Leksyon 135

Doktrina ug mga Pakigsaad 128:12–25

Pasiuna

Kini nga leksyon naglangkob sa nahibiling porsyon sa usa ka sulat nga gihimo ni Joseph Smith ngadto sa mga Santos sa sayong bahin sa Septyembre 1842. Niini nga porsyon sa sulat, gitudlo sa Propeta ang mahitungod sa kaluwasan sa mga buhi ug sa mga patay. Giawhag niya ang mga Santos nga magmatinud-anon sa ilang buhat alang sa mga patay ug mipahayag sa iyang hingpit nga kalipay sa Pagpahiuli sa ebanghelyo.

Mga Sugyot alang sa Pagtudlo

Doktrina ug mga Pakigsaad 128:12–18

Nagtudlo si Joseph Smith mahitungod sa kaluwasan sa mga buhi ug sa mga patay

I-display ang usa ka litrato sa bunyaganan [baptismal font] diha sa templo (pananglitan, “Bunyaganan sa Templo,” Libro sa Hulagway sa Ebanghelyo [2009], nu. 121; tan-awa usab sa LDS.org). Hangyoa ang mga estudyante sa paghunahuna nga nagtambong sila og open house sa templo kauban ang usa ka higala nga dili miyembro sa Simbahan. Human makaagi sa baptistry, nangutana ang ilang higala, “Nganong iunlod man gyud mo sa tubig kon bunyagan mo?” Nangutana usab ang ilang higala, “Nganong bunyagan man mo alang sa patay na nga mga tawo?”

Pahinumdumi ang mga estudyante nga samtang nagtago-tago si Joseph Smith gikan sa mga tawo nga nagtinguha sa paagi nga wala mahisubay sa balaod aron arestuhon siya, misulat siya ngadto sa mga Santos. Niini nga sulat, gitudloan niya sila og dugang mahitungod sa bunyag alang sa mga patay. Dapita ang usa ka estudyante sa pagbasa og kusog sa Doktrina ug mga Pakigsaad 128:12–13. Hangyoa ang klase sa pagsunod ug sa pagpangita sa gitudlo ni Joseph Smith mahitungod sa simbolismo sa bunyag.

• Unsaon ninyo paggamit ang mga pagtulun-an diha sa mga bersikulo 12–13 aron matabangan ang usa ka tawo nga makasabut nganong ang bunyag gihimo pinaagi sa pagpaunlod?

Hangyoa ang usa ka estudyante sa pagbasa og kusog sa Doktrina ug mga Pakigsaad 128:15. Dapita ang klase sa pagsunod ug sa pagpangita sa mga rason nganong gipahigayon nato ang mga bunyag alang sa mga patay.

• Sumala niini nga bersikulo, nganong nagkinahanglan man kanato ang atong mga katigulangan aron ipahigayon ang mga bunyag alang sa mga patay? (Kon gikinahanglan, giyahi ang atensyon sa mga estudyante ngadto sa mga pulong nga “sila kon wala kita dili mahingpit.” Tabangi ang mga estudyante nga mahibalo sa mosunod nga doktrina: Ang atong mga katigulangan nga namatay nga wala makahibalo sa ebanghelyo dili mouswag paingon sa pagkahingpit hangtud nga mapahigayon ang makaluwas nga mga ordinansa alang kanila.)

Kon nagkinahanglan ang mga estudyante og tabang sa pagtubag niining pangutana, dapita ang usa ka estudyante sa pagbasa og kusog sa mosunod nga pamahayag:

“Ang inyong namatay na nga mga katigulangan nagpuyo sa usa ka dapit nga gitawag og kalibutan sa espiritu. Didto sila adunay oportunidad sa pagpaminaw ug pagdawat sa ebanghelyo ni Jesukristo. Hinoon, dili sila makadawat sa mga ordinansa sa ebanghelyo alang sa ilang kaugalingon, ug dili sila mouswag hangtud nga ang uban mohimo niining mga ordinansa alang kanila.

“Ang inyong pribilehiyo ug responsibilidad mao ang paghatag sa inyong mga katigulangan niini nga gasa pinaagi sa pag-ila kanila ug pagsiguro nga ang mga ordinansa gipahigayon alang kanila diha sa templo. Dayon mahimo silang mopili kon modawat ba sa buhat nga nahimo na” (Member’s Guide to Temple and Family History Work [2009], 2).

• Unsa kaha ang bation sa inyong mga katigulangan nganha ninyo kon inyong himoon kini nga buhat alang kanila?

• Sumala sa bersikulo 15, unsa ang laing rason nga atong gipahigayon ang mga bunyag alang sa mga patay? (Human makatubag ang mga estudyante, isulat ang mosunod nga doktrina diha sa pisara: Ang kaluwasan sa atong mga katigulangan gikinahanglan ug mahinungdanon sa atong kaluwasan.

• Ngano kaha nga ang “ilang kaluwasan gikinahanglan ug mahinungdanon sa atong kaluwasan”? (Human makabaton og panahon ang mga estudyante sa paghisgot niining pangutana, sultihi sila nga makakat-on pa sila og dugang mahitungod niining doktrina samtang magpadayon sila sa pagtuon sa Doktrina ug mga Pakigsaad 128.)

Dapita ang usa ka estudyante sa pagbasa og kusog sa Doktrina ug mga Pakigsaad 128:16–17. Hangyoa ang klase sa pagsunod ug sa pagpangita og mga propeta diha sa Biblia kinsa misulat mahitungod sa bunyag alang sa mga patay. Dapita sila sa pag-report unsay ilang nakit-an.

• Sa unsa kaha nga paagi nga kining mga tudling sa Biblia makatabang sa usa ka higala nga dili miyembro sa Simbahan?

I-display ang usa ka kadena nga dunay pipila ka panakdo [link], o pagdrowing og usa diha sa pisara.

Dapita ang usa ka estudyante sa pagbasa og kusog sa Doktrina ug mga Pakigsaad 128:18. Hangyoa ang klase sa pagsunod, nga mangita kon sa unsang paagi nga ang mga panakdo sa kadena dunay kalabutan sa mga pagtulun-an ni Joseph Smith mahitungod sa bunyag alang sa mga patay. (Mahimo nimong pahinumduman ang mga estudyante nga ang dispensasyon mao ang usa ka tagal sa panahon nga ang Ginoo mopadayag sa Iyang mga doktrina, mga ordinansa, ug sa priesthood. Mahimo usab nimong ipasabut nga niining bersikulo, ang pulong nga mga anak nagpasabut kanato ug ang pulong nga mga amahan nagpasabut sa atong mga katigulangan.)

• Sa unsang paagi nga ang mga panakdo sa kadena dunay kalabutan sa mga pagtulun-an ni Joseph Smith mahitungod sa bunyag alang sa mga patay? (Ang mga estudyante kinahanglan mahibalo sa mosunod nga kamatuoran: Ang bunyag alang sa mga patay makatabang sa pagsumpay kanato sa kahangturan ngadto sa atong mga katigulangan. Ipasabut nga agig dugang sa bunyag, ang ubang makaluwas nga mga ordinansa—kumpirmasyon, ordinasyon sa Melchizedek Priesthood [alang sa mga lalaki], ang temple endowment, ug ang ordinansa sa sealing—mahinungdanon usab sa pagsiguro sa nagsumpay tali sa atong mga katigulangan ug sa atong kaugalingon.)

Aron matabangan ang mga estudyante nga molambo ang ilang panabut bahin sa mga doktrina ug mga baruganan nga ilang nahibaloan diha sa Doktrina ug mga Pakigsaad 128:12–18, dapita ang usa ka estudyante sa pagbasa og kusog sa mosunod nga pamahayag ni Presidente Joseph Fielding Smith:

“Kinahanglan gayud nga dunay organisasyon sa pamilya, usa ka unit sa pamilya, ug ang matag henerasyon kinahanglan gayud nga masumpay ngadto sa nag-una niini aron makadala og kahingpitan diha sa organisasyon sa pamilya. Sa ingon sa katapusan mamahimo kitang usa ka dakong pamilya nga si Adan maoy anaa sa ulohan, si Miguel, ang arkanghel, nga mangulo sa iyang kaliwatan” (Doctrines of Salvation, comp. Bruce R. McConkie, 3 vols. [1954–56], 2:175).

Ipasabut nga sumala sa bersikulo 18, ang yuta hampakon uban sa tunglo gawas kon ang mga henerasyon sa mga amahan ug mga anak nasumpay. Aron matabangan ang mga estudyante nga makasabut niining doktrina, basaha ang mosunod nga pagpasabut ni Presidente Joseph Fielding Smith:

“Kon walay nagsumpay tali sa mga amahan ug mga anak—nga mao ang buhat alang sa mga patay—nan magbarug kita nga sinalikway; ang tibuok nga buhat sa Dios mapakyas ug hingpit nga walay kapuslanan” (Doctrines of Salvation, 2:122).

Doktrina ug mga Pakigsaad 128:19–25

Mipahayag si Joseph Smith og hingpit nga kalipay sa Pagpahiuli sa ebanghelyo ug nag-awhag sa mga Santos nga magmatinud-anon samtang magtrabaho sila alang sa kaluwasan sa mga patay

Dapita ang mga estudyante sa paghunahuna og usa ka higayon sa dihang gibati nila nga nagmalipayon nga makadungog og maayong balita. Dapita ang pipila ka estudyante sa pagpakigbahin sa ilang mga kasinatian. Human nila kini mabuhat, pangutan-a sila kon ganahan ba sila nga mopakigbahin sa balita ngadto sa uban, ug ngano man.

Ipasabut nga laing pulong alang sa news mao ang tidings. Dayon dapita ang usa ka estudyante sa pagbasa og kusog sa Doktrina ug mga Pakigsaad 128:19. Hangyoa ang klase sa pagpangita sa mga balita nga giingon ni Joseph Smith nga atong nadawat.

• Unsa nga “malipayon nga mga balita” ang atong nadawat? (Ang ebanghelyo ni Jesukristo.)

• Sa unsang paagi nga ang ebanghelyo ni Jesukristo usa ka tingog sa kalipay alang sa mga buhi ug sa mga patay?

Ipasabut nga gilista ni Joseph Smith ang pipila niya ka kasinatian uban sa langitnong mga mensahero samtang ang ebanghelyo gipahiuli pinaagi kaniya. Dapita ang mga estudyante sa pagbasa sa daklit sa Doktrina ug mga Pakigsaad 128:20–21 ug sa pagtino sa mga kasinatian ug sa mga mensahero. Mahimo nimong isugyot nga ilang markahan kon unsay ilang makit-an. Hangyoa ang mga estudyante sa pag-report sa unsay ilang nakat-unan. Human nila mapakigbahin ang ilang nadiskubrihan, i-summarize ang ilang mga komentaryo pinaagi sa pagsulat sa doktrina diha sa pisara: Ang mga yawe, mga gahum, ug awtoridad sa miaging mga dispensasyon gipahiuli diha sa dispensasyon sa kahingpitan sa panahon.

Dapita ang usa ka estudyante sa pagbasa og kusog sa mosunod nga pamahayag ni Presidente John Taylor:

“Ang mga baruganan nga nagpahimutang kang [Joseph Smith] diha sa pakigsulti sa Ginoo, ug dili lamang sa Ginoo, apan sa karaang mga apostoles ug mga propeta; pareho pananglit sa kalalakin-an, sama nila ni Abraham, Isaac, Jacob, Noe, Adan, Seth, Enoch, ug Jesus, ug sa Amahan, ug sa mga apostoles nga nagpuyo niini nga kontinente, ingon man usab niadtong nagpuyo sa kontinente sa Asia. Daw pamilyar siya niining mga tawhana sama nga kita pamilyar sa usag usa. Ngano man? Tungod kay kinahanglan man niyang ipaila ang usa ka dispensasyon nga gitawag og dispensasyon sa kahingpitan sa mga panahon, ug nahibaloan kini nga ingon niana sa karaang mga sulugoon sa Dios” (The Gospel Kingdom [1987], 353.)

• Unsa ang kalainan nga mahimo niini sa imong kinabuhi sa pagkahibalo nga ang ebanghelyo gipahiuli dinhi sa yuta pinaagi sa langitnong mga mensahero?

Ipasabut nga ang Doktrina ug mga Pakigsaad 128:22–23 naglangkob og mga pagpahayag sa hingpit nga kalipay nga gibati ni Joseph Smith tungod kay ang mga yawe sa priesthood gipahiuli ug tungod kay ang mga Santos makatabang na sa pagtubos sa mga patay. Dapita ang usa ka estudyante sa pagbasa og kusog sa mga bersikulo. Dapita ang klase sa pagsunod, nga mangita sa mga pulong nga makahuluganon gayud ngadto kanila. (Mahimo nimong isugyot nga ilang markahan kadto nga mga pulong.) Hangyoa dayon ang mga estudyante sa pagbasa niadtong mga pulong ug sa pagpasabut nganong ang mga pulong makahuluganon ngadto kanila.

Hangyoa ang usa ka estudyante sa pagbasa og kusog sa Doktrina ug mga Pakigsaad 128:24 ug dapita ang klase sa pagpangita sa unsay gisugo sa Propeta nga buhaton sa mga Santos. Dapita sila sa pag-report unsay ilang nakit-an.

• Sumala niini nga bersikulo, unsa nga matarung nga halad ang atong mahimo ngadto sa Ginoo? (Usa ka basahon nga naglangkob sa mga rekord sa atong mga patay.)

• Unsay atong mahimo aron makatampo ngadto niini nga “basahon”? Unsa may gitudlo sa bersikulo 24 mahitungod sa atong pag-apil sa buhat sa family history ug sa buhat sa templo? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga baruganan: Kon mohimo kita sa buhat sa family history ug modawat sa mga ordinansa sa templo alang sa atong mga katigulangan, makahimo kita og matarung nga halad ngadto sa Ginoo. Isulat sa pisara kini nga baruganan.)

Dapita ang usa ka estudyante sa pagbasa og kusog sa mosunod nga pamahayag ni Elder David A. Bednar sa Korum sa Napulog Duha ka mga Apostoles. Hangyoa ang klase sa pagpaminaw sa paghulagway ni Elder Bednar bahin sa ilang tahas diha sa kaluwasan sa mga patay:

“Daghan ninyo tingali naghunahuna nga ang buhat sa family history alang lang sa mga edaran. Apan wala koy nasayran nga limitado sa edad nga gihulagway diha sa kasulatan o sa lagda nga gipahibalo sa mga lider sa Simbahan nga naglimitar niining importante nga serbisyo. …

“Dili kini sulagma nga … mga gamit nia na sa panahon nga ang kabatan-onan pamilyar kaayo sa mga teknolohiya sa impormasyon ug komunikasyon. … Ang mga kahanas ug abilidad nga makita sa kadaghanan sa atong kabatan-onan karon usa ka pagpangandam sa pagtabang sa buhat sa kaluwasan.

“… Ako moawhag kaninyo sa pagtuon, sa pagsiksik sa inyong mga katigulangan, ug sa pag-andam sa inyong kaugalingon sa pagpahigayon og proxy nga bunyag sa balay sa Ginoo alang sa inyong kaliwatan nga namatay na. … … Ug awhagon ko kamo sa pagtabang sa ubang tawo sa pag-ila sa ilang mga family history” (“Ang mga Kasingkasing sa mga Anak Mobati,” Liahona, Nob. 2011, 26).

• Sa unsang mga paagi nga makaapil kamo sa buhat sa family history ug sa buhat sa templo?

• Kanus-a kamo nakahimo og mga halad pinaagi sa buhat sa family history ug sa buhat sa templo? Sa unsang mga paagi nga napanalanginan kamo samtang naghimo kamo niining mga halad?

Mga pangutana nga makadapit og mga pagbati ug pagpamatuod

Ang ubang mga pangutana makagiya sa mga estudyante sa pagpamalandong sa espirituhanong mga kasinatian ug makatabang kanila nga mas mobati sa katinuod ug sa kamahinungdanon sa doktrina o baruganan sa ebanghelyo. Kasagaran kining mga pangutana moresulta sa pagpakigbahin sa mga estudyante sa mga pagbati, mga kasinatian, ug pagpamatuod. Kining mga pangutana makatabang nga motuhop ang ebanghelyo sa mga hunahuna sa mga estudyante ngadto na sa ilang mga kasingkasing.

Ipakigbahin ang imong pagpamatuod bahin sa mga panalangin nga madawat sa mga estudyante samtang moapil sila sa buhat sa family history ug sa buhat sa templo. Dapita ang mga estudyante sa paghimo og mga tumong nga makatabang nila nga mohimo sa buhat sa family history ug sa buhat sa templo.

Komentaryo ug Background nga Impormasyon

Doktrina ug mga Pakigsaad 128:15. “Sila kon wala kita dili mahingpit—ni kita kon wala ang atong mga patay mahingpit”

Si Propeta Joseph Smith mipasidaan:

“Kadtong mga Santos kinsa wala magtagad alang sa ilang namatay nga mga kabanay, naghimo niini sa kakuyaw sa ilang kaugalingong kaluwasan” (Mga Pagtulun-an sa mga Presidente sa Simbahan: Joseph Smith [2007], 571).

Doktrina ug mga Pakigsaad 128:15. Mga panalangin nga dunay kalabutan sa paghimo sa buhat sa family history ug sa buhat sa templo

Si Elder Richard G. Scott sa Korum sa Napulog Duha ka mga Apostoles miingon:

“Gusto ba ninyo mga kabatan-onan nga mawagtang ang impluwensya sa kaaway sa inyong kinabuhi? Isubsob ang inyong kaugalingon sa pagpangita sa inyong mga katigulangan, pag-andam sa ilang mga ngalan alang sa sagradong mga ordinansa sa templo, ug dayon adto sa templo aron mobarug isip puli nila sa pagdawat sa mga ordinansa sa bunyag ug sa gasa sa Espiritu Santo. Sa inyong pagdako, makaapil na usab kamo sa pagdawat sa ubang mga ordinansa. Wala na akoy mahunahuna nga mas labawng makapanalipod gikan sa impluwensya sa kaaway sa inyong kinabuhi” (“Ang Hingpit nga Kalipay sa Pagtubos sa mga Patay,” Liahona, Nob. 2012, 94).

Doktrina ug mga Pakigsaad 128:24. “[Ang] mga talaan [rekord] sa atong mga patay”

Ang mga pulong nga “atong mga patay” diha sa Doktrina ug mga Pakigsaad 128:24 nagpasabut sa atong responsibilidad sa paghimo sa pagsiksik [research] sa family history ug sa pagpahigayon sa mga ordinansa sa templo alang sa atong kaugalingong mga katigulangan. Si Elder Richard G. Scott mipasabut:

“Ang buhat sa templo ug sa family history maoy usa ka buhat nga may duha ka bahin. …

“Si Presidente Howard W. Hunter mitudlo:

“‘Kinahanglan atong mahimo ang buhat sa ordinansa sa priesthood sa templo nga gikinahanglan sa atong kahimayaan; dayon atong himoon ang gikinahanglang buhat alang niadtong walay kahigayunan nga madawat ang ebanghelyo sa buhi pa. Ang pagbuhat niini alang sa uban mahimo sa duha ka lakang: una, pinaagi sa pagsiksik sa family history sa pag-ila sa atong mga kagikan; ug ikaduha, pinaagi sa pagbuhat sa mga ordinansa sa templo aron mahatagan sila sa samang kahigayunan nga gihatag sa mga buhi. …

“‘Akong nakat-unan nga kadtong nagsiksik sa family history ug dayon mipahigayon sa mga ordinansa sa templo alang niadtong mga ngalan nga ilang nakit-an makaangkon sa dugang kalipay nga madawat ang duha ka bahin sa panalangin’ [“A Temple-Motivated People,” Ensign, Peb. 1995, 4–5].

“Ang Langitnong Amahan gusto nga kitang tanan makadawat sa duha ka bahin sa panalangin niining mahinungdanong buhat. …

“Bisan unsang buhat nga inyong himoon sa templo maoy oras nga maayong pagkagahin, apan ang pagdawat og mga ordinansa alang sa usa sa imong katigulangan naghimo sa imong panahon sa templo nga mas sagrado, ug mas dagkong panalangin ang madawat. Ang Unang Kapangulohan mideklarar, ‘Ang atong pinakaimportanteng obligasyon mao ang pagpangita ug pag-ila sa atong kaugalingong katigulangan’ [Sulat sa Unang Kapangulohan, Peb. 29, 2012; emphasis gidugang]” (“Ang Hingpit nga Kalipay sa Pagtubos sa mga Patay,” Liahona, Nob. 2012, 93–94).