Leksyon 113: Doktrina ug mga Pakigsaad 107:39–100

Leksyon 113

Doktrina ug mga Pakigsaad 107:39–100

Pasiuna

Mao kini ang katapusan sa tulo ka mga leksyon nga naghisgot sa pagpadayag nga narekord sa Doktrina ug mga Pakigsaad 107. Ang pagpadayag narekord niadtong 1835, apan “ang rekord sa kasaysayan nagmatuod nga ang kadaghanan sa mga bersikulo 60 hangtud 100 naglakip sa pagpadayag nga gihatag pinaagi ni Joseph Smith niadtong Nobyembre 11, 1831” (pasiuna sa D&P 107). Ang mga bersikulo nga nahisgutan niini nga leksyon naglakip sa mga pulong sa Ginoo mahitungod sa karaan nga praktis sa pagtugyan sa Melchizedek nga Pagkapari gikan sa amahan ngadto sa anak nga lalaki. Naghatag usab kini og instruksyon mahitungod sa mga katungdanan sa nagkalain-laing mga lider sa priesthood.

Mga Sugyot alang sa Pagtudlo

Doktrina ug mga Pakigsaad 107:39–57

Ang Ginoo mipadayag nga ang Melchizedek nga Pagkapari gipasa sa karaan pang panahon gikan sa amahan ngadto sa anak nga lalaki

Sa dili pa ang klase, isulat ang mosunod nga pangutana diha sa pisara: Unsa ang pipila ka mga sirkumstansya ang inyong giatubang karon, o atubangon sa dili madugay, diin kamo makabenepisyo sa pagdawat og giya o kahupayan gikan sa inyong Langitnong Amahan?

Sa sinugdanan sa leksyon, dapita ang mga estudyante nga mamalandong niini nga pangutana. Dapita ang pipila ka estudyante sa pagpakigbahin sa ilang mga tubag. Samtang ang mga estudyante magsugod sa panaghisgutan karon sa Doktrina ug mga Pakigsaad 107:39–100, awhaga sila sa pagpangita sa mga baruganan niini nga mga bersikulo nga makatabang kanila nga makadawat og giya ug kahupayan gikan sa ilang Langitnong Amahan.

Pahinumdumi ang mga estudyante nga sa miaging leksyon, ilang nakat-unan ang mahitungod sa Unang Kapangulohan, sa Korum sa Napulog Duha ka mga Apostoles, ug sa Kapitoan. Dapita ang usa ka estudyante sa pagbasa og kusog sa Doktrina ug mga Pakigsaad 107:39, ug hangyoa ang klase sa pagpangita og usa sa mga katungdanan sa Napulog Duha. Ipasabut nga ang termino nga mga ministro sa ebanghelyo nagpasabut niadtong naghupot sa katungdanan nga patriyarka diha sa Melchizedek nga Pagkapari (tan-awa sa Giya ngadto sa mga Kasulatan, “Ebanghelista,” scriptures.lds.org; Bible Dictionary, “Evangelist”).

Sumala sa bersikulo 39, sa unsa nga paagi ang mga patriyarka gitudlo diha sa ilang calling? (Samtang ang mga estudyante motubag, tabangi sila nga makasabut sa mosunod nga kamatuoran: Ang mga patriyarka gitawag pinaagi sa pagpadayag ug ordinahan ubos sa direksyon sa Napulog Duha ka mga Apostoles.)

Hangyoa ang mga estudyante nga ipasabut ang katungdanan niadtong naghupot sa katungdanan sa patriyarka. (Ang mga patriyarka mohatag og espesyal nga mga panalangin, nga gitawag og patriyarkal nga mga panalangin, ngadto sa takus nga mga miyembro sa Simbahan.) Agig dugang, pangutana kon aduna bay makapahinumdom sa klase kon unsa ang patriyarkal nga panalangin. (Ang usa ka patriyarkal nga panalangin naglakip sa tambag sa Ginoo alang sa usa ka indibidwal ug mopahayag sa kaliwatan sa tawo sa balay sa Israel. Tan-awa sa Matinud-anon sa Tinuhoan: Usa ka Pakisayran sa Ebanghelyo [2004], “Patriyarka nga mga Panalangin,” 111–13.)

Mahimo usab nimong dapiton ang mga estudyante nga nakadawat na og patriyarkal nga mga panalangin nga mopakigbahin sa ilang mga pagpamatuod mahitungod sa pagserbisyo sa mga patriyarka sa stake. (Pasidan-i ang mga estudyante nga ang patriyarkal nga mga panalangin sagrado ug personal ug nga kini sa kasagaran dili ipakigbahin sa mga tawo nga dili mga sakop sa pamilya.) Ipakigbahin ang imong pagpamatuod mahitungod sa mga panalangin sa pagdawat og patriyarkal nga panalangin ug pagtuon sa tambag nga gihatag niini.

Ipasabut nga ang pulong patriyarka nagpasabut usab sa mga amahan diha sa pamilya. Si Presidente Ezra Taft Benson mitudlo:

“Ang kapunongan sa priesthood nga gihisgutan sa mga kasulatan usahay gipasabut nga patriyarkal nga kapunongan tungod kay kini nagagikan sa amahan ngadto sa anak nga lalaki” (“What I Hope You Will Teach Your Children about the Temple,” Ensign, Ago. 1985, 9).

Dapita ang usa ka estudyante sa pagbasa og kusog sa Doktrina ug mga Pakigsaad 107:40, ug hangyoa ang klase sa pagpangita kon sa unsa nga paagi ang Melchizedek nga Pagkapari gihatag sa karaan nga panahon. Dapita ang mga estudyante sa pag-report kon unsay ilang makit-an.

Itudlo nga sa Doktrina ug mga Pakigsaad 107:41–57, mabasa nato ang pipila ka mga butang nga gibuhat ni Adan isip usa ka matarung nga patriyarka. Dapita ang mga estudyante nga hilom nga mopakli sa mga bersikulo verses 41–50 ug moila og sumbanan—duha ka mga butang nga gibalik-balik ni Adan pagbuhat samtang nagdumala siya sa iyang pamilya.

Unsa ang duha ka mga aksyon ang gibalik-balik ni Adan samtang nagdumala siya sa iyang pamilya? (Giordinahan niya ang iyang takus nga mga kaliwat nga lalaki ngadto sa mga katungdanan sa priesthood, ug iyang gipanalanginan sila.)

Dapita ang usa ka estudyante sa pagbasa og kusog sa Doktrina ug mga Pakigsaad 107:53, ug hangyoa ang klase sa pag-ila kinsa ang gipanalanginan ni Adan dugang ngadto sa iyang takus nga mga kaliwat nga lalaki. Hangyoa ang mga estudyante sa pag-report kon unsay ilang makit-an. (Siguroha nga sila nakasabut nga si Adan mipanalangin sa iyang tanang matarung nga kaliwatan, lakip sa mga anak nga babaye.)

Sa unsa nga paagi nga ang ehemplo ni Adan magsilbi nga usa ka sumbanan alang sa mga amahan? (Human makatubag ang mga estudyante, isulat ang mosunod nga kamatuoran diha sa pisara: Ang mga amahan nga naghupot sa Melchizedek nga Pagkapari adunay awtoridad sa pagpanalangin sa ilang mga anak.
Agig dugang ngadto sa pag-orden og anak nga lalaki ngadto sa priesthood, kanus-a man ang usa ka amahan mohatag og panalangin sa priesthood ngadto sa usa ka anak nga lalaki o babaye? (Ang mga tubag mahimong maglakip nga ang mga amahan makapangalagad sa mga panalangin sa priesthood sa mga panahon nga may sakit ug sa paghatag og direksyon ug kahupayan.)

Ipasabut nga agig dugang sa pagpanalangin sa ilang mga anak, ang mga naghupot sa Melchizedek nga Pagkapari mahimong mohatag og mga panalangin ngadto sa ubang mga sakop sa pamilya ug ngadto sa uban nga nangayo niini. Dapita ang usa ka estudyante sa pagbasa og kusog sa mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:

“Ang mga panimalay nga walay priesthood ang pagabantayan ug pangalagaran pinaagi sa mga korum sa priesthood. Niini nga paagi, walay dili makadawat og mga panalangin sa bisan kinsa nga pamilya sa Simbahan” (“Ang Gahum sa Priesthood,” Liahona, Mayo 2010, 9).

Hangyoa ang mga estudyante sa paghunahuna sa mga panahon sa dihang nakabenepisyo sila tungod sa pagdawat og mga panalangin sa priesthood gikan sa ilang mga amahan o sa ubang mga naghupot sa Melchizedek nga Pagkapari. Kon wala silay oportunidad nga makadawat og panalangin sa priesthood, dapita sila sa pagpamalandong kon sa unsa nga paagi sila makabenepisyo sa pagtinguha sa mao nga panalangin. Dapita ang pipila ka mga estudyante sa pagpakigbahin sa ilang mga kasinatian ug mga hunahuna.

Baliki ang pangutana nga imong gisulat diha sa pisara sa dili pa ang leksyon. Ipakigbahin ang imong pagsaksi nga ang mga estudyante makapangayo og giya ug kahupayan gikan sa Langitnong Amahan pinaagi sa patriyarkal nga mga panalangin ug pinaagi sa mga panalangin sa priesthood nga gipangalagad sa ilang mga amahan o sa ubang mga naghupot sa Melchizedek nga Pagkapari.

Doktrina ug mga Pakigsaad 107:58–100

Ang Ginoo mipadayag sa mga katungdanan sa mga presidente sa mga korum sa priesthood

Isip daklit nga pagribyu, isulat ang mga ulohan nga Melchizedek Priesthood ug Aaronic Priesthood diha sa pisara. Dapita ang mga estudyante sa paglista sa mga katungdanan sa priesthood ubos sa tukma nga mga ulohan. Paghangyo og usa ka estudyante sa pagsulat og usa ka katungdanan sa priesthood ug dayon ipasa ang tisas o marker ngadto sa laing estudyante, magpadayon niini nga proseso hangtud ang mga estudyante nakalista sa tanang mga katungdanan sa priesthood. Awhaga ang mga estudyante sa pagtabang sa usag usa kon gikinahanglan. (Ang mga katungdanan sa Melchizedek Priesthood mao ang elder, high priest, patriarch, Seventy, ug Apostol. Ang mga katungdanan sa Aaronic Priesthood mao ang deacon, teacher, priest, ug bishop.)

Unsa ang korum sa priesthood? (Usa ka giorganisar nga grupo sa mga kaigsoonan kinsa naghupot sa samang katungdanan sa priesthood.)

Dapita ang usa ka estudyante ngadto sa pisara ug palingini ang mga katungdanan sa priesthood nga naorganisar ngadto sa mga korum. Awhaga ang klase sa pagtabang kon gikinahanglan. (Ang mosunod nga mga katungdanan adunay mga korum: Apostol, Seventy, high priest, elder, priest, teacher, ug deacon. Mahimo nimong ipasabut nga ang matag stake adunay usa ka korum sa mga high priest, uban sa presidente sa stake isip ang presidente sa korum. Sa matag ward, ang mga high priest giorganisar sa usa ka grupo sa mga high priest.)

Hangyoa ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 107:60–63, 85–89, 93–94. Dapita ang klase sa pagsunod ug motino kon unsa nga mga nahisgutan dinhi niining mga bersikulo nga komon sa mga korum.

Sumala niini nga mga bersikulo, unsay komon nga anaa niini nga mga korum sa priesthood? (Tabangi ang mga estudyante sa pag-ila sa mosunod nga kamatuoran: Ang usa ka presidente gitudlo sa pagdumala ug paggiya sa trabaho sa matag korum sa priesthood.)
Sumala sa mga bersikulo 87–88, sa unsang paagi nga lahi ang korum sa mga priest gikan sa mga korum sa mga deacon ug mga teacher? (Ang bishop sa ward ang magdumala sa korum sa mga priest. Siya usab ang magdumala sa tanang naghupot og Aaronic Priesthood sa ward. Sa usa ka branch, ang presidente sa branch molihok isip presidente sa korum sa mga priest.)
Ngano kaha nga importante nga ang matag korum sa priesthood adunay presidente? Sa unsa nga paagi nga ang presidente sa korum sa priesthood makatabang sa mga sakop sa korum?

I-summarize ang Doktrina ug mga Pakigsaad 107:68–84 pinaagi sa pagpasabut nga kini nga mga bersikulo naghatag og instruksyon mahitungod sa katungdanan sa bishop ug ang tahas sa mga konseho sa Simbahan.

Hangyoa ang usa ka estudyante sa pagbasa og kusog sa Doktrina ug mga Pakigsaad 107:65–66, ug dapita ang klase sa pag-ila sa lider sa Simbahan kinsa nagdumala sa tanang mga naghupot sa priesthood. Dapita ang mga estudyante sa pag-report kon unsay ilang makit-an. Siguroha nga sila nakasabut nga kini nga mga bersikulo nagpasabut sa Presidente sa Simbahan.

Hangyoa ang usa ka estudyante sa pagbasa og kusog sa Doktrina ug mga Pakigsaad 107:67, 91–92, ug dapita ang klase sa pagpangita sa mga pulong nga naghulagway sa awtoridad ug mga responsibilidad sa Presidente sa Simbahan.

Base niini nga mga bersikulo, unsaon ninyo sa pag-summarize ang awtoridad ug mga responsibilidad sa Presidente sa Simbahan? (Bisan og ang mga estudyante mogamit og lain-laing mga pulong, kinahanglang mailhan nila ang mosunod nga kamatuoran: Ang Presidente sa Simbahan naghupot sa awtoridad sa pagpangalagad sa tanang mga ordinansa ug mga panalangin ug nagdumala sa tibuok Simbahan. Mahimo kang modapit og usa ka estudyante sa pagsulat niini nga kamatuoran diha sa pisara.)

Pagpakita og hulagway sa Presidente sa Simbahan karon.

Unsa ang pipila ka mga paagi nga kamo gipanalanginan tungod sa awtoridad sa priesthood nga gihuptan sa Presidente sa Simbahan?

Itudlo nga pipila ka mga miyembro sa Simbahan mahimong mobati nga ang ilang mga calling o mga responsibilidad sa Simbahan dili importante. Dapita ang usa ka estudyante sa pagbasa og kusog sa mosunod nga pamahayag ni Presidente Gordon B. Hinckley. Ipasabut nga si Presidente Hinckley misulti niini ngadto sa tanang mga miyembro sa Simbahan.

“Ang inyong obligasyon sama ka seryoso sa hut-ong sa responsibilidad sama sa akong obligasyon sa akong hut-ong. Walay calling sa simbahan nga gamay o may gamay ra nga sangputanan. Kitang tanan sa pagpaningkamot sa atong katungdanan motandog sa mga kinabuhi sa uban” (“This Is the Work of the Master,” Ensign, Mayo 1995, 71).

Unsa sa inyong hunahuna ang gipasabut nga “walay calling niini nga simbahan nga gamay o may gamay ra nga sangputanan”?
Unsa ang gitudlo sa pamahayag ni Presidente Hinckley mahitungod sa inyong mga responsibilidad diha sa Simbahan?

Hangyoa ang mga estudyante sa pagbasa sa hilum sa Doktrina ug mga Pakigsaad 107:99–100 ug mamalandong kon sa unsa nga paagi nga ang pamahayag ni Presidente Hinckley may kalabutan niini nga mga bersikulo.

Sumala sa mga bersikulo 99–100, unsay angay natong buhaton aron mobarug nga takus sa atubangan sa Ginoo? (Ang mga estudyante kinahanglang moila sa mosunod nga baruganan: Sa pagbarug nga takus sa atubangan sa Ginoo, kinahanglan nga makat-on kita sa atong katungdanan ug mobuhat niini sa tumang kakugi sa pagtuman niini. Mahimo nimong isugyot nga markahan sa mga estudyante kini nga kamatuoran diha sa ilang mga kasulatan.)

Bisan og kini nga mga bersikulo orihinal nga alang sa mga naghupot sa priesthood, ang baruganan nga ilang gitudlo alang sa tanang mga miyembro sa Simbahan.

Ipares-pares ang mga estudyante. Dapita sila sa paghisgot sa mosunod nga mga pangutana. Basaha ang mga pangutana kada usa o isulat kini diha sa pisara.

Sa unsang paagi nga napanalanginan kamo sa pagserbisyo sa usa ka miyembro sa Simbahan kinsa makugihong mituman sa iyang katungdanan?
Unsa ang inyong gibuhat aron makakat-on sa inyong katungdanan ug mobuhat diha sa tanang kakugi aron matuman kini?

Hatagi ang mga estudyante og oportunidad sa pagpamatuod sa kaimportante sa atong katungdanan sa Simbahan ug sa atong mga pamilya. Dapita sila sa paghimo og tumong nga magkugi sa pagtuman sa ilang mga katungdanan.

Komentaryo ug Background nga Impormasyon

Doktrina ug mga Pakigsaad 107:40–57. Giordinahan ni Adan ang iyang mga anak nga lalaki ug mga apo nga lalaki ug gipanalanginan ang iyang kaliwatan

Misulat si Presidente Ezra Taft Benson mahitungod sa kaimportante sa pagpangayo sa mga amahan og mga panalangin sa priesthood:

“Usa ka batan-ong lalaki misulod sa akong opisina sa dili pa lang dugay nangayo og panalangin. Siya adunay mga problema—dili moral nga mga problema, apan … naglibug siya; nabalaka siya ug nahadlok. Ug nag-istorya kami sa pipila ka minuto ug miingon ko kaniya, ‘Nakapangayo na ba ikaw sa imong amahan og panalangin?’ ‘Oh,’ miiingon siya, ‘Wala ko kahibalo nga si Papa mobuhat ba diay niana. Dili kaayo siya aktibo.’ Miingon ko, ‘Apan amahan nimo siya.’ ‘Oo.’ ‘Naghupot ba siya sa priesthood?’ ‘Oo, usa siya ka dili aktibo nga elder.’ Miingon ko, ‘Nahigugma ka ba niya?’ Ug miingon siya, ‘Oo, gihigugma nako siya. Buotan siya, buotan siya sa pamilya, buotan ngadto sa mga anak.’ “Miingon ko, ‘Aduna ba kamoy pag-ampo sa pamilya?’ Miingon siya, ‘Dugay na kaayo nga kami dunay pag-ampo sa pamilya.’ Miingon ko, ‘Sige, andam ka bang mouli ug mangita og oportunidad, ug mohangyo sa imong amahan nga hatagan ka niya og panalangin? Ug kon dili kini magsilbi, balik ug malipay kong motabang nimo.’

“Mao nga mibiya siya, ug mga tulo ka adlaw mibalik siya. ‘Brother Benson, kini mao ang labing nindot nga butang nga nahitabo sa among panimalay,’ miingon siya. ‘Si Mama ug ang mga bata nanglingkod, ang akong mga manghud, uban sa akong mama nga namahid sa mga luha sa iyang mga mata. Gipadayag niya ang iyang pasalamat pagkataud-taod. Gihatagan ko ni Papa og nindot nga panalangin.’ Midugang siya, ‘Makasulti ko nga kini gikan sa iyang kasingkasing.’

“Adunay daghang mga amahan nga ganahan nga mohatag og mga panalangin sa ilang kaugalingong mga anak, kon awhagon sila og gamay. Isip mga patriyarka sa ilang mga pamilya, mao kana ang usa sa ilang mga obligasyon ug mga katungdanan, mga responsibilidad, ug mga oportunidad” (God, Family, Country: Our Three Great Loyalties [1974], 184).

Doktrina ug mga Pakigsaad 107:99. “Himoa ang matag tawo nga makakat-on sa iyang katungdanan”

Si Presidente Thomas S. Monson mitudlo:

“Akong gimahal ang nindot nga pulong nga katungdanan ug ang kahulugan niini. …

Ang tawag sa katungdanan miabut ngadto nila ni Adan, Noe, Abraham, Moises, Samuel, David. Miabut kini ni Propeta Joseph Smith ug sa matag usa nga mipuli niya. Ang tawag sa katungdanan miabut ni Nephi dihang gisugo siya sa Ginoo, pinaagi sa iyang amahan nga si Lehi, nga mobalik sa Jerusalem uban sa iyang mga igsoon sa pagkuha sa mga palid nga tumbaga gikan ni Laban. Ang mga igsoon ni Nephi nagbagulbol, nag-ingon nga lisud ang gipabuhat kanila. Unsa man ang tubag ni Nephi? Miingon siya, ‘Ako moadto ug mobuhat sa mga butang nga ang Ginoo nagsugo, kay ako nasayud nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila’ [1 Nephi 3:7].

“Kon kanang sama nga tawag moabut kaninyo ug kanako, unsay atong itubag? Magbagulbol ba kita, sama nila ni Laman ug Lemuel, ug moingon, ‘Kini usa ka malisud nga butang nga giabuhat kanato’? [ [1 Nephi 3:5]. O kita, sama ni Nephi, moingon, ‘Ako moadto. Ako mobuhat’? Andam ba kita nga moserbisyo ug mosunod? …

“Sa atong paghimo sa katungdanan ug paggamit sa atong priesthood, makit-an nato ang tinuod nga kalipay. Masinati nato ang katagbawan nga nahuman ang atong buluhaton” (“Andam ug Takus nga Moserbisyo,” Liahona, Mayo 2012, 66–67).