Leksyon 109
Doktrina ug mga Pakigsaad 104
Pasiuna
Niadtong tingpamulak sa 1834, ang Simbahan naproblema sa kwarta, ug ang mga paningkamot sa pagkolekta og kwarta alang sa pagsulbad niini napakyas. Niadtong Marso 1832, ang mga lider sa Simbahan sa Ohio miestablisar og organisasyon nga gitawag og Nagkahiusa nga Kompaniya sa pagdumala sa komersyal, mercantile, ug negosyo nga mga paningkamot sa Simbahan sa paagi nga makatabang sa pag-establisar sa Zion ug pag-atiman sa mga kabus (tan-awa sa D&P 78). Niadtong Abril 1832, si Joseph Smith ug ang uban nakigkita sa mga lider sa Simbahan sa Missouri ug miorganisar og sanga sa Nagkahiusa nga Kompaniya sa Lalawigan sa Jackson (tan-awa sa D&P 82). Kining duha ka mga branch—usa sa Ohio ug usa sa Missouri—nagpadayon sulod sa duha ka tuig. Sa usa ka miting niadtong Abril 10, 1834, ang mga miyembro sa kapunongan nakahukom sa paghunong sa organisasyon. Hinoon, si Joseph Smith nakadawat og pagpadayag paglabay sa duha ka semana “nga ang kapunongan tukuron pag-usab” ug nga “ang mga kabtangan pagabahin-bahinon sa mga sakop sa kapunongan” (pasiuna sa D&P 104). Ubos sa direksyon ni Joseph Smith, ang pulong nga “Nagkahiusa nga Kompaniya” gipulihan sa “Nagkahiusa nga Kapunongan” niini nga pagpadayag. Ang Ginoo mitambag usab sa mga lider sa Simbahan kabahin sa ilang mga utang ug mitudlo sa tanang mga miyembro sa Simbahan unsaon nila pag-atiman ang mga kabus.
Mga Sugyot alang sa Pagtudlo
Doktrina ug mga Pakigsaad 104:1–18
Ang Ginoo mihatag og mga instruksyon mahitungod sa Nagkahiusa nga Kapunongan
Pagbutang og bug-at nga butang (sama sa dako nga libro o bato) sa atubangan sa classroom. Dapita ang usa ka estudyante sa pag-alsa sa butang gamit lamang ang usa ka tudlo. Lisud kini o imposible, apan pasulayi sa estudyante. Dayon tuguti ang estudyante sa pagdapit sa isig ka estudyante sa pagtabang sa pag-alsa sa butang. Ang mga estudyante kinsa motabang kinahanglang mosaad sa pagtabang hangtud ang butang maalsa, ug sila usab kinahanglan mogamit lang sa usa ka tudlo. Tuguti ang unang estudyante sa pagpadayon sa pagdapit og dugang nga mga estudyante hangtud ilang maalsa ang butang.
-
Unsa ang gikinahanglan sa pag-alsa sa bug-at nga butang? (Ang mga tubag mahimong maglakip sa teamwork, panaghiusa, ug uban pa.)
Ipasabut nga sa unang mga adlaw sa Simbahan, ang pinansyal nga mga problema bug-at nga problema sa Simbahan. Niadtong Marso ug Abril 1832, ang Ginoo misugo sa mga lider sa Simbahan sa pag-organisar sa Nagkahiusa nga Kompaniya, kansang mga miyembro misaad sa pagtambayayong ug mga responsable sa pagdumala sa mga operasyon sa negosyo ug pagmantala aron makunhuran ang utang sa Simbahan, maatiman ang mga pobre, ug mapadayon ang buhat sa Ginoo. Kini nga institusyon orihinal nga gitawag nga Nagkahiusa nga Kompaniya (tan-awa sa mga pasiuna sa mga seksyon 78, 82, ug 104 sa 2013 edisyon sa Doktrina ug mga Pakigsaad). Sa tingpamulak niadtong 1834, ang utang maoy nakaingon nga ang mga lider sa Simbahan mikonsiderar sa paghunong sa kompaniya. Niadtong Abril 23, 1834, si Propeta Joseph Smith nakadawat sa pagpadayag nga narekord sa Doktrina ug mga Pakigsaad 104, diin ang Ginoo mipadayag kon unsay buhaton sa Nagkahiusa nga Kompaniya ug sa mga kabtangan niini.
Dapita ang usa ka estudyante sa pagbasa og kusog sa pasiuna sa Doktrina ug mga Pakigsaad 104. Hangyoa ang klase sa pagsunod, nga mangita kon unsay gusto sa Ginoo nga buhaton sa mga lider sa Simbahan sa Nagkahiusa nga Kompaniya. (Sa dili pa mobasa ang mga estudyante, ipasabut nga si Joseph Smith misugo nga ang termino nga “Nagkahiusa nga Kompaniya” pulihan sa “Nagkahiusa nga Kapunongan” sa gimantala nga pagpadayag.) Hangyoa ang mga estudyante sa pag-report kon unsay ilang makit-an.
Dapita ang usa ka estudyante sa pagbasa og kusog sa Doktrina ug mga Pakigsaad 104:1–4. Hangyoa ang klase sa pagsunod ug sa pag-ila og usa sa mga rason sa mga kasamok sa Nagkahiusa nga Kompaniya. Kinahanglan nimong ipasabut nga sa bersikulo 4, ang pulong pagkamasinahon nagpasabut sa tinguha sa pagkahakog sa pagpanag-iya og butang, sa kasagaran iya sa laing tawo.
-
Unsa ang nasupak sa pipila ka mga kaigsoonan tungod sa pagkamasinahon?
Pahinumdumi ang mga estudyante sa object lesson sa sinugdanan sa leksyon. Hangyoa sila sa pagkonsiderar unsa unta ang mahitabo kon pipila sa mga estudyante mosaad sa pagtabang apan miusab sa ilang mga hunahuna ug nakahukom nga mobiya samtang gialsa ang maong butang.
I-summarize ang Doktrina ug mga Pakigsaad 104:5–10 pinaagi sa pagpasabut nga ang Ginoo mimando nga ang mga sangputanan sa pagsupak sa pakigsaad kalabut sa Nagkahiusa nga Kapunongan maglakip sa pagkatunglo ug pagkawala gikan sa Simbahan (tan-awa usab sa D&P 78:11–12; 82:11–21).
Dapita ang mga estudyante sa pagbasa sa hilom sa Doktrina ug mga Pakigsaad 104:11–13, mangita kon unsay gisulti sa Ginoo nga madawat sa matag sakop sa Nagkahiusa nga Kapunongan. Hangyoa ang mga estudyante sa pag-report kon unsay ilang makit-an. Kinahanglan nimong ipasabut nga ang tinugyanan mao ang usa ka tawo nga gihatagan og responsibilidad sa kabtangan nga iya sa laing tawo.
-
Sumala sa bersikulo 12–13, ngano nga ang Ginoo mitudlo og tinugyanan sa matag sakop sa Nagkahiusa nga Kapunongan?
Dapita ang usa ka estudyante sa pagbasa og kusog sa Doktrina ug mga Pakigsaad 104:14. Hangyoa ang klase sa pagsunod, nga mangita kon kinsa ang nanag-iya sa kabtangan kalabut sa Nagkahiusa nga Kapunongan.
-
Kinsa ang nanag-iya sa kabtangan nga ihatag ngadto sa mga sakop sa Nagkahiusa nga Kapunongan? (Human makatubag ang mga estudyante, isulat sa pisara ang mosunod nga kamatuoran: Ang Ginoo milalang sa yuta, ug ang tanang mga butang Iyaha.)
-
Sa unsang paagi nga kini nga kamatuoran makaimpluwensya sa paagi sa inyong pagtan-aw ug paggamit sa inyong mga kabtangan?
Dapita ang mga estudyante sa pagbasa sa hilom sa Doktrina ug mga Pakigsaad 104:15–18. Hangyoa sila sa pag-ila kon sa unsang paagi ang Ginoo misugo sa Iyang tinugyanan sa paggamit sa mga butang sa yuta.
-
Sa unsa nga paagi nga ang Ginoo gusto nga mosangkap sa Iyang mga Santos?
-
Unsa sa inyong hunahuna ang gipasabut sa “ang mga kabus ipataas pinaagi niana ang mga adunahan ipaubos”?
Aron matabangan ang mga estudyante nga makasabut sa kahulugan niini nga pamahayag, dapita ang usa ka estudyante sa pagbasa og kusog sa mosunod nga pagpasabot ni Elder Joseph B. Wirthlin sa Korum sa Napulog Duha ka mga Apostoles:
“Ang pamaagi sa Ginoo naglangkob sa pagtabang sa mga tawo sa pagtabang sa ilang kaugalingon. Ang kabus mapataas tungod kay gitrabahoan nila ang temporaryo nga tabang nga ilang nadawat, gitudloan sila sa sakto nga mga baruganan, ug nakahimo sila sa pagpataas sa ilang mga kaugalingon gikan sa kakabus ngadto sa pagpaningkamot sa kaugalingon. And adunahan mapaubos tungod kay nagmapainubsanon sila sa paghatag og ubay-ubay sa ilang kwarta ngadto sa nanginahanglan” (“Inspired Church Welfare,” Ensign, Mayo 1999, 77).
-
Unsa nga mga baruganan ang gitudlo sa mga bersikulo 17–18 mahitungod sa atong responsibilidad sa pagtabang sa uban? (Ang mga estudyante mahimong moila og lain-laing mga baruganan, lakip sa mosunod: May tulubagon kita sa paggamit unsay gihatag sa Ginoo kanato sa pagtabang sa uban. Isulat kini nga baruganan diha sa pisara.)
Dapita ang mga estudyante sa paghunahuna “sa mga kabus ug sa mga timawa” nga dili lamang kadtong nagkinahanglan og pinansyal nga tabang apan usab kadtong kinsa nagkinahanglan og espirituhanon, emosyonal, mental, ug sosyal nga tabang. Sa samang paagi, makahunahuna kita sa atong kaabunda nga labaw pa sa kwarta o materyal nga mga kabtangan nga atong naangkon. Ang atong kaabunda naglakip sa atong panahon, mga talento, kahibalo, mga pagpamatuod, ug mga kahanas.
-
Sa inyong hunahuna ngano nga importante nga kita makigbahin sa atong kaabunda ngadto sa nanginahanglan?
-
Unsaon nato sa pagtabang ang uban sa pamaagi sa Ginoo?
Dapita ang mga estudyante sa pagpamalandong sa ilang mga paningkamot sa pagtabang sa mga kabus ug sa mga timawa. Hangyoa sila sa pagsulat sa ilang tumong kon unsaon nila sa paggamit unsay gihatag sa Ginoo kanila sa pagtabang sa nanginahanglan.
Doktrina ug mga Pakigsaad 104:19–77
Ang Ginoo mihatag og mga instruksyon mahitungod sa Nagkahiusa nga Kapunongan, pagkatinugyanan, ug sa tipiganan
I-summarize ang Doktrina ug mga Pakigsaad 104:19-53 pinaagi sa pagpasabut nga ang Ginoo mihatag og piho nga mga instruksyon mahitungod sa pagkatinugyanan nga gitudlo ngadto sa mga sakop sa Nagkahiusa nga Kapunongan. Isulat ang mosunod diha sa pisara: Doktrina ug mga Pakigsaad 104:23, 25, 31, 33, 35, 38, 42, 46. Hangyoa ang mga estudyante sa pagbasa niini nga mga bersikulo sa hilom, mangita sa sumbanan sa mga saad sa Ginoo ngadto sa matag sakop sa kapunongan. Dapita ang mga estudyante sa pag-report kon unsay ilang makit-an.
Hangyoa ang mga estudyante kon unsa nga mga pulong ang gibalik-balik niining mga bersikulo. Ipasabut nga ang pulong “kon” nagpasabut og “sumala nga” o “hangtud niana.”
-
Unsay gitudlo niini nga mga pulong ngari kanato kon sa unsa nga paagi nga ang atong pagkamasulundon makaapekto sa mga panalangin nga atong madawat?
Isulat diha sa pisara Kon kita mapainubsanon ug matinud-anon, ang Ginoo mo …
Hangyoa ang mga estudyante kon unsaon nila sa pagkompleto kini nga baruganan. (Gamita ang ilang mga pulong sa pagtiwas sa dili kompleto nga baruganan diha sa pisara. Pananglitan: Kon kita mapainubsanon ug matinud-anon, ang Ginoo mopilo-pilo sa atong mga panalangin.)
-
Kanus-a man kamo nakakita og tawo nga gipanalanginan tungod sa pagkamatinud-anon sa ilang mga responsibilidad ngadto sa Ginoo?
Dapita ang mga estudyante sa paghunahuna kon sa unsang paagi sila mahimong matinud-anon sa mga responsibilidad nga gihatag sa Ginoo kanila.
I-summarize ang Doktrina ug mga Pakigsaad 104:54–77 pinaagi sa pagpasabut nga ang Ginoo mohatag og mga instruksyon sa paghimo og mga tipiganan aron luwas ang mga pundo nga pagagamiton alang sa kaayohan sa Simbahan, sama sa pagprinta sa mga kasulatan.
Doktrina ug mga Pakigsaad 104:78–86
Ang Ginoo mihatag og mga instruksyon sa mga lider sa Simbahan kabahin sa mga utang sa Nagkahiusa nga Kapunongan
Hangyoa ang mga estudyante sa pagpamalandong kon gihangyo na ba sila sa pagbuhat og butang nga sa ilang pagtuo imposible. Dapita ang pipila sa pagpakigbahin sa ilang mga kasinatian.
Ipasabut nga sa proseso sa pagsunod sa mga sugo sa Ginoo, ang Nagkahiusa nga Kapunongan nakautang og dako. Pipila ka mga panghitabo nakapapugong sa kapunongan sa pagbayad sa mga utang. Pananglitan, ang mga manggugubot nga panon miguba sa imprintahanan sa Lalawigan sa Jackson, nakaingon sa nagpadayon sa ekonomikanhong mga kalisud, ang manggugubot nga panon mipugong sa mga Santos sa paggamit sa balay tipiganan didto sa Independence.
Dapita ang usa ka estudyante sa pagbasa og kusog sa Doktrina ug mga Pakigsaad 104:78. Hangyoa ang klase sa pagsunod, nga mangita sa intruksyon sa Ginoo mahitungod sa mga utang sa Simbahan.
-
Unsay gihatag nga instruksyon sa Ginoo nga buhaton sa Nagkahiusa nga Kapunongan?
Ipasabut nga ang pagbayad sa utang tingali imposible sa mga Santos, apan ang Ginoo mihatag og instruksyon sa pagtabang kanila. Isulat ang KON ug DAYON sa ibabaw sa duha ka mga kolum diha sa pisara. Dapita ang usa ka estudyante sa pagbasa og kusog sa Doktrina ug mga Pakigsaad 104:80–82. Hangyoa ang katunga sa klase sa pagsunod, nga mangita kon unsay gisugo sa Ginoo sa mga miyembro sa kapunongan nga buhaton aron makadawat sa Iyang tabang sa pagbayad sa ilang mga utang. Hangyoa ang pikas katunga sa pagsunod, nga mangita unsay gisaad sa Ginoo nga Iyang buhaton sa pagtabang sa mga Santos sa ilang pagbayad sa ilang mga utang. Dapita ang unang grupo sa pagrekord sa ilang mga tubag diha sa pisara ubos sa “KON,” ug ipasulat sa ikaduhang grupo ang ilang mga tubag ubos sa “DAYON.”
-
Unsa nga baruganan ang atong makat-unan gikan sa Doktrina ug mga Pakigsaad 104:80–82? (Ang mga estudyante mahimong mogamit og lain-laing mga pulong, apan kinahanglan nilang ilhon ang mosunod nga baruganan: Kon kita mapainubsanon ug matinud-anon ug motawag sa pangalan sa Ginoo, dayon Siya motabang kanato nga matuman ang unsay Iyang gisugo nato nga atong buhaton.)
-
Unsa ang gisugo sa Ginoo nga buhaton sa mga miyembro sa Simbahan nga makonsiderar nga usa ka hagit? Unsa sa inyong hunahuna ang papel sa pagpaubos, pagkamatinud-anon, ug pag-ampo sa pagtuman sa mga butang nga gisugo sa Ginoo nga inyong buhaton?
-
Kinsa sa mga kasulatan ang ehemplo sa baruganan nga atong nakit-an diha sa mga bersikulo 80–82? Kinsa ang inyong nailhan karon nga usa ka ehemplo niini nga baruganan?
Dapita ang mga estudyante sa pagsulat sa ilang mga class notebook o sa mga scripture study journal og usa ka paagi nga sila mas mapainubsanon pa, matinud-anon, o mainampoon aron ang Ginoo makatabang kanila sa mga butang nga Iyang gisugo kanila nga ilang buhaton.
Komentaryo ug Background nga Impormasyon
Doktrina ug mga Pakigsaad 104:15–18. Ang Atong responsibilidad sa pag-atiman sa mga kabus ug sa mga timawa
Si Presidente Marion G. Romney sa Unang Kapangulohan naghisgot sa mga panalangin nga atong madawat samtang atimanon nato ang mga kabus ug mga timawa:
“Sayon ra unta alang sa Ginoo sa pagpadayag ngadto sa [Presidente sa Simbahan] asa ang mga deposito sa lana ug mahalon nga mga oro. Makasuhol dayon ta og usa ka tawo sa pagkalot niini ug kita mahimong adunahan na kaayo—ug tungod sa pagkaadunahan modiretso kita ngadto sa Impyerno. Dili, ang Ginoo wala gayud magkinahanglan nga atong atimanon ang mga kabus, apan kita nagkinahanglan niini nga kasinatian; kay pinaagi lamang sa atong pagkat-on kon unsaon sa pag-atiman sa usag usa nga atong gipalambo sa atong kaugalingon ang Kristohanong gugma ug disposisyon nga gikinahanglan aron mokwalipay sa pagbalik ngadto sa iyang presensya” (“Living Welfare Principles,” Ensign,Nob. 1981, 92).
Doktrina ug mga Pakigsaad 104:16. Ang pamaagi sa Ginoo sa pagsangkap sa mga Santos
Si Presidente Dieter F. Uchtdorf sa Unang Kapangulohan nagtudlo bahin sa pamaagi sa Ginoo sa pagsangkap alang sa mga Santos:
“Adunay daghang buotan nga mga tawo ug mga organisasyon sa kalibutan nga naningkamot sa pagtubag sa dinaliang mga panginahanglan sa mga kabus ug mga timawa sa tanang dapit. Mapasalamaton kita niini, apan ang pamaagi sa Ginoo sa pag-amuma sa mga timawa lahi sa pamaagi sa kalibutan. Ang Ginoo miingon, ‘Kinahanglan pagahimoon sa akong kaugalingon nga pamaagi’ [D&P 104:16]. Dili lamang kay interesado Siya sa dinalian natong panginahanglan; Nahingawa usab Siya sa atong mahangturon nga kalamboan. Tungod niini, ang pamaagi sa Ginoo naglakip sa pagbarug sa kaugalingon ug pagserbisyo sa atong silingan agi og dugang sa pag-amuma sa mga kabus” (“Pagsangkap pinaagi sa Pamaagi sa Ginoo,” Liahona, Nob. 2011, 54).
Si Presidente Marion G. Romney sa Unang Kapangulohan nagtudlo usab mahitungod sa katuyoan sa pagsangkap pinaagi sa pamaagi sa Ginoo: “Ang unang katungdanan sa Simbahan sa pagtabang sa mga kabus dili ang paghatag og temporaryong kahupayan ngadto sa ilang mga panginahanglan, apan ang kaluwasan sa ilang mga kalag” (“The Role of Bishops in Welfare Services,” Ensign, Nob. 1977, 81).