Doktrina ug mga Pakigsaad 109–112 (Unit 24)

Materyal sa Pagpangandam alang sa Home-Study Teacher

Summary sa Daily Home-Study nga mga Leksyon

Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang gitun-an nila ang Doktrina ug mga Pakigsaad 109–112 (unit 24) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.

Day 1 (Doktrina ug mga Pakigsaad 109)

Samtang gitun-an sa mga estudyante ang pagpahinungod nga pag-ampo sa Templo sa Kirtland, ilang nadiskubrihan ang pipila ka mga rason nga kita magtukod og mga templo. Ilang nakat-unan nga kon kita takus nga mosimba diha sa templo, ang Ginoo mopakita sa Iyang kaugalingon ngari kanato, sangkapan kita sa gahum ug uban sa Iyang tabang, ug mopanalangin kanato aron nga dili mopatigbabaw ang pagkadautan batok kanato. Ang kasinatian sa mga Santos atol sa pagpahinungod sa Templo sa Kirtland sa daghang paagi susama sa unsay nahitabo sa karaang mga Apostoles sa adlaw Pentecostes (tan-awa sa Mga Buhat 2).

Day 2 (Doktrina ug mga Pakigsaad 110)

Isip kabahin sa mga panalangin nga nadawat sa mga Santos didto sa Templo sa Kirtland, si Jesukristo mipakita ngadto ni Propeta Joseph Smith ug ni Olivery Cowdery. Nakat-unan sa mga estudyante nga kon kita mosunod sa mga sugo sa Ginoo ug ipabilin nga limpyo ang iyang balay, Siya mopakita sa Iyang kaugalingon ngari kanato diha sa Iyang mga templo. Nakat-unan usab sa mga estudyante nga si Moises, Elias, ug Elijah mipakita didto sa Templo sa Kirtland ug gitugyan ngadto nilang Joseph Smith ug Oliver Cowdery ang mga yawe sa priesthood. Nakat-unan sa mga estudyante nga ang mga yawe sa misyonaryo nga buhat, mahangturong mga pamilya, ug buhat sa templo makaandam kanato alang sa Ikaduhang Pag-anhi sa Ginoo.

Day 3 (Doktrina ug mga Pakigsaad 111)

Gikan sa pagpadayag nga gihatag ngadto ni Propeta Joseph Smith didto sa Salem, Massachusetts, nakat-unan sa mga estudyante nga ang Ginoo makahatag og kaayohan gikan sa atong sinsero nga mga paningkamot. Nakat-unan usab nila nga kita makadawat sa giya sa Ginoo pinaagi sa kalinaw ug gahum sa Iyang Espiritu.

Day 4 (Doktrina ug mga Pakigsaad 112)

Pinaagi sa tambag sa Ginoo ngadto ni Thomas B. Marsh, nakat-unan sa mga estudyante nga kon magmapainubsanon kita, ang Ginoo mogiya kanato ug mohatag kanato sa mga tubag sa atong mga pag-ampo. Ang Ginoo misulti ni Presidente Marsh nga isip Presidente sa Korum sa Napulog Duha ka mga Apostoles, siya naghupot sa mga yawe sa paggiya sa buhat sa Napulog Duha sa pagsangyaw sa ebanghelyo sa tanang kanasuran. Kini nga mga yawe gipahiuli sa katapusang higayon diha sa dispensasyon sa kahingpitan sa mga panahon. Nakat-unan usab sa mga estudyante nga kinahanglan gayud silang magmatinud-anon aron madawat ang gisaad nga mga panalangin sa Ginoo.

Pasiuna

Agig tipik sa pagpahinungod nga pag-ampo alang sa Templo sa Kirtland, si Propeta Joseph Smith nag-ampo alang sa kaayohan sa uban. Human mapahinungod ang templo, ang mga propeta sa karaan nga mga dispensasyon mitugyan sa mga yawe sa priesthood ngadto nilang Joseph Smith ug Oliver Cowdery, lakip ang mga yawe sa pag-seal.

Mga Sugyot alang sa Pagtudlo

Doktrina ug mga Pakigsaad 109:47–53

Si Joseph Smith mihangyo sa Langitnong Amahan sa pagtabang sa mga Santos didto sa Missouri

Dapita ang mga estudyante sa paghunahuna mahitungod sa usa ka tawo nga ilang nailhan kinsa nanglimbasug o nag-antus sa pipila ka paagi. Human sila nakagahin og panahon sa paghunahuna, ipangutana ang mosunod:

Sa unsang mga paagi nga makatabang kamo nga mahupay ang pag-antus sa usa ka tawo?

Human mapakigbahin sa mga estudyante ang pipila ka mga ideya, pahinumdumi sila nga ang mga Santos sa Missouri nag-antus sa hilabihan tungod sa kabayolente sa manggugubot nga panon sa Lalawigan sa Jackson. Ang ilang mga isigka Santos mihinumdom kanila atol sa pagpahinungod sa Templo sa Kirtland. Dapita ang usa ka estudyante sa pagbasa og kusog sa porsyon sa pagpahinungod nga pag-ampo nga narekord sa Doktrina ug mga Pakigsaad 109:47-49. Hangyoa ang klase sa pagsunod, nga mangita sa usa ka butang nga atong mahimo aron matabangan ang uban atol sa mga panahon sa kalisud.

Atol sa pagpahinungod sa Templo sa Kirtland, unsa ang gibuhat sa Propeta alang sa mga Santos sa Missouri?

Dapita ang usa ka estudyante nga mahimong tigsulat. Hangyoa ang klase sa pagsugyot og usa ka baruganan nga atong makat-unan gikan sa pag-ampo sa Propeta dinhi niining mga bersikulo. Samtang motubag ang mga estudyante, ang tigsulat tingali mosulat sa mosunod nga baruganan: Ang atong mga pag-ampo makatabang ug makapalig-on niadtong mga nanginahanglan.

Kanus-a kamo mibati o nakakita sa gahum sa pag-ampo nga nakatabang sa tawo nga nanginahanglan? (Mahimo nimong ipasabut nga ang ingon nga pag-ampo usahay matubag pinaagi sa pagdasig nga madawat nato o sa uban mahitungod sa unsay mahimong buhaton aron matabangan ang uban. Mahimo usab nimong ipakigbahin kon sa unsang paagi nga imong nakita kining baruganan nga natuman diha sa imong kinabuhi.)

Dapita ang usa ka estudyante sa pagbasa og kusog sa Doktrina ug mga Pakigsaad 109:50. Hangyoa ang klase sa pagsunod, nga mangita sa ubang tawo nga gi-ampo sa Propeta.

Kinsa pa man ang gi-ampo sa Propeta?
Ngano kaha nga kinahanglan man nga mag-ampo kita alang sa atong mga kaaway?
Unsa nga baruganan ang atong makat-unan gikan sa Doktrina ug mga Pakigsaad 109:50 mahitungod sa paagi nga ang atong mga pag-ampo makaimpluwensya sa uban? (Human motubag ang mga estudyante, hangyoa ang tigsulat nga isulat ang mosunod nga baruganan diha sa pisara: Ang atong mga pag-ampo makatabang sa pag-impluwensya sa mga tawo sa paghinulsol. Dayon dapita ang tigsulat nga molingkod.)

Hangyoa ang mga estudyante sa pagpamalandong sa mosunod nga pangutana:

Unsa kaha kon ang mga tawo nga atong gi-ampo mopili nga dili maghinulsol?

Dapita ang usa ka estudyante sa pagbasa og kusog sa Doktrina ug mga Pakigsaad 109:51–53. Hangyoa ang klase sa pagsunod, nga mangita sa mga pulong nga miila sa kabubut-on sa Ginoo ug sa kabubut-on sa uban. Dapita ang mga estudyante sa pag-report kon unsay ilang makit-an. (Sa dili pa mobasa ang estudyante niining mga bersikulo, mahimo nimong ipasabut nga kon ang mga kasulatan maglakip og mga pamahayag nga ang Ginoo mipadayag sa Iyang bukton, kini nagpasabut sa Iyang pagpakita sa Iyang gahum.)

Dapita ang usa ka estudyante sa pagbasa og kusog sa Doktrina ug mga Pakigsaad 109:53. Hangyoa ang klase sa pagsunod, nga mangita sa unsay buhaton sa Langitnong Amahan alang niadtong kinsa maghinulsol. (Mahimong gikinahanglan nimong ipasabut nga ang kasuko sa Dios kanunayng gipadayag diha sa silot o pag-antus nga atong masinati tungod sa atong mga sala, sumala sa Iyang kaangayan. Ang mga pulong nga “sa diha nga ikaw motan-aw sa nawong sa imong Dinihogan” nagpasabut ngadto sa kaandam sa Langitnong Amahan sa paghatag og kalooy tungod sa maulaong sakripisyo sa Iyang Anak, si Jesukristo.)

Ngano man nga ipahilayo sa Langitnong Amahan ang Iyang kasuko gikan niadtong kinsa maghinulsol? (Mahimong mogamit ang mga estudyante og lain-laing mga pulong, apan tabangi sila nga mahibaloan ang mosunod nga baruganan: Tungod sa maulaong sakripisyo ni Jesukristo, mahilayo ang kasuko sa Langitnong Amahan niadtong maghinulsol.)

Aron matabangan ang mga estudyante sa pag-visualize sa gihulagway diha sa bersikulo 53, dapita sila sa pagbuhat sa mosunod:

Hunahunaa nga usa ka kanhi sakop sa manggugubot nga panon nga usa ka anti-Mormon mobarug sa atubangan sa Dios aron pagahukman. Karon hunahunaa nga sa mga tuig sa wala pa kining tawhana mamatay, tinud-anay gayud siya nga naghinulsol ug mihangyo nga mapasaylo ug matubos pinaagi sa Pag-ula ni Jesukristo. Tungod kay si Jesukristo nag-antus alang sa mga sala niining tawhana, ipahilayo sa Langitnong Amahan ang silot ug motanyag og kalooy ngadto sa mahinulsulon nga makasasala.

Unsa nga kinaiya ang gikinahanglan alang sa mga tawo sa pag-ampo sa sinsero nga paagi nga ipalayo unta sa Langitnong Amahan ang kasuko gikan sa ilang mga kaaway?

Awhaga ang mga estudyante sa pagpalambo niining kinaiya ngadto niadtong kinsa nakapasilo kanila o nakaingon sa ilang pag-antus. Hangyoa ang mga estudyante sa paghunahuna nga ang ingon nga mga tawo nagbarug nga mahinulsulon diha sa atubangan sa Langitnong Amahan. Dapita ang mga estudyante sa pag-ampo, sama sa gibuhat ni Joseph Smith, alang sa mga tawo kinsa nakapasilo nila o nakasala batok nila.

Doktrina ug mga Pakigsaad 110:13–16

Si Elijah mitugyan sa mga yawe sa pag-seal ngadto ni Joseph Smith ug ni Oliver Cowdery

Pahinumdumi ang mga estudyante nga sa pagtapos sa semana sa pagpahinungod sa Templo sa Kirtland, si Jesukristo mipakita ngadto ni Propeta Joseph Smith ug ni Oliver Cowdery sulod sa templo. Dapita ang mga estudyante sa pagpangita diha sa pasiuna sa seksyon sa Doktrina ug mga Pakigsaad 110 ug pangitaa ang petsa niining panan-awon. Human nga makit-an nila kini, ipasabut nga ang tapus sa semana sa Abril 3, 1836, mao ang Pagpalabay alang sa mga Judeo sa tibuok kalibutan. Sulod sa mga siglo, ang mga pamilya sa mga Judeo magbakante og usa ka lingkuranan atol sa ilang piyesta sa Pagpalabay base sa usa ka panagna ni Malaquias sa Daang Tugon, nga nagpaabut sa pag-anhi ni Elijah aron nga “pabalikon ang mga kasingkasing sa mga amahan ngadto sa mga bata, ug ang kasingkasing sa mga bata ngadto sa ilang mga amahan” (Malaquias 4:6).

Dapita ang usa ka estudyante sa pagbasa og kusog sa Doktrina ug mga Pakigsaad 110:13–16. Hangyoa ang klase sa pagsunod, nga mangita kon sa unsang paagi nga ang panagna ni Malaquias natuman didto sa Templo sa Kirtland. Hangyoa ang mga estudyante sa pag-report unsa ang ilang nakaplagan.

Si Presidente Joseph Fielding Smith mitudlo nga si Elijah mitugyan ngadto kang Joseph Smith sa “gahum sa priesthood sa pag-seal, diin ang tanang mga butang mabugkos didto sa langit ingon man dinhi sa yuta. Naghatag kini og awtoridad ngadto ni Joseph Smith sa pagpahigayon diha sa templo sa Dios sa tanang mga ordinansa nga mahinungdanon sa kaluwasan sa buhi ug sa patay” (Doctrines of Salvation, ed. Bruce R. McConkie, 3 vols. [1954–56], 2:118).

Unsa ang atong gihalad ngadto sa atong namatay nga mga katigulangan kon kita motabang sa mga ordinansa diha sa templo isip puli nila? (Ikonsiderar ang pagsulat sa mosunod nga baruganan diha sa pisara: Motanyag kita og kaluwasan ngadto sa atong mga katigulangan kon kita magbuhat sa family history ug buhat sa templo alang kanila.)

Dapita ang usa ka estudyante sa pagbasa og kusog sa mosunod nga pamahayag ni Elder Richard G. Scott sa Korum sa Napulog Duha ka mga Apostoles. Mahimo nimong hatagan ang mga estudyante og usa ka kopya sa pamahayag. Hangyoa sila sa pagpaminaw alang sa usa ka panalangin nga moabut niadtong kinsa moabag sa family history ug sa buhat sa templo.

“Bisan unsang buhat nga inyong himoon sa templo maoy oras nga maayong pagkagahin, apan ang pagdawat og mga ordinansa alang sa usa sa imong katigulangan naghimo sa imong panahon sa templo nga mas sagrado, ug mas dagkong panalangin ang madawat. …

“Gusto ba ninyo mga kabatan-onan nga mawagtang ang impluwensya sa kaaway sa inyong kinabuhi? Isubsob ang inyong kaugalingon sa pagpangita sa inyong mga katigulangan, pag-andam sa ilang mga ngalan alang sa sagradong mga ordinansa sa templo, ug dayon adto sa templo aron mobarug isip puli nila sa pagdawat sa mga ordinansa sa bunyag ug sa gasa sa Espiritu Santo. Sa inyong pagdako, makaapil na usab kamo sa pagdawat sa ubang mga ordinansa. Wala na akoy mahunahuna nga mas labawng makapanalipod gikan sa impluwensya sa kaaway sa inyong kinabuhi” (“Ang Hingpit nga Kalipay sa Pagtubos sa Patay,”Liahona, Nob. 2012, 93–94).

Unsa nga mga panalangin ang moabut niadtong kinsa mobuhat sa family history ug sa buhat sa templo?
Kanus-a kamo o ang usa ka tawo nga inyong nailhan nakasinati sa usa niining mga panalangin?

Dapita ang mga estudyante sa pagkonsiderar kon unsay ilang mahimo aron mapalambo ang ilang mga paningkamot diha sa family history ug buhat sa templo.

Sunod nga Unit (Ang Simbahan Gibalhin ngadto sa Amihanang bahin sa Missouri; Doktrina ug mga Pakigsaad 113–120)

Aron matabangan ang mga estudyante nga maandam alang sa ilang pagtuon atol sa moabut nga semana, mahimo nimo silang dapiton sa pagkonsiderar sa mosunod: Sa unsang paagi nga Ang Simbahan ni Jesukristo sa mga Santos sa Ulahing mga Adlaw nakadawat sa pangalan niini? Kanus-a gipaila ang balaod sa ikapulo? Ipasabut nga sa sunod nga unit makat-unan nila ang mga tubag niining mga pangutana ug mahitungod kon sa unsang paagi nga makasangpit kita sa Dios alang sa tabang aron magpabilin nga matinuoron sa atong pagtuo ug mga pakigsaad.