Doktrina ug mga Pakigsaad 18:1–16

Pasiuna

Nadawat ni Joseph Smith ang pinadayag nga narekord sa Doktrina ug mga Pakigsaad 18 alang sa iyang kaugalingon, ni Oliver Cowdery, ug David Whitmer niadtong Hunyo 1829, wala madugay human gitugyan ni Pedro, Santiago, ug Juan ang Melchizedek Priesthood ngadto nila ni Joseph Smith ug Oliver Cowdery. Sa sinugdanan sa pinadayag, ang Ginoo mitudlo ni Oliver Cowdery kabahin sa pagtukod sa Simbahan. Dayon gitawag Niya si Oliver Cowdery ug David Whitmer sa pagsangyaw og paghinulsol.

Mga Sugyot alang sa Pagtudlo

Doktrina ug mga Pakigsaad 18:1–5

Ang Ginoo nagtudlo sa pagtukod sa Iyang Simbahan

Drowinga ang kauban nga litrato diha sa pisara sa dili pa magsugod ang klase.

Ikonsiderar ang pagbasa sa mosunod nga impormasyon o pagpaambit og susama nga impormasyon kabahin sa linog nga tingali nahitabo bag-ohay lang o duol sa inyong gipuy-an:

Niadtong Oktubre 17, 1989, sa alas 5:04 sa hapon, usa ka linog nga may gikusgon nga 6.9 sa Richter scale miigo sa San Francisco, California, nga dapit sa Estados Unidos. Liboan ka mga building ang nangadaut o nangaguba. Ang mga pundasyon sa daghang mga building nangliki, maoy nakaingon nga gideklarar ang mga building nga peligro.

Unsa kaha ang imong mga kabalaka nga magpuyo sa usa ka balay nga dunay huyang nga pundasyon?

Ipasabut nga ang Doktrina ug mga Pakigsaad 18 nagrekord sa pinadayag sa Ginoo kang Joseph Smith ug Oliver Cowdery kon unsaon sa pagtukod sa Iyang Simbahan diha sa lig-ong pundasyon. Sa sinugdanan niini nga pinadayag, ang Ginoo mihisgut sa mga butang nga gisulat ni Oliver Cowdery, nagpasabut sa mga pulong sa Basahon ni Mormon nga girekord ni Oliver samtang naglihok isip tigsulat ni Propeta Joseph Smith. Dapita ang usa ka estudyante sa pagbasa og kusog sa Doktrina ug mga Pakigsaad 18:1–4. Hangyoa ang klase sa pagpangita kon sa unsang paagi ang mga butang nga nahisulat diha sa Basahon ni Mormon makatabang sa pagtukod sa Simbahan.

Unsay gisulti sa Ginoo nga anaa sa Basahon ni Mormon? Sa unsang paagi ang mga pagtulun-an diha sa Basahon ni Mormon makatabang sa pagtukod sa Simbahan?

Dapita ang usa ka estudyante sa pagbasa og kusog sa Doktrina ug mga Pakigsaad 18:5. Hangyoa ang klase sa pag-ila unsa ang gisaad sa Manluluwas kon atong tukuron ang Iyang Simbahan diha sa pundasyon sa Iyang ebanghelyo.

Sumala sa bersikulo 5, unsay pagatukuran sa tinuod nga Simbahan? (Ang mga tubag sa mga estudyante kinahanglang magpakita sa mosunod nga doktrina: Ang tinuod nga Simbahan gitukod diha ni Jesukristo ug sa Iyang ebanghelyo.)
Unsa ang gisaad sa Ginoo kanato samtang atong tukuron ang Iyang Simbahan diha sa Iyang ebanghelyo?

Doktrina ug mga Pakigsaad 18:6–16

Ang Ginoo mitawag ni Oliver Cowdery ug David Whitmer sa pagsangyaw og paghinulsol

Dapita ang usa ka estudyante sa pagbasa og kusog sa Doktrina ug mga Pakigsaad 18:6. Hangyoa ang klase sa pagsunod, nga mangita sa unsa nga paagi ang Ginoo naghulagway sa pagkaylap sa ebanghelyo. Human ang mga estudyante mo-report sa ilang nadiskubrihan, dapita sila sa pagbasa sa Doktrina ug mga Pakigsaad 18:9 aron makat-on unsa ang gimando sa Ginoo agi og tubag sa nagkadugang nga kadautan sa kalibutan.

Unsay tubag sa Ginoo sa nagkadugang nga kadautan sa kalibutan? (Mitawag Siya og mga sulugoon aron mosangyaw og paghinulsol.)

Pahinumdumi ang mga estudyante nga ang Ginoo mitawag ni Oliver Cowdery ug David Whitmer sa pagsangyaw og paghinulsol, sama nga gitawag Niya si Apostol Pablo aron maoy ipabuhat. Samtang si Oliver ug David wala gitawag nga mga sakop sa Korum sa Napulog Duha ka mga Apostoles, aduna silay tahas sa pag-establisar niini nga korum sa ulahing mga adlaw. Ipasabut nga ang mga estudyante makakat-on pa og dugang mahitungod sa mga tahas ni Oliver Cowdery ug David Whitmer sa sunod nga leksyon.

Aron matabangan ang mga estudyante nga maandam sa pagtuon sa mga pagtulun-an sa Ginoo mahitungod sa bili sa mga kalag, pagpakita og pipila ka mga butang nga sa imong hunahuna dunay bili ngadto sa imong mga estudyante. Pangutan-a sila kon pila ang ilang ibayad alang sa matag butang. Ipasabut nga usa ka paagi sa pagtino sa bili sa usa ka butang mao ang pagsusi kon unsay andam nga ibayad sa mga tawo alang niini. Tingali dunay tawo nga moangkon nga ang usa ka partikular nga butang nagkantidad og piho nga presyo, apan sakto lamang kini nga presyo kon dunay laing tawo nga andam mobayad niana nga kantidad alang sa maong butang.

Basaha og kusog ang Doktrina ug mga Pakigsaad 18:10. Dapita ang mga estudyante sa paggamit niini nga bersikulo sa pagpasabut sa ilang bili sa panan-aw sa Dios. Ang mga estudyante mahimong mosugyot og lain-laing mga baruganan, apan siguroha nga mahatagan og gibug-aton nga ang bili sa mga kalag mahinungdanon sa panan-aw sa Dios.

Ngano kaha nga dako kaayo kamo og bili ngadto sa Dios?

Hangyoa ang usa ka estudyante sa pagbasa sa mosunod nga pamahayag ni Presidente Dieter F. Uchtdorf sa Unang Kapangulohan:

“Ang Dios nagtan-aw kaninyo dili lang isip mortal nga nilalang sa gamayng planeta nga mabuhi sa mubong panahon—Siya nagtan-aw kaninyo isip Iyang anak. Siya nagtan-aw kaninyo isip ang nilalang nga kamo makahimo ug giplanohan nga mahimo. Siya gusto nga kamo masayud nga kamo importante ngadto Kaniya” (“Kamo Importante ngadto Kaniya,” Liahona, Nob. 2011, 22).

Pahinumdumi ang mga estudyante sa kalihokan diin imong gipakita nga ang bili sa usa ka butang gibase sa unsay andam ibayad sa usa ka tawo alang niini. Dapita ang usa ka estudyante sa pagbasa sa Doktrina ug mga Pakigsaad 18:11–12. Hangyoa ang klase sa pagsunod ug hibaloan kon unsay andam ibayad sa Manluluwas alang kanato.

Unsa ang gibayad sa Manluluwas alang sa atong kalag?
Unsaon nato pagpakita og pasalamat sa sakripisyo nga gihimo sa Manluluwas alang kanato? (Bisan kon husto ang lain-laing mga tubag, hatagig gibug-aton nga usa sa labing maayong paagi nga makapakita kita sa atong pasalamat mao ang paghinulsol.)

Isulat ang mosunod nga pamahayag sa pisara: Mahinungdanon kaayo ang akong bili nga si Jesukristo nag-antus ug namatay aron ako makahinulsol.

Mahimo nimong isugyot nga isulat sa mga estudyante kini nga baruganan diha sa ilang class notebook o scripture study journal.

Sa unsang paagi kini nga kamatuoran makaimpluwensya kon unsaon ninyo pagtan-aw ang inyong kaugalingon?
Sa unsang paagi kini nga kamatuoran makaimpluwensya kon unsaon ninyo pagtratar ang ubang tawo?

Pagpamatuod sa gugma ug kaandam sa Manluluwas nga mamatay alang sa matag usa kanato.

Dapita ang mga estudyante nga hilum nga mobasa sa Doktrina ug mga Pakigsaad 18:13.

Ngano kaha nga mobati og dakong kalipay ang Ginoo kon maghinulsol kita?
Kon ang tawo motuo nga ang bili sa kalag mahinungdanon sa panan-aw sa Dios, nan unsa kaha ang ilang buhaton subay niana nga pagtuo? (Ang mga tubag mahimong maglakip sa mosunod: morespeto sa uban, moserbisyo sa uban, o mangandam sa pagserbisyo og misyon.)

Dapita ang mga estudyante nga hilum nga mobasa sa Doktrina ug mga Pakigsaad 18:14 aron makat-on kon unsay gipabuhat sa Ginoo ni Oliver Cowdery ug David Whitmer.

Unsa kaha ang gipasabut sa “pagsangyaw og paghinulsol”?

Aron matabangan ang mga estudyante nga mas makasabut niini nga mga pulong, basaha ang mosunod nga pamahayag ni Elder Neil L. Andersen sa Korum sa Napulog Duha ka mga Apostoles: “Ang pagsangyaw og paghinulsol nagpasabut lamang sa pagtabang sa mga tawo nga mobalik ngadto sa Dios” (“Preparing for Your Spiritual Destiny” [CES fireside address, Ene. 10, 2010], 7, speeches.byu.edu).

Unsa ang pipila ka paagi nga makatabang kita sa uban sa paghinulsol?

Dapita ang mga estudyante sa pagbasa sa Doktrina ug mga Pakigsaad 18:15–16 aron makat-on kon unsay masinati sa mga tawo kon motabang sila sa ubang tawo nga moduol kang Jesukristo.

Unsa nga mga panalangin ang ihatag niadtong nagtabang sa uban nga moduol kang Jesukristo? (Samtang motubag ang mga estudyante, mahimo nimong isulat ang mosunod nga baruganan diha sa pisara: Kon motabang kita sa uban nga maghinulsol ug moduol sa Ginoo, mobati kita og kalipay uban kanila sa gingharian sa Dios.)
Ngano kaha nga mobati kamo og kalipay kon modala kamo sa uban ngadto ni Jesukristo?

Dapita ang mga estudyante nga mopakigbahin og kasinatian diin sila o ilang kaila mibati og kalipay tungod kay nakatabang sila og tawo nga mas mapaduol sa Ginoo. Mahimo ka nga mopaambit og imong kaugalingon nga kasinatian.

Dapita ang mga estudyante sa pagsulat og usa ka butang nga ilang mahimo aron sa pagtabang sa buhat sa pagluwas og mga kalag. Hangyoa sila sa paghunahuna og piho nga mga tawo nga ilang matabangan.

Komentaryo ug Background nga Impormasyon

Doktrina ug mga Pakigsaad 18:5. “Akong lig-on nga sukaranan”

Ang Doktrina ug mga Pakigsaad 18:5 nag-ingon nga ang Simbahan sa Ginoo kinahanglang pagatukuron “diha sa tukuranan sa akong ebanghelyo ug sa akong lig-on nga sukaranan.” Ang Giya ngadto sa mga Kasulatan nagpasabut sa lig-on nga sukaranan nga “sa mahulagwayon nga pagkasulti, si Jesukristo ug ang iyang ebanghelyo, mao ang lig-on nga tukuranan ug sandiganan (D&P 11:24; 33:12–13). Ang lig-on nga sukaranan mahimo usab nga magpasabut ngadto sa pagpadayag, diin ang Dios naghimo sa iyang ebanghelyo nga masayran sa tawo (Mat. 16:15–18)” (Giya ngadto sa mga Kasulatan, “Lig-on nga Sukaranan,” scriptures.lds.org).

Doktrina ug mga Pakigsaad 18:10. “Ang bili sa mga kalag mahinungdanon sa panan-aw sa Dios”

Si Presidente Dieter F. Uchtdorf, sa Unang Kapangulohan, mitudlo:

“Ang matag tawo nga atong mahimamat usa ka VIP [importante kaayo nga tawo] ngadto sa atong Langitnong Amahan. Sa higayon nga ato kanang masabtan, makasugod kita sa pagsabut kon unsaon nato sa pagtratar ang atong isigkatawo.

“Usa ka babaye kinsa nakaagi og mga pagsulay ug kasakit sulod sa mga katuigan misulti nga naghilak, ‘Akong naamguhan nga sama ako sa usa ka karaan nga 20 dolyares nga kwarta—kum-ot, gisi, hugaw, giabusahan, ug nausab ang porma. Apan usa gihapon ako ka 20 dolyares nga kwarta. Ako adunay bili. Bisan tuod nga dili na kaayo ko maayong tan-awon ug bisan tuod nga ako giabusahan ug gigamit, ang akong bili 20 dolyares nga kwarta lang gyud gihapon.’” (“Kamo ang Akong mga Kamot,” Liahona, Mayo 2010, 69).

Doktrina ug mga Pakigsaad 18:15–16. “Kon kini mahimo nga ikaw manlimbasog”

Ang mosunod nga mga istorya naghulagway sa mga paningkamot ni Presidente Thomas S. Monson sa pagdala og mga kalag ngadto sa Manluluwas:

“Ang akong responsibilidad isip bishop daghan ug nagkalainlain, ug gibuhat nako kutob sa akong mahimo unsay gimando kanako. Ang Estados Unidos apil sa … gubat nianang higayuna. Kay daghan man sa atong mga miyembro ang nagsundalo, usa ka buluhaton miabut gikan sa Church headquarters alang sa tanang bishop nga hatagan ang matag sundalo og subskripsyon sa Church News ug sa Improvement Era, ang magasin sa Simbahan nianang panahona. Agig dugang, ang matag bishop gisugo sa pagsulat og personal, binulan nga sulat ngadto sa matag sundalo sa iyang ward. Sa among ward 23 ka tawo ang sundalo. Ang mga korum sa priesthood, sa paningkamot, mihatag og kwarta para sa subskripsyon. Gihimo nako, gani ang katungdanan, sa pagsulat og 23 ka sulat matag bulan. Hangtud karon duna pa koy kopya sa daghan nakong sulat ug mga tubag nga nadawat. Makahilak ko kon basahon nako pag-usab kining mga sulat. Dako kining kalipay nga masayud sa panumpa sa sundalo nga mosunod sa ebanghelyo, sa desisyon nga magpadayon uban sa iyang pamilya.

“Usa ka gabii akong gihatag sa usa ka sister sa ward ang 23 ka sulat para niana nga bulan. Iyang trabaho mao ang pagdala sa sulat ug paglista sa nag-usab-usab nga address. Mitan-aw siya sa usa ka sobre, mipahiyom, nangutana, ‘Bishop, wala pa ka pul-i? Ania ang laing sulat para ni Brother Bryson. Ika-17 na kini nimo nga sulat nga imong gipadala niya nga walay tubag.

“Mitubag ko, ‘Basin karong bulana.’ Nahitabo gayud, mao kanang bulana. Sa unang higayon, gitubag niya ang akong sulat. Ang iyang tubag halandumon, usa ka bahandi. Nagserbisyo siya sa layong lugar, nag-inusara, gimingaw, masulub-on. Misulat siya, ‘Dear Bishop, dili ko hilig mosulat.’ (Sutihan unta nako siya niana pipila ka bulan ang milabay.) Ang sumpay sa iyang sulat, ‘Salamat sa Church News ug mga magasin, apan labaw sa tanan sa imong mga sulat. Nagbag-o na ko. Naordinahan ko nga priest sa Aaronic Priesthood. Ang akong kasingkasing puno sa kalipay. Malipayon kaayo ko.’

“Nalipay pag-ayo si Brother Bryson sama sa iyang bishop. Akong nakat-unan nga ang paggamit sa panultihon, ‘Buhata ang [inyong] katungdanan; sa labing maayo. [Ang] uban Iyaha na sa Ginoo.’ (Henry Wadsworth Longfellow, “The Legend Beautiful,” sa The Complete Poetical Works of Longfellow [1893], 258).

“Paglabay sa mga katuigan, samtang nagtambong sa Salt Lake Cottonwood Stake dihang si James E. Faust ang presidente niini, gisaysay ko kana sa tuyo nga makaawhag og pagtagad para sa atong mga sundalo. Human sa miting, usa ka buotan nga batan-ong lalaki miduol. Gilamano ko niya ug miingon, ‘Bishop Monson, kahinumdom pa ka nako?’

“Nakaila dayon ko niya. ‘Brother Bryson!’ Misinggit ko. ‘Kumusta? Unsa may gibuhat nimo sa Simbahan?’

“Mapagarbuhon siyang mitubag, ‘Maayo ra ko. Nagserbisyo ko sa kapangulohan sa elders quorum. Salamat sa imong pagpakabana kanako ug sa imong mga sulat nga gipadala ug nga akong giampingan.’

“Kaigsoonan, ang kalibutan nagkinahanglan sa atong tabang” (“Andam ug Takus nga Moserbisyo,” Ensign o Liahona, Mayo 2012, 69).

“Sa dihang nagserbisyo ako isip bishop, nakabantay ko usa ka Dominggo sa buntag nga usa sa among mga priest wala sa miting sa priesthood. Akong gibiyaan ang korum ubos sa pagbantay sa adviser ug mibisita sa panimalay ni Richard. Miingon ang iyang inahan nga nagtrabaho siya sa West Temple Garage.

“Miadto ko sa garage aron mangita ni Richard ug nangita ko bisan asa apan wala gyud makakita niya. Sa kalit lang nadasig ko nga moli-li sa ubos sa kinaraan nga grasahanang lungag nga naa sa kilid sa trabahoan. Gikan sa kangitngit nakakita ko og duha ka nagsiga nga mga mata. Dayon akong nadungog si Richard nga miingon, ‘Nakit-an gyud ko nimo, Bishop! Mosaka ko.’ Human niana panagsa ra gyud siya makapalta og miting sa priesthood.

“Ang pamilya mibalhin sa duol nga stake. Milabay ang panahon, ug nakadawat ko og tawag sa telepono nga nagpahibalo nako nga si Richard gitawag nga moserbisyo og misyon sa Mexico, ug gidapit ko sa pamilya nga mamulong atol sa iyang farewell testimonial. Atol sa miting, sa pagtubag na ni Richard, iyang gihisgutan nga ang punto nga nakahimo siya og determinasyon nga magmisyon nahitabo usa ka Dominggo sa buntag—dili diha sa chapel, apan samtang mihangad gikan sa ubos sa ngitngit nga grasahanan ug nakita ang gituyhad nga kamot sa presidente sa iyang korum.

“Paglabay sa katuigan, si Richard padayon nga mikomunikar kanako, mosulti sa iyang pagpamatuod, sa iyang pamilya, ug sa iyang matinud-anong pagserbisyo sa Simbahan, lakip na ang iyang calling isip bishop” (“They Will Come,” Ensign, Mayo 1997, 46).