Leksyon 17
Doktrina ug mga Pakigsaad 9
Pasiuna
Sa Abril 1829, gisaaran usab si Oliver Cowdery nga siya makaangkon sa gasa sa paghubad (tan-awa sa D&P 6:25–29). Sa wala madugay, si Oliver gitudloan kabahin sa pagdawat og pagpadayag diha sa proseso sa paghubad (tan-awa sa D&P 8:1–4), ug misulay siya sa paghubad. Bisan tuod og dayag nga maayo ang iyang pagsugod, wala siya “mopadayon sumala sa [iyang] nasugdan” (D&P 9:5). Ang Propeta Joseph Smith nakadawat og usa ka pinadayag nga nagpasabut kon nganong ang mga paninguha ni Oliver sa paghubad wala magmalampuson. Sa pinadayag, ang Ginoo miingon nga dili na kinahanglan nga mohubad si Oliver. Ang Ginoo mihatag usab og dugang nga tambag sa pagdawat og pagpadayag.
Mga Sugyot alang sa Pagtudlo
Doktrina ug mga Pakigsaad 9:1–6, 11
Nagpasabut ang Ginoo kon nganong si Oliver Cowdery naglisud sa paghubad
Hangyoa ang mga estudyante sa paghingalan og pipila ka importanting mga desisyon nga ilang pagahimoon sa sunod nga tuig. Dayon hangyoa sila sa paglista og importanting mga desisyon nga ilang pagahimoon sa sunod 5 ngadto sa 10 ka tuig. Samtang nagtubag ang mga estudyante, mahimo nimong isulat ang ilang mga tubag diha sa pisara Hangyoa ang mga estudyante sa paghunahuna mahitungod sa usa niining mga desisyon kalabut sa mosunod nga pangutana.
-
Sa unsa nga paagi ang pagpaninguha og paggiya gikan sa Ginoo nagtabang kaninyo sa paghimo niini nga desisyon?
Human ang usa o duha ka mga estudyante makatubag, pahibaloa ang mga estudyante nga niini nga leksyon makakat-on sila mahitungod sa kasinatian ni Oliver Cowdery samtang nagsulay sa paghubad. Awhaga ang mga estudyante sa pagpangita og mga doktrina ug mga baruganan samtang sila nagtuon sa Doktrina ug mga Pakigsaad 9 nga makatabang kanila sa pagdawat ug pag-ila sa paggiya sa Ginoo samtang sila naghimo og importanting mga desisyon.
Pahinumdumi ang mga estudyante nga ang Ginoo naghatag ni Oliver og gasa sa paghubad ug pagtugot sa paghubad kon siya nagtinguha sa pagbuhat niini (tan-awa sa D&P 6:25–28). Misulti ang Ginoo ni Oliver nga kining gasa sa paghubad moabut pinaagi sa gahum sa Espiritu Santo (tan-awa sa D&P 8:1–2). Ang pagsulay ni Oliver sa paghubad misugod og maayo, apan sa katapusan siya wala magmalampuson. Human sa pagsulay ni Oliver sa paghubad, nadawat ni Joseph Smith ang pinadayag nga karon girekord diha sa Doktrina ug mga Pakigsaad 9.
Dapita ang usa ka estudyante sa pagbasa og kusog sa Doktrina ug mga Pakigsaad 9:1–4 ug hangyoa ang klase sa pagpangita sa buhat nga gipabuhat sa Ginoo ni Oliver kaysa paghubad.
-
Unsa nga buhat ang gisugo sa Ginoo ni Oliver nga buhaton?
Dapita ang usa ka estudyante sa pagbasa og kusog sa Doktrina ug mga Pakigsaad 9:5–6, 11. Hangyoa ang klase sa pagsunod, nga mangita sa mga rason nga wala molampos si Oliver sa dihang siya misulay sa paghubad.
Aron matabangan ang mga estudyante nga mas makasabut sa mga pulong “ikaw wala mopadayon sumala sa imong nasugdan” (D&P 9:5), dapita ang usa ka estudyante sa pagbasa sa mosunod nga pagpasabut ni Presidente Joseph Fielding Smith:
“Ang pagkapakyas ni Oliver miabut tungod kay wala siya mipadayon sumala sa iyang pagsugod, ug ang buluhaton ingon nga malisud, ang iyang hugot nga pagtuo mibiya kaniya” (Church History and Modern Revelation 1953], 1:51).
-
Sumala ni Presidente Smith, nganong si Oliver wala makahimo sa pagpadayon sumala sa iyang pagsugod? (Ang iyang pagtuo nagduha-duha.)
-
Unsa ang pipila ka mga paagi nga ang kahadlok, o kakulang sa hugot nga pagtuo, makapugong kanato gikan sa pagdawat o paglihok sa pagpadayag gikan sa Ginoo?
-
Unsay ikatudlo kanato sa kasinatian ni Oliver mahitungod sa unsaon pagdawat og pagpadayag gikan sa Ginoo? (Ang usa ka baruganan nga mahimong maila sa mga estudyante mao nga aron makadawat og pagpadayag, kita kinahanglan gayud nga maglihok diha sa hugot nga pagtuo. Mahimo nimong isulat sa pisara kini nga baruganan.)
Aron matabangan ang mga estudyante nga makasabut niini nga baruganan, hangyoa ang usa ka estudyante sa pagbasa sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:
“Sa proseso sa pagpadayag ug paghimo og importanting mga desisyon, ang kahadlok nagdala og makadaut, usahay makawagtang og gahum nga tahas. Ngadto ni Oliver Cowdery, kinsa napakyas sa oportunidad nga tagsa rang moabut sa kinabuhi tungod kay wala niya pahimusli ang oportunidad sa dihang anaa kini kaniya, ang Ginoo miingon, ‘Ikaw wala mopadayon sumala sa imong nasugdan.’ Kini ba ingon og pamilyar niadtong kinsa nahatagan og direksyon ug unya mibiya aron hunahunaon og balik ang mga tubag ug ang nagsamok nga mga pagduda? …
“… Human ninyo makuha ang mensahe, human ninyo mabayran ang bili sa pagbati sa Iyang gugma ug madungog ang pulong sa Ginoo, padayon sa unahan. Ayaw kahadlok, ayaw pagpanuko, ayaw pagliko-liko, ayaw pagbagulbol. … Wad-a ang inyong mga kahadlok ug ubog uban ang duha ka tiil” (“Cast Not Away Therefore Your Confidence,” Ensign, Mar. 2000, 10).
-
Kanus-a kamo nakadawat og tubag gikan sa Ginoo ug milihok niini nga walay pagpanuko? (Siguroa nga ang mga estudyante nakasabut nga kinahanglang dili sila mopakigbahin og mga kasinatian nga personal o pribado kaayo.)
Doktrina ug mga Pakigsaad 9:7–10
Ang Ginoo nagpadayag og mga baruganan nga nagdumala sa pagpadayag
Ipasabut nga ang Ginoo mipadayag og importanting baruganan kon unsaon sa pagtinguha ang Iyang direksyon. Dapita ang usa ka estudyante sa pagbasa og kusog sa Doktrina ug mga Pakigsaad 9:7–8. Hangyoa ang klase sa pagsunod, nga mangita og laing rason nga si Oliver naglisud sa pagdawat sa tabang sa Ginoo sa iyang mga paninguha sa paghubad.
-
Sumala sa Doktrina ug mga Pakigsaad 9:7, unsay gihunahuna ni Oliver nga mao lamang ang butang nga iyang kinahanglan nga buhaton aron makadawat og pagpadayag samtang siya naghubad?
-
Unsa ang gitudlo sa Ginoo ni Oliver nga iyang kinahanglan nga buhaton sa dili pa mangayo og paggiya?
Samtang ang mga estudyante nagtubag, mahimo nimong isugyot nga markahan nila ang tambag sa Ginoo diha sa ilang mga kasulatan. Aron matabangan ang mga estudyante sa pagtuki sa kahulugan niini nga mga bersikulo, ipangutana ang mosunod:
-
Unsa kaha ang gipasabut sa “magtuon niini diha sa imong hunahuna”? (Sa pagkonsiderar og mga desisyon ug mga kapilian, mabinantayong pagtimbang-timbang og mga kapilian.) Giunsa ninyo kini paghimo sa dihang nagkinahanglan kamo nga maghimo og mga desisyon?
-
Sumala sa Doktrina og mga Pakigsaad 9:8, unsay atong gikinahanglang buhaton human nato matun-an ang butang nga atong gikonsiderar? (Desisyunan hain nga pagpili ang atong gituohan nga husto ug dayon dad-on ang atong desisyon ngadto sa Langitnong Amahan diha sa pag-ampo.)
-
Unsa nga leksyon ang atong makat-unan gikan sa Doktrina ug mga Pakigsaad 9:8 mahitungod sa unsay gipaabut sa Ginoo kanato samtang kita naninguha sa Iyang direksyon ug paggiya? (Ang mga estudyante mahimong motubag og sama sa mosunod nga kamatuoran: Ang pagdawat ug pag-ila og pagpadayag nagkinahanglan og paningkamot sa atong bahin. Isulat kini nga kamatuoran diha sa pisara.)
Aron matabangan ang mga estudyante nga makasabut niini nga kamatuoran, ipangutana ang mosunod:
-
Sa unsa nga paagi kaha nga ang pagtuon sa butang diha sa imong salabutan makatabang kanimo sa pagdawat og pagpadayag?
Aron matabangan ang mga estudyante nga masabtan kon sa unsa nga paagi kini nga kamatuoran masusama sa mga sitwasyon sa ilang mga kinabuhi, basaha ang mosunod nga mga ehemplo. Human sa kada usa, dapita ang mga estudyante sa pagpasabut kon sa unsa nga paagi ang mga indibidwal nga gihulagway makagamit sa mga kamatuoran diha sa Doktrina ug mga Pakigsaad 9:7–8 aron makadawat og pagpadayag.
-
Usa ka batan-ong lalaki nakadawat og tanyag alang sa usa ka maayong trabaho, apan nagkinahanglan kini kaniya nga motrabaho og Dominggo. Nagsulay siya sa pagdesisyon kon dawaton ba niya ang trabaho.
-
Usa ka batan-ong babaye kanunay nga naghunahuna mahitungod sa mga higala nga iyang gikauban ug ang bati nila nga impluwensya diha kaniya. Gusto niyang mohunong sa pakigkuyog kanila, apan wala siya mahibalo sa labing maayo nga paagi sa pagbulag gikan kanila.
-
Usa ka batan-ong babaye nagkonsiderar kon unsay iyang buhaton human sa iyang high school. Nahibalo siya nga gusto siyang mopadayon sa iyang edukasyon apan dili sigurado og hain nga eskwelahan siya mo-eskwela.
Human maghisgot niini nga mga ehemplo diha sa klase, tuguti ang mga estudyante sa paghunahuna sa ilang kasinatian uban niini nga baruganan pinaagi sa pagsulat sa mosunod nga pangutana diha sa pisara: Kanus-a ninyo nabati nga ang paningkamot sa bahin nagtabang kanimo sa pagdawat og pagpadayag gikan sa Ginoo?
Dapita ang mga estudyante sa pagpamalandong og kadiyot niini nga pangutana. Dayon hangyoa ang pipila ka mga estudyante kinsa andam sa pagpakigbahin sa ilang mga kasinatian ngadto sa klase.
Dapita ang mga estudyante sa pagribyu sa Doktrina ug mga Pakigsaad 9:8, nga mangita kon sa unsang paagi mahibalo si Oliver nga ang iyang hukom o desisyon husto.
-
Unsa ang atong makat-unan gikan sa bersikulo 8 kon sa unsa nga paagi ang Ginoo nagtubag sa atong mga pangutana? (Ang pagpadayag moabut pinaagi sa atong mga pagbati samtang kita mangayo sa Ginoo og paggiya. Isulat kini nga kamatuoran diha sa pisara.)
Mahimo nimong klarohon nga ang pag-init sa dughan nga gisaad ngadto ni Oliver usa lamang ka paagi nga ang Espiritu mahimong mokumpirma og usa ka husto nga pagpili. Ang mga pagkumpirma sa Espiritu moabut sa lain-laing mga paagi nga mga personal ug lawom.
Aron matabangan ang mga estudyante nga masabtan kon sa unsa nga paagi ang Ginoo makahimo kanatong “mabati nga [ang usa ka desisyon] husto” (D&P 9:8), dapita ang usa ka estudyante sa pagbasa sa mosunod nga pagpasabut ni Elder Richard G. Scott:
“Ang pagbati og kalinaw mao ang kasagaran nga mapamatuorong saksi nga akong nasinati sa personal. Dihang ako nabalaka kaayo sa usa ka importanting butang, naningkamot og sulbad nga walay paglampos, gipadayon nako ang paningkamot uban sa pagtuo. Unya ang kalinaw nga anaa kanunay miabut, mihupay sa akong mga kabalaka, sigun sa Iyang gisaad” (“Ang Paggamit sa Langitnon nga Gasa sa Pag-ampo,” Liahona, Mayo 2007, 10).
-
Kanus-a ninyo nabati nga ang Ginoo mipanghimatuod og desisyon nga inyong gihimo? Unsa ang imong gibati niana nga panghimatuod? (Pahinumdumi ang mga estudyante nga kinahanglang dili sila mopakigbahin og mga kasinatian nga personal o pribado ra kaayo.)
Dapita ang usa ka estudyante sa pagbasa og kusog sa Doktrina ug mga Pakigsaad 9:9. Hangyoa ang mga estudyante sa pag-ila og mga pulong nga naghulagway kon sa unsa nga paagi kita makahibalo kon ang usa ka desisyon nga atong nahimo dili husto. Aron matabangan ang mga estudyante sa pagsabut sa mga pulong “kasamok sa hunahuna,” dapita ang usa ka estudyante sa pagbasa sa mosunod nga pamahayag ni Elder Richard G. Scott, diin siya nagpasabut og usa ka paagi ang kasamok sa hunahuna mahimong masinati:
“Kanang [kasamok sa hunahuna], alang kanako, usa ka dili mahimutang, kagil-as nga pagbati” (“Ang Paggamit sa Langitnong Gasa sa Pag-ampo,” 10).
Dapita ang mga estudyante sa pagsulat diha sa ilang mga class notebook o mga scripture study journal unsay ilang nakat-unan mahitungod sa pagdawat og pagpadayag nga makatabang kanila sa paghimo og importanting mga desisyon.
Doktrina ug mga Pakigsaad 9:12–14
Ang Ginoo nag-awhag ni Oliver sa pagpadayon sa buhat nga siya gitawag sa pagbuhat
Pahinumdumi ang mga estudyante sa calling ni Oliver nga mahimong usa ka tigsulat alang sa Propeta (tan-awa sa D&P 9:1, 4). Dapita ang mga estudyante sa pagbasa og hilum sa Doktrina ug mga Pakigsaad 9:12 14, nga mangita sa mga pulong nga nakita ni Joseph Smith ug Oliver Cowdery nga makaawhag niini nga panahon. Dapita ang pipila ka mga estudyante sa pagpakigbahin sa mga pulong nga ilang nakita nga makahuluganon ug ipasabut kon ngano.
Aron sa pagtapos niini nga leksyon, mahimo nimong ipakigbahin ang imong pagpamatuod nga kita makadawat og personal nga pagpadayag samtang kita nagsunod sa mga baruganan nga gilatid diha sa Doktrina ug mga Pakigsaad 9.
Komentaryo ug Background nga Impormasyon
Doktrina ug mga Pakigsaad 9:7–9. Pag-ila og mga tubag sa mga pag-ampo
Si Elder Richard G. Scott sa Korum sa Napulog Duha ka mga Apostoles mihatag og tambag kon nganong kita usahay mobati sama og kita wala makadawat og diha-diha nga tubag sa pag-ampo:
“Unsay inyong buhaton kon kamo nangandam og maayo, tinud-anay nga nag-ampo, naghulat og dugay alang sa tubag, ug gihapon walay gibati nga tubag? Mahimo kamong magpasalamat kon mahitabo man kana, kay kana timailhan sa Iyang pagsalig. Kon kamo nagpuyo nga takus ug ang inyong pagpili uyon kanunay sa pagtulun-an sa Manluluwas ug kamo kinahanglan nga mobuhat, padayon uban sa pagsalig. Kon kamo sensitibo sa pagdasig sa Espiritu, usa sa duha ka butang piho nga mahitabo sa tukma nga panahon: mahimong kasamok sa hunahuna, buot pasabut sayop nga pagpili, o ang kalinaw o ang kainit sa dughan mabati, sa pagmatuod nga ang inyong gipili husto. Kon kamo nagpuyo nga matarung ug nagbuhat uban sa pagsalig, ang Dios dili motugot nga kamo moabut og layo nga walay pahimangno kon nasayop kamo sa inyong desisyon” (“Ang Paggamit sa Langitnong Gasa sa Pag-ampo,” Liahona, Mayo 2007, 10).
Doktrina ug mga Pakigsaad 9:7–9. Unsa ang kainit sa dughan?
Si Elder Dallin H. Oaks mipasabut:
“Nakahimamat ako og mga tawo kinsa nagsulti kanako nga sila wala gayud sukad makadawat og pagsaksi gikan sa Espiritu Santo tungod kay wala gayud sila mibati sa ilang dughan og ‘kainit diha sulod ’kanila.
Unsa ang gipasabut sa ‘kainit sa dughan’? Kinahanglan ba kini nga usa ka pagbati nga init kaayo, sama sa kainit dala sa sunog? Kon kana ang kahulugan, ako sukad walay kainit sa dughan. Sa tinuod, ang pulong nga ‘kainit’ niini nga kasulatan nagpaila og pagbati sa kahayahay ug kalinaw. Kana mao ang saksi nga madawat sa daghan. Kana ang paagi nga naglihok ang pagpadayag.
“Sa tinuod, ang hinay, hinagawhaw nga tingog ingon lang niana, ‘hinay’ ug ‘hinagawhaw’” (“Teaching and Learning by the Spirit,” Ensign, Mar. 1997, 13).