Niadtong Hulyo 8, 1838, sa Far West, Missouri, si Propeta Joseph Smith nakadawat og upat ka pagpadayag nga narekord diha sa Doktrina ug mga Pakigsaad 117–120. Sa pagpadayag nga narekord diha sa Doktrina ug mga Pakigsaad 117, gimanduan sa Ginoo sila si Newel K. Whitney ug William Marks nga husayon dayon ang ilang negosyo [patigayon] didto sa Kirtland ug moapil sa matinud-anong mga Santos nga nagpundok sa Far West. Miingon usab ang Ginoo nga si Oliver Granger kinahanglang moserbisyo isip representante sa Unang Kapangulohan sa pagbaligya sa mga kabtangan sa Simbahan ug sa paghusay sa mga kalihokan sa negosyo ni Joseph Smith. Sa pagpadayag nga narekord diha sa Doktrina ug mga Pakigsaad 118, mitawag ang Ginoo og bag-ong mga Apostoles aron mohulip sa mga dapit niadtong mibiya sa kamatuoran ug mitawag sa tanang sakop sa Korum sa Napulog Duha sa pagserbisyo og mga misyon sa Great Britain.
Gimanduan sa Ginoo sila si William Marks ug Newel K. Whitney sa paghusay dayon sa ilang negosyo ug mobiya sa Kirtland
Hangyoa ang mga estudyante sa paglista sa mga rason nganong ang usa ka tawo mahimong magduha-duha sa pagsunod sa usa ka sugo gikan sa Ginoo. Isulat ang ilang mga tubag diha sa pisara.
Dapita ang mga estudyante sa pagbasa sa daklit sa Doktrina ug mga Pakigsaad 117:1 ug ipatino kon kang kinsa gihatag kini nga pagpadayag. Ipasabut nga si Newel K. Whitney mao ang bishop didto sa Kirtland. Malampuson siya nga tag-iya og negosyo, ug iyang gipahinungod ang dakong bahin sa iyang kabtangan ngadto sa Simbahan. Si William Marks gitawag nga moserbisyo isip tinugyanan [agent] ni Bishop Whitney niadtong Septyembre 17, 1837. Nanag-iya siya og negosyo nga magbaligya og libro.
Dapita ang usa ka estudyante sa pagbasa og kusog sa Doktrina ug mga Pakigsaad 117:1–3. Hangyoa ang klase sa pagsunod, nga mangita kon unsay gipabuhat sa Ginoo sa Iyang mga tawo. Mahimo nimong ipasabut nga ang pulong nga anaa nangahulugan og mosugod.
Unsa ang gimando sa Ginoo nga buhaton nila ni Newel K. Whitney ug William Marks? (Iya silang gimanduan sa paghusay dayon sa ilang negosyo ug mobiya sa Kirtland. Kinahanglan nilang buhaton kini nga pagbiyahe sa dili pa mopadala ang Ginoo og yelo [snow] ngadto sa dapit. Sa ato pa, kinahanglan silang mobiya sulod sa mga upat ka bulan.)
Pahinumdumi ang mga estudyante nga niadtong Abril 26, 1838, gimanduan sa Ginoo ang mga Santos nga magpundok ngadto sa Far West, Missouri, ug sa ubang mga dapit (tan-awa sa D&P 115:17–18). Niadtong Hulyo 6, 1838, usa ka grupo nga nailhan isip Kirtland Camp, nga gilangkuban og sobra sa 500 ka mga Santos gikan sa dapit sa Kirtland, mibiya paingon sa Missouri (tan-awa sa Church History in the Fulness of Times Student Manual, 2nd ed. [manwal sa Church Educational System, 2003], 178–79).
Ipasabut nga samtang magbasa kita sa mga pulong sa Ginoo diha sa Doktrina ug mga Pakigsaad 117:4–5, atong makita nga sila si Bishop Whitney ug William Marks nabalaka pag-ayo bahin sa mga kabtangan sa Simbahan didto sa Kirtland. Tungod sa ilang mga calling isip bishop ug tinugyanan sa bishop, mga tinugyanan sila niining mga kabtangan. Dapita ang usa ka estudyante sa pagbasa og kusog sa bersikulo 4, ug hangyoa ang klase sa pagpaminaw sa pangutana sa Ginoo diha niini nga bersikulo.
Isulat ang mosunod diha sa pisara: Unsa ang kapuslanan sa kabtangan ngari kanako?
Unsa kaha ang gipasabut niini?
Aron matabangan ang mga estudyante nga makasabut sa kahulugan sa pangutana sa Ginoo diha sa bersikulo 4, dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 117:5–8. Hangyoa ang klase sa pagpangita sa mga rason ngano nga ang Ginoo moingon nga “Unsa ang kapuslanan sa kabtangan ngari kanako?” (Mahimo nimong ipasabut nga ang mga pulong nga “mga patag sa Olaha Shinehah” nagpasabut sa dapit sa palibut sa Adan-ondi-Ahman didto sa Missouri.)
Unsa kaha ang gipasabut sa “maibug … sa gamay nga butang, ug ibaliwala ang labaw nga mahinungdanon nga mga butang”? (D&P 117:8). Sa unsang paagi nga ang mga kabtangan didto sa Kirtland usa ka “gamay nga butang” kon itandi sa mga panalangin nga mahatag sa Ginoo ngadto nilang Bishop Whitney ug Presidente Marks? (Human mahisguti sa mga estudyante kining mga pangutana, isulat ang mosunod nga baruganan diha sa pisara: Ang pagkaibug sa temporal nga mga butang mao ang makapahimo kanato sa pagbaliwala sa mahinungdanon nga mga butang.)
Hangyoa ang mga estudyante sa pagpamalandong kon unsaon nila paghatag og dugang nga pagtagad sa mga butang nga labing importante sa ilang kinabuhi.
I-summarize ang Doktrina ug mga Pakigsaad 117:10 pinaagi sa pagpasabut nga gitawag sa Ginoo si William Marks nga mopadayon sa pagserbisyo isip lider sa Simbahan sa dihang miabut siya sa Far West. Miingon usab ang Ginoo nga kon si Presidente Marks “sa diyutay kasaligan diay,” sa katapusan siya “pagapiyalan [sa daghan]” nga mga butang (tan-awa usab sa Mateo 25:23).
Dapita ang usa ka estudyante sa pagbasa og kusog sa Doktrina ug mga Pakigsaad 117:11, ug hangyoa ang klase sa pagpangita sa pagbadlong nga gihatag sa Ginoo ngadto ni Newel K. Whitney. Human mabasa sa estudyante kini nga bersikulo, ipasabut nga ang mga Nicolaitane usa ka karaang relihiyusong sekta. Miingon sila nga mga Kristiyano sila, apan mipahilayo sila sa mga baruganan sa ebanghelyo aron mosunod sa kalibutanong mga binuhatan (tan-awa sa Doctrine and Covenants Student Manual [manwal sa Church Educational System, 2001], 290).
Kon nakahukom pa si Newel K. Whitney nga mag-focus sa kabtangan didto sa Kirtland imbis nga makigpundok uban sa mga Santos, sa unsa kaha nga paagi nga ang iyang mga aksyon mahimong susama sa mga aksyon sa mga Nicolaitane?
Ipasabut nga tungod sa ilang nalangay nga pagbiya gikan sa Kirtland ug sa mga pagpanggukod didto sa Missouri, sila si William Marks ug Newel K. Whitney wala makahimo sa pakigpundok uban sa mga Santos didto sa Far West. Hinoon, gisunod nila ang tambag sa Ginoo ug nagpabiling matinud-anon, ug sa wala madugay nakigpundok sila uban sa mga Santos didto sa Nauvoo, Illinois, diin si William Marks miserbisyo isip stake president ug si Newel K. Whitney miserbisyo isip bishop.
Gisugo sa Ginoo si Oliver Granger sa pagrepresentar sa Unang Kapangulohan sa mga pakigsabut bahin sa negosyo didto sa Kirtland
Dapita ang mga estudyante nga ilista diha sa pisara ang nagkalain-laing mga calling o mga buluhaton sa Simbahan nga mahimo nilang madawat.
Ipasabut nga gimanduan sa Ginoo ang usa ka tawo nga ginganlan og Oliver Granger nga mobiya sa Far West ug mobalik ngadto sa Kirtland nga “makugihon nga makigbisog alang sa katubsanan sa Unang Kapangulohan sa akong Simbahan” (D&P 117:13). Kini nga buluhaton naglakip sa pagbaligya sa mga kabtangan sa Simbahan ug sa paghusay sa mga kalihokan sa negosyo ni Joseph Smith. Nagkinahanglan kini kang Oliver Granger, kinsa hapit na mabuta, nga mohimo og mga sakripisyo. Dapita ang mga estudyante sa pagbasa og hilum sa Doktrina ug mga Pakigsaad 117:12–15, nga mangita sa mga panalangin nga giingon sa Ginoo nga madawat ni Oliver Granger sa pagtuman niya niini nga buluhaton.
Unsa nga mga panalangin ang madawat ni Oliver Granger?
Unsay gibati sa Ginoo mahitungod sa mga sakripisyo nga buhaton ni Oliver Granger? (Mahimong kinahanglan nimong ipasabut nga ang pamahayag nga “ang iyang pagsakripisyo mahimo nga labaw pa nga sagrado ngari kanako kay sa iyang paglambo” nagpasabut nga mas nagpakabana ang Ginoo mahitungod sa sakripisyo ni Oliver kay sa kwarta nga mahimong maangkon ni Oliver sa pagtuman niya sa iyang buluhaton. Isulat ang mosunod nga baruganan diha sa pisara: Ang mga sakripisyo nga atong gihimo diha sa pagserbisyo sa Ginoo sagrado ngadto Kaniya.)
I-refer ngadto sa mga calling ug mga buluhaton nga imong gisulat diha sa pisara. Pangutan-a ang mga estudyante kon unsa kaha nga mga sakripisyo ang kinahanglanon niadtong mga calling ug mga buluhaton.
Nganong importante man ang pagbuhat sa tanan kutob sa atong mahimo aron matuman ang usa ka buluhaton o calling?
Ipasabut nga si Oliver Granger namatay didto sa Kirtland niadtong Agosto 25, 1841. Nianang panahona, nagtrabaho gihapon siya isip representante sa Unang Kapangulohan diha sa ilang mga kalihokan sa negosyo. Bisan tuod nga wala siya hingpit nga nagmalampuson sa paghusay sa mga kalihokan sa negosyo sa Simbahan, nagtrabaho siya aron mapreserbar ang integridad ug maayong pangalan sa Simbahan. Nagmatinud-anon siya sa Ginoo ug kang Propeta Joseph Smith.
Dapita ang usa ka estudyante sa pagbasa og kusog sa mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:
Imahe
President Boyd K. Packer
“Unsa man diay ang nabuhat ni Oliver Granger nga ang iyang ngalan kinahanglan man nga pagahinumduman sa kasagrado niini? Wala man gyud kaayo, sa tinuod lang. Dili sa kon unsay iyang nabuhat kondili kon unsa siya. …
“Ang Ginoo wala magpaabut kang Oliver nga mahimong perpeko, tingali dili gani aron molampus. …
“Dili kita makapaabut kanunay nga molampus, pero kinahanglan paningkamutan nato kutob sa atong mahimo” (“Sa Usa sa Labing Ubos Niini,”Liahona, Nob. 2004, 86).
Ngano kaha nga ang atong mga sakripisyo sagrado man ngadto sa Ginoo, bisan kon gibati nato nga wala hingpit nga nagmalampuson sa atong mga paningkamot?
Nagtudlo ang Ginoo og bag-ong mga Apostoles ug mitawag sa tanang mga Apostoles nga moserbisyo og misyon
Ipasabut nga niadtong Hulyo 8, 1838, mitawag ang Ginoo og upat ka bag-ong mga Apostoles aron mopuli nila ni Luke Johnson, Lyman E. Johnson, William E. McLellin, ug John F. Boynton, kinsa miapostasiya. Dapita ang mga estudyante sa pagbasa og hilum sa Doktrina ug mga Pakigsaad 118:3, nga mangita kon unsay gustong ipabuhat sa Ginoo sa mga Apostoles.
Unsa ang gimando sa Ginoo nga buhaton sa mga Apostoles?
Unsa nga mga pulong diha sa bersikulo 3 ang naghulagway kon sa unsang paagiha gusto sa Ginoo nga isangyaw sa mga Apostoles ang ebanghelyo?
Isulat ang mosunod diha sa pisara: Kon isangyaw nato ang ebanghelyo sa paagi sa Ginoo, …
Base sa bersikulo 3, unsa ang duha ka paagi nga makompleto nato kini nga pamahayag? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga mga baruganan: Kon isangyaw nato ang ebanghelyo sa paagi sa Ginoo, Siya mosangkap alang sa atong mga pamilya. Kon isangyaw nato ang ebanghelyo sa paagi sa Ginoo, Siya moandam sa uban aron modawat sa Iyang mensahe.)
Mahimo nimong dapiton ang mga estudyante sa pagpakigbahin kon sa unsang paagi nga sila napanalanginan pinaagi sa misyonaryo nga pagserbisyo sa usa ka igsoon o laing sakop sa pamilya.
I-summarize ang Doktrina ug mga Pakigsaad 118:4–5 pinaagi sa pagpasabut nga gitawag sa Ginoo ang mga sakop sa Korum sa Napulog Duha ka mga Apostoles aron “moadto tabok sa dako nga mga katubigan” (ang Atlantic Ocean) sa pagsangyaw sa Iyang ebanghelyo, nga magsugod sa ilang misyon didto sa luna sa templo sa Far West. Moserbisyo sila sa Great Britain.
Sumala sa bersikulo 5, kanus-a man mobiya ang mga Apostoles alang sa ilang misyon? Asa man sila manukad sa ilang pagbiya?
Ipasabut nga sa mga bulan human niining pagpadayag, misamut ang pagpanggukod didto sa Missouri. Sa katapusan gipapahawa ang mga Santos gikan niana nga estado. Kining mga kahimtang ang nakapadelikado sa Napulog Duha sa pagtuman sa mando sa Ginoo nga magpundok didto sa Far West. Daghang taga-Missouri ang dayag nga nanghambug nga ilang pugngan ang katumanan niana nga pagpadayag. Apan determinado ang Napulog Duha nga mosunod sa mando sa Ginoo. Pagkabuntag niadtong Abril 26, 1839, sila si Elder Brigham Young, Heber C. Kimball, ug Orson Pratt, kauban nila ni Elder John E. Page ug John Taylor, kinsa bag-ohay lang nga naordinahan nga mga Apostoles (tan-awa sa D&P 118:6), miadto sa luna sa templo didto sa Far West. (Dili tanang matinud-anong mga sakop sa korum ang makaadto. Pananglitan, si Elder Parley P. Pratt giaresto ug gipriso tungod sa sayop nga mga pasangil.) Gisugdan nila pag-usab ang pagpahimutang sa pundasyon sa templo (tan-awa sa D&P 115:11) pinaagi sa pagbutang og dakong bato duol sa habagatang-silangan nga bahin sa luna. Giordinahan usab nila ang bag-ong mga Apostoles, sila si Elder Wilford Woodruff (tan-awa sa D&P 118:6) ug George A. Smith, aron mohulip sa mga nabakante diha sa Korum sa Napulog Duha. Kay natuman na man ang mga instruksyon sa Ginoo, mibiya sila, nga wala mahibaloi niadtong nagplano sa pagpugong kanila. Si Willard Richards, kinsa nahisgutan diha sa Doktrina ug mga Pakigsaad 118:6, giordinahan nga usa ka Apostol mga usa ka tuig human niana, niadtong Abril 14, 1840. (Alang sa mas kompleto nga istorya bahin niining kasinatian, tan-awa sa Mga Pagtulun-an sa mga Presidente sa Simbahan: Wilford Woodruff [2004], 154–56.)
Tapusa pinaagi sa imong pagpamatuod bahin sa mga baruganan nga nahisgutan sa karon nga leksyon.
Ang pulong nga mga Nicolaitane [mga Nicolaita] makita diha sa Pinadayag 2:6, 15. Ang ubang mga iskolar nagtuo nga ang mga Nicolaitane misulay sa pagdala sa mga binuhatan sa pag-ampo sa dios-dios ngadto sa nag-unang simbahang Kristiyano. Si Elder Bruce R. McConkie sa Korum sa Napulog Duha Ka mga Apostoles misulat nga ang mga Nicolaitane “mga miyembro sa Simbahan nga misulay sa pagpabilin sa ilang kahimtang sa simbahan samtang nagpadayon sa pagpakabuhi pinasubay sa paagi sa kalibutan. … Bisan unsa pa ang ilang partikular nga mga binuhatan ug mga doktrina, ang tawag gigamit sa pag-ila niadtong gusto nga ang ilang mga pangalan maanaa sa mga rekord sa Simbahan, apan dili gustong mopahinungod sa ilang kaugalingon ngadto sa kawsa sa ebanghelyo nga dunay hingpit nga katuyoan sa kasingkasing” (Doctrinal New Testament Commentary, 3 vols. [1966–73], 3:446; tan-awa usab sa Doctrine and Covenants Student Manual [manwal sa Church Educational System, 2001], 290).
Sa wala pa mobiya si Joseph Smith sa Kirtland, usa ka grupo sa mga mibiya sa kamatuoran [apostate] ang mikontrolar sa templo. Ang Ginoo mitawag niining kalalakin-an isip “mga mangilis og salapi,” sama niadtong mihugaw-hugaw sa nataran sa templo didto sa Jerusalem (tan-awa sa Mateo 21:12–13). Bisan human kini nahitabo, gusto sa Ginoo nga ang Iyang mga sulugoon “nga atua sa yuta sa Kirtland” nga mahinumdom sa kabalaan sa templo.
“Sa sayong mga oras sa buntag [niadtong Abril 26, 1839, human nga ang Korum sa Napulog Duha ka mga Apostoles naghimamat didto sa luna sa templo sa Far West,] si Theodore Turley, usa sa mga Santos kinsa didto sa Far West kauban sa Napulog Duha, miadto sa panimalay sa mibiya sa kamatuoran [apostate] nga si Isaac Russell aron manamilit. Nahingangha si Russell nga ang iyang higala miadto sa Far West kauban sa mga sakop sa Napulog Duha ug wala makatingog sa pagkahibalo nga ang panagna natuman” (Church History in the Fulness of Times Student Manual, 2nd ed. [manwal sa Church Educational System, 2003], 226).