Leksyon 39
Doktrina ug mga Pakigsaad 33–34
Pasiuna
Niadtong Oktubre 1830 ang Ginoo mitawag kang Ezra Thayre ug Northrop Sweet sa pagsangyaw sa ebanghelyo. Kini nga pagpadayag, nga narekord sa Doktrina ug mga Pakigsaad 33, naglakip sa mga instruksyon kon unsaon niini nga mga tawo sa pagtudlo sa ebanghelyo. Wala madugay niana, sa pagpadayag nga narekord sa Doktrina ug mga Pakigsaad 34, ang Ginoo midayeg ni Orson Pratt tungod sa iyang hugot nga pagtuo ug usab misugo kaniya sa pagsangyaw sa ebanghelyo.
Mga Sugyot alang sa Pagtudlo
Doktrina ug mga Pakigsaad 33:1–6
Ang Ginoo mitawag kang Ezra Thayre ug Northrop Sweet sa pagsangyaw sa ebanghelyo
Sa wala pa ang klase isulat ang mosunod diha sa pisara: trumpeta, ba-ba, dunggan, usa ka umahan nga andam na nga anihon. (Kon mahimo, pagpakita og mga hulagway niini nga mga butang.) Sa pagsugod sa klase, ipangutana ang mosunod:
-
Sa unsang paagi kini nga mga butang may kalabutan sa misyonaryo nga buhat?
Aron matabangan ang mga estudyante nga makasabut sa konteksto sa Doktrina ug mga Pakigsaad 33, ipasabut nga si Ezra Thayre nagpuyo duol sa pamilya ni Joseph Smith Sr. Nakaila siya sa mga sakop sa pamilyang Smith pinaagi sa ilang pagtrabaho alang kaniya sa pipila ka higayon. Sa Oktubre 1830, si Ezra Thayre ug laing lumulupyo sa Palmyra, nga si Northrop Sweet, nabunyagan sa Simbahan. Wala madugay human niana, si Propeta Joseph Smith nakadawat og pagpadayag nga gitumong ngadto niining duha ka mga lalaki, nga karon narekord diha sa Doktrina ug mga Pakigsaad 33.
Dapita ang mga estudyante nga hilum nga mobasa sa Doktrina ug mga Pakigsaad 33:1–2, nga mangita og mga pulong nga may kalabutan sa mga drowing (o mga pulong) sa pisara. (Ang hulagway sa ba-ba hisgutan unya niini nga leksyon.) Human ang mga estudyante mo-report sa unsay ilang nakit-an, ipangutana ang mosunod:
-
Unsa kaha ang gipasabut sa “ablihi ang inyong mga dunggan ug patalinghug ngadto sa tingog sa … Dios”? Unsaon nato sa pagpakita sa Ginoo nga ang atong mga dunggan abli aron maminaw sa Iyang tingog?
-
Unsa kaha ang gipasabut sa pagsangyaw sa ebanghelyo “sama sa tunog sa trumpeta”?
Ipasabut nga ang Ginoo sa kasagaran mogamit og pamilyar nga mga butang, sama sa trumpeta, isip mga simbolo aron sa pagtudlo sa Iyang ebanghelyo ug sa pagtabang kanato nga makasabut sa mahangturong mga kamatuoran. Dapita ang usa ka estudyante sa pagbasa og kusog sa Doktrina ug mga Pakigsaad 33:3. Hangyoa ang klase sa pagsunod, nga mangita og dugang nga mga simbolo nga gigamit sa Ginoo niini nga pagpadayag.
-
Unsa kaha ang girepresentaran sa ubasan sa Ginoo? (Ang kalibutan.)
-
Kinsa kaha ang girepresentaran sa mga mamumuo sa ubasan sa Ginoo? (Ang mga miyembro sa Simbahan sa Ginoo.)
-
Unsa kaha ang gipasabut sa mga pulong nga “kini mao ang ikanapulo ug usa nga takna”? (Kini ang katapusang dispensasyon sa ebanghelyo ug ang katapusan nga higayon nga ang Ginoo motukod sa Iyang gingharian dinhi sa yuta sa dili pa ang Iyang Ikaduhang Pag-anhi.)
Dapita ang mga estudyante nga hilum nga mobasa sa Doktrina ug mga Pakigsaad 33:4, nga mangita kon giunsa paghulagway sa Ginoo ang kahimtang sa kalibutan sa 1830.
-
Unsa nga mga pulong niini nga bersikulo ang labing tataw kaninyo? Ngano? Unsay atong mabuhat sa paglig-on sa atong mga kaugalingon batok sa dautan nga mga impluwensya sa kalibutan?
Isulat ang mosunod sa pisara: Ang Ginoo ug .
Hatagi ang mga estudyante og pipila ka gutlo sa pagpamalandong kon unsa ang nabuhat sa Ginoo o ginabuhat aron makatabang sa paglig-on kanila batok sa pagkadautan sa kalibutan. Ipasabut nga sa Doktrina ug mga Pakigsaad 33:5–6, ang Ginoo mideklarar og usa ka butang nga Iyang nabuhat ug usa ka butang nga Iyang ginabuhat aron makatabang sa paglig-on kanato batok sa pagkadautan sa kalibutan. Dapita ang usa ka estudyante sa pagbasa og kusog niini nga mga bersikulo. Hangyoa ang klase sa pagsunod, ug hibaloan kon unsay nabuhat ug buhaton sa Ginoo aron sa paglig-on kanato.
-
Sumala niini nga mga bersikulo, unsa ang usa ka butang nga nabuhat sa Dios ug usa ka butang nga Iyang ginabuhat karon nga makatabang sa paglig-on kanato batok sa pagkadautan sa kalibutan? (Samtang motubag ang mga estudyante, dapita ang usa ka estudyante sa pagsulat sa mga blangko diha sa pamahayag sa pisara. Ang mga tubag sa mga estudyante kinahanglang magpakita sa mosunod nga baruganan: Ang Ginoo mi-establisar sa Iyang Simbahan ug nagpundok sa Iyang pinili sa katapusang mga adlaw.)
Aron matabangan ang mga estudyante nga mas makasabut niini nga kamatuoran ug mobati sa kaimportante niini, i-assign sila nga magpares ug hisgutan ang ilang mga tubag sa mosunod nga mga pangutana. Mahimo nimong basahon og kusog kini nga mga pangutana, isulat kini sa pisara, o iapud-apod kini isip handout. (Ayaw apila ang mga tubag diha sa parentesis.)
-
Sumala sa bersikulo 6, kinsa man ang mga pinili? (Kadtong motuo sa Dios ug mopatalinghug sa Iyang tingog.)
-
Nagkonsiderar sa pagkadautan sa kalibutan, nganong importante man alang sa mga pinili sa Ginoo nga maghiusa sa pagpundok?
-
Sa unsang paagi ang inyong pagkamiyembro sa Simbahan ni Jesukristo sa mga Santos sa Ulahing mga Adlaw nakapalig-on kaninyo batok sa pagkadautan sa kalibutan?
Doktrina ug mga Pakigsaad 33:7–18
Ang Ginoo mihatag kang Ezra Thayre ug Northrop Sweet og mga instruksyon alang sa pagtudlo sa ebanghelyo
Hisguti ang drowing sa ba-ba (o ang pulong nga ba-ba) sa pisara. Dapita ang mga estudyante nga hilum nga mobasa sa Doktrina ug mga Pakigsaad 33:7–10 nga mangita kon unsa ang gitudlo sa Dios kang Ezra Thayre ug Northrop Sweet nga ilang buhaton. Hangyoa ang mga estudyante nga mo-report sa unsay ilang nakat-unan.
Isulat sa pisara ang mosunod nga dili kompleto nga pamahayag: Kon atong ablihan ang atong mga ba-ba sa pagpahayag sa ebanghelyo …
Hangyoa ang mga estudyante sa paggamit sa unsay ilang nakat-unan gikan sa Doktrina ug mga Pakigsaad 33:7–10 aron sa pagkompleto niini nga pamahayag. Mahimo ka nga modapit og usa ka estudyante sa pag-adto sa pisara aron humanon pagsulat ang baruganan. Mahimo kining isulat sama sa mosunod: Kon atong ablihan ang atong mga ba-ba sa pagpahayag sa ebanghelyo, ang Ginoo modasig kanato kon unsay isulti.
-
Unsa ang uban nga mga sitwasyon diin magpanuko kita sa pag-abli sa atong mga ba-ba mahitungod sa ebanghelyo?
-
Kanus-a kamo nakahukom sa pag-abli sa inyong ba-ba aron mamulong mahitungod sa ebanghelyo ug nadasig nga masayud unsay isulti? Kanus-a kamo nakakita og laing tawo nga mipaambit sa ebanghelyo ug mibati nga sila nadasig sa unsay ilang gisulti?
I-summarize ang Doktrina ug mga Pakigsaad 33:11–15 pinaagi sa pagpasabut nga dinhi niini nga mga bersikulo, ang Ginoo misugo kang Ezra Thayre ug Northrop Sweet sa pagsangyaw sa unang mga baruganan ug mga ordinansa sa ebanghelyo—hugot nga pagtuo diha ni Jesukristo, paghinulsol, bunyag, ug ang gasa sa Espiritu Santo.
Balik ngadto sa baruganan nga naa sa pisara. Hangyoa ang mga estudyante sa pagpamalandong kon unsay gikinahanglan natong buhaton, agig dugang sa pag-abli sa atong mga ba-ba, aron ang Ginoo makadasig kanato nga masayud unsay isulti kon kita mopaambit sa ebanghelyo ngadto sa uban. Dapita ang usa ka estudyante sa pagbasa og kusog sa Doktrina ug mga Pakigsaad 33:16–18. Hangyoa ang klase sa pagsunod ug hibaloan ang piho nga tambag nga gihatag sa Ginoo ngadto ni Ezra ug Northrop nga makatabang kanila nga masayud unsay isulti isip mga misyonaryo.
-
Unsa nga tambag ang gihatag sa Ginoo kang Ezra ug Northrop nga makatabang kanila nga mahibalo unsay isulti isip mga misyonaryo? (Ikonsiderar ang pagsulat sa mga tubag sa mga estudyante diha sa pisara.)
-
Unsa kaha ang gipasabut sa tambag sa Ginoo nga “ang inyong lampara maandam ug magsiga, ug ang lana anaa kaninyo”? (D&P 33:17). (Mahimong andam sa espirituhanong paagi sa tanang higayon alang sa Ikaduhang Pag-anhi ni Jesukristo. Kini nga bersikulo adunay kalabutan sa sambingay sa napulo ka dalagang birhen, nga makita sa Mateo 25:1–13 ug gihisgutan sa Doktrina ug mga Pakigsaad 45:56–57.)
-
Sa unsang paagi ang tambag sa Ginoo niini nga mga bersikulo makatabang kanato nga maandam sa pag-abli sa atong mga ba-ba sa pagpaambit sa ebanghelyo bisan kanus-a ug sa bisan unsang sitwasyon?
Doktrina ug mga Pakigsaad 34
Ang Ginoo midayeg ni Orson Pratt tungod sa iyang hugot nga pagtuo ug misugo kaniya sa pagsangyaw sa ebanghelyo
Dapita ang mga estudyante sa pagtan-aw diha sa pasiuna sa seksyon sa Doktrina ug mga Pakigsaad 34 aron mangita og ehemplo sa usa ka tawo nga napanalanginan sa diha nga ang laing tawo miabli sa iyang ba-ba aron mopaambit sa ebanghelyo.
-
Kinsa ang napanalanginan niini nga ehemplo? Pila na ang edad ni Orson Pratt dihang siya gibunyagan? Giunsa niya sa pagkasayud mahitungod sa ebanghelyo?
Dapita ang usa ka estudyante sa pagbasa og kusog sa Doktrina ug mga Pakigsaad 34:1. Hangyoa ang klase sa pagsunod, nga mangita kon giunsa pagtawag sa Ginoo si Orson. Dapita ang mga estudyante sa pagreport sa unsay ilang nakit-an. Dayon hangyoa ang klase nga hilum nga mobasa sa Doktrina ug mga Pakigsaad 34:2–3 aron madiskubrihan nganong ang Ginoo mitawag kaniya nga “Akong anak.”
-
Nganong gitawag sa Ginoo si Orson nga Iyang anak? (Tungod sa pagtuo ni Orson sa Ginoo.)
-
Sumala sa Doktrina ug mga Pakigsaad 34:3, unsa ang gibuhat sa Ginoo alang sa “kutob sa” motuo diha Kaniya? (Aron matabangan ang mga estudyante nga makasabut nga ang kamatuoran niini nga bersikulo magamit usab sa mga babaye, mahimo nimong isugyot nga ilang basahon ang Doktrina ug mga Pakigsaad 25:1.)
Dapita ang usa ka estudyante sa pagbasa og kusog sa Doktrina ug mga Pakigsaad 34:4–6. Hangyoa ang klase sa pagsunod, nga mangita kon unsay gisulti sa Ginoo kang Orson nga makadala og dugang nga mga panalangin sa iyang kinabuhi.
-
Ngano nga kaha nga kita “labaw pa nga bulahan” kon kita motudlo sa ebanghelyo ngadto sa uban?
Dapita ang usa ka estudyante sa pagbasa og kusog sa Doktrina ug mga Pakigsaad 34:10–11. Hangyoa ang klase sa pagsunod, nga mangita sa mga panalangin nga ihatag ngadto niadtong makugihon nga mopaambit sa ebanghelyo ngadto sa uban.
-
Unsa nga mga panalangin ang ihatag niadtong makugihon nga motudlo sa ebanghelyo? (Samtang motubag ang mga estudyante, mahimo nimong isulat ang mosunod nga baruganan diha sa pisara: Kadtong makugihon nga motudlo sa ebanghelyo mobuhat niini pinaagi sa gahum sa Espiritu Santo.)
-
Unsa nga panalangin ang gisaad niadtong nagmatinud-anon? (Mahimo usab nimong isulat kini nga baruganan sa pisara: Kon kita magmatinud-anon, ang Ginoo magauban kanato.)
-
Sa unsang paagi ang kamatuoran sa Doktrina ug mga Pakigsaad 34:11 makatabang ninyo sa panahon sa kawalay kadasig?
Mahimo nimong tapuson pinaagi sa pagpaambit og usa ka higayon dihang mibati ka sa Ginoo nga nag-uban kanimo samtang nagmatinud-anon ka ngadto Kaniya. Mahimo ka usab nga mopamatuod sa mga kamatuoran nga gihisgutan niini nga leksyon.
Komentaryo ug Background nga Impormasyon
Doktrina ug mga Pakigsaad 33. Northrop Sweet
Si Northrop Sweet gibunyagan ni Parley P. Pratt isip miyembro sa Simbahan niadtong Oktubre 1830, didto sa Palmyra, New York. Gitudlo siya nga moserbisyo og misyon niadtong Oktubre 1830 (tan-awa sa D&P 33). Mibalhin siya ngadto sa Kirtland, Ohio, pagka-Hunyo 1831, diin gi-orden siya nga elder; hinoon, mibiya siya sa Simbahan sa wala madugay human niana ug misulay sa paghimo og laing simbahan, miingon nga si Joseph Smith usa ka mini nga propeta.
Doktrina ug mga Pakigsaad 33:1. Ang pulong sa Dios buhi ug makagagahum
Ang Ginoo migamit og impresibong mga imahe aron sa paghulagway sa gahum sa Iyang pulong. Ang ideya nga gamhanan ang pulong sa Dios sayon sabton tungod kay pinaagi sa Iyang pulong ang tanan gikan sa langit ngadto sa kasingkasing sa tawo gipalihok. Ang mga pulong nga “hait pa kay sa duha ka suwab sa espada, ngadto sa pagkabahin-bahin sa kahiladman ug uyok sa bukog, sa kalag ug espiritu” klarong naghulagway kon sa unsang paagi ang pulong sa Dios motabas ngadto sa sentro sa usa ka tawo (tan-awa usab sa 1 Nephi 16:1–2).
Ang pagkakabig ni Ezra Thayre naghatag og ehemplo kon sa unsang paagi ang pulong sa Dios buhi ug gamhanan. Si Ezra Thayre nahinumdom:
“Sa dihang misugod sa pagpamulong si Hyrum, ang matag pulong mitandog kanako ngadto sa kinahiladman sa kalag. Nagtuo ko nga ang matag pulong nakapunting kanako. Ang Dios misilot kanako ug mihimo nga dili ko makalihok. Wala koy mahimo sa akong kaugalingon. Ang mga luha midagayday sa akong mga aping, mapahitas-on kaayo ko ug gahi og ulo. Daghan didto ang nakaila kanako, wala ko makaako sa paghangad. Milingkod ko hangtud naulian ko sa akong kaugalingon una ko mihangad. Nanganta sila og mga himno ug mipuno kini kanako sa Espiritu. Sa matapos na si Hyrum, mipunit siya og usa ka libro ug miingon, ‘ania ang Basahon ni Mormon.’ Miingon ko, patan-awa ko. Giablihan dayo nako ang libro, ug nakadawat ko og kakurat sa ingon ka talagsaon nga kalipay nga walay bolpen nga makasulat ug walay dila nga makapadayag. Akong gitak-up ang libro ug miingon, pila man ang presyo niini? ‘Katorse ka shillings’ mao ang tubag. Miingon ko, akong kuhaon ang libro. Giablihan ko kini pag-usab, ug mibati ko og doble nga porsyon sa Espiritu, nga wala ko masayud kon anaa ba ko sa kalibutan o wala. Gibati nako nga daw tinud-anay nga naa ko sa langit.
“Midali og duol kanako si Martin Harris aron sultihan ko nga ang libro tinuod. Giingnan nako siya nga dili na siya kinahanglang mosulti nako niana, kay nasayud ko nga tinuod kini sama kaniya” (sa Lyndon W. Cook, The Revelations of the Prophet Joseph Smith: A Historical and Biographical Commentary of the Doctrine and Covenants [1985], 47–48).
Doktrina ug mga Pakigsaad 33:9. Magpas-an og mga binugkos diha sa inyong mga likod
Unsay gipasabut nga kita mahimong “magpas-an og mga binugkos diha sa [atong] mga likod”? Kini nga mga pulong nagpasabut ngadto sa mga tanom, o mga binugkos, giani gikan sa umahan. Ang “magpas-an og mga binugkos” nagpasabut sa usa ka dako ug daghan nga pag-ani. Simbolikanhon kini nga mga pulong nga nagrepresentar og dako nga misyonaryong kalampusan.
Si Elder David A. Bednar sa Korum sa Napulog Duha ka mga Apostoles dugang nga mipasabut sa kahulugan niini nga sambingay:
“Ang mga bugkos dinhi niining pasumbingay nagrepresentar sa bag-ong nabunyagan nga mga miyembro sa Simbahan. Ang mga kamalig mao ang balaang mga templo. Si Elder Neal A. Maxwell mipasabut: ‘Tataw kaayo, sa dihang kita nabunyagan, ang atong mga mata naglantaw lapas pa sa bunyaganan ngadto sa balaang templo. Ang mahinungdanong kamalig diin kini nga mga bugkos ipundok mao ang balaang templo’ (sa John L. Hart, ‘Make Calling Focus of Your Mission,’ Church News, Sep. 17, 1994, 4). Kini nga pahimangno miklaro ug mipasabut og maayo sa kamahinungdanon sa sagrado nga mga ordinansa ug mga pakigsaad sa templo—nga ang mga bugkos dili mausik” (“Madungganon nga Naghupot og usa ka Pangalan ug Katungdanan,” Liahona, Mayo 2009, 97).
Doktrina ug mga Pakigsaad 34:1. Orson Pratt
Gihulagway ni Orson Pratt kon giunsa niya sa pagpakita og hugot nga pagtuo kang Jesukristo isip usa ka batan-on:
“Sugod sa edad nga diyes handtud dise nuebe daghan ko og nakita sa kalibutan, ug gitugpo-tugpo nga walay permanenting dapit; apan pinaagi sa grasya sa Dios, napalayo ko sa daghang kadautan diin ang mga batan-on nabantang; ang unang mga impresyon sa moralidad ug relihiyon, gisilsil sa akong hunahuna sa akong mga ginikanan, kanunay nga nagpabilin kanako; ug kanunay akong mibati og dakong kabalaka nga maandam sa umaabut nga kahimtang; apan wala gayud misugod, sa tinud-anay, sa pagpangita sa Ginoo, hangtud sa tinglarag niadtong 1829. Misugod dayon ako sa pag-ampo nga hugot kaayo, naghinulsol sa matag sala. Sa hilom nga kangitngit sa kagabhion, samtang ang uban nangatulog pa, ako kanunay miadto sa tago nga dapit diha sa mingaw nga mga umahan o sa awaaw nga kamingawan, ug miyukbo atubangan sa Ginoo, ug nag-ampo sulod sa daghang oras uban sa masulub-on nga kasingkasing ug mahinulsulon nga espiritu; mao kini ang akong kahupayan ug kalipay. Ang labing dako nga tinguha sa akong kasingkasing mao nga ang Ginoo mopadayag sa Iyang kabubut-on mahitungod kanako” (sa The Orson Pratt Journals, comp. Elden J. Watson [1975], 8–9).
Doktrina ug mga Pakigsaad 34:10. “Ipabati ang imong tingog”
Agig pagsunod sa sugo sa Ginoo nga narekord diha sa Doktrina ug mga Pakigsaad 34:10, maisugong migamit sa Orson Pratt sa iyang tingog sa pagpaambit sa ebanghelyo. Wala madugay human sa pagdawat niini nga pagpadayag, si Orson Pratt misugod sa usa ka misyon ngadto sa Colesville, New York. Sa laing misyon paglabay sa pipila ka tuig, si Orson “milakaw og dul-an 6400 ka kilometro, mitambong og 207 ka mga miting, … mibunyag og 104 ka mga tawo, ug mi-organisar og pipila ka bag-o nga mga Branch sa Simbahan” (Orson Pratt, “History of Orson Pratt,” Millennial Star, Peb. 4, 1865, 72). Sa iyang tibuok kinabuhi nga pagserbisyo, “mitabok siya sa kadagatan sa dise-sayes ka higayon, sa mga misyon sa kaluwasan” (“Orson Pratt,” Contributor, Nob. 1881, 61).