Leksyon 24
Doktrina ug mga Pakigsaad 19:1–22
Pasiuna
Sa Hunyo 1829, gikuha ni Joseph Smith si Egbert B. Grandin sa pag-imprinta og 5,000 ka mga kopya sa Basahon ni Mormon sa kantidad nga $3,000. Hinoon, dili mosugod si Grandin sa pag-imprinta o gani sa pagpalit sa tipo [type] hangtud nga magarantiya kaniya ang bayad sa trabaho. Sa pinadayag nga anaa sa Doktrina ug mga Pakigsaad 19, malagmit nga gihatag niadtong ting-init sa 1829, ang Ginoo misugo ni Martin Harris sa “[pag]hatag og bahin sa imong kabtangan … [ug pag]bayad sa utang nga imong gikauyunan uban sa tig-imprinta” (D&P 19:34–35). Gamit ang usa ka porsyon sa iyang umahan isip collateral, si Martin Harris personal nga migarantiya sa bayad sa pag-imprinta kon ang halin sa Basahon ni Mormon dili paigo nga ibayad sa bayranan.
Si Presidente Joseph Fielding Smith mihulagway niini nga pinadayag, uban sa mga pagtulun-an niini sa Pag-ula, isip “usa sa mahinungdanong mga pagpadayag nga gihatag niini nga dispensasyon; pipila lamang ang mas labaw kaimportante niini” (Church History and Modern Revelation, 2 vols. [1953], 1: 85).
Mga Sugyot alang sa Pagtudlo
Doktrina ug mga Pakigsaad 19:1–3
Ang Manluluwas namahayag nga natuman Niya ang kabubut-on sa Amahan
Sa pagsugod sa klase, hangyoa ang mga estudyante sa paghunahuna og pipila ka mga butang nga gipabuhat kanila o ipabuhat unya kanila tungod kay mga miyembro sila sa Simbahan. Isulat ang ilang mga tubag sa pisara. Dayon hangyoa ang mga estudyante sa pagribyu sa lista diha sa pisara ug sa pagpili og mga item nga tingali ikonsiderar sa uban nga lisud. (Ang mga ehemplo mahimong maglakip sa pagbayad sa ikapulo, pagserbisyo og misyon, ug paghinulsol.)
-
Ngano kaha nga kining mga butanga lisud buhaton sa ubang tawo?
Aron matabangan ang mga estudyante nga makasabut sa kasaysayan nga konteksto sa Doktrina ug mga Pakigsaad 19, basaha og kusog ang pasiuna niini nga leksyon.
Dapita ang mga estudyante nga hilum nga mobasa sa Doktrina ug mga Pakigsaad 19:1–3, nga mangita og mga kamatuoran mahitungod sa Manluluwas. Hangyoa ang mga estudyante sa pag-report sa ilang mga nakit-an. Isip kabahin sa diskusyon, siguroa nga mahibaloan sa mga estudyante ang mosunod nga mga doktrina: Si Jesukristo mituman sa kabubut-on sa Iyang Amahan. Si Jesukristo mohukom nato sumala sa atong mga buhat. Kopyaha ang mosunod nga tsart sa pisara, nga gamiton kini nga mga kamatuoran isip ulohan sa duha ka mga kolum. Dapita ang mga estudyante sa paghimo og susama nga tsart diha sa ilang mga class notebook o mga scripture study journal ug sulatan kini atol sa leksyon. Pagbilin og dakong luna diha sa pisara aron makompleto ang tsart sama sa gipakita wala madugay diha sa leksyon.
|
Si Jesukristo mituman sa kabubut-on sa Iyang Amahan. |
Si Jesukristo mohukom nato sumala sa atong mga buhat. |
|---|---|
-
Sa unsang paagi kaha ang pagkasayud niini nga mga kamatuoran mahitungod sa Manluluwas nakatabang ni Martin Harris nga mobati og kalinaw kalabut sa iyang desisyon sa pagbaligya og dakong bahin sa iyang umahan?
Doktrina ug mga Pakigsaad 19:4–12
Si Jesukristo mipasabut sa mahangturon ug walay katapusang silot
Diha sa tsart sa pisara, isulat ang Doktrina ug mga Pakigsaad 19:4–12 ubos sa ulohan nga “Si Jesukristo mohukom nato sumala sa atong mga buhat.” Dapita ang mga estudyante nga hilum nga mobasa sa Doktrina ug mga Pakigsaad 19:4, nga mangita og kamatuoran mahitungod sa paghukom nga angay natong ikonsiderar tanan. Hangyoa sila sa pag-report unsay ilang nakit-an. Ang mga estudyante mahimong mogamit og lain-laing mga pulong, apan siguroa nga ilang mahibaloan ang mosunod nga doktrina: Ang tanang tawo kinahanglang maghinulsol o mag-antus. Dapita ang usa ka estudyante sa pagsulat niini nga doktrina diha sa pisara ubos sa “Doktrina ug mga Pakigsaad 19:4–12.”
Ipasabut nga ang Doktrina ug mga Pakigsaad 19:5 naglakip sa pagpasabut sa Manluluwas nga dili Niya bakwion ang Iyang mga paghukom. Nagpasabut kini nga kadtong dili maghinulsol kinahanglang mag-antus sa silot sa ilang mga sala. Dapita ang usa ka estudyante sa pagbasa og kusog sa Doktrina ug mga Pakigsaad 19:5. Hangyoa ang klase sa pagsunod, nga mangita kon giunsa paghulagway sa Manluluwas ang kahimtang niadtong dili maghinulsol ug busa makadawat sa Iyang mga paghukom.
-
Unsa ang masinati niadtong dili maghinulsol?
-
Sa unsang paagi ang Doktrina ug mga Pakigsaad 19:5 modasig nato sa paghinulsol?
Isulat ang mosunod nga mga pulong diha sa pisara ubos sa “Ang tanang tawo kinahanglang maghinulsol o mag-antus”: Walay katapusan o mahangturong silot.
-
Unsay inyong mahunahuna kon makadungog o makabasa kamo sa mga pulong nga “walay katapusan o mahangturong silot”?
Dapita ang mga estudyante nga hilum nga mobasa sa Doktrina ug mga Pakigsaad 19:6–12, nga mangita kon giunsa sa Ginoo pagpasabut sa walay katapusan o mahangturong silot. Human makatubag ang mga estudyante, papasa ang mga pulong nga Walay katapusan o mahangturon diha sa pisara ug pulihi kini sa pulong sa Dios.
-
Unsay inyong mahunahuna kon makabasa o makadungog kamo sa mga pulong nga “silot sa Dios”?
Tingali kinahanglan nimong ipasabut nga diha sa mga kasulatan, ang mga termino nga walay katapusan nga silot ug mahangturong silot wala magpasabut sa gidugayon sa panahon nga ang mga tawo mag-antus alang sa ilang mga sala. Ang Manluluwas miingon, “Ako walay katapusan, ug ang silot nga gihatag gikan sa akong kamot mao ang walay katapusan nga silot, kay Walay Katapusan mao ang akong ngalan” (D&P 19:10). Busa, sa dihang naghisgut Siya sa walay katapusan nga silot o mahangturong silot, Siya namulong sa silot nga Iyang ipahigayon sumala sa balaan nga balaod ug sa mga gikinahanglan sa kaangayan.
Doktrina ug mga Pakigsaad 19:13–22
Ang Manluluwas namulong sa Iyang pag-antus alang sa sala
Diha sa tsart sa pisara, isulat ang Doktrina ug mga Pakigsaad 19:13–17 diha sa kolum nga giulohan og “Si Jesukristo mohukom nato sumala sa atong mga buhat.” Ipasabut nga ang mga bersikulo 13–17 naglakip og pahimangno sa mga miyembro sa Simbahan. Dapita ang mga estudyante nga hilum nga mobasa sa Doktrina ug mga Pakigsaad 19:13–17, nga mangita sa mga sangputanan alang niadtong mopili nga dili maghinulsol.
-
Unsay mahitabo niadtong mopili nga dili maghinulsol sa ilang mga sala? (Ang mga estudyante kinahanglang mahibalo sa mosunod nga doktrina: Kadtong mopili nga dili maghinulsol mag-antus sa silot sa ilang mga sala. Isulat sa pisara kini nga kamatuoran ubos sa “Doktrina ug mga Pakigsaad 19:13–17.”)
Isulat ang Doktrina ug mga Pakigsaad 19:16–19 diha sa kolum nga giulohan og “Si Jesukristo mohukom nato sumala sa atong mga buhat.” Dapita ang usa ka estudyante sa pagbasa og kusog sa Doktrina ug mga Pakigsaad 18:11–12. Hangyoa ang klase sa pagsunod, nga mangita sa rason nga gihatag sa Manluluwas kon nganong nag-antus Siya alang sa atong mga sala.
-
Unsa nga rason ang gihatag sa Manluluwas kon nganong nag-antus Siya alang sa atong mga sala? (Ang mga estudyante mahimong mogamit og lain-laing mga pulong, apan kinahanglan silang mahibalo sa mosunod nga doktrina: Ang Manluluwas nag-antus alang sa atong mga sala aron kita maghinulsol ug dili na mag-antus sama sa Iyang gibuhat.)
-
Sumala niini nga mga bersikulo, unsay nakahimong posible aron mapasaylo ang atong mga sala? (Samtang motubag ang mga estudyante, isulat ang mosunod nga pamahayag diha sa tsart sa pisara ubos sa “Doktrina ug mga Pakigsaad 19:16–19”: Ang pag-antus ni Jesukristo ug ang Iyang maulaong dugo mitagbaw sa gipangayo sa kaangayan. Busa, ang kalooy gitunol ngadto kanila nga maghinulsol.)
-
Sa unsang paagi ang pagkasayud sa mga kamatuoran nga atong nahibaloan karon makaapekto sa inyong tinguha sa paghinulsol?
Aron matabangan ang mga estudyante nga makasabut sa atong pagpili nga maghinulsol o mag-antus alang sa atong mga sala, dapita ang usa kanila sa pagbasa og kusog sa mosunod nga pamahayag ni Elder Neal A. Maxwell sa Korum sa Napulog Duha ka mga Apostoles:
“Mosangput ra gayud kita sa pagpili sa matang sa pagpakabuhi ni Kristo o sa matang sa Iyang pag-antus! Mopili kita nga ‘mag-antus sama kanako’ (D&P 19:16–17), o magmadaugon ‘sama nga [Siya] … nagmadaugon (Pinadayag 3:21)” (“Overcome … Even As I Also Overcame,” Ensign, Mayo 1987, 72).
Diha sa tsart sa pisara, isulat ang Doktrina ug mga Pakigsaad 19:15, 18–19 ubos sa ulohan nga “Si Jesukristo mituman sa kabubut-on sa Iyang Amahan.”
Ipasabut nga kadaghanan sa mga istorya sa pag-antus ni Jesukristo gisaysay sa laing tawo gawas sa iyang Kaugalingon (tan-awa sa Mateo 26:36–39; Lucas 22:39–44). Ang Doktrina ug mga Pakigsaad 19 naglakip sa personal nga istorya sa Manluluwas kabahin sa Iyang pag-antus. Dapita ang mga estudyante nga hilum nga mobasa sa Doktrina ug mga Pakigsaad 19:15, 18–19, nga mangita kon giunsa paghulagway sa Manluluwas ang pag-antus nga Iyang nasinati atol sa Pag-ula. Mahimo nimong isugyot nga ilang markahan ang unsay ilang nakit-an. Idugang ang mga tubag sa mga estudyante diha sa pisara ubos sa “Doktrina ug mga Pakigsaad 19:15, 18–19.” Ang katapusang tsart mahimong makita nga sama niini:
|
Si Jesukristo mituman sa kabubut-on sa Iyang Amahan. |
Si Jesukristo mohukom nato sumala sa atong mga buhat. |
|---|---|
|
Ang pag-antus sa Manluluwas sakit, hapdus, ug lisud antuson. Ang pag-antus sa Manluluwas nakapahimo Kaniya sa pagkurog tungod sa kasakit ug sa pag-agas sa dugo sa matag lungag sa panit. Si Jesukristo nag-antus sa pisikal ug espirituhanong paagi. Ang Manluluwas nag-ampo nga Siya unta makalikay sa pag-ambit sa mapait nga kopa. Ang Manluluwas mituman sa kabubut-on sa Amahan ug “nakahuman sa [Iyang] mga pagpangandam alang sa mga katawhan.” (D&P 19:16–19). |
Ang tanang tawo kinahanglan gayud nga maghinulsol o mag-antus. Silot sa Dios Kadtong mopili nga dili maghinulsol mag-antus sa silot sa ilang mga sala. Ang pag-antus ni Jesukristo ug ang Iyang maulaong dugo mitagbaw sa gipangayo sa kaangayan. Busa, ang kalooy gitunol ngadto kanila nga maghinulsol. |
-
Unsa ang inyong gibati mahitungod sa pag-antus sa Manluluwas sa silot alang sa inyong mga sala?
-
Sa unsang paagi kaha ang pagkahibalo kabahin sa pag-antus sa Manluluwas nakatabang ni Martin Harris samtang naghunahuna siya sa mga butang sama sa pagkawala sa 116 ka mga pahina sa manuskrito o paghatag og porsyon sa iyang kabtangan aron ibayad sa pag-imprinta sa Basahon ni Mormon?
-
Kanus-a man ang inyong kahibalo sa Pag-ula sa Manluluwas nakatabang kaninyo sa pag-atubang og lisud nga butang? (Pahinumdumi ang mga estudyante nga ang ubang mga kasinatian hilabihan ka sagrado o personal aron ipakigbahin.)
Dapita ang usa ka estudyante sa pagbasa og kusog sa Doktrina ug mga Pakigsaad 19:20. Hangyoa ang mga estudyante sa pagsunod, nga mangita sa mga pulong nga nagpasabut sa panahon nga si Martin Harris nakasinati og pag-antus alang sa iyang mga sala.
-
Ngano kaha nga ang pagbiya sa Espiritu mosangput man sa pag-antus?
Dapita ang mga estudyante nga hilum nga mobasa og balik sa Doktrina ug mga Pakigsaad 19:13, 15, 20, nga mangita sa sugo diha sa matag bersikulo ug sa mga pasidaan sa bersikulo 15 ug 20.
-
Sa unsang paagi ang sugo sa Ginoo sa paghinulsol usa ka ebidensya sa Iyang gugma alang kanato?
Dapita ang mga estudyante nga isulat sa ilang mga class notebook o mga scripture study journal ang ilang mga pagpamatuod mahitungod sa usa sa mga doktrina ug baruganan nga ilang nakat-unan gikan sa Doktrina ug mga Pakigsaad 19:1–22.
Komentaryo ug Background nga Impormasyon
Doktrina ug mga Pakigsaad 19: Pasiuna sa seksyon. “Usa ka sugo sa Dios ug dili sa tawo, ngadto kang Martin Harris”
Sa Marso 1830, pipila ka bulan human si Joseph Smith malagmit nakadawat sa pinadayag nga narekord sa Doktrina ug mga Pakigsaad 19, si Joseph Knight Sr. nakasaksi og panagsultihanay tali ni Joseph Smith ug Martin Harris kalabut sa pagbaligya sa Basahon ni Mormon:
“‘Ang mga Basahon dili mahalin kay walay gusto niini.[’] Miingon si Joseph, ‘Nagtuo ko nga mahalin kini og maayo.’ Miingon siya, ‘Gusto ko og Sugo [o pagpadayag gikan sa Ginoo].’ ‘Ngano man,’ miingon si Joseph, ‘tumana ang naa nimo.’ ‘Apan,’ miingon siya, ‘Kinahanglan ko nga dunay Sugo.’ … Miinsister siya sa tulo o upat ka mga higayon nga kinahanglan niya nga dunay Sugo” (Dean Jessee, “Joseph Knight’s Recollection of Early Mormon History,” BYU Studies, vol. 17, no. 1 [1976], 37).
Ang instruksyon ni Joseph Smith “tumana ang naa nimo” daw nagpasabut sa pinadayag diha sa Doktrina ug mga Pakigsaad 19, diin ang Dios mihatag na kang Martin Harris og usa ka sugo nga “ihatag [ang iyang kabtangan] nga walay pagdumili ngadto sa pag-imprinta sa Basahon ni Mormon” (D&P 19:26).
Doktrina ug mga Pakigsaad 19:2, 19. “Ingon nga nakatapos sa kabubut-on Kaniya kang kinsa Ako anak”
Si Elder Neal A. Maxwell sa Korum sa Napulog Duha ka mga Apostoles mitudlo nga “ang pagtugyan sa kabubut-on mao lang gayud ang talagsaong personal nga butang nga mahalad nato diha sa altar sa Dios. Ang daghang mga butang nga atong ‘gihatag’ … sa tinud-anay mao ang mga butang Iya na nga gihatag o gipahulam kanato. Hinoon, kon kamo ug ako sa katapusan motugyan sa atong kaugalingon, pinaagi sa pagpaubos sa atong indibidwal nga kabubut-on ngadto sa kabubut-on sa Dios, niana naghatag gayud kita og makahuluganong butang ngadto Kaniya! Kini lang ang bugtong gipanag-iya nga tinud-anay natong mahatag!” “Swallowed Up in the Will of the Father,” Ensign, Nob. 1995, 24).
Si Elder Jeffrey R. Holland sa Korum sa Napulog Duha ka mga Apostoles mipasabut nga ang Manluluwas kanunay nga andam sa pagtugyan ngadto sa kabubut-on sa Amahan:
“Ang butang nga ingon og gusto gayud kaayo nga ipasabut ni Kristo mahitungod sa Iyang misyon—lapas sa personal nga mga hiyas ug lapas sa talagsaong mga wali ug gani lapas sa mga pagpang-ayo, mao nga Iyang gitugyan ang Iyang kabubut-on ngadto sa Amahan” (“Therefore, What?” [pakigpulong ngadto sa CES religious educators, Ago. 8, 2000], 8, LDS.org).
Doktrina ug mga Pakigsaad 19:6, 11–12. “Walay katapusan nga kasakit” ug “mahangturon nga silot”
Si Presidente J. Reuben Clark sa Unang Kapangulohan mihatag sa mosunod nga ideya mahitungod sa “silot sa Dios”:
“Kon ang Ginoo moabut aron sa paghatag kanato sa atong ganti … ug atong silot, akong gibati nga [ang Manluluwas] mohatag niana nga silot nga maoy labing gamay nga angay sa atong kalapasan. Nagtuo ko nga iyang dad-on diha sa iyang kaangayan tanan sa walay kinutubang gugma ug panalangin ug kalooy ug kamabination ug pagsabut nga aduna siya. …
“Ug sa laing bahin, nagtuo ko nga kabahin sa paghimo sa mga ganti sa atong maayong binuhatan, siya mohatag kanato sa labing dako nga posibleng ikahatag, naghunahuna sa kasaypanan nga atong nabuhat” (“As Ye Sow … ,” Brigham Young University Speeches of the Year [May 3, 1955], 7).
Mipasabut si Presidente Joseph Fielding Smith sa kahulugan sa walay katapusang kasakit ug mahangturong silot:
“Atong nakat-unan sa Doktrina ug mga Pakigsaad nga ang mahangturong silot, o walay katapusang silot, wala magpasabut nga ang tawo nga gisilutan mag-antus niini nga silot sa kahangturan. … Kon ang tawo mobayad sa silot sa iyang kasaypanan ug mapainubsanong maghinulsol, modawat sa ebanghelyo, mogawas siya sa bilanggoan ug i-assign ngadto sa ang-ang sa himaya sumala sa iyang bili ug binuhatan” (Doctrines of Salvation, comp. Bruce R. McConkie, 3 vols. [1954–1956], 2:160).
Si Elder James E. Talmage sa Korum sa Napulog Duha ka mga Apostoles mihatag og dugang panabut kalabut sa kahulugan sa mahangturong silot:
“Ang ‘mahangturong silot’ … wala magpasabut nga ang nag-antus o makasasala nga indibidwal kinahanglang mag-antus sa kahangturan. Walay tawo nga ibutang sa impyerno nga mas dugay kay sa gikinahanglan aron maandam siya alang sa mas maayo. Sa iyang pag-abut niana nga kahimtang ang mga pultahan sa bilanggoan moabli ug adunay pagmaya tali sa mga panon kinsa modawat kaniya ngadto sa mas maayo pa nga kahimtang” (sa Conference Report, Abr. 1930, 97; tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 37).
Doktrina ug mga Pakigsaad 19:20. “Sa panahon nga ako mikuha sa akong Espiritu”
Ang mga pulong nga “sa panahon nga ako mikuha sa akong Espiritu” tingali nagpasabut sa nasinati ni Martin Harris human niya nawala ang 116 ka mga pahina sa manuskrito sa Basahon ni Mormon. Si Lucy Mack Smith, ang inahan ni Joseph, nahinumdom nga sa dihang gisultihan ni Martin Harris si Joseph Smith mahitungod sa nawala nga manuskrito siya “nakatuaw sa tono nga lawom nga kasakit, ‘O, wala na ang akong kalag! Giwagtang ko ang akong kalag!’” (History of Joseph Smith by His Mother, ed. Preston Nibley [1958], 128).
Ang pag-antus alang sa sala mahimong mahitabo sa mortalidad ingon man usab human kita mamatay. Kon kita makasala, ang Espiritu Santo mobiya, naghimo kanato nga walay kahupayan ug makabalaan nga gahum sa Iyang presensya. Sa Iyang pagkawala, “makatilaw” kita sa pag-antus nga nasinati sa Manluluwas samtang nag-antus Siya alang sa atong mga sala. Ang proseso sa paghinulsol naghimong posible alang kanato nga makig-uli sa atong kaugalingon ngadto sa atong Amahan sa Langit ug matagamtam pag-usab ang pakig-uban sa Espiritu Santo, uban sa mga panalangin nga resulta niini.
Si Presidente Henry B. Eyring sa Unang Kapangulohan namulong sa koneksyon tali sa pagkawala sa pakig-uban sa Espiritu Santo ug sa panginahanglan sa paghinulsol:
“Kon maglisud kamo sa pagbati sa Espiritu Santo, unta kamo magmaalamon nga mamalandong kon aduna bay butang nga angay ninyong hinulsulan ug mangayo og kapasayloan” (“Gifts of the Spirit for Hard Times,” Liahona, Hunyo 2007, 23).