Doktrina ug mga Pakigsaad 101:43–101; 102–105 (Unit 22)

Materyal sa Pagpangandam alang sa Home-Study Teacher

Summary sa Daily Home-Study nga mga Leksyon

Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang gitun-an nila ang Doktrina ug mga Pakigsaad 101:43–101; 102–105 (unit 22) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.

Day 1 (Doktrina ug mga Pakigsaad 101:43–101; 102)

Ang mga estudyante nagtuon sa tulo ka mga sambingay nga gigamit sa Ginoo sa pagtudlo sa mga Santos kabahin sa Iyang pagtubos sa Zion. Samtang nagtuon sila, nakat-unan sa mga estudyante ang mosunod nga mga baruganan: pinaagi sa buhat sa templo, matarung nga pagpuyo, ug pagsunod sa mga propeta, kita maandam nga makasugakod sa kaaway; kon kita mosunod sa mga sugo sa Ginoo, kita malig-on sa pagsugakod sa espirituhanon ug pisikal nga mga kaaway; kon kita magpundok ngadto sa templo, makadawat kita og proteksyon ug maandam ang atong mga kaugalingon alang sa kinabuhing dayon; ug ang Dios mihatag kanato sa kabubut-on, sa gahum sa pagpili, apan kita ang manubag sa atong mga pagpili.

Day 2 (Doktrina ug mga Pakigsaad 103)

Samtang ang mga estudyante nagtuon sa mga instruksyon sa Ginoo kalabut sa katubsanan sa Zion, ilang natino ang mga panalangin nga atong madawat kon kita magmasulundon sa mga sugo sa Ginoo ug sa mga sangputanan nga mahitabo kon kita dili masulundon. Nakat-unan usab sa mga estudyante nga ang mga disipulo ni Jesukristo andam nga motugyan sa ilang kinabuhi alang Kaniya ug nga tanang kadaugan ug himaya mapahinabo ngari kanato pinaagi sa atong kakugi, pagkamatinud-anon, ug mga pag-ampo sa hugot nga pagtuo.

Day 3 (Doktrina ug mga Pakigsaad 104)

Gikan sa mga instruksyon sa Ginoo sa pag-organisar og usab sa United Firm (sa kasagaran gitawag og Nagkahiusa nga Kapunongan), nakat-unan sa mga estudyante nga ang Ginoo milalang sa yuta ug ang tanang mga butang nga anaa niini Iyaha. Ilang nahibaloan ang baruganan nga kita ang manubag sa paggamit sa unsay gihatag sa Ginoo kanato sa pagtabang sa uban. Nakat-unan usab sa mga estudyante ang mahitungod sa mga panalangin nga atong madawat gikan sa kamapainubsanon ug kamatinud-anon ug sa pagsangpit sa ngalan sa Ginoo.

Day 4 (Doktrina ug mga Pakigsaad 105)

Pagkaabut sa Kampo sa Zion didto sa Missouri, gipadayag sa Ginoo nga ang Zion dili matubos nianang panahona. Gikan sa mga instruksyon sa Ginoo ngadto sa mga Santos, nakat-unan sa mga estudyante ang mosunod nga mga baruganan: kinahanglan kitang magkahiusa ug magmasulundon sa tanang ipabuhat sa Dios aron matukod ang Zion; ang Dios nag-andam og dagkong mga panalangin alang niadtong matinud-anon sa ilang mga pagsulay; ug kon kita maningkamot sa pagpatunhay sa kalinaw ngadto sa ubang tawo, nan, tanang mga butang molihok alang sa atong kaayohan. Ang panahon sa Ginoo sa kasagaran lahi kay sa atong kaugalingon.

Pasiuna

Kini nga leksyon makatabang sa mga estudyante nga magamit ang mga leksyon sa Kampo sa Zion sa ilang kaugalingong kinabuhi.

Mga Sugyot alang sa Pagtudlo

Doktrina ug mga Pakigsaad 105

Ang Ginoo mopadayag kon unsa ang angayang buhaton sa mga Santos kalabut sa mga kalisud diha sa yuta sa Zion

Sa dili pa magklase, pagkuha og papel nga kopa, lastiko, ug tulo ka buok hilo. Ang sirkumperensya sa lastiko kinahanglang mas gamay kay sa sirkumperensya sa kopa. Ihigut ang mga hilo ngadto sa lastiko sa parehas og gintang.

Sugdi ang leksyon pinaagi sa paghangyo og tulo ka mga boluntaryo. Ibutang ang kopa sa patag nga lugar, ug sultihi ang mga boluntaryo sa pagkuha sa kopa nga gamit lamang ang lastiko ug mga hilo. Sultihi sila nga dili sila mahimong mohikap sa lastiko; kinahanglang gunitan nila ang mga hilo. (Aron matuman kining buluhaton, ang mga estudyante kinahanglan nga magtinabangay ug bitaron og dungan ang kada hilo nga insakto lang ang kahugot aron moinat ang lastiko nga masal-ob kini sa kopa ug dayon alsahon kini.)

Human makompleto sa mga estudyante kining kalihokan, ipangutana ang mosunod:

Unsay papel sa panaghiusa diha sa pagtuman niini nga buluhaton?

Pahinumdumi ang mga estudyante nga atol sa ilang mga pagtuon niining miaging semana, nakaangkon sila og oportunidad sa pagtuon sa mga pinadayag gikan sa Ginoo kabahin sa Kampo sa Zion ug sa misyon niini sa pagtabang sa mga Santos nga gipalayas sa Zion. Awhaga ang mga estudyante sa pagpangita alang sa papel sa panaghiusa diha sa pagsulay sa mga Santos nga mabawi ang yuta sa Zion sa tibuok nga leksyon karon.

Dapita ang mga estudyante nga sublion sa pagsaysay ang istorya sa Kampo sa Zion, base sa unsay ilang nakat-unan sa ilang pagtuon sa Doktrina ug mga Pakigsaad 103 ug 105. Ang mosunod mahimong ipangutana aron matabangan ang mga estudyante samtang magribyu sila sa ilang nakat-unan:

Nganong nagkinahanglan og tabang ang mga Santos sa Zion (Lalawigan sa Jackson, Missouri)? (Napugos sila sa pagpahawa sa ilang yuta pinaagi sa manggugubot nga panon.)
Unsa man ang Kampo sa Zion? (Usa ka grupo nga mokapin sa 200 ka kalalakin-an, 12 ka kababayen-an, ug 9 ka mga bata—mga boluntaryo ug mga na-recruit—gigiyahan ni Propeta Joseph Smith ug naorganisar agig pagsunod sa mga instruksyon sa Ginoo.)
Unsa man ang orihinal nga katuyoan sa Kampo sa Zion? (Aron magdala sa gikinahanglan nga mga kapanguhaan sa gipalayas nga mga Santos sa Missouri ug sa pagtabang kanila sa pagbawi sa ilang yuta sa Lalawigan sa Jackson.)

Pahinumdumi ang mga estudyante nga ang pinadayag nga naglangkob sa Doktrina ug mga Pakigsaad 105 gihatag niadtong Hunyo 22, 1834, human ang Kampo sa Zion nagbiyahe dul-an sa pito ka semana ug 10–20 ka milya na lamang (mga 15–30 ka kilometros) gikan sa Lalawigan sa Jackson. Hangyoa ang klase kon aduna bay makahinumdom sa mga instruksyon nga gihatag sa Ginoo niining panahona ngadto sa Kampo sa Zion kalabut sa katubsanan sa Zion. (Kinahanglan silang maghulat aron matabangan ang gipalayas nga mga Santos nga mabawi ang yuta sa Zion. Kon nagkinahanglan ang mga estudyante og tabang sa paghinumdom niini nga detalye, dapita sila sa pagpakli ngadto sa Doktrina ug mga Pakigsaad 105:9.)

Dapita ang usa ka estudyante sa pagbasa og kusog sa Doktrina ug mga Pakigsaad 105:3–9. Hangyoa ang klase sa pagsunod, nga magribyu sa mga pipila ka rason nga gihatag sa Ginoo sa pagkalangay sa katubsanan sa Zion.

Unsa ang mga rason sa Ginoo nga wala gihatag og balik sa mga Santos ang ilang mga kayutaan ug mga panimalay sa Zion nianang panahona?
Unsa nga baruganan ang atong makat-unan gikan niining mga bersikulo kabahin sa unsay kinahanglan gayud natong buhaton aron atong matukod ang Zion? (Ang mga estudyante mahimong mosugyot og lain-laing mga baruganan, apan tabangi sila nga mahibalo sa mosunod: Kita kinahanglang magkahiusa ug magmasulundon sa tanang gisugo sa Dios aron matukod ang Zion. Mahimo nimong isulat sa pisara kini nga baruganan.)

Aron matabangan ang mga estudyante nga mas masabtan kining doktrina, dapita ang usa ka estudyante sa pagbasa sa mosunod nga pamahayag ni Elder D. Todd Christofferson sa Korum sa Napulog Duha ka mga Apostoles. Hangyoa ang klase sa pagpaminaw sa pagpasabut ni Elder Christofferson kon unsa ang Zion ug unsa ang kinahanglang mahitabo aron maestablisar kini.

“Ang Zion usa ka lugar ug ingon man mga tawo. …

“Ang Zion usa ka Zion tungod sa pamatasan, hiyas, ug pagkamatinud-anon sa iyang mga pagkanasudnon. Hinumdumi, ‘ang Ginoo mitawag sa iyang katawhan nga Zion, tungod kay sila usa sa kasingkasing ug usa sa hunahuna, ug nagpuyo diha sa pagkamatarung; ug walay kabus taliwala kanila’. (Moises 7:18). Kon atong itukod ang Zion diha sa atong mga panimalay, mga branch, mga ward ug mga stake, kinahanglan atong labanan kini nga sumbanan. Gikinahanglan nga (1) mahimong maghiusa sa usa ka kasingkasing ug usa ka hunahuna, (2) aron mamahimo, sa tinagsa ug sa dinaghan, nga usa ka balaan nga katawhan, ug (3) moatiman alang sa mga timawa ug nagkinahanglan uban sa ingon ka epektibo nga atong wad-on ang kakabus taliwala kanato. Dili kita makahulat nga ang Zion moabut nga kining mga butanga mahitabo—ang Zion moabut lamang kon kini mahitabo.” (Dali na diri sa Zion,” Ensign ug Liahona, Nob. 2008, 37, 38).

Ikonsiderar ang pagpangutana sa mosunod aron matabangan ang mga estudyante nga mapalawman ang ilang panabut sa Zion:

Unsa ang Zion?
Unsa ang kinahanglang mahitabo aron maestablisar ang Zion?
Ngano kaha nga ang panaghiusa ug pagkamasulundon gikinahanglan aron matukod ang Zion?
Sumala sa Doktrina ug mga Pakigsaad 105:3–5, kadtong mga tawo nga nagkahiusa nagsunod sa balaod sa hain nga gingharian sa himaya?
Unsay inyong mahimo aron mapalig-on ang panaghiusa sa inyong mga pamilya, mga klase sa Simbahan, o mga korum? Unsaon ninyo pag-awhag ang uban niining mga grupo nga magkahiusa ug magmasulundon ngadto sa Ginoo?
Sa unsang paagi nga ang pagbuhat niining mga butanga makatabang kaninyo ug sa uban sa pag-establisar sa Zion?
Unsa nga mga kasinatian ang nakatabang kaninyo nga masabtan ang kaimportante sa panaghiusa diha sa grupo?

Dapita ang mga estudyante sa paghunahuna og usa ka butang nga ilang mabuhat aron mapalig-on ang panaghiusa sa ilang mga pamilya o sa ilang mga klase sa Simbahan o sa mga korum. Hangyoa ang mga estudyante sa paghisgot uban sa partner kon unsay ilang buhaton. Ipamatuod ang kaimportante sa panaghiusa ug kamasulundon samtang magtinguha kita sa pagtuman sa mga katuyoan sa Ginoo.

Ipasabut nga ang Ginoo mitapos sa pinadayag sa Doktrina ug mga Pakigsaad 105 pinaagi sa pagtudlo sa mga Santos kon unsa ang angay nilang buhaton sa ilang mga kaaway. Dapita ang usa ka estudyante sa pagbasa og kusog sa Doktrina ug mga Pakigsaad 105:38–41. Hangyoa ang klase sa pagsunod ug magpili og mga pulong gikan sa mga bersikulo nga nag-summarize kon unsa ang gitudlo sa Ginoo nga buhaton sa mga Santos agig tubag sa ilang mga tigpanlupig. Dayon hangyoa ang mga estudyante sa pagpasabut kon nganong ilang gipili ang maong mga pulong.

Base sa mga pagtulun-an sa Ginoo niining mga bersikulo, unsa nga mga panalangin ang moabut kon kita magtinguha sa pagpatunhay og kalinaw ngadto sa uban? (Ikonsiderar ang pagdapit sa mga estudyante nga markahan ang mga pulong nga nagtudlo sa mosunod nga baruganan: Kon kita magtinguha sa pagpatunhay og kalinaw ngadto sa uban, nan ang tanang mga butang molihok alang sa atong kaayohan.)
Unsa nga mga panalangin ang inyong nakita nga miabut sa dihang kamo o ang inyong kaila nagtinguha nga mahimong tigpasiugda sa kalinaw?

Awhaga ang mga estudyante sa pagtinguha sa pagpatunhay og kalinaw sa ilang pakig-inter-aksyon sa uban.

Sunod nga Unit (Doktrina ug mga Pakigsaad 106–108; 137)

Hangyoa ang mga estudyante kon nakahunahuna na ba sila kon unsay mahitabo sa mga tawo nga namatay nga walay bunyag o wala makadungog sa ebanghelyo ni Jesukristo. Ipasabut nga sa sunod nga unit, ilang makaplagan ang mga tubag niana nga pangutana. Makakat-on usab sila mahitungod sa orihinal nga ngalan sa Melchizedek Priesthood ug ang mga function sa mga katungdanan sa priesthood.