Leksyon 9

Joseph Smith—Kasaysayan 1:27–54; Doktrina ug mga Pakigsaad 2

Pasiuna

Ang batan-ong Joseph Smith mipadayon sa pagpanghimatuod nga siya nakakita og panan-awon, ug gipadayon siya sa paggukod tungod niini. Siya sa wala madugay miingon nga atol niini nga panahon, siya “nahulog ngadto sa daghan nga walay hinungdan nga mga kasaypanan, ug nagpakita sa kahuyang sa kabatan-on” (Joseph Smith—Kasaysayan 1:28). Usa ka gabii sa dihang siya 17 anyos, siya nag-ampo alang sa kapasayloan ug mihangyo nga makahibalo sa iyang kahimtang diha sa atubangan sa Dios. Usa ka anghel nga ginganlan og Moroni mipakita ug mipahayag nga ang Dios adunay ipabuhat ni Joseph, lakip ang paghubad sa usa ka karaang rekord nga nahisulat diha sa bulawan nga mga palid. Samtang nagpasabut sa tahas ni Joseph diha sa Pagpahiuli sa ebanghelyo, gikutlo ni Moroni ang pipila ka mga panagna gikan sa Biblia, lakip ang panagna ni Malaquias mahitungod sa pagbalik ni Elijah(Elias). Sa sunod nga adlaw, miadto si Joseph Smith sa bungtod diin gisulti ni Moroni nga gilubong ang bulawan nga mga palid. Didto nakadawat siya og dugang nga panudlo gikan ni Moroni.

Mga Sugyot alang sa Pagtudlo

Joseph Smith—Kasaysayan 1:27–29

Nag-ampo si Joseph Smith alang sa kapasayloan

Dapita ang mga estudyante sa paghunahuna mahitungod sa unsay ilang nakat-unan gikan sa ehemplo ni Joseph Smith isip usa ka batan-on nga lalaki. Mahimo kang mohangyo og pipila ka mga estudyante sa pagpakigbahin og dali sa usa ka baruganan nga ilang nakat-unan nga nakapatik kanila. Hangyoa ang usa ka estudyante sa pagbasa og kusog sa Joseph Smith—Kasaysayan1:27–29. Sa dili pa siya mobasa, ipasabut nga ang mga hitabo nga gihulagway niini nga mga bersikulo nahitabo nga si Joseph diha tali sa mga edad nga 14 ug 17. Dapita ang mga estudyante sa pagpahisama niini nga mga bersikulo diha sa ilang mga kaugalingon, nag-ila sa mga kasinatian ni Joseph Smith nga susama sa mga kasinatian nga diha kanila.

Tudloi ang mga estudyante sa pagpahisama sa mga kasulatan nganha sa ilang mga kaugalingon

Awhaga ang mga estudyante sa pagpangutana sa ilang mga kaugalingon, “Unsa nga mga kahimtang ug mga sitwasyon sa akong kinabuhi nga sama sa mga kahimtang og mga sitwasyon dinhi niini nga tudling sa kasulatan?” o “Sa unsa nga paagi ako sama sa katawhan nga among gitun-an dinhi sa mga kasulatan?” Samtang ang mga estudyante nakakita og mga pagkasusama tali sa ilang mga kasinatian ug sa mga kasinatian sa katawhan diha sa mga kasulatan, mas maayo silang moila og mga doktrina ug mga baruganan ug motan-aw kon unsaon paggamit niadtong mga kamatuoran diha sa ilang mga kinabuhi.

• Unsa ang pipila ka mga kasinatian nga aduna si Joseph Smith isip usa ka batan-on nga kamo makaagid-agid? (Pahinumdumi ang mga estudyante nga kinahanglang dili sila mopakigbahin og mga kasinatian nga personal o pribado ra kaayo.)

• Sumala sa katapusan sa Joseph Smith—Kasaysayan 1:28, unsa ang gisulti ni Joseph mahitungod sa mga tintasyon ug mga kasaypanan nga siya nahulog? (Siya wala makasala sa bisan unsang dagko nga mga sala, apan usahay siya mibati nga wala siya maglihok sama sa linihokan sa usa ka tawo kinsa gitawag sa Dios.)

• Unsa ang gibuhat ni Joseph Smith mahitungod sa kahasol sa tanlag nga iyang gibati tungod sa iyang mga sala? (Nag-ampo siya alang sa kapasayloan ug nanghangyo nga makahibalo unsay iyang kahimtang diha sa atubangan sa Dios.)

• Unsa nga mga kamatuoran ang atong makat-unan gikan sa ehemplo ni Joseph Smith?

Samtang ang mga estudyante naghisgot sa ilang mga panan-aw, tabangi sila sa pag-ila sa mosunod nga mga kamatuoran:

Samtang giila nato ang atong mga sala ug gibati ang kasubo alang niini, makaampo kita ngadto sa Langitnong Amahan alang sa kapasayloan.

Makaampo kita aron makahibalo sa atong kahimtang diha sa atubangan sa Dios.

• Unsa kaha ang gipasabut nga makahibalo sa inyong kahimtang diha sa atubangan sa Dios? (Tingali kinahanglan nimong ipasabut nga ang makahibalo sa atong kahimtang diha sa atubangan sa Dios nagpasabut nga nakahibalo kon ang Dios nahimuot ba kanato.)

• Ngano kaha nga importante alang kanato nga mahibalo sa atong kahimtang diha sa atubangan sa Dios?

Dapita ang usa ka estudyante sa pagbasa sa mosunod nga pamahayag ni Elder Neil L. Andersen sa Korum sa Napulog Duha ka mga Apostoles. Ipasabut nga ang tambag ni Elder Andersen makatabang kanato nga mahibalo kon unsaon nato sa pagkahibalo sa atong kahimtang diha sa atubangan sa Dios.

“[Kita makahimo og] mapainubsanong paghangyo sa Ginoo: ‘Amahan, unsa ang buot Nimo nga akong buhaton?’ Ang mga tubag moabut. Atong mabati ang mga kausaban nga gikinahanglan nato nga himoon. Ang Ginoo nagsulti kanato sa atong hunahuna ug sa atong kasingkasing” (“Paghinulsol … Aron Ako Moayo Kaninyo,” Liahona, Nob. 2009, 41).

Ipaambit ang imong pagpamatuod bahin sa mga kamatuoran nga nahisgutan sa mga estudyante. Pasaligi ang mga estudyante nga ang Langitnong Amahan andam sa pagpasaylo kanato samtang magpakita kita og hugot nga pagtuo diha ni Jesukristo ug buhaton ang tanang gikinahanglan sa paghinulsol sa atong mga sala.

Joseph Smith—Kasaysayan 1:30–35

Ang anghel Moroni nagpakita ni Joseph Smith

Dapita ang mga estudyante sa pagbasa og hilum sa Joseph Smith—Kasaysayan 1:30 nga mangita sa unsay nahitabo samtang si Joseph Smith nag-ampo alang sa kapasayloan. Hangyoa sila sa pagreport kon unsay ilang nakit-an. Ipakita ang litrato nga Moroni Nagpakita ni Joseph Smith didto sa Iyang Lawak (Libro sa mga Hulagway sa Ebanghelyo [2009], nu. 91; tan-awa usab sa LDS.org).

Hangyoa ang usa ka estudyante sa pagbasa og kusog sa Joseph Smith—Kasaysayan 1:32–33 ug dapita ang klase sa pagpangita sa unang mensahe ni Moroni ngadto ni Joseph Smith.

• Unsa ang gisulti ni Moroni mahitungod sa umaabut ni Joseph Smith? (Ang mga estudyante kinahanglan mopahayag nga ang Dios adunay ipabuhat ni Joseph Smith.)

• Miingon si Moroni nga ang ngalan ni Joseph Smith “pagagamiton alang sa maayo ug sa dautan diha sa tanan nga mga kanasuran.” Kanus-a kamo nakakita og mga ehemplo niini?

Hangyoa ang usa ka estudyante sa pagbasa og kusog sa Joseph Smith—Kasaysayan 1:34–35. Dapita ang klase sa pagsunod, nag-ila sa unsay gitudlo ni Moroni mahitungod sa buhat nga pagabuhaton ni Joseph.

• Sa unsa nga paagi ang basahon pagahubaron? (Pinaagi sa paggamit og espesyal nga mga bato, nga gitawag og Urim ug Thummim, nga giandam sa Dios.)

Ipasabut nga sa umaabut nga mga leksyon, ang mga estudyante makakat-on mahitungod sa mga paningkamot ni Joseph Smith sa paghubad ug sa pagmantala sa Basahon ni Mormon.

Joseph Smith—Kasaysayan 1:36–49; Doktrina ug mga Pakigsaad 2

Nagtudlo si Moroni ni Joseph Smith

I-summarize ang Joseph Smith—Kasaysayan 1:36–42 pinaagi sa pagpasabut nga gikutlo ni Moroni ang mga panagna gikan sa Biblia aron sa pagpasabut sa tahas ni Joseph Smith sa pagpahinabo sa Pagpahiuli sa ebanghelyo. (Ikonsiderar ang pagsugyot nga markahan sa mga estudyante ang mga scripture reference nga gihisgutan niini nga mga bersikulo. Sama pananglit, sa bersikulo 40, ang mga estudyante makamarka sa mga pulong “ang ikanapulog usa nga kapitulo sa Isaias.”)

Ipasabut nga ang mga pulong diha sa panagna nga gikutlo sa Joseph Smith—Kasaysayan 1:38–39 makita usab sa Doktrina ug mga Pakigsaad 2. Kini usa sa labing una nga mga pagpadayag niini nga dispensasyon, ingon nga nahatag ngadto ni Joseph Smith sa dihang siya nag-edad og 17 anyos.

Mahimo usab nimong isulti nga kini nga panagna ingon niana ka importante nga kini makita usab sa Daang Tugon (tan-awa sa Malaquias 4:5–6), sa Bag-ong Tugon (tan-awa sa Lucas 1:17), ug sa Basahon ni Mormon (tan-awa sa 3 Nephi 25:5–6).

Sa wala pay klase, paghimo og mga kopya sa mosunod nga tsart. Guntinga kini aron mahimong tulo ka nagbulag nga mga handout. Bahina ang klase ngadto sa tulo ka grupo, ug hatagi ang kada grupo og usa sa mga handout. Hangyoa ang kada grupo sa pagtuon sa ilang gi-assign nga bersikulo ug sa propetikanhong pagpasabut nga nagsunod niini. Agi og dugang, hangyoa ang kada grupo sa pag-summarize sa mensahe sa gi-assign nila nga bersikulo sa ilang kaugalingong mga pulong ug sa pagtubag sa pangutana o mga pangutana nga anaa sa ilang mga handout.

Grupo 1

Doktrina ug mga Pakigsaad 2:1—Kinsa si Elijah? Unsang gahum sa priesthood ang gisulti ni Moroni nga ipahiuli ni Elijah?

“Si Elijah usa ka bantugang propeta nga adunay dakong gahum nga gihatag sa Dios kaniya. Iyang gihuptan ang pinakadakong gahum nga gihatag sa Dios sa Iyang mga anak: gihuptan niya ang gahum sa pagsilyo, ang gahum sa pagbugkos dinhi sa yuta ug pagpabugkos didto sa langit” (Presidente Henry B. Eyring, “Mga Kasingkasing Nahiusa sa Pagkabugkos,” Liahona, Mayo 2005, 78).

Grupo 2

Doktrina ug mga Pakigsaad 2:2—Kinsa nga mga amahan ug mga anak ang gipasabut niini nga bersikulo?

Sa panagna nga “siya motanom diha sa mga kasingkasing sa anak sa mga saad nga gihimo ngadto sa mga amahan,” ang mga pulong “mga amahan” nagpasabut ngadto ni “Abraham, Isaac, Jacob, ngadto kang kinsa ang saad gihimo. Unsa ang mga saad? Kini ang mga saad sa usa ka magpadayong yunit sa pamilya ngadto sa kahangturan” (Bruce R. McConkie, Millennial Messiah [1982], 267).

Sa panagna nga “ang mga kasingkasing sa mga anak mobati sa ilang mga amahan,” ang pulong “ilang mga amahan” nagpasabut ngadto sa “atong patay nga mga katigulangan kinsa namatay nga walay pribilehiyo sa pagdawat sa ebanghelyo, apan kinsa nakadawat sa saad nga ang panahon moabut nga kana nga pribilehiyo ihatag ngadto kanila. Ang mga anak mao kadtong karon buhi kinsa nag-andam og mga kasayuran sa kasaysayan sa mga katigulangan ug kinsa nagpahigayon sa mga pagpuli nga mga ordinansa diha sa mga templo” (Joseph Fielding Smith, Doctrines of Salvation, ed. Bruce R. McConkie, 3 bols. [1954–56], 2:127).

Grupo 3

Doktrina ug mga Pakigsaad 2:3—Ngano nga ang yuta sa hingpit malaglag kon ang gahum sa pagbugkos wala mapahiuli?

“Nganong pagalaglagon ang kalibutan? Tungod lamang kay kon walay pagkasumpay tali sa mga amahan ug sa mga anak— nga mao ang buluhaton alang sa mga patay—nan tanan kita magbarug nga isalikway;ang tanang buhat sa Dios mapakyas ug hingpit nga malaglag” (Joseph Fielding Smith, Doctrines of Salvation, ed. Bruce R. McConkie, 3 bols. [1954–56], 2:122).

Human ang mga grupo adunay igong panahon sa pag-andam, dapita ang mga estudyante gikan sa mga grupo sa pagreport sa ilang mga summary ug mga tubag ngadto sa klase. Ang mga tubag sa mga estudyante kinahanglang magpakita sa mosunod nga mga kamatuoran:

Doktrina ug mga Pakigsaad 2:1—Ang Dios mopadala nganhi sa yuta ni Elijah sa pagpahiuli sa gahum sa pagbugkos sa wala pa ang Ikaduhang Pag-anhi ni Jesukristo.

Doktrina ug mga Pakigsaad 2:2—Ang atong mga kasingkasing mobati sa atong mga katigulangan, ug atong mapahigayon ang mga ordinansa alang kanila diha sa mga templo.

Doktrina ug mga Pakigsaad 2:3—Kon wala ang gahum sa paghiusa sa mga pamilya alang sa kahangturan, ang yuta pagalaglagon sa Ikaduhang Pag-anhi ni Jesukristo.

Kon na-sealed ka sa templo, mahimo nimong ipakita ang litrato sa imong pamilya. Kon wala ka pa ma-sealed, isulti ang imong kahinam nga ma-sealed. Ipasabut og dali nga kon ang mga estudyante magtuon sa Doktrina ug mga Pakigsaad 110, makat-unan nila ang mahitungod ni Elijah nga nagtugyan sa gahum sa pagbugkos diha ni Propeta Joseph Smith.

Giyahi og balik ang atensyon sa mga estudyante ngadto sa asoy sa Joseph Smith—Kasaysayan pinaagi sa pagpasabut nga human gikutlo ni Moroni ang panagna mahitungod sa pagbalik ni Elijah, gikutlo niya ang ubang mga panagna mahitungod sa Pagpahiuli. Dayon mihatag siya og dugang nga mga panudlo mahitungod sa bulawang mga palid ug mibiya (tan-awa sa Joseph Smith—Kasaysayan 1:42–43). Dapita ang usa ka estudyante sa pagbasa og kusog sa Joseph Smith—Kasaysayan 1:44–45. Hangyoa ang klase sa pagsunod ug sa pag-ila kon unsay nahitabo human sa pagbiya ni Moroni. Sa mahibaloan na sa mga estudyante nga si Moroni mibalik nianang gabhiona ug gibalik ang samang mensahe, dapita sila sa pagbasa sa Joseph Smith—Kasaysayan 1:46–49 ug sa pagpangita kapila si Moroni mihatag sa samang mensahe ngadto ni Joseph Smith.

• Kapila gihatag ni Moroni ang mensahe ngadto ni Joseph Smith? (Upat ka beses.)

• Unsa ang pipila ka mga mensahe nga gibalik-balik diha sa mga kasulatan, sa mga leksyon sa Simbahan, ug sa mga pakigpulong sa kinatibuk-ang komperensya?

• Sa unsa nga mga paagi kita makadawat og kaayohan kon ang Ginoo ug ang Iyang mga sulugoon nagbalik-balik sa ilang mga mensahe?

Awhaga ang mga estudyante sa pagpangita sa gibalik-balik nga mga pagtulun-an samtang nagtuon sila sa mga kasulatan sa ilang mga kaugalingon ug sa pagkonsiderar sa importansya niadtong mga pagtulun-an.

Joseph Smith—Kasaysayan 1:50–54

Miadto si Joseph sa bungtod ug giablihan ang rekord, ang Urim ug Thummim, ug ang panagang sa dughan [taming]

I-summarize ang Joseph Smith—Kasaysayan 1:50–51 pinaagi sa pagpasabut nga gisunod ni Joseph ang sugo ni Moroni ug gisultihan ang iyang amahan mahitungod sa iyang kasinatian sa miaging gabii. Mituo niya ang iyang amahan ug mitambag kaniya sa pagbuhat unsay gisulti ni Moroni nga buhaton niya. Busa miadto si Joseph sa bungtod diin ang bulawang mga palid gilubong. Hangyoa ang tulo ka mga estudyante sa pagpuli-puli sa pagbasa og kusog gikan sa Joseph Smith—Kasaysayan 1:52–54 samtang ang klase mosunod. Aron sa pagsiguro nga ang mga estudyante klarong nakasabut sa mga hitabo nga gihulagway niini nga mga bersikulo, hangyoa ang usa ka estudyante sa pagsulti og balik kon unsa ang nahitabo sa iyang kaugalingong mga pulong. Pahibaloa ang mga estudyante nga sa sunod leksyon hisgutan nila ang mga hitabo nga naglibut sa panahon sa dihang si Joseph gitugutan sa pagkuha sa mga palid.

Mahimo nimong tapuson pinaagi sa pagpamatuod sa mga kamatuoran nga inyong nahisgutan niini nga leksyon ug pinaagi sa pagdapit sa mga estudyante sa paglihok sa bisan unsa nga mga pag-aghat nga ilang madawat aron sa paggamit niini nga mga kamatuoran diha sa ilang mga kinabuhi.

Komentaryo ug Background nga Impormasyon

Joseph Smith—Kasaysayan 1:33. “Ang akong ngalan … pagalitukon sa maayo ug sa dautan taliwala sa tanan nga mga katawhan”

Si Elder John H. Groberg sa Seventy miistorya sa usa ka kasinatian diin iyang nakita ang katumanan sa panagna ni Moroni sa Joseph Smith—Kasaysayan 1:33. Samtang nagserbisyo isip usa ka misyonaryo sa South Pacific, mibisita si Elder Groberg sa usa ka layo kaayo nga isla nga ginganlan og Tafahi, nga may 18 lamang ka panimalay ug walay elektrisidad o nag-agas nga tubig. Misulat siya:

“Sa katapusang panimalay, usa ka katingad-an nga hunahuna miabut kanako, ‘Nganong dili nimo sulayan ang panagna nga ang pangalang Joseph Smith kinahanglang mailhan alang sa maayo ug sa dautan sa tibuok kalibutan?’ Wala ako mahibalo ngano nga ang hunahuna miabut, apan kini miabut.”

Gipangutana niya ang pamilya nga nagpuyo niini nga panimalay kon nakadungog ba sila sukad sa presidente sa Estados Unidos. Mitubag sila, “Kinsa siya?” ug “Asa ang Estados Unidos?” Mireport si Elder Groberg:

“Naningkamot ako sa pagpasabut kon hain kini, apan dili sila makasabut. Nangutana sila kon unsa kadako nga isla kana. Mitubag ako nga kini usa ka dako kaayo nga isla, liboan ka milya ang gilay-on nga may minilyon ka mga tawo ang nagpuyo diha niini. Gisultihan ko sila nga daghang mga tawo didto wala sukad makakita og lawod ug nga daghang mga tawo wala manag-ilhanay sa usag usa. Dili nila masabtan kana.”

Dayon gipangutana niya sila mahitungod sa mga lider sa Russia ug sa France, apan dili sila makatubag sa iyang mga pangutana.

“Sunod,” miingon siya, “Nangutana ako mahitungod sa pipila ka inilang mga tawo sa sport, mga artista, bantugang mga negosyante, mahitungod sa Grabing Kalisud, sa gubat sa Korea, ug ubang mga butang. …

“Walay miyembro sa Simbahan nga nagpuyo niini nga isla, hinoon dihay duha ka lain nga mga simbahan didto. Miginhawa ako og lawom ug miingon, ‘Nakadungog ba mo sukad ni Joseph Smith?’

“Diha-diha dayon ang ilang mga nawong misanag. Ang tanan mitan-aw kanako, ug ang amahan miingon, ‘Ayaw kami og sultihi mahitungod nianang mini nga propeta! Dili dinhi sa among panimalay! Nasayud mi sa tanan mahitungod kaniya. Gisultihan kami sa among ministro!’ Dili ako hapit makatuo sa unsay akong nadungog. Ang kasulatan … mialingaw-ngaw sa akong hunahuna nga ang pangalan ni Joseph ‘pagagamiton alang sa maayo ug sa dautan diha sa tanang mga kanasuran’ (JS—K 1:33). Alang kanako kini usa ka direkta nga katumanan sa panagna.

“Nakumbinsir ako nga dili na kamo makaadto og dapit nga mas layo, mas dili konektado sa modernong sibilisasyon kay sa gamay nga isla sa Tafahi. Ang mga tawo didto walay nailhan sa bantugang mga lider sa panahon—politikanhon, ekonomikanhon, o bisan unsa—apan nakaila sila sa pangalang Joseph Smith. Niini nga sitwasyon nailahan nila kini sa kangil-ad, sa labing gamay sa pagsugod. Gigahin ko ang pipila ka mga adlaw sa pagpasabut pa sa misyon ni Propeta Joseph Smith, ug sa wala pa kami mibiya, pipila kanila nakaila sa iyang pangalan alang sa maayo” (In the Eye of the Storm [1993], 104–6).

Dugang nga Ideya sa Pagtudlo

Joseph Smith—Kasaysayan 1:36–49; Doktrina ug mga Pakigsaad 2. “Ang mga kasingkasing sa mga anak mobati sa ilang mga amahan.”

Tabangi ang mga estudyante sa pagkaamgo sa kalipay nga moabut gikan sa pagsiksik alang sa mga rekord sa ilang mga katigulangan ug sa pag-adto sa templo sa pagpahigayon sa mga ordinansa alang kanila. Dapita ang usa ka estudyante sa pagbasa og kusog sa Doktrina ug mga Pakigsaad 2:1–3 ug hangyoa ang klase sa pagpaminaw kon unsa ang mahitabo ngadto sa mga “kasingkasing sa mga anak.”

• Unsa ang gisulti sa Dios nga Iyang itanom diha sa mga kasingkasing sa mga anak? (Ang “saad nga gihimo ngadto sa mga amahan.”)

Tabangi ang mga estudyante sa pagsabut nga “ang mga saad nga gihimo ngadto sa mga amahan” mao ang mga saad diha sa Abrahamic nga pakigsaad, nga naglakip sa mga panalangin sa priesthood ug sa mahangturong mga pamilya. Mahimo nimong paribyuhon ang mga estudyante sa entry alang sa “Abrahamic nga Pakigsaad” diha sa Matinud-anon sa Tinuhoan: Usa ka Pakisayran sa Ebanghelyo. [2004], 5–6.

• Unsa kaha ang gipasabut sa mobati ang atong mga kasingkasing ngadto sa atong mga amahan?

Tabangi ang mga estudyante sa pagsabut nga agi og dugang sa pagpabati sa atong mga kasingkasing ngadto sa atong yutan-ong mga ginikanan ug paghinumdom sa mga saad nga gihimo sa Ginoo ngadto ni Abraham, Isaac, ug Jacob, kinahanglan nga mobati ang atong mga kasingkasing ngadto sa atong mga katigulangan kinsa nangamatay nga wala makadawat sa ebanghelyo. Kini kabahin sa atong responsibilidad ug pribilehiyo isip mga tigdawat sa mga saad diha sa Abrahamic nga pakigsaad. Tungod sa atong gugma alang sa atong mga katigulangan, kinahanglan nga moadto kita sa templo ug tabangan sila nga makadawat sa mga ordinansa sa kaluwasan.

Dapita ang usa ka estudyante sa pagbasa sa mosunod nga pamayahag ni Elder Richard G. Scott sa Korum sa Napulog Duha ka mga Apostoles:

“Ang buhat sa templo ug sa family history maoy usa ka buhat nga may duha ka bahin. Konektado sila sa usag-usa sama sa mga ordinansa sa bunyag ug gasa sa Espiritu Santo. Pipila sa mga miyembro tingali dili makahimo sa duha ka buhat tungod sa panglawas o gilay-on sa mga templo” (“Ang Hingpit nga Kalipay sa Pagtubos sa mga Patay,” Liahona, Nob. 2012, 93).

Ipasabut nga human sa paghimo niini nga pamahayag, gikutlo ni Elder Scott si Presidente Howard W. Hunter. Dapita ang laing estudyante sa pagbasa sa mga pulong ni Presidente Hunter:

“Kinahanglan atong mahimo ang buhat sa ordinansa sa priesthood sa templo nga gikinahanglan sa atong kahimayaan; dayon atong himoon ang gikinahanglang buhat alang niadtong walay kahigayunan nga madawat ang ebanghelyo sa buhi pa. Ang pagbuhat niini alang sa uban mahimo sa duha ka mga lakang: una, pinaagi sa pagsiksik sa family history sa pag-ila sa atong mga kagikan; ug ikaduha, pinaagi sa pagbuhat sa mga ordinansa sa templo aron mahatagan sila sa samang kahigayunan nga gihatag sa mga buhi” (“A Temple-Motivated People,” Ensign, Peb. 1995, 4; tan-awa usab “Ang Hingpit nga Kalipay sa Pagtubos sa mga Patay,” 93).

• Unsa ang duha ka bahin sa buhat sa templo ug family history?

Dapita ang laing estudyante sa pagpadayon og basa sa pamahayag ni Presidente Hunter:

“Daghang mga miyembro sa Simbahan ang wala kaayoy kahigayunan nga makaadto sa mga templo. Nagbuhat sila kutob sa ilang mahimo. Nagsiksik sila sa family history ug ang buhat sa ordinansa sa templo ipahigayon sa uban. Sa laing bahin, may pipila ka mga miyembro nga makaapil sa buhat sa templo apan wala makahimo og pagsiksik sa family history sa ilang kaugalingong mga pamilya. Bisan kon sila balaanong miserbisyo sa pagtabang sa uban, mawad-an sila og usa ka panalangin kon dili mangita sa ila mismong patay nga mga katigulangan sigun sa balaanong paggiya sa mga propeta sa ulahing mga adlaw. …

Akong nakat-unan nga kadtong nagsiksik sa family history ug dayon mipahigayon sa mga ordinansa sa templo alang niadtong mga ngalan nga ilang nakit-an makaangkon sa dugang nga kalipay nga madawat ang duha ka bahin sa panalangin” (“A Temple-Motivated People,” 4–5; tan-awa usab sa “Ang Hingpit nga Kalipay sa Pagtubos sa mga Patay,” 93).

Hangyoa ang laing estudyante sa pagbasa sa mosunod nga pamahayag ni Elder Scott:

“Ang Langitnong Amahan gusto nga kitang tanan makadawat sa duha ka bahin sa panalangin niining mahinungdanong buhat. Iyang gigiyahan ang uban sa pagpakita kanato unsaon sa pagkahimong takus. Anaa ra kanato unsaon sa pag-angkon kadto nga mga panalangin.

“Bisan unsang buhat inyong himoon sa templo maoy oras nga maayong pagkagahin, apan ang pagdawat og mga ordinansa alang sa usa sa imong katigulangan naghimo sa imong panahon sa templo nga mas sagrado, ug mas dagkong panalangin ang madawat. Ang Unang Kapangulohan mideklarar, “Ang atong pinakaimportanting obligasyon mao ang pagpangita ug pag-ila sa atong kaugalingong katigulangan.’ [Sulat sa First Presidency, Peb. 29, 2012; emphasis gidugang.]

“Gusto ba ninyo mga kabatan-onan nga mawagtang ang impluwensya sa kaaway sa inyong kinabuhi? Isubsob ang inyong kaugalingon sa pagpangita sa inyong mga katigulangan, pag-andam sa ilang mga ngalan alang sa sagradong mga ordinansa sa templo, ug dayon adto sa templo aron mobarug isip puli nila sa pagdawat sa mga ordinansa sa bunyag ug sa gasa sa Espiritu Santo. Sa inyong pagdako, makaapil na usab kamo sa pagdawat sa ubang mga ordinansa. Wala na akoy mahunahuna nga mas labawng makapanalipod gikan sa impluwensya sa kaaway sa inyong kinabuhi” (“Ang Hingpit nga Kalipay sa Pagluwas sa mga Patay,” 93–94).

• Unsa nga mga panalangin ang moabut niadtong kinsa naghimo og buhat sa templo ug family history?

• Unsa ang inyong gibuhat aron maapil sa duha ka bahin sa buhat sa templo ug sa family history? Paghunahuna mahitungod sa unsay inyong mabuhat aron molambo.