Ang Doktrina ug mga Pakigsaad naglangkob og “balaan nga mga pinadayag ug dinasig nga mga pahayag nga gihatag aron sa pagpahimutang ug pagdumala sa gingharian sa Dios dinhi sa yuta sa ulahing mga adlaw” (pasiuna sa Doktrina ug mga Pakigsaad). Pinaagi sa mainampoong pagtuon sa Doktrina ug mga Pakigsaad, ang mga estudyante makapalig-on sa ilang mga pagpamatuod ni Jesukristo ug makadawat og personal nga pagpadayag.
Mga Sugyot alang sa Pagtudlo
Ang Doktrina ug mga Pakigsaad naglangkob og mga pagpadayag nga nadawat pinaagi ni Propeta Joseph Smith ug sa iyang mga sumusunod
Sugdi ang leksyon pinaagi sa pagpangutana sa mosunod:
Unsa nga mga libro sa imong hunahuna ang makahatag og kaayohan sa tibuok kalibutan kon basahon? Ngano man? (Ikonsiderar ang pagpakita og pipila ka mga libro nga imong isugyot.)
Human ang mga estudyante makatubag, dapita ang usa ka estudyante sa pagbasa sa mosunod nga pamahayag ni Joseph Smith. Hangyoa ang klase sa pagpaminaw kon unsay gitudlo sa Propeta kalabut sa Doktrina ug mga Pakigsaad.
Imahe
Prophet Joseph Smith
“[Ang Doktrina ug mga Pakigsaad mao] ang pundasyon sa Simbahan niining katapusang mga adlaw, ug usa ka kaayohan ngadto sa kalibutan, nagpakita nga ang mga yawe sa mga misteryo sa gingharian sa atong Manluluwas gisalig na usab ngadto sa tawo” ( Mga Pagtulun-an sa mga Presidente sa Simbahan: Joseph Smith [2007], 231).
Ipasabut nga ang Doktrina ug mga Pakigsaad ingon ka makahatag og kaayohan ngadto sa kalibutan nga si Presidente Joseph Fielding Smith mipahayag nga “kini mas bililhon kanato kay sa mga katigayunan sa yuta” (Doctrines of Salvation, comp. Bruce R. McConkie, 3 vols. [1954–56], 3:199). Awhaga ang mga estudyante sa pagpangita sulod sa leksyon karong adlawa og mga paagi nga ang pagtuon sa Doktrina ug mga Pakigsaad makahatag og kaayohan sa ilang mga kinabuhi.
Dapita ang mga estudyante sa pagpakli ngadto sa ulohang pahina sa Doktrina ug mga Pakigsaad. Ipasabut nga aron ang Doktrina ug mga Pakigsaad makahatag og kaayohan, kinahanglan gayud natong sabton og una kon unsa ang mga doktrina ug mga pakigsaad. Hangyoa ang usa ka estudyante sa pagbasa og kusog sa ulohang pahina ug sa unang sentence sa pasiuna.
Unsaon ninyo sa pagpatin-aw ang pulong nga doktrina? Unsa ang usa ka pakigsaad ? Unsa ang pagpadayag? (Tingali kinahanglan nimong ipasabut nga ang doktrina usa ka sukaranan, mahangturong kamatuoran sa ebanghelyo ni Jesukristo; ang pakigsaad usa ka sagradong panag-uyon tali sa Dios ug sa Iyang mga anak; ug ang pagpadayag mao ang komunikasyon gikan sa Dios ngadto sa Iyang mga anak. Mahimo nimong isulat kini nga mga pagpatin-aw diha sa pisara ug isugyot nga ang mga estudyante mokopya niini diha sa ulohang pahina sa ilang mga kasulatan.)
Hangyoa ang mga estudyante sa pagpakli ngadto sa ikawalong paragraph sa pasiuna sa Doktrina ug mga Pakigsaad (nagsugod sa “Diha sa mga pagpadayag …”). Ipasabut nga kini nga paragraph naglista og mga ehemplo sa pipila ka mga doktrina nga makit-an diha sa Doktrina ug mga Pakigsaad. Dapita ang mga estudyante sa pagbasa og hilum sa unang sentence ug sa pag-ila og usa o labaw pa nga mga doktrina nga sila interesado sa pagkat-on pa.
Hain sa mga doktrina ang pinaka-interesado ninyong makat-unan pa? Sa unsa nga paagi kaha nga kamo mahatagan og kaayohan gikan sa mas dakong kahibalo ug pagsabut niadto nga mga kamatuoran?
Ipasabut nga bisan og ang kahibalo niining mga doktrina importante gyud kaayo, ang mas labing dako nga bili sa Doktrina ug mga Pakigsaad makaplagan diha sa labing importanting kamatuoran nga gilangkob niini. Dapita ang usa ka estudyante sa pagbasa og kusog sa katapusang sentence sa ikawalong paragraph, ug dapita ang klase sa pagsunod ug sa pagpangita sa kamatuoran nga naghimo sa Doktrina ug mga Pakigsaad nga bililhon kaayo.
Unsa ang naghimo sa Doktrina ug mga Pakigsaad nga “mahinungdanon ang bili”? Ngano nga ang usa ka pagpamatuod kabahin sa Manluluwas bililhon kaayo?
Sa unsa nga paagi ang inyong pagtuon sa Doktrina ug mga Pakigsaad nagdugang sa inyong pagpamatuod kabahin ni Jesukristo?
Isulat ang mosunod nga baruganan diha sa pisara: Pinaagi sa pagtuon sa mga pinadayag diha sa Doktrina ug mga Pakigsaad, makapalig-on kita sa atong mga pagpamatuod kabahin ni Jesukristo.
Dapita ang usa ka estudyante sa pagkonsiderar kon sa unsa nga paagi ang ilang mga kinabuhi mahimong mahatagan og kaayohan gikan sa mas lig-ong pagpamatuod kabahin sa Manluluwas. Ikonsiderar ang pagpakigbahin kon sa unsa nga paagi ang pagtuon sa Doktrina ug mga Pakigsaad naglig-on sa imong pagpamatuod kabahin ni Jesukristo.
Aron matabangan ang mga estudyante sa pagsabut kon sa unsa nga paagi ang pagtuon sa Doktrina ug mga Pakigsaad makapalig-on sa ilang mga pagpamatuod kabahin ni Jesukristo, dapita ang usa ka estudyante sa pagbasa og kusog sa ikaduhang sentence sa unang paragraph sa pasiuna. Hangyoa ang klase sa pagsunod ug sa pag-ila kinsang tingog ang ilang madungog pinaagi sa Doktrina ug mga Pakigsaad. Human matubag sa mga estudyante, isulat ang mosunod nga baruganan diha sa pisara: Samtang kita nagtuon sa Doktrina ug mga Pakigsaad, atong madungog ang tingog sa Manluluwas.
Dapita ang usa ka estudyante sa pagbasa og kusog sa Doktrina ug mga Pakigsaad 18:34–36 . Dapita ang klase sa pagsunod, nga mangita kon unsaon nato pagkadungog sa tingog sa Ginoo samtang atong tun-an ang Doktrina ug mga Pakigsaad.
Unsa ang atong ikapamatuod kon kita magtuon sa Doktrina ug mga Pakigsaad?
Mahimo nimong ipasabut nga diha sa Doktrina ug mga Pakigsaad ang mga pulong sama sa “ang Ginoo” o “Dios” sa kinatibuk-an nagpasabut ni Jesukristo. Siya mao ang tigpamulong sa tibuok Doktrina ug mga Pakigsaad.
Hangyoa ang usa ka estudyante sa pagbasa og kusog sa ikatulong paragraph sa pasiuna. Dapita ang klase sa pagsunod ug sa pagpangita sa mga pulong nga naghulagway sa tingog sa Manluluwas. (Mahimo nimong isugyot nga markahan unsa ang ilang nakit-an.)
Unsa nga mga pulong ang gigamit sa paghulagway sa tingog sa Manluluwas?
Unsa nga mga kaayohan ang moabut sa inyong kinabuhi nga makadungog ug makaila sa tingog sa Ginoo? (Ipasabut nga sa umaabut nga mga semana, ang mga estudyante makakat-on mahitungod sa ubang mga paagi sa pagdungog sa tingog sa Ginoo ug sa pag-ila kon nakigsulti Siya kanila.)
Aron matabangan pa ang mga estudyante sa pagsabut kon sa unsang paagi ang pagtuon sa Doktrina ug mga Pakigsaad makahatag og kaayohan sa ilang mga kinabuhi, ikonsiderar ang pagpakita og mga imahe sa pipila ka mga tawo nga konektado sa mga pinadayag diha sa Doktrina ug mga Pakigsaad: Brother Joseph (Libro sa mga Hulagway sa Ebanghelyo [2009], nu. 87; tan-awa usab sa LDS.org), Emma Smith (nu. 88), Juan Bautista Nagtugyan sa Aaronic Priesthood (nu. 93), Pagpahiuli sa Melchizedek Priesthood (nu. 94), Elias Mipakita didto sa Templo sa Kirtland (nu. 95). Ipasabut nga samtang sila nagtuon sa mga pinadayag diha sa Doktrina ug mga Pakigsaad, ilang makat-unan ang importanting mga butang kalabut niini nga mga tawo. Hangyoa ang usa ka estudyante sa pagbasa sa unang duha ka sentence sa ikaunom nga paragraph sa pasiuna (nagsugod sa “Kining sagrado nga mga pagpadayag …”). Dapita ang klase sa pagsunod ug sa pag-ila sa mga sitwasyon nga ang mga pinadayag diha sa Doktrina ug mga Pakigsaad nadawat.
Imahe
Prophet Joseph Smith
Imahe
Emma Smith
Imahe
John the Baptist Conferring the Aaronic Priesthood
Imahe
Melchizedek Priesthood Restoration
Imahe
Elijah Appearing in the Kirtland Temple
Unsa nga mga pulong niini nga paragraph naghulagway sa mga sitwasyon nga kining mga pagpadayag nadawat? (“Agi og tubag sa pag-ampo,” “sa panahon sa panginahanglan,” ug “tinuod nga mga kahimtang sa kinabuhi”).
Pagpakita og usa ka piraso nga papel nga may pulong Ikaw nga nasulat diha niini. Ipasabut nga sama lamang sa mga indibidwal diha sa kasaysayan sa Simbahan, moagi usab kita og mga sitwasyon nga kita manginahanglan og balaang paggiya. Dapita ang mga estudyante sa paghulagway og mga sitwasyon nga mahimong moabut sa panahon sa tuig ting-eskwela nga sila makadawat og kaayohan gikan sa paggiya sa Ginoo. Dapita ang usa ka estudyante sa pagsulat sa ilang mga tubag diha sa pisara.
Ipasabut nga ang kada pagpadayag nga tun-an sa mga estudyante niini nga tuig usa ka dugang nga saksi nga ang Dios sa tinuod buhi, nga Siya nakigsulti ngadto sa Iyang mga anak, ug nga Siya naggiya sa Iyang Simbahan.
Sa unsang paagi nga kining dugang nga mga saksi nagtabang kaninyo kon kamo anaa sa mahagitong mga sitwasyon?
Base sa unsay inyong nabasa diha sa paragraph says sa pasiuna, unsay kinahanglan gayud natong buhaton aron makadawat sa balaang paggiya sa panahon sa atong panginahanglan?
Tabangi ang mga estudyante sa pag-ila og baruganan gikan sa paragraph sais pinaagi sa pagsulat sa mosunod nga dili kompleto nga pamahayag diha sa pisara: Kon kita , niana ang Ginoo .
Dapita ang mga estudyante sa pag-summarize unsay ilang nakat-unan pinaagi sa pagkompleto niini nga pamahayag. Ang mga estudyante mahimong mogamit og lahi nga mga pulong, apan ang ilang mga tubag kinahanglan nga mopakita sa mosunod nga baruganan: Kon kita mag-ampo alang sa panabang sa atong mga panahon sa panginahanglan, niana ang Ginoo mohatag kanato og paggiya.
Hangyoa ang mga estudyante sa pagpakli ngadto sa mga paragraph kwatro ug singko sa pasiuna. I-summarize kini nga mga paragraph pinaagi sa pagpasabut nga kini naghatag og overview sa mahinungdanong mga hitabo sa Pagpahiuli sa Simbahan ni Jesukristo dinhi sa yuta, lakip ang Unang Panan-awon ug ubang balaang mga pagpakita, ang paghubad sa Basahon ni Mormon, ang pagpahiuli sa awtoridad ug mga yawe sa priesthood, ug ang pag-organisar sa Ang Simbahan ni Jesukristo sa mga Santos sa Ulahing mga Adlaw. Sultihi ang mga estudyante nga sila makakat-on pa mahitungod niining sagrado nga mga hitabo sa panahon sa ilang pagtuon sa kurso. Ipasabut nga kining balaan nga mga kasinatian miabut samtang si Propeta Joseph Smith ug ang uban nangamuyo sa panabang ug paggiya sa Ginoo.
Kanus-a kamo nag-atubang og usa ka sitwasyon nga inyong gikinahanglan ang panabang o paggiya sa Ginoo ug nadawat ninyo kini?
Dapita ang mga estudyante sa pagpakli ngadto sa “Pagpamatuod sa Napulog Duha ka mga Apostoles sa Kamatuoran sa Basahon sa Doktrina ug mga Pakigsaad,” nga anaa sa pasiuna. Hangyoa ang usa ka estudyante sa pagbasa og kusog sa unang duha ka mga paragraph (nagsugod sa mga pulong “Busa, kami mibati …”). Hangyoa ang klase sa pagsunod ug pag-ila sa mga pulong nga nakadani kanila.
Hain nga mga pulong gikan sa pagpamatuod sa Napulog Duha ka mga Apostoles sa Doktrina ug mga Pakigsaad labaw alang kaninyo? Ngano man?
Human matubag sa mga estudyante, pahinumdumi sila nga sa sinugdanan sa leksyon giawhag sila sa pagpangita sa mga paagi nga ang pagtuon sa Doktrina ug mga Pakigsaad makahatag og kaayohan sa ilang mga kinabuhi. Dapita ang mga estudyante sa pagsulat diha sa ilang mga class notebook o mga scripture study journal kon sa unsang paagi nanghinaut sila nga ang Doktrina ug mga Pakigsaad mohatag og kaayohan sa ilang mga kinabuhi ug unsa ang ilang buhaton sa pagtabang niini nga mahitabo.
Kon mahuman na ang mga estudyante sa pagsulat, hagita sila nga mainampuong magtuon sa Doktrina ug mga Pakigsaad matag adlaw niining tuig sa ting-eskwela isip usa ka paagi sa pagtabang kanila sa pagdungog sa tingog sa Manluluwas ug sa pagdawat og paggiya gikan Kaniya. Mahimo nimong tapuson pinaagi sa pagpakigbahin sa imong pagpamatuod kon sa unsang paagi ang pagtuon sa Doktrina ug mga Pakigsaad nakatabang kanimo sa pagsinati niini nga mga panalangin sa imong kinabuhi.
Komentaryo ug Background nga Impormasyon
Unsa ang kalabutan tali sa Basahon ni Mormon ug sa Doktrina ug mga Pakigsaad?
Gitudlo ni Presidente Ezra Taft Benson unsa ang kalabutan tali sa Basahon ni Mormon ug sa Doktrina ug mga Pakigsaad:
Imahe
Presidente Ezra Taft Benson
“Ang Basahon ni Mormon ug ang Doktrina ug mga Pakigsaad gimantala isip mga pinadayag gikan sa Dios sa Israel aron sa pagpundok ug pag-andam sa Iyang katawhan alang sa ikaduhang pag-anhi sa Ginoo. …
“Ang Basahon ni Mormon ug ang Doktrina ug mga Pakigsaad nagpamatuod sa usag usa. Dili ka mahimong motuo sa usa ug dili sa lain. …
Ang Doktrina ug mga Pakigsaad mao ang bugkos nga nagsumpay tali sa Basahon ni Mormon ug sa nagpadayong buhat sa Pagpahiuli pinaagi ni Propeta Joseph Smith ug sa iyang mga sumusunod. …
“Ang Basahon ni Mormon nagdala sa mga tawo ngadto ni Kristo. Ang Doktrina ug mga Pakigsaad nagdala sa katawhan ngadto sa gingharian ni Kristo, gani Ang Simbahan ni Jesukristo sa mga Santos sa Ulahing mga Adlaw, “mao lamang ang tinuod ug buhi nga simbahan diha sa ibabaw sa tibuok yuta” [D&P 1:30]. Nasayud ako niana.
“Ang Basahon ni Mormon mao ang ‘tukurang bato’ sa atong relihiyon, ug ang Doktrina ug mga Pakigsaad mao ang ulohang bato, uban sa nagpadayong pagpadayag sa ulahing mga adlaw. Ang Ginoo naghatag sa Iyang pagtugot sa tukurang bato ug sa ulohang bato” (“The Book of Mormon and the Doctrine and Covenants,” Ensign, Mayo 1987, 83).
Gikan sa pagpadayag ngadto sa pagmantala: Lahi nga mga edisyon sa Doktrina ug mga Pakigsaad
Sa Nobyembre 1831 nakigkita si Propeta Joseph Smith sa mga elder sa Hiram, Ohio. Ang grupo mihukom sa pagtigum ug pagmantala sa pipila sa mga pinadayag nga nadawat sa Propeta. Mipili sila og 65 ka mga pinadayag ug giulohan ang tinigum og ang Basahon sa mga Sugo. Sa ting-init sa 1833 giimprinta ang kadaghanan sa mga tinigum, apan usa ka pundok sa manggugubot miguba sa hapit tanang mga kopya. Agig resulta, adunay diyutay kaayong mga kopya karon. Laing edisyon gi-aprobahan ug gimantala sa 1835. Kini nga edisyon naglangkob sa Lectures on Faith (tan-awa ang pasiuna sa Doktrina ug mga Pakigsaad) ug ang 103 nga mga pinadayag. Busa, kini nga edisyon, mao ang una nga may ulohan nga Doktrina (ang mga lecture) ug mga Pakigsaad (ang mga pagpadayag). (Tan-awa sa History of the Church, 2:243–251.)
Dugang pa nga mga edisyon (kada usa nagdugang og bag-ong mga pagpadayag o naghimo og gamay nga mga pag-uswag sa organisasyon) giimprinta sa matag karon ug unya hangtud sa 1981, sa dihang gimantala sa Simbahan ang usa ka bag-ong edisyon sa triple combination, sa Iningles, nga may daghang mga footnote ug mga cross-reference ug usa ka bag-ong index. Niana nga panahon, ang 1836 nga panan-awon ni Propeta Joseph Smith sa celestial nga gingharian ug ang 1918 nga panan-awon ni Joseph F. Smith sa kaluwasan sa mga patay, gikanonisar ang duha sa Simbahan niadtong 1976 ug orihinal nga gidugang ngadto sa Perlas nga Labing Bililhon, gidugang ngadto sa Doktrina ug mga Pakigsaad isip mga seksyon 137 ug 138. Ang 1981 nga edisyon adunay 138 ka mga seksyon ug duha ka opisyal nga mga pamahayag: ang Manipesto, nga gi-isyu sa 1890 ni Presidente Wilford Woodruff, ug ang pamahayag kalabut sa priesthood, nga gi-isyu sa 1978 ni Presidente Spencer W. Kimball. Sa Marso 1, 2013, ang Unang Kapangulohan mianunsyo og bag-ong edisyon sa Iningles nga mga kasulatan. Kasagaran sa mga pahiangay nga gihimo niini nga edisyon anaa sa mga tabang sa pagtuon o sa mga ulohan sa Doktrina ug mga Pakigsaad o naglakip og diyutay nga mga koreksyon sa spelling diha sa basahon. (Alang sa dugang pang detalyadong impormasyon mahitungod sa lain nga mga edisyon, tan-awa ang Revelations Correspondence Chart diha sa “Corresponding Section Numbers in Editions of the Doctrine and Covenants,” JosephSmithPapers.org/reference/library.)