Leksyon 138

Doktrina ug mga Pakigsaad 131

Pasiuna

Ang Doktrina ug mga Pakigsaad 131 naglangkob sa usa ka hinugpong nga mga baruganan nga gitudlo ni Propeta Joseph Smith samtang didto sa Ramus, Illinois, niadtong Mayo 16–17, 1843. Gitudlo niya ang mahitungod sa bag-o ug walay katapusan nga pakigsaad sa kaminyoon ug sa saad nga kinabuhing dayon alang sa mga matinud-anon. Gitudlo usab niya nga tanan nga espiritu mga butang.

Mga Sugyot alang sa Pagtudlo

Doktrina ug mga Pakigsaad 131:1–4

Nagtudlo si Joseph Smith mahitungod sa kaimportante sa pakigsaad sa walay katapusan nga kaminyoon

Ipakita sa mga estudyante ang usa ka simple nga kandado nga dunay kombinasyon. Mahimo nimong ikonsiderar ang paggamit niini aron masiguro ang tabon sa kahon. Kon ikaw walay kandado, pagdrowing og usa diha sa pisara. Dapita ang usa ka lalaki nga estudyante ug usa ka babaye nga estudyante nga moduol sa atubangan sa klase. Hatagi og papel ang usa ka estudyante nga ang unang bahin sa kombinasyon nakasulat diha niini. Hatagi og papel ang laing estudyante nga ang nahibilin sa kombinasyon nakasulat diha niini. Kon nakadala ka og kandado ngadto sa klase, hangyoa ang usa sa mga estudyante sa pag-abli sa kandado nga walay tabang sa laing estudyante. Tuguti sila nga magtinabangay sa pag-abli sa kandado.

Isulat ang mosunod nga pangutana diha sa pisara (o ipasulat kini diha sa papel sa sulod sa kahon nga bag-o lang gitangtangan sa kandado sa duha ka estudyante): Kon ang kandado nagrepresentar sa pagsulod sa kinatas-an nga ang-ang sa celestial nga gingharian, unsa may girepresentar sa kombinasyon? Hangyoa ang mga estudyante sa pagpangita sa tubag niini nga pangutana samtang magtuon sila sa Doktrina ug mga Pakigsaad 131.

Ipasabut nga niadtong Mayo 16, 1843, mibiyahe si Joseph Smith ngadto sa Ramus, Illinois. Samtang nag-istar sa panimalay nila ni Benjamin ug Melissa Johnson, iyang gipahigayon ang ilang sealing isip bana ug asawa alang sa kahangturan. Gitudloan usab niya sila kon sa unsang paagi nga ang mahangturong kaminyoon may kalabutan ngadto sa celestial nga gingharian. Kini nga mga kamatuoran narekord diha sa Doktrina ug mga Pakigsaad 131:1–4. (Tan-awa sa History of the Church, 5:391–92.)

Dapita ang usa ka estudyante sa pagbasa og kusog sa Doktrina ug mga Pakigsaad 131:1. Hangyoa ang klase sa pagsunod, nga mangita sa kamatuoran nga gipadayag sa Propeta mahitungod sa celestial nga gingharian.

• Unsay gipadayag ni Joseph Smith mahitungod sa celestial nga gingharian?

Ipasabut nga kanunay natong gipasabut ang pagdawat sa labing taas nga ang-ang sa himaya sa sulod sa celestial nga gingharian isip kahimayaan o kinabuhing dayon. Isulat ang pulong nga kahimayaan diha sa pisara. Ipasabut nga kadtong makaangkon niining ang-ang sa celestial nga himaya magpuyo sama sa pagpuyo sa atong Langitnong Amahan.

Dapita ang usa ka estudyante sa pagbasa sa Doktrina ug mga Pakigsaad 131:2–4 nga kusog, ug hangyoa ang klase sa pagpangita kon unsay kinahanglan gayud natong buhaton aron makaangkon sa labing taas nga ang-ang sa celestial nga gingharian.

• Unsa ang kinahanglan natong buhaton aron makaangkon sa labing taas nga ang-ang sa celestial nga gingharian? (Ang mga estudyante kinahanglang mahibalo sa mosunod nga doktrina: Aron makaangkon sa labing taas nga ang-ang sa celestial nga gingharian, kinahanglan gayud kitang mosulod sa bag-o ug walay katapusan nga pakigsaad sa kaminyoon.)

• Unsa kaha ang gipasabut diha sa bersikulo 4 nga kon dili kita ma-sealed diha sa templo pinaagi sa tukma nga awtoridad, kita “dili makabaton og mga anak”? (Aron matabangan ang mga estudyante nga makasabut niining bersikulo, mahimong kinahanglan nimong ipasabut nga ang pagbaton og mga anak nagpasabut sa oportunidad nga magpadayon nga dunay mga anak didto sa celestial nga gingharian.)

Aron matabangan ang mga estudyante nga makasabut sa mga pulong nga “bag-o ug walay katapusan nga pakigsaad sa kaminyoon,” ipasabut nga ang pulong nga bag-o niini nga konteksto nagpasabut nga kining pakigsaad bag-ohay lang nga gipahiuli sa atong dispensasyon. Ang termino nga walay katapusan nagpasabut nga kining gikinahanglan nga pakigsaad molungtad sa kahangturan. Pahinumdumi ang mga estudyante nga mosulod kita ngadto niining pakigsaad sa celestial nga kaminyoon diha sa templo.)

• Sa unsang mga paagi kaha nga ang celestial nga kaminyoon tali sa usa ka lalaki ug usa ka babaye makaandam kanila alang sa kahimayaan?

Dapita ang usa ka estudyante sa pagbasa og kusog sa mosunod nga pamahayag ni Elder David A. Bednar sa Korum sa Napulog Duha ka mga Apostoles. Hangyoa ang klase sa pagpaminaw kon sa unsang paagi nga ang kaminyoon makatabang kanato nga maandam alang sa kinabuhing dayon.

“Duha ka mahangturong doktrinal nga mga rason ang nagtabang kanato pagsabut ngano nga ang mahangturong kaminyoon importante sa plano sa Amahan.

“Rason 1: Ang mga kinaiya sa mga espiritu sa lalaki ug babaye nagkompleto ug naghingpit sa usag usa, ug, busa ang mga lalaki ug babaye gituyo nga mouswag og dungan ngadto sa kahimayaan. …

“Sa balaanong tuyo, lalaki ug babaye gituyo nga mouswag og dungan ngadto sa pagkahingpit ug kahingpitan sa himaya. Tungod sa ilang kalainan sa mga taras ug mga kapasidad ang mga lalaki ug babaye tagsa-tagsa nagdala ngadto sa relasyon sa kaminyoon og mga talagsaong panan-aw ug mga kasinatian. Ang lalaki ug ang babaye nagtampo og lahi apan parehas ngadto sa pagkausa ug panaghiusa nga dili mahimo sa laing paagi. Ang lalaki mokompleto ug mohingpit sa babaye ug ang babaye mokompleto ug mohingpit sa lalaki samtang sila nagkat-on ug naglig-on ug nagpanalangin sa usag usa. …

“Rason 2: Sa balaang plano, ang lalaki ug ang babaye gikinahanglan sa pagdala sa mga bata nganhi sa mortalidad ug sa paghatag sa pinakamaayo nga kahimtang sa pagpadako ug pag-amuma sa mga bata” (“Ang Kaminyoon Mahinungdanon sa Iyang Mahangturong Plano,” Liahona, Hunyo 2006, 51–52; ang pinabaga nga mga pulong ug mga italic gitangtang).

• Sumala ni Elder Bednar, nganong ang kaminyoon tali sa usa ka lalaki ug usa ka babaye gikinahanglan man alang sa atong kahimayaan?

• Sa unsang paagi nga ang pagsabut sa doktrina nga ang celestial nga kaminyoon mahinungdanon alang sa kahimayaan makaapeko sa unsay inyong gipangita sa umaabut nga kapikas?

• Nganong importante man sa inyong pangidaron sa paghimo niini nga usa ka prayoridad ang pag-andam nga maminyo sa kahangturan diha sa templo?

Mahimo nimong ipasabut nga ang mga panalangin sa kahimayaan maanaa niadtong walay oportunidad alang sa usa ka celestial nga kaminyoon dinhi niini nga kinabuhi. Dapita ang usa ka estudyante sa pagbasa og kusog sa mosunod nga pamahayag gikan sa Matinud-anon sa Tinuhoan:

“Pipila ka mga miyembro sa Simbahan ang nagpabiling wala maminyo bisan tuod nga dili nila sala, bisan kon ganahan sila nga magminyo. Kon ikaw anaa niini nga sitwasyon, magmasaligon nga ‘ang matag usa ka butang ang Dios nagabuhat og maayo uban kanila nga nahigugma kaniya’ (Mga Taga-Roma 8:28). Samtang magpabilin ikaw nga takus, ikaw sa umaabut, niining kinabuhia o sa sunod, pagahatagan sa tanang mga panalangin sa usa ka mahangturong relasyon sa pamilya” (Matinud-anon sa Tinuhoan: Usa ka Pakisayran sa Ebanghelyo [2004], 89).

• Sa unsang paagi nga ang pagtuman sa inyong mga pakigsaad sa bunyag karon makatabang kaninyo nga makadawat sa mga panalangin sa templo? Unsa man ang mahimo karon sa mga batan-ong lalaki ug mga batan-ong babaye aron mahimong usa ka prayoridad ang celestial nga kaminyoon diha sa templo? (Mahimo nimong ilista ang mga tubag sa mga estudyante diha sa pisara.)

Awhaga ang mga estudyante sa paghimo niini nga usa ka prayoridad ang maminyo alang sa kahangturan diha sa templo. Ipamatuod ang bahin sa mga panalangin nga moabut isip resulta sa celestial nga kaminyoon.

Doktrina ug mga Pakigsaad 131:5–6

Gipasabut sa Propeta ang “labing kasiguroan nga pulong sa panagna”

Ipakita ngadto sa mga estudyante ang usa ka sinulat nga garantiya o pasalig.

• Unsa ang mga benepisyo sa pagbaton og garantiya?

• Nganong ang usa ka garantiya gikan sa Langitnong Amahan hilabihan ka bililhon?

Ipasabut nga didto sa Ramus, Illinois, sa buntag niadtong Mayo 17, 1843, mihatag si Joseph Smith og usa ka wali bahin sa mga pulong nga makita diha sa 2 Pedro 1:19 nga nagrepresentar og usa ka garantiya gikan sa Dios (tan-awa sa History of the Church, 5:392). Dapita ang mga estudyante sa pagbasa og hilum sa 2 Pedro 1:19 ug sa pagpangita sa mga pulong. (“Labi pa gayud diay nga nahimatud-an ang pulong sa propesiya [Labing kasiguroan nga pulong sa panagna]”)

Dapita ang mga estudyante sa pagbasa sa Doktrina ug mga Pakigsaad 131:5 ug sa pagpangita kon unsay gipasabut sa mga pulong nga “labing kasiguroan nga pulong sa panagna.” Hangyoa sila sa pagreport kon unsay ilang makit-an.

• Sumala sa bersikulo 5, unsa may gigarantiya sa Langitnong Amahan ngadto sa usa ka tawo pinaagi sa labing kasiguroan nga pulong sa panagna? (Kinabuhing dayon.)

• Unsa kaha ang bation kon makadawat sa maong garantiya? Ngano man?

Pahinumdom: Ayaw pangagpas mahitungod sa buhi nga mga indibidwal kinsa mahimong nakadawat sa “labing kasiguroan nga pulong sa panagna.” Hinoon, ang mga kasulatan naghisgot bahin sa pipila ka indibidwal kinsa nakadawat niini nga kasiguroan sa kinabuhing dayon samtang dinhi pa sa mortalidad. Pananglitan, ang Ginoo mipahayag niining kasiguroan ngadto ni Joseph Smith (tan-awa sa Doktrina ug mga Pakigsaad 132:49) ug ngadto ni Alma (tan-awa sa Mosiah 26:20).

Dapita ang usa ka estudyante sa pagbasa og kusog sa Doktrina ug mga Pakigsaad 131:6, ug hangyoa ang klase sa pagpangita og butang nga makapugong sa usa ka tawo nga makadawat og kinabuhing dayon.

• Unsay gisulti ni Joseph Smith nga makapalisud alang kanato nga maluwas, o makadawat og kinabuhing dayon? (Ang mga estudyante mahimong mogamit og lain-laing mga pulong, apan siguroa nga ilang masabtan nga dili kita maluwas diha sa pagkawalay alamag. Mahimo nimong isulat kining kamatuoran diha sa pisara.)

Dapita ang usa ka estudyante sa pagbasa sa mosunod nga pagpasabut niini nga kamatuoran nga gihatag ni Presidente Marion G. Romney sa Unang Kapangulohan. Hangyoa ang mga estudyante sa pagpaminaw alang sa matang sa kahibalo nga atong gikinahanglan aron makadawat og kinabuhing dayon.

“Ang kahibalo bahin ‘sa bugtong tinuod nga Dios, ug kang Jesukristo’ (Juan 17:3) mao ang labing importante nga kahibalo dinhi sa universe; kini ang kahibalo nga kon wala kini miingon si Propeta Joseph Smith nga walay tawo nga maluwas. Ang kakulang niini mao ang pagkawalay alamag nga gipasabut diha sa pagpadayag diin kini gisulat: ‘Malisud alang sa usa ka tawo nga maluwas diha sa pagkawalay alamag.’ (D&P 131:6)” “Except a Man Be Born Again,” Ensign, Nob. 1981, 14).

• Unsa nga matang sa kahibalo ang kinahanglan gayud natong mabatunan aron makabaton og kinabuhing dayon? Ngano kaha nga kining matang sa kahibalo mahinungdanon man alang sa kaluwasan?

• Unsa may atong mahimo aron molambo ang atong kahibalo bahin sa Langitnong Amahan ug ni Jesukristo?

Doktrina ug mga Pakigsaad 131:7–8

Nagtudlo si Joseph Smith nga ang tanan nga espiritu mga butang

Dapita ang usa ka estudyante sa pagbasa og kusog sa Doktrina ug mga Pakigsaad 131:7–8. Hangyoa ang klase sa pagsunod, nga mangita kon unsay naglangkob sa espiritu.

• Unsay inyong nakat-unan gikan niining mga bersikulo? (Ang tanang nilalang naglangkob og mga butang, apan ang mga butang sa espiritu “labaw nga dalisay o putli.”)

Ipamatuod ang bahin sa mga baruganan nga nahisgutan diha sa Doktrina ug mga Pakigsaad 131, ug awhaga ang mga estudyante sa pagpadayon sa pagbaton og kahibalo bahin sa Langitnong Amahan ug ni Jesukristo aron mahimo sila nga mas mahisama Kanila.

Komentaryo ug Background nga Impormasyon

Doktrina ug mga Pakigsaad 131:1–4. “Ang bag-o ug walay katapusan nga pakigsaad sa kaminyoon”

Si Elder Bruce R. McConkie sa Korum sa Napulog Duha ka mga Apostoles mipasabut sa kalabutan tali sa celestial nga kaminyoon ug pagsiguro sa pagkatinawag ug pagkapinili:

“Sa samang paagi nga ang bunyag moabli sa pultahan ug makapasugod sa mahinulsulon nga mga tawo sa pagbiyahe diha sa dalan nga mopaingon sa kinabuhiing dayon, mao usab ang celestial nga kaminyoon. Kining balaan nga han-ay sa matrimonya moabli usab sa usa ka pultahan paingon sa celestial nga kahiimayaan. …

“Sama sa nasayran sa tanang naminyo diha sa templo, kadtong gihiusa gayud—pinaagi sa gahum ug awtoridad sa balaang priesthood ug pinaagi sa katungod sa gahum sa sealing nga gipahiuli ni Elijah—gisaaran og panulundon sa himaya, dungog, gahum, ug kamandoan diha sa gingharian sa Dios. Apan, sama sa bunyag, ang tanang mga saad dunay kondisyon; piho ug klaro kining gipamahayag isip kondisyon sa nagsunod nga pagkamatinud-anon sa na-sealed nga managtiayon. Kon motuman sila sa mga sugo human sa celestial nga kaminyoon, ang ilang panaghiusa magpadayon sa umaabut nga kinabuhi; kon dili sila magsubay sa nalambigit nga mga sumbanan sa personal nga pagkamatarung, ang ilang kaminyoon dili balido kon sila mamatay ug mobalik sila ngadto sa bulag ug dili minyo nga kahimtang. …

“… Tungod kay ang pagsiguro sa pagkatinawag ug pagkapinili mao man ang paagi sa pagdawat og garantiya sa kinabuhing dayon—kini ang labing natural nga butang dinhi sa kalibutan alang sa Ginoo sa pagpadayag sa parehong doktrina sa mahangturong kaminyoon ug sa doktrina sa pagka-sealed ngadto sa kinabuhing dayon (buot ipasabut sa pagsiguro sa pagkatinawag ug pagkapinili) sa samang pagpadayag. Sa epektibong paagi ang usa direktang resulta sa lain. Ang usa dunay kondisyon nga saad sa kinabuhing dayon; ang lain walay kondisyon nga saad. …

“… Kinahanglan gayud kitang magpakabuhi sa ingon aron makadawat sa garantiya kon asa kita gitawag, ug ang mga kasiguroan nga may kalabutan sa pagpili kanato, ug gihatag base sa kondisyon lamang sa celestial nga kaminyoon. Sama sa bunyag, ingon man usab sa celestial nga kaminyoon; human sa mahimayaong saad sa kinabuhing dayon nga kabahin sa matag usa niining mga pakigsaad, kinahanglan gayud kitang magpadayon diha sa pagkamatarung hangtud masiguro ang atong pagkatinawag ug pagkapinili; ug kining taas nga nakab-ot usa ka direktang resulta ug mao ang kinatas-ang ganti sa celestial nga kaminyoon” (Doctrinal New Testament Commentary, 3 vols. [1965–1973], 3:331, 332, 333).

Doktrina ug mga Pakigsaad 131:5. “Labing kasiguroan nga pulong sa panagna”

“Ang labing kasiguroan nga pulong sa panagna nagkahulugan nga ang tawo nasayud nga siya nabugkos ngadto sa kinabuhi nga dayon, pinaagi sa pagpadayag ug sa espiritu sa panagna, pinaagi sa gahum sa balaan nga Pagkapari” (D&P 131:5). Kini nga panalangin gipasabut usab nga “masiguro ang pagkatinawag ug pagkapinili” (2 Pedro 1:10).

“Ang matarung nga mga sumusunod malakip sa mga pinili kinsa nakabaton sa kasiguroan sa kahimayaan. Kini nga pagtawag ug pagpili magsugod sa paghinulsol ug bunyag. Makompleto kini kon sila ‘mopadayon sa unahan, magbusog sa pulong ni Kristo, ug molahutay hangtud sa katapusan’ (2 Ne. 31:19–20). Ang mga kasulatan mitawag niini nga proseso nga pagsiguro sa atong pagkatinawag ug pagkapinili (2 Ped. 1:4–11; D&P 131:5–6)” (Giya ngadto sa mga Kasulatan “Balaan nga Tawag ug Pinili,” scriptures.lds.org).

Si Elder Bruce R. McConkie sa Korum sa Napulog Duha ka mga Apostoles mipasabut:

“Kadtong mga miyembro sa Simbahan kinsa hingpit nga mipahinungod sa ilang kaugalingon ngadto sa pagkamatarung, nagpakabuhi pinaagi sa matag pulong nga mogula gikan sa ba-ba sa Dios, nagsiguro sa ilang pagkatinawag ug pagkapinili. Mao kana, sila nagdawat sa labing kasiguroan nga pulong sa panagna, nga nagpasabut nga ang Ginoo nagsilyo sa ilang kahimayaan nganha kanila samtang ania pa sila niining kinabuhi. Gi-summarize ni Pedro ang dalan sa pagkamatarung nga kinahanglang paninguhaon sa mga santos aron masiguro ang ilang pagkatinawag ug pagkapinili ug dayon (nagtudlo sa iyang kasinatian didto sa Bukid sa Transpigurasyon uban ni Santiago ug ni Juan) nag-ingon nga ang kadtong tulo nakadawat niining labing kasiguroan nga pulong sa panagna. (2 Ped. 1.)

“Si Joseph Smith nagtudlo: ‘Human ang usa ka tawo makabaton og hugot nga pagtuo kang Kristo, naghinulsol sa iyang mga sala, ug nabunyagan alang sa kapasayloan sa iyang mga sala ug nakadawat sa Espiritu Santo, (pinaagi sa pagpatong sa mga kamot), nga mao ang unang Maghuhupay, unya magpadayon sa kamapainubsanon sa iyang kaugalingon atubangan sa Dios, gigutom ug giuhaw sa pagkamatarung, ug magsunod sa matag pulong sa Dios, ug ang Ginoo sa dili madugay moingon ngadto kaniya, Anak, ikaw pagahimayaon. Kon hingpit nang nasulayan sa Ginoo ang iyang katakus, ug nakita nga ang tawo buot gayud nga moalagad Kaniya nga walay pagsapayan sa nalakip nga mga hagit, makita dayon sa tawo nga nasiguro na ang iyang pagkatinawag ug pagkapinili, iya na dayong kahigayunan nga madawat ang laing Maghuhupay.’ Ang pagdawat sa laing Maghuhupay mao ang pagpakita ni Kristo ngadto kaniya ug makita ang mga panan-awon sa kahangturan. [Teachings of the Prophet Joseph Smith, sel. Joseph Fielding Smith [1976], 149–51; mga italic gidugang].

“Sa ingon, sama usab sa gisulti sa Propeta, ‘Ang labing kasiguroan nga pulong sa panagna nagkahulugan nga ang tawo nasayud nga siya nabugkos ngadto sa kinabuhi nga dayon, pinaagi sa pagpadayag ug sa espiritu sa panagna, pinaagi sa gahum sa balaan nga Pagkapari.’ (D. & P. 131:5.) Kadtong gikahimut-an sa Ginoo gisilyo batok sa tanang matang sa sala ug panamastamas gawas sa panamastamas batok sa Espiritu Santo ug sa pagpaagas og dugo sa walay sala. Nga mao, ang ilang kahimayaan gipaniguro; ang ilang pagkatinawag ug pagkapinili gisiguro, tungod kay mituman sila sa kahingpitan sa mga balaod sa Dios ug nakabuntog sa kalibutan. …

“… Ang Propeta, mismo, napahimutang diha kaniya kini nga silyo. Nga mao, nasayud siya ‘pinaagi sa pagpadayag ug sa espiritu sa panagna, pinaagi sa gahum sa Balaan nga Priesthood,’ nga iyang makab-ot ang pagkadios sa umaabut nga kalibutan. Ngadto kaniya miingon ang Dios: ‘Ako mao ang Ginoo nga inyong Dios, ug mag-uban kanimo gani ngadto sa kinatumyan sa kalibutan, ug hangtud sa tanan nga kahangturan; kay sa pagkatinuod Ako mosilyo diha kanimo sa imong kahimayaan, ug moandam og usa ka trono alang kanimo sa gingharian sa akong Amahan, uban ni Abraham nga imong amahan.’ (D. & P. 132:49 mga italic gidugang.)

“Kinahanglan nga masabtan gayud kini nga kining dagkong mga panalangin dili kabahin sa celestial nga kaminyoon. ‘Ang mga panalangin nga pormal nga gitugyan ngadto sa mga managtiayon nga may kalabutan sa celestial nga kaminyoon dunay kondisyon sa nagsunod nga pagkamatinud-anon sa nalambigit nga managtiayon.’ (Doctrines of Salvation, vol. 2, pp. 46–47.)” (Mormon Doctrine, 2nd ed. [1966], 109–10).

Doktrina ug mga Pakigsaad 131:6. “Malisud alang sa usa ka tawo nga maluwas diha sa pagkawalay alamag.”

Niadtong Abril 7, 1844, mihatag si Propeta Joseph Smith og usa ka wali atol sa lubong sa iyang higala nga si King Follett. Diha sa wali, iyang gitudlo ang mahitungod sa bili sa kahibalo:

“Ang kahibalo makaluwas sa tawo; ug sa kalibutan sa mga espiritu walay tawo nga mahimaya gawas kon pinaagi sa kahibalo. Hangtud nga ang tawo dili mopatalinghug sa mga sugo, magpabilin gayud siya nga walay kaluwasan. Kon ang usa ka tawo dunay kahibalo, mahimo siyang maluwas” (“The King Follett Sermon,” Ensign, Mayo 1971, 15).