Leksyon 104: Doktrina ug mga Pakigsaad 101:1–16

Leksyon 104

Doktrina ug mga Pakigsaad 101:1–16

Pasiuna

Niadtong Disyembre 16 ug 17, 1833 si Propeta Joseph Smith nakadawat og pagpadayag mahitungod sa mga kasakit nga nasinati sa mga Santos didto sa Missouri. Kini nga pagpadayag, narekord sa Doktrina ug mga Pakigsaad 101, hisgutan sa tulo ka leksyon. Kining una nga leksyon naglakip sa pagpasabut sa Ginoo nganong mitugot Siya nga sakiton ang mga Santos. Naglakip usab kini sa Iyang mga pulong sa tambag ug kahupayan sa pag-antus sa mga Santos.

Mga Sugyot alang sa Pagtudlo

Doktrina ug mga Pakigsaad 101:1–8

Ang Ginoo mipasabut ngano nga Siya mitugot nga makasinati og mga pagsulay ang Iyang katawhan

Drowinga ang giapil nga mapa diha sa pisara sa dili pa ang klase. Mahimo nimong gamiton ang mapa sa tibuok leksyon aron pagtabang sa mga estudyante nga makasabut sa istorya sa kasaysayan sa leksyon.

Sa pagsugod sa leksyon, ipangutana ang mosunod nga pangutana:

Unsa ang pipila ka mga ehemplo sa pagpanggukod nga giantus sa mga Santos didto sa Lalawigan sa Jackson, Missouri? (Mahimo nimong pahinumduman ang mga estudyante sa pagkaguba sa buhatan sa pag-imprinta, mga panimalay, ug mga abut sa yuta sa mga Santos ug sa pagbutang og alkitran ug balahibo nila ni Edward Partridge ug Charles Allen.)

I-summarize o basaha ang mosunod nga paragraph o hangyoa ang usa ka estudyante sa pagbasa niini.

Tungod sa kabayolente sa manggugubot nga panon sa Lalawigan sa Jackson, Missouri, niadtong Hulyo 1833, ang mga lider sa Simbahan sa Missouri miuyon nga mobiya sa lalawigan. Hinoon, niadtong Agosto 1833, usa ka council sa kinatibuk-ang mga lider sa Simbahan didto sa Kirtland nagmiting aron hisgutan ang mga kalisud sa Missouri. Nagpadala sila og instruksyon nga ang mga Santos sa Missouri kinahanglang dili mobaligya sa ilang yuta o mobalhin gikan sa lalawigan gawas kon nakapirma na sila og mga kasabutan sa pagbuhat sa ingon. Ang mga lider sa Simbahan mihangyo sa gobyerno ug migamit sa legal nga mga paagi nga mamintenar nila ang ilang mga yuta sa Missouri ug nangita og hustisya alang niadtong responsable sa pagpangdagmal. Human madungog kini nga mga aksyon, ug nagtuo nga ang mga Santos wala magplano nga mobiya sumala sa gipaabut, ang dili lumulupyo nga mga Santos sa Ulahing mga Adlaw nga miataki pag-usab sa mga Santos. Niadtong gabii sa Oktubre 31, 1833, ang manggugubot nga panon nga mga 50 ka tingpangabayo miataki sa Whitmer Settlement, kasadpan sa Independence. Giguba nila ang atop sa 13 ka mga balay ug milatigo sa daghang mga lalaki, hapit na gani sila gipatay. Kini nga mga pagpangataki nagpadayon sa misunod nga duha ka gabii didto sa Independence ug sa ubang mga dapit diin magpuyo ang mga Santos. Ang mga lalaki gikulata, ug ang mga babaye ug mga bata gipanghulga.

Unsa nga mga pangutana sa inyong hunahuna ang anaa sa mga Santos sa Missouri niining higayuna? (Kon ang mga estudyante nagkinahanglan og tabang sa pagtubag niini nga pangutana, ikonsiderar ang pagsugyot nga ang mga Santos tingali naghunahuna ngano nga ang Ginoo mitugot nga sila gukuron.)

Pangutan-a ang mga estudyante kon nahibulong ba sila ngano nga ang Ginoo mitugot nga sila o ang mga tawo nga ilang nailhan nga mosinati og mga kasakit.

Ipasabut nga sa dihang ang mga Santos sa Missouri nag-antus niini nga mga pagsulay, ang Ginoo mipadayag og mga kamatuoran ngano nga Siya mitugot sa Iyang katawhan nga makasinati og mga kasakit. Dapita ang mga estudyante sa pagtan-aw sa pasiuna nga seksyon sa Doktrina ug mga Pakigsaad 101 ug ipapangita ang mga petsa sa dihang nadawat ni Joseph Smith kini nga pagpadayag. Dayon dapita sila sa pag-scan sa nahibilin sa pasiuna nga seksyon sa pagpangita og dugang nga mga kalisud nga nasinati sa mga Santos tali sa pagpangataki sa manggugubot nga panon niadtong Oktubre 31 ug sa mga petsa nga gihatag kini nga pagpadayag. Hangyoa sila sa pagreport kon unsay ilang nakit-an. (Human sila makareport, mahimo nimong ipasabut nga labaw sa 1,000 ka mga Santos ang giabug gikan sa ilang mga panimalay sa Lalawigan sa Jackson.)

Dapita ang usa ka estudyante sa pagbasa og kusog sa Doktrina ug mga Pakigsaad 101:1–2. Hangyoa ang klase sa pagsunod ug mangita og rason ngano ang Ginoo mitugot nga ang mga Santos sa Lalawigan sa Jackson mag-antus sa pagpanggukod ug kasakit. Hangyoa ang mga estudyante sa pagreport kon unsay ilang nakit-an.

Unsay atong makat-unan gikan sa bersikulo 2 mahitungod sa mga sangputanan sa pagsupak sa mga sugo sa Dios? (Ang mga estudyante mahimong mogamit og lain-laing mga pulong, apan kinahanglang masulti nila ang mosunod nga baruganan: Kon kita mosupak sa mga sugo, ang Dios motugot nga kita mag-antus.)
Nganong importante man nga masabtan kini nga baruganan?

Itudlo nga bisan og ang daghang mga Santos sa Missouri matinud-anon ug masulundon, mag-antus gihapon sila tungod sa pagpanggukod. Dapita ang usa ka estudyante sa pagbasa og kusog sa Doktrina ug mga Pakigsaad 101:3–5. Hangyoa ang klase sa pagsunod ug mangita og rason ngano ang Ginoo mitugot bisan ang matarung nga mga Santos nga sakiton. Hangyoa ang mga estudyante sa pagreport kon unsay ilang nakit-an. Mahimo nimong ipasabut nga ang pulong pagpanton nagpasabut sa pagdisiplina o pagkorihir, nga ang pulong masulayan nagpasabut og pagtesting, ug nga ang pulong nga mabalaan nagpasabut sa paghimo sa tawo o butang nga putli o balaan.

Sumala niini nga mga bersikulo, ngano nga ang Ginoo mopanton man ug mosulay sa Iyang katawhan? (Ang mga estudyante kinahanglang mosulti sa mosunod nga baruganan: Kon dili kita molahutay og pagpanton, dili kita mabalaan. Isulat sa pisara kini nga baruganan.)
Sa unsang paagi nga ang pagpanton makatabang nato nga mabalaan?
Sa unsa kaha nga paagi nga kini nga mensahe niini nga mga bersikulo nakaimpluwensya sa mga Santos sa Missouri?

Aron matabangan ang mga estudyante nga makasabut kon sa unsa nga paagi nga ang pagpanton ug pagtesting makatabang nato nga mabalaan, dapita ang usa ka estudyante sa pagbasa og kusog sa mosunod nga pamahayag ni Elder D. Todd Christofferson sa Korum sa Napulog Duha ka mga Apostoles:

“Agig dugang aron maawhag kita nga maghinulsol, ang kasinatian mismo nga makalahutay sa pagpanton makapalimpyo kanato ug makaandam kanato alang sa mas dagko nga espirituhanong mga pribilehiyo” (“Ako Nagabadlong ug Nagapanton sa Akong Gihigugma,” Liahona, Mayo 2011, 98).

Ipasabut nga ang Ginoo mitudlo kang Abraham nga usa ka ehemplo sa usa ka tawo kinsa gipanton ug gisulayan. Mahimo nimong dapiton ang usa ka estudyante sa pag-summarize og mubo sa istorya sa Ginoo nga nagsugo ni Abraham sa paghalad sa iyang anak nga si Isaac isip usa ka sakripisyo (tan-awa sa Genesis 22:1–14). Ipasabut nga ang pagkamatinud-anon ni Abraham atol niana nga pagsulay ug atol sa laing mga pagsulay nakapaandam niya sa pagdawat og mas dako nga espirituhanong mga panalangin (tan-awa sa Genesis 22:15–18). I-refer ang mga estudyante ngadto sa baruganan nga imong gisulat diha sa pisara.

Sa unsang paagi kini nga kamatuoran makatabang kanato atol sa malisud nga mga panahon?

Dapita ang mga estudyante sa pagbasa og hilum sa Doktrina ug mga Pakigsaad 101:6–8, mangita sa mga sala nga nahimo sa mga Santos sa Missouri nga misangpot sa mga kasakit nilang tanan. Dapita ang mga estudyante sa pagreport sa ilang nakaplagan ngadto sa klase.

Unsay inyong nakat-unan gikan sa mga bersikulo 7–8?
Base sa bersikulo 8, unsa ang buhaton sa ubang mga tawo kon ang ilang mga kinabuhi malinawon?
Sumala sa bersikulo 8, unsa ang sugdan nga buhaton sa ubang mga tawo sa ilang mga kasakitan? Unsa sa imong hunahuna ang ipasabut sa “nangita” sa Ginoo?

Awhaga ang mga estudyante sa pagpamalandong og mga kasinatian sa dihang ang ilang mga pagsulay migiya kanila sa pagbalik sa ilang mga kasingkasing ngadto sa Ginoo.

Doktrina ug mga Pakigsaad 101:9–16

Ang Ginoo mitambag ug mihupay sa mga Santos

Dapita ang usa ka estudyante sa pagbasa og kusog sa Doktrina ug mga Pakigsaad 101:9, ug hangyoa ang klase sa pagpangita og mensahe sa paglaum nga gihatag sa Ginoo sa mga Santos kinsa nag-antus didto sa Missouri.

Unsa nga mensahe ang gihatag sa Ginoo sa bersikulo 9 nga makatabang nato kon kita mag-antus sa mga sangputanan sa atong mga sala? (Ang mga tubag sa mga estudyante magkalahi, apan kinahanglan makit-an nila ang mosunod nga kamatuoran: Bisan kon kita nakasala, ang Ginoo adunay kalooy kanato. Isulat kini nga kamatuoran diha sa pisara. Mahimo usab nimong isugyot nga isulat kini sa mga estudyante diha sa ilang mga kasulatan.)
Sa unsang paagi kini nga kamatuoran makahatag nato og kalinaw?

Hangyoa ang mga estudyante sa pagsulat diha sa ilang mga class notebook o mga scripture study journal kon unsay ilang mahimo aron pagpabalik sa ilang mga kasingkasing ngadto sa Ginoo ug makasinati sa Iyang kalooy.

I-summarize ang Doktrina ug mga Pakigsaad 101:10–11 pinaagi sa pagpasabut nga bisan og ang Ginoo mitugot nga gukdon ang mga Santos, miingon Siya nga Iyang silotan ang mga tawo kinsa migukod kanila. Dapita ang usa ka estudyante sa pagbasa og kusog sa mosunod nga mga paragraph, ug hangyoa ang klase sa pagpaminaw sa dugang nga mga pagsulay nga nasinati sa mga Santos didto sa Missouri. Mahimo nimong dapiton ang mga estudyante sa paghunahuna kon unsa kaha kini ka sama nga makasaksi o makasinati niadto nga mga pagsulay.

Ang manggugubot nga panon sa Lalawigan sa Jackson nagpadayon sa pagpanggukod sa mga Santos hangtud nga ang tanang mga miyembro sa Simbahan naabug gikan sa lalawigan. Mi-report si Lyman Wight, “Akong nakita ang usa ka gatus ug nobenta ka mga babaye ug mga bata nga giabug 30 ka milya tabok sa kasagbutan, uban sa tulo lamang ka luya nga mga lalaki sa ilang pundok, sa bulan sa Nobyembre, ang yuta natabunan sa ice; ug sayon ra nakong nasundan ang ilang giagian tungod sa dugo nga miagas gikan sa ilang nasamad nga mga tiil diha sa nasunog nga mga kasagbutan!” (sa History of the Church, 3:439).

Kadaghanan sa mga Santos mipaingon sa amihanan, diin kinahanglan silang motabok sa Missouri River. Ang kabaybayunan sa suba duol sa barko dunay naglinya nga mga refugee. Ang ubang mga tawo naswertihan nga nakaikyas nga nakadala sa uban nilang mga butang, apan ang kadaghanan nawad-an sa tanan. Si Parley P. Pratt misulat: “Gatusan ka mga tawo ang nakita sa matag direksyon, ang uban anaa sa mga tolda ug ang uban anaa sa gawas libut sa mga daob, samtang kusog nga mibundak ang ulan. Ang mga bana nangita hain ang ilang mga asawa, ang mga asawa nangita hain ang ilang mga bana; mga ginikanan sa ilang mga anak, ug mga anak sa ilang mga ginikanan. … Ang talan-awon dili mahulagway, ug, ako nakasiguro, makapalanay sa mga kasingkasing ni bisan kinsa nga mga tawo sa yuta, gawas sa among walay pagbati nga mga tigdaog-daog, ug buta ug ignorante nga komunidad” (Autobiography of Parley P. Pratt, ed. Parley P. Pratt Jr. [1938], 102).

Unsa nga mga aspeto niini nga mga pagsulay nga mahimong labing lisud alang kaninyo nga masaksihan o masinati?
Unsa sa inyong hunahuna ang inyong buhaton kon kamo makasinati sa mao nga mga kasakitan? (Mahimo nimong tugutan ang mga estudyante sa pagpamalandong niini nga pangutana nga dili motubag og kusog.)

Dapita ang usa ka estudyante sa pagbasa og kusog sa Doktrina ug mga Pakigsaad 101:12–16. Hangyoa ang klase sa pagsunod ug mangita sa gisaad sa Manluluwas ngadto sa matarung nga mga Santos. Hangyoa ang mga estudyante sa pagreport sa ilang nakit-an. Ipasabut nga sa bersikulo 12, ang pulong nga “akong tanan nga Israel” nagpasabut niadtong kinsa matinud--anon sa pakigsaad sa ebanghelyo.

Unsa nga baruganan ang inyong makat-unan gikan sa mga bersikulo 12–16? (I-summarize ang mga tubag sa mga estudyante sa usa ka pamahayag diha sa pisara. Ang ilang mga tubag kinahanglan magpakita sa mosunod nga baruganan: Kon magpuyo kita nga matarung, makakaplag kita og kahupayan sa kahibalo nga ang tanang mga tawo anaa sa mga kamot sa Ginoo.)
Sa bersikulo 16, unsa sa inyong hunahuna ang kahulugan sa sugo nga “pagmalinawon ug hibaloi nga Ako mao ang Dios”?
Sa unsang paagi nga ang “pagmalinawon” makatabang nato nga makadawat og kahupayan gikan sa Ginoo?

Dapita ang mga estudyante sa paghunahuna og panahon nga sila mibati og kalinaw ug nakahibalo nga sila anaa sa mga kamot sa Dios. Hangyoa ang pipila ka estudyante sa pagpakigbahin sa ilang mga kasinatian. Mahimo kang mopakigbahin og kasinatian sa dihang ikaw napanalanginan og kalinaw atol sa panahon sa kasakit.

Awhaga ang mga estudyante sa pagduol kanunay ngadto sa Ginoo ug mosalig nga Siya mobuhat unsay labing maayo alang kanila.

Komentaryo ug Background nga Impormasyon

Doktrina ug mga Pakigsaad 101:2. “Agig sangputanan sa ilang mga kalapasan”

Sa wala pa abuga ang mga Santos gikan sa Lalawigan sa Jackson, Missouri, nakadawat sila og mga pasidaan nga sila mag-antus og mga kasakitan kon dili sila maghinulsol. Sama pananglit, niadtong Enero 1833, si Joseph Smith mipanton ni William W. Phelps ug Sidney Gilbert tungod sa “sentimento nga gipadayag” sa mga sulat nga ilang gisulat, nag-ingon nga ang maong sentimento “nag-usik-usik lang sa kusog sa Zion” ug “mahinog ang Zion sa hulga sa mga Paghukom sa Dios.” Sila si Orson Hyde ug Hyrum Smith, nagsulat ngadto ni Bishop Edward Partridge, sa iyang mga magtatambag, ug sa komperensya sa mga high priest, mipadala og sulat pasidaan ngadto sa mga lider sa Simbahan sa Missouri. Naghisgot sila sa sulat nga gikan ni Sidney Gilbert nga adunay “bulgar, dautan, ug dili maayo nga mga sugyot.” Gipanghimaraut usab nila ang laing sulat nga nagpasabut nga ang Propeta “nagtinguha og gahum ug awtoridad sama sa usa ka Hari.” Tungod niini nga mga kalapasan ug uban pa, sila si Orson Hyde ug Hyrum Smith mipasidaan nga ang mga Santos sa Missouri mag-atubang og “tunglo ug paghukom” (tan-awa sa Documents, Volume 2: Hulyo 1831–Enero 1833, volume 2 sa Documents series sa The Joseph Smith Papers [2013], 367, 373–74).

Doktrina ug mga Pakigsaad 101:5. Katuyoan sa “balaan nga pagpanton”

Si Elder D. Todd Christofferson sa Korum sa Napulog Duha ka mga Apostoles mipasabut:

“Ang balaanon nga pagpanton adunay labing minus tulo ka mga katuyoan: (1) aron sa pag-awhag kanato sa paghinulsol, (2) aron sa paglimpyo ug sa pagbalaan kanato, ug (3) usahay aron sa pagpasubay kanato og balik sa dalan sa kinabuhi sa unsay nahibaloan sa Dios nga mas maayo nga dalan” (“Ako Nagabadlong ug Nagapanton sa Akong Gihigugma,” Liahona, Mayo 2011, 98).

Doktrina ug mga Pakigsaad 101:6. “Adunay mga pagtay-og, ug mga panagbingkil”

Si Elder D. Todd Christofferson sa Korum sa Napulog Duha ka mga Apostoles mitudlo nga kon kita maningkamot sa pag-establisar sa Zion, makat-on kita gikan sa mga sayop sa unang mga Santos didto sa Missouri:

“Ubos sa direksyon ni Propeta Joseph Smith, ang unang mga miyembro sa Simbahan misulay sa pag-establisar sa sentro nga lugar sa Zion sa Missouri, pero sila dili sarang sa pagtukod sa balaan nga siyudad. Ang Ginoo mipasabut sa usa sa mga rason sa ilang kapakyasan:

“‘Sila wala makakat-on sa pagsunod sa mga butang diin Ako nagkinahanglan gikan sa ilang mga kamot, apan puno sa tanan nga matang sa kadautan, ug dili mohatag sa ilang kabuhian, ingon nga angay nga buhaton sa mga santos, ngadto sa mga kabus ug mga sinakit diha kanila;

“‘Ug wala magkahiusa sumala sa pagkahiusa nga gikinahanglan sa balaod sa celestial nga gingharian’ (D&P 105:3–4).

“‘Adunay mga pagtay-og, ug mga panagbingkil, ug mga kasina, ug mga panagbangi, ug higal ug maibugon nga mga tinguha diha kanila; busa pinaagi niini nga mga butang sila mihugaw-hugaw sa ilang mga kabilin’ (D&P 101:6).

“Kay sa mohukom nga dili maayo niining unang mga Santos, bisan pa niana, atong tan-awon ang atong mga kaugalingon aron masuta kon kita nagbuhat ba sa bisan unsa nga mas maayo.

“Ang Zion usa ka Zion tungod sa pamatasan, hiyas, ug pagkamatinud-anon sa iyang mga pagkanasudnon. Hinumdumi, ‘ang Ginoo mitawag sa iyang katawhan nga Zion, tungod kay sila usa sa kasingkasing ug usa sa hunahuna, ug nagpuyo diha sa pagkamatarung; ug walay kabus taliwala kanila’. (Moises 7:18). Kon atong itukod ang Zion diha sa atong mga panimalay, mga branch, mga ward ug mga stake, kinahanglan atong labanan kini nga sumbanan. Gikinahanglan nga (1) mahimong maghiusa sa usa ka kasingkasing ug usa ka hunahuna; (2) aron mamahimo, sa tinagsa ug sa dinaghan, nga usa ka balaan nga katawhan; ug (3) moatiman alang sa mga timawa ug nagkinahanglan uban sa ingon ka epektibo nga atong wad-on ang kakabus taliwala kanato. Dili kita makahulat nga ang Zion moabut nga kining mga butanga mahitabo—ang Zion moabut lamang kon kini mahitabo” (“Dali na diri sa Zion,” Liahona, Nob. 2008, 38).

Doktrina ug mga Pakigsaad 101:16. “Ang tanan nga mga tawo ania sa akong mga kamot; pagmalinawon ug hibaloi nga Ako mao ang Dios”

Si Presidente Gordon B. Hinckley mihisgot og usa ka panahon sa dihang siya nahupay sa mga baruganan sa Doktrina ug mga Pakigsaad 101:16:

“Karong bag-o samtang ako naghunahuna sa usa ka problema nga seryoso kaayo miluhod ko sa pag-ampo. Dihay miabut sa akong hunahuna nga usa ka pagbati sa kalinaw ug mga pulong sa Ginoo, ‘Pagmalinawon ug hibaloi nga Ako mao ang Dios.’ Miabli ko sa mga kasulatan ug mibasa niining naghatag og kasiguroan nga pamahayag nga gisulti ngadto ni Propeta Joseph Smith 150 ka tuig nang milabay: ‘Busa, himoa nga ang inyong mga kasingkasing mahupay mahitungod sa Zion; kay ang tanan nga mga tawo ania sa akong mga kamot; pagmalinawon ug hibaloi nga Ako mao ang Dios.’ (D&P 101:16.)

“Ang Dios maoy naggiya sa tanang mga butang sumala sa iyang kaugalingong dakong plano. Ang tanan nga mga tawo anaa sa iyang mga kamot. Wala kitay katungod sa pagtambag kaniya. Responsibilidad ug oportunidad nato nga magmalinawon sa atong mga hunahuna ug sa atong mga kasingkasing, ug masayud nga nga siya ang Dios, nga kini iyang buhat, ug nga siya dili motugot nga mapakyas kini.

“Wala kitay angay nga kahadlokan. Wala kitay angay nga kabalak-an. Wala kitay angay nga ipamasin. Ang atong importante nga panginahanglan mao ang makita kita nga nagbuhat sa atong katungdanan matag usa sa mga calling nga anaa kanato. Ug tungod kay, sa kasagaran, ang mga Santos sa Ulahing mga Adlaw naglakaw pinaagi sa hugot nga pagtuo ug nagtrabaho uban ang konbiksyon, ang Simbahan sa kanunay nagtubo nga mas lig-on” (“He Slumbers Not, nor Sleeps,” Ensign, Mayo 1983, 6).

Si Elder W. Craig Zwick sa Seventy mipasabut kon unsay gipasabut nga anaa sa mga kamot sa Dios:

“Ang pagkaanaa sa mga kamot sa Dios magsugyot nga wala lamang kita ubos sa Iyang maamumahon nga pagbantay apan usab gibantayan ug gipanalipdan sa Iyang talagsaon nga gahum.

“Diha sa mga kasulatan, ang pakisayud gihimo nga nagpasabut sa kamot sa Ginoo. Ang Iyang balaanon nga panabang makita nga nagbalikbalik. Ang gamhanan Niyang mga kamot milalang sa mga kalibutan, apan bisan pa niana may igong kalumo sa pagpanalangin sa gagmayng mga bata.” (“Ang Ginoo nga Imong Dios Magakupot sa Imong Kamot,” Liahona, Nob. 2003, 34).