Leksyon 73
Doktrina ug mga Pakigsaad 67
Pasiuna
Sa Nobyembre 1831, usa ka grupo sa mga elder nagpundok alang sa usa ka espesyal nga komperensya didto sa Hiram, Ohio. Usa ka butang nga gihisgutan sa komperensya mao ang pagmantala sa mga pagpadayag nga nadawat ni Propeta Joseph Smith. Atol niini nga miting, ang Ginoo mihatag og pagpadayag ngadto ni Joseph Smith ug ginganlan kini isip ang pasiuna sa basahon sa mga pagpadayag nga imantala. Kana nga pagpadayag mao karon ang unang seksyon sa Doktrina ug mga Pakigsaad. Wala madugay diha sa komperensya, ang Ginoo mihatag og pagpadayag nga karon gi-rekord diha sa Doktrina ug mga Pakigsaad 67. Diha niana nga pagpadayag, namulong ang Ginoo sa mga kaigsoonan kinsa adunay mga pangutana mahitungod sa pinulongan sa mga pagpadayag nga Iyang gihatag ngadto sa Propeta.
Mga Sugyot alang sa Pagtudlo
Doktrina ug mga Pakigsaad 67:1–3
Ang Ginoo nakadungog sa atong mga pag-ampo ug nakahibalo sa atong mga kasingkasing
Sa dili pa magsugod ang klase, isulat ang mosunod nga pangutana diha sa pisara: Kanus-a ninyo nabati nga ang inyong mga pag-ampo nadungog ug natubag? Sa pagsugod sa klase, dapita ang mga estudyante sa pagtubag sa pangutana.
Ipasabut nga sa Nobyembre 1831, usa ka grupo sa mga elder, lakip ni Joseph Smith, nagpundok sa paghisgot sa pagmantala sa mga pagpadayag nga nadawat sa Propeta. Mihangyo si Joseph Smith sa mga elder sa pagpamatuod nga ang mga pagpadayag gikan sa Ginoo, apan ang uban kanila nagpanuko sa pagbuhat sa mao. Kini nga pagpanuko midangat sa pagpadayag nga gi-rekord diha sa Doktrina ug mga Pakigsaad 67.
Dapita ang mga estudyante sa pagbasa og hilum sa Doktrina ug mga Pakigsaad 67:1–2, nga mangita sa unsay gisulti sa Ginoo mahitungod sa pag-ampo.
-
Niini nga mga bersikulo, unsay gisulti sa Ginoo mahitungod sa Iyang pagtagad sa atong mga pag-ampo? (Bisan og ang imong mga estudyante mohatag og lain-laing mga tubag, siguroha nga ilang ilhon ang mosunod nga baruganan: Ang Ginoo nakadungog sa atong mga pag-ampo ug nakahibalo sa atong mga kasingkasing. Isulat sa pisara kini nga baruganan.)
-
Sa unsang paagi nga ang pagkahibalo niini nga baruganan makatabang kaninyo sa pagpalambo sa inyong mga pag-ampo?
Aron matabangan ang mga estudyante nga mobati sa importansya sa baruganan nga anaa sa pisara, dapita ang pipila kanila sa pagpakigbahin kon giunsa nila pagkahibalo nga ang Langitnong Amahan nakadungog sa ilang mga pag-ampo ug nakahibalo sa mga tinguha sa ilang mga kasingkasing. Human ang pipila sa mga estudyante dihay higayon sa pagpakigbahin, awhaga ang mga estudyante sa pag-ampo alang sa kahibalo nga ang Dios nakadungog sa ilang mga pag-ampo ug nakahibalo sa ilang mga kasingkasing.
Dapita ang usa ka estudyante sa pagbasa sa Doktrina ug mga Pakigsaad 67:3. Hangyoa ang klase sa pagsunod, nga mangita kon ngano nga ang pipila sa mga elder wala makadawat sa panalangin nga gitanyag sa Ginoo kanila.
Isulat ang mosunod nga pangutana diha sa pisara: Sa unsa kaha nga paagi nga ang kahadlok makahimo sa usa ka tawo nga dili makadawat sa mga panalangin? Dapita ang mga estudyante sa pagtubag. Samtang sila maghisgot niini nga pangutana, isulat ang mosunod nga baruganan diha sa pisara: Kon atong tugutan ang kahadlok nga mosulod sa atong mga kasingkasing, niana kita mawagtangan sa mga panalangin.
-
Unsa nga mga kahadlok aduna ang mga tawo nga mahimong mosanta kanila sa pagbaton sa mga panalangin? (Ang mga ehemplo mahimong maglakip sa kahadlok nga wala mahiangay, kahadlok sa paghimo og sayop, kahadlok sa pag-usab sa ilang mga kinabuhi, kahadlok nga mapakyas, kahadlok nga maghinulsol, ug uban pa.)
Dapita ang mga estudyante sa paghunahuna mahitungod sa mga kahadlok nga nagpugong kanila sa paglihok nga may hugot nga pagtuo. Awhaga ang mga estudyante sa pagpangayo sa panabang sa Ginoo nga pulihan ang ilang mga kahadlok og hugot nga pagtuo.
Doktrina ug mga Pakigsaad 67:4–9
Ang Ginoo naghatag og paagi alang sa mga elder nga makabaton og pagpamatuod sa mga pagpadayag pinaagi ni Joseph Smith
Isulat ang mosunod nga pangutana diha sa pisara: Nganong kinahanglan nga atong paluyohan ang atong mga lider sa Simbahan bisan og kita nahibalo nga sila dili hingpit?
Dapita ang usa ka estudyante sa pagbasa og kusog sa pasiuna sa seksyon sa Doktrina ug mga Pakigsaad 67. Dapita ang lain nga estudyante sa pagbasa og kusog sa Doktrina ug mga Pakigsaad 67:5. Hangyoa ang klase sa pagsunod, nga mangita sa unsay gibati sa mga elder mahitungod sa mga pagpadayag nga imantala diha sa Book of Commandments. (Mahimo nimong pahinumduman ang mga estudyante nga ang unang koleksyon sa mga pagpadayag ni Joseph Smith giulohan og Book of Commandments. Sa 1835 ang basahon gimantala ubos sa ulohan nga Doctrine and Covenants [Doktrina ug mga Pakigsaad].)
-
Unsay gibati sa mga elder mahitungod sa mga pagpadayag? (Daghang mga elder “nagpahayag og maligdong nga pagpamatuod” sa kamatuoran sa mga pagpadayag. Bisan pa niana,“pipila sa mga panagsinultihanay nahimo mahitungod sa pinulongan nga gigamit diha sa mga pagpadayag.” Sumala sa bersikulo 5, pipila sa mga elder naghunahuna nga sila “makapahayag labaw sa [kang Joseph Smith nga] pinulongan.”)
Ipasabut nga pipila sa mga elder nabalaka mahitungod sa pinulongan nga nagpahayag sa mga pagpadayag. Tingali ilang gibati nga ang mga pagpadayag nanginahanglan og taas nga pag-edit aron maandam sa pagmantala, ug tingali sila nahadlok mahitungod sa unsay buhaton sa mga kaaway sa Simbahan sa mga pagpadayag kon kini mamantala na. Dapita ang usa ka estudyante sa pagbasa og kusog sa Doktrina ug mga Pakigsaad 67:4–5. Hangyoa ang klase sa pagsunod ug mangita sa tubag sa Ginoo sa mga kabalaka mahitungod sa pinulongan sa mga pagpadayag.
-
Unsa ang giangkon sa Ginoo mahitungod ni Joseph Smith?
Itudlo nga ang kahanas ni Joseph Smith sa pinulongan dili hingpit. Dili siya kanunay larino kon siya mosulti. Bisan pa niana, gipadayag sa Ginoo ang kamatuoran ngadto kaniya ug gitugutan siya sa pagpahayag niini sa labing maayo nga iyang mahimo.
-
Ngano kahang makatabang kini nga mahibaloan nga ang Ginoo mipadayag sa Iyang kabubut-on ngadto ni Joseph Smith bisan og Siya nahibalo nga si Joseph dili hingpit?
Dapita ang upat ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 67:6–9. Hangyoa ang klase sa pagsunod ug mangita sa hagit nga gihatag sa Ginoo ngadto sa mga misaway sa pinulongan sa mga pagpadayag.
-
Unsa nga hagit ang gihatag sa Ginoo niadtong kinsa mihunahuna nga sila makapahayag sa ilang kaugalingon labaw sa pinulongan sa mga pagpadayag?
Pangutan-a ang mga estudyante unsay ilang nahinumduman gikan sa miaging leksyon mahitungod ni William E. McLellin. Ipasabut nga si William mihukom sa pagdawat sa hagit sa Ginoo sa pagsulat og usa ka pagpadayag nga ikatandi ngadto niadtong nadawat ni Joseph Smith. Dayon dapita ang usa ka estudyante sa pagbasa og kusog sa mosunod nga pamahayag gikan sa kasaysayan ni Joseph Smith:
“Si William E. M’Lellin, isip ang labing maalamong tawo, sa iyang kaugalingong paghunahuna, ingon nga nag-angkon og mas daghang nakat-unan kay sa pagsabut, naningkamot sa pagsulat og usa ka sugo sama niadtong usa sa labing ubos sa Ginoo, apan napakyas; kini usa ka dako kaayo nga responsibilidad nga mosulat diha sa pangalan sa Ginoo. Ang mga Elder ug ang tanang dinha nga misaksi niining napakyas nga pagsulay sa usa ka tawo sa pagsunod sa pinulongan ni Jesukristo, mibag-o sa ilang hugot nga pagtuo sa kahingpitan sa Ebanghelyo, ug diha sa kamatuoran sa mga sugo ug mga pagpadayag nga gihatag sa Ginoo ngadto sa Simbahan pinaagi sa akong pagkahiman; ug ang mga Elder mipadayag og pagkaandam sa pagpamatuod sa kamatuoran niini ngadto sa tibuok kalibutan” (sa History of the Church, 1:226).
Ipasabut nga human niini nga hitabo, daghang mga elder kinsa dinha mipirma og dokumento nga naghatag sa ilang ligdong nga pagpamatuod sa pagkatinuod sa mga pagpadayag diha sa Book of Commandments.
-
Ngano kaha nga si Joseph Smith, kinsa kulang og edukasyon, makahimo niini nga mga pagpadayag, apan si William E. McLellin, kinsa taas og edukasyon, dili makahimo?
-
Unsay atong makat-unan gikan niini nga istorya mahitungod sa paghukom sa atong mga lider tungod sa ilang pagkadili hingpit?
Itudlo ang pangutana diha sa pisara mahitungod sa pagsunod sa dili hingpit nga mga lider. Dapita ang mga estudyante sa pagsulat og mga tubag ubos sa pangutana.
Doktrina ug mga Pakigsaad 67:10–14
Nagtambag ang Ginoo sa Iyang mga sumusunod kon unsaon pag-andam nga makaharong diha sa atubangan sa Dios
Isulat ang mosunod nga pangutana diha sa pisara: Unsa ang pipila ka mga panalangin nga moabut kon kita mapailubon sa atong mga kaugalingon ug sa uban? Dapita ang mga estudyante sa pagtubag.
Hangyoa ang usa ka estudyante sa pagbasa og kusog sa mosunod nga istorya, nga gipaambit ni Presidente Dieter F. Uchtdorf sa Unang Kapangulohan:
“Niadtong mga 1960, usa ka propesor sa Stanford University misugod og usa ka kasarangang eksperimento sa pagtesting sa kalig-on sa nanag-edad og upat ka tuig nga mga bata. Iyang gibutang sa ilang atubangan ang dakong marshmallow ug gisultihan sila nga mahimo nilang kan-on dayon kini o, kon makahulat sila og 15 ka minutos sila makaangkon ug duha ka marshmallow.
“Dayon iyang gibiyaan ang mga bata ug gibantayan sa luyo sa duhay nawong nga salamin kon unsay mahitabo. Pipila sa mga bata mikaon dayon sa marshmallow; ang pipila nakahulat lamang og pipila ka minutos sa wala pa monunot sa tintasyon. 30 porsiyento lamang ang nakahulat” (“Ipadayon ang Pagpailub,” Liahona, Mayo 2010, 56).
-
Sa unsa nga paagi kaha kini nga ekspiremento sa propesor may kalabutan kanato?
-
Unsa nga mga panalangin ang inyong nadawat tungod kay kamo mapailubon?
Dapita ang mga estudyante sa paghimo og duha ka kolum nga tsart diha sa ilang mga class notebook o mga scripture study journal. Hangyoa sila sa pagngalan sa unang kolum og Ganti ug ang ikaduhang kolum og Unsaon sa Pag-angkon sa Ganti. Ipares-pares ang klase. Hangyoa ang mga estudyante sa pagbasa sa Doktrina ug mga Pakigsaad 67:10–14 kauban sa ilang mga pares ug mangita sa mga panalangin nga gisaad sa Manluluwas ug ang mga lihok nga gikinahanglan aron maangkon ang mga ganti. Dapita sila sa pag-rekord sa ilang mga tubag diha sa angay nga mga kolum sa ilang mga tsart.
Human ang mga estudyante adunay igo nga panahon sa pagtuon ug paghisgot sa tudling, gamita ang mga pangutana sa ubos aron matabangan sila sa pag-report sa ilang mga nakit-an ngadto sa klase.
-
Unsa nga mga ganti ang gitanyag sa Ginoo ngadto niini nga mga elder?
-
Unsa ang gikinahanglang buhaton sa mga elder aron maangkon kini nga mga ganti? (Samtang magsulti ang mga estudyante sa mga pulong “makaharong sa atubangan sa Dios,”mahimo nimong ipasabut nga ang pulong makaharong nagpasabut og paglahutay o pagpadayon diha sa usa ka dapit.)
Ipasabut nga kini nga tudling alang kanatong tanan. Isulat ang mosunod nga baruganan diha sa pisara: Kon huboan nato ang atong mga kaugalingon sa kasina ug kahadlok, magpaubos sa atong mga kaugalingon, ug magpadayon nga mapailubon, makahimo kita nga makaharong diha sa atubangan sa Dios.
-
Ngano kaha nga kita kinahanglan nga magmapailubon sa atong mga paningkamut nga mahimong takus aron makaharong diha sa atubangan sa Dios?
Dapita ang usa ka estudyante sa pagbasa og kusog sa mosunod nga mga resulta gikan sa eksperimento sa marshmallow, ingon nga giistorya ni Presidente Uchtdorf. Hangyoa ang klase sa pagpaminaw kon unsay atong makat-unan mahitungod sa pagkahimong putli diha sa atubangan sa Dios.
“Sa paglabay sa panahon, [ang propesor] iyang gipanid-an ang mga bata ug nagsugod sa pagkamatikod og usa ka makapaikag nga sitwasyon: ang mga bata nga wala makahulat nagkalisud sa kaulahian sa kinabuhi ug adunay daghang problema sa kinaiya, samtang kadtong nakahulat nahimong mas positibo ug labaw pa ka madasigon, adunay mas taas nga mga grado ug mga kinitaan, ug adunay mas maayo nga mga pakigrelasyon.
“… Ang abilidad sa paghulat—pagkamapailubon—mao ang hiyasnon nga kinaiya nga tingali makatagna sa umaabut nga kalampusan sa kinabuhi. …
“… Kon walay pagpailub, dili kita makapahimuot sa Dios; dili kita mahimong hingpit. Sa pagkatinuod, ang pailub maoy usa ka makapaputli nga proseso nga maghashas sa panabut, magpasamot sa kalipay, magpunting sa buluhaton, ug magtanyag og paglaum alang sa kalinaw” (“Ipadayon ang Pagpailub,” 56–57).
-
Unsay atong makat-unan gikan niini nga eksperimento mahitungod sa mga panalangin nga moabut kon kita mapailubon?
Dapita ang mga estudyante sa pagpamalandong ug pag-ampo mahitungod sa mga parte sa ilang mga kinabuhi nga sila nagkinahanglan pa og dugang nga pailub sa ilang mga kaugalingon ug sa uban. Awhaga sila sa paghimo og tumong nga motabang kanila nga mahimong takus nga makaharong sa atubangan sa Dios.
Komentaryo ug Background nga Impormasyon
Doktrina ug mga Pakigsaad 67:3. “Mga kahadlok sa inyong mga kasingkasing”
Si Presidente Thomas S. Monson miingon:
“Hinumdumi nga ang hugot nga pagtuo ug pagduha-duha dili maanaa sa samang hunahuna sa samang panahon, kay ang usa mopapahawa sa usa. Isalikway ang pagduha-duha. I-ugmad ang hugot nga pagtuo” (“The Call to Serve,” Liahona, Nob. 2000, 49).
Doktrina ug mga Pakigsaad 67:5. “Sa iyang mga pagkulang kamo nasayud”
Si Elder Neal A. Maxwell sa Korum sa Napulog Duha ka mga Apostoles mitudlo kon sa unsa nga paagi kita kinahanglang motubag kon kita makaila og mga dili pagkahingpit sa mga tawo nga naglibut kanato:
“Ang dili hingpit nga mga tawo, sa tinuod, gitawag sa atong hingpit nga Ginoo aron sa pagtabang sa Iyang buhat. Mipahayag ang Ginoo ngadto sa pipila ka mga kauban ni Joseph Smith nga Siya nahibalo nga ilang naobserbahan ang kang Joseph nga gagmay nga mga dili pagkahingpit. Bisan pa niana, ang Ginoo dayon mipamatuod nga ang mga pagpadayag nga gihatag pinaagi sa Propeta mga tinuod! (Tan-awa sa D&P 67:5, 9.)
“Busa, dili kahibudngan, nga kita makamatikod sa mga kahuyang sa usag usa. Apan dili kini nato ikalipay. Magpasalamat kita alang sa gagmay nga mga pag-uswag nga nahimo nato ug sa uban, kay sa maglipay kita sa mga kakulangan. Ug kon ang mga kasaypanan mahitabo, himoa kini nga makahatag og pagtulun-an, dili nga makadaut.
“Akong gimahal kining nindot nga mga pahayag gikan niana nga maayo kaayo, apan mapainubsanon kaayo, nga propeta-editor nga si Moroni:
“‘Ayaw ako ipanghimaraut tungod sa akong pagkadili hingpit, ni ang akong amahan, tungod sa iyang pagkadili hingpit, ni sila nga misulat una pa kaniya; apan hinoon pasalamat ngadto sa Dios nga siya mipakita nganha kaninyo sa among pagkadili hingpit, nga kamo unta makakat-on nga magmaalamon labaw pa kay kanamo.’ (Morm. 9:31; italics gidugang.)
“Kon kana mao ang atong kinaiya, kita layo ra kaayo nga masakitan.
“Gawas pa, kon ang pagpili anaa tali sa pag-usab sa ubang miyembro sa Simbahan o sa atong mga kaugalingon, angay pa bang ipangutana kon asa kita kinahanglan nga magsugod? Ang importante mao ang atong pagtan-aw og maayo sa atong kaugalingong mga kasaypanan ug sa diyutay tak-upon ngadto sa mga kasaypanan sa uban—dili ang bali! Ang pagkadili hingpit sa uban dili gayud mopagawas kanato gikan sa panginahanglan nga usbon ang atong kaugalingong mga kakulangan” (“A Brother Offended,” Ensign, Mayo 1982, 38–39).