Kini nga leksyon naghisgot sa panan-awon sa telestial nga himaya nga gipakita kang Joseph Smith ug Sidney Rigdon, nga narekord sa Doktrina ug mga Pakigsaad 76. Gihulagway ni Joseph Smith ug Sidney Rigdon kon unsay ilang nakat-unan mahitungod niadtong kinsa makapanunod sa telestial nga gingharian ug mahitungod sa mga sangputanan sa pagsalikway sa pagpamatuod ni Jesukristo. Gihulagway usab nila kon sa unsang paagi ang telestial nga gingharian lahi sa uban nga mga gingharian sa himaya.
Ang Ginoo mipakita ni Joseph Smith ug Sidney Rigdon og panan-awon sa telestial nga gingharian
Dapita ang mga estudyante sa paghunahuna nga ang usa ka higala kinsa miyembro sa laing tinuohan nga Kristiyano miingon kanila, “Ang akong ministro misulti kanamo nga human kita mamatay, mopadulong kita sa langit o sa impyerno. Wala ko mobati nga igo ang akong kabuotan aron makaadto sa langit karon dayon, apan wala usab ko mobati nga grabe ko kadautan nga kinahanglang maadto ko sa impyerno. Unsay gitudlo sa inyong relihiyon mahitungod sa langit ug impyerno?”
Unsaon ninyo sa pagtubag ang inyong higala?
Ipakita ang diagram gikan sa leksyon 78 nga gitawag og Doktrina ug mga Pakigsaad 76: Outline sa Panan-awon” (o dapita ang mga estudyante nga ipagawas ang ilang kaugalingong mga kopya sa diagram). Samtang ang mga estudyante maghisgot sa tibuok Doktrina ug mga Pakigsaad 76, awhaga sila sa pagpangita og mga kamatuoran nga makatabang niini nga higala.
Dapita ang usa ka estudyante sa pagbasa og kusog sa Doktrina ug mga Pakigsaad 76:81–83, 101, 103. Hangyoa ang klase sa pagsunod, nga mangita sa mga pulong nga naghulagway sa mga tawo kinsa makapanunod sa telestial nga gingharian.
Unsa nga mga pulong niini nga mga bersikulo ang naghulagway sa mga tawo kinsa makapanunod sa telestial nga gingharian? (Tingali kinahanglan nimong ipasabut nga ang barangan mao ang tawo nga moapil og mga kalihokan nga nagdapit sa impluwensya sa dautan nga mga espiritu. Ang nagbaligya sa dungog mao ang tawo nga moapil og sekswal nga sala.)
Sumala sa mga bersikulo 82 ug 101, ang ubang mga tawo makapanunod sa telestial nga gingharian tungod kay mibalibad sila sa pagdawat sa mahinungdanong mga panalangin nga gitanyag kanila. Unsa ang mga panalangin nga ilang gibalibaran? (Tuyo nilang gisalikway ang pagpamatuod ni Jesus ug ang ebanghelyo. Tungod kay gisalikway nila ang Manluluwas ug ang Iyang ebanghelyo, gibalibaran nila ang oportunidad nga maghinulsol sa ilang mga sala ug malimpyohan pinaagi sa Pag-ula. Samtang maghisgot ang mga estudyante niini nga pangutana, mahimo nimo silang pahinumduman og unsay ilang nakat-unan sa miaging leksyon mahitungod sa pagkamaisugon diha sa pagpamatuod ni Jesus. Ipasabut nga ang himaya nga atong mapanunod mag-agad sa paagi nga atong gidawat kini nga pagpamatuod [tan-awa sa D&P 76:50–51, 69, 78–79, 81–82, 101].)
Sumala sa bersikulo 83, sa unsang paagi kadtong kinsa mopuyo sa telestial nga gingharian lahi kay sa mga anak sa kapildihan? (Wala sila makahimo sa dili mapasaylo nga sala sa paglimud sa Balaang Espiritu [tan-awa sa D&P 76:35].)
Dapita ang mga estudyante sa pagbasa og hilum sa Doktrina ug mga Pakigsaad 76:84–85, 104–106, nga mangita kon unsay mahitabo sa mga dautan sa dili pa sila makadawat sa telestial nga himaya.
Unsa ang mahitabo sa mga dautan sa dili pa sila matubos ug matugutan sa pagpanunod sa telestial nga gingharian? (Tabangi ang mga estudyante nga mahibalo sa mosunod nga kamatuoran: Kadtong makapanunod sa telestial nga gingharian kinahanglan gayud nga mag-antus sa impyerno sa dili pa sila matubos sa Manluluwas. Mahimo nimong isulat kini nga kamatuoran sa pisara.)
Aron matabangan ang mga estudyante nga makasabut sa kahulugan sa termino nga impyerno, ipasabut nga ang mga kasulatan migamit sa termino sa labing minos sa duha ka paagi. Una, ang impyerno mao ang bahin sa kalibutan sa espiritu nga gipuy-an sa mga dautan ug usa ka literal apan temporaryo nga kahimtang sa espirituhanon nga kasakit ug pag-antus. Ikaduha, ang mga kasulatan usahay mogamit sa pulong nga impyerno nga nagpasabut sa usa ka permanente nga kahimtang sa kasakit ug pag-antus alang sa mga anak sa kapildihan. (Tan-awa sa Giya ngadto sa mga Kasulatan, “Impyerno,” scriptures.lds.org.)
Unsa nga mga pulong sa bersikulo 84–85 ug 104–106 ang naghulagway sa pag-antus nga masinati sa mga dautan human sila mamatay? (Tingali kinahanglan nimong ipasabut nga sa bersikulo 105, ang mga pulong nga “walay katapusan nga kalayo” usa ka pinasumbingay nga pagpahayag nga nagpasabut sa pag-antus sa mga dautan kinsa makapanunod sa telestial nga gingharian. Wala kini magpasabut nga ang ilang pag-antus dili gayud matapos. Tan-awa sa D&P 19:4–12.)
Ipasabut og maayo nga ang mga kahimtang sa impyerno nga masinati niadtong makapanunod sa telestial nga gingharian temporaryo lang. Tungod kay kini nga mga tawo dili maghinulsol ug mogamit sa mga panalangin sa Pag-ula diha sa ilang mga kinabuhi, magpabilin sila sa impyerno sa tibuok Milenyum, mobayad sa silot sa ilang mga sala pinaagi sa ilang pag-antus.
Unsa nga mga pulong gikan sa mga bersikulo 85 ug 106 ang nagtudlo nga ang impyerno usa lang ka temporaryo nga kahimtang niadtong makapanunod sa telestial nga gingharian?
Dapita ang usa ka estudyante sa pagbasa og kusog sa mosunod nga pamahayag ni Presidente Joseph Fielding Smith, ug dapita ang klase sa pagpaminaw sa mga resulta sa pag-antus nga masinati sa mga dautan didto sa impyerno:
Imahe
President Joseph Fielding Smith
“Kini nga pag-antus usa ka paagi sa paglimpyo, o pagputli, ug pinaagi niini ang mga dautan pagadad-on ngadto sa usa ka kahimtang diin sila, pinaagi sa katubsanan ni Jesukristo, makabaton og imortalidad. Ang ilang mga espiritu ug mga lawas mahiusa pag-usab, ug sila mopuyo sa telestial nga gingharian. Apan kini nga pagkabanhaw dili mahitabo hangtud matapos ang kalibutan” (Doctrines of Salvation, comp. Bruce R. McConkie, 3 vols. [1954–56], 2:298).
I-summarize ang Doktrina ug mga Pakigsaad 76:106–108 pinaagi sa pagpasabut nga ang mga dautan mag-antus sa ilang mga sala hangtud nga makompleto ni Jesukristo ang Iyang buhat ug matugyan ang gingharian sa Dios dinhi sa yuta ngadto sa Iyang Amahan. Si Jesukristo pagakoronahan dayon sa himaya.
Dapita ang usa ka estudyante sa pagbasa og kusog sa Doktrina ug mga Pakigsaad 76:109–111. Dayon dapita ang laing estudyante sa pagbasa og kusog sa Doktrina ug mga Pakigsaad 137:9. Hangyoa ang klase sa pagsunod, nga mangita kon unsay mahitabo kon kadtong kinsa makapanag-iya sa telestial nga gingharian moduol sa trono sa Dios aron pagahukman.
Sumala sa Doktrina ug mga Pakigsaad 76:110, unsay mahitabo samtang kining mga tawhana dad-on atubangan sa trono sa Dios aron pagahukman? (Sila moluhod ug moila ni Jesukristo isip ilang Manluluwas.)
Ipasabut nga bisan og ang bersikulo 111 piho nga nagpasabut ngadto niadtong kinsa makapanunod sa telestial nga gingharian, ang kamatuoran nga gitudlo niini nga bersikulo magamit ngadto sa tanan.
Sumala sa bersikulo 111, unsa ang modeterminar sa gingharian sa himaya nga atong mapanunod? (Tabangi ang mga estudyante nga mahibalo sa mosunod nga doktrina: Ang gingharian sa himaya nga atong mapanunod madeterminar pinaagi sa atong mga binuhatan niini nga kinabuhi ug sa mga tinguha sa atong kasingkasing. Mahimo nimong isulat kini nga doktrina sa pisara.)
Sa unsa nga paagi kini nga doktrina makaimpluwensya sa inyong mga pagpili?
Dapita ang mga estudyante nga hilum nga mobasa sa Doktrina ug mga Pakigsaad 76:86–89, 98, 112 ug mangita sa mga pulong nga naghulagway kon sama sa unsa ang imortalidad alang niadtong makapanunod sa telestial nga gingharian. Hangyoa ang mga estudyante sa pagreport sa ilang nakit-an.
Sa unsang paagi kini nga mga pulong nagpakita sa gugma ug kalooy ni Jesukristo?
Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 76:91–98. Hangyoa ang klase sa pagsunod ug sa pagpangita kon sa unsang paagi makompara ang mga gingharian sa himaya ngadto sa usag usa.
Sa unsang paagi ang himaya sa celestial nga gingharian lahi kay sa himaya sa terrestrial ug telestial nga mga gingharian? (Ang mga estudyante mahimong mogamit og lain-laing mga pulong, apan ang ilang mga tubag kinahanglang maghulagway sa mosunod nga kamatuoran: Ang himaya sa celestial nga gingharian mas labaw sa himaya sa terrestrial ug telestial nga mga gingharian.
Sumala sa mga bersikulo 92–95, unsa nga mga panalangin ang moabut niadtong makadawat sa kahimayaan sa celestial nga gingharian? Sa unsang paagi kini nga mga panalangin ikakumpara sa mga panalangin nga ihatag niadtong makapanunod sa telestial nga gingharian?
Si Joseph Smith ug Sidney Rigdon mipasabut kon sa unsang paagi ang uban makadawat sa kahibalo nga ilang nadawat
I-summarize ang Doktrina ug mga Pakigsaad 76:113–119 pinaagi sa pagpasabut nga human sa paghulagway niini nga panan-awon, si Joseph Smith ug Sidney Rigdon miingon nga ang Ginoo misugo kanila nga dili isulat ang tanan nga gipakita kanila. Gipasabut usab nila kon unsay kinahanglan gayud natong buhaton aron makakita ug makasabut sa mga misteryo sa gingharian sa Dios.
Dapita ang usa ka estudyante sa pagbasa og kusog sa Doktrina ug mga Pakigsaad 76:116–118. Hangyoa ang klase sa pagsunod, nga mangita kon unsaon nato nga makakita ug makasabut sa mga misteryo sa gingharian sa Dios.
Sumala niini nga mga bersikulo, unsay kinahanglan gayud natong buhaton aron makakita ug makasabut sa mga misteryo sa gingharian sa Dios? (Tan-awa usab sa D&P 76:5–10.)
Aron matabangan ang mga estudyante nga mopasabut ug mopamatuod sa mga doktrina nga ilang nakat-unan gikan sa pagtuon sa Doktrina ug mga Pakigsaad 76, pahinumdumi sila sa pangutana nga ilang gihisgutan sa pagsugod sa klase: “Unsay gitudlo sa inyong relihiyon mahitungod sa langit ug impyerno?” Ipares-pares ang mga estudyante, ug hangyoa sila nga magtinabangay sa paghimo og outline kon unsaon nila pagtubag niini nga pangutana. Pahibaloa sila nga human sa pipila ka minuto, ang matag pares dunay oportunidad sa pagpaambit sa ilang mga tubag ngadto sa laing pares.
Aron matabangan ang mga estudyante sa ilang pagpangandam, pag-apud-apod og mga kopya sa mosunod nga mga pangutana o isulat ang mga pangutana diha sa pisara sa dili pa magklase:
Unsa ang mga kalainan tali sa matag usa niini nga mga gingharian sa himaya?
Unsa ang mga kalainan sa mga pagpili nga gihimo niadtong makapanunod niini nga mga gingharian ug niadtong dili makapanunod og gingharian sa himaya?
Unsa ang inyong nahibaloan nga tinuod mahitungod sa Manluluwas ug sa Iyang tahas diha sa atong kaluwasan?
Isugyot nga ang mga estudyante mokonsiderar niini nga mga pangutana samtang mangandam sila sa pagpasabut unsay gitudlo sa Simbahan mahitungod sa langit ug impyerno. Dugang pa, hangyoa ang mga estudyante sa paggamit og dili mominos sa duha ka mga scripture reference gikan sa Doktrina ug mga Pakigsaad 76 isip kabahin sa ilang pagpasabut.
Human sa igong panahon, dapita ang matag pares nga makigtrabaho og laing pares. Dapita ang usa ka parisan sa pagtudlo sa laing duha ka mga estudyante gamit ang ilang outline. Kon ang unang pares sa mga estudyante aduna nay oportunidad sa pagpasabut sa doktrina, dapita ang ikaduha nga pares sa pagtudlo. Human makatudlo ang mga estudyante, mahimo nimo silang dapiton sa pagpaambit sa klase kon unsay ilang nakat-unan.
Aron matabangan ang mga estudyante nga magamit ang ilang nakat-unan gikan sa pagtuon mahitungod sa mga gingharian sa himaya, isulat ang mosunod nga dili kompleto nga mga sentence diha sa pisara ug dapita ang mga estudyante sa pagkompleto niini diha sa ilang mga class notebook o scripture study journal:
Isip resulta sa unsay akong nakat-unan gikan sa pagtuon mahitungod sa mga gingharian sa himaya diha sa Doktrina ug mga Pakigsaad 76:
Nasayud ko …
Gusto nako nga …
Ako …
Human ang mga estudyante makabaton og igong panahon sa pagkompleto niini nga kalihokan, awhaga sila sa pagkonsiderar kon ang mga pagpili nga ilang gihimo makahimo ba nilang takus nga makapanunod sa celestial nga gingharian. Awhaga usab sila sa pagtinguha sa tabang sa Ginoo sa paghimo sa bisan unsang kausaban nga gibati nila nga kinahanglan nilang himoon. Ikonsiderar ang pagpaambit sa imong pagpamatuod sa mga kamatuoran nga imong nakat-unan gikan sa pagtuon sa Doktrina ug mga Pakigsaad 76.
Ang Giya ngadto sa mga Kasulatan nagpasabut sa paggamit sa termino nga impyerno diha sa mga kasulatan:
“Ang pagpadayag sa ulahing mga adlaw naghisgot sa impyerno diha sa dili mokubos sa duha ka pagsabut. Una, kini mao ang lumalabay nga pinuy-anan diha sa kalibutan sa espiritu alang niadto nga masinupakon sa buhi pa. Niini nga pagsabut, ang impyerno adunay katapusan. Ang mga espiritu didto tudloan sa ebanghelyo, ug [usa ka panahon human] sa ilang paghinulsol sila mabanhaw ngadto sa usa ka ang-ang sa himaya diin sila takus. Kadto nga dili maghinulsol, apan bisan pa niana dili mga anak sa kapildihan, magpabilin sa impyerno sa tibuok nga Kaliboan. Human niini nga kaliboan ka mga tuig sa pag-antus, sila mabanhaw ngadto sa usa ka himaya nga telestial (D&P 76:81–86; 88:100–101).
“Ikaduha, kini mao ang usa ka walay pagkabalhin nga dapit niadto nga dili matubos pinaagi sa pag-ula ni Jesukristo. Niini nga pagsabut, ang impyerno walay pagkabalhin. Kini alang niadto nga makaplagan nga ‘mahugaw gihapon’ (D&P 88:35, 102). Kini mao ang dapit diin si Satanas, ang iyang mga anghel, ug ang mga anak sa kapildihan—kadto kinsa milimud sa Anak human ang Amahan mipadayag kaniya—mopuyo sa kahangturan (D&P 76:43–46)” (Giya ngadto sa mga Kasulatan, “Impyerno,” scriptures.lds.org).
Si Elder Bruce R. McConkie misulti sa mosunod mahitungod sa impyerno:
Imahe
Elder Bruce R. McConkie
“Kana nga bahin sa kalibutan sa espiritu nga gipuy-an sa dautan nga mga espiritu nga nagpaabut sa umaabut nga adlaw sa ilang pagkabanhaw gitawag nga impyerno. Tali sa ilang kamatayon ug sa pagkabanhaw, kini nga mga kalag sa mga dautan isalikway ngadto sa kawanangan sa kangitngit, ngadto sa magul-anong dapit nga gitawag og sheol, ngadto sa dapit diin maghulat ang dautan nga mga espiritu nga gitawag og hades, ngadto sa impyerno. Didto mag-antus sila sa kasakit sa gipanghimaraut; didto mag-antus sila sa panimalos sa mahangturong kalayo; makita didto ang mga paghilak ug pagdanguyngoy ug pagpangagot sa ngipon; didto ang nagdilaab nga kasuko sa Dios ibu-bu sa mga dautan. (Alma 40:11–14; D. & P. 76:103–106.) …
“Human sa ilang pagkabanhaw, ang kadaghanan niadtong nag-antus sa impyerno moadto sa telestial nga gingharian; ang nahabilin, nga gitunglo isip mga anak sa kapildihan, ipalagpot ngadto sa walay katapusan nga pagkaalaot uban sa yawa ug sa iyang mga anghel. …
“Busa, alang niadtong makapanunod og matang sa kaluwasan, nga naglakip sa tanan gawas sa mga anak sa perdisyon (D. & P. 76:44), ang impyerno adunay katapusan” (Mormon Doctrine, 2nd ed. [1966], 349, 350, 351; tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 165–166.)
Si Presidente Brigham Young mipasabut kon unsa ang reaksyon sa pipila ka mga tawo sa iyang panahon sa kamatuoran nga ang kadaghanan sa mga dautan matubos sa katapusan ug dili mag-antus sa impyerno sa kahangturan:
Imahe
President Brigham Young
“Sa dihang gipadayag sa Dios ngadto ni Joseph Smith ug Sidney Rigdon nga dihay usa ka dapit nga giandam alang sa tanan, sumala sa kahayag nga ilang nadawat ug sa ilang pagsalikway sa dautan ug pagbuhat og maayo, dako kini nga pagsulay alang sa kadaghanan, ug ang uban mibiya sa kamatuoran tungod kay ang Dios dili mopadala sa mga pagano ug mga bata ngadto sa walay katapusan nga silot, apan adunay dapit sa kaluwasan, sa tukmang panahon, alang sa tanan, ug mopanalangin sa matinuoron ug mahiyason ug matinud-anon, bisan og sila nasakop sa bisan unsa nga simbahan o wala. Bag-o kini nga doktrina niini nga henerasyon, ug daghan ang wala modawat niini” (Mga Pagtulun-an sa mga Presidente sa Simbahan: Brigham Young [1997], 337).
Si Elder Orson Pratt sa Korum sa Napulog Duha ka mga Apostoles mitudlo sa kalainan tali sa pagkaluwas diha sa celestial nga gingharian ug sa pagpanunod sa uban nga mga gingharian sa himaya:
Imahe
Elder Orson Pratt
“Adunay kalainan tali sa pagkaluwas diha sa uban nga gingharian, diin adunay pipila ka himaya, pipila ka kalipay, ug pagkaluwas diha sa gingharian diin nagpuyo ang atong Amahan. …
“Ang atong Amahan nga anaa sa kalangitan, ug iyang Anak nga si Jesukristo, nagpuyo sa kinatas-ang ang-ang sa himaya sa kahangturan. Sila nagbaton sa kahingpitan sa himaya. Aduna Sila sa kahingpitan sa kalipay, kahingpitan sa gahum, kahingpitan sa kaalam, kahayag ug kamatuoran, ug sila nagmando sa tanan nga mga gingharian sa ubos nga himaya, ubos nga kalipay, ug ubos nga gahum. … Ang ebanghelyo gituyo sa paghimaya sa katawhan niana nga samang ang-ang sa himaya, diin ang atong Amahan ug iyang Anak nagpuyo” (Deseret News,Nob. 10, 1880, 642).
Aron sa pagpanghimaraut sa kawalay paghiusa, misulat si Pablo ngadto sa mga Taga-Corinto:
“Kay gikasuginlan man ugod ako … nga kono anaay pakiglalisay diha kaninyo, mga igsoon ko.
“Sa laing pagkasulti, ang matag usa kaninyo magakanayon kono, ako iya ni Pablo; o ako iya ni Apolos; o ako iya ni Cefas; o ako iya ni Kristo.
“Nabahinbahin ba ugod si Kristo? si Pablo ba ang gikalansang sa krus alang kaninyo? o gikabautismohan ba kamo sa ngalan ni Pablo?” (1 Mga Taga-Corinto 1:11–13).
Ang susama nga mga pulong sa Doktrina ug mga Pakigsaad 76:99–101 nagpasabut niadtong wala mahiuyon kang Jesukristo o sa Iyang mga propeta. Ang uban moingon nga sila nagsunod ni Jesukristo o sa piho nga mga propeta, apan kini nga mga tawo tuyo nga misalikway sa Manluluwas ug nagdumili sa pagdawat sa Iyang ebanghelyo o sa pagsunod sa Iyang mga propeta.
“Makapasabut ko og usa ka gatus pa ka gidaghanon kay sa akong nabuhat sukad sa mga himaya sa mga gingharian nga gipakita kanako diha sa panan-awon, kon gitugutan pa ko, ug kon andam pa ang mga tawo sa pagdawat niini” (sa History of the Church, 5:402).