpasabut sa paghatag og serbisyo.

Aron matabangan ang mga estudyante nga makasabut sa mga responsibilidad sa mga tighupot sa priesthood, ibaling ang ilang atensyon ngadto sa lista diha sa pisara ug ipangutana ang mosunod:

Unsa ang pipila ka mga paagi nga ang mga tighupot sa Aaronic Priesthood “[maka]bantay sa simbahan” ug “magpaduol ug maglig-on kanila”? (Ang mga ehemplo mahimong maglakip sa home teaching, pag-amuma sa kabus ug timawa, paglimpyo sa meetinghouse ug nataran, ug pagtuman sa ubang mga assignment gikan sa bishop ug mga lider sa korum.)
Unsa ang pipila ka mga paagi nga ang mga tighupot sa Aaronic Priesthood “magdapit sa tanan sa pagduol ngadto kang Kristo”?

Samtang ang mga sakop sa klase maghisgot niini nga pangutana, mahimo nimong hangyuon ang usa ka estudyante sa pagbasa sa mosunod nga tambag:

“Kon ikaw usa ka naghupot sa priesthood, hinumdumi nga ang priesthood kinahanglan nga kabahin nimo sa tanang mga higayon ug sa tanan nga mga pagkabutang. Dili kini sama sa usa ka sinina mahimo nimong isul-ob ug hubuon sa gusto lang. Bisan unsa nga pag-orden sa buhatan sa priesthood mao ang tawag sa tibuok kinabuhi nga pagserbisyo, uban sa panaad nga ang Ginoo mosarang kanimo sa pagbuhat sa Iyang buluhaton sumala sa imong pagkamatinud-anon.

“Kinahanglan gayud nga ikaw takus aron sa pagdawat ug paggamit sa gahum sa priesthood. Ang mga pulong nga imong isulti ug ang imong kada adlaw nga pamatasan makaapekto sa imong abilidad sa pagserbisyo. Ang imong pamatasan diha sa publiko kinahanglan gayud nga walay ikasaway. Ang imong pamatasan diha sa tago mas labaw pa gani ka importante” (Matinud-anon sa Tinuhoan: Usa ka Pakisayran sa Ebanghelyo [2004], 205).

Isulat sa pisara ang mosunod nga pamahayag ni Elder Richard G. Scott sa Korum sa Napulog Duha ka mga Apostoles, ug ipabasa kini og kusog sa usa ka estudyante. (Kini nga pamahayag makita sa “Tahura ang Priesthood ug Ayoha Kini sa Paggamit,” Liahona, Nob. 2008, 46.) Mahimo nimong isugyot nga isulat kini sa mga estudyante sa margin sa ilang mga kasulatan sa Doktrina ug mga Pakigsaad 20 o sa ilang mga class notebook o mga scripture study journal.

“Ang katuyoan sa [awtoridad] sa priesthood mao ang paghatag, pagserbisyo, pagbayaw, pagdasig” (Elder Richard G. Scott).

Hangyoa ang klase sa pagsulti mahitungod sa mga panahon sa dihang nakakita sila og mga tighupot sa priesthood nga mihatag, miserbisyo, mibayaw, ug midasig. Mahimo nimong idugang ang imong kaugalingong mga obserbasyon.

Isip kabahin niini nga diskusyon, ipasabut nga samtang ang pagpadayag sa Doktrina ug mga Pakigsaad 20 kabahin sa mga tighupot sa priesthood, ang tanang mga miyembro sa Simbahan adunay responsibilidad ug pribilehiyo sa pagpangalagad sa uban. Ang mga young women adunay daghang mga oportunidad sa pagserbisyo. Ang uban tingali mopili sa pagserbisyo og misyon, ug sa umaabut sila dunay pribilehiyo nga mahimong miyembro sa Relief Society, “[ma]kigtambayayong sila sa mga lalaki nga naghupot sa priesthood aron sa pagpalambo sa ilang pagtuo ug personal nga pagkamatarung, paglig-on sa mga pamilya ug panimalay, ug sa pagpangita ug pagtabang niadtong nanginahanglan” (Anak nga mga Babaye sa Akong Gingharian: Ang Kasaysayan ug Buhat sa Relief Society [2011], 8).

Hatagi ang mga estudyante og pipila ka minuto sa pagsulat sa unsay ilang nakat-unan gikan sa Doktrina ug mga Pakigsaad 20:38–59. Awhaga ang mga young men nga ikonsiderar ang pagsulat og tumong nga makatabang kanila nga magmatinud-anon sa pagbantay ug paglig-on sa mga miyembro sa Simbahan. Mahimo kining kabahin sa ilang mga paningkamot sa Katungdanan ngadto sa Dios.

Doktrina ug mga Pakigsaad 20:60–67

Ang mga lagda sa ordinasyon sa priesthood gihatag

Dapita ang usa ka estudyante sa pagbasa og kusog sa Doktrina ug mga Pakigsaad 20:60, ug hangyoa ang klase sa pagpangita sa tahas sa Espiritu Santo kon dunay i-orden sa katungdanan sa priesthood.

Hangyoa ang mga estudyante sa pag-isa sa ilang mga kamot kon nakasaksi sila og ordinasyon sa priesthood o na-orden ngadto sa usa ka katungdanan sa priesthood. Dapita ang pipila niadtong mipataas sa ilang mga kamot sa pagpaambit sa ilang mga kasinatian ug sa bisan unsa nga ilang gibati atol sa pag-orden. Mahimo kang mangutana sa mosunod:

Sa unsang paagi ang Espiritu Santo kabahin sa pag-orden?

Isulat ang mosunod nga pamahayag sa pisara: Ang mga tighupot sa priesthood nagkinahanglan sa gahum sa Espiritu Santo uban kanila samtang mobuhat sila sa ilang mga katungdanan.

Aron matabangan ang mga young men sa pagkonsiderar sa ilang katakus kon mopahigayon og mga ordinansa sa priesthood, dapita ang usa ka estudyante sa pagbasa sa mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:

“Ang inyong katungod maggikan pinaagi sa inyong pag-orden; ang inyong gahum maggikan sa pagkamasulundon ug pagkatakus. …

“Ang gahum sa priesthood naggikan sa pagbuhat sa inyong katungdanan sa ordinaryong mga butang: pagtambong og mga miting, pagdawat og mga buluhaton, pagbasa sa mga kasulatan, pagtuman sa Pulong sa Kaalam.” (“The Aaronic Priesthood,” Ensign, Nob. 1981, 32–33).

Dapita ang mga young men nga mainampuong ikonsiderar kon unsay gusto nga ipabuhat sa Ginoo kanila aron sa pagdapit sa gahum sa Espiritu Santo sa pag-uban kanila samtang ilang buhaton ang ilang kasamtangan ug umaabut nga mga katungdanan sa priesthood. Ipasabut og maayo nga ang mga young women usab adunay importanting mga responsibilidad sa Simbahan. Dapita sila sa pagkonsiderar kon unsay gusto nga ipabuhat sa Ginoo kanila aron sa pagdapit sa gahum sa Espiritu Santo samtang ilang tumanon kadto nga mga responsibilidad.

Mahimo nimong ipasabut nga ang Doktrina ug mga Pakigsaad 20:61–63 naghisgot sa pipila ka mga katuyoan sa pagpahigayon og mga komperensya sa Simbahan, sama sa dayag nga pagpahigayon sa buluhaton sa Simbahan.

Dapita ang usa ka estudyante sa pagbasa og kusog sa Doktrina ug mga Pakigsaad 20:65. Ipasabut nga niini nga bersikulo, ang pulong pagboto nagpasabut sa pagpaluyo nga boto nga dawaton sa usa ka tawo sa dili pa i-orden sa usa ka katungdanan sa priesthood. Pangutan-a ang mga young men sa klase sa paghinumdom sa katapusang higayon nga gipaluyohan sila sa mga miyembro sa ilang ward o branch aron i-orden ngadto sa usa ka priesthood office.

Unsay inyong gibati sa dihang inyong nakita ang mga sakop sa inyong ward (o branch) nga mipaluyo sa inyong ordinasyon? Sa unsang paagi ang paghinumdom sa ilang pagpaluyo nga boto makatabang ninyo sa inyong priesthood nga pagserbisyo? (Ang mga tubag mahimong maglakip nga mobati sila nga mas may tulubagon ngadto sa ward alang sa ilang pagserbisyo ug nga mobati sila sa suporta sa mga miyembro sa ward.)

Mahimo nimong dapiton ang pipila ka mga estudyante sa pagpaambit nganong mapasalamaton sila alang sa awtoridad sa priesthood. Ipaambit usab ang imong pagpamatuod bahin sa mga kamatuoran nga gihisgutan niini nga leksyon.

Komentaryo ug Background nga Impormasyon

Doktrina ug mga Pakigsaad 20:42. Pagbantay sa Simbahan

Namulong kabahin sa mahinungdanong katuyoan sa priesthood, si Presidente James E. Faust sa Unang Kapangulohan miingon:

“Ang pag-amuma sa uban maoy kinauyukan sa responsibilidad sa priesthood. Kini ang gahum sa pagpanalangin, sa pag-ayo, ug sa pagpahigayon sa makaluwas nga mga ordinansa sa ebanghelyo” (“Power of the Priesthood,” Ensign, Mayo 1997, 41).

Si Elder W. Grant Bangerter sa Seventy namulong mahitungod niadtong naghupot sa priesthood isip “mga tigpangalagad” kinsa nagbantay sa mga miyembro sa Simbahan:

“Sulod sa pipila ka tuig duna koy pribilehiyo nga personal nga makat-on gikan ni Presidente Marion G. Romney, kinsa nagtudlo kanamo kabahin sa ‘batakang balaod sa Simbahan’—nagpasabut niadto nga pagpadayag nga gihatag atol sa pag-organisar sa Simbahan, diin gilatid sa Ginoo ang mga pamaagi sa pagdumala niini. Ang mga elder [anciano], giingon diha sa seksyon 20 sa Doktrina ug mga Pakigsaad, abagan sa mas ubos nga priesthood, ‘[mag]bantay diha sa Simbahan.’ (Bers. 42, 53.) Usa ka bahin niana nga ‘pagbantay’ mahimo pinaagi sa pagbisita sa mga balay sa mga miyembro ug sa pagtudlo kanila sa pagbuhat sa ilang katungdanan. Sa laing pagpadayag ang elders quorum piho nga gihisgutan isip pundok sa ‘dili mopanaw nga mga ministro.’ (D&P 124:137.) Kadtong naghupot sa Aaronic Priesthood gitawag og ‘dili mopanaw nga mga ministro.’ (D&P 84:88.)” (“The Power of the Priesthood,” Ensign, Nob. 1975, 69).

Si Presidente James E. Faust sa Unang Kapangulohan misulti sa mosunod nga istorya mahitungod sa usa ka batan-ong tighupot sa priesthood kinsa mitabang ug milig-on sa usa ka silingan nga nanginahanglan:

Pipila ka tuig na ang milabay usa ka korum sa mga priest midesidar sa pagpangolekta og mga pagkaon alang sa mga kabus isip usa ka proyekto sa pagserbisyo. Si Jim, usa sa mga priest, naghinamhinam sa pag-apil ug nahimong determinado sa pagkolekta og mas daghan pa nga pagkaon kay ni bisan kinsa. Ang higayon miabot sa dihang ang mga priest nagtagbo sa chapel. Nagdungan sila sa pagpanggawas ug wala madugay mibalik sa tukma nga panahon sa pagka-gabii. Sa kahikurat sa kada usa, ang karatelya ni Jim walay sulod. Siya ingon og hilumon, ug pipila sa mga batang lalaki mihimo kaniya nga kataw-anan. …

“… Ang adviser nangutana ni Jim kon nasuko ba siya. Si Jim miingon, ‘Wala, wala gayud. Apan sa dihang migawas ako aron mangolekta sa pagkaon, daghan gayud kaayo ang akong nakuha. Napuno ang akong karetilya. Sa akong pagbalik sa chapel, mihunong ako sa balay sa dili miyembro nga babaye kinsa gibulagan sa bana ug nagpuyo sulod sa mga utlanan sa atong ward. Mituktok ako sa pultahan ug mipasabut kon unsay atong gibuhat, ug iya akong gipasulod. Nagsugod siya og pangita og butang aron ihatag kanako. Miabli siya sa refrigerator, ug akong nakita nga hapit walay sulod kini. Ang mga tukador walay sulod. Sa katapusan, nakakita siya ug gamay nga lata sa peaches.’

“‘Hapit dili ako makatuo niini. Dihay daghang gagmay nga mga batang pakan-unon niini nga nagdagandagan, ug gitunol niya kanako kining lata sa peaches. Gikuha ko kini ug gibutang sa akong karatilya ug mipadayon paglakaw sa karsada. Nanungatunga na ako sa eskina sa dihang mibati ako og kadagaang sa akong tibuok lawas ug nasayud nga kinahanglang mobalik ako niana nga balay. Gihatag nako ang tanang pagkaon.’

“Ang adviser miingon, ‘Jim, ayaw gayud pagkalimti ang mao nimong gibati karong gabhiuna, tungod kay mao kini ang katuyoan.’ Si Jim nakatilaw sa sustansya sa dili hinakog nga pagserbisyo”(“Espirituhanon nga mga Sustansya,” Liahona, Nob. 2006, 54).

Doktrina ug mga Pakigsaad 20:46. “Ang katungdanan sa pari mao ang pagpamulong, pagtudlo, pagpatin-aw, pag-awhag, ug pagbunyag, ug pagpangalagad sa sakramento”

Si Presidente Wilford Woodruff miingon: “Mibiyahe ko og liboan ka mga kilometro ug misangyaw sa Ebanghelyo isip usa ka Priest, ug, sama sa akong gisulti sa mga kongregasyon kaniadto, ang Ginoo mipaluyo kanako ug mipakita sa Iyang gahum sa pagpanalipod sa akong kinabuhi samtang naghupot ako niana nga katungdanan nga susama gayud sa Iyang gibuhat samtang naghupot ako sa katungdanan sa usa ka Apostol. Paluyohan sa Ginoo ang bisan kinsang tawo nga naghupot og usa ka porsyon sa Priesthood, usa man siya ka Priest, Elder, Seventy, o Apostol, kon iyang gipalambo ang iyang calling ug gibuhat ang iyang katungdanan” (Deseret Weekly, Nob. 7, 1896, 641). (Tan-awa usab sa Boyd K. Packer, “The Aaronic Priesthood,” Ensign, Nob. 1981, 33.)

Doktrina ug mga Pakigsaad 20:60–67. Tukma nga pag-orden sa priesthood

Si Presidente Boyd K. Packer sa Korum sa Napulog Duha ka mga Apostoles gihimug-atan nga ang tukma nga pag-orden sa priesthood dako og importansya sa Ginoo:

“Madawat lamang nimo ang priesthood gikan sa tawo nga adunay awtoridad ug ‘nahibaloan sa simbahan nga siya adunay pagtugot [awtoridad].’ (D&P 42:11.)

“Ang priesthood dili ikatugyan sama sa usa ka diploma. Dili kini matunol kaninyo isip usa ka sertipiko. Dili kini mahatud diha kaninyo isip usa ka mensahe o ipadala kaninyo isip usa ka sulat. Mahatag lamang kini pinaagi sa tukma nga pag-orden. Ang usa ka awtorisado nga tighupot sa priesthood kinahanglan nga anaa. Kinahanglang ibutang niya ang iyang mga kamot diha sa inyong ulo ug mo-orden kaninyo.

“Usa kana ka rason nganong ang mga General Authority kanunay nga mobiyahe—aron sa pagtugyan sa mga yawe sa awtoridad sa priesthood. Ang matag stake president bisan asa sa kalibutan nakadawat sa iyang awtoridad ubos sa mga kamot sa usa sa mga tigdumala nga mga kaigsoonan sa Simbahan. Walay bisan usa nga nalahi.

“Hinumdumi kining mga butanga. Ang priesthood bililhon gayud kaayo sa Ginoo. Mabinantayon kaayo Siya sa paagi nga kini itugyan, ug si kinsa ang motugyan. Dili gayud kini buhaton sa tago” (“The Aaronic Priesthood,” Ensign, Nob. 1981, 32).