Leksyon 70

Doktrina ug mga Pakigsaad 64:20–43

Pasiuna

Nadawat ni Joseph Smith ang pagpadayag nga gi-rekord diha sa Doktrina ug mga Pakigsaad 64 sa Septiyembre 11, 1831. Ang Doktrina ug mga Pakigsaad 64:20–43 naglangkob sa mga pagtulun-an sa Ginoo mahitungod sa mga sakripisyo nga Iyang gikinahanglan sa mga Santos ug mahitungod sa pagtukod sa Zion sa ulahing mga adlaw.

Timan-i: Kini nga leksyon naghatag og oportunidad alang sa duha ka estudyante nga motudlo. Hatagi kini nga mga estudyante og mga kopya sa materyal og una aron sila adunay igo nga panahon sa pag-andam. Isip kapilian, mahimong modesisyon ka sa pagtudlo sa tibuok leksyon sa imong kaugalingon.

Mga Sugyot alang sa Pagtudlo

Doktrina ug mga Pakigsaad 64:20–25

Nagtudlo ang Ginoo nga Siya nagkinahanglan sa atong mga kasingkasing

Hangyoa ang mga estudyante sa paghunahuna og mga panahon nga sila naghimo og mga sakripisyo sa pagsunod sa mga sugo sa Ginoo. (Aron sila maghunahuna, mahimo kang makigbahin og ehemplo sama sa paglikay og apil sa kalihokan sa sport o susama nga kalihokan sa Igpapahulay.) Dapita ang pipila ka mga estudyante sa paghulagway sa ilang mga kasinatian ug sa pagpakigbahin kon giunsa nila pagkahibalo nga sila napanalanginan sa paghimo niini nga mga sakripisyo.

Ipasabut nga sa ilang pagtuon sa Doktrina ug mga Pakigsaad 64:20–43, ang mga estudyante mas makakat-on pa mahitungod sa mga sakripisyo nga gikinahanglan sa Ginoo kanato. Ipakita ang mosunod nga tsart. (Mahimo nimong kopyahon ang tsart diha sa pisara sa wala pay klase.)

	Isaac Morley (D&P 64:20)	Frederick G. Williams (D&P 64:21)
Sugo
Tubag
Resulta

Ipasabut nga si Isaac Morley nanag-iya og dako nga umahan sa Kirtland, Ohio. Daghan ang iyang gidapit nga mga miyembro sa Simbahan, lakip ni Joseph Smith ug sa iyang pamilya, sa pagpuyo diha sa iyang yuta. Dapita ang usa ka estudyante sa pagbasa og kusog sa Doktrina ug mga Pakigsaad 64:20. Hangyoa ang klase sa pagsunod, nga mangita kon unsay gitudlo sa Ginoo ni Isaac Morley nga buhaton sa iyang umahan.

• Unsay gimando sa Ginoo ni Isaac Morley nga buhaton sa iyang umahan? (Human tubaga sa mga estudyante, isulat ang Ibaligya ang iyang umahan diha sa tsart aron ipakita ang sugo nga gihatag sa Ginoo ngadto ni Isaac Morley.)

Ipasabut nga si Isaac Morley gisugo sa Ginoo sa paghimo og dako nga sakripisyo. Kadaghanan sa kwarta nga halin sa iyang umahan pagagamiton sa pagpalit og yuta alang sa ubang miyembro sa Simbahan sa Independence, Missouri.

• Unsa nga panalangin ang gisaad sa Ginoo nga ihatag kang Isaac Morley kon iyang ibaligya ang iyang umahan? (Ang Ginoo misaad nga kon ibaligya ni Isaac ang iyang umahan, siya “dili mahimo nga matintal labaw niana diin siya mahimo nga moantus.”)

• Unsa nga baruganan ang gitudlo niini nga saad kanato mahitungod sa paglikay og tintasyon? (Ang mga tubag sa mga estudyante kinahanglan gayud nga magpakita sa mosunod: Kon kita mosunod sa kabubut-on sa Ginoo alang kanato, kita dili pagatintalon labaw niana nga atong maantus.)

Ipasabut nga si Isaac Morley misunod sa sugo sa Ginoo sa pagbaligya sa iyang umahan. Usa siya sa unang mga Santos nga mipuyo sa Independence, Missouri, diin iyang gipaninguha ang pagtukod sa Zion. Gialagaran niya ang Ginoo sa matinud-anong paagi sa tibuok niyang kinabuhi. Diha sa tsart sa pisara, isulat Siya misunod isip tubag ni Isaac. Isulat Siya gipanalanginan isip resulta sa iyang lihok.

• Unsa ang pipila ka mga ehemplo kon sa unsa nga paagi kita makalikay og tintasyon pinaagi sa pagsunod sa mga sugo ug mga sumbanan sa Ginoo? (Hunahunaa ang pagpakigbahin og pipila ka mga ehemplo gikan sa Alang sa Kalig-on sa mga Kabatan-onan nga booklet.)

Ipasabut nga laing tawo, si Frederick G. Williams, nanag-iya usab og dako nga umahan sa Kirtland. Hangyoa ang mga estudyante sa pagbasa og hilum sa Doktrina ug mga Pakigsaad 64:21 mangita sa sugo nga gihatag sa Ginoo ngadto ni Frederick G. Williams.

• Unsay gimando sa Ginoo ngadto ni Frederick G. Williams nga buhaton sa iyang umahan? (Human tubaga sa mga estudyante, isulat Dili ipabaligya ang iyang umahan diha sa angay nga dapit sa tsart.)

Dapita ang usa ka estudyante sa pagbasa sa mosunod nga paragraph, nagpasabut kon unsay gibuhat ni Frederick G. Williams sa iyang umahan:

Bisan tuod si Frederick G. Williams wala sugoa sa pagbaligya sa iyang umahan, gipakita gihapon niya ang pagkaandam sa pagsakripisyo. Gisultihan niya si Joseph Smith nga ang iyang umahan mahimong gamiton aron kapuy-an ug mapakaon ang mga miyembro sa Simbahan nga nanginahanglan. Sa kadugayan, gipahinungod ni Frederick ang iyang tibuok nga umahan ngadto sa Simbahan nga walay gidawat nga bayad. Pinaagi sa mga sakripisyo ni Frederick G. Williams ug sa ubang matinud-anong mga Santos sa Ohio, ang Ginoo mipabilin og “lig-on nga paghupot diha sa yuta sa Kirtland, alang sa gidugayon nga lima ka tuig” (D&P 64:21). Sulod niini nga mga katuigan, gitukod sa mga Santos ang Templo sa Kirtland, nga mao ang tinubdan sa dakong mga panalangin ngadto sa mga Santos, lakip ni Brother Williams.

Diha sa tsart sa pisara, kompletuha ang kolum alang ni Frederick G. Williams pinaagi sa pagsulat og Siya misunod ug Siya gipanalanginan diha sa angay nga mga dapit.

• Unsa ang atong makat-unan mahitungod sa pagkamasulundon ug sakripisyo gikan sa mga ehemplo ni Isaac Morley ug Frederick G. Williams? (I-summarize ang mga tubag sa mga estudyante pinaagi sa pagsulat sa mosunod nga baruganan diha sa pisara: Kita mapanalanginan samtang kita nagsunod sa Ginoo ug naghalad sa mga sakripisyo nga Iyang gihangyo kanato nga buhaton.)

Ipasabut nga ang mga sakripisyo nga gihimo ni Isaac Morley ug Frederick G. Williams kalabut sa ilang mga umahan nagpakita og laing sakripisyo nga gikinahanglan sa Ginoo kanila ug nga Iyang gikinahanglan kanato karon. Dapita ang usa ka estudyante sa pagbasa og kusog sa Doktrina ug mga Pakigsaad 64:22. Hangyoa ang klase sa pagpangita sa sakripisyo nga gikinahanglan sa Ginoo kanato.

• Sumala sa bersikulo 22, unsa ang gikinahanglan sa Ginoo kanato? (Ang mga estudyante kinahanglang moila sa mosunod nga doktrina: Ang Ginoo nagkinahanglan sa atong mga kasingkasing. Mahimo nimong isugyot nga markahan sa mga estudyante kini nga kamatuoran diha sa ilang mga kasulatan.)

• Unsa sa inyong hunahuna ang gipasabut nga ang Ginoo nagkinahanglan sa atong mga kasingkasing?

• Giunsa pagpakita ni Isaac Morley ug Frederick G. Williams nga sila andam sa paghatag sa ilang mga kasingkasing ngadto sa Ginoo? Kinsa ang ubang ehemplo nga mga tawo kinsa naghatag sa ilang mga kasingkasing ngadto sa Ginoo? (Mahimo nimong ipasabut nga ang mga estudyante makahimo sa pakigbahin og mga ehemplo gikan sa mga kasulatan o gikan sa mga kinabuhi sa mga tawo nga ilang nailhan.)

• Sa unsa nga paagi kita makapakita sa Manluluwas nga andam kita sa paghatag sa atong mga kasingkasing ngadto Niya?

Dapita ang usa ka estudyante sa pagbasa og kusog sa Doktrina ug mga Pakigsaad 64:23–25 ug hangyoa ang klase sa pag-ila og usa ka sugo nga atong masunod aron sa pagpakita nga atong nahatag ang atong mga kasingkasing ngadto sa Ginoo.

• Unsa ang gimando sa Ginoo nga buhaton sa Iyang mga tawo? (Pagbayad og ikapulo. Mahimo nimong ipasabut nga sa diha nga ang Ginoo mihatag niini nga pagpadayag, ang mga Santos migamit sa pulong ikapulo aron sa pag-refer sa ilang tanan nga mga kontribusyon ngadto sa Simbahan. Paglabay sa mga pito ka tuig, mipadayag ang Ginoo nga ang ikapulo kinahanglan nga mahimong “ikanapulo sa tanan [natong] mga tubo sa matag tuig” [D&P 119:4].) Sa unsa nga paagi nga ang ikapulo nagpakita nga atong nahatag ang atong mga kasingkasing ngadto sa Ginoo?

• Sumala sa bersikulo 23, unsa nga saad ang gihatag sa Ginoo niadtong kinsa nagbayad sa ikapulo?

Ipasabut nga samtang ang panalangin nga gipiho diha sa bersikulo 23 magamit sa umaabut, nagpanalangin usab ang Ginoo kanato karon tungod sa pagbayad og ikapulo. Mahimo nimong pangutan-on ang mga estudyante sa pagpakigbahin og mga kasinatian nga sila aduna sa dihang sila o ang ilang mga pamilya napanalanginan isip usa ka resulta sa pagbayad og ikapulo.

Doktrina ug mga Pakigsaad 64:26–43

Ang Ginoo naghatag og mga panudlo alang sa pagtukod sa Zion

Aron sa paghatag og overview sa Doktrina ug mga Pakigsaad 64:26–43, ipasabut nga niini nga mga bersikulo atong mabasa ang mga panudlo sa Ginoo alang sa pagtukod sa Zion. Ang nahibilin niini nga leksyon gidisenyo nga itudlo sa mga estudyante. Dapita ang unang estudyante nga magtutudlo sa pag-anha sa atubangan sa klase aron sa pagtudlo.

Hatagi ang mga estudyante og mga oportunidad sa pagtudlo

Matag karon og unya, tuguti ang mga estudyante sa pagtudlo og bahin sa leksyon. Kini nga kasinatian makatabang kanila sa pagtuman sa ilang tahas diha sa proseso sa pagkat-on ug sa pag-andam kanila alang sa umaabut nga mga oportunidad sa pagtudlo sa ebanghelyo. Kon dapiton nimo ang mga estudyante sa pagtudlo, siguroa ang paghatag kanila og tin-aw nga mga pahimangno ug igo nga panahon sa pag-andam.

Estudyante nga Magtutudlo 1—Doktrina ug mga Pakigsaad 64:26–33

Sugdi pinaagi sa pagpangutana sa mosunod:

• Kanus-a kamo nasultihan sa pagkompleto og usa ka buluhaton nga malisud o makasanap? (Human makatubag ang mga estudyante, mahimo usab nga ikaw makigbahin og usa ka ehemplo.)

Ipasabut nga sa Agosto 1831, gihatagan sa Ginoo ang mga Santos og hilabihan ka dakong buluhaton sa pagpangita og kwarta aron ipalit sa tanang yuta nga gikinahanglan sa pagtukod sa siyudad sa Zion sa Jackson County, Missouri. Nahibalo ang mga Santos nga sa higayon nga ilang mapalit ang yuta, kinahanglan silang motrabaho og maayo sa pagtukod sa siyudad ug sa templo didto. Ang Doktrina ug mga Pakigsaad 64:26–30 naglangkob sa sugo sa Ginoo ngadto sa duha sa Iyang mga sulugoon, si Newel K. Whitney ug Sidney Gilbert. Siya mimando kanila sa paggamit sa ilang tindahan sa Kirtland, Ohio, aron sa pagtabang og sangkap sa mga panginahanglan sa mga Santos. Kini usa ka ehemplo sa usa ka paagi ang pipila sa mga Santos gihangyo sa pagsakripisyo ug sa paghatag ngadto sa pagtukod sa Zion.

Dapita ang usa ka estudyante sa pagbasa og kusog sa Doktrina ug mga Pakigsaad 64:31–33. Hangyoa ang klase sa pagsunod, nga mangita sa mga pulong nga tingali nakaawhag sa mga Santos kinsa naninguha sa pagtuman sa hilabihang kadako nga buluhaton sa pagtukod sa Zion.

• Unsa kaha nga mga pulong ang nakaawhag niini nga mga Santos? (Samtang ang mga estudyante nakigbahin og mga pulong, pangutan-a kon sa unsa nga paagi kadto nga mga pulong kalabut sa ilang mga kaugalingon.)

Human mahisgutan sa mga estudyante kini nga mga bersikulo, isulat ang mosunod nga baruganan diha sa pisara: Kon kita kugihan sa pagbuhat og maayo, makatuman kita og importanting mga butang. Ipakigbahin ang imong pagpamatuod niini nga baruganan. Mahimo ka usab nga mopakigbahin og kasinatian nga nakatabang kanimo sa pagkat-on sa kamatuoran niini nga baruganan.

Estudyante nga Magtutudlo 2—Doktrina ug mga Pakigsaad 64:34–43

Hangyoa ang mga estudyante sa paghunahuna og panahon nga sila misunod sa ginikanan, lider sa Simbahan, magtutudlo, o coach, apan mihimo niini uban ang dili maayo nga kinaiya. Dapita ang usa ka estudyante sa pagbasa og kusog sa Doktrina ug mga Pakigsaad 64:34. Hangyoa ang klase sa pagsunod, nga mangita sa mga pulong nga naghulagway sa kinaiya nga kinahanglan atong batunan samtang kita nagsunod sa Ginoo.

• Unsa nga mga pulong ang nagtudlo mahitungod sa hustong kinaiya alang sa pagkamasulundon?

Human makatubag ang mga estudyante, isulat ang mosunod nga baruganan diha sa pisara: Kita kinahanglang mosunod sa Ginoo uban sa atong mga kasingkasing ug andam nga mga hunahuna.

• Unsa kaha ang gipasabut sa pagsunod sa Ginoo uban “ang kasingkasing ug andam nga hunahuna”?

Dapita ang mga estudyante sa paghunahuna mahitungod sa mga panahon nga sila misunod sa Ginoo uban ang ilang mga kasingkasing ug andam nga mga hunahuna.

• Sa unsa nga paagi kini lahi sa mga panahon nga kamo misunod nga dili kaayo maayo og kabubut-on? (Mahimong ikaw usab gustong mopakigbahin og usa ka kasinatian.)

Itudlo nga sumala sa bersikulo 34, kadtong kinsa nagsunod sa Ginoo uban ang ilang mga kasingkasing ug mga hunahuna motagamtam sa mga panalangin sa Zion sa katapusang mga adlaw. Dapita ang usa ka estudyante sa pagbasa og kusog sa Doktrina ug mga Pakigsaad 64:41–43. Hangyoa ang klase sa pagsunod, mangita og impormasyon mahitungod sa pagtukod sa Zion sa atong panahon. Aron matabangan ang mga estudyante nga makasabut niini nga mga bersikulo, ipasabut nga sa katapusang mga adlaw, ang Zion pagatukuron diha sa tanang mga nasud diin ang mga tawo nagsunod sa Ginoo uban sa ilang mga kasingkasing ug andam nga mga hunahuna.

Ipakigbahin ang imong pagpamatuod sa importansya sa pagsunod sa Ginoo uban sa imong kasingkasing ug hunahuna. Dapita ang mga estudyante sa paghunahuna og mga paagi nga sila makasunod sa Ginoo uban ang mas kinasingkasing ug andam nga pagkamasulundon. Awhaga sila sa pagtan-aw sa mahimong kalainan niining matang sa pagkamasulundon sa ilang mga kinabuhi.

Timan-i: Human ang mga estudyante makatudlo sa ilang mga bahin sa leksyon, pasalamati sila sa ilang trabaho. Pagpamatuod nga ang gisaad nga panalangin takus sa pagkamasulundon ug mga sakripisyo nga gipangayo sa Ginoo kanato. Hangyoa ang usa ka estudyante sa pag-summarize unsay nakat-unan sa klase karon ug sa pagpasabut unsaon niya sa paglihok niadto nga mga baruganan.

Komentaryo ug Background nga Impormasyon

Doktrina ug mga Pakigsaad 64:20. Gimandoan si Isaac Morley sa pagbaligya sa iyang umahan

Sa panahon nga gihatag sa Ginoo ang pagpadayag nga gi-rekord diha sa Doktrina ug mga Pakigsaad 64, si Isaac Morley didto sa Missouri, apan mihatag siya og power of attorney [legal nga awtoridad sa paglihok alang kaniya] ngadto sa iyang bayaw nga lalaki nga si Titus Billings. Mao kini ang hinungdan nga si Titus Billings nakadawat usab og panudlo sa pagbaligya sa umahan (tan-awa sa D&P 63:39). Gibaligya ni Titus Billings hapit mga 32.5 ka ektarya sa umahan ni Isaac Morley ngadto ni Richie ug Hercules Carrell sa Oktubre 1831. (Aron makita ang dapit sa umahan ni Isaac Morley, tan-awa ang Mga Mapa ug Indeks sa Dapit-Mga Ngalan, Mapa 4, “Kirtland, Ohio, 1830–38.”)

Dugang nga mga Ideya sa Pagtudlo

Doktrina ug mga Pakigsaad 64:20. Ang umahan ni Isaac Morley

Sa dili pa hangyoon ang mga estudyante sa pagbasa sa Doktrina ug mga Pakigsaad 64:20, mahimo nimong pakit-on sila og pipila ka mga litrato sa umahan ni Isaac Morley sa Kirtland, Ohio. Kini makatabang sa mga estudyante sa pagdayeg sa sakripisyo ni Isaac Morley sa pagbaligya sa iyang umahan. Kini nga mga litrato anaa sa LDS.org.

Doktrina ug mga Pakigsaad 64:31–33. Pagpasalida sa video—“Flecks of Gold”

Aron matabangan ang mga estudyante sa pagsabut sa baruganan nga kon kita makugihon sa pagbuhat og maayo, makabuhat kita og dagkong mga butang, ikonsiderar ang pagpasalida sa Mormon Messages nga video “Flecks of Gold” (anaa sa LDS.org). Niini nga video, si Elder M. Russell Ballard sa Korum sa Napulog Duha ka mga Apostoles nag-istorya nga nagpakita sa importansya sa pagkamapailubon ug pagkamatinud-anon diha sa pagbuhat sa buluhaton sa Ginoo. Niini nga istorya, usa ka batan-ong tigpangita og bulawan nahibalo nga mas dali nga makatigum og bahandi pinaagi sa pag-angkon og dugmok nga mga bulawan kay sa mangita og dagkong bugon sa bulawan. Mahimo nimong ipasalida kini nga video human dayon ang magtutudlo nga estudyante nahuman sa pagtudlo.