Niadtong Disyembre 16 ug 17, 1833 si Propeta Joseph Smith nakadawat og pagpadayag mahitungod sa mga Santos didto sa Missouri nga mibiya sa ilang mga panimalay aron makaikyas sa pagpanggukod. Kadaghanan niadto nga mga Santos gipugos sa pagbiya sa ilang tanang kabtangan. Ang pagpadayag nga nadawat sa Propeta, narekord sa Doktrina ug mga Pakigsaad 101, gihisgutan sa tulo ka leksyon niini nga manwal. Kining ikatulo nga leksyon naglakip sa sambingay sa Ginoo sa halangdong tawo ug sa mga kahoy nga oliba, nagtudlo sa Iyang kabubut-on kabahin sa katubsanan sa Zion. Naglakip usab kini sa tambag sa Ginoo nga ang mga Santos magpadayon sa pagpundok (kabahin sa Iyang sambingay sa trigo ug sa mga sagbut) ug mangita og husay sa mga krimen nga gibuhat batok kanila (kabahin sa Iyang sambingay sa babaye ug dili makiangayon nga maghuhukom).
Ang Ginoo mihatag sa sambingay sa halangdong tawo ug sa mga kahoy nga oliba
Sa pisara, isulat Ang sambingay sa …
Ipasabut nga ang sambingay “usa ka yano nga istorya gigamit aron sa paghulagway ug pagtudlo og usa ka espirituhanon nga kamatuoran o baruganan. Ang usa ka sambingay gipasikad sa pagtandi og ordinaryo nga butang o hitabo ngadto sa usa ka kamatuoran” (Giya ngadto sa mga Kasulatan, “Sambingay,” scriptures.lds.org).
Hangyoa ang mga estudyante sa paglista og pipila ka mga sambingay nga gitudlo sa Manluluwas atol sa Iyang mortal nga pangalagad. Sama pananglit, ang mga estudyante mahimong mohisgot sa sambingay sa maayong Samarianhon o ang sambingay sa napulo ka mga birhen.
Ipasabut nga sa leksyon karon, ang mga estudyante mohisgot og sambingay nga gihatag sa Manluluwas pinaagi ni Joseph Smith. Kompletuha ang mga pulong sa pisara aron mabasa kini nga Ang sambingay sa halangdon nga tawo ug sa mga kahoy nga oliba.
Dapita ang usa ka estudyante sa pagbasa og kusog sa Doktrina ug mga Pakigsaad 101:43. Hangyoa ang klase sa pagsunod, nga mangita sa mensahe nga gisulti sa Ginoo nga gusto Siya nga makigsulti pinaagi niini nga sambingay. (Gusto Siya nga ang katawhan makasabut sa Iyang “kabubut-on mahitungod sa katubsanan sa Zion.”) Dapita ang usa ka estudyante sa pagbasa og kusog sa Doktrina ug mga Pakigsaad 101:44–45, ug hangyoa ang klase sa pagsunod, maniid og maayo sa mga detalye sa sambingay. Aron sa pagsiguro nga ang mga estudyante nakasabut sa istorya, ipangutana ang mosunod nga mga pangutana:
Unsa ang gisugo sa halangdon nga tawo nga buhaton sa iyang mga sulugoon?
Ngano nga ang halangdon nga tawo gusto nga dunay mga magbalantay sa iyang ubasan? Ngano nga gusto siya nga adunay magbalantay diha sa tore?
Dapita ang usa ka estudyante sa pagbasa og kusog sa Doktrina ug mga Pakigsaad 101:46. Hangyoa ang klase sa pagsunod, nga mangita kon sa unsa nga paagi gisunod sa mga sulugoon ang mga instruksyon sa halangdon nga tawo.
Dapita ang mga estudyante sa pagbasa og hilum sa Doktrina ug mga Pakigsaad 101:47–50, mangita pag-usab kon sa unsa nga paagi ang mga sulugoon misunod sa mga instruksyon sa halangdon nga tawo.
Unsa ka maayo ang mga sulugoon misunod sa mga instruksyon? (Mahimo nimong ipasabut nga sa bersikulo 50, ang mga pulong nga “nagsumpaki sa usag usa” nagpasabut nga ang mga sulugoon naglalis sa usag usa.)
Nganong napakyas ang mga sulugoon sa pagtukod og tore?
Dapita ang usa ka estudyante sa pagbasa og kusog sa Doktrina ug mga Pakigsaad 101:51. Hangyoa ang klase sa pagpangita unsa ang nahitabo tungod ang mga sulugoon wala motukod sa tore. Dapita sila sa pag-report unsay ilang nakit-an.
Basaha ang Doktrina ug mga Pakigsaad 101:52–54 ngadto sa mga estudyante. Hangyoa sila sa pagsunod, nga mangita sa mga pulong sa halangdon nga tawo ngadto sa iyang mga sulugoon.
Sumala sa bersikulo 54, ngano nga ang halangdon nga tawo nasuko nga wala magtukod og tore ang iyang mga sulugoon?
Sa unsa nga paagi nga ang mga panghitabo niini nga sambingay may kalabutan sa unsay nahitabo sa mga Santos sa Missouri?
Isip kabahin niini nga panaghisgutan, mahimo nimong pahinumduman ang mga estudyante nga sa pagpadayag nga gihatag niadtong Hulyo 1831, ang Ginoo mitudlo sa nahimutangan sa templo sa Independence, Missouri (tan-awa sa D&P 57). Niadtong Agosto 3, 1831, si Joseph Smith mipahinungod sa dapit sa templo sa Independence. Hinoon, ang mga Santos walay gihimo sa pagtukod sa templo. Niadtong Agosto 2, 1833, ang Ginoo misugo sa mga Santos sa Missouri sa pagtukod og templo (tan-awa sa D&P 97).
Sa unsa nga paagi nga ang tore sa sambingay may kalabutan sa templo nga wala matukod sa mga Santos?
Unsa ang pipila ka mga baruganan niini nga sambingay nga atong magamit sa atong mga kinabuhi? (Tungod kay ang sambingay adunay daghang kahulugan, mahimong mosugyot ang mga estudyante og pipila ka mga baruganan, lakip sa mosunod: Kon kita mosunod sa mga sugo sa Ginoo, malig-on kita sa pagbatok sa espiritwal ug pisikal nga mga kaaway. Ang mga propeta maoy nagsilbi nga mga magbalantay sa tore, magpasidaan nato sa umaabut nga mga kakuyaw. Pinaagi sa buhat sa templo, makaandam kita sa pagbatok sa kaaway.)
Dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 101:55–62. Hangyoa ang klase sa pagsunod ug pagpangita kon unsay gisugo sa halangdon nga tawo nga buhaton sa Iyang mga sulugoon.
Unsa ang gisulti sa halangdon nga tawo nga buhaton sa Iyang sulugoon? (Pagpundok og kasundalohan ug tubsa ang ubasan.)
Ipasabut nga ang sulugoon nga gihisgutan sa bersikulo 55 nagrepresentar ni Joseph Smith (tan-awa sa D&P 103:21). Gisunod ni Joseph Smith ang sugo sa Ginoo ug miorganisar og grupo nga gitawag og Zion’s Camp aron tubson ang yuta sa Zion. Ang Zion’s Camp pagahisgutan sa mga leksyon 108 ug 110.
Ang Ginoo mitambag sa mga Santos sa pagpadayon sa buhat sa panagpundok
Ipasabut nga bisan og ang mga Santos sa Lalawigan sa Jackson, Missouri, gipapahawa gikan sa ilang mga panimalay, ang Ginoo misugo kanila sa pagpadayon sa pagtukod sa Iyang gingharian. Dapita ang usa ka estudyante sa pagbasa og kusog sa Doktrina ug mga Pakigsaad 101:63–64 ug hangyoa ang klase sa pagpangita unsay gisulti sa Ginoo nga Iyang padayunon sa pagbuhat. Hangyoa ang mga estudyante sa pag-report kon unsay ilang makit-an.
Unsa man ang girepresentar sa trigo ug sa mga sagbut niini nga sambingay? (Ang trigo nagrepresentar sa matinud-anong mga sakop sa Simbahan, ug ang mga sagbut nagreperesentar sa dautan nga katawhan sa kalibutan. Mahimo nimong ipasabut nga ang mga sagbut susama sa trigo sa gagmay pa kini.)
Aron matabangan ang mga estudyante nga makasabut niini nga sambingay, ipasabut nga sa karaang panahon, ang mga kamalig mao ang mga dapit nga pundukanan sa trigo ug matipigan nga luwas. Nagpasabut niini nga sambingay ug sa ubang mga pagtulun-an sa mga kasulatan, si Elder David A. Bednar sa Korum sa Napulog Duha ka mga Apsotoles mipasabut, “Ang mga kamalig mao ang balaan nga mga templo” (“Madungganon nga Paghupot og usa ka Pangalan ug Katungdanan,”Liahona, Mayo 2009, 97). Isulat ang mosunod diha sa pisara: mga kamalig = balaan nga mga templo.
Base niini nga sambingay, unsa nga mga panalangin ang atong madawat pinaagi sa panagpundok ngadto sa mga templo ug magserbisyo didto? (Ang mga estudyante mahimong mogamit og lahi nga mga pulong, apan kinahanglan nilang ilhon ang mosunod nga baruganan: Samtang magpundok kita ngadto sa templo, madawat nato ang proteksyon ug maandam ang atong mga kaugalingon alang sa kinabuhing dayon.)
Unsa sa inyong hunahuna nga ang mga ordinansa ug mga pakigsaad sa templo makapanalipod nato ug makapaandam nato alang sa kinabuhing dayon?
Dapita ang pipila ka mga estudyante sa pagpakigbahin kon sa unsa nga paagi ang templo nahimong tinubdan sa proteksyon ug pagpangandam alang kanila ug sa ilang mga pamilya. Mahimo nimong idugang ang imong pagpamatuod niini nga baruganan.
I-summarize ang Doktrina ug mga Pakigsaad 101:67–75 pinaagi sa pagpasabut nga bisan ang mga Santos gipugos sa pagpahawa sa Lalawigan sa Jackson, Missouri, ang Ginoo mitambag kanila sa pagpadayon sa pagpalit og kabtangan didto ug sa silingang mga lalawigan.
Ang Ginoo mitambag sa mga Santos sa pagpadayon sa pagpangita og paagi nga makabalik sa ilang mga panimalay sa Missouri
Ipasabut nga dugang sa pagsugo sa mga Santos sa pagpalit og kayutaan, ang Ginoo misulti kanila sa “paghangyo alang sa kahusayan” tungod sa binuhatan niadtong migukod kanila (tan-awa D&P 101:76). Sa laing pagkasulti, giingnan Niya sila sa pagpangita og hustiysa pinaagi sa legal nga sistema sa gobyerno.
Dapita ang usa ka estudyante sa pagbasa og kusog sa Doktrina ug mga Pakigsaad 101:76–80. Hangyoa ang klase sa pagsunod ug pag-ila sa sistema sa mga balaod nga makapahimo sa mga Santos sa pagpangayo og tabang gikan sa mga lider sa gobyerno.
Sumala niini nga mga bersikulo, ang Ginoo migiya sa pag-establisar sa Batakang Balaod sa Estados Unidos mga tuig sa sayo pa. Ngano nga gusto Siya nga kini nga batakang balaod magpadayon?
Ang Ginoo miingon nga usa ka katuyoan sa “matarung nga kabubut-on” mao ang pagsiguro nga kita “manubag sa [atong] kaugalingon nga mga sala” (D&P 101:78). Ngano nga ang tulubagon—responsibilidad alang sa atong mga aksyon—usa ka importante nga bahin sa kabubut-on? Unsaon ninyo sa pagtubag ang usa ka tawo nga moingon “Ako gawasnon sa pagbuhat bisan unsay akong gusto”?
Ang Ginoo miingon nga walay usa ang himoong ulipon sa laing tawo. Sa inyong hunahuna ngano kaha nga importante man nga ang mga tawo dili mahimong ulipon?
Isip kabahin niini nga panaghisgutan, isulat ang mosunod diha sa pisara: Ang Dios mihatag nato og matarung nga kabubut-on, ang gahum sa pagpili, apan kita …
Dapita ang mga estudyante sa pagkompleto niini nga pamahayag base sa Doktrina ug mga Pakigsaad 101:78. (Samtang ang mga estudyante moila sa mosunod nga baruganan, kompletuha ang pamahayag diha sa pisara: Ang Dios mihatag nato og matarung nga kabubut-on, sa gahum sa pagpili, apan kita dunay tulubagon sa atong mga pagpili.)
Ipasabut nga ang Ginoo migamit og sambingay aron sa pag-awhag sa mga Santos sa pagpangayo og tabang gikan sa mga lider sa gobyerno. Dapita ang usa ka estudyante sa pagbasa sa sambingay nga anaa sa Doktrina ug mga Pakigsaad 101:81–84 (tan-awa usab sa Lucas 18:1–8). Hangyoa ang klase sa pagsunod ug sa pagkonsiderar kon sa unsa nga paagi ang sambingay magamit sa mga Santos sa Missouri. Dayon hangyoa ang laing estudyante sa pagbasa sa Doktrina ug mga Pakigsaad 101:85–88. Hangyoa ang klase sa pagpangita sa paagi nga gigamit sa Manluluwas ang sambingay ngadto sa mga Santos.
Atol niining panahon sa kasaysayan sa Simahan, kinsa kaha ang girepresentaran sa babayeng balo? (Ang mga miyembro sa Simbahan) Kinsa ang girepresentaran sa maghuhukom? (Ang maghuhukom mahimong magrepresentar sa mga maghuhukom ug mga lider sa gobyerno nga kapangayoan sa mga Santos og panabang. Mahimo usab nga siya nagrepresentar sa Langitnong Amahan, nga ampoan kanunay sa mga Santos.)
Sa paggamit niini nga sambingay, unsa ang piho nga mga butang nga gisugo sa Ginoo nga buhaton sa mga Santos?
Ipasabut nga ang mga Santos miduol sa mga maghuhukom sa lokal nga mga korte apan wala makadawat og suporta nga ilang gilauman. Mihangyo sila ni Daniel Dunklin, ang gobernador sa Missouri, ug ni Andrew Jackson, ang presidente sa Estados Unidos, sa pagtabang nila nga makabalik sa ilang mga panimalay ug kayutaan ug sa pagpanalipod kanila. Ang duha ka mga lider mibalibad sa pagtabang kanila. Ang mga Santos mihangyo usab sa balaod sa estado sa Missouri, apan nagdumili sila sa pagtabang.
Itudlo ang baruganan nga bag-o lang nimong gisulat sa pisara. Dapita ang usa ka estudyante sa pagbasa og kusog sa Doktrina ug mga Pakigsaad 101:89–91. Hangyoa ang klase sa pagpangita kon sa unsa nga paagi ang mga lider sa gobyerno may tulubagon kon sila magdumili sa pagbatang sa mga Santos. Hangyoa ang mga estudyante sa pag-report kon unsay ilang makit-an.
Dapita ang mga estudyante sa pagbasa og hilum sa Doktrina ug mga Pakigsaad 101:92–95, mangita kon unsay gisulti sa Ginoo nga buhaton sa mga Santos alang sa ilang mga lider sa gobyerno.
Unsa ang gitudlo kanato sa bersikulo 92 mahitungod sa Ginoo? (Dili Siya gusto nga mosilot sa mga tawo. Gusto Siya nga ang tanang mga tawo maghinulsol aron Siya malooy kanila.)
I-summarize ang Doktrina ug mga Pakigsaad 101:96–101 pinaagi sa pagpasabut nga ang Ginoo mitambag sa mga Santos nga ipabilin ang ilang mga kayutaan sa Lalawigan sa Jackson, bisan og wala sila tuguti nga mopuyo didto. Misaad Siya nga kon sila magpuyo nga takus, sila sa umaabut makahimo sa pagpuyo didto.
Sa pagtapos, ipakigbahin ang imong pagpamatuod sa mga baruganan nga gihisgutan sa mga estudyante.
Ang mosunod nga mga paragraph nagpasabut sa usa ka paagi sa paghubad sa sambingay sa halangdon nga tawo ug sa mga kahoy nga oliba:
“Ingon og ang sambingay hubaron niining paagiha: ang halangdon nga tawo mao ang Ginoo, kansang pinili nga yuta sa Iyang ubasan mao ang Zion sa Missouri. Ang mga dapit diin magpuyo ang mga Santos sa Zion mao ang mga kahoy sa oliba. Ang mga sulugoon mao ang mga nanimuyo nga mga Santos sa Ulahing mga Adlaw, ug ang mga magbalantay mao ang ilang mga opisyal sa Simbahan. Samtang nagtukod pa sa Zion, nagkasumpaki sila sa usag usa ug wala motukod sa tore o Templo kansang dapit gipahinungod sa sayo pa niadtong Agosto 3, 1831. Kon gitukod pa nila kini sumala sa gisugo, usa unta kini ka espirituhanong dangpanan alang kanila, kay gikan niini ang mga magbalantay sa Ginoo makakita unta pinaagi sa pagpadayag ang mga lihok sa kaaway sa layo pa. Kini nga kahibalo makaluwas unta nila ug sa ilang hinagoan sa dihang ang kaaway mihimo sa iyang pag-ataki.
“Apan ang mga Santos sa Missouri tapulan, wala magbantay, ug nangatulog. Ang kaaway miabut, ug ang mga pagpanggukod sa Missouri mao ang resulta. Ang katawhan sa Ginoo nagkatag ug kadaghanan sa ilang mga paningkamot nangausik. Ang Makagagahum mibadlong sa Iyang katawhan, sa nakita na nato, apan gisugo Niya ang usa sa Iyang mga sulugoon (b. 55), si Joseph Smith (103:21), sa pagpundok sa ‘kusgan nga mga tawo sa Akong balay’ ug pagluwas sa Iyang mga yuta ug mga kabtangan nga gipundok batok kanila.
“Sa wala madugay, ang Propeta ug ang iyang kaigsoonan sa inila nga Zion’s Camp miadto sa Missouri niadtong 1834 sa pagsulay sa pagtuman sa mga instruksyon sa sambingay. Sa wala pa sila moadto, dugang nga pagpadayag ang nadawat (tan-awa sa103:21–28) kabahin sa katubsanan sa Zion. Ang kaigsoonan gisugo sa pagsulay sa pagpalit og yuta sa Missouri, dili mogamit og kusog; ug kon ang kaaway moabut batok kanila, responsibilidad nila ang pagtunglo kanila. Ang Zion wala matubos nianang higayuna, apan makapaabut kita niini sa dili madugay. … Matubos ra kini kon gusto na sa Ginoo.” (Sidney B. Sperry, Doctrine and Covenants Compendium [1960], 521–22; kinutlo sa Manwal sa Estudyante sa Doktrina ug mga Pakigsaad [manwal sa Church Educational System, 2001], 243).
Si Elder D. Todd Christofferson sa Korum sa Napulog Duha ka mga Apostoles mitudlo ngano nga ang pulong matarung nga kabubut-on mas gipili kay sa pulong nga gawasnon nga kabubut-on:
Imahe
Elder D. Todd Christofferson
“Sa milabay nga katuigan, gigamit nato kasagaran ang pulong nga gawasnon nga kabubut-on. Dili kana sakto, apan karong bag-o among nahibaloan nga ang gawasnon nga kabubut-on dili makita isip ekspresyon diha sa mga kasulatan. Nagsulti kini sa atong ‘kagawasan sa pagpili’ ug ‘gawasnon sa paglihok’ alang sa atong kaugalingon ug sa atong obligasyon sa pagbuhat sa daghang mga butang sa atong kaugalingong ‘gawasnon nga kabubut-on.’ Apan ang pulong nga kabubut-on makita nga kini ra o, sa Doktrina ug mga Pakigsaad, seksyon 101, bersikulo 78, uban sa modifier nga matarung: ‘Aron ang matag tawo mahimo nga mobuhat diha sa doktrina ug baruganan … sumala sa matarung nga kabubut-on nga Ako mihatag ngadto kaniya, aron ang matag tawo mao ang manubag sa iyang kaugalingon nga mga sala sa adlaw sa paghukom.’ (emphasis gidugang). Kon kita mogamit sa pulong nga matarung nga kabubut-on, nan, sa tukma nga paagi atong gipasabut ang pagkamay-tulubagon nga usa ka importante nga bahin sa balaan nga gasa sa kabubut-on. Kita mao ang matarung nga mga binuhat ug mga tinugyanan sa atong kaugalingon, gawasnon sa pagpili apan responsable usab sa atong mga pagpili” (“Moral Agency” [Brigham Young University devotional address, Ene. 31, 2006], 1, speeches.byu.edu).
Si Presidente J. Reuben Clark sa Unang Kapangulohan miingon:
Imahe
President J. Reuben Clark
“Alang nako, akong mga kaigsoonan, kana nga pamahayag sa Ginoo, ‘Akong giestablisar ang Batakang Balaod niining yuta,’ nabutang ang Batakang Balaod sa Estados Unidos nga anaa sa posisyon diin nga ingon og kini nahisulat diha sa basahon sa Doktrina ug mga Pakigsaad mismo. Nakahimo kini sa Batakang Balaod nga pulong sa Ginoo ngari kanato. Nahatag kadto, dili sa sulti lang, apan pinaagi sa paglihok sa iyang hunahuna ug espiritu diha sa mga hunahuna sa mga tawo, nagdasig kanila sa pagpalambo niining talagsaon nga dokumento sa panggobyerno sa tawo, wala makausab sa awtoridad niini” (in Conference Report, Abr. 1935, 93).
Si Presidente Brigham Young naghisgot sa pipila ka mga tawo kinsa mga instrumento sa mga kamot sa Dios sa pag-establisar sa Batakang Balaod sa Estados Unidos:
Imahe
President Brigham Young
“Nagtuo kita nga ang Ginoo nag-andam kanus-a niya ipahinabo ang iyang buhat, nga, kon ang gitakda nga panahon moabut na, adunay dapit diha sa iyang tumbanan diin adunay igo nga kagawasan sa tanlag ang anaa, nga ang iyang mga Santos magpuyo sa kalinaw ubos sa proteksyon sa batakang balaod ug pareha og mga katungod. Niini nga pagsabut gikonsiderar nato nga ang mga tawo sa Rebulusyon gidasig sa Makagagahum, aron pugos nga mahimong independente gikan sa panggobyerno, uban sa iyang naestablisar nga relihiyon. Tungod niini nga kawsa sila si Adams, Jefferson, Franklin, Washington, ug daghan pang laing mga tawo nga nadasig sa pagbatok sa mga buhat sa Hari sa Great Britain … sa pag-establilsar og bag-ong gobyerno subay sa baruganan sa mas dako nga kagawasan, ang basihanan sa gobyerno sa kaugalingon nagtugot sa gawasnong paghimo sa relihiyoso nga pagsimba.
“Tingog kadto sa Ginoo nga nagdasig niadtong tanang takus nga mga tawo kinsa adunay mga impluwensya sa mga panahon sa pagsulay, dili lamang sa pagpakiggubat apan sa paggamit og kaalam diha sa council, emosyunal nga kalig-on, kaisug, ug paglahutay diha sa panggubatan, ingon man usab sa pagporma ug pagsagop niadtong maalamon ug epektibo nga mga polisiya nga nakuha sa ilang kaugalingon ug sa misunod nga mga henerasyon, ang mga panalangin sa usa ka gawasnon ug independente nga gobyerno.” (Discourses of Brigham Young, sel. John A. Widtsoe [1954], 359–60).
Sa pagpadayag nga narekord sa Doktrina ug mga Pakigsaad 101, ang Ginoo misubli sa Iyang sambingay sa babaye nga nakapaugtas sa usa ka maghuhukom hangtud nga iyang gihatag ang iyang gihangyo (tan-awa sa Lucas 18:1–8). Gipahisama niya ang sambingay ngadto sa sitwasyon sa mga Santos kinsa giabug gikan sa ilang mga panimalay sa Missouri. Kinahanglan sila moadto sa mga lider sa gobyerno aron mangita og hustisya ug panalipod, sugod sa usa ka maghuhukom ug, kon gikinahanglan, moadto sa gobyerno sa Missouri ug sa presidente sa Estados Unidos. Kon ang mga hangyo sa mga Santos dili paminawon, ang Ginoo miingon nga Siya masuko ug mohatag og hustisya niadtong kinsa mipugos sa pagpapahawa sa mga Santos, aron ang tanan nga mga tawo “walay ikabalibad” (D&P 101:93). Si Presidente Joseph Fielding Smith mipasabut:
Imahe
President Joseph Fielding Smith
“Ang mga santos kinahanglan usab nga modala sa ilang mga reklamo ngadto sa tukma nga hukmanan ug mangayo og kahusayan sa mga kasaypanan nga gibuhat ngadto kanila. Usa kini ka importante kaayo nga lakang, ug kon ang mga Santos mobuhat niini ug wala hatagi sa ilang sibil ug relihiyoso nga mga katungod, kadto nga mga opisyal walay ikabalibad, ug ang mga paghukom sa Makagagahum nga miabut diha kanila panahon sa Sibil nga gubat, makatarunganon. …
“Tungod kay adunay makiangayon nga balaod sa silot, lig-on ug mahangturon sama sa ubang mga balaod sa Makagagahum [tan-awa sa 2 Mga Taga Corinto 9:6; D&P 6:33], ang adlaw moabut nga adunay mga kausaban nga himoon sa Makiangayong Maghuhukom kinsa dili mahadlok sa mga hulga sa manggugubot nga panon” (Church History and Modern Revelation, 2 vols. [1953], 1:462, 469).