Home-Study nga Leksyon
Doktrina ug mga Pakigsaad 121–123; ang Pagtukod sa Nauvoo (Unit 26)
Materyal sa Pagpangandam alang sa Home-Study Teacher
Summary sa Daily Home-Study nga mga Leksyon
Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang gitun-an nila ang Doktrina ug mga Pakigsaad 121–123 ug ang leksyon nga “Ang Pagtukod sa Nauvoo” (unit 26) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.
Day 1 (Doktrina ug mga Pakigsaad 121:1–10; 122)
Samtang gitun-an sa mga estudyante ang mahitungod sa pagkabilanggo ni Propeta Joseph Smith ug sa uban didto sa Liberty Jail, ilang nadiskubrihan ang mosunod nga mga baruganan: Kon kita motawag sa Ginoo atol sa mga panahon sa kalisdanan ug kasakit, makadawat kita sa Iyang kalinaw. Kon molahutay kita og maayo sa mga pagsulay dinhi sa mortalidad, ang Dios mopanalangin kanato karon ug sa kahangturan. Ang mga kasakit makahatag kanato og kasinatian ug mahimong alang sa atong kaayohan. Nakat-unan usab sa mga estudyante nga giantus sa Manluluwas ang mga kasakit sa tanang tawo.
Human sa pagtuon bahin sa nasinati nga mga kasakit ug mga pagpanglutos sa mga Santos gikan sa ilang mga kaaway didto sa Missouri, nakat-unan sa mga estudyante nga ang Ginoo nakakita ug nasayud sa tanan natong mga binuhatan ug kadtong mohimo og sayop makadawat sa paghukom sa Dios sa iyang gitakda nga panahon. Nadiskubrihan usab nila nga ang Dios mopadayag og kahibalo ngari kanato pinaagi sa Espiritu Santo ug nga ang mga pagsulay makatabang sa paglunsay kanato ug pag-andam kanato sa pagdawat og pagpadayag.
Niining porsyon sa dinasig nga sulat ni Propeta Joseph Smith gikan sa Liberty jail, nakat-unan sa mga estudyante nga ang mga naghupot sa priesthood makakuha lamang sa gahum sa langit kon sila magpakabuhi nga matarung. Gikonsiderar usab sa mga estudyante ang piho nga mga buhat nga makapaluya o makapalig-on sa gahum sa naghupot sa priesthood.
Day 4 (Doktrina ug mga Pakigsaad 123; ang Pagtukod sa Nauvoo)
Samtang gitun-an sa mga estudyante ang katungdanan sa mga Santos kalabut sa ilang mga tiglutos, ilang nakat-unan kining mga baruganan: Ang Ginoo motuman sa Iyang mga saad human nato gihimo ang atong bahin. Adunay daghan kinsa natago gikan sa kamatuoran tungod kay wala sila masayud asa kini pangitaa. Ang atong desisyon sa pagsunod sa ingon og ginagmay nga mga sugo sa Ginoo mahimong adunay dakong impluwensya sa umaabut. Nakat-unan usab sa mga estudyante ang mahitungod sa punoang buhatan sa Simbahan nga naestablisar didto sa Nauvoo, Illinois, ug nakadiskubre nga ang Relief Society usa ka dinasig nga bahin sa Pagpahiuli sa ebanghelyo ni Jesukristo.
Pasiuna
Niini nga leksyon ang mga estudyante magribyu sa pipila ka mga pagtulun-an gikan sa Doktrina ug mga Pakigsaad 121–122 nga makatabang kanato kon kita makasinati og kalisdanan sa kinabuhi. Ila usab nga madiskubrihan nga ang pagpanggukod makaimpluwensya sa buhat sa Dios sa pagpadayon imbis mopahunong sa pag-uswag niini. Sa katapusan, makat-unan sa mga estudyante ang mahitungod sa pag-establisar sa Relief Society didto sa Nauvoo, Illinois, ug mopakigbahin sa mga paagi nga ang Relief Society nakapanalangin sa mga tawo karon.
Mga Sugyot alang sa Pagtudlo
Doktrina ug mga Pakigsaad 121–122
Ang mga Santos nakakat-on og importanting mga leksyon gikan sa ilang mga kasinatian uban sa pagpanggukod
Diha sa pisara, isulat ang Sugo sa pagpatay, Haun’s Mill, ug Liberty Jail. Dapita ang mga estudyante sa paggamit niining mga pulong sa pag-summarize unsay ilang nakat-unan mahitungod sa mga pagpanggukod nga nasinati sa mga Santos didto sa Missouri niadtong 1838–39.
Isulat diha sa pisara ang Doktrina ug mga Pakigsaad 121:7–10; 122:7–9. Pahinumdumi ang mga estudyante nga dinhi niining mga bersikulo ang Ginoo mipadayag sa mga baruganan ngadto ni Propeta Joseph Smith sa paghupay niya ug sa mga Santos atol sa ilang mga pagsulay. Dapita ang mga estudyante sa pagbasa og hilum niining mga bersikulo, nga mangita sa mga paagi nga ang mga pagtulun-an niining mga bersikulo tingali makatabang kanila sa panahon sa mga pagsulay. Dapita ang pipila ka mga estudyante sa pagpakigbahin sa unsay ilang makit-an.
Atol sa semana, natun-an sa mga estudyante ang Doktrina ug mga Pakigsaad 121:36, 41–42, nga usa ka scripture mastery passage. Mahimo nimo silang hangyoon nga magdungan sa pagribyu niini pinaagi sa pag-recite sa bersikulo 36. Mahimo usab nimong ikonsiderar ang paghangyo nila sa paglista og matarung nga mga buhat nga nahisgutan sa Ginoo sa mga bersikulo 41–42.
-
Kinsa ang inyong nailhan nga usa ka ehemplo niining matarung nga mga baruganan?
Ipakigbahin ang pagpasalamat nga inyong nabati alang sa matarung nga mga naghupot sa priesthood ug alang sa mga panalangin nga mahimong madawat sa tanang tawo pinaagi sa gahum sa priesthood.
Ang Pagtukod sa Nauvoo
Hangyoa ang mga estudyante sa paghingalan og mga butang nga makapalong sa kalayo. Dayon ipangutana kon usa ang makapadako sa kalayo. Ipasabut nga si Joseph Smith mitandi sa buhat sa Dios ngadto sa kalayo.
-
Sa inyong hunahuna nahisama ba kaha sa tubig ang nasinati sa mga Santos nga pagpanggukod didto sa Missouri nga misugod sa pagpalong sa buhat sa Dios o sama sa sugnod nga nakatabang sa pagpadako niini? Ngano man?
Dapita ang usa ka estudyante sa pagbasa og kusog sa mosunod nga pamahayag ni Propeta Joseph Smith. Ipasabut nga ang Propeta misulat niining pamahayag diha sa usa ka sulat ngadto sa editor sa newspaper nga ginganlan og John Wentworth niadtong Marso 1, 1842.
“Ang pagpanggukod wala makapahunong sa pag-uswag sa kamatuoran, apan midugang lamang sa sugnod ngadto sa siga. …
“… Ang Sumbanan sa Kamatuoran natukod; walay dili balaan nga kamot ang makapugong sa buhat sa paglambo; mga pagpanggukod mahimong magkakusog, ang mga manggugubot mahimong maghiusa, mga kasundaluhan magpundok, mga pasangil mahimong modaot sa kadungganan, apan ang kamatuoran sa Dios magpadayon nga maisugon, halangdon, ug gawasnon, hangtud nga kini makasulod sa matag yuta, makabisita sa matag dapit, molukop sa matag nasud, ug makasulti sa matag dunggan, hangtud ang mga katuyoan sa Dios matuman, ug ang Halangdong Jehova moingon nga ang buhat nahuman na” (sa History of the Church, 4:540).
-
Unsa nga baruganan ang atong makat-unan gikan niini nga pamahayag? (Ang mga estudyante mahimong motino og lainlaing mga kamatuoran, apan hatagi og gibug-aton ang mosunod: Walay makapahunong sa pag-uswag sa buhat sa Dios sa tibuok kalibutan.)
-
Unsa nga ebidensya ang inyong nakita niining baruganan karon?
-
Sa unsang mga paagi nga kamo makaapil sa pagpauswag sa buhat sa Dios?
Ipasabut nga nianang panahona si Propeta Joseph Smith misulat niining panagna diha sa iyang sulat ngadto ni John Wentworth, ang Ginoo misugod sa pagtawag og mga misyonaryo sa pagsangyaw sa ebanghelyo sa nagkalain-laing mga nasud. Kana nga panagna nagsugod sa pagkatuman samtang ang liboan ka mga tawo—kasagaran gikan sa Great Britain—nabunyagan. Ang bag-ong mga miyembro nakahatag og dakong kalig-on ngadto sa Simbahan, ug daghan pang mibiyahe aron sa pag-apil sa mga Santos didto sa Nauvoo.
Pahibaloa ang klase nga sa Nauvoo, Illinois, ang mga kababayen-an sa Simbahan maoy dakong kalig-on sa pag-abante sa buhat sa Ginoo. Dapita ang usa ka estudyante sa pagbasa sa mosunod nga duha ka mga paragraph:
Niadtong 1842 pipila sa mga kababayen-an sa Nauvoo, Illinois, nanagpundok aron sa paghisgot og mga paagi nga sila makatabang sa pagtukod sa Templo sa Nauvoo. Naghimo sila og katilingban ug dayon mihangyo ni Propeta Joseph Smith alang sa iyang opinyon mahitungod niini. Miaprubar siya niini, apan nadasig siya sa pag-organisar sa Relief Society “ubos sa priesthood subay sa sumbanan sa priesthood” (Mga Pagtulun-an sa mga Presidente sa Simbahan: Joseph Smith [2007], 545; tan-awa usab sa Anak nga mga Babaye sa Akong Gingharian: Ang Kasaysayan ug Buhat sa Relief Society [2011], 12).
Si Emma Smith natawag nga mahimong unang kinatibuk-ang presidente sa Relief Society. Si Sister Eliza R. Snow, kinsa miserbisyo isip secretary sa Relief Society didto sa Nauvoo ug sa kaulahian gitawag sa pagserbisyo isip ang ikaduha nga kinatibuk-ang presidente sa Relief Society, mitudlo: “Bisan tingali og moderno ang pangalan [Relief Society], ang institusyon nanukad sa karaan. Gisultihan kita [ni Propeta Joseph Smith] nga ang sama nga organisasyon diha na sa karaan nga Simbahan” (“Female Relief Society,” Deseret News, Abr. 22, 1868, 1; tan-awa usab sa Anak nga mga Babaye sa Akong Gingharian, 7).
-
Unsa ang atong makat-unan mahitungod sa Relief Society gikan sa pamahayag ni Eliza R. Snow? (Samtang motubag ang mga estudyante, isulat ang mosunod nga kamatuoran diha sa pisara: Ang Relief Society usa ka dinasig nga bahin sa Pagpahiuli sa Simbahan ni Jesukristo.)
-
Ngano kaha nga importante alang kanato nga makasabut niining kamatuoran?
Dapita ang usa ka estudyante sa pagbasa og kusog sa mosunod nga pamahayag mahitungod sa mga katuyoan sa Relief Society:
“Ang Relief Society giestablisar aron sa pagtabang sa pag-andam sa anak nga mga babaye sa Dios alang sa mga panalangin sa kinabuhing dayon. Ang mga katuyoan sa Relief Society mao ang pagpalambo sa pagtuo ug personal nga pagkamatarung, paglig-on sa mga pamilya ug panimalay, ug paghatag sa kahupayan pinaagi sa pagpangita ug pagtabang niadtong mga nanginahanglan” (Anak nga mga Babaye sa Akong Gingharian, xi–xii).
Hangyoa ang mga estudyante sa pagribyu sa unsay ilang gisulat sa ilang mga scripture study journal alang sa day 4, assignment 7. (Gihangyo sila sa pagpakigsulti uban sa usa ka sakop sa Relief Society ug isulat ang pipila sa mga paagi nga ang Relief Society nakapanalangin sa iyang kinabuhi ug nakahatag niya og mga oportunidad sa pag-apil diha sa buhat sa Ginoo.) Dapita ang mga estudyante sa pagpakigbahin sa unsay ilang nakat-unan gikan niining kalihokan.
Tapusa kini nga leksyon pinaagi sa pagpakigbahin sa imong pagpamatuod kon sa unsang paagi nga ang mga paningkamot sa matinud-anong mga kalalakin-an ug kababayen-an karon nakatabang nga ang buhat sa Ginoo magpadayon sa pagdako sa tibuok kalibutan. Dapita ang mga estudyante sa pagpakabuhi nga matinud-anon aron sila makapadayon sa pag-apil diha sa buhat sa Ginoo.
Sunod nga Unit (Doktrina ug mga Pakigsaad 124–128)
Hangyoa ang mga estudyante sa paghunahuna bahin sa mga panahon sa dihang miapil sila sa mga bunyag ug mga kumpirmasyon alang sa patay. Ipasabut nga daghan sa ilang mga pagtuon sa mosunod nga semana mahitungod sa Templo sa Nauvoo ug sa pagpahiuli sa ordinansa sa bunyag alang sa patay.