Doktrina ug mga Pakigsaad 29:31–50; 30–35 (Unit 8)

Materyal sa Pagpangandam alang sa Home-Study Teacher

Summary sa Daily Home-Study nga mga Leksyon

Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang gitun-an nila ang Doktrina ug mga Pakigsaad 29:31–50; 30–35 (unit 8) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.

Day 1 (Doktrina ug mga Pakigsaad 29:31–50)

Samtang nagkat-on ang mga estudyante bahin sa plano sa kaluwasan diha sa Doktrina ug mga Pakigsaad 29, ilang nadiskubrihan nga ang tanang mga sugo sa Dios espirituhanon ug nga ang Dios mihatag kanato sa gasa sa kabubut-on sa paghimo og mga pagpili ug makasinati sa mga sangputanan niadto nga mga pagpili. Samtang gihunahuna sa mga estudyante kon sa unsang paagi nga ang Pagkapukan ni Adan nakadala og espirituhanon nga kamatayon, ilang nakat-unan nga pinaagi sa Pag-ula, si Jesukristo mitanyag og kapasayloan ug kinabuhing dayon sa tanang mopakita og hugot nga pagtuo diha Kaniya ug maghinulsol sa ilang mga sala.

Day 2 (Doktrina ug mga Pakigsaad 30–32)

Niini nga leksyon ang mga estudyante mobasa sa tambag ug mga saad nga gihatag sa Ginoo ngadto sa unom ka kalalakin-an nga Iyang gitawag sa pagsangyaw sa ebanghelyo. Ang leksyon naghatag og gibug-aton nga kinahanglan kita nga moserbisyo sa Ginoo sa tibuok natong kalag ug Siya magauban kanato. Nakat-unan usab sa mga estudyante nga pinaagi sa atong kamatinud-anon, ang mga sakop sa atong pamilya mahimong mapanalanginan nga motuo ug masayud sa kamatuoran.

Day 3 (Doktrina ug mga Pakigsaad 33–34)

Gitun-an sa mga estudyante ang mga pulong sa Ginoo ngadto sa duha ka mga misyonaryo, si Ezra Thayre ug Northrop Sweet. Nadiskubrihan sa mga estudyante nga kon ablihon nato ang atong mga ba-ba aron ipahayag ang ebanghelyo, ang Ginoo modasig kanato kon unsay isulti. Pinaagi sa mga pulong sa Ginoo ngadto kang Orson Pratt, nakat-unan sa mga estudyante nga kadtong kinsa nagtudlo sa ebanghelyo sa tukma ug makugihon nga paagi makabuhat sa ingon pinaagi sa gahum sa Espiritu Santo.

Day 4 (Doktrina ug mga Pakigsaad 35)

Gibasa sa mga estudyante ang mahitungod sa pagkakabig ni Sidney Rigdon ug gitun-an ang mga pulong sa Ginoo ngadto kaniya. Ilang nakat-unan nga ang Ginoo nakaila kanato ug adunay buluhaton alang sa matag usa kanato ug ang Dios nagtawag niadtong kinsa huyang aron matuman ang Iyang mga buhat pinaagi sa gahum sa Iyang Espiritu. Nadiskubrihan usab sa mga estudyante nga kon kita mosunod sa mga sugo ug mopasidungog sa atong mga pakigsaad, ang Ginoo motabang kanato nga matuman ang Iyang buhat.

Pasiuna

Kini nga leksyon nagtutok sa piho nga tambag sa Ginoo ngadto nilang David ug Peter Whitmer human sa komperensya sa Simbahan niadtong Septyembre 1830. Atol sa komperensya gibutyag sa Ginoo nga sayop ang mga pagpadayag gikan ni Hiram Page. Sa Doktrina ug mga Pakigsaad 30, ang Ginoo mipanton ni David Whitmer tungod sa iyang pagtuo sa bato ug mitawag ni Peter Whitmer sa pag-uban ni Oliver Cowdery sa iyang misyon.

Mga Sugyot alang sa Pagtudlo

Doktrina ug mga Pakigsaad 30:1–4

Si David Whitmer gipanton tungod sa pagpaminaw sa pagpamugos sa katawhan

Hangyoa ang mga estudyante nga ikonsiderar sa hilum ang mosunod nga mga sitwasyon:

Usa ka batan-ong lalaki nagpaminawan og musika nga wala mohaum sa mga sumbanan nga gi-outline diha sa Alang sa Kalig-on sa mga Kabatan-onan. Bisan og nalingaw siya sa pagpaminaw niining musika, hinay-hinay siyang nakaamgo nga ang mga mensahe niini makapawagtang sa Espiritu ug makapahilayo gikan sa iyang pamilya, sa iyang mga higala, ug sa Simbahan.
Human sa pipila ka pakig-date sa usa ka batan-ong lalaki, ang batan-ong babaye nagsugod sa pagkaamgo, pinaagi sa mga pag-aghat sa Espiritu Santo, nga ang batan-ong lalaki hinay-hinayng misulay sa pagdani kaniya sa paglapas sa balaod sa kaputli.

Dayon ipangutana sa mga estudyante ang mosunod:

Sa unsang paagi nga kita, sama sa mga indibidwal dinhi niining mga sitwasyon, makaila kon kita gilingla?

Ipasabut nga ang Doktrina ug mga Pakigsaad 30 naglangkob sa mga kamatuoran nga makatabang kanato nga maandam sa pagdawat ug pagsunod sa mga pasidaan gikan sa Espiritu ug makatabang kanato nga makalikay sa pagkalingla. Dapita ang mga estudyante sa pagpangita niining mga kamatuoran samtang magtuon sila niining seksyon karon.

Aron matabangan ang mga estudyante nga makasabut sa konteksto sa Doktrina ug mga Pakigsaad 30, hangyoa sila sa paghinumdom sa ilang nakat-unan mahitungod ni David Whitmer sumala kon unsa na sila kalayo sa ilang pagtuon sa Doktrina ug mga Pakigsaad ug kasaysayan sa Simbahan. (Usa siya sa Tulo ka mga Saksi sa Basahon ni Mormon ug nakatabang sa paghatag og kagamitan atol sa paghubad sa Basahon ni Mormon.)

Sultihi ang mga estudyante nga ang bayaw ni David Whitmer mao si Hiram Page. Mahimo nimong pangutan-on ang mga estudyante unsay ilang mahinumduman bahin ni Hiram Page gikan sa ilang pagtuon sa Doktrina ug mga Pakigsaad 28. (Usa siya sa Walo ka mga Saksi sa Basahon ni Mormon ug nakakaplag og usa ka bato nga pinaagi niini miangkon siya nga nakadawat siya og pagpadayag.) Ipasabut nga sa dihang gipakita ni Hiram ang iyang mini nga bato sa manalagna ug miangkon nga ang mga pagpadayag naggikan niini, si Oliver Cowdery, ang mga Whitmer, ang uban pa nga diha sa dapit sa Fayette misugod na sa pagtuo sa pangangkon ni Hiram.

Ngano kaha nga dali rang nadani si David Whitmer ni Hiram Page?

Hangyoa ang mga estudyante sa pagpangita sa Doktrina ug mga Pakigsaad 30:1–2 ug sa pagtubag sa mosunod nga mga pangutana:

Unsa ang gisulti sa Ginoo nga gibuhat ni David Whitmer nga nakapahimo niyang dali nga malingla?
Unsa ang gisulti sa Ginoo nga wala buhata ni David?

Dapita ang mga estudyante nga magsugyot og mga baruganan nga atong makat-unan gikan sa Doktrina ug mga Pakigsaad 30:1–2. Tingali mosugyot sila og pipila o tanan sa mosunod:

Imbis kahadlokan ang tawo, kinahanglang mosalig kita sa Ginoo alang sa kalig-on.

Kinahanglan ibutang nato sa atong mga hunahuna ang mga butang sa Dios labaw pa kay sa mga butang sa kalibutan.

Kinahanglan mosunod kita sa Espiritu ug sa tambag sa mga lider sa Simbahan kay sa madani niadtong wala gitawag sa Ginoo.

Ipangutana ang mosunod:

Unsa kaha ang gipasabut sa pagbutang sa atong mga hunahuna sa mga butang sa kalibutan kay sa mga butang sa Ginoo? Unsa ang pipila ka mga paagi nga matintal kita sa paghimo niini?
Sa unsang paagi nga ang pagtutok sa kalibutanong mga butang makahimo kanato nga mas daling malingla?

Hangyoa ang usa ka estudyante sa pagbasa og kusog sa mosunod nga pamahayag ni Presidente Joseph Fielding Smith:

“Ingon og lahi kini nga dili pa lang dugay human sa maanindot nga pagpakita nga nadawat ni [David Whitmer] ug sa pagsaksi sa pagbu-bu sa Espiritu sa ubang mga panahon, nga siya makalimot, apan ang kinaiyahan sa tawo nga kitang tanan kinahanglan og makanunayong paghinumdom sa atong mga responsibilidad o lagmit kitang mosangput ngadto sa walay pagpakabana. Ang panginahanglan sa kanunayng pag-ampo ug itutok ang atong mga hunahuna sa mga butang sa gingharian, ug sinsero nga pagtagad sa katungdanan, maoy klaro sa kadaghanan kanato, kay kon dili masipyat kita. Kanunay gayud ang Ginoo nga mipasidaan sa iyang katawhan batok sa kahuyang sa unod!” Church History and Modern Revelation, 2 vols. [1953], 1:146).

Sumala ni Presidente Smith, unsa ang angay natong buhaton aron masiguro nga dili kita mahikalimot sa atong espirituhanon nga mga responsibilidad sama sa nahitabo ni David Whitmer?

Mahimo nimong gamiton kini nga oportunidad sa pagpahinumdom sa mga estudyante sa panginahanglan sa pagtuon sa ilang mga kasulatan matag adlaw—dili lang sa pagkompleto sa ilang mga assignment apan aron matabangan sila nga makakat-on sa ebanghelyo, makapalambo og pagpamatuod sa ebanghelyo, ug makadungog sa tingog sa Ginoo. Mahimo usab nimong hangyoon ang mga estudyante sa pagpakigbahin sa unsay nakatabang nila sa pagtuon sa mga kasulatan sa makahuluganon nga paagi.

Dapita ang usa ka estudyante sa pagbasa og kusog sa Doktrina ug mga Pakigsaad 30:3–4. Hangyoa ang klase sa pagsunod ug motino sa mga instruksyon sa Ginoo ngadto ni David Whitmer.

Pagkahuman nga nalingla ni Hiram Page, sa unsang paagi kini nakatabang ni David Whitmer sa pagpamalandong sa mga butang nga gipadayag sa Ginoo ngadto kaniya?

Awhaga ang mga estudyante sa pagkonsiderar kon duna bay mga sitwasyon sa ilang mga kinabuhi diin sila mahimong misalig o mas nakatutok sa “mga butang sa kalibutan” kay sa mga butang sa Dios ug sa unsang paagi nga ang pagbuhat sa ingon makapahimo nilang daling malingla. Dapita sila sa pagdesidir unsay ilang buhaton aron mas mosalig sa Ginoo niadtong mga sitwasyon.

Doktrina ug mga Pakigsaad 30:5–8

Si Peter Whitmer gitawag sa pag-uban ni Oliver Cowdery sa usa ka misyon ngadto sa mga Lamanite

Ipakita ang usa ka bug-at nga butang o usa ka bag nga puno sa bug-at nga mga item. Dapita ang usa ka estudyante sa pagduol sa atubangan sa klase ug alsahon ang butang nga naa sa iyang atubangan. Samtang gialsa sa estudyante ang butang, dapita ang uban nga mga estudyante sa pagbasa og hilum sa Doktrina ug mga Pakigsaad 30:5 ug mangita sa unsay gipabuhat sa Ginoo ni Peter Whitmer. Hangyoa ang klase sa pag-report sa unsay ilang nakit-an.

Kinsa ang mahimong tigdumalang lider sa misyon ni Peter Whitmer ngadto sa mga Lamanite?

Dapita ang ikaduha nga estudyante aron sa pagtabang sa estudyante nga nag-alsa sa bug-at nga butang o bag. Hangyoa ang unang estudyante sa paghulagway sa kalainan nga iyang nabati nga dunay suporta gikan sa laing tawo. Ipasabut nga sa Doktrina ug mga Pakigsaad 30:5–7 narekord ang tambag sa Ginoo ngadto ni Peter Whitmer kon unsaon ni Peter pagsuporta ug pagpaluyo kang Oliver Cowdery sa iyang posisyon sa pagpangulo. Hangyoa ang mga estudyante sa pagpangita niining mga bersikulo ug sa pagtino sa piho nga mga pulong nga naghulagway kon unsaon ni Peter sa pagpaluyo kang Oliver.

Unsa nga mga pulong ang gigamit sa Ginoo sa pagtudlo ni Peter kon unsaon niya sa pagsuporta ug pagpaluyo kang Oliver? (Tan-awa sa bersikulo 6; si Peter kinahanglang moantus sa tanang kasakit ni Oliver, sa pag-ampo alang kang Oliver, ug moila sa awtoridad ni Oliver.)
Unsa kaha ang gipasabut sa “ … mag-antus sa iyang tanan nga mga kasakitan” (D&P 30:6)?
Unsa ang usa ka leksyon nga atong makat-unan gikan sa tambag sa Ginoo ngadto ni Peter nga magamit usab kanato?

Usa ka kamatuoran nga mahimong ipahayag sa mga estudyante mao nga kita kinahanglan mopaluyo ug mosuporta niadtong kinsa gitawag sa Ginoo sa pagdumala sa Iyang buhat. Dapita ang usa ka estudyante sa pagsulat niining baruganan diha sa pisara.

Hangyoa ang mga estudyante sa pagpasabut kon unsaon nila sa paggamit niining baruganan diha sa ilang mga kinabuhi, tingali diha sa pagsuporta sa ilang mga lider sa ward o sa branch. Dapita sila sa pagpakigbahin sa ilang pagpamatuod sa mga panalangin nga miabut gikan sa pagtabang niadtong kinsa gitawag sa Ginoo. Awhaga sila sa pagpadayon sa pagsunod niining baruganan.

Sunod nga Unit (Doktrina ug mga Pakigsaad 36–40)

Pangutan-a ang mga estudyante kon gihangyo na ba sila sa pagsunod og usa ka sugo, apan wala sila makasabut sa hingpit kon ngano. Unsa kaha kon kamo gisaaran og mga panalangin base sa inyong kamasulundon apan napakyas sa pagsunod sa mga sugo? Sa sunod nga unit makat-unan sa mga estudyante ang mahitungod sa mga miyembro sa Simbahan kinsa nahimutang niining sitwasyuna ug unsay gitudlo sa Ginoo kanila.