Kini ang ikaduha sa upat ka mga leksyon kabahin sa Doktrina ug mga Pakigsaad 88. Ang bahin sa pinadayag nga gihisgutan niini nga leksyon gihatag sa usa ka komperensya sa mga high priest sa Kirtland, Ohio, niadtong Disyembre 27 ug 28, 1832. Naglakip kini sa pagpasabut ni Jesukristo kon sa unsang paagi ang Dios nagdumala sa Iyang mga linalang ug usa ka pagdapit kanato nga magpaduol Kaniya.
Ang Manluluwas mipadayag nga ang tanang mga butang gidumala pinaagi sa balaang balaod
Pagpakita og litrato sa mga bitoon, sama sa Ang Ginoo Milalang sa Tanan nga mga Butang (Libro sa mga Hulagway sa Ebanghelyo [2009], nu. 2; tan-awa usab sa LDS.org), o pagdrowing og pipila ka bitoon diha sa pisara.
Imahe
stars in space
Nakatan-aw ba kamo sa bitoon ug naghunahuna kabahin sa Dios ug sa Iyang mga linalang? Unsa nga mga pangutana o mga hunahuna ang inyong gipamalandong samtang nagtan-aw kamo sa langit?
Ipasabut nga kon ang mga tawo maghunahuna sa kadaghan kaayo sa mga linalang sa Dios, usahay mobati sila og kagamay ug dili importante. Tingali maghunahuna sila kon ang Dios nakahibalo ba kanila. Sultihi ang mga estudyante nga samtang maghisgot sila sa mga bersikulo sa leksyon karon, ilang mahibaloan nga bisan og ang Dios naggiya og hilabihan ka daghan nga mga linalang sa tibuok kalangitan, Siya nahibalo sa matag usa kanato ug gusto nga mopaduol kanato.
Dapita ang usa ka estudyante sa pagbasa og kusog sa Doktrina ug mga Pakigsaad 88:41. Hangyoa ang klase sa pagsunod, nga mangita kon sa unsang paagi kini nga bersikulo nagpakita nga ang Dios adunay gahum sa pagdumala sa tanan Niyang mga linalang apan nagpabilin nga nahibalo sa matag usa kanato sa indibidwal nga paagi.
Sa unsang paagi kini nga bersikulo nagpakita nga ang Dios adunay gahum nga mahibalo sa matag usa kanato ug sa atong mga panginahanglan?
Dapita ang laing estudyante sa pagbasa og kusog sa Doktrina ug mga Pakigsaad 88:42–45. Hangyoa ang klase sa pagtino kon unsaon sa pagdumala sa Dios ang Iyang mga linalang.
Unsaon pagdumala sa Dios ang Iyang mga linalang? (Pinaagi sa Iyang mga balaod.)
Dapita ang mga estudyante sa paghunahuna og usa sa mga linalang sa Dios nga nakapahingangha kanila. Dapita ang pipila ka mga estudyante sa pagpaambit sa ilang mga hunahuna. Isip ehemplo, mahimo ka nga mopakita og butang o litrato nga nagrepresentar sa usa sa mga linalang sa Dios ug ipasabut ngano nga kana nga linalang nakapahingangha kanimo.
Dapita ang mga estudyante nga hilum nga mobasa sa Doktrina ug mga Pakigsaad 88:46–47 ug pangitaon kon unsay atong makita kon motan-aw kita sa mga linalang sa Dios.
Unsay atong makita kon magtan-aw kita bisan sa labing minos sa mga linalang sa Dios? (Ang mga estudyante mahimong mogamit og lain-laing mga pulong, apan ang ilang mga tubag kinahanglang mopahayag sa mosunod nga baruganan: Kon magtan-aw kita sa mga linalang sa Dios, atong makita ang Iyang pagkahalangdon ug gahum. Isulat sa pisara kini nga baruganan.)
Sa unsang paagi ang mga linalang nga inyong makita sa kalangitan ug sa yuta nag-impluwensya sa inyong pagpamatuod kalabut sa Dios?
Dapita ang mga estudyante nga hilum nga mobasa sa Doktrina ug mga Pakigsaad 88:48–50. Human sa igong panahon, hangyoa ang usa kanila sa pag-summarize sa mga bersikulo sa ilang kaugalingong mga pulong.
Ang Ginoo nagsaysay og usa ka sambingay sa mga tawo nga nagtrabaho sa umahan ug gitag-tagsa sa pagbisita sa ilang agalon
Ipasabut nga ang Doktrina ug mga Pakigsaad 88:51–60 naglangkob og sambingay nga makatabang kanato nga makasabut sa mga inter-aksyon sa Dios ngadto sa mga gingharian, o mga kalibutan, nga Iyang gilalang. Dapita ang usa ka estudyante sa pagbasa og kusog sa Doktrina ug mga Pakigsaad 88:51–55. Hangyoa ang klase sa pagsunod, nga mangita kon unsa ang gimando sa tawo diha sa sambingay nga buhaton sa matag usa sa iyang mga sulugoon ug unsay iyang gisaad sa matag usa sa iyang mga sulugoon.
Unsa ang gisugo sa tawo nga buhaton sa Iyang mga sulugoon? Unsa ang iyang gisaad sa iyang mga sulugoon? (Gisugo niya sila sa pagtrabaho diha sa iyang umahan. Misaad siya nga tagsa-tagsaon niya sila sa pagbisita.
I-summarize ang Doktrina ug mga Pakigsaad 88:56–60 pinaagi sa pagpasabut nga diha sa sambingay, ang ginoo sa umahan mibisita sa matag usa sa iyang mga sulugoon sa dihang turno na nila. Ang matag sulugoon “nakadawat sa kahayag sa panagway sa ilang ginoo, matag tawo sa iyang takna” (D&P 88:58).
Dapita ang usa ka estudyante sa pagbasa og kusog sa Doktrina ug mga Pakigsaad 88:61. Hangyoa ang klase sa pagsunod ug sa pagpangita kon unsay gitudlo niini nga sambingay kanato kon sa unsang paagi ang Dios makig-interact sa mga gingharian nga Iyang gilalang.
Unsa ang gitudlo niini nga sambingay kon sa unsang paagi ang Dios makig-interact sa mga gingharian nga Iyang gilalang? (Tabangi ang mga estudyante nga mahibalo sa mosunod nga doktrina: Ang Dios mobisita sa matag usa sa Iyang mga gingharian ug sa mga lumulupyo niini sa Iyang panahon. Isulat kini nga doktrina diha sa pisara.)
Ang Dios misaad nga magpaduol kanato kon kita mopaduol Kaniya
Ipasabut nga ang Ginoo nakaanhi na sa Iyang gingharian dinhi sa yuta ug nga Siya moanhi pag-usab ug maghari dinhi panahon sa Milenyum. Sa Doktrina ug mga Pakigsaad 88:62–69, ang Ginoo mitudlo sa unsay atong mabuhat aron Siya mopaduol nato karon. Dapita ang mga estudyante sa pagpamalandong sa mosunod nga mga pangutana:
Unsa kasuod ang inyong gibati ngadto sa Ginoo? Ganahan ba mong mas mapaduol ngadto Kaniya?
Dapita ang mga estudyante nga hilum nga mobasa sa Doktrina ug mga Pakigsaad 88:62–63, nga mangita sa mga butang nga atong mahimo aron madapit ang Ginoo nga mopaduol kanato.
Unsa nga baruganan ang gitudlo niini nga mga bersikulo mahitungod sa pagpaduol ngadto sa Ginoo? (Samtang motubag ang mga estudyante, isulat sa pisara ang mosunod nga baruganan: Kon magpaduol kita sa Ginoo, niana Siya mopaduol kanato.)
Unsa nga mga pulong sa bersikulo 63 ang nagtudlo kon unsaon nato nga mapaduol sa Ginoo? (Pangita, pangayo, ug tuktok.)
Ipasabut nga ang mga pulong nga pangita, pangayo, ug tuktok mga pulong sa pagbuhat.
Unsa ang pipila ka mga buhat nga nakatabang ninyo sa pagpangita, pagpangayo, ug pagpanuktok aron mas mapaduol sa Ginoo?
Aron matabangan ang mga estudyante nga makasabut sa usa ka paagi nga mapaduol sila sa Ginoo, dapita ang usa ka estudyante sa pagbasa og kusog sa mosunod nga pamahayag ni Presidente Spencer W. Kimball:
Imahe
President Spencer W. Kimball
“Akong nakita nga kon dili kaayo nako hatagan og bili ang akong pakigrelasyon uban sa Dios ug sa dihang maora og walay diosnong dalunggan nga naminaw ug walay diosnong tingog nga namulong, ako layo ra gayud kaayo. Kon akong isubsob ang akong kaugalingon sa mga kasulatan ang gilay-on magkaduol ug ang pagka-espirituhanon mobalik.” (Mga Pagtulun-an sa mga Presidente sa Simbahan: Spencer W. Kimball [2006], 84).
Aron matabangan ang mga estudyante nga molambo sa ilang pagsabut kon sa unsang paagi ang Langitnong Amahan motubag sa ilang mga pag-ampo, basaha og kusog ang Doktrina ug mga Pakigsaad 88:64–65. Dapita ang mga estudyante sa pagsunod ug sa pagpangita sa saad sa Manluluwas kanato kon mag-ampo kita sa Amahan diha sa Iyang ngalan.
Niini nga bersikulo, unsa ang gitudlo sa Manluluwas kon sa unsang paagi ang Langitnong Amahan motubag sa atong mga pag-ampo? (Tabangi ang mga estudyante nga mahibalo sa mosunod nga baruganan: Ang Langitnong Amahan motubag sa atong mga pag-ampo sa mga paagi nga Iyang nasayran nga labing maayo alang kanato. Isulat sa pisara kini nga baruganan.)
Aron matabangan ang mga estudyante nga makasabut niini nga baruganan, mahimo nimo silang hatagan og kopya sa mosunod nga pamahayag ni Elder Richard G. Scott sa Korum sa Napulog Duha ka mga Apostoles. Dapita ang usa ka estudyante sa pagbasa og kusog sa pamahayag, ug hangyoa ang klase sa pagsunod ug sa pagtino kon unsay atong buhaton kon ang Langitnong Amahan motubag sa pag-ampo sa paagi nga lahi sa unsay atong gilauman o gidahuman.
Imahe
Elder Richard G. Scott
“Lisud kaayo kon ang sinserong pag-ampo sa mga butang nga inyong labawng gitinguha dili matubag sa paagi nga inyong gusto. Lisud sabton nganong ang inyong bug-os nga paggamit ug sinserong pagtuo sa usa ka masulundong kinabuhi dili makahatag sa gitinguhang mahitabo. … Usahay lisud kaayo ang pag-ila unsay pinakamaayo o angay kaninyo sa kadugayan. Ang inyong kinabuhi mas sayon kon inyong sabton nga ang gipangbuhat sa Dios sa inyong kinabuhi alang sa inyong mahangturongkaayohan” (“Ang Paggamit sa Langitnon nga Gasa sa Pag-ampo,”Liahona, Mayo 2007, 9).
Ikonsiderar ang pagdapit og pipila ka mga estudyante sa pagpaambit og kaugalingon nilang kasinatian sa dihang ang Langitnong Amahan mitubag sa ilang mga pag-ampo sa paagi nga labing maayo alang kanila. Mahimo ka usab nga mopaambit og kasinatian.
Ipasabut nga sa Doktrina ug mga Pakigsaad 88:66, atong makat-unan nga usa ka paagi nga makigsulti ang Dios kanato mao ang “sama sa tingog sa usa nga nagpahayag diha sa kamingawan.” Dapita ang mga estudyante nga hilum nga mobasa sa Doktrina ug mga Pakigsaad 88:66, nga mangita kon sa unsang paagi ang tingog sa Dios moabut kanato.
Sumala niini nga bersikulo, sa unsang paagi ang tingog sa Dios sama “sa tingog sa usa nga nagpahayag diha sa kamingawan”?
Kanus-a kamo mibati nga ang Dios duol kaninyo bisan tuod wala kamo makakita Kaniya?
Dapita ang usa ka estudyante sa pagbasa og kusog sa Doktrina ug mga Pakigsaad 88:67–69. Hangyoa ang klase sa pagsunod ug sa pagpangita og dugang nga mga paagi nga makapaduol kita sa Ginoo. Hangyoa ang mga estudyante sa pagreport sa ilang nakit-an.
Isulat sa pisara ang mosunod nga dili kompleto nga pamahayag: Kon ang akong katuyoan usa ngadto sa himaya sa Dios, niana …
Dapita ang mga estudyante sa pagkompleto sa pamahayag gamit ang ilang nakat-unan gikan sa bersikulo 67. Ang pamahayag mahimong mabasa sama sa mosunod: Kon ang akong katuyoan usa ngadto sa himaya sa Dios, niana ako mapuno sa kahayag. Mahimo nimong isugyot nga markahan sa mga estudyante kini nga baruganan sama nga kini makita diha sa Doktrina ug mga Pakigsaad 88:67.
Unsa kaha ang gipasabut nga ang inyong katuyoan “usa ngadto sa … himaya [sa Ginoo]”? (Samtang motubag ang mga estudyante niini nga pangutana, tingali maghisgot sila og lain-laing piho nga mga ehemplo. Siguroa nga nakasabut sila nga sa kinatibuk-an, ang mga pulong nagpasabut nga mahimong hingpit nga mapahinunguron sa buhat ug mga katuyoan sa Dios.)
Paghunahuna og mga tawo nga inyong kaila nga daw napuno sa kahayag sa Ginoo. Sa unsang mga paagi nga inyong nakita kini nga kahayag diha kanila?
Sumala sa bersikulo 68, unsay kinahanglan natong buhaton aron ang atong mga hunahuna usa ngadto sa Dios? (Mahimo nimong ipasabut nga ang mga pulong “ibalaan ang inyong mga kaugalingon” nagpasabut sa atong panginahanglan nga mahimong putli ug malimpyohan gikan sa sala. Mahimo kitang mabalaan pinaagi sa Pag-ula ni Jesukristo ug sa impluwensya sa Espiritu Santo samtang maghinulsol kita sa atong mga sala, modawat sa mga ordinansa sa priesthood, ug motuman sa atong mga pakigsaad.)
Dapita ang mga estudyante sa pagbasa og usab sa mga doktrina ug mga baruganan nga imong gisulat sa pisara. Dayon hangyoa sila sa paghunahuna nga nagtan-aw sila sa mga bitoon uban sa usa ka higala kinsa mibati nga ang Dios wala masayud kaniya. Dapita ang mga estudyante sa pagsulat sa ilang mga class notebook o mga scripture study journal kon unsay ilang isulti sa ilang higala, gamit ang mga baruganan diha sa pisara. Human sa igong panahon, dapita ang pipila ka mga estudyante sa pagpaambit sa unsay ilang gisulat. Mahimo nimong tapuson pinaagi sa pagbasa sa mosunod nga pamahayag ni Presidente Dieter F. Uchtdorf sa Unang Kapangulohan. Mahimo ka usab nga mopaambit sa imong pagpamatuod sa impluwensya sa Dios sa imong kinabuhi samtang mihimo ka og mga paningkamot nga mapaduol Kaniya.
Imahe
President Dieter F. Uchtdorf
“Mga kaigsoonan, … usahay … mobati tingali kita nga dili importante, dili makita, nag-inusara, o nakalimtan. Apan hinumdumi kanunay—kamo importante ngadto Kaniya! …
“Ang Dios nagtan-aw kaninyo dili lang isip mortal nga nilalang sa gamayng planeta nga mabuhi sa mubong panahon—Siya nagtan-aw kaninyo isip Iyang anak. Siya nagtan-aw kaninyo isip ang nilalang nga kamo makahimo ug giplanohan nga mahimo. Siya gusto nga kamo masayud nga kamo importante ngadto Kaniya” (“Kamo Importante ngadto Kaniya,”Liahona, Nob. 2011, 22).
Si Presidente Dieter F. Uchtdorf sa Unang Kapangulohan mitudlo nga samtang mopaduol kita sa Dios, ang atong mga kalag mapuno sa kahayag:
Imahe
President Dieter F. Uchtdorf
“Kon kita magpaduol sa Langitnong Amahan, mahimo kitang mas balaan. Ug kon kita mahimong mas balaan, atong mabuntog ang pagkadili matuohon ug ang atong kalag mapuno sa Iyang bulahan nga kahayag. Samtang gipahiuyon nato ang atong kinabuhi niining langitnon nga kahayag, kini mopagawas kanato gikan sa kangitngit ug mopadulong sa mas dako nga kahayag. Kining mas dako nga kahayag magdala og dili mahubit sa pulong nga mga pangalagad sa Balaang Espiritu, ug ang tabil taliwala sa langit ug sa yuta magkanipis” (“Ang Gugma sa Dios,”Liahona, Nob. 2009, 24).
Si Elder J. Thomas Fyans sa Seventy mipasabut kon unsa ang gipasabut sa pagbalaan sa atong mga kaugalingon:
Imahe
Elder J. Thomas Fyans
“Gikan sa pagtuon sa kasulatan nakadawat kita og dugang direksyon kalabut sa paagi sa pagpaduol ngadto sa Ginoo: ‘Ibalaan ang inyong mga kaugalingon aron ang inyong mga hunahuna mahimo nga ipahinungod ngadto sa Dios, ug ang mga adlaw moabut nga kamo makakita kaniya; kay siya mopakita sa iyang nawong nganha kaninyo, ug kini diha sa iyang kaugalingon nga panahon, ug sa iyang kaugalingon nga paagi, ug sumala sa iyang kaugalingon nga kabubut-on.’ (D&P 88:68; italics gidugang.) Ang pagbalaan nagpasabut nga himoon nga sagrado o balaan—himoong gawasnon gikan sa sala, himoong putli. Kini atong buhaton aron mahiuyon sa iyang Espiritu.
“Gihatagan kita og usa ka giya nga kanunay nga nagpahinumdom kanato sa mga paagi nga magpabilin kitang gawasnon gikan sa sala ug makabaton sa iyang Espiritu uban kanato. Madungog nato kini sa matag higayon nga moambit kita sa sakrament. Paminaw og maayo sa mga pulong: ‘O Dios, ang Amahan sa Kahangturan, kami mangayo kanimo pinaagi sa ngalan sa imong Anak, nga si Jesukristo, sa pagpanalangin ug pagbalaan niining pan ngadto sa mga kalag sa tanan niadto kinsa moambit niini; nga sila unta mokaon agi og handumanan sa lawas sa imong Anak, ug mosaksi nganha kanimo, O Dios, ang Amahan sa Kahangturan, nga sila andam sa pagdala nganha kanila sa ngalan sa imong Anak, ug sa kanunay mohinumdom kaniya ug maghupot sa iyang mga sugo diin siya mihatag kanila, nga sila unta sa kanunay makabaton sa iyang Espiritu uban kanila’ (Moro. 4:3; usab sa D&P 20:77; italics gidugang.)” (“Draw Near unto Me,” Ensign, Nob. 1985, 90).