Leksyon 129: Doktrina ug mga Pakigsaad 123

Leksyon 129

Doktrina ug mga Pakigsaad 123

Pasiuna

Samtang gipriso si Propeta Joseph Smith didto sa Liberty Jail gikan niadtong Disyembre 1, 1838, hangtud sa Abril 6, 1839, naghimo siya og sulat bahin sa kahupayan ug tambag ngadto sa mga Santos. Ang Doktrina ug mga Pakigsaad 123 usa ka kinutlo [excerpt] gikan sa sulat nga gipetsahan og Marso 20, 1839, nga iyang gisulat ngadto sa mga Santos. Niini nga kinutlo, gihangyo sa Propeta ang mga Santos sa pagtigum ug pagmantala sa mga istorya bahin sa mga pagpanggukod ug pag-antus nila ug sa pagtabang niadtong nalingla sa sayop nga mga doktrina.

Pahinumdom: Ang sunod nga leksyon (“Ang Pag-establisar sa Nauvoo,” leksyon 130) naghatag og oportunidad alang sa duha ka estudyante sa pagtudlo og mga porsyon sa leksyon. Mahimong magpili ka og duha ka estudyante karon ug hatagi sila og mga kopya sa gitagana nga mga porsyon sa leksyon 130 aron makapangandam sila.

Mga Sugyot alang sa Pagtudlo

Doktrina ug mga Pakigsaad 123:1–6

Gitambagan ni Joseph Smith ang mga Santos sa pagtigum ug pagmantala sa mga istorya bahin sa mga pagpanggukod ug sa pag-antus nila

Sugdi pinaagi sa pagbasa sa mosunod nga pamahayag:

“Kini mahimong mopanghimatuod nga ako, si Delia Reed, mibalhin sa Missouri sa tuig 1836. Ang akong bana namatay sa wala madugay human mi miabut ug mibiya kanako og pito ka gagmayng mga anak. … Sa dihang miabut ang mga kagubot tali sa mga lumulupyo ug sa mga Mormon, ako, kauban ang among pundok, napugos sa pagbiya sa estado. … Napugos ko sa pagsakripisyo sa hapit tanan nakong kabtangan [ug] ang akong pamilya nagkatibulaag, ug kinahanglan kong makabaton og gamayng kantidad sa kwarta taliwala sa mga estranghero” (Delia Reed, sa Mormon Redress Petitions: Documents of the 1833–1838 Missouri Conflict, ed. Clark V. Johnson [1992], 523; ang punctuation, capitalization, ug spelling gi-standardize).

Ipasabut nga usa kini ka opisyal nga pamahayag nga gihatag ni Sister Reed ngadto sa usa ka opisyal sa hukmanan. Dapita dayon ang mga estudyante sa pagbasa og hilum sa Doktrina ug mga Pakigsaad 123:1.

Gikan sa unsay inyong nakat-unan niining bersikulo, unsa kaha ang usa ka katuyoan nga gihatag ni Sister Reed kini nga pamahayag?

Pahinumdumi ang mga estudyante nga gikan niadtong Disyembre 1838 hangtud sa Abril 1839 si Propeta Joseph Smith ug ang ubang mga lider sa Simbahan gipriso sa bilanggoan sa Liberty, Missouri. Sa samang higayon, ang mga Santos gipapahawa gikan sa estado sa Missouri atol sa grabe nga mga bulan sa tingtugnaw [winter] tungod sa sugo sa pagpatay nga giluwatan ni Gobernador Lilburn Boggs. Ipasabut nga ang Doktrina ug mga Pakigsaad 123 kinutlo sa usa ka sulat niadtong Marso 1839 nga gisulat ni Propeta Joseph Smith gikan sa Liberty Jail nga naghatag og tambag ngadto sa mga Santos atol niining lisud nga panahon.

Dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 123:1–5. Hangyoa ang klase sa pagsunod, nga mangita kon unsay gitambag ni Joseph Smith nga buhaton sa gilutos nga mga Santos. Aron matabangan ang mga estudyante nga makasabut niining mga bersikulo, mahimong ipasabut nga diha sa bersikulo 5 ang mga pulong nga “pagkasumpay-sumpay sa yawan-on nga pagkalampingasan” nagpasabut sa usa ka koleksyon sa mga bakak sa dautan ug ang mga pulong nga “pagkabanyaga ug pagpahamtang sa kamatayon” nagpasabut sa yawan-on ug bayolente nga mga binuhatan.

Unsay gitambag sa Propeta nga buhaton sa mga Santos diha niining mga bersikulo?

Daghan sa mga Santos ang nagmasulundon sa tambag sa Propeta ug nagtigum og mga istorya bahin sa mga pagpanggukod kanila. Dapita ang usa ka estudyante sa pagbasa og kusog sa Doktrina ug mga Pakigsaad 123:6. Hangyoa ang klase sa pagsunod, nga mangita sa mga rason nganong gisultihan ang mga Santos sa pagtigum og mga istorya bahin sa mga pagpanggukod ug pag-antus nila. Mahimo nimong ipasabut nga ang pulong nga “giawhag kanato” nagpasabut og “gikanahanglan kanato.” Mahimo usab nimo silang pahinumduman nga ang Ginoo nahaunang misaad sa pagtubos sa gigukod nga mga Santos ug “mogula gikan sa iyang dapit nga tagoanan, ug sa iyang kasuko mohasol sa nasud” (D&P 101:89).

Sumala sa Doktrina ug mga Pakigsaad 123:6, nganong gimanduan man sa Langitnong Amahan ang mga Santos sa pagtigum og mga istorya bahin sa pagpanggukod kanila?
Unsa ang gitudlo niini nga bersikulo nga kinahanglan gayud natong buhaton sa dili pa tumanon sa Ginoo ang Iyang mga saad?

Dapita ang mga estudyante sa pagsulat og pamahayag sa baruganan nga nagpahayag niining relasyon tali sa atong mga paningkamot ug sa mga saad sa Ginoo. Hangyoa ang pipila ka estudyante sa pagpakigbahin sa baruganan nga ilang nahibaloan. Ang mosunod mao ang usa ka paagi nga mahimong ipamulong sa mga estudyante kini nga baruganan: Ang Ginoo motuman sa Iyang mga saad human nga mahimo nato ang atong bahin. Isulat kini nga baruganan diha sa pisara.

Ngano kaha nga gilauman sa Ginoo nga atong buhaton ang atong bahin sa dili pa Siya motuman sa Iyang mga saad?
Kanus-a ninyo nakita kini nga baruganan nga nakumpirmar diha sa inyong kaugalingong kinabuhi o sa kinabuhi sa tawo nga inyong nailhan?

Doktrina ug mga Pakigsaad 123:7–17

Gitambagan ni Joseph Smith ang mga Santos sa pagtabang niadtong nalingla sa mga bakak

Dapita ang mga estudyante sa paghunahuna nga gihatagan sila og buluhaton sa pagsulat og report mahitungod sa Simbahan alang sa usa sa ilang mga klase sa eskwelahan. Isip kabahin sa gikinahanglan [requirement], kinahanglan nilang ilakip ang dili mominus sa tulo ka mga tinubdan.

Unsa kaha nga mga tinubdan ang inyong gamiton alang sa inyong report?
Nganong importante man kon unsa nga mga tinubdan ang inyong gamiton sa pagsulat mahitungod sa Simbahan?
Unsaon ninyo pagkahibalo kon hain nga mga tinubdan ang tukmang naghulagway sa Simbahan?

I-summarize ang Doktrina ug mga Pakigsaad 123:7–10 pinaagi sa pagpasabut nga sa dihang girekord ni Joseph Smith kining mga bersikulo, daghang mga bakak ang gipakatap mahitungod sa Simbahan. Gisultihan ang mga Santos nga ila kining “dili malikayan nga katungdanan” (D&P 123:7) ang pagtubag niining mga bakak ug sa pagtigum ug pagmantala sa mga istorya bahin sa mga pagpanggukod ug mga pag-antus nila.

Dapita ang usa ka estudyante sa pagbasa og kusog sa Doktrina ug mga Pakigsaad 123:11–12. Hangyoa ang klase sa pagsunod, nga mangita sa dugang nga mga rason nganong gisugo ang mga Santos sa pagtigum ug pagmantala og mga istorya bahin sa mga pagpanggukod ug pag-antus nila. Hangyoa ang mga estudyante sa pag-report sa ilang mga nakit-an.

Sumala sa bersikulo 12, sa unsang paagi nga ang daghang putli og kasingkasing nabutaan gikan sa pagkakita sa kamatuoran?
Sa unsang paagi kaha nga ang mga bakak mahitungod sa Simbahan makaapekto niadtong dili sakop sa atong tinuohan?
Sumala sa bersikulo 12, nganong daghang tawo dinhi sa yuta ang natago gikan sa kamatuoran? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga kamatuoran: Aduna pay daghan kinsa natago gikan sa kamatuoran tungod kay sila wala masayud asa kini pangitaa.)
Sa unsa kaha nga paagi nga ang pagmantala sa kamatuoran mahitungod sa mga pagpanggukod ug mga pag-antus sa mga Santos niining higayuna nakatabang sa mga tawo nga makakita sa kamatuoran?

Pahinumdumi ang mga estudyante nga adunay daghan pa nga mga tawo karon “kinsa nabutaan pinaagi sa maliputon nga paglingla sa mga tawo” ug kinsa natago gikan sa kamatuoran tungod lamang kay sila wala masayud asa kini pangitaa (D&P 123:12). Dapita ang usa ka estudyante sa pagbasa og kusog sa mosunod nga pamahayag ni Elder M. Russell Ballard sa Korum sa Napulog Duha ka mga Apostoles. Hangyoa ang klase sa pagpaminaw og butang nga nakapatago sa mga tawo gikan sa pagkasayud sa kamatuoran mahitungod sa Simbahan sa atong panahon.

“Daghan kaayong mga tawo minus og pagsabut kabahin sa Simbahan tungod kay kasagaran sa impormasyon nga ilang madungog kabahin nato nagagikan sa mga report sa mga tigbalita nga kasagaran pinasikad sa mga kontrobersiya. Sobra nga pagtagad sa kontrobersiya adunay dili maayo nga epekto sa mga pagtan-aw sa mga tawo mahitungod sa unsa gayud ang Ang Simbahan ni Jesukristo sa mga Santos sa Ulahing mga Adlaw” (“Pagpaambit sa Ebanghelyo Gamit ang Internet,” Liahona, Hunyo 2008, 62).

Sumala ni Elder Ballard, unsa ang butang nga nakapatago sa mga tawo gikan sa pagkasayud sa kamatuoran mahitungod sa Simbahan sa atong panahon?

Ipasabut nga, susama sa mga Santos niadtong 1839, gisugo kita sa pagtabang sa uban nga makabaton og sakto nga panabut bahin sa Simbahan—sa mga miyembro, mga lider, mga gituohan, kasaysayan, mga pagtulun-an, ug mga gipangbuhat niini.

Unsay inyong mahimo sa pagtabang sa uban nga makabaton og sakto nga panabut bahin sa Simbahan? (Isulat ang mga tubag sa mga estudyante diha sa pisara.)

Dapita ang usa ka estudyante sa pagbasa sa mosunod nga pamahayag ni Elder M. Russell Ballard. Hangyoa ang klase sa pagpaminaw alang sa usa ka paagi nga makatabang sa uban nga makabaton og sakto nga panabut bahin sa Simbahan.

“Adunay mga pag-istoryahanay nga gihimo kabahin sa Simbahan kanunay. Kini nga mga pag-istoryahanay magpadayon bisan kon moapil ba kita niini o dili. Apan dili mahimong magpadaplin ra kita samtang ang uban, lakip ang atong mga tigpanaway, mosulay sa paghubit sa unsay ginatudlo sa Simbahan. Samtang ang ubang pag-istoryahanay adunay liboan o gani minilyon nga maminaw, kadaghanan niini mas ginagmay ra. Apan ang tanang mga pag-istoryahanay adunay epekto niadtong moapil niini. Ang mga pagtan-aw kabahin sa Simbahan ma-establisar diha sa usa ka pag-istoryahanay sa kada higayon. …

“Karon, hangyoon ko kamo sa pag-apil sa pag-istoryahanay pinaagi sa pagsalmot diha sa Internet sa pagpakigbahin sa ebanghelyo ug sa pag-eksplikar sa yano ug klaro nga mga pulong ang mensahe sa Pagpahiuli. … Kini, hinoon, nagkinahanglan nga inyong masabtan ang nag-una nga mga baruganan sa ebanghelyo. Importante nga makatanyag kamo og klaro ug husto nga pagsaksi bahin sa mga kamatuoran sa ebanghelyo” (“Pagpaambit sa Ebanghelyo Gamit ang Internet,” 61, 62).

Idugang ang gisugyot ni Elder Ballard niadtong nalista na diha sa pisara.

Dapita ang mga estudyante sa pagkonsiderar og mga paagi sa pagtabang sa uban nga makakat-on sa kamatuoran nga nalista diha sa pisara. Hangyoa sila sa pagpili og usa nga ilang gibati nga ilang magamit. Dapita ang pipila ka estudyante sa pag-report kon hain nga sugyot ang ilang gipili ug kon unsaon nila pagplano nga gamiton kini aron makatabang sa uban nga makabaton og sakto nga panabut bahin sa Simbahan. Awhaga ang tanang estudyante nga buhaton ang gisugyot nga ilang gipili aron matabangan ang uban nga makakita sa kamatuoran.

Hangyoa ang mga estudyante sa paghunahuna mahitungod sa usa ka panahon sa dihang nakatabang sila sa uban nga makabaton og sakto nga panabut bahin sa Simbahan. Dapita ang pipila ka estudyante sa pagpakigbahin sa ilang mga kasinatian ngadto sa klase.

Dapita ang usa ka estudyante sa pagbasa og kusog sa Doktrina ug mga Pakigsaad 123:13–16. Hangyoa ang klase sa pagsunod, nga mangita kon unsay gisulti ngadto sa mga Santos mahitungod sa ilang mga paningkamot sa pagpresentar og tukma nga istorya sa kamatuoran ngadto sa uban.

Sumala sa bersikulo 15, nganong gisultihan man ang mga Santos nga dili ikonsiderar ang ilang mga paningkamot ingon og “walay hinungdan nga mga butang”?
Unsa nga baruganan ang atong makat-unan gikan sa tambag sa Ginoo diha sa bersikulo 15 mahitungod sa ginagmay nga mga desisyon nga atong gihimo karon? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga baruganan: Ang atong mga desisyon nga motuman sa morag ginagmay nga mga sugo sa Ginoo makahatag og dakong impluwensya sa atong kinabuhi sa umaabut.)
Sa unsang paagi nga ang gamayng desisyon nga makahimo og panag-istoryahanay bahin sa ebanghelyo uban sa usa ka tawo makahatag og dakong impluwensya?

Dapita ang usa ka estudyante sa pagbasa og kusog sa Doktrina ug mga Pakigsaad 123:17. Hangyoa ang klase sa pagsunod, nga mangita kon sa unsang paagi kini nga bersikulo adunay kalabutan ngadto sa kamatuoran nga gisulat diha sa pisara sa sayo pa: Ang Ginoo motuman sa Iyang mga saad human nga mahimo nato ang atong bahin. Dapita ang mga estudyante nga mopakigbahin sa ilang mga ideya ngadto sa klase.

Ngano kaha nga importante man nga magmalipayon “sa pagbuhat sa tanan nga mga butang nga ubos sa atong gahum”?
Base sa bersikulo 17, unsay mapaniguro ngari nato kon buhaton nato ang tanan natong mahimo aron magmasulundon sa mga sugo sa Ginoo? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga baruganan: Kon buhaton nato ang tanang butang ubos sa atong gahum aron magmasulundon sa mga sugo sa Ginoo, nan makabaton kita sa kasiguroan nga gamiton sa Dios ang Iyang gahum sa pagtabang kanato sumala sa Iyang kabubut-on ug panahon.)
Unsa kaha ang gipasabut sa pagbaton og kasiguroan nga gamiton sa Dios ang Iyang gahum sa pagtabang kanato kon kita “magmalipayon sa pagbuhat sa tanan nga mga butang nga ubos sa atong gahum”? Unsa man ang pipila ka butang nga inyong mahimo aron makabaton nianang kasiguroan sa inyong kinabuhi?

Ipakigbahin ang imong pagpamatuod nga makasalig kita nga kon mabuhat nato ang tanan kutob sa atong mahimo nga masulundong mosunod sa mga sugo sa Dios, Iyang tumanon ang Iyang mga saad.

Komentaryo ug Background nga Impormasyon

Doktrina ug mga Pakigsaad 123:1. “Ang pagtigum sa kasayuran sa … mga pag-antus ug mga pasipala”

Ang mga Santos nga nag-antus didto sa Missouri nagmasulundon sa tambag ni Propeta Joseph Smith diha sa Doktrina ug mga Pakigsaad 123, ug nagtigum sila og daghang mga istorya bahin sa mga pagpanggukod kanila. Ang mosunod mao ang duha sa opisyal nga mga pamahayag nga gihatag ngadto sa mga opisyal sa hukmanan:

“Miabut si Heneral Clark ngadto sa Caldwell uban sa iyang mga tropa. Nagpuyo ko og mga duha ka milya gikan sa Far West … duol kang Mr. Gad Yale. Igong gidaghanon sa mga tropa ni Heneral Clark ang miabut sa balay ni Mr. Yale ug mihunong didto sulod sa mga duha ka adlaw ug miguba sa daghang kabtangan. Ilang gipanglangkat ang mga salog sa balay, gipangpatay ang ilang mga manok ug mga baboy, ug gisunog ang … mga dagami. Nakit-an nako nga ilang gisunog ang mga dagami, nga nahurot tanan. Ilang gidala ang gusto nilang mais alang sa ilang mga kabayo gikan ni Mr. Yale, ug nagtuo ko nga siya dunay mga napulo ka acre [4.05 ka ektarya] nga giguba. … Ang ubang mga baboy nga ilang gipusil gipasagdan lang nga madugta diha sa yuta. Nakita usab nako ang uban sa militia nga miadto sa balay ni Mr. Cyrus Daniel, nga ilang gilungkab. Nakita nako sila nga nagdala og usa ka higdaanan ug hapin sa higdaanan ug pipila ka sinina” (Mary K. Miles, sa Mormon Redress Petitions: Documents of the 1833–1838 Missouri Conflict, ed. Clark V. Johnson [1992], 496–97; ang punctuation, capitalization, ug spelling gi-standardize).

“Ako mopanghimatuod nga ang akong amahan mihunong sa Haun’s mill ug nagpuyo sa usa ka tolda sa panahon nga nahitabo ang pagmasaker didto. Anaa ko sa tolda sa dihang miabut ang pundok sa mga tropa. Gisinggitan sa pipila sa among katawhan ang kababayen-an ug kabataan nga mobiya sa mga tolda. Midagan ko sa usa ka pandayan kon asa anaa ang akong amahan. Mikamang ko ubos sa trabahuanan sa panday, ingon man usab ang akong igsoong lalaki ug laing batang lalaki nga ginganlan og Charles Merrick. Nasamdan ko sa bat-ang, gipusil sa ulo ang akong igsoong lalaki, ug ang laing batang lalaki nakadawat og tulo ka samad ug namatay tungod niini. Gisultihan ko sa akong inahan nga otso anyos na ko sa miaging bulan. Nakita nako ang pipila sa among mga kaaway nga mibira sa botas sa akong amahan sa wala pa siya mamatay” (Alma Smith, sa Mormon Redress Petitions, 537; ang punctuation, capitalization, grammar, ug spelling gi-standardize).

Doktrina ug mga Pakigsaad 123:4–5. “[Ang] makauulaw nga mga pamahayag nga gihungihong”

Si Elder Robert D. Hales sa Korum sa Napulog Duha ka mga Apostoles mipasabut kon sa unsang paagi nga ang negatibong publisidad kabahin sa Simbahan makatabang sa atong misyonaryo nga mga paningkamot:

“Ang kasinatian nagpakita nga ang mga panahon sa negatibo nga publisidad kabahin sa Simbahan makatabang sa pagkab-ot sa mga tumong sa Ginoo. Niadtong 1983, ang Unang Kapangulohan misulat ngadto sa mga lider sa Simbahan, ‘Ang oposisyon mahimo nga oportunidad niini mismo. Uban sa nagpadayon nga mga pagsulay nga giatubang sa atong mga misyonaryo mao ang kakulang sa interes diha sa relihiyuso nga mga butang ug sa atong mensahe. Kini nga mga pagsaway nakamugna … og interes diha sa Simbahan. Kini naghatag og oportunidad [alang sa mga miyembro] sa pagpahibalo sa kamatuoran niadtong kansang pagtagad gitumong ngari kanato’ [Sulat sa Unang Kapangulohan, Dis. 1, 1983].

“Kita mahimong makapahimulos niana nga mga oportunidad sa daghang mga paagi: usa ka mahigalaon nga sulat ngadto sa editor, usa ka pakigsultihanay sa higala, usa ka komentaryo diha sa blog, o usa ka pulong nga makahatag og kasiguroan ngadto sa usa ka tawo nga nakahimo og pagdaut sa Simbahan. Tubagon nato kana uban sa gugma niadtong naimpluwensya sa sayop nga impormasyon ug pagpihig—kinsa “nahikawan sa kamatuoran tungod kay wala sila masayud asa kini pangitaon’ (D&P 123:12). Akong ipaniguro kaninyo nga ang pagtubag sa mga tig-akusar kanato niini nga paagi dili kahuyang. KiniKristohanon nga kaisug sa lihok” (“Kristohanong Kaisug: Ang Bugti sa Pagkadisipulo,” Liahona, Nob. 2008, 73).

Doktrina ug mga Pakigsaad 123:4–5. Pagtimbang-timbang [evaluate] sa tumong ug pagkabalido sa mga tinubdan

Ang ubang mga tagsulat kinsa nagsulat bahin sa Simbahan ug sa kasaysayan niini nagpresentar og impormasyon nga wala sa konteksto o naglakip og parsyal nga mga kamatuoran nga mahimong makapahisalaag. Ang katuyoan sa pipila niining mga sinulat mao ang pagguba sa pagtuo diha sa Simbahan ug sa mga lider niini.

Si Elder Neil L. Andersen sa Korum sa Napulog Duha ka mga Apostoles namulong mahitungod sa maong mga pagsulay sa atong pagtuo:

“Kanunay adunay pipila kinsa gustong modaut sa Simbahan ug moguba sa hugot nga pagtuo. Karon mogamit sila sa Internet.

“Pipila sa mga impormasyon kabahin sa Simbahan, bisan unsa pa ka mahaylohon, dili gayud tinuod. Niadtong 1985, nakahinumdom ko og kauban nga misulod sa akong opisina sa Florida. Siya dunay artikulo sa Time magazine nga giulohan og ‘Challenging Mormonism’s Roots’ [Paghagit sa Sinugdanan sa Mormonism]. Naghisgut kini og bag-o lang nadiskubre nga sulat, sinulat kuno ni Martin Harris, nga nagsukwahi sa asoy ni Joseph Smith kabahin sa pagkakaplag sa mga palid sa Basahon ni Mormon.

“Ang akong kauban nangutana kon kining bag-o nga impormasyon makadaut ba sa Mormon nga Simbahan. Ang artikulo naghisgut sa usa ka tawo nga miingon nga mobiya sa Simbahan tungod sa maong dokumento. Wala madugay, gikataho nga ang uban mibiya sa Simbahan. Sigurado ako nga kadto pagsulay sa ilang hugot nga pagtuo.

“Pipila ka bulan ang milabay, ang mga eksperto nakadiskubre (ug ang palsipikador miangkon) nga ang sulat usa ka pagpangilad. Nakahinumdom ko nga nanghinaot nga kadtong mibiya sa Simbahan tungod niini nga pagpangilad mobalik ra” (“Pagsulay sa Inyong Hugot nga Pagtuo,” Liahona, Nob. 2012, 41).

Si Elder Dallin H. Oaks sa Korum sa Napulog Duha ka mga Apostoles miawhag sa mga Santos sa Ulahing mga Adlaw nga timbang-timbangon og maayo kon unsay ilang nabasahan mahitungod sa Simbahan ug sa kasaysayan niini ug mosalig sa Espiritu Santo ingon man usab sa ilang salabutan samtang mobuhat sila sa ingon:

“Ang pagtimbang-timbang … adunay duha ka dimensyon, ang intelektwal ug espiritwal.

“Sa aspeto sa intelektwal, ang mga magbabasa ug mga tumatan-aw klaro nga kinahanglang mahimong mas sopistikado sa pagtimbang-timbang sa unsay gipamulong ngadto kanila. …

“Alang sa mga Santos sa Ulahing mga Adlaw, ang pagtimbang-timbang usab adunay espiritwal nga dimensyon. Tungod kini sa atong pagtuo sa pamahayag ni Moroni’ nga ‘pinaagi sa gahum sa Espiritu Santo kamo mahimo nga masayud sa kamatuoran sa tanan nga mga butang’ (Moroni 10:5). Kana nga saad mipasalig sa sensitibo nga mga magbabasa sa espirituhanong paagi og usa ka gahum sa pag-ila nga makatabang kanila sa pagtimbang-timbang sa kahulugan sa unsay ilang nakat-unan.

“Kalabut sa atong espirituhanong mga gahum sa pagtimbang-timbang, kinahanglan natong hinumduman nga ang Espiritu sa Ginoo dili mogiya kanato kon ang kaugalingon natong kinaiya mao ang pagpangita og sayop. Kana nga baruganan magamit ngadto sa mga magbabasa ug mga manunulat. …

“Ang atong indibidwal, personal nga mga pagpamatuod gibase sa pagsaksi sa Espiritu, dili sa bisan unsang kombinasyon o napundok nga makasaysayanong mga kamatuoran. Kon lig-on kaayo ang atong pundasyon, walay kausaban sa makasaysayanong mga kamatuoran ang makauyog sa atong mga pagpamatuod. Ang atong Langitnong Amahan mihatag kanato og mga gahum sa pagpangatarungan, ug gilauman nga ato kining gamiton sa hingpit. Apan gihatagan usab niya kita og Maghuhupay, kinsa miingon nga mogiya kanato sa kamatuoran ug kansang gahum mahimo kitang mahibalo sa kamatuoran sa tanang butang. Kana ang labing mahinungdanong giya alang sa mga Santos sa Ulahing mga Adlaw kinsa takus ug andam nga mosalig niini” (“Reading Church History,” sa Symposium Speeches [symposium bahin sa Doktrina ug mga Pakigsaad ug kasaysayan sa Simbahan, Ago. 14–16, 1985], 4, 5).

Doktrina ug mga Pakigsaad 123:17. “Pagbuhat sa tanan nga mga butang nga ubos sa atong gahum”

Si Propeta Joseph Smith mituo ug misunod sa baruganan nga kinahanglan gayud natong buhaton ang tanan kutob sa atong mahimo sa dili pa kita makabaton sa kasiguroan sa tabang sa Dios. Sama sa narekord diha sa Doktrina ug mga Pakigsaad 101:86–89, gimanduan sa Ginoo ang mga Santos sa pagdala sa mga istorya sa ilang pag-antus ug pagpanggukod ngadto sa pagtagad sa mga lider sa gobyerno, lakip na ang presidente sa Estados Unidos. Niadtong Nobyembre 29, 1839, si Propeta Joseph Smith ug si Elias Higbee, nga usa ka huwes, nakighimamat sa presidente sa Estados Unidos, nga si Martin Van Buren.

“Sa sinugdanan si Van Buren mibaliwala sa pangamuyo sa Propeta. Hinoon, samtang nagpadayon ang panaghisgot, misaad ang presidente sa pagkonsiderar pag-usab sa iyang posisyon ug ‘mibati sa pagsimpatiya [sa mga Mormon], sa istorya sa [ilang] mga pag-antus’ [sa History of the Church, 4:40].

“Human sa ilang pagbisita ni Presidente Van Buren, ang Propeta ug si Elias Higbee miistar og duha ka bulan sa Silangan, nga misulay sa pagbaton og suporta gikan sa mga senador ug mga representante kinsa andam nga mosuporta sa ilang kawsa [tan-awa sa History of the Church, 4:40, 43–44]. Nakighimamat sila pag-usab ni Presidente Van Buren pagka-Pebrero 1840. Niining higayuna, nawad-an na si Van Buren sa mga pagbati sa pagsimpatiya nga diha unta kaniya alang sa Simbahan. Sumala sa Propeta, gitratar sila sa presidente sa dili maayong paagi ug namahayag: ‘Mga kaigsoonan, ang inyong kawsa matarung, apan wala akoy mahimo alang kaninyo. … Kon mosuporta ko ninyo mawad-an ko sa boto sa Missouri’ [sa History of the Church, 4:80]” (Arnold K. Garr, Joseph Smith: Campaign for President of the United States,” Ensign, Peb. 2009, 49).

Bisan kon ang presidente sa Estados Unidos mibalibad sa pagtabang sa mga Santos, si Propeta Joseph Smith nagpadayon sa pagpangayo og tabang gikan sa ubang mga lider sa gobyerno. Tungod kay gibuhat ni Joseph ang tanan ubos sa iyang gahum, masaligon siya nga gamiton sa Dios ang Iyang gahum sa pagtabang kaniya.