Doktrina ug mga Pakigsaad 88–89 (Unit 19)

Materyal sa Pagpangandam alang sa Home-Study Teacher

Summary sa Daily Home-Study nga mga Leksyon

Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang gitun-an nila ang Doktrina ug mga Pakigsaad 88–89 (unit 19) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.

Day 1 (Doktrina ug mga Pakigsaad 88:1–40)

Samtang ang mga estudyante nagtuon sa pinadayag nga gihatag ngadto ni Propeta Joseph Smith ug sa usa ka grupo sa mga high priest, ilang nakat-unan nga ang Dios naghatag og kahayag ug kinabuhi sa tanang mga butang pinaagi sa Kahayag ni Kristo. Nakat-unan usab nila nga ang espiritu ug ang lawas mao ang kalag sa tawo, nga natubos diha sa Pagkabanhaw pinaagi ni Jesukristo, ug sa Pagkabanhaw kita makadawat og himaya pinasikad sa balaod nga atong gisunod.

Day 2 (Doktrina ug mga Pakigsaad 88:41–69)

Niini nga leksyon, ang mga estudyante nakakat-on nga ilang makita ang kaharianon ug gahum sa Dios samtang sila magtan-aw sa Iyang mga gilalang. Gitun-an sa mga estudyante ang mga bersikulo kon sa unsang paagi ang Ginoo mobisita sa matag usa sa Iyang gingharian ug sa mga lumulupyo niini sa Iyang panahon. Nakat-unan usab sa mga estudyante nga samtang magpaduol sila sa Ginoo, Siya mopaduol ngadto kanila. Ilang nadiskubrihan nga ang Langitnong Amahan motubag sa ilang mga pag-ampo sa mga paagi nga Siya nasayud nga maoy labing maayo alang kanila ug kon sila adunay bug-os nga pagtan-aw sa himaya sa Dios, mapuno sila sa kahayag.

Day 3 (Doktrina ug mga Pakigsaad 88:70–141)

Samtang gitun-an sa mga estudyante ang mga instruksyon sa Ginoo alang sa pag-establisar sa Tulunghaan sa mga Propeta, ilang nakat-unan nga kon sila magtudlo sa usag usa ug magtinguha sa pagkat-on pinaagi sa pagtuon ug sa hugot nga pagtuo, ang ilang hugot nga pagtuo diha ni Jesukristo molambo. Ilang nahibaloan ang matarung nga mga pamatasan nga motabang nila nga makakat-on ug mapalig-on ug sa dili matarung nga mga buhat nga gisugo sa Ginoo nga atong hunungon. Nakat-unan usab nila nga ang pagpakita og pagkamahigalaon ug gugma niadtong ilang gikauban sa pagkat-on sa ebanghelyo magdapit sa Espiritu samtang magdungan sila sa pagtuon.

Day 4 (Doktrina ug mga Pakigsaad 89)

Gikan sa tambag sa Ginoo ngadto sa kaigsoonan nga nagtambong sa Tulunghaan sa mga Propeta, nakat-unan sa mga estudyante nga tungod sa dautang mga laraw sa nagkonsabo nga mga tawo sa katapusang mga adlaw, ang Ginoo mipasidaan kanato nga dili mogamit og makadaut nga mga butang. Ilang nahibaloan ang pasidaan sa Ginoo bahin sa sayop nga paggamit sa piho nga mga butang ug nakakat-on nga kinahanglan silang mokaon sa makahimsog nga mga pagkaon sa maalamon ug mapasalamatong paagi. Nakat-unan sa mga estudyante nga kon kita mosunod sa Pulong sa Kaalam, ang Ginoo mopanalangin kanato og kahimsog, kaalam, kusog, ug proteksyon.

Pasiuna

Kini nga leksyon makatabang sa mga estudyante nga makaila sa bili sa pagtudlo sa ebanghelyo ngadto sa uban. Samtang nagtudlo sila sa usag usa sa pipila ka mga baruganan nga ilang natun-an atol sa semana, aduna silay kahigayunan sa pagsinati sa pipila ka mga barunganan nga gitudlo sa Ginoo niadtong kinsa mitambong sa Tulunghaan sa mga Propeta.

Mga Sugyot alang sa Pagtudlo

Pahinumdom: Samtang ang mga estudyante nagtuon sa scripture mastery passage diha sa Doktrina ug mga Pakigsaad 88:124 karong semanaha, gidapit sila sa pagsag-ulo ug i-recite kini kon sila motambong sa seminary ug sa ubang mga klase sa Simbahan. Kini nga imbitasyon gituyo aron mapahinumduman sila nga ang paghimo og matarung ug paghunong sa mga dili matarung nga mga buhat makatabang kanato nga makakat-on ug mapalig-on. Mahimo nimong pahinumduman ang mga estudyante niini ug dapiton sila nga i-recite og dungan ang tudling. Mahimo usab nimong dasigon sila sa pagsunod sa tambag nga nahatag diha sa tudling.

Doktrina ug mga Pakigsaad 88:70–117

Ang Ginoo misugo sa mga elder sa simbahan sa pag-andam alang sa ilang pagpangalagad ug mopadayag sa mga panghitabo kalabut sa Iyang Ikaduhang Pag-anhi

Dapita ang usa ka estudyante sa pag-adto sa atubangan sa klase ug itudlo sa laing estudyante kon unsaon pagbuhat ang usa ka yano nga buluhaton, sama sa pagtaud og necktie (o laing buluhaton nga ang ikaduhang estudyante dili makamao kon usaon paghimo). Hangyoa ang mga estudyante sa pagpataas sa ilang mga kamot kon sila nakatabang sa pagtudlo og usa ka leksyon o kahanas ngadto sa laing tawo bag-ohay lang. Hangyoa ang pipila niadtong mipataas sa ilang mga kamot sa paghulagway kon unsa ang ilang natudlo ug ngadto kang kinsa. I-follow up pinaagi sa pagpangutana sa mosunod:

Unsa ang inyong nakat-unan pinaagi sa pagpangandam sa pagtudlo ug sa pagtudlo sa laing tawo?
Ngano kaha nga sa kanunay mas makakat-on kita sa pag-andam sa pagtudlo kay sa tudloan sa uban?

Pahinumdumi ang mga estudyante nga ang Ginoo mihatag sa pagpadayag sa Doktrina ug mga Pakigsaad 88 sulod sa pipila ka adlaw sa katapusan sa Disyembre 1832 ug sa sinugdanan sa Enero 1833 ngadto sa grupo sa mga naghupot sa priesthood kinsa nag-ampo aron masayud sa kabubut-on sa Ginoo bahin sa pag-establisar sa Zion. Niini nga pagpadayag, ang Ginoo mipasabut niining mga naghupot sa priesthood isip “una nga mga mamumuo niining katapusan nga gingharian” (D&P 88:70, 74) ug mimando kanila sa pag-organisar ug motambong sa tulunghaan aron maandam ang ilang mga kaugalingon sa pagsangyaw sa ebanghelyo taliwala sa mga nasud sa kalibutan (tan-awa sa D&P 88:74, 84, 127).

Dapita ang usa ka estudyante sa pagbasa og kusog sa Doktrina ug mga Pakigsaad 88:73–76. Hangyoa ang klase sa pagsunod, nga mangita sa unsay gisugo sa Ginoo nga buhaton niining mga naghupot sa priesthood aron makaandam sa pagtudlo sa uban.

Unsa man ang gisugo niining “una nga mga mamumuo” aron maandam sa pagtudlo sa uban isip mga misyonaryo? (Mahimo nimong hangyuon ang usa ka estudyante mga magsilbing tigsulat ug isulat ang mga tubag sa mga estudyante diha sa pisara.)
Unsa ang atong mahimo aron “maghan-ay,” “mag-andam” ug “magbalaan” sa atong mga kaugalingon aron mahimong mas epektibo sa pagpakigbahin sa ebanghelyo?
Sa unsang paagi nga ang pagkalimpyo gikan sa sala makaimpluwensya sa atong ablilidad sa pagpakigbahin sa ebanghelyo?

Dapita ang usa ka estudyante sa pagbasa og kusog sa Doktrina ug mga Pakigsaad 88:77–80. Hangyoa ang klase sa pagsunod, nga mangita sa unsay gisugo sa Ginoo nga buhaton niining mga naghupot sa priesthood samtang nanagtigum sila. Hangyoa ang mga estudyante sa pag-report unsa ang ilang nakaplagan.

Unsa ang gisaad sa Ginoo alang niadtong nagkugi sa pagtudlo? (Siya misaad nga ang Iyang grasya magauban kanila ug sila matudloan sa mas hingpit sa tanan nilang gikinahanglan nga masabtan kalabut sa gingharian sa Dios.)
Unsa ang gipasabut nga ang “grasya [sa Ginoo] mouban kaninyo” (D&P 88:78)? (Ang Ginoo motabang kanato kon kita makugihong magtinguha sa pagtudlo ug pagkat-on sa ebanghelyo.)
Gikan sa unsay inyong nakat-unan sa mga bersikulo 77–78, unsaon ninyo pagpahayag ang usa ka baruganan bahin sa pagtudlo? (Ang mga estudyante mahimong maghingalan og pipila ka mga baruganan. Human sila makatubag, mahimo nimong isulat ang mosunod nga mga baruganan diha sa pisara: Kon magmakugihon kita sa pagtudlo sa usag usa, ang Ginoo motabang kanato nga mas hingpit natong masabtan ang Iyang mga kamatuoran. Pinaagi sa pagtudlo sa usag usa, makaandam kita sa pagpakigbahin sa ebanghelyo ngadto sa uban.)
Sa unsang mga paagi nga ang pagtudlo sa ebanghelyo ngadto sa uban nakatabang kaninyo nga mas makasabut niini?
Sumala sa bersikulo 79, unsa pay laing mga hisgutanan nga importante nga atong masabtan? Sa unsang paagi nga ang pag-angkon og halapad nga kahibalo makatabang kanato sa pagtudlo sa ebanghelyo ngadto sa uban?

Pahinumdom: Ang mosunod nga kalihokan gisulat alang sa tinagup-at nga grupo sa mga estudyante sa pag-andam ug pagtudlo sa usag usa nga magpares-pares. Kon gamay ra ang imong klase, mahimo nimong paandamon ug patudluon ang mga estudyante sa indibidwal nga paagi, o mahimo nimong ipatudlo sa klase ang usa sa mga leksyon ug dayon ikaw ang motudlo nila sa laing leksyon.

Ipasabut sa mga estudyante nga gusto nimong makatabang nila nga mobati sa kaimportante ug sa paggamit sa duha ka baruganan sa pagtudlo nga ilang ginganlan. Bahina ang klase nga magrupo sa tagtinagup-at ka estudyante. Hangyoa ang duha ka estudyante sa matag grupo nga magtinabangay sa paggamit sa ilang mga kasulatan ug mga scripture study journal sa pag-andam sa pagtudlo sa Doktrina ug mga Pakigsaad 88: 63–68 ngadto sa laing duha ka mga estudyante. Hangyoa ang laing duha ka mga estudyante nga magtinabangay sa pag-andam sa pagtudlo sa scripture mastery passage sa Doktrina ug mga Pakigsaad 89: 18–21 ngadto sa unang duha ka mga estudyante.

Ihatag ang mga kopya sa mosunod nga mga instruksyon ngadto sa matag grupo . Hangyoa sila nga basahon ang tanan nga mga instruksyon ug mga bersikulo sa mga kasulatan ug dayon modesisyon kon unsaon nila sa pagtudlo ang matag leksyon. (Awhaga ang duha ka estudyante sa matag parisan sa pag-apil diha sa pagtudlo.) Ipasabut nga ang matag parisan adunay mga 8–10 ka minutos sa pag-andam ug mga 5 ka minutos sa pagtudlo sa ilang mga leksyon.

Mga instruksyon ngadto sa mga estudyante nga magtudlo:

Hutdon sa pagbasa ang tudling sa kasulatan nga gi-assign diha ninyo. Mahimo usab kamong mag-ampo diha sa inyong kasingkasing nga ang Espiritu Santo motabang kaninyo samtang nangandam ug nagtudlo kamo.
Pangitaa ang bisan unsang mga pahinumdom o mga pagmarka nga inyong gihimo sa inyong mga kasulatan ug scripture study journal aron matabangan kamo nga mahinumdom unsa ang inyong nakat-unan gikan sa inyong pagtuon sa tudling atol sa semana.
Isulat o markahi ang usa ka doktrina o baruganan nga gusto niyong itudlo.
Desisyuni kon unsaon sa pagtudlo ang doktrina o baruganan. Ikonsiderar ang paggamit sa mosunod nga mga ideya samtang maghimo kamo og usa ka outline:
1. Paghunahuna og usa ka yanong ipangutana o usa ka leksyon nga maggamit og butang nga mahimo ninyong gamiton aron mainteresado ang inyong gitudloan ug sa pagpaila sa hilisgutan.
2. Ipasabut kon unsa ang inyong nahibaloan bahin sa background ug sulod sa pinadayag, ug dapita kadtong inyong gitudloan sa pagbasa sa porsyon o tanang tudling nga gi-assign diha kaninyo.
3. Pangutana aron matabangan kadtong inyong gitudloan nga makahibalo sa doktrina o baruganan, ug dayon pangutana pa og dugang nga mga pangutana sa pagsiguro kon nasabtan ba nila kini.
4. Ipakigbahin ang usa nimo ka kasinatian kalabut sa doktrina ug baruganan ug pagpamatuod sa kaimportante ug kamatuoran niini. Mahimo usab ninyong dapiton kadtong inyong gitudloan sa pagpakigbahin sa ilang kasinatian kalabut sa doktrina o baruganan.

Human makabaton og igong panahon nga makaandam ang mga estudyante, dapita ang parisan nga gi-assign sa Doktrina ug mga Pakigsaad 88:63–68 sa pagtudlo sa ubang mga estudyante sa ilang grupo. Dayon hangyoa ang mga estudyante nga magbaylo og tahas, ug dapita ang managkompanyon nga gi-assign sa pagtudlo sa Doktrina ug mga Pakigsaad 89:18–21.

Human ang mga estudyante nakatudlo sa usag usa, tudlo ngadto sa mosunod nga baruganan diha sa pisara: “Kon magmakugihon kita sa pagtudlo sa usag usa, ang Ginoo motabang kanato nga mas hingpit natong masabtan ang Iyang mga kamatuoran.” Dayon ipangutana sa klase ang mosunod:

Sa unsang paagi nga napalawman ang inyong pagsabut niining mga kasulatan samtang nagtudlo kamo niini ngadto sa laing tawo karon?
Sa unsang mga paagi nga inyong nabati nga ang Ginoo nagtabang kaninyo?

Awhaga ang mga estudyante sa pagpangita og mga oportunidad sa pagtudlo sa uban sa ebanghelyo. Pagpamatuod sa mga panalangin nga ilang madawat sa paghimo sa ingon.

Sunod nga Unit (Doktrina ug mga Pakigsaad 90–97)

Aron maandam ang mga estudyante alang sa ilang pagtuon atol sa mosunod nga semana, mahimo nimo silang dapiton sa pagkonsiderar sa mosunod: Unsa ang gitakda sa Ginoo isip kwalipikasyon aron makakita sa Iyang panagway? Unsa ang mga panalangin sa pagkahimong “putli og kasingkasing” (D&P 97:16) kon kamo motambong sa templo? Naghunahuna ba kamo kon unsa ang gipasabut niining pagsimba sa Dios? Sa inyong pagtuon sa sunod semana, tan-awa kon kinsa ang atong gisimba ug giunsa nato sa pagsimba.