Sa Agosto 8, 1831, si Joseph Smith ug daghang mga elder nangandam sa pagbiya sa Independence, Missouri, ug mobalik ngadto sa Ohio. Gitudloan sa Ginoo ang mga elder sa pagsangyaw sa ebanghelyo samtang sila nagbiyahe—panudlo nga karon gi-rekord diha sa Doktrina ug mga Pakigsaad 60. Sa ikatulong adlaw sa ilang panaw ang panon nakasinati og kakuyaw diha sa Suba sa Missouri. Sa misunod nga duha ka adlaw, Agosto 12 ug 13, nadawat ni Propeta Joseph Smith ang duha ka mga pagpadayag gikan sa Ginoo. Kadto nga mga pagpadayag anaa karon gi-rekord sa Doktrina ug mga Pakigsaad 61 ug 62. Naglakip kini og mga pulong sa panudlo, pahimangno, paghupay, ug pag-awhag.
Ang Ginoo nagmando sa mga elder sa pagsangyaw sa ebanghelyo samtang sila nagbiyahe gikan sa Missouri ngadto sa Ohio
Sa wala pay klase, isulat ang mosunod nga pangutana diha sa pisara: Makahunahuna ba kamo og panahon nga kamo nagduha-duha sa pagsulti sa uban mahitungod sa inyong mga pagtuo o nagpanuko sa pagpakigbahin sa inyong pagpamatuod sa ebanghelyo?
Sugdi ang klase pinaagi sa pagdapit sa mga estudyante sa pagpamalandong sa pangutana diha sa pisara. Samtang ang mga estudyante namalandong, mahimo kang mopakigbahin sa imong kaugalingong tubag ngadto niini nga pangutana pinaagi sa pag-istorya og kasinatian gikan sa imong kinabuhi.
Ipasabut nga usa ka grupo sa mga elder mibiyahe gikan sa Ohio aron sa pag-apil sa pagpahinungod sa yuta ug sa mahimutangan sa templo diha sa Independence, Missouri. Misugo ang Ginoo kanila sa pagsangyaw sa ebanghelyo ngadto sa uban samtang sila nagbiyahe ngadto sa Missouri (tan-awa sa D&P 52:9–10). Ang Doktrina ug mga Pakigsaad 60 naglangkob sa mga pulong sa Ginoo ngadto sa daghan niini nga mga elder samtang sila nag-andam sa pagbalik ngadto sa Ohio. Dapita ang mga estudyante sa pagbasa og hilum sa Doktrina ug mga Pakigsaad 60:1–2, nga mangita kon nganong ang Ginoo wala mahimuot sa pipila ka mga elder.
Ngano nga ang Ginoo wala mahimuot sa pipila ka mga elder? (Miingon Siya, “Sila dili mobuka sa ilang mga ba-ba, apan sila nagtago sa kahibalo nga Ako mihatag ngadto kanila.” Sa laing pagkasulti, sila wala mipakigbahin sa ilang mga pagpamatuod sa ebanghelyo.)
Dapita ang usa ka estudyante sa pagbasa og kusog sa Doktrina ug mga Pakigsaad 60:3. Hangyoa ang klase sa pagsunod ug sa pag-ila kon unsa ang mahitabo kon kita dili mopakigbahin sa atong mga pagpamatuod.
Unsa ang mahitabo kon kita dili mopakigbahin sa atong mga pagpamatuod? (Ang mga estudyante mahimong mogamit og lahi nga mga pulong, apan kinahanglang ilhon nila ang mosunod nga baruganan: Mahimong mawala ang atong mga pagpamatuod kon kita dili mopakigbahin niini.)
Ngano kaha kita kinahanglan nga mopakigbahin sa atong pagpamatuod aron kini magpabilin uban kanato? Kanus-a ninyo gibati nga ang inyong pagpamatuod nagtubong mas lig-on tungod kay inyong gipakigbahin kini?
Awhaga ang mga estudyante sa pagpakigbahin sa ilang mga pagpamatuod kon sila adunay mga oportunidad sa pagbuhat sa mao. I-summarize ang nahibilin sa Doktrina ug mga Pakigsaad 60 pinaagi sa pagpasabut nga ang Ginoo misugo niini nga mga elder sa pagsangyaw sa ebanghelyo samtang sila mibiyahe balik ngadto sa Ohio.
Naghatag ang Ginoo og direksyon alang ni Joseph Smith ug sa ubang mga elder diha sa ilang panaw ngadto sa Ohio
Hangyoa ang mga estudyante sa paghunahuna og panahon nga sila nabalaka alang sa ilang kasiguroan ug mibati nga ang Ginoo mipanalipod kanila. Ipasabut nga sa Agosto 11, 1831, ang Propeta Joseph Smith ug napulo ka mga elder nakakita nga sila anaa sa kakuyaw samtang mibiyahe sila pinaagi sa baroto diha sa kusog kaayong sulog sa Suba sa Missouri. Nahinumdom si Joseph Smith nga sa ikatulong adlaw sa panaw, “kadaghanan sa mga kuyaw nga sagad diha sa mga katubigan sa kasadpan, nagpakita sa ilang mga kaugalingon; ug human kami nagkampo diha sa pangpang sa suba, … si Brother [William W.] Phelps, sa klaro nga panan-awon sa panahon sa adlaw, nakakita sa tiglaglag diha sa iyang labing makahahadlok nga gahum, naglihok ibabaw sa mga katubigan; nadungog sa uban ang ka saba, apan wala makakita sa panan-awon” (sa History of the Church, 1:203). Sa wala pa kini nga panan-awon, “ang pipila sa mga panaglalis ug ngil-ad nga pagbati mitumaw taliwala sa mga kaigsoonan” (B. H. Roberts, A Comprehensive History of the Church, 1:262–63). Nianang pagkagabii, gihisgutan sa mga kaigsoonan ang ilang mga kalisud ug kasagaran sa kanila nakapasaylo sa usag usa. Sa pagkabuntag, nag-ampo si Joseph Smith ug nadawat ang pagpadayag nga gi-rekord diha sa Doktrina ug mga Pakigsaad 61.
Dapita ang usa ka estudyante sa pagbasa og kusog sa Doktrina ug mga Pakigsaad 61:2, 20, 36–37. Hangyoa ang klase sa pagsunod, nga mangita sa mga pulong nga tingali midala og kahupayan ngadto niini nga mga elder.
Unsa nga mga pulong ang inyong nakit-an nga tingali mihupay niini nga mga elder? (Samtang nagtubag ang mga estudyante, mahimo nimo silang hangyoon sa pagpasabut kon sa unsang paagi kini nga mga pulong nga ilang gihinganlan makahimo sa paghupay.)
Ipasabut nga niini nga pagpadayag, gitudlo sa Ginoo nga “daghang mga kalaglagan” ang mahitabo diha sa mga tubig sa katapusang mga adlaw (tan-awa sa D&P 61:5, 14–19). Ang Ginoo namulong usab kabahin sa Iyang gahum. Dapita ang usa ka estudyante sa pagbasa og kusog sa Doktrina ug mga Pakigsaad 61:1. Hangyoa ang klase sa pagsunod ug pagpangita sa unsay gitudlo sa Ginoo mahitungod sa Iyang gahum.
Sa unsa nga paagi ang Ginoo naghulagway sa Iyang gahum niini nga bersikulo? (Human sa tubag sa mga estudyante, isulat ang mosunod nga doktrina diha sa pisara: Ang Ginoo aduna sa tanang gahum.)
Mahimo nimong itudlo nga tungod sa panan-awon ni William W. Phelps sa tiglaglag diha sa mga tubig, ang pipila nagtuo nga si Satanas adunay gahum ibabaw sa mga tubig. Hinoon, ang Doktrina ug mga Pakigsaad 61:1 nanghimatuod nga ang Ginoo aduna sa tanang gahum—lakip ang gahum ibabaw sa mga tubig.
Dapita ang usa ka estudyante sa pagbasa og kusog sa Doktrina ug mga Pakigsaad 61:6, 10. Hangyoa ang klase sa pagsunod ug sa pagpangita sa mga pulong nga tingali nagtabang sa mga elder sa pagdayeg pa sa gahum sa Ginoo. Hangyoa ang mga estudyante sa pag-report unsa ang ilang nakit-an, ug dayon idugang ngadto sa pamahayag diha sa pisara aron kini mabasa ingon sa mosunod: Ang Ginoo aduna sa tanang gahum, ug Siya makahimo sa pagpanalipod kanato.
Unsa nga mga kasinatian kamo aduna nga nagpalig-on sa inyong pagpamatuod sa gahum sa Ginoo ug sa abilidad sa Ginoo sa pagpanalipod kanato gikan sa kadautan?
Mahimo nimong i-summarize ang nahibilin sa Doktrina ug mga Pakigsaad 61 pinaagi sa pagpasabut nga ang Ginoo mihatag pa og mga panudlo aron magiyahan ang pagbalik niini nga mga elder ngadto sa Ohio.
Gidayeg sa Ginoo ang pagkamatinud-anon sa usa ka pundok sa mga elder nga nagbiyahe ngadto sa Independence, Missouri
Isulat sa pisara ang mosunod nga mga pangutana:
Unsang kolor sa sinina ang akong isul-ob karon?
Kinahanglan ba akong mosimba sa Dominggo?
Kinahanglan ba akong moserbisyo og misyon? Kon mao, kanus-a?
Kon ang akong mama, motanyag sa pagluto sa akong paboritong pagkaon, unsa ang kinahanglan akong pilion?
Kinsa ang akong ika-date? Kinahanglan asa mi mangaon sa among date?
Hangyoa ang mga estudyante sa paghunahuna hain niini nga mga pangutana tingali labing mahinungdanon ngadto sa Ginoo.
Ipasabut nga samtang gitudloan sa Ginoo ang mga elder kinsa nagbiyahe gikan sa Missouri ngadto sa Ohio, Siya mitabang kanila sa pagsabut nga ang pipila sa mga desisyon nga ilang gikinahanglan nga buhaton mas importante ngadto Kaniya kay sa uban. Awhaga ang mga estudyante sa pagpangita og mga ideya diha sa Doktrina ug mga Pakigsaad 62 nga makagiya kanila sa paghimo og mga desisyon.
Dapita ang usa ka estudyante sa pagbasa og kusog sa Doktrina ug mga Pakigsaad 62:1–3. Hangyoa ang klase sa pagsunod, nga mangita sa mga pulong nga nagpakita nga ang mga paninguha sa mga elder sa pagsangyaw sa ebanghelyo importante ngadto sa Ginoo.
Unsa nga mga pulong ang inyong nakit-an? Giunsa pagpakita niini nga mga pulong kon unsa ang gibati sa Ginoo mahitungod sa mga paninguha niini nga mga misyonaryo?
Aron matabangan ang mga estudyante sa paghunahuna og mga ehemplo sa mga butang nga importante ngadto sa Ginoo ug sa mga butang nga dili importante, kopyaha ang mosunod nga tsart diha sa pisara o andama kini isip usa ka handout. Ayaw apila ang impormasyon diha sa parentesis…Nag-agad sa mga panginahanglan sa imong mga estudyante, hangyoa sila sa pagbuhat niini nga kalihokan sa tinagsa o uban ang mga pares. O tingali kompletuhon ninyo ang kalihokan isip usa ka klase.
(Nga ang mga elder magmatinud-anon, magpamatuod sa ebanghelyo, ug magtabang sa mga Santos nga mapundok)
(Kon ang mga elder magdungan ba og panaw o sa tinagurha; kon ang mga elder magsakay ba og mga kabayo o mga karwahe)
Human makompleto sa mga estudyante ang tsart, ipangutana ang mosunod:
Unsa nga mga kalainan ang inyong namatikdan tali sa mga butang nga importante ngadto sa Ginoo ug sa mga butang nga dili importante?
Sa unsa nga paagi kini nga sumbanan naggiya kaninyo samtang kamo naghimo og mga desisyon?
Ipasabut nga ang Doktrina ug mga Pakigsaad 62:8 nagtudlo og usa ka baruganan nga makagiya kanato samtang naghimo kita og mga desisyon. Dapita ang mga estudyante sa pagbasa og hilum niini nga bersikulo, nga mangita alang niana nga baruganan. Hangyoa sila sa pag-report kon unsay ilang nakit-an. Mahimo silang mogamit og lahi nga mga pulong , apan kinahanglan nga sila mopahayag sa mosunod nga baruganan: Kon kita maghimo og mga desisyon, kita kinahanglan nga mosalig sa atong kaugalingong paghukom ug sa mga paggiya sa Espiritu. Mahimo nimong dapiton ang mga estudyante sa pagsulat niini nga baruganan sa ilang kaugalingong mga pulong diha sa ilang mga kasulatan.
Ngano kaha nga importante ang pagsalig sa atong kaugalingong paghukom ingon man sa mga paggiya sa Espiritu kon maghimo kita og mga desisyon?
Kanus-a kamo nakahimo og desisyon base sa inyong kaugalingong paghukom ingon man sa paggiya gikan sa Espiritu? Sa unsang paagi kamo napanalanginan sa paghimo sa ingon?
Pagpamatuod sa mga kamatuoran nga inyong nahisgutan dinhi niini nga leksyon. Dapita ang mga estudyante sa pagpamalandong kon unsaon nila sa paglihok diha sa mga kamatuoran nga ilang nakat-unan gikan sa ilang pagtuon sa Doktrina ug mga Pakigsaad 60–62. Mahimo kang modapit og usa o duha ka mga estudyante sa pagpakigbahin kon giunsa nila sa pagplano og lihok ang usa niini nga mga kamatuoran.
Ang mga pulong sa Ginoo diha sa Doktrina ug mga Pakigsaad 61:5–19 wala magdili sa mga Santos sa Ulahing mga Adlaw sa pagbiyahe o paglangoy sa tubig. Sa paghulagway sa tunglo diha sa mga tubig sa katapusang mga adlaw, ang Ginoo tingali nagpasabut ngadto sa mga tudling diha sa Pinadayag diin naghulagway si Juan sa kalaglagan nga mahitabo diha sa mga tubig sa dili pa ang Ikaduhang Pag-anhi ni Jesukristo (tan-awa sa Pinadayag 8:8–11; 16:2–6). Sa Doktrina ug mga Pakigsaad 61, ang Ginoo nag-refer sa piho nga kakuyaw “niini nga mga tubig,” nagpasabut sa Suba sa Missouri (tan-awa sa D&P 61:5, 18). Gipasabut ni Joseph Fielding Smith ang pipila ka mga kadaot nga nahimo sa Suba sa Missouri:
Imahe
President Joseph Fielding Smith
“Kalabut ngadto sa mga tubig sa Missouri-Mississipi, nakita namo kada tuig ang dako nga kadaot diha niini, ug gikan niini. Minilyon ka dolyares hapit kada tuig ang nawala tungod sa pag-awas niining dakong suba sa mga pangpang niini. Daghang mga kinabuhi ang nawala niini nga mga lunop samtang gibanlas niini ang ibabaw sa yuta, ug gani bisan niining daw hilum o kalma nga tubig adunay moabut nga mga unos nga nagdala og kadaot. Sa pagkatinuod ang pulong sa Ginoo nahimo, ug pagahimoon, nga matuman kalabut ngadto sa mga tubig” (Church History and Modern Revelation, 2 bols. [1953], 1:224).
Samtang si Joseph Smith ug ang uban mibiyahe sa silangan ngadto sa Ohio, nasugatan nila ang upat ka elder nga nagbiyahe sa kasadpan ngadto sa Independence, Missouri. Usa niini ka mga elder, si John Murdock, nasakit samtang nagsangyaw sa ebanghelyo atol sa panaw gikan sa Ohio. Si John ug ang iyang kauban, si Hyrum Smith, nag-abang sa Chariton, Missouri, naghulat nga maayo ang sakit ni John. Didto ilang nahimamat ang duha ka elder, si David Whitmer ug Harvey Whitlock, kinsa matinud-anon usab sa sugo sa pagsangyaw sa ebanghelyo padulong ngadto sa Missouri. Human kining upat ka elder nakahimamat ni Joseph Smith didto sa Chariton ug nakadawat sa mga panudlo sa Ginoo nga gi-rekord diha sa Doktrina ug mga Pakigsaad 62, giipon nila ang ilang kwarta ug mipalit og kabayo, nga mihimo kang John Murdock sa pagbiyahe nga may mas kasayon ngadto sa Zion.