Leksyon 86
Doktrina ug mga Pakigsaad 84:1–44
Pasiuna
Niadtong Septyembre 1832, ang mga misyonaryo mibalik sa Kirtland, Ohio, human sa pagsangyaw sa ebanghelyo sa silangang bahin sa Estados Unidos. Atol niining malipayon nga panagkita og usab, nadawat ni Propeta Joseph Smith ang pinadayag nga girekord diha sa Doktrina ug mga Pakigsaad 84. Nadawat niya ang pinadayag sulod sa duha ka adlaw: Septyembre 22 ug 23, 1832. Niini nga manwal, ang seksyon 84 gibahin sa tulo ka mga leksyon. Kining unang leksyon nag-tutok sa mga instruksyon sa Ginoo mahitungod sa priesthood ug sa unsang paagi ang priesthood makaandam kanato sa pagdawat sa tanan nga anaa sa Langitnong Amahan.
Mga Sugyot alang sa Pagtudlo
Doktrina ug mga Pakigsaad 84:1–30
Ang Ginoo namahayag nga usa ka templo pagatukuron ug mipasabut sa mga katuyoan sa priesthood
Kon mahimo, pagdala og kopya sa priesthood line of authority sa usa ka tawo diha sa klase (ang imo o sa sakop sa pamilya). (Mahimo nimong kopyahon ang line of authority diha sa pisara.) Tabangi ang mga estudyante nga makasabut nga ang priesthood line of authority nagpakita kon sa unsang paagi ang awtoridad sa priesthood gihatag gikan sa usa ka tighupot sa priesthood ngadto sa lain, gikan ni Jesukristo ngadto sa usa ka tighupot sa priesthood karon.
Ipasabut nga ang Doktrina ug mga Pakigsaad 84 naglangkob og usa ka pagpadayag mahitungod sa priesthood ug sa unsang paagi kini nagpanalangin sa mga anak sa Langitnong Amahan. Ang unang bahin sa pinadayag nagpadayag sa priesthood nga kaliwatan ni Moises. Dapita ang mga estudyante nga hilum nga mobasa sa Doktrina ug mga Pakigsaad 84:6–19 ug mangita kon sa unsang paagi masubay ni Moises ang iyang awtoridad sa priesthood ngadto sa Dios.
-
Ngano kahang importante nga ang awtoridad sa priesthood masubay sa direkta nga linya balik ngadto sa Dios? (Tan-awa sa Mga Hebreohanon 5:4.)
Dapita ang usa ka estudyante sa pagbasa og kusog sa Doktrina ug mga Pakigsaad 84:17. Hangyoa ang klase sa pagsunod ug pagpangita sa mga pulong nga naghulagway sa mahangturong kinaiyahan sa priesthood (“walay sinugdan sa mga adlaw o katapusan sa mga tuig.”). Mahimo nimong ipamatuod nga ang priesthood mao ang mahangturong gahum ug awtoridad sa Dios ug ipaambit ang imong pasalamat nga gihatag sa Dios kini nga gahum diha sa katawhan alang sa kaayohan sa Iyang mga anak.
Dapita ang usa ka estudyante sa pagbasa og kusog sa Doktrina ug mga Pakigsaad 84:19–22. Hangyoa ang klase sa pagsunod ug pagpangita sa mga panalangin nga atong madawat pinaagi sa Melchizedek Priesthood.
-
Sumala sa mga bersikulo 19–22, unsa nga mga panalangin ang atong madawat pinaagi sa Melchizedek Priesthood? (Ang mga estudyante mahimong mopaambit og pipila ka mga tubag. Siguroa nga mahibalo sila sa mosunod nga doktrina: Diha sa mga ordinansa sa Melchizedek Priesthood, ang gahum sa pagkadiosnon gipakita. Isulat kini nga doktrina diha sa pisara.)
-
Hain nga makaluwas nga mga ordinansa ang kinahanglang ipahigayon pinaagi sa awtoridad sa Melchizedek Priesthood? (Kumpirmasyon, pagtugyan sa Melchizedek Priesthood, ang temple endowment, ug ang sealing sa templo. Ilista kini nga mga ordinansa diha sa pisara.) Sa unsang paagi nga inyong nakita ang gahum sa pagkadiosnon nga napakita dinhi niini nga mga ordinansa?
-
Sumala sa bersikulo 22, nganong importante man nga atong madawat ang mga ordinansa sa Melchizedek Priesthood? (Ang “gahum sa pagkadiosnon” nga gipakita niini nga mga ordinansa makapahimo nato nga makakita sa nawong sa Dios ug mabuhi.)
Isulat ang mosunod nga kamatuoran diha sa pisara: Aron mahisama sa Dios ug mopuyo diha sa Iyang presensya, kinahanglan natong madawat ang mga ordinansa sa Melchizedek Priesthood.
Hisguti ang lista sa mga ordinansa sa Melchizedek Priesthood nga anaa sa pisara.
-
Hain niini nga mga ordinansa ang madawat lamang diha sa templo?
Human makatubag ang mga estudyante, basaha ang mosunod nga pamahayag ni Elder Russell M. Nelson sa Korum sa Napulog Duha ka mga Apostoles:
“Ang templo mao ang tumong sa matag kalihokan, matag leksyon, matag naglambo nga pamaagi diha sa Simbahan. … Ang mga ordinansa sa templo hilabihan gayud ka mahinungdanon. Dili kita makabalik ngadto sa presensya sa Dios kon wala kini” (“Pangandam alang sa mga Panalangin sa Templo,” Liahona,Okt. 2010, 41).
Dapita ang usa ka estudyante sa pagbasa og kusog sa Doktrina ug mga Pakigsaad 84:23. Hangyoa ang klase sa pagsunod ug sa pagtino unsay gibuhat ni Moises aron sa pag-andam sa iyang katawhan nga makakita sa nawong sa Dios. Hangyoa ang mga estudyante sa pag-report kon unsay ilang makit-an. Mahimo nimong ipasabut nga ang pulong nga pagbalaan nagpasabut sa paglimpyo ug paghimong sagrado. Kita mahimong balaan pinaagi sa Pag-ula ni Jesukristo.
I-summarize ang Doktrina ug mga Pakigsaad 84:24–30 pinaagi sa pagpasabut nga tungod kay ang mga anak sa Israel mipatig-a sa ilang mga kasingkasing, nawad-an sila sa oportunidad sa pagdawat sa Melchizedek Priesthood ug sa konektado nga mga ordinansa niini nga kinabuhi. Hinoon, ang Ginoo mipadayon sa pagtabang kanila sa pag-uswag. Gitugot Niya ang ubos nga priesthood, o ang Aaronic Priesthood, nga magpadayon uban kanila (tan-awa sa D&P 84:26–27).
Doktrina ug mga Pakigsaad 84:31–44
Ang Ginoo mitudlo sa panumpa ug pakigsaad sa priesthood
Hangyoa ang usa ka estudyante nga naghupot sa priesthood sa pagtubag sa mosunod nga mga pangutana:
-
Sa unsang paagi ka napanalanginan tungod kay naghupot ka sa priesthood? Sa unsang paagi ka napanalanginan tungod kay ang ubang mga tawo naghupot sa priesthood?
Dapita ang usa ka estudyante sa pagbasa og kusog sa Doktrina ug mga Pakigsaad 84:31–32. Hangyoa ang klase sa pagsunod, nga mangita sa mga pulong nga gigamit sa Ginoo nga nagpasabut niadtong nanaghupot sa priesthood.
-
Unsa ang tawag sa Ginoo niadtong nanaghupot sa priesthood? (Tabangi ang mga estudyante nga makasabut nga ang mga pulong nga “anak nga mga lalaki ni Moises” nagpasabut niadtong nanaghupot sa Melchizedek Priesthood ug nga ang mga pulong nga “anak nga mga lalaki ni Aaron” nagpasabut niadtong nanaghupot sa Aaronic Priesthood.)
Isulat ang mosunod nga mga pulong diha sa pisara: Panumpa ug Pakigsaad sa Priesthood.
Ipasabut nga ang Doktrina ug mga Pakigsaad 84:33–44 nailhan isip ang panumpa ug pakigsaad sa priesthood. Kini nga mga bersikulo naglatid sa (1) mga pakigsaad nga himoon sa usa ka tawo kon siya makadawat sa priesthood ug sa (2) mga saad nga himoon sa Ginoo ngadto sa matinud-anong mga tighupot sa priesthood.
Isulat sa pisara ang mosunod nga dili kompleto nga pamahayag: Kon kadtong modawat sa priesthood , niana ang Dios .
Dapita ang mga estudyante nga hilum nga magtuon o magpares sa pagtuon sa Doktrina ug mga Pakigsaad 84:33–44. Hangyoa sila sa pagkompleto sa pamahayag diha sa pisara base niini nga mga bersikulo.
-
Giunsa ninyo sa pagkompleto ang pamahayag? (Ang mga estudyante kinahanglang makaila sa mosunod nga baruganan: Kon kadtong modawat sa priesthood mopalambo sa ilang mga calling, mosunod sa Ginoo ug sa Iyang mga sulugoon, ug mopatalinghug sa mga pulong sa kinabuhing dayon, niana ang Dios mobalaan kanila ug mohatag kanila sa tanan nga anaa Kaniya.)
Dapita ang usa ka estudyante sa pagbasa og kusog sa mosunod nga pamahayag ni Presidente Gordon B. Hinckley:
“Atong mapalambo ang atong priesthood ug mapadako ang atong mga calling kon kita moserbisyo uban sa kakugi ug kadasig diha sa mga responsibilidad diin gitawag kita sa tukma nga awtoridad. … Atong mapalambo ang atong calling, atong mapadako ang potensyal sa atong priesthood kon kita motanyag og panabang niadtong nagkalisud ug mohatag og kalig-on niadtong naluya. Atong mapalambo ang atong calling kon kita maglakaw uban sa kamatinuoron ug kaligdong” (“Magnify Your Calling,” Ensign, Mayo 1989, 48–49).
Ipasabut nga kon kita makadawat og mga calling sa simbahan, aduna kitay oportunidad sa pag-andam sa atong kaugalingon ug sa uban sa pagdawat sa makaluwas nga mga ordinansa sa priesthood. Hangyoa ang usa ka estudyante sa pagbasa og kusog sa mosunod nga pamahayag ni Presidente Thomas S. Monson:
“Sa unsang paagi mapalambo sa tawo ang usa ka calling? Pinaagi lamang sa pagpahigayon sa serbisyo nga may kalabutan niini. … Manghinaut ako uban sa tibuok nakong kasingkasing ug kalag nga ang matag batan-ong lalaki kinsa nakadawat sa priesthood motahud niana nga priesthood ug magmatinud-anon sa katungdanan nga gihatag sa diha nga kini gitugyan” (“Priesthood Power,” Ensign,Nob. 1999, 49, 51).
-
Unsa ang pipila ka mga paagi nga ang mga naghupot sa Aaronic Priesthood mopalambo sa ilang mga calling diha sa priesthood?
-
Kanus-a kamo napanalanginan tungod kay ang usa ka tawo mipalambo sa iyang calling?
Tabangi ang mga estudyante nga makakita nga ang mga panalangin sa panumpa ug pakigsaad sa priesthood dili lamang alang sa mga tighupot sa priesthood. Ang pinakadako nga mga panalangin sa Dios moabut sa mga lalaki ug mga babaye kinsa na-sealed ngadto sa usag usa diha sa templo. Basaha ang mosunod nga pamahayag ni President Russell M. Nelson:
“Moabut ang adlaw nga si Sister Nelson ug ako mag-uban og puyo diha sa presensya sa among pamilya ug sa Ginoo hangtud sa kahangturan. Kami magmatinud-anon sa mga pakigsaad nga gihimo diha sa templo ug sa panumpa ug pakigsaad sa priesthood, nga misiguro kanamo, sumala sa mga pulong sa Ginoo, nga ‘tanan nga iya sa akong Amahan ihatag ngadto [kaninyo]’ (D&P 84:38).
“Ang matinud-anon nga mga sister makaambit sa mga panalangin sa priesthood. Hunahunaa kadto nga mga pulong nga ‘tanan nga iya sa akong Amahan.’ … Nagpasabut kini nga walay yutan-ong ganti—walay bisan unsang kalampusan—ang makapuli sa kabuhong nga ihatag sa Ginoo niadtong nahigugma Kaniya, nagsunod sa Iyang mga sugo (tan-awa sa Moroni 4:3), ug molahutay hangtud sa katapusan (tan-awa sa D&P 14:7)” (“Identity, Priority, and Blessings,” Ensign,Ago. 2001, 10).
Aron matabangan ang mga estudyante nga makasabut sa piho nga mga saad nga gihimo sa Ginoo isip kabahin sa panumpa ug pakigsaad sa priesthood, isulat ang mosunod nga dili kompleto nga pamahayag diha sa pisara: Ang Ginoo misaad nga …
Dapita ang mga estudyante nga hilum nga mobasa og usab sa Doktrina ug mga Pakigsaad 84:33–34, 38, 42. Hangyoa sila sa pag-ila sa mga panalangin nga gisaad sa Ginoo isip kabahin sa panumpa ug pakigsaad sa priesthood. Mahimo nimong isulat ang ilang mga tubag diha sa pisara. Mahimo silang mohisgut nga ang Ginoo: (1) mobalaan kanato pinaagi sa Espiritu (tan-awa sa bersikulo 33); (2) mobag-o sa atong mga lawas (tan-awa sa bersikulo 33); (3) moihap kanato nga apil sa binhi ni Abraham—sa laing pagkasulti, mohatag kanato sa mga panalangin nga gisaad ngadto ni Abraham ug sa iyang kaliwatan (tan-awa sa bersikulo 34); (4) mohimo kanato nga Iyang mga pinili (tan-awa sa bersikulo 34); (5) mohatag kanato sa tanan nga iya sa Amahan (tan-awa sa bersikulo 38); ug (6) mohatag sa Iyang mga anghel og katungod diha kanato (tan-awa sa bersikulo 42). (Samtang ang mga estudyante maghisgot sa saad diha sa bersikulo 38, mahimo nimo silang awhagon sa paghunahuna sa mga kinaiya ug himaya sa Dios, dili sa materyal nga kabtangan. Sama pananglit, atong madawat ang Iyang kamatuoran, Iyang gugma, Iyang hingpit nga kalipay, ug Iyang kalinaw. Mapanalanginan kita sa kahingpitan sa Iyang gahum.)
Dapita ang mga estudyante sa pagpaambit nganong ang priesthood makahuluganon ngadto kanila. Ikonsiderar ang pagpaambit sa imong pagpamatuod sa mga panalangin sa priesthood.
Komentaryo ug Background nga Impormasyon
Doktrina ug mga Pakigsaad 84:3–5. “Kini nga kaliwatan”
Sa Doktrina ug mga Pakigsaad 84:3–5 atong mabasa ang pinadayag sa Ginoo nga usa ka templo ang pagatukuron diha sa siyudad sa Bag-ong Jerusalem diha sa estado sa Missouri. Niini nga pinadayag, nga gihatag niadtong 1832, ang Ginoo miingon nga ang templo pagatukuron “niini nga kaliwatan” (D&P 84:4–5). Kana nga templo wala pa matukod, apan ang Ginoo misugo sa Iyang mga Santos sa pagtukod og daghan pang uban nga mga templo. Ang Ginoo temporaryong mitugot sa Iyang katawhan nga dili usa motukod og templo sa siyudad sa Bag-ong Jerusalem (tan-awa sa D&P 124:49–51).
Kabahin sa mga pulong nga “kini nga kaliwatan,” si Presidente Joseph Fielding Smith misulat:
“Kini nga pamahayag nahimong babag ngadto sa uban ug dunay lain-laing mga interpretasyon sa kahulugan sa kaliwatan. Gituohan sa uban nga ang usa ka kaliwatan mao ang usa ka gatus ka tuig; sa uban nga kini usa ka gatus ug kawhaan ka tuig; sa uban nga ang usa ka kaliwatan ingon nga gipahayag niini ug sa uban nga mga kasulatan nagpasabut og gidugayon sa panahon nga dili piho. Ang Manluluwas miingon: ‘Basta kaliwatan nga dautan ug mananapaw mangita gayud og ilhanan.’ Wala kini magpasabut sa panahon sa katuigan, apan sa panahon sa pagkadautan. Ang usa ka kaliwatan []henerasyon] mahimong magpasabut sa panahon niini nga dispensasyon. Dugang pa, ang pamahayag giklaro niini nga pinadayag diha sa kinutlo sa ibabaw. ‘Kay sa pagkatinuod kini nga kaliwatan dili molabay,’ ubp. Dili nato tuyo nga mobutang og bisan unsang interpretasyon diha niini nga pagpahayag, apan aron sa pag-ingon nga kini nga mga butang anaa sa mga kamot sa Ginoo ug iyang tumanon ang iyang mga katuyoan kon mahunahuna niya nga ang panahon miabut na” (Church History and Modern Revelation, 2 vols. [1953], 1:337).
Doktrina ug mga Pakigsaad 84:24–25. “Siya mikuha … sa Balaan nga Pagkapari”
Sa Doktrina ug mga Pakigsaad 84:25, atong mabasa nga ang Ginoo mikuha sa balaan nga priesthood gikan sa taliwala sa mga anak sa Israel kinsa uban ni Moises didto sa kamingawan. Si Elder Bruce R. McConkie sa Korum sa Napulog Duha ka mga Apostoles mipasabut nga ang Ginoo “mikuha sa Melchizedek Priesthood, nga maoy nagdumala sa ebanghelyo, gikan kanila diha sa pagsabut nga kini wala magpadayon ug mahatag gikan sa usa ka tighupot sa priesthood ngadto sa lain sa naandan ug kasagaran nga kahulugan sa pulong. Ang mga yawe sa priesthood gikuha uban ni Moises aron ang bisan unsa nga umaabut nga mga ordinasyon sa priesthood magkinahanglan og espesyal nga balaan nga pagtugot” (The Mortal Messiah, 4 vols. [1979–81], 1:60).
Si Presidente Ezra Taft Benson dugang nga mipasabut:
“Atong makat-unan pinaagi sa Hubad ni Joseph Smith nga ang Ginoo … mitudlo kang Moises: ‘Ako mobawi sa pagkapari gikan diha kanila, busa ang akong balaan nga kapunongan, ug ang mga ordinansa niana.’ (HJS Ex. 34:1; italics gidugang.)
“Kining mas taas nga priesthood, apil ang kauban nga mga ordinansa niini, gikuha gikan sa Israel hangtud sa panahon ni Jesukristo. …
“Gikan ni Moises ug hangtud ni Kristo pipila lang ka mga propeta ang nakaangkon sa katungod sa mas taas nga priesthood ug sa mga panalangin nga mahimong modala sa mga tawo ngadto sa presensya sa Dios” (“What I Hope You Will Teach Your Children about the Temple,” Ensign, Ago. 1985, 9).
Doktrina ug mga Pakigsaad 84:28. Na-orden pinaagi sa anghel
Sa mosunod nga pamahayag, si Elder Bruce R. McConkie sa Korum sa Napulog Duha ka mga Apostoles naghisgot sa Doktrina ug mga Pakigsaad 84:28 ug mipasabut nga sa dihang si Juan Bautista walo pa ka adlaw, gi-orden siya, o gipili, sa pagtuman og misyon—wala siya gi-orden ngadto sa priesthood nianang panahuna. Si Juan gi-orden sa pagbuntog sa gingharian sa mga Judeo ug sa pag-andam sa agianan sa Ginoo. Usa ka anghel ang mipahayag nga iya kining himoon.
“Si Lucas miingon: ‘Ang pulong sa Dios miabut kang Juan nga anak ni Zacarias sa didto siya sa mga awaaw.’ Wala madugay si Juan miingon: ‘Siya nga nagsugo kanako sa pagpangbautismo sa tubig miingon kanako,’ sa ingon nga mga butang. (Juan 1:33.) Kon kinsa ang nagsugo kaniya wala kita masayud. Nasayud kita nga ‘siya nabunyagan samtang siya anaa sa iyang pagkabata [nagpasabut, sa dihang otso anyos siya], ug na-orden pinaagi sa anghel sa Dios sa panahon nga siya walo pa ka mga adlaw ngadto niini nga gahum [timan-i kini og maayo, dili ngadto sa Aaronic Priesthood, apan], aron sa pagbuntog sa gingharian sa mga Judeo, ug sa paghimo nga matul-id ang agianan sa Ginoo sa atubangan sa iyang mga katawhan, sa pag-andam kanila alang sa pag-anhi sa Ginoo, diha diin nga kamot gihatagan sa tanan nga gahum.’ (D&P 84:28.) Wala kita masayud kon kanus-a siya nakadawat sa Aaronic Priesthood, apan klaro nga miabut kini kaniya human sa iyang bunyag, sa bisan unsang edad nga tukma, ug sa wala pa siya gipadala sa usa ka tawo kinsa wala niya hinganli aron sa pagsangyaw ug pagbunyag pinaagi sa tubig” (The Mortal Messiah, 4 vols. [1979–81], 1:384–85).
Doktrina ug mga Pakigsaad 84:33–44. Pagsalig pinaagi sa panumpa ug pakigsaad sa priesthood
Si Presidente Henry B. Eyring namulong mahitungod sa pagsalig nga angay nga batunan sa mga tighupot sa priesthood kon mosulod ngadto sa panumpa ug pakigsaad sa priesthood:
“Ang pag-usbaw nianang mga posibilidad sa panumpa ug pakigsaad magdala sa labing dako sa tanang mga gasa sa Dios: kinabuhi nga dayon. Usa kana ka katuyoan sa Melchizedek Priesthood. Pinaagi sa paghupot sa mga pakigsaad sa atong pagdawat sa priesthood ug sa pagbag-o niini diha sa mga seremonya sa templo, kita gisaaran pinaagi sa usa ka panumpa nga gihimo sa atong Langitnong Amahan, nga si Elohim, nga atong maangkon ang kahingpitan sa Iyang himaya ug mabuhi sama nga Siya nabuhi. Makaangkon kita sa panalangin nga mabugkos sa usa ka pamilya sa kahangturan uban ang saad nga magpadayon sa paglambo. …
“… Adunay dili moubos sa duha ka mga hinungdan ngano nga angay kamong magmasaligon kaysa mahadlok sa mga silot nga mosunod sa pagkapakyas pagtuman sa panumpa ug pakigsaad o paghukom sa dili pagdawat niini. Dawaton man ninyo ang panumpa ug pakigsaad ug makitang lisud kini kaayo o wala gayud kamo mosulay, ang silot pareho ra. Walay [duda nga] ang inyong labing maayo nga dalan ug kanako mao ang pagdawat sa balaan nga priesthood ug mosulay kutob sa tibuok natong kasingkasing sa paghupot sa iyang mga pakigsaad. Kon mopili kita nga dili mosulay, sigurado gayud nga mawala ang kahigayunan sa kinabuhing dayon. Kon mosulay kita ug uban sa panabang sa Dios molampus, makaangkon kita og kinabuhing dayon.
“Aduna pay laing hinungdan nga mohukom karon nga mosulay kita sa tibuok natong kasingkasing nga mahimong takus alang nianang panumpa ug pakigsaad ug magbaton og pagsalig nga kamo molampus. Ang Dios nagsaad kaninyo og panabang ug gahum diin, kon kamo magbaton og hugot nga pagtuo, mohatag kaninyo og kalampusan.
“Tuguti ako sa paglarawan sa pipila ka mga panalangin nga inyong madawat sa inyong pagpadayon uban ang hugot nga pagtuo.
“Una, ang kamatuoran nga gihatag kaninyo [ang] panumpa ug pakigsaad nagpasabut nga ang Dios mipili kaninyo nga nakaila sa inyong gahum ug kapasidad. Siya nakaila kaninyo sukad pa kamo kauban Kaniya didto sa kalibutan sa espiritu. Uban sa Iyang kahibalo sa inyong kusog, Siya mitugot kaninyo sa pagpangita sa tinuod nga Simbahan ni Jesukristo ug pagatanyagan sa priesthood. Kamo makabati og pagsalig tungod kay aduna kamoy ebidensya sa Iyang pagsalig kaninyo.
“Ikaduha, sa inyong pagsulay og hupot sa inyong mga pakigsaad, ang Manluluwas misaad sa Iyang kaugalingong panabang. Siya miingon nga sa inyong pagpadayon sa paghupot sa priesthood: “Didto atua usab Ako, kay Ako molakaw diha sa inyong atubangan. Ako anaa sa inyong tuo nga kamot ug sa inyong wala, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo aron sa pagtabang kaninyo’ [D&P 84:88]” (“Hugot nga Pagtuo ug Panumpa ug Pakigsaad sa Priesthood,” Liahona, Mayo 2008, 61–62).