Leksyon 80

Doktrina ug mga Pakigsaad 76:50–80

Pasiuna

Samtang nagtrabaho sa paghubad sa Biblia kaniadtong Pebrero 16, 1832, si Joseph Smith mihimo og dinasig nga mga kausaban sa Juan 5:29 kalabut ngadto sa mga pagkabanhaw sa matarung ug sa dili matarung. Human makakita og mga panan-awon sa himaya sa Amahan ug sa Anak, sa pagkalaglag ni Lucifer, ug sa mga anak sa kapildihan, si Joseph Smith ug si Sidney Rigdon gipakita og mga panan-awon niadtong kinsa maapil sa pagkabanhaw sa mga makiangayon: ang mga lumulupyo sa celestial ug terrestrial nga mga gingharian.

Mga Sugyot alang sa Pagtudlo

Doktrina ug mga Pakigsaad 76:50–70

Nagpadayag ang Ginoo sa mga panginahanglanon ug sa mga panalangin sa pagdawat og kahimayaan diha sa celestial nga gingharian

Pagdala sa klase og usa ka piraso nga pan ug mga sangkap sa paghimo og pan. (O, makagamit ka og usa ka lahi nga matang sa gihudno nga pagkaon nga nagkinahanglan og nagkalain-laing mga sangkap.) Isulat ang Resipe alang sa Pan diha sa pisara. Hangyoa ang mga estudyante sa paghingalan sa mga sangkap alang sa paghimo og pan, ug ipakita ang mga butang samtang ang mga estudyante naghingalan niini. (Kon wala ka sa mga sangkap, mahimo nimong ilista kini diha sa pisara samtang ilang gihinganlan.) Sultihi ang mga estudyante nga ang proseso sa paghimo og pan makatabang kanila sa pagsabut sa mga kamatuoran nga ilang ilhon diha sa ilang pagtuon sa Doktrina ug mga Pakigsaad 76:50–80.

Tabangi ang mga estudyante sa pagribyu sa konteksto sa Doktrina ug mga Pakigsaad 76 pinaagi sa pagpangutana sa mosunod:

• Unsa ang gibuhat ni Joseph Smith ug Sidney Rigdon sa wala pa madawat ang panan-awon nga gi-rekord diha sa Doktrina ug mga Pakigsaad 76? (Naghubad ug namalandong sa Juan 5:29. Kon ang mga estudyante nagkinahanglan og tabang sa paghinumdom niini nga konteksto, dapita sila sa pag-scan sa katapusang sentence sa pasiuna sa seksyon.)

Dapita ang usa ka estudyante sa pagbasa og kusog sa Juan 5:29. Ipasabut nga si Joseph Smith ug Sidney Rigdon namalandong sa paghulagway ni Juan sa pagkabanhaw niadtong kinsa nagbuhat og maayo ug sa pagkabanhaw niadtong kinsa nagbuhat og dautan sa dihang nadawat nila ang panan-awon nga gi-rekord diha sa Doktrina ug Pakigsaad 76.

Dapita ang usa ka estudyante sa pagbasa og kusog sa Doktrina ug mga Pakigsaad 76:50. Hangyoa ang klase sa pagpangita og unsay gipakita ngadto ni Joseph Smith ug Sidney Rigdon human sa panan-awon kabahin sa mga anak sa kapildihan. (Mahimo nimong ipasabut nga niini nga bersikulo, ang pulong makiangayon nagpasabut og matarung.)

• Sumala sa bersikulo 50, kinsa ang nakita sa Propeta ug ni Sidney Rigdon human sa panan-awon kabahin sa mga anak sa kapildihan? (Kadto kinsa motungha diha sa pagkabanhaw sa mga makiangayon.)

Ipasabut nga ang Doktrina ug mga Pakigsaad 76:50–80 naghulagway niadtong kinsa mabanhaw sa pagkabanhaw sa mga makiangayon. Hangyoa ang mga estudyante sa pag-scan sa Doktrina ug mga Pakigsaad 76:70 ug sa pag-ila sa unang grupo sa mga tawo kinsa mabanhaw atol sa pagkabanhaw sa mga makiangayon. Hangyoa ang mga estudyante sa pagreport kon unsay ilang nakit-an.

Isulat ang Resipe alang sa Pagkahimong Celestial nga Tawo diha sa pisara. Ipasabut nga isip kabahin niini nga panan-awon, mipadayag ang Ginoo ngadto ni Joseph Smith ug Sidney Rigdon og paghulagway niadtong kinsa makapanunod og kahimayaan diha sa celestial nga gingharian. Dapita ang mga estudyante sa pagbasa og hilum sa Doktrina ug mga Pakigsaad 76:51–53 ug sa pagpangita sa mga panginahanglanon (mga sangkap) alang sa pagkahimong usa ka celestial nga tawo. Tudloi ang mga estudyante nga kon sila makakita og panginahanglanon, gidapit sila sa pag-adto sa pisara ug sa pagsulat unsay ilang nakit-an.

Human makasulat ang mga estudyante sa mga panginahanglanon diha sa pisara, mahimo nimong tabangan sila nga mas makasabut og maayo sa pipila ka mga pulong dinhi niini nga mga bersikulo.

• Unsa kaha ang ipasabut sa “[pagdawat] sa pagpamatuod ni Jesus”? (D&P 76:51). (Ang mga tubag mahimong maglakip og pagbaton og hugot nga pagtuo diha sa balaang misyon sa Manluluwas ug pagsunod sa Iyang ebanghelyo.)

• Sa unsa nga paagi nga ang usa ka tawo “nakabuntog pinaagi sa hugot nga pagtuo”? (D&P 76:53). (Ang “nakabuntog pinaagi sa hugot nga pagtuo” nagpasabut sa pagbuntog og mga tintasyon ug mga sala pinaagi sa pagpakita og hugot nga pagtuo diha ni Jesukristo ug sa paglahutay sa tanang mga pagsulay.)

• Unsay buot ipasabut sa “gibugkos pinaagi sa Balaan nga Espiritu sa saad”? (D&P 76:53). (Mahimo nimong ipasabut nga ang Balaan nga Espiritu sa saad mao ang Espiritu Santo. Kita gibugkos sa Balaan nga Espiritu sa Saad kon ang Espiritu Santo magpamatuod ngadto sa Langitnong Amahan nga ang mga ordinansa nga atong nadawat napahigayon og tarung ug nga kita nagmatinud-anon ngadto sa mga pakigsaad nga atong gihimo. Ang Espiritu Santo makapanghimatuod usab kanato nga ang atong pagkamatinud-anon sa mga ordinansa ug sa mga pakigsaad dawaton sa Dios.)

Sa laktod i-summarize ang Doktrina ug mga Pakigsaad 76:54–68 pinaagi sa pagpasabut nga kini nga tudling naglista sa daghang mga panalangin nga madawat sa gihimaya nga mga lumulupyo sa celestial nga gingharian. Kon ang panahon motugot, mahimo nimong dapiton ang pipila ka mga estudyante sa pagpuli-puli sa pagbasa og kusog gikan sa Doktrina ug mga Pakigsaad 76:54–68. Hangyoa ang klase sa pagsunod, nga mangita niini nga mga panalangin. Mahimo nimong isugyot nga markahan sa mga estudyante ang bisan hain nga mga panalangin nga labing makahuluganon ngadto kanila.

• Hain nga mga panalangin ang labing makahuluganon nganha kaninyo? Ngano?

Dapita ang usa ka estudyante sa pagbasa og kusog sa Doktrina ug mga Pakigsaad 76:69–70. Hangyoa ang klase sa pagsunod, nga mangita kon unsa pa ang gikinahanglan sa usa ka indibidwal aron makasarang sa celestial nga gingharian.

• Bisan kon kita naninguha sa pagbaton sa tanang gikinahanglan nga mga sangkap sa atong mga kinabuhi, unsay gisulti niini nga mga bersikulo nga ato pang gikinahanglan aron mahimong takus sa pagpanunod sa celestial nga gingharian? (Human motubag ang mga estudyante, isulat ang mosunod nga doktrina diha sa pisara ubos sa Resipe sa Pagkahimong Celestial nga Tawo: Mahimo lamang kitang hingpit pinaagi sa Pag-ula ni Jesukristo.)

Ipasabut nga samtang ang atong labing maayo nga mga paningkamot sa pagsunod sa mga sugo dili mohimo kanato nga hingpit, ang atong mga paninguha nagtabang kanato nga makasarang sa pagdawat sa grasya sa Manluluwas ug malimpyuhan pinaagi sa Iyang “hingpit nga pag-ula pinaagi sa pagpaagas sa iyang … dugo” (D&P 76:69). Kini nga kamatuoran nag-awhag kanato sa pagsunod sa mga sugo ug sa pagdawat sa mga ordinansa sa kaluwasan aron kita makadawat niining mahangturong mga panalangin. Dapita ang mga estudyante sa pagpamalandong sa mosunod nga pangutana ug dayon sa pagsulat sa ilang mga tubag diha sa ilang mga class notebook o mga scripture study journal:

• Sa unsa kaha nga paagi ang doktrina diha sa bersikulo 69 nagtabang kanato sa pagbuntog sa pagkawalay kadasig samtang kita naninguha alang sa kahimayaan sa celestial nga gingharian?

Human sa igo nga panahon, dapita ang pipila ka mga estudyante sa pagpakigbahin sa ilang mga tubag. Ikonsiderar ang pagpakigbahin sa imong pagpamatuod mahitungod sa tahas sa Manluluwas diha sa pagtabang kanato nga mahimong hingpit.

Doktrina ug mga Pakigsaad 76:71–80

Gipakita si Joseph Smith ug Sidney Rigdon sa usa ka panan-awon sa terrestrial nga gingharian

Dapita ang usa ka estudyante sa pagbasa og kusog sa Doktrina ug mga Pakigsaad 76:71. Hangyoa ang klase sa pagsunod, nga mangita sa unsay gipakita og sunod ngadto ni Joseph Smith ug Sidney Rigdon. Hangyoa ang mga estudyante sa pagreport kon unsay ilang nakit-an.

• Sumala niini nga bersikulo, sa unsa nga paagi ang himaya sa terrestrial nga gingharian makomparar ngadto sa himaya sa celestial nga gingharian?

Ipasabut nga ang mga kasulatan naggamit ug lahi nga mga kakusgon sa kahayag nga nagbanwag gikan sa bulan ug sa adlaw aron sa pagsimbolo sa kalainan tali sa mga kahimayaan sa terrestrial ug celestial nga mga gingharian. Samtang ang mga lumulupyo sa celestial ug terrestrial nga mga gingharian malakip sa pagkabanhaw sa mga makiangayon, kadtong nagbaton og celestial nga mga lawas mabanhaw uban ang mas dakong himaya ug mga panalangin kaysa niadtong nagbaton og terrestrial nga mga lawas.

Hangyoa ang mga estudyante sa pagbasa og hilum sa Doktrina ug mga Pakigsaad 76:72–80, nga mangita kon sa unsa nga paagi ang mga lumulupyo sa terrestrial nga gingharian malahi gikan sa mga lumulupyo sa celestial nga gingharian. Human ang mga estudyante may igong panahon sa pagbasa, hangyoa sila sa paghulagway sa kalainan nga ilang nakit-an.

• Sumala niini nga mga bersikulo, unsa ang pipila ka mga kinatibuk-ang paghulagway niadtong kinsa makapanunod sa terrestrial nga gingharian? (Ang mga tubag mahimong maglakip sa mosunod: kadtong “kinsa namatay nga wala masayud sa balaod” [bersikulo 72]; kadtong “kinsa wala midawat sa pagpamatuod ni Jesus diha sa unod, apan sa pagkahuman midawat niini” [mga bersikulo 73–74]; “dungganan nga mga tawo sa yuta, kinsa nabutaan pinaagi sa pagkamalimbungon sa mga tawo” [bersikulo 75]; ug “sila kinsa dili mga maisug diha sa pagpamatuod ni Jesus” [bersikulo 79].)

Aron matabangan ang mga estudyante nga mas makasabut og maayo sa pakisayran ngadto niadtong kinsa namatay nga wala masayud sa balaod o kinsa midawat sa ebanghelyo human sila mamatay (tan-awa sa mga bersikulo 72–74), ipasabut nga ang Ginoo mihatag og dugang nga panabut sa dihang siya mipadayag ngadto ni Joseph Smith sa katapusang padulngan sa iyang igsoong lalaki nga si Alvin, kinsa namatay sa wala pa siya mabunyagi. Dapita ang usa ka estudyante sa pagbasa og kusog sa Doktrina ug mga Pakigsaad 137:7–9. Dayon pangutan-a sa mosunod:

• Unsa ang dugang katin-awan nga gihatag sa Ginoo kabahin niadtong kinsa modawat unta sa ebanghelyo kon sila gitugutan pa nga mabuhi?

• Sumala sa Doktrina ug mga Pakigsaad 137:9, kinsa ang mohukom kanato sumala sa atong mga buhat ug sa mga tinguha sa atong mga kasingkasing?

Basaha og kusog ang mosunod nga pamahayag: “Hinumdumi nga ang Dios lamang, kinsa nasayud sa matag kasingkasing sa indibidwal, ang makahimo og katapusang mga paghukom sa mga indibidwal” (Matinud-anon sa Tinuhoan: Usa ka Pakisayran sa Ebanghelyo [2004], 134). Hatagi og gibug-aton nga tungod kay ang Ginoo lamang ang nakahibalo sa atong mga kasingkasing, kinahanglan nga dili kita mohimo og mga paghukom mahitungod kon hain nga gingharian atong gituohan ang mapanunod sa uban.

• Unsa kaha ang gipasabut sa “nabutaan pinaagi sa pagkamalimbungon sa mga tawo”? (D&P 76:75.) (Ang pipila ka mga tawo buta sa importansya sa ebanghelyo ni Jesukristo tungod sa kalibutanon nga mga impluwensya.) Sa unsa nga paagi nga ang pipila sa mga tawo karon nabutaan pinaagi sa pagkamalimbungon sa mga tawo?

Aron matabangan ang mga estudyante nga makasabut sa mga pulong “dili mga maisug diha sa pagpamatuod ni Jesus” (D&P 76:79), dapita ang usa ka estudyante sa pagbasa og kusog sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles:

“Unsa ang ipasabut sa pagkahimong maisug diha sa pagpamatuod ni Jesus?

“Ang mahinungdanong bato sa pamag-ang sa kaisug diha sa kawsa sa pagkamatarung mao ang pagkamasulundon ngadto sa tibuok balaod sa tibuok ebanghelyo. …

“Ang pagkahimong maisug diha sa pagpamatuod ni Jesus mao ang pagtuo diha ni Kristo ug sa iyang ebenghelyo uban sa dili matarug nga kombiksyon. …

“Apan dili kini ang tanan. Kini labaw pa kay sa pagtuo ug pagkahibalo. Kinahanglan gayud nga kita mga tigbuhat sa mga pulong ug dili lamang tigpaminaw. Kini labaw pa kay sa pagsulti; kini dili yano nga pagkumpisal pinaagi sa ba-ba sa balaang Pagkaanak sa Manluluwas. Kini pagkamasulundon ug pag-uyon ug personal nga pagkamatarung. …

“Ang maisug diha sa pagpamatuod ni Jesus mao ang … ‘paglahutay ngadto sa katapusan.’ (2 Ne. 31:20.) Kini mao ang pagpuyo sa atong relihiyon, sa pagbuhat unsay atong gisangyaw, sa pagsunod sa mga sugo” (“Be Valiant in the Fight of Faith,” Ensign, Nob. 1974, 35).

• Paghunahuna og usa ka tawo nga inyong kaila kinsa inyong gikonsiderar nga maisug sa pagpamatuod diha ni Jesukristo. Unsa nga mga kinaiya ug mga lihok ang nagpakita sa ilang kaisug?

• Unsa ang nagtabang kaninyo nga mahimong maisug sa inyong pagpamatuod diha ni Jesukristo?

• Kon kita maisug sa pagpamatuod diha ni Jesukristo, unsa ang atong maangkon? (Samtang ang mga estudyante nagtubag, kinahanglan nga ilang ilhon ang mosunod nga baruganan: Kon kita maisug sa pagpamatuod diha ni Jesukristo, kita makaangkon sa celestial, nga gingharian sa Dios. Idugang kini nga kamatuoran ngadto sa Resipe sa Pagkahimong Celestial nga Tawo diha sa pisara.)

Dapita ang mga estudyante sa pagsulat diha sa ilang mga class notebook o mga scripture study journal og usa ka butang nga ilang mabuhat nga mahimong mas maisug sa ilang pagpamatuod ni Jesukristo. Ipakigbahin ang imong pagpamatuod nga ang kada usa kanila adunay potensyal nga makaangkon sa celestial nga gingharian.

Komentaryo ug Background nga Impormasyon

Doktrina ug mga Pakigsaad 76:51–53, 69–70. Pagkahimong celestial nga mga tawo

Si Elder Dallin H. Oaks sa Korum sa Napulog Duha ka mga Apostoles mipasabut sa tahas sa pagkamasulundon ug sa Pag-ula sa paghimo kanato nga takus sa celestial nga gingharian:

“Ang Katapusang Paghukom dili lamang usa ka pagtimbang-timbang sa gidaghanon sa maayo ug sa dautan nga mga buhat—nga atong nahimo. Kini maoy usa ka pagdawat sa katapusang sangputanan sa atong mga buhat ug mga hunahuna—unsa ang atong gidangatan. Dili igo alang ni bisan kinsa nga mobuhat lamang nga dili maghunahuna. Ang mga sugo, mga ordinansa, ug mga pakigsaad sa ebanghelyo dili listahan sa mga nahimo nga gikinahanglan aron adunay mapundo didto sa langit. …

“Ang ebanghelyo ni Jesukristo mao ang plano diin kita mamahimo kon unsa gayud ang angay nga mahimo sa mga anak sa Dios. Kining walay lama ug hingpit nga kahimtang moresulta gumikan sa makanunayong pagsunod-sunod sa mga pakigsaad, mga ordinansa, ug mga lihok, usa ka katingbanan sa husto nga mga pagpili, ug sa nagpadayon nga paghinulsol. …

“… Ako mopamatuod uban ang pagpasalamat sa plano sa Amahan ubos diin, pinaagi sa Pagkabanhaw ug Pag-ula sa atong Manluluwas, kita adunay kasigurohan sa imortalidad ug sa oportunidad nga mahimong unsay gikinahanglan alang sa kinabuhing dayon” (“The Challenge to Become,” Ensign, Nob. 2000, 32, 33, 34).

Doktrina ug mga Pakigsaad 76:67. Ang“simbahan ni Enoch, ug sa Unang Natawo”

Si Enoch ug ang iyang katawhan, kinsa mahimong matawag isip ang simbahan, pundok, o kongregasyon ni Enoch, malampusong mitukod sa Zion ug gidala ngadto sa langit. Ang mahimong miyembro sa simbahan sa Unang Natawo nagkinahanglan kanato nga mahimong takus sa pagpuyo diha sa katilingban ni Enoch, nga mahimo lamang pinaagi sa personal nga pagkamatarung, pagkamasulundon sa mga ordinansa sa balay sa Ginoo, ug sa Pag-ula ni Jesukristo.

Si Elder Bruce R. McConkie sa Korum sa Napulog Duha ka mga Apostoles mipasabut kon unsay gipasabut nga mahimong miyembro sa simbahan sa Unang Natawo:

“Ang mga miyembro sa Ang Simbahan ni Jesukristo sa mga Santos sa Ulahing mga Adlaw kinsa nagpahinungod og maayo sa ilang mga kaugalingon ngadto sa pagkamatarung nga nadawat nila ang mas taas nga mga ordinansa sa kahimayaan mahimong mga miyembro sa Simbahan sa Unang Natawo. Ang bunyag mao ang ganghaan ngadto sa Simbahan mismo, apan ang celestial nga kaminyoon mao ang ganghaan ngadto sa pagka-miyembro diha sa Simbahan sa Unang Natawo, ang alirong sa matinud-anong mga santos kinsa manununod sa kahimayaan ug kahingpitan sa gingharian sa Amahan” (Mormon Doctrine, 2nd ed. [1966], 139).

Doktrina ug mga Pakigsaad 76:69. Kahingpitan

Si President Russell M. Nelson sa Korum sa Napulog Duha ka mga Apostoles mipasabut sa kahulugan sa kahingpitan diha sa plano sa Ginoo:

“Ang kahingpitan nga gipanglantaw sa Manluluwas alang kanato mas labaw pa kay sa walay sayop nga pagbuhat. Kini mao ang mahangturong gipaabut ingon nga gipahayag sa Ginoo diha sa iyang pangamuyo nga pag-ampo ngadto sa iyang Amahan—nga unta kita mahimong hingpit ug makapuyo uban kanila sa mga kahangturan nga umaabut [tan-awa sa Juan 17:23–24]. …

“… Ang kahingpitan naglangkob sa pag-angkon og kinabuhing dayon—ang matang sa kinabuhi nga ang Dios nagpuyo. …

“… Isip mga anak sa langitnong mga ginikanan, kita gitugahan og potensyal nga mahimong sama kanila, ingon lamang nga ang mortal nga mga anak mahimong sama sa ilang mortal nga mga ginikanan.

“Gipahiuli sa Ginoo ang iyang simbahan aron matabangan kita sa pag-andam alang sa kahingpitan. …

“Ang hingpit nga tawo … mao ang na-kompleto nga tawo … ang nahimaya nga kalag! …

“Dili kita angayang masagmuyo kon ang atong kinasingkasing nga mga paningkamot ngadto sa pagkahingpit karon daw makapaluya ug walay katapusan. Ang pagkahingpit gilauman. Moabut kini sa hingpit human lamang sa Pagkabanhaw ug pinaagi lamang sa Ginoo. Kini nagpaabut sa tanan kinsa nahigugma kaniya ug nagsunod sa iyang mga sugo. Kini naglakip sa mga trono, mga gingharian, mga kayutaan, mga kagamhanan, ug mga kamandoan [tan-awa sa D&P 132:19]. Kini mao ang katapusan diin kita kinahanglan nga molahutay. Kini mao ang mahangturong kahingpitan nga ang Dios nagtagana alang sa kada usa kanato” (“Perfection Pending,” Ensign, Nob. 1995, 87, 88).

Doktrina ug mga Pakigsaad 76:69–70. Ang tanang mga miyembro sa Simbahan adunay potensyal sa pag-angkon og kahimayaan didto sa celestial nga gingharian

Gitudlo ni Presidente George Albert Smith ang potensyal alang sa tanan sa pag-angkon sa celestial nga gingharian:

“Usa sa nindot nga mga butang ngari kanako sa Ebanghelyo ni Jesukristo mao nga kini nagdala kanatong tanan sa sama nga ang-ang. Kini dili kinahanglan alang sa usa ka tawo nga mahimong presidente sa usa ka stake, o miyembro sa Korum sa Napulog Duha, aron maangkon ang taas nga dapit sa celestial nga gingharian. Ang pinakaubos nga miyembro sa Simbahan, kon siya nagsunod sa mga sugo sa Dios, makaangkon og kahimayaan ingon lamang ni bisan kinsa nga tawo diha sa celestial nga gingharian. Ang nakanindot sa ebanghelyo ni Jesukristo mao nga kini naghimo kanatong tanan nga managsama kutob nga kita nagsunod sa mga sugo sa Ginoo. … Kita adunay sama nga mga oportunidad alang sa kahimayaan” (sa Conference Report, Okt. 1933, 25).

Si Bishop Joseph L. Wirthlin sa Presiding Bishopric mipamatuod: “Tanan kita mga kandidato alang sa celestial nga gingharian” (sa Conference Report, Abr. 1952, 118).

Doktrina ug mga Pakigsaad 76:58, 71. Ang pagkahimong dios ug pagdawat sa kahingpitan sa Amahan

Ingon nga tinuod nga mga anak sa Dios nga Amahan, ang atong potensyal mao nga mahimong ingon nga Siya mao. Ang pagdawat sa kahingpitan sa Amahan mao ang pagdawat sa hingpit nga matang sa Iyang himaya ug mga panalangin. Kon atong sundon ang mga pagtulun-an sa Manluluwas, sundon ang Iyang mga sugo, ug gamiton ang Iyang Pag-ula sa atong mga kinabuhi, ang Amahan makabayaw kanato nga mahisama Kaniya, magpuyo sa matang sa kinabuhi nga Siya nagpuyo, ug magpahimulos sa mahangturong kalipay nga Siya nagpahimulos.

Doktrina ug mga Pakigsaad 76:79. “Maisug diha sa pagpamatuod diha ni Jesus”

Gihulagway ni Presidente Ezra Taft Benson unsa ang kahulugan sa maisug sa pagpamatuod diha ni Jesus sa Abril 1982 nga kinatibuk-ang komperensya sa Simbahan. Tan-awa sa “Valiant in the Testimony of Jesus,” Ensign, Mayo 1982, 62–64.