Leksyon 95
Doktrina ug mga Pakigsaad 89
Pasiuna
Niadtong Pebrero 27, 1833, si Joseph Smith nagpakisayud sa Ginoo kalabut sa paggamit og tabako sa mga tighupot sa priesthood diha sa ilang mga miting. Agi og tubag, ang Ginoo mihatag sa pinadayag diha sa Doktrina ug mga Pakigsaad 89, nailhan isip ang Pulong sa Kaalam. Niini, ang Ginoo mipasidaan batok sa paggamit sa makadaot nga mga butang ug giawhag ang pagkaon og makahimsog nga mga pagkaon. Ang Ginoo misaad usab nga kadtong nagsunod sa Pulong sa Kaalam mapanalanginan sa pisikal ug espiritwal nga paagi.
Mga Sugyot alang sa Pagtudlo
Doktrina ug mga Pakigsaad 89:1–3
Gipaila sa Ginoo ang pinadayag nga nailhan isip ang Pulong sa Kaalam.
Isulat ang Ang Pulong sa Kaalam sa ibabaw sa pisara, ug ipangutana ang mosunod:
-
Nakasulay ba kamo nga kinahanglan ninyong ipasabut sa usa ka tawo nganong dili mo moinom og alkohol, tsa, o kape o motabako? Unsay inyong gisulti? Giunsa man pagtubag sa tawo? (Kon gusto nimo, mahimo nimong isulat kini nga mga pangutana diha sa pisara sa dili pa magklase. Sa pagsugod sa klase, mahimo nimong ipares-pares ang mga estudyante ug dapiton sila nga magtinabangay sa pagtubag niini nga mga pangutana. Dayon hangyoa sila sa pag-report sa pipila sa ilang mga kasinatan diha sa tibuok klase.)
Dapita ang usa ka estudyante sa pagbasa og kusog sa pasiuna sa seksyon sa Doktrina ug mga Pakigsaad 89. Hangyoa ang klase sa pag-ila sa mga sirkumstansya nga miresulta sa pagkadawat ni Joseph Smith niini nga pinadayag. Dapita sila sa pag-report sa ilang nakit-an.
Dapita ang usa ka estudyante sa pagbasa og kusog sa Doktrina ug mga Pakigsaad 89:1–3. Hangyoa ang klase sa pagsunod, nga mangita sa mga pulong nga naghulagway sa mga katuyoan sa Ginoo sa paghatag niini nga pinadayag.
-
Sumala sa mga bersikulo 2–3, nganong gihatag man kini nga pinadayag? (Tingali kinahanglan nimong ipasabut nga ang mga pulong nga “temporal nga kaluwasan” may kalabutan sa atong pisikal nga kahimsog ug ang impluwensya niini sa kahimsog sa atong mga espiritu.)
Ipasabut nga ang Ginoo sa sinugdan wala mohatag sa Pulong sa Kaalam ngadto sa mga Santos isip usa ka sugo (tan-awa sa D&P 89:2). Si Presidente Joseph F. Smith mipasabut:
“Kon gihatag pa [ang Pulong sa Kaalam] isip usa ka sugo mapaubos unta sa panghimaraut ang matag tawo, nga nag-umon sa paggamit sa makadaut nga mga butang; busa ang Ginoo maloloy-on ug mihatag kanila og kahigayunan sa pagbuntog, sa dili pa Niya ipaubos sila sa balaod” (sa Conference Report, Okt. 1913, 14).
Ipasabut nga tungod niini kinahanglan kitang magmatngon nga dili mohukom sa ubang nag-una nga mga lider ug mga miyembro sa Simbahan kinsa, bisan gipadayag na ang Pulong sa Kaalam, migamit og mga butang nga gidili karon. Sa tibuok nag-unang kasaysayan sa Simbahan, ang mga lider midapit sa mga Santos nga mas hingpit nga mosunod sa Pulong sa Kaalam. Sa kinatibuk-ang komperensya niadtong tinglarag sa 1851, si Brigham Young misugyot nga ang tanang mga Santos pormal nga makigsaad nga molikay sa tsa, kape, tabako, ug bino. Niadtong Oktubre 13, 1882, ang Ginoo mipadayag ngadto ni Presidente John Taylor nga ang Pulong sa Kaalam ikonsiderar isip usa ka sugo. Niadtong 1919 ang Unang Kapangulohan, ubos ni Presidente Heber J. Grant, mihimo sa pagsunod sa Pulong sa Kaalam nga usa ka kinahanglanon aron makadawat og rekomend sa templo. Ang Pulong sa Kaalam nagpadayon nga usa ka importante nga sugo karon, ug ang pagsunod niini usa ka kinahanglanon sa bunyag, pagtambong sa templo, misyonaryo nga pagserbisyo, ug ubang takus nga pagpangalagad diha sa Simbahan.
Diha sa pisara, ubos sa Ang Mga Pulong sa Kaalam, isulat ang mga pulong nga Usa Ka Baruganan uban sa Saad gikan sa bersikulo 3, sama sa gipakita sa ubos. Mahimo usab nimong isugyot nga markahan sa mga estudyante kini nga mga pulong diha sa ilang mga kasulatan. Kini nga mga pulong magsilbi nga outline alang sa tibuok leksyon.
Usa ka Baruganan uban sa Saad
Doktrina ug mga Pakigsaad 89:4–9
Ang Ginoo mipasidaan sa mga Santos nga dili mogamit og alkohol, tabako, tsa, o kape
Ipakita sa mga estudyante ang usa ka pasol ug pipila ka mga paon, o pagdrowing og hulagway niini diha sa pisara.
-
Sa unsang paagi ang usa ka mangingisda molingla sa isda sa pagpaak sa taga?
Dapita ang usa ka estudyante sa pagbasa og kusog sa Doktrina ug mga Pakigsaad 89:4. Hangyoa ang mga estudyante sa pagsunod, nga mangita kon kinsa ang gipasidan-an sa Ginoo nga mosulay sa paglingla sa mga Santos sa katapusang mga adlaw.
-
Bahin sa unsa ang gipasidaan sa Ginoo ngadto sa mga Santos niini nga bersikulo?
Isulat ang mosunod nga barugaanan diha sa pisara ubos sa pulong Baruganan: Tungod sa dautan nga mga plano sa katapusang mga adlaw, ang Ginoo mipasidaan kanato sa dili paggamit og makadaot nga mga butang. Dapita ang mga estudyante nga hilum nga mobasa sa Doktrina ug mga Pakigsaad 89:5–9 ug mangita kon unsa nga mga butang ang gipasadaan sa Ginoo sa mga Santos nga dili isulod sa ilang mga lawas. Mahimo nimong isugyot nga markahan sa mga estudyante unsa ang ilang nakit-an.
-
Unsa nga mga butang ang gipasidaan sa Ginoo sa mga Santos nga dili isulod sa ilang mga lawas? (Tingali kinahanglan nimong ipasabut nga ang mga lider sa Simbahan namahayag nga ang mga pulong nga “mainit nga mga ilimnon” nagpasabut sa tsa ug kape.) Sa unsang mga paagi nga makadaot kini nga mga butanga?
Ipasabut nga ang alkohol ug tabako adunay maayo ug dili maayong kagamitan (tan-awa sa D&P 89:7–8). Karon adunay uban pa nga mga butang nga mahimong abusuhan ug sa ingon mahimong makadaot ug makaadik. Ang mga lider sa Simbahan mipasidaan batok sa paggamit sa bisan unsa nga ilimnon, druga, kemikal, o peligrong binuhatan nga maka-“high” o ubang artipisyal nga epekto nga makadaot sa atong mga lawas o mga hunahuna. Ang pipila niini naglakip sa marijuana, isug nga mga druga, giresita o wala giresita nga mga tambal nga giabusohan, ug mga kemikal sa balay. (Tan-awa ang For the Strength of Youth [booklet, 2011], 26.)
-
Ngano kaha ang ubang tawo mosulay man sa pagdani kaninyo nga moambit sa mga butang nga gidili sa Ginoo? (Ang ubang mga tawo mobati nga sikat ang pag-ambit niini nga mga butang. Ang uban nagtinguha nga mokita pinaagi sa pagbaligya og makaadik nga mga butang ngadto sa uban.)
-
Sa unsang mga paagi ang pagkaadik sama sa taga nga gamiton sa mangingisda sa pagkubit og isda? Sa unsang mga paagi ang pagkaadik makadaot sa atong mahangturong pag-uswag?
Dapita ang pipila ka estudyante sa pagpaambit kon sa unsang paagi ang pasidaan sa paglikay sa makaadik ug makadaot nga mga butang nakapanalangin sa ilang mga kinabuhi o sa kinabuhi sa ilang mga higala o mga sakop sa pamilya. Mahimo ka usab nga mopaambit gikan sa imong kaugalingong mga kasinatian. Dapita ang mga estudyante nga modesisyon nga dili gayud moambit sa mga butang nga sukwahi sa Pulong sa Kaalam.
Doktrina ug mga Pakigsaad 89:10–17
Ang Dios miawhag sa paggamit sa mga hilba, prutas, karne, ug mga lugas
Dapita ang mga estudyante nga hilum nga mobasa sa Doktrina ug mga Pakigsaad 89:10 ug mangita kon unsay giawhag sa Ginoo nga atong kaunon. Mahimo nimong isugyot nga ilang markahan ang unsay ilang nakit-an.
-
Unsa nga mga pagkaon ang gisugyot sa Ginoo nga atong kaunon isip kabahin sa Pulong sa Kaalam?
-
Sumala sa bersikulo 11, unsa nga matang sa kinaiya ang kinahanglang anaa kanato samtang moambit kita niining makapahimsog nga mga pagkaon? (Kinahanglang moambit kita niini nga mga pagkaon uban ang pagmatngon ug pagpasalamat. Tingali kinahanglan nimong klaruhon nga ang “uban ang pagmatngon” nagpasabut sa maalamon ug mabinantayong paagi. Ang nanghinubra o dili balanse nga diyeta bisan sa maayong pagkaon mahimong makadaot sa panglawas.)
-
Base sa unsay atong nakat-unan niini nga mga bersikulo, unsa nga baruganan mahitungod sa makapahimsog nga mga pagkaon ang atong madugang diha sa pisara? (Human makatubag ang mga estudyante, isulat ang mosunod diha sa pisara ubos sa baruganan mahitungod sa makadaot nga mga butang: Kinahanglang mogamit kita og mga hilba, mga prutas, karne, ug mga lugas sa maalamon ug mapasalamatong paagi.
Ipasabut nga usa ka ehemplo sa maalamon nga paggamit sa pagkaon makita diha sa instruksyon nga gihatag sa Ginoo mahitungod sa karne diha sa mga bersikulo 12–13. Ang pulong nga pagdaginot nagsugyot nga ang karne gamiton sa kasarangan nga paagi.
Doktrina ug mga Pakigsaad 89:18–21
Ang Ginoo misaad og kahimsog, kaalam, ug proteksyon niadtong nagsunod sa Pulong sa Kaalam
Isulat ang mosunod diha sa pisara ubos sa pulong Saad: Kon kita mosunod sa Pulong sa Kaalam ug sa ubang mga sugo sa Ginoo, ang Ginoo mopanalangin kanato og …
Dapita ang usa ka estudyante sa pagbasa og kusog sa Doktrina ug mga Pakigsaad 130:18–19. Hangyoa ang klase sa pagsunod ug sa pagtino og mga panalangin nga makakompleto sa sentence diha sa pisara.
-
Unsa nga mga panalangin ang gisaad sa Ginoo niadtong mosunod sa Pulong sa Kaalam? (Isulat sa pisara ang tubag sa mga estudyante aron sa pagkompleto sa sentence.)
Mahimo nimong ipasabut nga ang saad sa Ginoo nga kahimsog diha sa bersikulo 18 wala magpasabut nga ang Pulong sa Kaalam usa ka tambal alang sa dugay na o makapaluya nga mga sakit. Hinoon, makatabang kini sa mga tawo nga makabaton og labing maayong panglawas ug kalig-on nga mahimo sa ilang mga lawas.
-
Sa unsang paagi ang pagsunod sa Pulong sa Kaalam makatabang kanato nga makaangkon og kaalam ug kahibalo?
Tabangi ang mga estudyante nga makasabut nga ang pagsunod sa Pulong sa Kaalam magtugot kanato nga matagamtam ang pakig-uban sa Espiritu Santo, kinsa mopadayag og kaalam ug kahibalo ngadto sa matinud-anon. Isip kabahin niini nga diskusyon, mahimo ka nga modapit og usa ka estudyante sa pagbasa og kusog sa mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:
“Akong nasayran … nga ang usa ka sukaranan nga katuyoan sa Pulong sa Kaalam may kalabutan sa pagpadayag. …
“Kon ang usa ka tawo nga ‘ubos sa impluwensya’ maglisud sa pagpaminaw sa yano nga pakig-istorya, unsaon man nila sa pagtubag sa espirituhanong mga pag-aghat nga motandog sa ilang labing malumo nga mga pagbati?
“Samtang bililhon ang Pulong sa Kaalam isip balaod sa kahimsog, mahimong mas bililhon kini kaninyo sa espirituhanong paagi kay sa pisikal nga paagi” (“Prayers and Answers,” Ensign, Nob. 1979, 20).
Dapita ang usa ka estudyante sa pagbasa og kusog sa Doktrina ug mga Pakigsaad 89:20–21. Hangyoa ang klase sa pagsunod, nga mangita og dugang nga mga panalangin nga moabut gikan sa pagsunod sa Pulong sa Kaalam.
-
Unsa nga dugang nga mga panalangin ang gisaad sa Ginoo niadtong nagsunod sa Pulong sa Kaalam?
Aron matabangan ang mga estudyante nga makasabut sa mga pulong nga “ang tiglaglag nga anghel mosaylo kanila”, i-refer sila ngadto sa Doktrina ug mga Pakigsaad 89:21, footnote a. Ipasabut nga kini nga saad sa balaang proteksyon mahimong magpasabut sa pisikal ingon man usab sa espirituhanong kasiguroan. Kompletuha ang sentence sa pisara aron magpakita kini sa mosunod nga baruganan: Kon mosunod kita sa Pulong sa Kaalam ug sa ubang mga sugo sa Ginoo, ang Ginoo mopanalangin kanato og kahimsog, kaalam, kalig-on, ug proteksyon.
-
Kanus-a man ninyo nakita ang saad sa mga bersikulo 18–21 nga natuman diha sa inyong kinabuhi o sa kinabuhi sa tawo nga inyong kaila?
Hangyoa ang mga estudyante sa pagpaambit (diha sa klase o sa ka-partner) unsay ilang nakat-unan o gibati mahitungod sa Pulong sa Kaalam samtang nagtuon sila sa Doktrina ug mga Pakigsaad 89 karon. Dapita sila sa pagpamalandong sa mga baruganan ug mga saad nga gisulat diha sa pisara ug sa paghimo og tumong nga mas matinud-anon nga mosunod sa Pulong sa Kaalam. Pagpamatuod mahitungod sa mga panalangin nga moabut kanila samtang mosunod sila niini nga balaod.
Komentaryo ug Background nga Impormasyon
Doktrina ug mga Pakigsaad 89. Background nga kasaysayan
Niadtong tingtugnaw sa 1833, mga 20 ka mga tighupot sa priesthood ang nag-abut sa kwarto sa ibabaw sa tindahan ni Newel K. Whitney sa Kirtland, Ohio, aron motambong sa Tulunghaan sa mga Propeta. Sama sa unsay kasagaran niadtong panahona, daghan niining mga tawhana ang nanabako ug nag-usap og tabako atol sa mga miting. Nahinumdom si Brigham Young nga “daghang higayon nga ang Propeta mosulod sa kwarto nga mohatag og pagpanudlo sa klase iyang nakita ang iyang kaugalingon nga naputos sa bagang aso sa tabako” (Mga Pagtulun-an sa mga Presidente sa Simbahan: Joseph Smith [2007], 316). Kini nga mga sirkumstansya ug ang mga reklamo ni Emma Smith, kinsa maoy molimpyo sa linuwa nga mga tabako diha sa salog, nakaaghat ni Joseph Smith nga mangutana sa gamit sa ingon nga mga butang. Nag-ampo si Joseph Smith alang sa direksyon ug nakadawat sa pinadayag diha sa Doktrina ug mga Pakigsaad 89.
Doktrina ug mga Pakigsaad 89:3. “Usa ka baruganan uban sa saad”
Si Presidente Boyd K. Packer, sa Korum sa Napulog Duha ka mga Apostoles mipaambit sa iyang personal nga mga pagbati ug kasinatian mahitungod sa Pulong sa Kaalam:
“Tungod sa polio sa pagkabata, wala ko makahimo sa pag-apil sa mga sports ug mibati nga dili ko sama ka maayo sa akong mga higala.
“Ang akong patriarchal blessing mitambag: ‘Bantayi ug panalipdi [ang imong lawas]—walay isulod niini nga makadaot sa mga parte niini tungod kay kini sagrado. Instrumento kini sa imong hunahuna ug pundasyon sa imong kinaiya’ (patriyarkal nga panalangin ni Boyd K. Packer, 15 Ene. 1944, 1).
“Akong nakita diha sa Pulong sa Kaalam ang usa ka baruganan uban sa usa ka saad. Ang baruganan: Atimana ang inyong lawas; likayi ang makaadik nga mga butang, tsa, kape, tabako, bino, ug mga drugas (tan-awa saD&P 89:3–9). Ang ingon nga makaadik nga mga butang igo lang mohupay sa kahidlaw nga gihimo niini sa sinugdan.
“Ang saad: Kadtong mosunod makadawat og mas maayong panglawas (tan-awa sa D&P 89:18) ug ‘dako nga mga bahandi sa kahibalo, gani ang mga tinago nga mga bahandi’ (D&P 89:19). …
“Bisan ang grabe nga pagsulay sa panglawas o may kakulian o kakulangan nga lawas makahashas sa kalag alang sa mahimayaong adlaw sa pagpahiuli ug pagkaayo nga siguradong moabut.
“Ang inyong lawas mao gayud ang instrumento sa inyong hunahuna ug pundasyon sa inyong kinaiya” (“Ye Are the Temple of God,” Ensign, Nob. 2000, 72).
Doktrina ug mga Pakigsaad 89:4. Ang dautan nga mga laraw ug dautan nga mga tawo
Ang dautan nga mga tawo magtinguha nga mokita og kwarta pinaagi sa pagbaligya og makaadik nga mga butang ngadto sa uban. Si Presidente Ezra Taft Benson mitudlo:
“Ang Ginoo nakakita nang daan sa sitwasyon karon nga ang mga motibo sa pagpangwarta maoy hinungdan nga ang mga tawo makigkunsabo sa pag-agni sa uban nga mopasulod og makadaot nga mga butang sa ilang mga lawas. Ang mga advertisement nga nagpasiugda og beer, bino, ilimnong makahubog, kape, tabako, ug uban pang makadaot nga mga butang mao ang mga ehemplo sa unsay nakita nang daan sa Ginoo. Apan ang labing makadaot nga ehemplo sa dautan nga pakigkunsabo sa atong panahon mao kadtong nag-agni sa mga kabatan-onan ngadto sa paggamit og mga druga.
“Akong batan-ong mga kaigsoonan, uban sa tanang gugma, mopasidaan kami kaninyo nga si Satanas ug ang iyang mga sinugo maningkamot sa pag-agni kaninyo sa paggamit sa makadaot nga mga butang, tungod kay nasayud kaayo sila nga kon kamo moambit, ang inyong espirituhanong mga gahum mapugngan ug maanaa kamo sa ilang dautang gahum. Palayo nianang mga dapit o mga tawo nga mo-impluwensya kaninyo sa pagsupak sa mga sugo sa Dios. Sunda ang mga sugo sa Dios ug maangkon ninyo ang kaalam nga masayud ug makaila niana nga dautan” (“A Principle with a Promise,” Ensign, Mayo 1983, 54–55).
Doktrina ug mga Pakigsaad 89:5–9. Unsa kaha kon adunay usa ka butang nga wala mahisguti sa piho diha sa Pulong sa Kaalam?
Ang Doktrina ug mga Pakigsaad 89 wala maghisgut sa matag ilimnon, pagkaon, o butang nga gidili. Usahay motumaw ang mga pangutana mahitungod sa mga butang nga wala mahisguti sa pinadayag o nganong gidili ang tsa ug kape bisan tuod wala kini hisguti. Ang mosunod nga pamahayag makatabang sa pagpasabut niini:
“Walay opisyal nga interpretasyon sa Pulong sa Kaalam gawas nianang gihatag sa Kaigsoonan sa sayo kaayong bahin sa panahon sa Simbahan sa dihang gipadayag nga ang ‘mainit nga mga ilimnon’ nagpasabut sa tsa ug kape.
“Kalabut sa cola nga mga ilimnon, ang Simbahan wala gayud mohimo og opisyal nga baruganan mahitungod niini nga mga butang, apan ang mga lider sa Simbahan mitambag, ug kami karon piho nga motambag, batok sa paggamit sa bisan unsa nga ilimnon nga adunay makadaot nga makaadik nga mga druga ubos sa mga sirkumstansya nga moresulta sa pagkaadik. Bisan unsa nga ilimnon nga adunay sagol nga makadaot sa lawas kinahanglang likayan” (Priesthood Bulletin, Peb. 1972 [volume 8, number 1], 3–4; tan-awa usab sa “Staying Healthy: Welfare Services Suggests How,” Ensign, Ene. 1981, 15–16).
Si Presidente Boyd K. Packer sa Korum sa Napulog Duha ka mga Apostoles mipasabut sa panginahanglan nga mosunod kita sa mga baruganan diha sa Pulong sa Kaalam ug mosalig sa mga saad:
“Ang mga miyembro misulat aron mangutana kon kini o kana nga butang supak ba sa Pulong sa Kaalam. Nahibaloan na nga ang tsa, kape, bino, ug tabako supak niini. Wala kini ipasabut og mas detalyado. Hinoon, atong gitudlo ang baruganan uban sa gisaad nga mga panalangin. Adunay daghang makaadik nga mga butang nga mahimong mainom o mausap o mahingus o ma-inject sa usa ka tawo nga makadaot sa lawas ug espiritu nga wala hisguti diha sa pinadayag.
“Ang tanang butang nga makadaot wala gilista sa piho; ang arsenic, pananglit—siguradong dili maayo, apan dili makaadik! Siya nga kinahanglang suguon sa tanan nga mga butang, ang Ginoo miingon, ‘usa ka tapulan ug dili maalamon nga sulugoon’ (D&P 58:26).
“Sa ubang mga kultura, ang lumad nga mga ilimnon giangkon nga dili makadaot tungod kay wala kini hisguti sa piho diha sa pinadayag. Apan gibira niini ang mga miyembro, ilabi na ang kalalakin-an, gikan sa ilang mga pamilya padulong sa mga pundok-pundok nga siguradong supak sa baruganan. Ang mga saad nga gihimo diha sa pinadayag ihikaw ngadto sa mga tawo nga dili mainampingon o nagpasagad.
“Ang pagsunod sa tambag mobutang kaninyo diha sa luwas nga habig sa kinabuhi” (“The Word of Wisdom: The Principle and the Promises,” Ensign, Mayo 1996, 17–18).
Doktrina ug mga Pakigsaad 89:21. “Ang tiglaglag nga anghel mosaylo kanila”
Si Elder Russell M. Nelson sa Korum sa Napulog Duha ka mga Apostoles mipasabut sa espirituhanong simbolismo sa tiglaglag nga anghel nga mosaylo niadtong nagsunod sa Pulong sa Kaalam:
“Adunay espesyal nga kahulugan sa katapusang bersikulo sa seksyon 89, nga namahayag, ‘Ang tiglaglag nga anghel mosaylo kanila, ingon sa mga anak sa Israel, ug dili mopatay kanila’ (b. 21). Kini nga paghisgut sa Pagpalabay naghatag og gibug-aton nga ang espirituhanong pagtuo unang gikinahanglan. Sa dihang gipakita ni Abraham ang iyang kaandam sa paghalad ni Isaac isip sakripisyo, walay gisulti nga ang pagkamasulundon makahatag dayon og pisikal nga kaayohan. Sa dihang si Josue nangulo sa mga Israelite tabok sa Suba sa Jordan panahon sa baha, ang kumpirmasyon sa pisikal nga ganti wala gikinahanglan aron ang matinud-anong mga tawo mosunod kaniya. Mosunod kita sa Pulong sa Kaalam tungod kay nagrepresentar kini sa kabubut-on sa Ginoo alang sa atong espirituhanong pagpangandam nga mahimong takus niya nga mga anak. Ang pagbuntog sa espiritwal sa mortal nga mga kahinam usa ka bahin sa proseso sa pagsulay kanato” (“Twenty Questions” [pakigpulong ngadto sa mga religious educator sa CES, Sept. 13, 1985], LDS.org).
Si Presidente Boyd K. Packer sa Korum sa Napulog Duha ka mga Apostoles mipasabut sa espirituhanong kahulugan sa saad nga ang “tiglaglag nga anghel mosaylo”:
“Dili gikan sa mortal nga kamatayon nga luwason kita sa ingon nga pagpalabay kon maglakaw kita nga masulundon niini nga mga sugo, kay moabut ang panahon nga ang matag usa kanato mamatay. Apan adunay espirituhanon nga kamatayon nga dili ninyo angay nga antuson. Kon kamo masulundon, ang espirituhanong kamatayon mosaylo kaninyo, tungod kay ‘gikahalad na si Kristo, ang atong karniro sa pasko,’ ang pinadayag nagtudlo (1 Mga Taga-Cor. 5:7)” (“The Word of Wisdom: The Principle and the Promises,” Ensign, Mayo 1996, 19).