Ang Buhi nga Propeta

Pasiuna

Ang mga miyembro sa Ang Simbahan ni Jesukristo sa mga Santos sa Ulahing mga Adlaw napanalanginan nga magiyahan pinaagi sa buhi nga propeta, manalagna, ug tigpadayag. Sa karaang mga panahon, ang mga propeta gipili sa Ginoo ug gihatagan og awtoridad sa pagpamulong alang Kaniya. Sa samang paagi, sa atong panahon ang mga pulong sa buhi nga propeta nagrepresentar sa tingog sa Ginoo ngari kanato ug ngadto sa kalibutan (tan-awa sa D&P 1:37–38). Niini nga leksyon, magtuon ang mga estudyante sa bag-ong tambag gikan sa Presidente sa Simbahan, ang pinili nga propeta sa Ginoo.

Mga Sugyot alang sa Pagtudlo

Ang nagpadayon nga pagpadayag pinaagi sa buhi nga propeta

Isulat ang mosunod nga pangutana diha sa pisara: Kinsa ang labing importanting propeta para ninyo?

Dapita ang klase sa pagpamalandong niining pangutana ug paminaw sa tubag samtang imong basahon ang mosunod nga pamahayag ni Presidente Ezra Taft Benson.

“Ang labing importanting propeta, sumala sa atong nahibaloan, mao ang usa nga buhi sa atong panahon” (“Jesus Christ—Gifts and Expectations,” New Era, Mayo 1975, 17).

Ngano kaha nga ang buhi nga propeta mao man ang labing importanting propeta alang kanato?

Human makatubag ang mga estudyante, padayuna ang pagbasa sa pamahayag ni Presidente Benson:

“Mao kini ang propeta kinsa adunay mga instruksyon karon gikan sa Dios ngari kanato. … Kada henerasyon adunay panginahanglan sa karaang kasulatan, dugangan sa kasamtangang kasulatan gikan sa buhi nga propeta. Busa, ang labing mahinungdanon nga pagbasa ug pagpamalandong nga angay ninyong buhaton mao ang labing ulahing dinasig nga mga pulong gikan sa tigpama-ba sa Ginoo. Mao nga mahinungdanon kaayo nga kamo makagamit ug maampingong mobasa sa iyang mga pulong diha sa mga pahayagan sa Simbahan” (“Jesus Christ—Gifts and Expectations,” 17).

Ipasabut nga atong gipaluyohan ang tanang sakop sa Unang Kapangulohan ug ang Korum sa Napulog Duha ka mga Apostoles isip mga propeta, mga manalagna, ug mga tigpadayag. Hinoon, ang Presidente sa Simbahan mao ang bugtong tawo kinsa dunay katungod sa paggamit sa tanang yawe sa priesthood dinhi sa yuta ug ang bugtong tawo kinsa dunay katungod sa pagdawat ug mamahayag sa mga pinadayag alang sa tibuok Simbahan.

Sumala sa unsay inyong nakat-unan sa labing bag-ong mga leksyon, kanus-a man nga ang Presidente sa Simbahan namahayag og mga pagpadayag alang sa tibuok Simbahan o mipahibalo sa dagkong mga kausaban sa mga pamalakad sa Simbahan? (Ang mga tubag mahimong maglakip sa higayon nga si Presidente Wilford Woodruff miisyu og Manifesto kalabut sa dinaghan nga kaminyoon [tan-awa sa Opisyal nga Pamayahag 1], sa dihang si Presidente Joseph F. Smith mipahayag sa kanhi wala maila nga mga kamatuoran mahitungod sa kalibutan sa espiritu human niining kinabuhi [tan-awa sa D&P 138], ug sa dihang si Presidente Spencer W. Kimball mipahayag nga ang mga panalangin sa priesthood mahimo nang magamit sa tanang takus nga mga miyembro sa Simbahan [tan-awa sa Opisyal nga Pamahayag 2].)

Dapita ang usa ka estudyante sa pagbasa og kusog sa mosunod nga pamahayag ni Presidente Dieter F. Uchtdorf. Dapita ang klase sa pagpaminaw sa usa ka kamatuoran kalabut sa pinadayag sa atong panahon.

“Usa sa mahimayaong mensahe sa Pagpahiuli sa Simbahan ni Jesukristo mao nga ang Dios nagpadayon sa pagpadayag sa Iyang mga anak! Wala Siya motago sa kalangitan apan siya nagpadayag karon sama sa Iyang gibuhat sa karaang panahon. …

“Ang bililhong mga instruksyon sa Dios ngadto sa katawhan makita sa Biblia, Basahon ni Mormon, Doktrina ug mga Pakigsaad, ug Perlas nga Labing Bililhon. Dugang pa, ang Ginoo nagpadayag ngari kanato pinaagi sa Iyang mga sulugoon, nga Iya kining buhaton og usab sa … kinatibuk-ang komperensya.” (“Nganong Nagkinahanglan Kita og mga Propeta?” Liahona, Marso. 2012, 4).

Unsa nga doktrina kalabut sa pagpadayag ang gitudlo ni Presidente Uchtdorf? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang susama sa mosunod nga doktrinal nga pamahayag: Ang Ginoo nagpadayon sa pagpakigsulti kanato karon pinaagi sa Iyang buhi nga propeta. Mahimo nimong isulat kining doktrina diha sa pisara.)
Asa man nato makit-an ang mga pulong sa buhi nga propeta? (Ang mga tubag mahimong maglakip sa kinatibuk-ang komperensya, mga magasin sa Simbahan, LDS.org, ug mormonchannel.org.)

Aron matabangan ang mga estudyante nga makasabut sa kaimportante sa padayon nga pagpakigsulti sa Ginoo pinaagi sa Iyang buhi nga propeta, dapita ang usa ka estudyante sa pagbasa og kusog sa mosunod nga pamahayag ni Presidente John Taylor. Hangyoa ang klase sa pagpaminaw kon nganong importante ang padayon nga pagpadayag pinaagi sa mga propeta.

“Kita nagkinahanglan og buhing kahoy—usa ka buhing tuburan—buhing kahibalo, nga nagagikan sa buhing priesthood sa langit, pinaagi sa buhing priesthood sa yuta. … Ug gikan sa panahon nga si Adan unang nakadawat og komunikasyon gikan sa Dios, … kanunay kining nagkinahanglan og bag-ong mga pagpadayag, nga gipahiangay sa talagsaon nga mga kahimtang diin ang mga simbahan o mga indibidwal gipahimutang. Ang pinadayag ni Adan wala nagtudlo nga si Noe maghimo og usa ka arka, ingon man ang pagpadayag ni Noe wala magsulti nga biyaan ni Lot ang Sodom; o bisan hain niini nga namulong sa pagbiya sa mga anak ni Israel gikan sa Ehipto” (sa The Gospel Kingdom, sel. G. Homer Durham [1987], 34).

Sumala ni Presidente Taylor, nganong nagkinahanglan kita og usa ka buhi nga propeta? (Pinaagi sa buhi nga propeta, ang Dios makahatag og piho nga direksyon ngadto sa mga panginahanglan ug mga kahimtang sa usa ka panahon.)
Sa unsang paagi nga ang pagsabut sa panginahanglan sa padayon nga pagpadayag makaapekto sa paagi sa inyong pagpaminaw o pagbasa sa mga pulong sa buhi nga propeta?

Pagsunod sa tambag sa buhi nga propeta

Aron matabangan ang mga estudyante nga mahisgutan ang tambag sa buhi nga propeta, pagpili og usa o mas daghang pakigpulong sa kinatibuk-ang komperensya nga nahatag sa Presidente sa Simbahan sa miagi nga tuig. Hatagi og kopya sa pakigpulong ang matag estudyante sa klase. Hatagi ang mga estudyante og panahon sa pagpangita sa mga doktrina ug mga baruganan nga kasamtangang gitudlo sa buhi nga propeta.

Human ang mga estudyante nakabasa og igong panahon, hangyoa sila sa paglista sa mga doktrina ug mga baruganan nga gitudlo sa Presidente sa Simbahan. Ikonsiderar ang paghangyo sa usa ka estudyante sa pagsulat sa ilang mga tubag diha sa pisara.

Aron matabangan ang mga estudyante nga makasabut ug mabati ang kaimportante sa mga doktrina ug mga baruganan nga ilang nahibaloan, ipangutana ang pipila o tanan sa mosunod:

Hain niining mga baruganan o mga doktrina nga sa inyong pamati espesyal kaayo para ninyo? Ngano man?
Sa unsang mga paagi nga kamo ug ang inyong pamilya naningkamot sa pagsunod sa tambag sa propeta?
Ngano kaha nga importante nga atong tun-an ug gamiton kon unsa ang kasamtangan nga gitudlo sa Presidente sa Simbahan?

Isulat ang mosunod nga mga pangutana diha sa pisara, ug dapita ang mga estudyante sa pagtubag niini diha sa ilang mga class notebook o mga scripture study journal:

Gikan sa mga pulong sa buhi nga propeta nga bag-o lang ninyong natun-an, unsa nga mga mensahe ang inyong gibati nga gusto sa Ginoo nga inyong madawat?

Unsa ang inyong buhaton tungod sa bag-ong tambag sa propeta?

Dapita ang mga estudyante sa pagbuhat sa unsay ilang nasulat. Ipamatuod nga kon sila mobuhat sa ingon, makaangkon sila og pasalig nga ang Langitnong Amahan mopanalangin kanila. Awhaga ang mga estudyante nga magmakanunayon sa pagtuon ug paggamit sa mga pagtulun-an sa buhi nga mga propeta.

Dapita ang mga estudyante sa pagpakigbahin sa ilang mga pagpamatuod sa buhi nga mga propeta.

Agig panapos niining tuig sa seminary, awhaga ang mga estudyante nga ipadayon ang pagtuon sa mga kasulatan kada adlaw. Kon sila mokuha pa sa sunod nga kurso sa seminary, mahimo nimong isugyot nga ilang sugdan ang pagtuon sa Daang Tugon. Mahimo nimong dapiton ang usa ka estudyante sa pagpamatuod sa mga panalangin nga iyang nadawat pinaagi sa pagpadayon sa pagbasa sa mga kasulatan matag adlaw bisan og ang seminary wala pa magsugod.

Komentaryo ug Background nga Impormasyon

Ang kaimportante sa pagsunod sa buhi nga mga propeta

Si Presidente Ezra Taft Benson mitudlo:

“Sa tanang katawhan, kinahanglan nga itutok nato ang atong panan-aw sa walay pagkalipat ngadto sa kapitan, ang propeta, manalagna, ug tigpadayag, ug presidente sa Ang Simbahan ni Jesukristo sa mga Santos sa Ulahing mga Adlaw. Kini ang tawo nga nagbarug nga pinakaduol sa tinubdan sa buhing tubig. Adunay daghang langitnong instruksyon para kanato nga madawat lang nato pinaagi sa propeta. Ang maayong paagi sa pagsukod sa inyong kahimtang ngadto sa Ginoo mao ang pagsusi kon unsay inyong gibati, ug gihimo, mahitungod sa dinasig nga mga pulong sa iyang representante sa kalibutan, nga mao ang propeta nga presidente. Ang dinasig nga mga pulong sa presidente dili angayang ibaliwala. Ang tanang tawo may katungod sa inspirasyon ug ang lain-laing mga tawo may katungod sa pagpadayag alang sa piho nilang buluhaton. Apan usa ra ka tawo ang mobarug isip tigpamâ-bâ sa Simbahan ug sa kalibutan, ug siya ang presidente sa Simbahan. Ang tanang mga pulong sa uban pang mga tawo kinahanglang sukdon batok sa iyang dinasig nga mga pulong.

“Bisan og ang iyang propeta mortal, ang Dios dili motugot kaniya nga ipahisalaag ang simbahan. (Tan-awa sa Discourses of Wilford Woodruff, pp. 212–13.) Ang Dios nasayud sa tanang mga butang, ang katapusan gikan sa sinugdanan, ug walay tawo nga mahimong presidente sa simbahan ni Jesukristo pinaagi sa wala damha, o magpabilin dinha pinaagi sa sulagma, o mamatay sa wala tuyoa nga panghitabo.

“Ang labing importanting propeta, kutob sa atong nahibaloan, mao ang usa kinsa buhi sa atong panahon. Mao kini ang propeta kinsa adunay mga instruksyon sa karon nga panahon gikan sa Dios ngari kanato. Ang pinadayag sa Dios ngadto ni Adan wala magsugo ni Noe kon unsaon sa paghimo sa arka. Kada henerasyon adunay panginahanglan sa karaang kasulatan, ipuno ang kasamtangang kasulatan gikan sa buhi nga propeta. Busa, ang labing mahinungdanon nga pagbasa ug pagpamalandong nga angay ninyong buhaton mao ang labing ulahing dinasig nga mga pulong gikan sa tigpama-ba sa Ginoo. Mao nga mahinungdanon kaayo nga kamo makagamit ug maampingong mobasa sa iyang mga pulong diha sa mga pahayagan sa Simbahan” (“Jesus Christ—Gifts and Expectations,” New Era, Mayo 1975, 16–17).

Si Presidente J. Reuben Clark Jr. mipasabut usab og maayo sa panginahanglan sa pagpaminaw sa buhi nga mga propeta:

“Kaniadto adunay usa ka pamphlet nga gibutang sa akong lamesa. … Diha sa hapin dunay giingon, ‘Nagkinahanglan kita og propeta,’ ug sa akong pagbasa niini, ug sa akong mahinumduman karon, nakahunahuna ko kon unsa ka buta ang kalibutan karon. …

“… Wala kita magkulang sa propeta; unsay atong kulang mao ang dalunggan sa mga tawo nga maminawug ang determinasyon sa pagpakabuhi sumala sa sugo sa Dios” (sa Conference Report, Okt. 1948, 79–80).

Miingon ni Presidente Wilford Woodruff:

“Ang Ginoo dili gayud motugot kanako o ni bisan kinsa nga tawo kinsa mibarug ingon nga Presidente niini nga Simbahan sa paggiya kaninyo nga mahisalaag. Kini wala sa palakaw. Kini wala sa hunahuna sa Dios. Kon ako mangahas niana, ang Ginoo mopapahawa kanako gikan sa akong dapit, ug busa Siya mobuhat ngadto ni bisan kinsa nga tawo kinsa mangahas sa paggiya sa mga katawhan sa paghisalaag gikan sa mga orakulo sa Dios ug gikan sa ilang katungdanan” (Opisyal nga Pamahayag 1).