Leksyon 125

Doktrina ug mga Pakigsaad 119–120

Pasiuna

Sa ting-init niadtong 1838, ang mga Santos nakasinati og grabe nga kalisdanan sa pinansyal samtang misulay sila sa pagtukod sa Simbahan sa amihanang bahin sa Missouri. Nagtinguha si Propeta Joseph Smith og direksyon gikan sa Ginoo, ug niadtong Hulyo 8, 1838, nakadawat siya og pagpadayag nga narekord diha sa Doktrina ug mga Pakigsaad 119 ug 120. Dinhi niini nga mga pagpadayag, gitudlo sa Ginoo ang balaod sa ikapulo ug mitugot sa pipila ka lider sa Simbahan sa pagtino kon unsaon paggamit ang mga pundo sa ikapulo.

Mga Sugyot alang sa Pagtudlo

Doktrina ug mga Pakigsaad 119:1–4

Gipadayag sa Ginoo ang balaod sa ikapulo

Dapita ang usa ka estudyante sa pagbasa og kusog sa mosunod nga istorya ni Presidente Gordon B. Hinckley:

“Usa ka babaye sa São Paulo, Brazil … nagtrabaho samtang nag-eskwela aron makasangkap sa iyang pamilya. Gamiton nako ang kaugalingon niyang mga pulong sa pagsulti niini nga istorya. Nag-ingon siya:

“‘Ang unibersidad diin ako nag-eskwela dunay regulasyon nga nagpugong sa mga estudyante nga dunay utang sa pagkuha sa mga eksamin.’ …

“‘Nakahinumdom ko og panahon nga ako … nagsagubang og grabeng pinansyal nga kalisud. … Dihang akong gikwenta ang binulan nga badyet, nakabantay ko nga dili kini paigo nga ibayad [sa] akong ikapulo ug sa akong unibersidad. Kinahanglang mopili ko og usa. Ang kada duha ka bulan nga eksamin sugdan na pagkasunod semana, ug kon dili ko makakuha niini mausik ang akong school year. Grabe ang akong kaguol. … … Duna koy sakit nga desisyon nga buhaton, ug wala ko masayud unsay pilion’” (“We Walk by Faith,” Ensign,Mayo 2002, 73).

• Unsa kaha ang inyong isulti ngadto sa usa ka tawo nga susama niini og sitwasyon?

Dapita ang usa ka estudyante sa pagbasa sa sumpay niini nga istorya:

“‘Kini nga pagbati misanap sa akong kalag ug nagpabilin kanako [sulod sa pipila ka adlaw]. Didto akong nahinumduman nga sa dihang gibunyagan ko miuyon ko nga mosunod sa balaod sa ikapulo. Akong giangkon sa akong kaugalingon ang usa ka obligasyon, dili sa mga misyonaryo, apan sa akong Langitnong Amahan. Nianang higayuna, ang kaguol misugod sa pagkahanaw, nga gipulihan sa nindot nga pagbati sa kalinaw ug determinasyon. …

“‘Nianang gabhiuna sa akong pag-ampo, nangayo ko og pasaylo sa Ginoo tungod sa akong pagduha-duha. Pagka-Dominggo, … uban sa dakong kalipay mibayad ko sa akong ikapulo ug mga halad. Usa kana ka espesyal nga adlaw. Gibati nako ang kalipay ug kalinaw sulod sa akong kaugalingon ug sa Langitnong Amahan’” (“We Walk by Faith,”73).

Hangyoa ang mga estudyante sa pagpamalandong kon unsa kaha ang ilang reaksyon niini nga sitwasyon. Dapita ang mga estudyante sa pagpangita sa mga baruganan atol sa ilang pagtuon sa mga kasulatan karon nga makatabang kanila samtang ilang masinati ang susama nga mga sitwasyon.

Ipasabut nga sugod niadtong 1837, nakasinati ang Simbahan og grabe nga kalisdanan sa pinansyal, ingon man usab ang daghang indibidwal nga mga miyembro sa Simbahan. Kining mga problemang pinansyal miresulta gikan sa usa ka nasudnong ekonomikanhong depresyon, kabayolente sa manggugubot nga panon didto sa Missouri ug Ohio nga mipapahawa sa mga Santos gikan sa ilang mga panimalay, ug sa pagkadili andam sa pipila ka mga Santos nga mosunod sa balaod sa pagpahinungod. Pagka-1838, tungod sa dugang nga mga Santos nga nagpundok sa Lalawigan sa Caldwell, Missouri, nagkinahanglan ang Simbahan og kwarta aron matuman kon unsay gimando sa Ginoo nga ilang buhaton, sama sa pagtukod og templo didto sa Far West. Ang mga bishop didto sa Ohio ug Missouri miawhag sa mga Santos sa pagdala sa ilang mga ikapulo ug mga halad ngadto sa balay tipiganan.

Dapita ang usa ka estudyante sa pagbasa og kusog sa pasiuna sa seksyon sa Doktrina ug mga Pakigsaad 119. Hangyoa ang klase sa pagsunod, nga mangita sa unsay gipangutana ni Joseph Smith nianang higayuna.

• Unsa man ang gipangutana ni Joseph Smith sa Ginoo?

Dapita ang usa ka estudyante sa pagbasa og kusog sa Doktrina ug mga Pakigsaad 119:1–4. Hangyoa ang klase sa pagsunod, nga mangita kon unsay tubag sa Ginoo sa gihangyo ni Joseph Smith.

• Sumala sa bersikulo 4, unsa man ang ikapulo? (Ang mga estudyante kinahanglang mahibalo sa mosunod nga sugo: Gimanduan kita sa Ginoo nga mobayad og ikanapulo sa tanan natong abut ngadto Kaniya isip ikapulo. Mahimo nimong isulat kini nga sugo diha sa pisara.)

Aron matabangan ang mga estudyante nga makasabut sa kahulugan sa pulong nga tubo diha sa bersikulo 4, dapita ang usa ka estudyante sa pagbasa og kusog sa mosunod nga pamahayag ni Presidente Howard W. Hunter:

“Ang balaod yano nga gipahayag isip ‘ikanapulo sa tanan nilang tubo.’ Ang tubo nagpasabut sa ganansya, sweldo, usbaw. Kini mao ang sweldo sa usa ka tawo nga nagtrabaho, ang ganansya sa pagpadagan og negosyo, ang ganansya sa usa ka tawo kinsa nananom o nangani, o ang kinitaan sa usa ka tawo gikan sa bisan unsang uban nga tinubdan. Ang Ginoo miingon nga kini usa ka balaod sa ‘kahangturan’ ingon nga kini gihimo kaniadto pa” (sa Conference Report, Abr. 1964, 35).

• Unsa ang inyong nakat-unan gikan sa pagmando sa Ginoo sa mga Santos sa pagbayad sa ikapulo atol sa usa ka panahon sa dihang lisud alang kanila ang pagbuhat sa ingon?

• Sa unsang mga paagi nga ang pagbayad sa ikapulo usa man ka buhat sa hugot nga pagtuo?

Aron matabangan ang mga estudyante nga makasabut kon unsaon pagbayad sa ikapulo, i-display ang usa ka porma sa Ikapulo ug Uban pang mga Halad. Hangyoa ang mga estudyante sa paghunahuna nga bag-o lang silang nakaangkon og kwarta. Dapita ang usa ka estudyante sa pagsugyot og kantidad.

• Pila may ikapulo ang kinahanglang ibayad nianang kantidad sa kwarta?

Irekord ang kantidad sa ikapulo diha sa hustong dapit sa porma ug ipangutana ang mosunod:

• Kon bahinon nato ang 10 porsyento sa atong kinitaan sa lain-laing mga kategoriya sa donasyon diha sa porma, nakabayad ba kita og hingpit nga ikapulo? (Siguroa nga ang mga estudyante makasabut nga ang 10 porsyento sa ilang kinitaan kinahanglang ilista isip ikapulo. Ang bisan unsang mga donasyon nga ilang himoon sa ubang mga pundo dugang lamang ngadto nianang 10 porsyento.)

Ipares-pares ang mga estudyante. Hangyoa sila sa pagpasabut ngadto sa usag usa sa ilang nasabtan kon sa unsang paagi gigamit ang mga pundo sa ikapulo. Dayon dapita sila sa pagbasa sa pagpasabut sa Ginoo diha sa Doktrina ug mga Pakigsaad 119:2.

• Sumala sa bersikulo 2, asa gamiton ang mga pundo sa ikapulo? (Ang ikapulo gamiton “alang sa pagtukod sa balay [sa Ginoo]” [pagtukod og mga templo] ug “alang sa pagpahimutang sa pundasyon sa Zion ug alang sa priesthood” [pagpundo sa ubang mga aspeto sa buhat sa Ginoo, sama sa pagtukod ug pagmintenar sa mga meetinghouse, paghubad ug pagmantala sa mga kasulatan, ug pagsuporta sa misyonaryo ug family history nga buhat sa tibuok kalibutan]. Mahimo nimong ipasabut nga karon wala nay utang ang Simbahan. Isulat ang mosunod nga kamatuoran diha sa pisara: Ang mga pundo sa ikapulo gigamit aron sa pagtukod og mga templo ug sa pagtuman sa buhat sa Ginoo.)

Doktrina ug mga Pakigsaad 119:5–7

Gipasabut sa Ginoo ang balaod sa ikapulo

Pag-role play

Ang pag-role play makatabang sa mga estudyante nga mapraktis ang paggamit sa mga doktrina ug mga baruganan sa ebanghelyo sa tinuod nga mga sitwasyon sa kinabuhi. Mas malampuson ang pag-role play kon hatagan nimo ang mga partisipante og igo nga impormasyon ug panahon sa pagpangandam. Samtang mag-role play ang mga estudyante, lagmit makahimo sila og mga sayop. Pagmabination sa ilang mga pagbati ug mga kinaiya, ug pag-amping nga dili manaway sa ilang mga sayop. Sa katapusan sa role play, mahimong makatabang nga pangutan-on ang mga tig-obserbar kon aduna bay laing mga ideya nga tingali ilang ikasugyot kon partisipante pa sila diha sa role play.

Pagdapit og duha ka estudyante sa pag-apil sa usa ka role play. I-assign ang usa ka estudyante nga magsilbing usa ka matinud-anong miyembro sa Simbahan, samtang ang ikaduhang estudyante mohimo sa tahas sa usa ka tawo nga dili miyembro sa Simbahan. Hatagi ang ikaduhang estudyante og usa ka piraso nga papel nga gisulatan sa mosunod nga pangutana: Nakadungog ko nga mohatag kuno mo og 10 porsyento sa inyong kinitaan ngadto sa inyong simbahan. Nganong gusto man kamo nga mobuhat niana?

Hangyoa ang ikaduhang estudyante sa pagbasa og kusog sa pangutana, ug dapita ang unang estudyante sa pagtubag. Human sa role play, pangutan-a ang klase kon unsa kaha unta ang ilang reaksyon. Ipasabut nga dunay daghang maayo nga tubag niini nga pangutana.

Dapita ang usa ka estudyante sa pagbasa og kusog sa Doktrina ug mga Pakigsaad 119:6–7. Hangyoa ang klase sa pagpangita sa unsay natuman pinaagi sa pagkamasulundon ngadto sa balaod sa ikapulo.

• Sumala sa bersikulo 6, unsa may natuman pinaagi sa pagkamasulundon ngadto sa balaod sa ikapulo? (Ang pagbalaan sa yuta sa Zion ngadto sa Ginoo.)

Aron matabangan ang mga estudyante nga makasabut niining bersikulo, ipasabut nga ang pagkabalaan nagpasabut nga mahimong gawasnon gikan sa sala—putli, limpyo, ug balaan pinaagi sa Pag-ula ni Jesukristo. Agig dugang, pahinumdumi ang mga estudyante nga ang Zion mas labaw pa kay sa pisikal nga lokasyon; katawhan kini kinsa “putli og kasingkasing” (D&P 97:21).

Dapita ang mga estudyante sa pag-summarize sa mga epekto sa pagsunod sa balaod sa ikapulo sa ilang kaugalingong mga pulong. Bisan og ang mga estudyante mahimong mogamit og lain-laing mga pulong, kinahanglan nilang mahibaloan ang mosunod nga baruganan: Ang pagbayad og ikapulo mopabalaan kanato isip mga indibidwal ug isip usa ka Simbahan. Isulat kini nga baruganan diha sa pisara. Mahimo nimong isugyot nga isulat kini sa mga estudyante diha sa margin sa ilang mga kasulatan.

Aron matabangan ang mga estudyante nga makasabut ug mobati sa kaimportante niining baruganan, hangyoa sila sa pagtubag sa usa sa mosunod nga mga pangutana diha sa ilang mga class notebook o mga scripture study journal:

• Sa unsang paagi nga ang pagbayad og ikapulo nakatabang nga mabalaan kamo?

• Sa unsa kaha nga mga paagi nga ang pagbayad og ikapulo makatabang sa usa ka tawo nga mabalaan?

Human sa igong panahon, dapita ang pipila ka estudyante sa pagpasabut kon unsay ilang gisulat. Mahimo usab nga mopakigbahin ka og usa ka kasinatian ug mohatag sa imong pagpamatuod bahin sa balaod sa ikapulo.

Doktrina ug mga Pakigsaad 120

Nag-organisar ang Ginoo og usa ka konseho sa paggasto sa ikapulo

Dapita ang usa ka estudyante sa pagbasa og kusog sa pasiuna sa Doktrina ug mga Pakigsaad 120. Hangyoa ang klase sa pagsunod ug mangita sa katuyoan niini nga pagpadayag.

Dapita ang usa ka estudyante sa pagbasa og kusog sa Doktrina ug mga Pakigsaad 120:1. Hangyoa ang klase sa pagsunod, nga mangita kon kinsa ang gipili sa Ginoo nga mahimong kabahin sa konseho nga modesisyon kon unsaon paggasto sa mga pundo sa ikapulo.

• Kinsa man ang motino kon unsaon paggasto sa mga pundo sa ikapulo?

Mahimo nimong ipasabut nga ang konseho nga gipasabut diha sa Doktrina ug mga Pakigsaad 120 maoy responsable alang sa pagdumala sa tanang mga pagbayad ug mga gasto alang sa tibuok Simbahan. Kini nga konseho kasamtangang nailhan isip Konseho sa Paggasto sa Ikapulo nga gilangkuban sa Unang Kapangulohan, sa Korum sa Napulog Duha ka mga Apostoles, ug sa Presiding Bishopric.

• Sumala sa Doktrina ug mga Pakigsaad 120:1, unsaon man pagdesisyon sa mga sakop niining konseho sa paggamit sa mga pundo sa ikapulo? (Pinaagi sa “kaugalingon nga tingog [sa Manluluwas] ngadto kanila.” Sa ato pa, pinaagi sa pagpadayag.)

Dapita ang mga estudyante sa pag-summarize diha sa ilang kaugalingong mga pulong kon unsay gitudlo niini nga pagpadayag mahitungod kon kinsa ang modumala sa paggamit sa mga pundo sa ikapulo. (Bisan kon ang mga estudyante mahimong mogamit og lain-laing mga pulong, kinahanglan nilang mahibaloan ang mosunod nga baruganan: Ang Ginoo nagdumala sa paggamit sa mga pundo sa ikapulo pinaagi sa Iyang pinili nga mga sulugoon.)

Aron matabangan ang mga estudyante nga makasabut kon sa unsang paagi nga magamit kining baruganan diha sa Simbahan karon, ipasabut nga ang matag ward o branch mosumiter sa makolekta niini nga mga pundo sa ikapulo ngadto sa punoang buhatan sa Simbahan. Ang lokal nga mga lider dili maoy motino kon unsaon paggasto niining sagradong mga pundo. Ang Konseho sa Paggasto sa Ikapulo mohimo niadtong mga desisyon ubos sa direksyon sa Ginoo.

Si Presidente Gordon B. Hinckley namulong bahin sa hilabihan nga pagtahud sa Konseho sa Paggasto sa Ikapulo alang sa mga pundo sa ikapulo:

“Gitipigan nako diha sa hunos [credenza] sa luyo sa akong lamesa ang usa ka diyot sa biyuda nga gihatag ngari kanako didto sa Jerusalem daghang katuigan na ang milabay isip usa ka pahinumdom, usa ka kanunay nga pahinumdom, sa kasagrado sa mga pundo nga kinahanglan namong atimanon. Naggikan kini sa biyuda, kini iyang halad ingon man usab sa ikapulo sa adunahan nga tawo, ug kinahanglan kining gamiton uban sa pag-amping ug paghunahuna alang sa mga katuyoan sa Ginoo. Giatiman namo kini og maayo ug gibantayan ug misulay sa matag paagi kutob sa among mahimo aron sa pagsiguro nga kini gigamit nga among gibati nga mao ang paagi nga gusto sa Ginoo nga kini gamiton alang sa pagpahigayon sa Iyang buhat ug sa kaayohan sa katawhan” (“This Thing Was Not Done in a Corner,” Ensign,Nob. 1996, 50).

Dapita ang mga estudyante sa pagpakigbahin og dugang nga mga ideya o sa ilang mga pagpamatuod mahitungod sa balaod sa ikapulo.

Komentaryo ug Background nga Impormasyon

Doktrina ug mga Pakigsaad 119. Ang balaod sa ikapulo

Si Elder Robert D. Hales sa Korum sa Napulog Duha ka mga Apostoles mipasabut sa pipila ka espirituhanong katuyoan sa pagbayad sa atong ikapulo:

“Ang pundasyon sa madaginuton nga pagpuyo mao ang balaod sa ikapulo. Ang nag-una nga katuyoan niini nga balaod mao ang pagtabang kanato nga molambo ang hugot nga pagtuo diha sa atong Langitnong Amahan ug sa Iyang Anak nga si Jesukristo. Ang ikapulo makatabang kanato sa pagbuntog sa atong mga tinguha alang sa mga butang niini nga kalibutan ug andam nga mosakripisyo alang sa uban. Ang ikapulo makatarunganon kaayo nga balaod, kay bisan unsa pa kita ka adunahan o kakabus, kitang tanan mobayad sa sama nga ikanapulo sa atong tubo sa matag tuig (tan-awa sa D&P 119:4), ug kitang tanan makadawat sa mga panalangin nga daghan gayud kaayo ‘nga wala na unyay dapit nga igong kabutangan sa pagdawat [kanila]’ (Malaquias 3:10“Pagkahimong Madaginuton nga mga Tigsangkap sa Temporal ug Espirituhanong Paagi,” Liahona, Mayo 2009, 9).

Doktrina ug mga Pakigsaad 120. Ang Konseho sa Paggasto sa Ikapulo

Sa sinugdanan, ang high council sa Missouri gisugo sa pag-apil sa Konseho sa Paggasto sa mga Ikapulo. Sa wala madugay kana nga tahas gihatag ngadto sa Korum sa Napulog Duha ka mga Apostoles. Sa ingon, sa Simbahan karon, ang Konseho sa Paggasto sa Ikapulo gilangkuban sa Unang Kapangulohan, sa Korum sa Napulog Duha ka mga Apostoles, ug sa Presiding Bishopric.

Si Elder Robert D. Hales naghisgot mahitungod sa iyang kasinatian isip sakop sa Konseho sa Paggasto sa Ikapulo, una isip Presiding Bishop ug sa wala madugay isip sakop sa Korum sa Napulog Duha ka mga Apostoles:

“Sama sa gipadayag sa Ginoo, ang paggamit sa ikapulo gitino pinaagi sa usa ka konseho nga gilangkuban sa Unang Kapangulohan, ang Korum sa Napulog Duha ka mga Apostoles, ug ang Presiding Bishopric. Ang Ginoo sa piho nga paagi miingon nga ang buhat sa konseho kinahanglang dumalaon ‘pinaagi sa akong kaugalingon nga tingog ngadto kanila’ [D&P 120:1]. Kini nga konseho gitawag nga Ang Konseho sa Paggasto sa mga Ikapulo.

“Talagsaon kini nga makasaksi niini nga konseho nga mopatalinghug sa tingog sa Ginoo. Ang matag sakop makahibalo ug makasalmot sa tanang mga desisyon sa konseho. Walay desisyon nga himoon hangtud ang konseho magkahiusa. Ang tanang mga salapi sa ikapulo gastoon lamang alang sa mga katuyoan sa Simbahan, lakip ang welfare—ang pag-alima alang sa mga kabus ug mga timawa—mga templo, mga building ug paggalam sa mga balay-tigumanan, edukasyon, kurikulum—sa laktod, ang buhat sa Ginoo. …

“Ngadto sa mga sakop sa Simbahan ug sa uban sa tibuok kalibutan, mohatag ako sa akong pagpamatuod mahitungod sa Konseho sa Paggasto sa mga Ikapulo. Nahimo ako nga sakop niini nga konseho … isip Presiding Bishop sa Simbahan ug karon isip sakop sa Korum sa Napulog Duha ka mga Apostoles. Sa tanan gayud, ang mga salapi sa ikapulo niini nga Simbahan gigamit alang sa Iyang mga katuyoan” (“Ikapulo: Usa ka Pagsulay sa Hugot nga Pagtuo nga adunay Mahangturon nga mga Panalangin,” Ensign, Nob. 2002, 28).