Doktrina ug mga Pakigsaad 22–23

Pasiuna

Atol sa Dakong Apostasiya, ang mga ordinansa sa Simbahan ni Jesukristo nausab, nawala, o gihimo nga walay tukma nga awtoridad. Sa pagpadayag nga narekord sa Doktrina ug mga Pakigsaad 22, ang Ginoo mimatuod nga ang ordinansa sa bunyag kinahanglang ipahigayon niadtong adunay awtoridad sa paghatag sa mga indibidwal og pagkamiyembro sa Simbahan ug pagsulod sa gingharian sa Dios. Ang seksyon 23 sa Doktrina ug mga Pakigsaad naglakip og usa ka pagpadayag nga nadawat ni Joseph Smith alang sa lima ka mga tawo kinsa kinasingkasing nga nagtinguha nga masayud sa kabubut-on sa Dios alang kanila: si Oliver Cowdery, Hyrum Smith, Samuel Smith, Joseph Smith Sr., ug Joseph Knight.

Mga Sugyot alang sa Pagtudlo

Doktrina ug mga Pakigsaad 22

Ang bunyag kinahanglang ipahigayon niadtong adunay tukmang awtoridad

Pagdapit og tulo ka mga estudyante sa pag-apil sa usa ka role play. Dapita ang usa ka estudyante nga maoy modala sa papel sa usa ka investigator kinsa nagtuo nga ang Simbahan tinuod. Ang investigator nabunyagan pinaagi sa pagpaunlod diha sa lain nga simbahan ug wala makasabut nganong gikinahanglan ang laing bunyag. Hangyoa ang laing duha ka estudyante nga maoy modala sa papel sa mga misyonaryo kinsa naningkamot sa pagtubag sa pangutana sa investigator. Hangyoa ang klase sa pagkonsiderar unsaon nila sa pagtubag kon sila mismo anaa niini nga sitwasyon.

Human sa role play, ipasabut nga ang pagpadayag nga narekord sa Doktrina ug mga Pakigsaad 22 naaghat sa sama nga sitwasyon. Daghan niadtong nagtinguha nga mamiyembro sa simbahan nabunyagan na sa ilang kanhi nga mga simbahan. Naghunahuna sila kon ngano nga kinahanglan silang bunyagan pag-usab.

Nagpakisayud si Joseph Smith sa Ginoo kalabut niini nga pangutana. Agi og tubag, ang Ginoo mitudlo og importante nga doktrina sa Pagpahiuli sa ebanghelyo. Dapita ang usa ka estudyante sa pagbasa og kusog sa Doktrina ug mga Pakigsaad 22:1. Hangyoa ang klase sa pagsunod, nga mangita sa mga pulong nga may kalabutan sa buhat sa pagpaluyo.

Unsa nga mga pulong niini nga bersikulo dunay kalabutan sa Pagpahiuli sa ebanghelyo? (“Usa ka bag-o ug walay katapusan nga pakigsaad.”)

Aron matabangan ang mga estudyante nga makasabut niini nga mga pulong, dapita ang usa kanila sa pagbasa og kusog sa mosunod nga pamahayag.

“Ang bag-o ug walay katapusang pakigsaad mao ang kahingpitan sa ebanghelyo. [Tan-awa sa D&P 66:2.] Kini naglangkub sa ‘Tanan nga mga pakigsaad, mga kasabutan, mga kauyunan, mga katungdanan, mga panumpa, mga binuhatan, mga kabanay, mga pagkakauban, o mga paglaum’ nga gi-sealed diha sa mga miyembro sa Simbahan pinaagi sa Balaang Espiritu sa saad, o ang Espiritu Santo, pinaagi sa awtoridad sa Presidente sa Simbahan kinsa naghupot sa mga yawe. [Tan-awa sa D&P 132:7.] Ang Presidente sa Simbahan naghupot sa mga yawe sa Melchizedek Priesthood. Iyang gidelegar ang awtoridad ngadto sa uban ug nagtugot kanila sa pagpahigayon sa sagradong mga ordinansa sa priesthood.

“Ang kaminyoon alang sa kahangturan maoy usa ka bag-o ug walay katapusan nga pakigsaad. Ang bunyag usab usa ka bag-o ug walay katapusan nga pakigsaad [tan-awa sa D&P 132:22], ug ingon man ang pag-orden ngadto sa priesthood, ug ang matag pakigsaad mahangturon ug usa ka bahin sa bag-o ug walay katapusan nga pakigsaad nga naglakip sa tanan nga mga butang” (Answers to Gospel Questions, comp. Joseph Fielding Smith Jr., 5 vols. [1957–66], 1:65).

Hangyoa ang mga estudyante nga i-summarize sa ilang kaugalingong mga pulong ang kahulugan sa mga pulong nga bag-o ug walay katapusan nga pakigsaad.

Sa unsang paagi ang pagkat-on mahitungod sa bag-o ug walay katapusan nga pakigsaad makatabang niadtong nabunyagan na nga walay awtoridad sa priesthood?
Sa unsa nga awtoridad ipahigayon ang mga ordinansa ubos sa bag-o ug walay katapusan nga pakigsaad? (Ang awtoridad sa priesthood.)

Isulat ang mosunod nga doktrina diha sa pisara: Ang bunyag kinahanglang ipahigayon pinaagi sa tawo nga adunay awtoridad gikan sa Dios.

Dapita ang usa ka estudyante sa pagbasa og kusog sa Doktrina ug mga Pakigsaad 22:2–4. Hangyoa ang klase sa pagsunod ug pag-ila sa mga pulong nga nagpakita nga ang Ginoo dili modawat sa mga bunyag nga gipahigayon nga walay awtoridad sa priesthood. Niini nga pagpadayag, ang Ginoo mipasabut sa ordinansa sa bunyag isip pagsulod sa “higpit nga ganghaan” (tan-awa sa D&P 22:2). Dayon dapita ang mga estudyante sa pag-report sa ilang nakit-an.

Sa unsa nga pagsabut ang walay pagtugot nga mga bunyag “walay hinungdan nga mga buhat”? (Kini walay ikahatag nga mahangturong kaayohan niadtong moapil niini.)
Sumala sa Doktrina ug mga Pakigsaad 22:3, unsa ang gibuhat sa Ginoo tungod sa mga walay hinungdan nga mga buhat nga gipahigayon nianang panahona? (Iyang gihimo ang Iyang pakigsaad nga maestablisar pag-usab ug ang Iyang Simbahan nga matukod.)
Sa unsang paagi kamo napanalanginan tungod kay nahisakop kamo sa Simbahan ni Jesukristo sa mga Santos sa Ulahing mga Adlaw—ang bugtong simbahan nga adunay awtoridad sa pagpahigayon sa importanting mga ordinansa?

Doktrina ug mga Pakigsaad 23

Lima ka tawo ang gitawag aron sa paglig-on sa Simbahan

Hangyoa ang mga estudyante sa paghunahuna og panahon dihang nakadawat sila og gikinahanglan kaayo nga mga pulong sa pagdasig o direksyon gikan sa laing tawo. Mahimo kang mohangyo og pipila ka estudyante sa pagpaambit sa ilang mga kasinatian.

Dapita ang mga estudyante sa pagtan-aw sa pasiuna sa Doktrina ug mga Pakigsaad 23 ug ipaila ang lima ka tawo nga gihisgutan niini nga seksyon. Ipasabut nga niini nga pagpadayag, ang matag usa niini nga mga tawo nakadawat og piho nga instruksyon gikan sa Ginoo. Awhaga ang mga estudyante sa pagpangita og mga leksyon nga ilang makat-unan samtang magtuon sila sa mga pulong sa Ginoo ngadto niini nga mga lalaki. Ang mosunod nga mga biographical sketch [mubo nga saysay sa kinabuhi] makahatag og makatabang nga konteksto sa Doktrina ug mga Pakigsaad 23.

Si Hyrum Smith, ang magulang sa Propeta, mitabang sa pagmantala sa Basahon ni Mormon pinaagi sa direkta nga pagtrabaho uban sa tig-imprinta. Miserbisyo siya isip presidente sa unang branch sa Simbahan sa Colesville, New York. Matinud-anon si Hyrum sa Ginoo ug sa Simbahan sa tibuok niyang kinabuhi.

Si Samuel Smith, manghud sa Propeta, nabunyagan sa Mayo 1829. Pagka-Hunyo 1830, mibiya siya aron magmisyon ug mibutang og Basahon ni Mormon nga sa katapusan miresulta sa pagkakabig ni Brigham Young ug sa daghan sa iyang mga sakop sa pamilya. Si Samuel maunungon ngadto sa iyang pamilya ug sa Simbahan sa tibuok niyang kinabuhi. Si Samuel dili pa andam sa pagsangyaw sa dihang gihatag kini nga pagpadayag, apan paglabay sa duha ka bulan iyang gisugdan ang iyang misyonaryo nga pagserbisyo.

Si Joseph Smith Sr., ang amahan sa Propeta, nagpamiyembro sa Simbahan sa adlaw nga kini giorganisar. Sa misunod nga ting-init, siya ug ang iyang anak nga si Don Carlos misugod sa pagserbisyo og misyon ngadto mga paryente sa New York. Nahimo siyang high priest ug unang patriyarka sa Simbahan. Si Joseph Smith Jr. mihulagway sa iyang amahan isip “tawo nga matinud-anon ngadto sa iyang Dios ug sa Simbahan sa matag sitwasyon ug sa tanang mga kahimtang nga gipasinati kaniya” (History of the Church, 4:192).

Si Joseph Knight Sr. usa ka suod nga higala ni Joseph Smith Jr. ug mipakita kaniya og dako nga kaayo. Mihatag siya sa Propeta og mga suplay samtang mitrabaho siya sa paghubad sa Basahon ni Mormon. Mibati siya og tinguha nga magpabunyag kauban sa ubang mga tawo sa adlaw nga ang Simbahan giorganisar, apan nagpugong siya tungod kay gusto niya nga dugang pa nga magtuon sa Basahon ni Mormon. Sa kaulahian siya misulat, “Mas maayo unta ang akong gibati kon ako … mipadayon pa” sa pagpabunyag (sumala sa kinutlo diha sa Larry Porter, “The Joseph Knight Family,” Ensign, Okt. 1978, 40; ang spelling ug pag-capital gi-standardize).

Dapita ang usa ka estudyante sa pagbasa og kusog sa Doktrina ug mga Pakigsaad 23:1–2. Hangyoa ang klase sa pagsunod, nga mangita sa pasidaan nga gihatag sa Ginoo ngadto ni Oliver Cowdery.

Unsa ang pasidaan nga gihatag sa Ginoo ngadto ni Oliver? Sa unsang paagi ang garbo mosangput ngadto sa tintasyon?
Unsa ang pipila ka mga paagi nga kita makalikay sa mga pagbati sa garbo nga modala kanato ngadto sa tintasyon?
Sumala sa bersikulo 2, unsa nga panalangin ang maangkon ni Oliver? (Ang abilidad sa “pagsangyaw sa kamatuoran.”)

Dapita ang usa ka estudyante sa pagbasa og kusog sa Doktrina ug mga Pakigsaad 23:3–5. Hangyoa ang klase sa pagsunod, nga mangita sa mga pagkasusama sa mga instruksyon nga gihatag sa Ginoo ngadto nila ni Hyrum Smith, Samuel Smith, ug Joseph Smith Sr.

Sa unsang paagi nga susama ang mga instruksyon sa Ginoo ngadto niining mga tawhana? (Ang matag usa gitawag sa pag-awhag ug sa pagpalig-on sa Simbahan. Mahimo nimong ipasabut nga ang tawag sa pag-awhag nagpasabut sa responsibilidad sa pagtudlo sa ebanghelyo ngadto sa uban.)

Pagdapit og tulo ka mga estudyante nga magpuli-puli sa pagbasa og kusog sa mga biographical sketch ni Hyrum Smith, Samuel Smith, ug Joseph Smith Sr. Sa dili pa basahon ang mga saysay, hangyoa ang klase sa pagpaminaw og mga pamaagi nga gituman niining mga tawhana ang tawag sa pag-awhag ug sa paglig-on sa Simbahan. Human mabasa ang matag saysay, hangyoa ang mga estudyante sa pagpaambit sa unsay ilang nakat-unan.

Unsa man ang mga pagkasusama ug panaglahi tali sa mga instruksyon ngadto kang Hyrum Smith ug Samuel Smith?
Unsa ang pipila ka mga paagi nga makaawhag ug makalig-on kita sa Simbahan?

Dapita ang usa ka estudyante sa pagbasa og kusog sa biographical sketch ni Joseph Knight Sr. Dayon hangyoa ang laing estudyante sa pagbasa sa Doktrina ug mga Pakigsaad 23:6–7, nga naglakip sa tambag sa Ginoo ngadto ni Joseph Knight Sr. Hangyoa ang klase sa pagsunod, nga mangita kon unsa ang gisugo sa Ginoo nga iyang buhaton.

Unsa man ang gipabuhat kang Joseph Knight? (Sa pag-ampo sa makusog nga tingog nga siya ra, uban sa iyang pamilya ug mga higala, ug ngadto sa kalibutan; sa pag-apil sa tinuod nga Simbahan; ug sa pag-awhag sa uban.)
Unsa nga ebidensya ang inyong nakita diha sa Doktrina ug mga Pakigsaad 23:7 nga ang Ginoo nagtinguha sa pagpanalangin ni Joseph Knight Sr.?

Ipasabut nga wala madugay human ang Ginoo mihatag niini nga pagpadayag, si Joseph Knight Sr. mipili nga magpabunyag. Nagpabilin siya nga matinud-anon sa Simbahan sa tibuok niyang kinabuhi, nanalipod sa Propeta Joseph Smith sa pribado ug sa publiko. Ang Propeta sa wala madugay mihulagway ni Joseph Knight Sr. nga “maunungon ug matinud-anon, ug makiangayon ug sulundon, ug mahiyason ug mabination, walay pagtipas sa tuo nga kamot o sa wala” (Mga Pagtulun-an sa mga Presidente sa Simbahan: Joseph Smith [2007], 560).

Dapita ang mga estudyante sa pagsulti og baruganan nga ilang nakat-unan gikan sa pagtuon sa Doktrina ug mga Pakigsaad 23. (Ang mga estudyante mahimong mopadayag og mga baruganan sama sa mosunod:

Samtang nagtinguha kita sa pagserbisyo sa Ginoo, makadawat kita og personal nga giya gikan Kaniya.

Ang Ginoo mopanalangin kanato samtang atong sundon ang giya nga Iyang gihatag kanato.

Dapita ang mga estudyante sa pagpamalandong sa giya nga ilang nadawat gikan sa Ginoo pinaagi sa Espiritu Santo, sa mga pulong sa buhing mga propeta, o sa mga kasulatan. Hatagi sila og pipila ka minuto sa pagpamalandong kon unsaon nila pagsunod ang tambag nga ilang nadawat. Mahimo nimo silang dapiton sa pagsulat sa ilang mga class notebook o scripture study journal sa bisan unsang impresyon nga ilang madawat. Pasaligi sila nga mapanalanginan sila sa panabang ug giya gikan sa Ginoo samtang ilang buhaton ang unsay Iyang gihangyo.

Komentaryo ug Background nga Impormasyon

Doktrina ug mga Pakigsaad 22:1. “Gani kana nga diin gikan sa sinugdanan”

Sa Doktrina ug mga Pakigsaad 22:1, ang mga pulong nga “gani kana nga diin gikan sa sinugdanan” tinuod sa literal nga paagi: Ang ebanghelyo gitudlo kang Adan ug Eva, ug sila nabunyagan (tan-awa sa Moises 5:58–59; 6:52–68); si Enoch gisugo sa pagbunyag sa mga sumusunod sa Ginoo (tan-awa sa Moises 7:11); ug si Noe mitudlo sa katawhan nga sila kinahanglan nga mabunyagan pinaagi sa ngalan ni Jesukristo, sama sa ilang mga amahan (tan-awa sa Moises 8:24). Ang bunyag gitudlo usab diha sa Basahon ni Mormon sa wala pa moabut si Kristo. Usa ka artikulo sa Septyembre 1974 nga Ensign mitudlo nga ang bunyag gipahigayon usab taliwala sa karaang mga Judeo:

“Bisan og dili kaayo klaro gikan sa sekular nga kasaysayan o sa mga kasulatan nga ang mga Judeo tinuoray gayud nga nagbunyag sa usag usa [sa panahon ni Jesukristo], usa ka regular nga buhat nila ang pagbunyag sa mga hentil nga nakabig sa Judaismo. …

“Mabantayan nga sa diha nga si Juan miadto taliwala sa katawhan, wala sila mangutana kaniya, ‘Unsa kini nga bag-ong butang ang imong ginabuhat?’ apan hinoon sila nangutana, ‘ Kinsa ka?’ Wala sila magduda sa ordinansa” (Robert J. Matthews, “I Have a Question,” Ensign, Sept. 1974, 16.)

Doktrina ug mga Pakigsaad 22:2. “Kamo dili makasulod sa higpit nga ganghaan pinaagi sa balaod ni Moises”

Ang balaod ni Moises, uban sa sistema niini nga kalibutanong mga sugo, mga seremonya, mga ritwal, ug mga simbolo, gihatag aron sa pagtabang sa mga Israelite nga mahinumdom sa Dios ug maglaum sa Pag-ula ni Jesukristo. Ang Manluluwas mituman niini nga balaod pinaagi sa Pag-ula (tan-awa sa Alma 34:13–14). Atol sa Iyang mortal nga pangalagad, si Jesukristo ug ang Iyang mga Apostoles naningkamot sa pagtudlo sa mga Judeo nga ang kaluwasan dili moabut nga pinaagi lamang sa pagsunod sa balaod, apan pinaagi sa makaluwas nga gahum sa Pag-ula. Sumala sa narekord sa Doktrina ug mga Pakigsaad 22:2, ang Ginoo mitandi sa tawo kinsa miagi sa dili awtorisadong mga bunyag ngadto niadtong misalig sa balaod ni Moises nga walay hugot nga pagtuo diha ni Jesukristo. Kini nga pagkumpara naghatag og gibug-aton sa panginahanglan sa pagsalikway sa “walay hinungdan” nga relihiyusong mga binuhatan nga dili makaluwas kanato ug sa paghangup sa bag-o ug walay katapusan nga pakigsaad sa ebanghelyo, sama sa gibuhat sa unang mga Judeo nga nakabig ngadto sa Kristyanismo.

Doktrina ug mga Pakigsaad 22:1–4. Ang kaimportante sa pagpahiuli sa awtoridad sa priesthood

Si Elder James E. Talmage sa Korum sa Napulog Duha ka mga Apostoles mipasabut:

“Sa dihang giestablisar sa Ginoo ang iyang Simbahan taliwala sa mga Nephite dinhi niini nga kontinente, gisultihan niya kadtong napili ug gi-orden, ngadto kang kinsa ang awtoridad gihatag, kon unsaon sa pagpahigayon sa ordinansa sa bunyag. Kinahanglang silang mosulti: ‘Pinaagi sa awtoridad nga gihatag kanako ni Jesukristo, ako mobunyag kanimo sa ngalan sa Amahan, ug sa Anak, ug sa Espiritu Santo.’ Wala kana maghatag kanato niining panahona og bisan unsa nga awtoridad. Ang mga pulong nga gipamulong ni Kristo ngadto sa iyang karaan nga mga apostoles dili mahimo nga awtoridad sa mga apostoles karon, ni ngadto ni bisan kinsa nga mga elder sa Simbahan. Akong sublion, ang mga pulong nga gipamulong niya, ang Ginoo, ngadto sa mga disipulo nga gipili gikan sa mga Nephite dili mahimong awtoridad ngari kanato; apan niining panahona siya namulong pag-usab, ug mihatag niana nga samang gahum ug awtoridad sa pagpamulong diha sa iyang ngalan, ug sa pagpahigayon sa mga ordinansa sa ebanghelyo, subay sa sumbanan nga iyang gihan-ay; ug busa ang mga elder ug mga priest kinsa modala sa mga tawo nga nagtinguha nga mabunyagan, kinsa mideklarar sa ilang hugot nga pagtuo, ug kinsa naghinulsol sa ilang mga sala, ngadto sa mga tubig sa bunyag karon, modeklarar nga sila adunay awtoridad nga gihatag kanila; ug, ingon nga sinugo ni Jesukristo, sila mobunyag sa pangalan sa Amahan ug sa Anak ug sa Espiritu Santo” (sa Conference Report, Abr. 1924, 68; tan-awa usab sa Doctrine and Covenants Student Manual, 2nd ed. [manwal sa Church Educational System, 2001] , 46).

Pipila ka nag-unang mga kinabig sa Simbahan wala makasabut nga ang Ginoo dili modawat sa bunyag gawas kon kini gipahigayon sa usa ka tawo nga naghupot sa awtoridad sa priesthood. Si Presidente Joseph Fielding Smith mipasabut:

“Diha-diha dayon human maorganisar ang Simbahan, dunay mga kinabig nga nahimo. Ang pipila niini sakop sa mga simbahan nga mituo sa bunyag pinaagi sa pagpaunlod. Gani, kadaghanan sa unang mga kinabig sa Simbahan kaniadto midawat niini nga paagi, nagtuo nga kini husto. Ang pangutana kabahin sa balaan nga awtoridad, hinoon, wala gayud motuhop sa ilang mga hunahuna. Sa dihang nagtinguha sila nga mamiyembro sa Simbahan, nakadawat sa pagpamatuod nga si Joseph Smith [usa ka tinuod nga propeta], sila natingala nganong gikinahanglang bunyagan sila pag-usab nga nakatuman na man sila sa ordinansa sa bunyag pinaagi sa pagpaunlod” (Church History and Modern Revelation [1953], 1: 109).

Doktrina ug mga Pakigsaad 22:4. “Sulod kamo sa ganghaan”

Ang bunyag mao ang ganghaan, o gikinahanglan, alang sa pagsulod sa celestial nga gingharian ngadto ni bisan kinsa nga miabut na sa edad sa pagkamay-tulubagon (tan-awa sa 2 Nephi 31:15–21). Ang ordinansa sa bunyag, bisan importante kaayo, mahimong balido lamang kon kini pagaubanan sa kausaban sa kasingkasing nga modala ngadto sa usa ka bag-ong kinabuhi.

Si Elder John A. Widtsoe sa Korum sa Napulog Duha ka mga Apostoles mihulagway sa ingon nga nausab nga kinabuhi:

“Nakahinumdom ko sa tawo nga mibunyag nako ngadto sa Simbahan, usa ka komon kaayo, ordinaryo nga tawo … moinom og usa ka botelya nga beer duha o tulo ka higayon matag adlaw, usa ka baso nga whiskey pagkataud-taud, … tabako kasagaran sa tibuok adlaw, nagpuyo og walay pulos, walay tumong nga kinabuhi, gawas sa tulo ka kaon kada adlaw, ug sa pagtagbaw sa pipila ka kalibutanong mga gana. Nakadungog siya sa Ebanghelyo ug midawat niini. Maayo kadto. Usa kadto ka butang nga dugay na niyang gipangandoy. Ang tawo milambo diha sa gahum ug posisyon sa Simbahan. Sa akong mahinumduman, miserbisyo siya og lima o unom ka mga misyon ug midumala og usa ka misyon sa Simbahan. Siya ang sama ra gihapon nga tawo, uban sa sama nga mga bukton, sama nga mga tiil, sama nga lawas, sama nga hunahuna, apan nausab tungod sa Espiritu nga moabut tungod sa pagdawat sa mahangturong kamatuoran” (sa Conference Report, Abr. 1952, 34; tan-awa usab Doctrine and Covenants Student Manual, 2nd ed. [manwal sa Church Educational System, 2001], 46–47).