Leksyon 19
Joseph Smith—Kasaysayan 1:68–75; Doktrina ug mga Pakigsaad 13
Pasiuna
Sa Mayo 15, 1829, si Joseph Smith ug si Oliver Cowdery miadto sa kakahoyan duol sa umahan ni Joseph sa Harmony, Pennsylvania, aron sa pagpangutana sa Ginoo human sa paghubad og tudling diha sa Basahon ni Mormon nga naghatag og gibug-aton sa importansya sa ordinansa sa bunyag. Samtang nag-ampo sila, mipakita si Juan Bautista kanila isip usa ka nabanhaw nga personahe. Iyang gitugyan ang Aaronic Priesthood diha kanila, nagsugo kanila sa pagbunyag sa usag usa diha duol sa Suba sa Susquehanna, ug dayon misugo kanila sa pag-orden sa usag usa ngadto sa Aaronic Priesthood. Ang mga pulong ni Juan ngadto ni Joseph Smith ug Oliver Cowdery girekord diha sa Doktrina ug mga Pakigsaad 13. Human sa ilang bunyag, si Joseph ug si Oliver napuno sa Espiritu Santo ug nakasinati og dagkong mga panalangin.
Mga Sugyot alang sa Pagtudlo
Joseph Smith—Kasaysayan 1:68–72; Doktrina ug mga Pakigsaad 13
Gitugyan ni Juan Bautista ang Aaronic Priesthood diha ni Joseph Smith ug Oliver Cowdery
Isulat ang mosunod nga mga pangutana diha sa pisara sa wala pay klase o hatagi sila og handout alang sa kada estudyante (ayaw ilakip ang mga tubag). Samtang ang mga estudyante moabut sa klase, dapita sila sa pagtubag sa mga pangutana diha sa usa ka pirasong papel o diha sa ilang mga handout. Kon gikinahanglan, isugyot nga gamiton nila ang Giya Ngadto sa mga Kasulatan (tan-awa sa “Aaronic nga Pagkapari”) aron sa pagpangita sa hustong mga tubag. Mahimo nimong hulaton hangtud ang mga estudyante nakarekord na sa ilang mga tubag sa dili pa nimo sugdan ang debosyonal.
-
Hain sa mga kasulatan kita makakat-on mahitungod sa pagpahiuli sa Aaronic Priesthood?
-
Sa unsa nga petsa ang Aaronic Priesthood napahiuli?
-
Unsa ang pangalan sa anghel kinsa mipahiuli sa Aaronic Priesthood nganhi sa yuta pinaagi sa pagtugyan niini diha ni Joseph Smith ug Oliver Cowdery?
-
Sa unsa nga paagi ang Aaronic Priesthood gitugyan diha kanila?
-
Unsa pa ang gisaad sa anghel ni Joseph ug Oliver nga ilang madawat? Gikan kang ni kinsa nila madawat kini?
(Mga tubag: (1) Joseph Smith—Kasaysayan o Doktrina ug mga Pakigsaad 13; (2) Mayo 15, 1829 [tan-awa sa Joseph Smith—Kasaysayan 1:72]; (3) Juan Bautista [tan-awa sa Joseph Smith—Kasaysayan 1:72]; (4) Pinaagi sa pagpandong sa mga kamot [tan-awa sa Joseph Smith—Kasaysayan 1:68, 71]; (5) Gisultihan sila ni Juan Bautista nga sa dili madugay madawat nila ang Melchizedek Priesthood gikan sa mga Apostoles Pedro, Santiago, ug Juan [tan-awa sa Joseph Smith—Kasaysayan 1:72].)
Human sa debosyonal, hangyoa ang mga estudyante sa pagpakigbahin sa ilang mga tubag sa unang pangutana. Human nila matubag og husto kini nga pangutana, pag-assign og mga estudyante sa pagtrabaho nga magpares ug pag-check sa ilang mga tubag sa nahibilin nga mga pangutana. Itudlo kanila ang paggamit sa Joseph Smith—Kasaysayan 1:68–72 ug ang paghulagway ni Oliver Cowdery nga nagsunod sa Joseph Smith—Kasaysayan. Mahimo kang molibut sa classroom aron matabangan ang mga estudyante sa pagpangita sa hustong mga tubag.
Human sa igong panahon, pagdungan og ribyu sa mga tubag isip usa ka klase. Samtang dungan ninyong gihisgutan kining mga tubag, tabangi ang mga estudyante sa pag-ila ug sa pagsabut sa mosunod nga mga doktrina: si Juan Bautista mipahiuli sa Aaronic Priesthood dinhi sa yuta (tan-awa sa Joseph Smith—Kasaysayan 1:72). Ang pagkapari gitugyan pinaagi sa pagpandong sa mga kamot (tan-awa sa Joseph Smith—Kasaysayan 1:68, 71). Usab, samtang nagribyu kamo sa mga tubag sa mga estudyante, ipasabut nga nadawat ni Joseph Smith ug Oliver Cowdery ang Melchizedek Priesthood gikan ni Pedro, Santiago, ug Juan sa wala madugay sa Mayo 1829 (tan-awa sa Larry C. Porter, “The Restoration of the Aaronic and Melchizedek Priesthoods,” Ensign, Dis. 1996, 30–47).
Dapita ang usa ka estudyante sa pagbasa og kusog sa Joseph Smith—Kasaysayan 1:68. Hangyoa ang klase sa pagsunod, nga mangita sa unsay gibuhat ni Joseph ug ni Oliver nga migiya kanila sa pagpangutana sa Ginoo mahitungod sa bunyag alang sa kapasayloan sa mga sala.
-
Sumala niini nga bersikulo, unsay naggiya ni Joseph ug Oliver sa pagpangutana mahitungod sa bunyag alang sa kapasayloan sa mga sala? (Naghubad sila sa Basahon ni Mormon ug nakabasa og mga pagtulun-an kalabut sa bunyag alang sa kapasayloan sa mga sala.)
Ipasabut nga ang pagpahiuli sa Aaronic Priesthood importante kaayo nga ang mga pulong ni Juan Bautista gilakip diha sa Doktrina ug mga Pakigsaad isip seksyon 13. Dapita ang usa ka estudyante sa pagbasa og kusog sa Doktrina ug mga Pakigsaad 35:13. Hangyoa ang klase sa pagsunod ug sa pag-ila kon sa unsa nga paagi ang pagpahiuli sa Aaronic Priesthood mitubag sa pag-ampo ni Joseph ug Oliver nga mahibalo pa mahitungod sa bunyag alang sa kapasayloan sa mga sala.
-
Sa unsa nga mga paagi ang pagpahiuli sa Aaronic Priesthood mitubag sa pag-ampo ni Joseph ug Oliver nga mahibalo pa mahitungod sa bunyag alang sa kapasayloan sa mga sala?
Diha sa pisara, pagdrowing og usa ka yanong hulagway sa usa ka pultahan nga adunay yawehanan.
-
Unsa ang katuyoan sa usa ka pultahan? (Samtang ang mga estudyante naghisgot niini nga pangutana, tabangi silang makasabut nga ang pultahan gibutang diha sa agianan padulong sa laing dapit. Agig dugang, ang usa ka pultahan mahimong mopagawas kanato o mopasulod kanato.)
Ipakita sa mga estudyante ang usa ka pundok sa mga yawe (o pagdrowing og usa ka yanong hulagway sa usa ka yawe diha sa pisara) ug ipangutana ang mosunod:
-
Sa unsa nga paagi ang usa ka yawe may kalabutan ngadto sa kagamitan sa pultahan? (Ang yawe nagtrangka o nag-abli sa pultahan. Kon kita mogamit og yawe sa pag-abli og pultahan, kini makapaagi kanato ug makapasinati kon unsay anaa sa pikas nga bahin.)
Ipasabut nga ang Ginoo naggamit og mga yawe isip usa ka simbolo sa pagrepresentar sa awtoridad sa priesthood, nga nag-abli sa agianan alang kanato sa pagdawat og walay katapusang mga oportunidad ug mga panalangin. Dapita ang mga estudyante sa pagsiksik sa Doktrina ug mga Pakigsaad 13:1, nga mangita sa mga yawe nga kauban sa Aaronic Priesthood. Mahimo kang mosugyot nga markahan sa mga estudyante kini nga mga yawe diha sa ilang mga kasulatan samtang makit-an nila kini.
-
Unsay gisulti ni Juan Bautista sa gihuptang mga yawe sa Aaronic Priesthood? (Ang Aaronic Priesthood naghupot sa mga yawe sa pagpangalagad sa mga anghel, sa ebanghelyo sa paghinulsol, ug sa bunyag pinaagi sa pagpaunlod alang sa kapasayloan sa mga sala. Mahimo nimong dapiton ang mga estudyante sa pagsulat niini nga pamahayag ubos sa hulagway sa pultahan diha sa pisara.)
Aron matabangan ang mga estudyante nga mas makasabut niini nga mga yawe sa Aaronic Priesthood ug ang mga panalangin nga maanaa sa mga miyembro sa Simbahan, dapita ang usa ka estudyante sa pagbasa og kusog sa mosunod nga pagpasabut ni Elder Dallin H. Oaks sa Korum sa Napulog Duha ka mga Apostoles. (Ikonsiderar ang paghimo og gamay nga kopya niini nga pamahayag alang sa kada estudyante aron itago diha sa iyang mga kasulatan.)
“Unsa ang gipasabut niini nga ang Aaronic Priesthood naghupot [sa yawe sa] ‘ebanghelyo sa paghinulsol ug sa bunyag, ug sa kapasayloan sa mga sala’? Ang kahulugan makaplagan diha sa ordinansa sa bunyag ug diha sa sakrament. Ang bunyag alang sa kapasayloan sa mga sala, ug ang sakrament mao ang pagbag-o sa mga pakigsaad ug sa mga panalangin sa bunyag. Ang duha kinahanglan nga unhan sa paghinulsol. …
“Walay usa [kanato] nga nabuhi nga walay sala sukad sa [atong] bunyag. Kon walay bisan unsang paagi alang sa dugang pa nga paglimpyo human sa atong bunyag, ang matag usa kanato mawala sa mga butang nga espirituhanon. …
“Kita gimandoan sa paghinulsol sa atong mga sala ug sa pagduol ngadto sa Ginoo uban sa mapainubsanong kasingkasing ug mahinulsulong espiritu ug sa pag-ambit sa sakrament agi og pagsunod sa mga pakigsaad niini. Kon atong bag-ohon ang atong mga pakigsaad sa bunyag niini nga paagi, ang Ginoo nagbag-o sa epekto sa paglimpyo sa atong bunyag. …
“Dili kita makahimo sa pagpalabi og istorya sa importansya sa Aaronic Priesthood dinhi niini. Ang tanan niining importanting mga lakang kabahin sa kapasayloan sa mga sala gihimo pinaagi sa makaluwas nga ordinansa sa bunyag ug sa makabag-o nga ordinansa sa sakrament. Kining duha ka mga ordinansa gidumala pinaagi sa mga tighupot sa Aaronic Priesthood ubos sa direksyon sa bishopric, kinsa naggamit sa mga yawe sa ebanghelyo sa paghinulsol ug sa bunyag ug sa kapasayloan sa mga sala” (“The Aaronic Priesthood and the Sacrament,” Ensign, Nob. 1998, 37–38).
-
Sa unsa nga paagi ang mga yawe sa Aaronic Priesthood nagtabang kanato sa pagdawat sa mga panalangin sa Pag-ula ni Jesukristo?
-
Sumala ni Elder Oaks, kinsa ang nagdumala sa mga yawe sa ebanghelyo sa paghinulsol ug bunyag sa matag ward?
Aron matabangan ang mga estudyante nga mas makasabut sa yawe sa pagpangalagad sa mga anghel, dapita ang usa ka estudyante sa pagbasa sa mosunod nga pagpasabut ni Elder Oaks:
“Isip usa ka batan-ong tighupot sa Aaronic Priesthood, wala ako maghunahuna nga makakita ako og anghel, ug natingala ako kon unsa ang kalabutan sa ingon nga mga pagpakita ngadto sa Aaronic Priesthood.
“Apan ang pagpangalagad sa mga anghel mahimo usab nga dili makita. Ang sama sa anghel nga mga mensahe mahimong ikahatag pinaagi sa tingog o pinaagi sa mga hunahuna o mga pagbati lamang nga gipahayag ngadto sa salabutan” (“The Aaronic Priesthood and the Sacrament,” 39).
Dapita ang usa ka estudyante sa pag-adto sa atubangan sa klase ug paguniti ang mga hulagway sa Batan-ong Lalaki nga Gibunyagan (Libro sa mga Hulagway sa Ebanghelyo [2009], nu. 103; tan-awa usab sa LDS.org) ug ang Pagpanalangin sa Sakrament (nu. 107), kon aduna.
-
Sa unsa nga paagi nga ang pagsabut sa mga yawe sa Aaronic Priesthood nag-impluwensya sa inyong mga hunahuna o mga lihok samtang kamo nag-andam, nagpahigayon, o nag-ambit sa sakrament kada semana?
Dapita ang batan-ong mga babaye sa klase sa pagpakigbahin sa ilang mga pagbati mahitungod sa Aaronic Priesthood ug sa mga panalangin nga gidala niini sa ilang mga kinabuhi. Mahimo usab nimong ipakigbahin kon nganong ikaw nagpasalamat sa pagpahiuli sa Aaronic Priesthood.
Joseph Smith—Kasaysayan 1:73–75
Si Joseph Smith ug si Oliver Cowdery nagsinati og dagkong mga panalangin human sa ilang mga bunyag
Dapita ang usa ka estudyante sa pagbasa og kusog sa Joseph Smith—Kasaysayan 1:73. Hangyoa ang klase sa pagsunod ug sa pag-ila sa mga pulong nga naghulagway unsa ang nasinati ni Joseph ug Oliver human sila bunyagi. (Mahimo kang mosugyot nga markahan sa mga estudyante kini nga mga pulong diha sa ilang mga kasulatan.)
-
Unsa ang mitungha diha ni Joseph ug Oliver human sila mabunyagi?
Sanglit si Joseph ug Oliver wala pa makadawat sa gasa sa Espiritu Santo, ang ilang nasinati niini nga okasyon mao ang gahum sa Espiritu Santo. Si Joseph ug si Oliver makadawat sa Melchizedek Priesthood alang sa pagtugyan sa gasa sa Espiritu Santo sa umaabut nga petsa (tan-awa sa Joseph Smith—Kasaysayan 1:70; tan-awa sa Giya ngadto sa mga Kasulatan, “Espiritu Santo,” scriptures.lds.org).
Dapita ang usa ka estudyante sa pagbasa og kusog sa Joseph Smith—Kasaysayan 1:74. Hangyoa ang klase sa pagsunod, mangita sa pihong panalangin nga nadawat ni Joseph ug ni Oliver pinaagi sa gahum sa Espiritu Santo. Human mo-report ang mga estudyante kon unsay ilang nakit-an, isulat ang mosunod nga doktrina diha sa pisara: Ang Espiritu Santo nagtabang kanato sa pagsabut sa kahulugan ug katuyoan sa mga kasulatan.
-
Ngano kaha nga gikinahanglan nato ang Espiritu Santo sa pagtabang kanato sa pagsabut sa mga kasulatan?
-
Kanus-a ang Espiritu Santo mitabang kaninyo sa pagsabut sa “tinuod nga kahulugan ug katuyoan” sa mga kasulatan?
Dapita ang mga estudyante sa paggahin og pipila ka minuto sa pagsulat diha sa ilang mga class notebook o mga scripture study journal mahitungod sa unsay ilang buhaton sa pagdapit sa panabang sa Espiritu Santo samtang nagtuon sila sa mga kasulatan.
Komentaryo ug Background nga Impormasyon
Joseph Smith—Kasaysayan 1:74. Pagbaton sa Balaang Espiritu kon nagtuon sa mga kasulatan
Si Elder Dallin H. Oaks sa Korum sa Napulog Duha ka mga Apostoles mikomentaryo sa panginahanglan sa pagbaton sa Espiritu uban kanato samtang nagtuon kita sa mga kasulatan:
“Kon kita magtinguha ug modawat og pagpadayag ug inspirasyon aron sa pagdugang sa atong pagsabut sa mga kasulatan, atong makab-ut ang katumanan sa dinasig nga saad ni Nephi nga kadtong kinsa makugihong mangita makakaplag ‘sa mga misteryo sa Dios … ipadayag ngadto kanila, pinaagi sa gahum sa Espiritu Santo’ (1 Ne. 10:19).
“…Daghan sa ubang mga butang nga ginganlan diha sa mga kasulatan mahimong masabtan lamang pinaagi sa inspirasyon sa Espiritu Santo. Sa mga pulong ni Apostol Pablo,‘Ang mga butang sa Dios dili masayran sa tawo, gawas kon anaa kaniya ang Espiritu sa Dios’ (JST, 1 Taga-Cor. 2:11), …
“Si Joseph Smith ug si Oliver Cowdery ang mihatag og ehemplo alang niini nga dispensasyon. Human sa ilang bunyag, napuno sila sa Espiritu Santo. Dayon, sumala sa pagpasabut ni Joseph diha sa iyang personal nga kasaysayan, ‘Ang among mga hunahuna nga karon nadan-agan, kami misugod sa pag-angkon sa salabutan sa mga kasulatan, ug ang tinuod nga kahulugan ug katuyoan sa ilang labaw nga kahibulongan nga mga pulong nga gipadayag ngari kanamo sa usa ka paagi nga kami dili gayud unta makakat-on, ni sukad makahunahuna’ (JS—K 1:74). …
“Ingon sa gisulti ni Pablo ngadto ni Timoteo, ‘ang tibuok kasulatan gituga sa Dios’ (2 Tim. 3:16 tan-awa usab sa 2 Ped. 1:21). Kini nagpasabut nga aron masabtan ang kasulatan, ang atong mga salabutan gikinahanglan nga malamdagan sa Espiritu sa Ginoo” (“Scripture Reading and Revelation,” Ensign, Ene. 1995, 7, 9).
Doktrina ug mga Pakigsaad 13:1. Unsa ang gipasabut nga ang anak nga mga lalaki ni Levi maghalad og halad ngadto sa Ginoo?
Si Propeta Joseph Smith mihatag sa mosunod nga pagpasabut sa sakripisyo nga ihalad sa anak nga mga lalaki ni Levi:
“Gihunahuna sa kadaghanan nga ang sakripisyo sa kinatibuk-an gihunong sa dihang ang Dakong Sakripisyo [ingnon nato., ang sakripisyo ni Ginoong Jesus] gihalad, ug nga wala na kinahanglana ang ordinansa sa sakripisyo sa umaabut: apan kadtong kinsa nagtuo niini sa tinuod dili sinati sa mga katungdanan, mga pribilihiyo ug awtoridad sa priesthood, o sa mga Propeta.
“Ang paghalad og sakripisyo sa kaniadto pa kanunay konektado ug nagporma og usa ka bahin sa mga katungdanan sa Priesthood. Kini misugod sa Priesthood ug ipadayon hangtud human sa pagbalik ni Kristo, gikan sa henerasyon ngadto sa henerasyon. …
“Kini nga mga sakripisyo, ingon man sa matag ordinansa nga sakop sa Priesthood, mahimo, kon ang Templo sa Ginoo pagatukuron, ug ang anak nga mga lalaki ni Levi mahinlo, nga hingpit nga mapahiuli ug mahatagan sa tanan nilang mga gahum, mga sanga, ug mga panalangin. Kini anaa ug sa kanunay maanaa kon ang mga gahum sa Melchizedek Priesthood igo nga gipaila; unsa pa ang laing paagi nga ang pag-uli sa tanang mga butang nga gipamulong pinaagi sa balaang mga Propeta mapahinabo? Kini dili pagasabton nga ang balaod ni Moises ma-estabilisar pag-usab uban sa tanan niini nga mga tulumanon ug nagkalain-laing mga seremonyas; kini wala gayud sukad ipamulong sa mga Propeta; apan kadto nga mga butang nga diha na sa dili pa panahon ni Moises, ingnon nato, ang sakripisyo, ipadayon” (History of the Church, 4:211–12).
Si Presidente Joseph Fielding Smith mipadayon sa pagpasabut:
“Kita nagpuyo sa dispensasyon sa kahingpitan sa mga panahon diin ang tanang mga butang pagapundukon, ug ang tanang mga butang ipahiuli gikan sa sinugdanan. Bisan kining yuta ipahiuli sa kahimtang nga milungtad sa wala pa makahimo og kalapasan si Adan. Karon sa kinaiyahan sa mga butang, ang balaod sa sakripisyo kinahanglan nga ipahiuli, o ang tanang mga butang nga gimando sa Ginoo dili ipahiuli. Busa, kini mahimong kinahanglan, alang sa anak nga mga lalaki ni Levi, kinsa mihalad og dugo nga mga sakripisyo sa karaan didto sa Israel, sa paghalad sa ingon nga sakripisyo pag-usab aron sa pagbalik ug pagkompleto niini nga ordinansa niini nga dispensasyon. Ang sakripisyo pinaagi sa pagpaagas og dugo gihimo sa mga panahon ni Adan ug tungod sa panginahanglan ipahiuli.
“Ang pagsakripisyo og mga hayop pagahimoon aron sa pagkompleto sa pagpahiuli kon ang templo nga gipamulong matukod; sa sinugdanan sa milenyum, o diha sa pagpahiuli, ang pagsakripisyo og dugo pagahimoon sa igong gidugayon aron makompleto ang kahingpitan sa pagpahiuli niini nga dispensasyon. Pagkahuman ang sakripisyo himoon sa uban nga paagi” (Doctrines of Salvation, ed. Bruce R. McConkie [1956], 3:94).
Doktrina ug mga Pakigsaad 13:1. Pagpasabut sa mga yawe
Gipasabut ni Elder Bruce R. McConkie nga ang mga pagpadayag sa Ginoo nagpasabut sa mga yawe sa duha ka paagi:
“Duha ka nagkalain-laing paggamit sa pulong nga mga yawe makita diha sa mga pagpadayag. Ang usa adunay kalabutan sa mga gahum sa pagdumala pinaagi diin ang Simbahan o gingharian ug ang tanan niini nga mga organisasyon gidumala, ang mga yawe sa gingharian ingon nga mao ang mga gahum sa kapangulohan. Ang laing paggamit nagpasabut ngadto sa paagi nga gihatag pinaagi diin ang usa ka butang gipadayag, gidiskubre, o gipaila” (Mormon Doctrine, 2nd ed. [1966], 409–10).
Doktrina ug mga Pakigsaad 13:1. Ang yawe sa pagpangalagad sa mga anghel
Si Elder Dallin H. Oaks sa Korum sa Napulog Duha ka mga Apostoles mihatag sa mosunod nga panabut ngadto sa yawe sa pagpangalagad sa mga anghel:
“Sa hapit magkapareha nga paagi, kini nga mga ordinansa sa Aaronic Priesthood importante usab kaayo sa pagpangalagad sa mga anghel.
“‘Ang pulong nga “anghel” gigamit diha sa mga kasulatan alang sa bisan unsa nga langitnong tawo nga nagdala og mensahe sa Dios’ (George Q. Cannon, Gospel Truth, sel. Jerreld L. Newquist [1987], 54). Ang mga kasulatan naghingalan og daghang mga higayon diin ang usa ka anghel personal nga mipakita. …
“Apan ang pagpangalagad sa mga anghel mahimo usab nga dili makita. Ang sama sa anghel nga mga mensahe mahimong ikahatag pinaagi sa tingog o pinaagi sa mga hunahuna lamang o mga pagbati nga gipahayag ngadto sa salabutan. …
“… Kadaghanan sa sama sa anghel nga mga komunikasyon nabati o nadungog kaysa nakita.
Sa unsa nga paagi gihuptan sa Aaronic Priesthood ang mga yawe sa pagpangalagad sa mga anghel? Ang tubag sama sa tubag alang sa Espiritu sa Ginoo.
“Sa kinatibuk-an, ang mga panalangin sa espirituhanong panag-uban ug komunikasyon anaa lamang niadtong kinsa limpyo. Ingon nga gipasabut og una, pinaagi sa Aaronic Priesthood nga mga ordinansa sa bunyag ug sa sakrament, kita malimpyohan sa atong mga sala ug gisaaran nga kon kita mosunod sa atong mga pakigsaad makabaton kita kanunay sa Iyang Espiritu nga mag-uban kanato. Ako nagtuo nga kana nga saad wala lamang nagpasabut sa Espiritu Santo apan usab ngadto sa pagpangalagad sa mga anghel, kay ang mga ‘anghel mamulong pinaagi sa gahum sa Espiritu Santo; busa, sila namulong sa mga pulong ni Kristo’ (2 Nephi 32:3). Busa mao kini nga kadtong kinsa naghupot sa Aaronic Priesthood nag-abli sa pultahan alang sa tanang miyembro sa Simbahan kinsa sa katakus nag-ambit sa sakrament aron makapahimulos sa panag-uban sa Espiritu sa Ginoo ug sa pagpangalagad sa mga anghel. …
“Ang Aaronic Priesthood naghupot sa mga yawe sa ‘ebanghelyo sa paghinulsol ug sa bunyag, ug sa kapasayloan sa mga sala” (D&P 84:27). Ang makalimpyo nga gahum sa Pag-ula sa atong Manluluwas gibag-o alang kanato samtang kita nag-ambit sa sakrament. Ang saad nga kita ‘unta sa kanunay makabaton sa iyang Espiritu uban [kanato]’ (D&P 20:77) gikinahanglan sa atong espiritwalidad. Ang mga ordinansa sa Aaronic Priesthood mga importante ngadto sa tanan niini” (“The Aaronic Priesthood and the Sacrament,” Ensign, Nob. 1998, 38–40).
Doktrina ug mga Pakigsaad 13:1. Ang pagpangalagad sa mga anghel
Gipasabut ni Presidente Gordon B. Hinckley ang pagpangalagad sa mga anghel niini nga paagi:
“Sa panahon nga si Wilford Woodruff, usa ka tawo kinsa nagpuyo sa daghang mga katuigan ug daghang mga kasinatian, mao ang Presidente sa Simbahan, miingon siya ngadto sa batang mga lalaki sa Aaronic Priesthood: ‘Ako nagtinguha sa pagsilsil diha kaninyo sa kamatuoran nga walay kalainan kon ang usa ka tawo usa ka Priest o Apostol, kon siya magpalambo sa iyang calling. Ang usa ka Priest naghupot sa mga yawe sa pagpangalagad sa mga anghel,’ miingon siya. ‘Wala gayud sa akong kinabuhi, isip usa ka Apostol, Seventy, o usa ka Elder, nga ako sukad dihay labaw nga proteksyon sa Ginoo kay sa panahong naghupot sa responsibilidad sa usa ka Priest.’ (Millennial Star, 53:629.)
“Hunahunaa kini, mahal kong batan-ong mga kaigsoonan. Kini nga priesthood nga inyong gihuptan nagdala uban niini sa mga yawe sa pagpangalagad sa mga anghel. Kana nagpasabut, ingon sa akong pagsabut niini, nga kon kamo magpuyo nga takus sa priesthood, kamo adunay katungod sa pagdawat ug sa pagpahimulos sa gahum gayud sa langitnong mga tawo sa paggiya kaninyo, sa pagpanalipod kaninyo, sa pagpanalangin kaninyo. Kinsa nga batang lalaki, kon siya manggihunahunaon, dili mohangop niining talagsaong panalangin?” (“The Priesthood of Aaron,” Ensign, Nob. 1982, 45).