Leksyon 61

Ang Tunga-tunga nga Dapit sa Zion

Pasiuna

Sa ting-init sa 1831, ang pipila sa mga Santos kinsa nagpundok sa Ohio misugod sa ilang biyahe aron mopuyo sa dapit sa Jackson County, Missouri. Sa usa ka pagpadayag ngadto ni Propeta Joseph Smith sa Hulyo 20, 1831, gitudlo sa Ginoo ang Independence, Missouri isip ang “tunga-tunga nga dapit” sa Zion (D&P 57:3). Kinahanglan nga magsugod na ang mga Santos sa pagpalit og yuta diha sa dapit, ug sila gikinahanglan usab nga magsunod sa mga sugo sa Ginoo agi og pagpangandam alang sa pagtukod sa Zion. Sa kadugayan, bisan pa niana, ang mga panagbingkil misugod tali sa mga Santos ug kadaghanan sa mga tagilungsod sa Jackson County, Missouri, nga midangat sa kapintas sa pundok sa mga katawhan batok sa mga Santos. Gipugos ang mga Santos sa pagbiya sa Jackson County sa Nobyembre ug Disyembre 1833.

Mga Sugyot alang sa Pagtudlo

Gitudlo sa Ginoo ang Independence, Missouri isip ang tunga-tunga nga dapit sa Zion

Sa wala pay klase isulat ang Kirtland, Ohio sa usa ka karatola ug ibutang kini sa usa ka bahin sa kwarto. Sa pikas bahin sa kwarto, pagpakita og karatola nga mabasa ang Independence, Missouri. O, kon gusto nimo, makadrowing ka diha sa pisara og usa ka yanong mapa sa taliwalang kasadpan sa Estados Unidos, nga ang Kirtland, Ohio, ug ang Independence, Missouri klaro nga gimarkahan (tan-awa sa Mga Mapa, ug mga Hulagway sa Kasaysayan sa Simbahan, Map 6, “Ang Paingon sa Kasadpan nga Kalihokan sa Simbahan”). Refer ngadto sa mapa samtang nagtudlo ka sa leksyon.

Sugdi pinaagi sa paghangyo sa mga estudyante sa paghanduraw nga sila nag-camping ug nahibaloan nila nga usa ka unos nagsingabut.

• Unsa ang pipila ka mga paagi nga kamo makakita og kadangpan gikan sa unos? Sa unsa kaha nga paagi ang usa ka tolda makatabang niini nga sitwasyon?

Ipasabut nga gihulagway ni propeta Isaias ang Zion isip usa ka dako kaayo nga tolda. Miingon siya, “Padakua ang dapit sa imong balong-balong, ug ipabuklad kanila ang mga tabil sa imong mga puloy-anan; ayaw pagdaginot; lugwayi ang imong mga pisi, ug lig-ona ang imong mga lagdok [stakes]” (Isaias 54:2). Agi og katumanan niini nga panagna, nagpadayon ang Ginoo sa paggiya sa Unang Kapangulohan ug sa Korum sa Napulog Duha ka mga Apostoles sa pagtukod og mga stake sa Zion sa tibuok kalibutan.

Dapita ang usa ka estudyante sa pagbasa og kusog sa Doktrina ug mga Pakigsaad 64:41–43. Hangyoa ang klase sa pagsunod, nga mangita sa mga panalangin nga gisaad sa Ginoo ngadto sa mga matarung kinsa nagpundok ngadto sa Zion.

• Unsa nga mga panalangin ang gisaad sa Ginoo ngadto sa mga matarung kinsa nagpundok ngadto sa Zion?

Ipasabut nga sa Hulyo 1831, ang Ginoo mipahayag nga ang yuta sa Missouri mao ang gisaad nga yuta sa Zion ug nga ang Independence, Missouri, mao ang “tunga-tunga nga dapit” sa siyudad sa Zion (tan-awa sa D&P 57:1–3).

Dapita ang usa ka estudyante sa pagbarug o paglingkod tupad sa Independence, Missouri nga karatola. Dapita ang usa ka estudyante sa pagdrowing og litrato sa usa ka tolda diha sa pisara. (Kon ang classroom igo ang gidak-on, mahimo nimong hunahunaon ang pagdala og tolda sa klase ug sa pagdapit og usa o duha ka estudyante sa pagbukhad niini aron sa pagrepresentar sa mga Santos nga nagsugod sa pagtukod og siyudad nga kadangpan.)

• Nakatukod ka na ba sukad og tolda nga nasayop o misulay sa pagtukod nga wala ang tanan nga mga bahin niini? Unsay nahitabo?

Dapita ang mga estudyante sa pagbasa og hilum sa Doktrina ug mga Pakigsaad 105:5, nga mangita kon unsaon gayud pagtukod sa “tolda” sa Zion nga dawaton kini sa Ginoo. Hangyoa ang mga estudyante sa pag-report kon unsay ilang makit-an.

Isulat ang mosunod nga baruganan diha sa pisara: Ang Zion kinahanglan gayud nga matukod diha sa mga baruganan sa balaod sa celestial nga gingharian. Ipasabut nga human ang Ginoo mipadayag sa mahimutangan sa yuta sa Zion sa 1831, mihatag Siya og daghang mga pagpadayag sulod sa duha ka tuig nga naghulagway sa mga baruganan nga ang mga Santos kinahanglan nga motukod sa Zion.

Isulat ang mosunod nga mga scripture reference diha sa pisara:

Doktrina ug mga Pakigsaad 82:14–19

Doktrina ug mga Pakigsaad 97:10–16

Doktrina ug mga Pakigsaad 97:21–22, 25–27

Doktrina ug mga Pakigsaad 133:4–9

Bahina ang mga estudyante ngadto sa upat ka grupo, ug i-assign ang matag grupo og usa sa mga reference nga gilista diha sa pisara. Dapita ang mga grupo sa pagbasa sa mga tudling nga gi-assign ngadto kanila, nga mangita sa mga baruganan sa pagkamatarung o sa mga sugo nga kinahanglang sundon sa mga Santos aron malampuson ang pagtukod sa Zion.

Human ang mga estudyante magtuon sa ilang gi-assign nga mga tudling, dapita sila sa pag-report unsay ilang nakit-an. Dapita ang usa ka estudyante sa paglista sa ilang mga tubag diha sa pisara. (Ang mga tubag sa mga estudyante kinahanglan nga mag-apil sa mosunod: magsunod sa balaod sa pagpahinungod ug magtinguha sa kaayohan sa uban [D&P 82:17–19]; magtukod og templo ug magdawat og panudlo didto [D&P 97:10–14]; magpakaputli sa kasingkasing [D&P 97:16, 21]; magsunod sa mga sugo [D&P 97:25–26]; ug mahimong balaan ug “mogawas … gikan sa Babelonia,” nga nagpasabut mobiya sa pagkakalibutanon [D&P 133:4–5].)

• Sa unsa nga paagi kaha nga ang pagsunod niini nga mga baruganan sa pagkamatarung mitabang sa mga Santos pagtukod sa Zion ug mapanalipdan gikan sa espirituhanong mga pagsulay? Sa unsa nga paagi kaha nga ang pagsunod niini nga mga baruganan nagtabang sa pagpanalipod kanato karon?

Mahimo nimong ikonsiderar ang pagdapit og pipila ka mga estudyante sa pagdala sa ilang mga kasulatan o sa paglingkod tupad sa Kirtland, Ohio nga karatola, ug sa paghangyo sa usa o duha niini ka mga estudyante sa pag-adto sa Independence, Missouri nga karatola ug sa pagbarug o pagtindog didto. Ipasabut nga human ang Ginoo mipadayag sa mahimutangan sa Zion sa Hulyo 1831, daghang mga Santos mibiyahe sa hapit 1448 ka kilometro ngadto sa Independence, Missouri, aron mopuyo og motukod sa Zion. Ang uban mipabilin sa Kirtland ug sa uban nga mga dapit sa silangan. Usa ka stake ang organisahon sa Kirtland sa Pebrero 17, 1834.

Itudlo ang hulagway sa tolda (o ngadto sa tolda nga imong gidala sa klase). Ipasabut nga samtang nagtambayayong sa pagtrabaho ang mga Santos aron sa pagtukod sa Zion, ang mapanalipdanong mga panalangin sa Zion gilugway ngadto kanilang tanan, bisan niadtong kinsa wala magpuyo sa Independence ,Missouri. Nagtambayayong sa pagtrabaho ang mga Santos sa pag-amut og mga pundo ug mga kapanguhaan aron sa pagpahimutang sa pundasyon sa siyudad sa Zion. Hangyoa ang mga estudyante sa paghanduraw og sumpay sa tolda sa Zion nga nagtabon sa mga Santos sa Kirtland.

Ang panagbingkil miabut tali sa mga Santos ug sa ubang mga tagilungsod sa Missouri

Aron matabangan ang mga estudyante sa pagsabut sa mga hitabo nga nahitabo sa Ohio ug Missouri tali sa 1831 ug 1833, hangyoa ang estudyante nga anaa duol sa karatola nga Kirtland sa pagbasa og kusog sa mosunod nga pagpasabut kon giunsa sa mga Santos diha sa Kirtland nga stake sa Zion pagsuporta sa pagtukod sa tunga-tunga nga dapit sa Zion didto sa Missouri. Dapita ang klase sa pagpaminaw alang sa unsay gibuhat sa pipila ka mga Santos sa Kirtland aron sa pagtabang sa pagtukod sa Zion.

Kirtland, Ohio: Atol sa nagsunod-sunod nga mga komperensya nga gihimo sa Nobyembre 1831, si Joseph Smith ug ang ubang mga lider sa Simbahan mihipos sa mga pagpadayag nga nadawat kutob niana nga panahon ug nagplano sa pag-imprinta og mga kopya nga himoon og libro. Gidawat ni Oliver Cowdery ug John Whitmer ang responsibilidad sa pagdala sa mga pagpadayag ngadto sa Missouri aron si William W. Phelps maka-imprinta niini isip ang Basahon sa mga Kasugoan. Sa panahon sa 1831 ngadto sa 1832, nagpadayon og dawat si Joseph og mga pagpadayag ug sa paghubad sa Biblia. Sa tingpamulak sa 1832, mibiyahe si Joseph ngadto sa Missouri aron sa pagduaw sa mga Santos sa Zion, sa pagpahimangno kanila nga si Satanas nagtinguha “sa pagpalayo sa ilang mga kasingkasing gikan sa kamatuoran (D&P 78:10), ug sa pagtakdo sa mga paninguha sa mga balay tipiganan sa mga bishop sa Kirtland ug Independence. Ang pipila ka mga miyembro sa Simbahan sa Ohio miamut og salapi aron sa pagtabang og palit sa yuta ug mga sangkap sa Missouri. Kadaghanan sa mga Santos mipadayon sa pagbalhin ngadto sa Zion, ug sa katapusan sa 1832 mga ikatulong bahin sa mga miyembro sa Simbahan mipuyo sa Jackson County.

• Sa unsa nga paagi si Joseph Smith ug ang ubang mga Santos sa Kirtland nagtabang sa mga Santos sa Missouri pagsugod og estabilisar sa Zion?

Hangyoa ang usa ka estudyante sa pagbasa og kusog sa impormasyon mahitungod sa mga paningkamot sa mga Santos sa pagtukod sa siyudad sa Zion. Dapita ang klase sa pagpangita sa unsay gibuhat sa mga Santos nga husto ug sayop samtang ilang gisugdan ang pagtukod sa Zion.

Independence, Missouri: Gihulagway ni Parley P. Pratt ang pagpamuyo sa mga Santos sa Zion pinaagi sa pagpahayag nga ang “kalinaw ug kabuhong miganti sa ilang mga kahago, ug ang kamingawan nahimong uma nga mabungahon” (Autobiography of Parley P. Pratt, ed. Parley P. Pratt Jr. [1938], 93). Ang mga lider sa Simbahan sa Missouri mitrabaho aron sa pagtubag sa mga panginahanglan sa umaabut nga mga Santos. Naglakip kini sa pagpalit og yuta ug sa pagtukod og tindahan ug imprintahanan. Sa pagka-Hulyo 1833, ang populasyon sa mga Santos sa Ulahing mga Adlaw mitubo ngadto hapit sa 1,200. Apan ang mga lider ug ang mga Santos dihay ilang mga problema. Ang pipila ka mga miyembro mitugot sa ilang kadalo ug kahakog sa pagpugong kanila sa pagpuyo sa balaod sa pagpahinungod.

Agi og dugang sa mga problema sa mga Santos nga resulta sa ilang kaugalingong pagkadili masulundon, nakasinati sila og panagbangi sa orihinal nga mga lumulupyo niana nga dapit. Nagkadako ang kabalaka sa mga taga-Missouri mahitungod sa kusog nga pagdaghan sa mga “Mormons” ug sa ilang impluwensya sa lokal nga ekonomiya ug mga politika. Ang lokal nga relihiyosong mga lider misupak sa mga tinuohan sa mga Santos. Usa ka relihiyosong lider mipakanap og mga bakak mahitungod sa mga miyembro sa Simbahan ug nag-awhag sa mga tagilungsod sa paghimo og mga buhat nga mapintas batok kanila. Ug sa Hulyo 1833, si W. W. Phelps mimantala og usa ka artikulo nga giulohan og “Free People of Color,” nga nagpahimatngon sa mga misyonaryo mahitungod sa pag-proselyte taliwala sa mga ulipon. Ang mga tagilungsod sa Missouri, kinsa mga dumadapig sa pagkaulipon, sayop nga mihukom nga ang mga Santos nagdapit og binuhian nga mga ulipon ngadto sa Missouri. Kini nakadugang sa makulba na nga sitwasyon diha sa estado. Sa Hulyo 20, 1833, gilabay sa usa ka pundok sa manggugubot ang imprintahanan ngadto sa dalan, gipatag ang opisina sa imprintahanan, giguba ang kadaghanan sa wala mabugkos nga mga palid sa Basahon sa mga Kasugoan, gibu-buan og init nga alkitran ug mga balhibo si Bishop Partridge ug ang kinabig nga si Charles Allen, ug gihulga ang lungsod. Ang panagdinumtanay mipadayon ug ang mga Santos gipugos sa pagbiya sa Jackson County sa Nobyembre ug Disyembre niana nga tuig.

• Unsa kaha ang inyong bation nga usa ka sa matarung nga mga Santos, naglaum og proteksyon gikan sa Ginoo apan gipugos sa pagbiya sa Jackson county?

• Kon usa ka tawo mangutana kaninyo ngano ang unang mga Santos wala makahimo og tukod sa siyudad sa Zion, unsa ang inyong isulti? (Aron matabangan ang mga estudyante sa pagtubag niini nga pangutana, mahimo nimong dapiton sila sa pagbasa sa Doktrina ug mga Pakigsaad 101:6–7; 103:2–4; 105:3–4, 9.)

Kon wala pa nimo hangyoa ang mga estudyante sa pagbalik ngadto sa ilang mga lingkuranan, dapita sila sa pagbalik karon.

Unsa ang kaugmaon sa Zion?

Dapita ang usa ka estudyante sa pagbasa og kusog sa Doktrina ug mga Pakigsaad 97:21. Hangyoa ang klase sa pagsunod, nga mangita kon giunsa paghulagway sa Ginoo ang Zion. Mahimo kang mosugyot nga markahan sa mga estudyante ang mga pulong nga nagtudlo sa mosunod nga kamatuoran: Ang Zion mao ang putli og kasingkasing. I-refer ngadto sa lista sa mga baruganan ug mga kinaiya diha sa pisara ug ipangutana ang mosunod:

• Sa unsa nga mga paagi kining matarung nga mga baruganan nagtabang og katawhan nga mahimong putli og kasingkasing?

• Unsa ang atong tahas sa pagtukod og Zion karon? (Makapuyo kita og matarung ug makaawhag sa uban sa pagpuyo og matarung. Samtang kita nagpuyo ug nakigbahin sa ebanghelyo, ang mga utlanan sa Zion molapad, ang iyang mga stake malig-on, ug ang Dios mopanalangin sa mga Santos og proteksyon.)

Dapita ang mga estudyante sa pagkonsiderar sa mga baruganan sa pagkamatarung nga gilista diha sa pisara. Awhaga sila sa pagsulat og tumong diha sa ilang mga class notebook o mga scripture study journal sa pagsunod nga matinud-anon sa usa sa mga baruganan.

Komentaryo ug Background nga Impormasyon

Ang Zion kinahanglan gayud nga pagatukuron diha sa mga baruganan sa pagkamatarung

Si Elder D. Todd Christofferson sa Korum sa Napulog Duha ka mga Apostoles namulong mahitungod sa panginahanglan nga matukod ang Zion diha sa mga baruganan sa balaod sa celestial nga gingharian:

“Kadaghanan sa mga buluhaton nga pagahimoon sa pagtukod sa Zion naglakip sa atong indibidwal nga mga paningkamot nga mahimo ‘ang putli og kasingkasing’ (D&P 97:21). ‘Ang Zion dili matukod kon dili pinaagi sa mga baruganan sa balaod sa celestial nga gingharian,’ miingon ang Ginoo; ‘gawas niini Ako dili modawat kaniya ngari sa akong kaugalingon’ (D&P 105:5). Ang balaod sa celestial nga gingharian mao, sa tinuod, ang balaod sa ebanghelyo ug mga pakigsaad, diin naglakip sa atong makanunayon nga paghinumdom sa Manluluwas ug sa atong pasalig sa pagkamasulundon, pagsakripisyo, pagpahinungod, ug pagkaligdong.

“Ang Manluluwas misaway niadtong pipila sa nag-unang mga Santos sa ilang ‘maibugon … nga mga tinguha’ (D&P 101:6; tan-awa usab sa D&P 88:121). Kini ang mga katawhan kinsa nagpuyo sa kalibutan nga walay telebisyon, walay sine, walay internet, walay iPod. Sa kalibutan karon nga puno sa mga hulagway ug musika nga malaw-ay, gawasnon ba kita gikan sa maibugon nga mga tinguha ug sa mga nag-uban niini nga mga dautan? Monunot sa mga kinutuban sa kaligdong sa sinina o moapil sa nagkalain-lain nga imoralidad sa pornograpiya, kita kinahanglang gutom ug uhaw sa pagkamatarung. Sa pag-adto sa Zion, dili kini igo alang kanimo o kanako nga mora og buotan og gamay kay sa uban. Kita kinahanglan nga dili lamang mahimong buotan apan balaan nga mga lalaki ug mga babaye. Sa paghinumdom sa mga pulong ni Elder Neal A. Maxwell, sa makausa pa atong ipalambo ang Zion sa atong mga panimalay ug isalikway ang ting-init nga pinuy-anan sa Babelonia (tan-awa sa Neal A. Maxwell, A Wonderful Flood of Light [1990], 47)” (“Dali na Diri sa Zion,” Liahona, Nob. 2008, 38–39).

Gilista ni Bishop Keith B. McMullin sa Presiding Bishopric ang pipila ka mga baruganan nga diha pagatukuron ang Zion:

“Ang pakigsaad sa pagpahinungod naglangkob og sakripisyo; naglakip og gugma, buhat, ug paninguha sa kaugalingon; ug mao ang sukaranan ngadto sa pagtukod sa gingharian sa Dios. ‘Ang Zion dili matukod,’ miingon ang Ginoo, ‘kon dili pinaagi sa mga baruganan sa balaod sa celestial nga gingharian’ [D&P 105:5.] Ang pakigsaad sa pagpahinungod mao ang punoan niini nga balaod. Moabut ang panahon nga magamit nato kini sa kahingpitan niini. Kini nga pakigsaad naglakip sa ‘paghatag sa panahon, mga talento, ug mga kapanguhaan nga makagalam niadtong nanginahanglan—mahimong sa espiritwal o temporal man—ug sa pagtukod sa gingharian sa Ginoo.’ [tan-awa sa Ensign, Ago. 1984, 4; Tambuli, Dis. 1984, 7.]

“Kini nga mga baruganan sa gugma, buhat, paninguha sa kaugalingon, ug pagpahinungod hinatag sa Dios. Kadtong kinsa modawat niini ug modumala sa ilang mga kaugalingon sumala niini ang kasingkasing mahimong putli. Ang matarung nga panaghiusa mao ang talagsaon nga timaan sa ilang katilingban. Ang ilang kalinaw ug panag-uyon mahimong usa ka bandila ngadto sa mga nasud. Miingon si Propeta Joseph Smith:

“‘Ang pagtukod sa Zion mao ang kawsa nga nakapaikag sa katawhan sa Dios sa tanang kapanahunan; mao kini ang tema diin ang mga propeta, mga pari ug mga hari mipahayag uban sa kahimuot; … kini gibilin kanato aron mahibaloan, moapil ug motabang aron pagsabwag sa kahimayaan [sa Zion] … ang buhat nga gitagana aron sa pagguba sa mga gahum sa kangitngit, sa pagbag-o sa yuta, ang kahimayaan sa Dios, ug ang kaluwasan sa tawhanong pamilya.’ [Teachings of the Prophet Joseph Smith, sel. Joseph Fielding Smith (1976), 231–32; emphasis gidugang.]” (“Duol Ngari sa Zion! Duol Ngari sa Zion!” Liahona, Nob. 2002, 96).

Ngano nga ang unang mga Santos napakyas sa pagtukod sa balaang siyudad?

Si Elder D. Todd Christofferson sa Korum sa Napulog Duha ka mga Apostoles mitudlo:

“Ubos sa direksyon ni Propeta Joseph Smith, ang unang mga miyembro sa Simbahan misulay sa pag-establisar sa sentro nga lugar sa Zion sa Missouri, pero sila dili sarang sa pagtukod sa balaan nga siyudad. Ang Ginoo mipasabut sa usa sa mga rason sa ilang kapakyasan:

“‘Sila wala makakat-on sa pagsunod sa mga butang diin Ako nagkinahanglan gikan sa ilang mga kamot, apan puno sa tanan nga matang sa kadautan, ug dili mohatag sa ilang kabuhian, ingon nga angay nga buhaton sa mga santos, ngadto sa mga kabus ug mga sinakit diha kanila;’

“‘Ug wala magkahiusa sumala sa pagkahiusa nga gikinahanglan sa balaod sa celestial nga gingharian’ (D&P 105:3–4).

“‘Adunay mga pagtay-og, ug mga panagbingkil, ug mga kasina, ug mga panagbangi, ug higal ug maibugon nga mga tinguha diha kanila; busa pinaagi niini nga mga butang sila mihugaw-hugaw sa ilang mga kabilin’ (D&P 101:6).

“Kay sa mohukom nga dili maayo niining unang mga Santos, bisan pa niana, atong tan-awon ang atong mga kaugalingon aron masuta kon kita nagbuhat ba sa bisan unsa nga mas maayo.

“Ang Zion usa ka Zion tungod sa pamatasan, hiyas, ug pagkamatinud-anon sa iyang mga pagkanasudnon. Hinumdumi, ‘ang Ginoo mitawag sa iyang katawhan nga Zion, tungod kay sila usa sa kasingkasing ug usa sa hunahuna, ug nagpuyo diha sa pagkamatarung; ug walay kabus taliwala kanila’ (Moises 7:18). Kon atong itukod ang Zion diha sa atong mga panimalay, mga branch, mga ward ug mga stake, kinahanglan atong labanan kini nga sumbanan. Gikinahanglan nga (1) mahimong maghiusa sa usa ka kasingkasing ug usa ka hunahuna; (2) aron mamahimo, sa tinagsa ug sa dinaghan, nga usa ka balaan nga katawhan; ug (3) moatiman alang sa mga timawa ug nagkinahanglan uban sa ingon ka epektibo nga atong wad-on ang kakabus taliwala kanato. Dili kita makahulat nga ang Zion moabut nga kining mga butanga mahitabo—ang Zion moabut lamang kon kini mahitabo” (“Dali na diri sa Zion,” Liahona, Nob. 2008, 38).

Ang paghimo og mga stake sama sa pagpatindog og mga siyudad sa Zion

Gipasabut ni Elder Bruce R. McConkie nga ang mga stake mga pundokanan nga mga dapit alang sa mga Santos nga nagpuyo sa tibuok kalibutan:

“Ang stake adunay hiyograpikanhon nga mga utlanan. Ang paghimo og usa ka stake sama sa pagpatindog og usa ka Siyudad sa Pagkabalaan. Ang kada stake sa yuta mao ang pundokanan nga dapit alang sa nawalang karnero sa Israel kinsa nagpuyo niini nga area. …

“Matag usa kanato makatukod og Zion sa atong kaugalingong mga kinabuhi pinaagi sa pagputli sa kasingkasing. Ug ang saad mao, ‘Bulahan ang mga maputli og kasingkasing, kay makakita sila sa Dios.’ (Mat. 5:8.) Matag usa kanato makalugway sa mga utlanan sa Zion pinaagi sa pagpundok sa atong mga higala ug mga silingan ngadto sa panon sa Israel” (“Come: Let Israel Build Zion,” Ensign, Mayo 1977, 118).

Ang pagbalik nga biyahe ni Joseph Smith ngadto sa Kirtland gikan sa Missouri

Gisulat ni Joseph Smith ang mosunod mahitungod sa iyang pagbiyahe og balik ngadto sa Kirtland human sa iyang pagbisita sa mga Santos sa Missouri:

“Sa ika-6 sa Mayo [1832] mihatag ako sa akong panamilit ngadto sa mga kaigsoonan sa Independence, ug, kauban nilang Brother Rigdon ug Whitney, misugod sa pagbalik ngadto sa Kirtland, pinaagi sa karwahe ngadto sa St Louis, gikan didto ngadto sa Vincennes, Indiana; ug gikan didto ngadto sa New Albany, duol sa mga busay sa suba sa Ohio. Sa wala pa kami moabut sa ulahing dapit, ang mga kabayo nahadlok, ug samtang kusog kaayong dagan mihana og lukso si Bishop Whitney gikan sa karwahe, apan kay huot ang iyang amerikana, nasulod ang usa ka tiil sa ligid, ug ang iyang bitiis ug tiil napiang sa daghang parte; sa samang higayon milukso ako nga wala maunsa. Mipuyo kami sa balay abutanan ni Mr. Porter, sa Greenville, sulod sa upat ka semana, samtang si Elder Rigdon midiretso ngadto sa Kirtland. Sulod niini nga panahon, si Brother Whitney wala kawad-i og gana sa pagkaon o sa pagkatulog sa gabii, ug si Dr. Porter, ang igsoong lalaki sa tag-iya sa among gipuy-an, kinsa miatiman kaniya, miingon nga sayang nga kami walay pipila ka ‘Mormon’ didto, tungod kay sila makahilot og nabali nga mga bukog o makabuhat bisan unsa pa. Ako mipabilin uban ni Brother Whitney ug nangalagad kaniya hangtud siya makalihok. Samtang dinhi niini nga dapit kanunay akong molakaw ngadto sa kakahoyan, diin akong nakita ang daghang bag-ong mga lubnganan; ug usa ka adlaw sa dihang mitindog ako gikan sa talad panihaponan, midiretso ako og lakaw ngadto sa pultahan ug misugod sa grabe kaayong pagsuka. Misuka ako og daghang dugo ug makahilo nga butang, ug hilabihan kaayo ang pagkurog sa kaunoran sa akong lawas, nga ang akong apapangig sa makadiyut nahiwi. Ako niini nagmalampuson sa pagtarung pinaagi sa akong kaugalingong mga kamot, ug miadto ni Brother Whitney (kinsa diha sa katre), sa labing dali nga mahimo; iyang gibutang ang iyang mga kamot sa akong ulo ug nangalagad diha sa pangalan sa Ginoo, ug naayo dayon ako, bisan tuod og ang epekto sa hilo gamhanan kaayo, nga makahimo sa daghang buhok nga mawala gikan sa akong ulo. Salamat ngadto sa akong Langitnong Amahan alang sa Iyang pagtabang kanako niining malisud kaayo nga higayon, diha sa pangalan ni Jesukristo. Amen.

“Wala lihoka ni Brother Whitney ang iyang usa ka tiil diha sa paghigda sulod sa hapit upat ka semana, sa dihang miadto ako sa iyang kwarto, human sa lakaw didto sa kakahoyan, ug gisultihan siya kon uyon ba siya nga sugdan na ang pagpauli sa buntag, magsakay mi og karomata ngadto sa suba, nga mga pito ka kilometro, ug didto adunay ferry-boat nga naghulat nga daling modala kanamo sa pagtabok, diin makita namo ang kabayo nga modala kanamo diretso sa dunggoanan, diin makita namo ang sakayan, naghulat, ug wala pay alas dyes matabok na namo ang suba, ug malipayong mobiyahe pauli. Nagmaisugon siya ug misulti kanako nga mouban siya. Misugod kami sunod buntag, ug nakita ang tanan sama sa akong gisulti kaniya, tungod kay kami kusog nga mitabok sa suba sa wala pa ang alas diyes, ug midunggo sa Wellsville, misakay og karwahe ngadto sa Chardon, gikan didto sa usa ka karomata ngadto sa Kirtland, diin miabut kami sa mga Hunyo” (sa History of the Church, 1:271–72). (Tan-awa usab sa Church History in the Fulness of Times Student Manual 2nd ed. [manwal sa Church Educational System, 2003], 116).

Pagdinumtanay sa Jackson County

“Sa wala pa mahuman ang Abril [1833], ang espiritu sa pagpanggukod mipakita sa iyang kaugalingon. Sa unang yugto, ang lokal nga mga lumulupyo mipahimangno sa mga sakop nga sila wala mahimuot sa pag-abut sa daghang mga Santos sa Ulahing mga adlaw kinsa ilang gikahadlokan nga molupig unya kanila diha sa pagbotar. Ang mga Santos una nga nagagikan sa mga amihanang mga estado ug sa kinatibuk-an supak sa pag-ulipon sa mga tawo nga naggikan sa Aprika, nga sa kaniadtong panahon legal sa Missouri. …

“Usa ka mantalaan, nga usahay gipasabot nga isip usa ka sekreto nga batakang balaod, gipasa libut sa mga nagsupak aron sa pagtigum og mga pirma niadtong uyon nga mopapahawa sa ‘kahasol sa Mormon.’ Kini nga pagbati sa kasilag misangko pagka-20 sa Hulyo 1833 sa dihang usa ka pundok sa manggugubot, nga milangkub og 400 ka mga lalaki, nagtagbo diha sa balay hukmanan sa Independence aron sa pagpakigsabut sa ilang mga tinguha. Sinulat nga mga demanda gihatag ngadto sa mga pangulo sa Simbahan nagtawag sa mga Santos nga mobiya sa [Jackson County]; sa pag-undang sa pag-imprinta sa ilang pamantalaan, ang Evening and the Morning Star; ug dili motugot og dugang nga mga sakop sa Simbahan nga moanha sa Jackson County. Sa dihang nakita sa mga manggugubot nga ang mga pangulo sa Simbahan dili mutugot niining dili legal nga mga demanda, sila misulong sa buhatan sa pamantalaan, nga mao usab ang panimalay ni William W. Phelps. Ang manunulong mikawat sa gamit sa pag-imprinta ug miguba sa building. …

“Ang mga manggugubot miabot pag-usab sa pagka-23 sa Hulyo [1833], ug ang mga pangulo sa Simbahan mihalad sa ilang mga kaugalingon isip mga tubos kon sila dili mopasakit sa mga katawhan. Apan ang manggugubot mihulga og kadaut sa tibuok Simbahan ug mipugos sa mga kaigsoonang lalaki sa pagtugot nga ang tanang mga Santos sa Ulahing mga adlaw mobiya sa [county]. Kay ang mga lihok sa manggugubot dili legal, batok sa batakang balaod sa [Estados Unidos] ug sa estado sa Missouri, ang mga pangulo sa Simbahan mihangyo og tabang sa gobernador sa estado, si Daniel Dunklin. Siya mitambag kanila sa ilang sibil nga mga katungod ug misugo sa mga Santos sa pagkuha og legal nga magtatambag. …

Sa ulahing bahin sa 1833 kadaghanan sa mga Santos mitabok sa Suba sa Missouri amihan ngadto sa Lalawigan sa Clay [Clay County] ug nakakaplag og temporaryo nga kadangpan didto” (Ang Atong Panulundon: Usa ka Mubong Kasaysayan sa Ang Simbahan ni Jesukristo sa Mga Santos sa Ulahing mga Adlaw [1996], 40, 51, 52).