Leksyon 100: Doktrina ug mga Pakigsaad 97

Leksyon 100

Doktrina ug mga Pakigsaad 97

Pasiuna

Si Propeta Joseph Smith nakadawat og pinadayag nga narekord diha sa Doktrina ug mga Pakigsaad 97 niadtong Agosto 2, 1833. Niini nga pinadayag, ang Ginoo mihatag og panudlo ug pagdasig alang kang Parley P. Pratt, kinsa nagdumala og eskwelahan alang sa mga tighupot sa priesthood sa Missouri, ug alang sa mga tawo nga mitambong niana nga eskwelahan. Ang Ginoo mipasabut usab og maayo sa Iyang kabubut-on nga ang mga Santos sa Missouri motukod og templo. Misaad siya nga kon mobuhat sila niini, ug kon putli ang ilang mga kasingkasing, ang Iyang himaya ug presensya magpuyo didto.

Mga Sugyot alang sa Pagtudlo

Doktrina ug mga Pakigsaad 97:1–9

Ang Ginoo mitudlo sa mga sakop sa tulunghaan sa mga elder sa Missouri unsay kinahanglan nilang buhaton aron Iyang madawat

Isulat ang mosunod nga dili kompleto nga pamahayag sa pisara. Hangyoa ang mga estudyante sa pagkompleto niini nga mga pamahayag diha sa ilang mga class notebook o mga scripture study journal.

Moeskwela ko tungod kay …

Mosimba ko tungod kay …

Human sa igo nga panahon, dapita ang pipila ka mga estudyante sa pagpaambit kon giunsa nila pagkompleto ang mga pamahayag.

Pahinumdumi ang mga estudyante nga sa tingtugnaw sa 1832–33, ang Ginoo misugo sa mga lider sa Simbahan sa pag-establisar sa Tulunghaan sa mga Propeta sa Kirtland, Ohio. Si Parley P. Pratt ang nangulo sa susama nga eskwelahan sa Independence, Missouri—usa ka eskwelahan sa mga elder. Ang mga sakop niini nga eskwelahan misulat ngadto ni Joseph Smith, kinsa didto sa Ohio. Agi og tubag, mipadala siya kanila og sulat nga naglangkob sa pinadayag nga karon narekord diha sa Doktrina ug mga Pakigsaad 97. Dapita ang mga estudyante nga hilum nga mobasa sa Doktrina ug mga Pakigsaad 97:1 ug motino kon giunsa paghulagway sa Ginoo ang daghan sa mga kaigsoonan diha sa yuta sa Zion (Missouri).

Giunsa paghulagway sa Ginoo ang daghan sa mga kaigsoonan sa Missouri?

Dapita ang usa ka estudyante sa pagbasa og kusog sa Doktrina ug mga Pakigsaad 97:2. Hangyoa ang klase sa pagsunod ug sa pagtino kon unsa ang gisaad sa Ginoo niining mga tawhana. Hangyoa ang mga estudyante sa pagreport sa ilang nakit-an.

Sa mga bersikulo 1–2, unsa nga baruganan ang inyong nakita kalabut sa paagi nga mahimo kitang makaangkon og kaalam ug kamatuoran? (Ang mga estudyante mahimong mogamit og lain-laing mga pulong, apan kinahanglang mahibalo sila og baruganan nga susama sa mosunod: Kon magpaubos kita sa atong kaugalingon ug makugihon nga magtinguha sa pagkat-on, makaangkon kita og kaalam ug kamatuoran.)
Sa unsang paagi kaha ang pagkamapainubsanon ug pagkamakugihon makatabang kanato nga makabaton og kaalam ug kamatuoran?

Dapita ang mga estudyante nga hilum nga mobasa sa Doktrina ug mga Pakigsaad 97:3–5, nga mangita kon unsa ang gibati sa Ginoo mahitungod sa pagserbisyo ni Parley P. Pratt ug unsay gisaad sa Ginoo kang Brother Pratt. Hangyoa ang mga estudyante sa pagreport sa ilang nakat-unan. Pasaligi sila nga, sama kang Parley P. Pratt, makahibalo sila nga ang Ginoo mahimuot kanila samtang mopadayon sila sa pagsunod Kaniya.

Aron maandam ang mga estudyante sa pagtuon sa Doktrina ug mga Pakigsaad 97:6–9, dapita ang duha ka mga estudyante sa pagdrowing og mga hulagway diha sa pisara. Hangyoa ang usa ka estudyante sa pagdrowing og kahoy nga namunga og maayong bunga ug nga gitanom sa maayong yuta tupad sa usa ka sapa (tan-awa sa bersikulo 9). Hangyoa ang laing estudyante sa pagdrowing og kahoy nga wala mamunga og maayong bunga, nga adunay atsa nga gibutang duol sa mga gamot niini (tan-awa sa bersikulo 7).

Ipasabut nga sa duha ka mga paghulagway, ang kahoy nagrepresentar sa mga miyembro sa Simbahan. Pahinumdumi ang mga estudyante nga daghang mga sakop sa eskwelahan sa mga elder mapainubsanon ug matinud-anon. Hinoon, ang uban nahimong mapagarbuhon ug masinupakon.

Kon ang mga kahoy nagrepresentar sa mga miyembro sa Simbahan, unsa kaha ang girepresentar sa bunga? (Ang mga buhat ug lihok sa mga miyembro sa Simbahan. Kon ang mga estudyante maglisud sa pagpahayag niini nga tubag, mahimo nimo silang dapiton sa pagbasa og hilum sa Doktrina ug mga Pakigsaad 97:6, nga mangita sa tubag didto.)

Dapita ang usa ka estudyante sa pagbasa og kusog sa Doktrina ug mga Pakigsaad 97:6–7, ug hangyoa ang klase sa pagpangita og mga baruganan nga gitudlo niini nga mga bersikulo.

Unsa ang pipila ka mga baruganan nga gitudlo niini nga mga bersikulo?

Dapita ang usa ka estudyante sa pagbasa og kusog sa Doktrina ug mga Pakigsaad 97:8-9, ug hangyoa ang klase sa pagpangita og mga baruganan nga gitudlo niini nga mga bersikulo.

Unsa ang pipila ka mga baruganan nga gitudlo niini nga mga bersikulo?
Sa unsang paagi kaha ang mga paghulagway sa unsay mahitabo sa mga kahoy makadasig kanato nga mahimong mas matinud-anon?

Isulat sa pisara ang mosunod nga dili kompleto nga pamahayag: Aron madawat sa Ginoo, kinahanglan gayud kitang …

Dapita ang mga estudyante sa pagribyu sa Doktrina ug mga Pakigsaad 97:8 ug sa pag-ila sa mga kinaiya sa tawo kinsa gidawat sa Ginoo. Samtang ilang ilhon kini nga mga kinaiya, kompletuha ang pamahayag sa pisara sama sa mosunod: Aron madawat sa Ginoo kinahanglan kitang adunay matinuuron ug masulub-on nga kasingkasing ug mahinulsulon nga espiritu ug andam nga motuman sa atong mga pakigsaad pinaagi sa pagsakripisyo.

Unsa kaha ang gipasabut sa pagbaton og masulub-on nga kasingkasing ug mahinulsulon nga espiritu?
Unsa kaha ang gipasabut sa pagtuman sa atong mga pakigsaad pinaagi sa sakripisyo? (Usa ka posibling tubag mao nga kini nagpasabut sa pagbuhat sa bisan unsa nga kinahanglan gayud natong buhaton sa pagtuman sa mga pakigsaad nga atong gihimo uban sa Ginoo.)
Unsa ang pipila ka mga sakripisyo nga inyong nahimo aron sa pagtuman sa inyong mga pakigsaad?

Hatagi ang mga estudyante og panahon sa pagpamalandong sa ilang kahimtang atubangan sa Ginoo ug sa paghunahuna kon unsaon nila paggamit sa baruganan gikan sa Doktrina ug mga Pakigsaad 97:8 diha sa ilang kinabuhi.

Doktrina ug mga Pakigsaad 97:10–21

Ang Ginoo mipasabut og maayo sa Iyang kabubut-on nga ang mga Santos sa Missouri motukod og templo

Hangyoa ang usa ka estudyante sa pagbasa og kusog sa Doktrina ug mga Pakigsaad 97:10–12, ug dapita ang klase sa pagpangita sa sakripisyo nga gipangayo sa Ginoo gikan sa mga Santos sa Missouri.

Unsa nga sakripisyo ang gipangayo sa Ginoo gikan sa mga Santos sa Missouri? (Kinahanglan silang motukod og templo—usa ka balay alang sa Ginoo.)

Pahinumdumi ang mga estudyante nga ang Ginoo mitudlo sa lote sa templo duha ka tuig na ang milabay (tan-awa sa D&P 57:1–3). Niadtong Hunyo 1833, si Joseph Smith misulat sa mga lider sa Simbahan sa Missouri ug misugo kanila nga sugdan dayon ang pagtukod sa templo. Hinoon, sa dihang ang pinadayag sa Doktrina ug mga Pakigsaad 97 gihatag niadtong Agosto 2, 1833, ang mga Santos sa Missouri wala pa makasugod sa pagtukod. Agig dugang, ang unang buhat sa panon sa mga manggugubot batok sa mga Santos sa Jackson County, nga nahitabo sa wala pa moabut ang kopya niini nga pinadayag, hilabihan nga nakapalisud sa pagtuman niini nga sugo.

Hangyoa ang mga estudyante nga hilum nga mosiksik sa Doktrina ug mga Pakigsaad 97:12–14, nga magtino sa mga rason nga gusto sa Ginoo nga ang mga Santos sa Missouri motukod og templo. Hangyoa ang mga estudyante sa pagreport sa ilang mga nakit-an. Dayon ipangutana ang mosunod:

Sa unsang paagi ang templo nahimong “usa ka dapit sa pagpasalamat” alang kaninyo? Sa unsang paagi kini nahimong “usa ka dapit alang sa pagpanudlo”?

I-assign ang mga estudyante nga magpares sa pagtrabaho. Hangyoa sila sa pagtuon sa Doktrina ug mga Pakigsaad 97:15–20 uban sa ilang kapares, nga mangita sa mga saad nga gihatag sa Ginoo sa mga Santos kon sila magtukod og templo. Hangyoa sila sa pagreport sa ilang mga nakit-an.

Aron matabangan ang mga estudyante nga makasabut nga ang saad nga makakita sa Dios diha sa templo mahimong naglakip og sobra pa kay sa pagkakita Kaniya gamit ang atong natural nga mga mata, basaha ang mosunod nga pamahayag ni Elder David B. Haight sa Korum sa Napulog Duha ka mga Apostoles:

“Tinuod nga ang uban nakakita gayud sa Manluluwas, apan kon ang tawo mokonsulta sa diksyonaryo, iyang makat-unan nga adunay daghang kahulugan ang pulong nga makakita,sama sa makahibalo Kaniya, makabantay Kaniya, makaila Kaniya ug sa Iyang buhat, makaamgo sa Iyang kaimportante, o makasabut Kaniya” (“Temples and Work Therein,” Ensign, Nob. 1990, 61).

Sumala sa mga bersikulo 15–17, unsaon nato nga mahimong kwalipikado aron makasinati sa himaya ug presensya sa Ginoo diha sa templo?

Human makatubag ang mga estudyante, isulat sa pisara ang mosunod nga baruganan: Diha sa templo, ang Dios mopakita sa Iyang kaugalingon niadtong kinsa mga putli og kasingkasing.

Unsa kaha ang gipasabut nga mahimong putli og kasingkasing?
Unsay atong mabuhat sa pagputli sa atong kasingkasing aron makadawat kita sa mga panalangin sa templo?
Sa unsang paagi kamo mibati nga napanalanginan samtang takus kamo nga mitambong sa templo? (Kon ikaw adunay mga estudyante sa imong klase nga wala pa makatambong sa templo, mahimo ka nga mangutana hinoon sa mosunod nga pangutana: Sa unsang paagi kamo mibati nga napanalanginan samtang nagtinguha kamo nga mahimong putli og kasingkasing?)

Hangyoa ang mga estudyante nga hilum nga mobasa sa Doktrina ug mga Pakigsaad 97:21 ug motino kon giunsa sa Ginoo pagpasabut ang pulong nga Zion. Ang mga estudyante kinahanglang mahibalo sa mosunod nga doktrina: Ang Zion mao ang putli og kasingkasing.)

Doktrina ug mga Pakigsaad 97:22–28

Ang Ginoo mipasabut kon unsay kinahanglan natong buhaton aron makalingkawas sa Iyang kaligutgot ug makadawat sa Iyang mga panalangin

Aron maandam ang mga estudyante nga makasabut sa mensahe sa Ginoo diha sa Doktrina ug mga Pakigsaad 97:22–24, pagpakita o pagdrowing og hulagway sa usa ka alimpulos. Ipasabut nga ang mga alimpulos mahitabo bisan asa sa kalibutan. Ang kusog nga mga alimpulos posibleng mahimong mapintas nga mga buhawi nga makaingon sa grabeng kadaot. Pangutan-a ang mga estudyante kon personal na ba silang nakakita og alimpulos o grabeng buhawi o nakakita og video recording niini. Tuguti ang mga estudyante sa paghulagway sa ilang mga kasinatian.

Dapita ang usa ka estudyante sa pagbasa og kusog sa Doktrina ug mga Pakigsaad 97:22–24, ug hangyoa ang klase sa pagtino kon ngadto sa unsa gikompara sa Ginoo ang usa ka alimpulos. Hangyoa sila sa pag-report unsay ilang nakit-an. Ipasabut nga diha sa bersikulo 22, ang pulong nga panimalos nagpasabut sa mga sangputanan sa pagsupak sa Ginoo.

Sa unsang paagi ang panimalos sa Ginoo sama sa alimpulos?

Hangyoa ang mga estudyante nga hilum nga mosiksik sa Doktrina ug mga Pakigsaad 97:25–28 nga mangita kon unsay gikinahanglan natong buhaton aron makalingkawas sa panimalos sa Ginoo ug makadawat sa Iyang mga panalangin. Mahimo nimong isugyot nga markahan sa mga estudyante ang pulong nga kon bisan asa kini makita niini nga mga bersikulo.

Unsay kinahanglan natong buhaton aron makalingkawas sa panimalos sa Ginoo ug makadawat sa Iyang mga panalangin?
Sa unsang paagi ang mensahe sa Ginoo niini nga mga bersikulo may kalabutan sa mga hulagway sa duha ka mga kahoy nga atong gihisgutan sa unahan? Unsa ang gitudlo sa mga bersikulo 27–28 mahitungod sa paghinulsol ug pagpasaylo?

Ipaambit ang imong pagpamatuod sa mosunod nga baruganan: Kon kita magmasulundon, makalingkawas kita sa panimalos sa Ginoo ug makadawat og daghan kaayo sa Iyang mga panalangin.

Mahimo nimong ipasabut nga sumala ni Parley P. Pratt, ang pinadayag sa Doktrina ug mga Pakigsaad 97 “wala tumana sa mga lider ug sa simbahan sa Missouri, sa kinatibuk-an; bisan tuod daghan ang mapainubsanon ug matinud-anon. Busa, ang gihulga nga paghukom hingpit nga gipahamtang, nga gipakita sa kasaysayan sa mosunod nga lima ka tuig” (Autobiography of Parley P. Pratt, ed. Parley P. Pratt Jr. [1938], 96). Niadtong Nobyembre 1833, ang mga Santos gipapahawa gikan sa Jackson County, Missouri, ug padayon sila nga miatubang og pagpanggukod diha sa Missouri hangtud nga napapahawa sila gikan sa estado niadtong 1838 ug 1839.

Dapita ang mga estudyante sa paghunahuna kon unsay pag-aghat nga ilang gibati nga buhaton samtang gitun-an nila ang Doktrina ug mga Pakigsaad 97. Awhaga sila sa pagbuhat sumala niadto nga mga pag-aghat aron makadawat sila sa mga panalangin sa Ginoo.

Komentaryo ug Background nga Impormasyon

Doktrina ug mga Pakigsaad 97:3. Si Parley P. Pratt ug ang eskwelahan sa Zion

Si Elder Parley P. Pratt mihulagway sa eskwelahan sa mga elder sa Zion ug sa iyang mga pagpaningkamot atol sa ting-init sa 1833:

“Kini nga klase, nga adunay mga saysenta ang gidaghanon, mag-abut alang sa instruksyon kausa matag semana. Ang dapit nga mitinganan anaa sa gawas, ilawom sa tag-as nga mga kahoy, sa usa ka hilit nga dapit sa kamingawan, diin kami nag-ampo, nagsangyaw ug nanagna, ug nagbansay sa among mga kaugalingon diha sa mga gasa sa Balaang Espiritu. Dagkong mga panalangin ang gibu-bu dinhi, ug daghang mahinungdanon ug kahibulongan nga mga butang ang gipakita ug gitudlo. Ang Ginoo mihatag kanako og dako nga kaalam, ug nagtugot kanako sa pagtudlo ug paglig-on sa mga Elder, ug sa paghupay ug pagdasig kanila sa ilang mga pagpangandam alang sa mahinungdanong buhat nga nagpaabut kanamo. Ako usab nabayaw ug nalig-on og maayo. Kinahanglan kong molakaw aron makatambong niini nga eskwelahan, ug usahay gani magtiniil, og mga napulo ka kilometro. Kini akong gibuhat kausa matag semana, gawas sa pagbisita ug sa pagsangyaw diha sa lima o unom ka mga branch matag semana” (Autobiography of Parley P. Pratt, ed. Parley P. Pratt Jr. [1938], 93–94; tan-awa usab sa Doctrine and Covenants Student Manual, 2nd ed. [manwal sa estudyante sa Church Education System, 2001], 228).

Kadtong miapil sa eskwelahan sa mga elder nagtuon sa mga kasulatan, doktrina, ug mga subject sama sa English grammar, ubang mga pinulongan, kasaysayan, literatura, pilosopiya, arithmetic, ug sa pagsulat.

Doktrina ug mga Pakigsaad 97:13–14. Ang templo “usa ka dapit alang sa panudlo”

Si Elder John A. Widtsoe sa Korum sa Napulog Duha ka mga Apostoles miingon:

“Ang buluhaton sa templo … naghatag og nindot kaayong oportunidad nga magpabiling abtik ang atong espirituhanong kahibalo ug kalig-on. … Ang gamhanang panan-awon sa kahangturan gipakita sa atong atubangan diha sa balaang mga templo; atong makita ang panahon gikan sa walay utlanan nga sinugdanan ngadto sa walay pagtapos nga katapusan; ug ang pagsaksi sa representasyon sa walay katapusan nga kinabuhi gibukhad diha sa atong atubangan. Niana mas klaro nakong makita ang akong dapit taliwala sa mga butang sa kalibutan, ang akong dapit taliwala sa mga katuyoan sa Dios; mas mapahimutang nako og maayo ang akong kaugalingon diin ako nahisakop, ug mas makahimo ako sa paghatag og bili ug sa pagtimbang-timbang, sa pagbulag ug sa paghan-ay sa yano, ordinaryong mga katungdanan sa akong kinabuhi, aron ang gagmay nga mga butang dili molupig o mokuha sa akong panan-awon sa mas dagkong mga butang nga gihatag sa Dios kanato” (sa Conference Report, Abr. 1922, 97–98; tan-awa usab sa Doctrine and Covenants Student Manual, 2nd ed. [manwal sa estudyante sa Church Educational System, 2001], 229).

Doktrina ug mga Pakigsaad 97:15–16. Katakus sa pagsulod sa templo

Aron makatambong sa templo, ang usa ka miyembro sa Simbahan kinahanglang makabaton og rekomend sa templo. Si Presidente Dieter F. Uchtdorf sa Unang Kapangulohan mitudlo:

“Ang matag miyembro nga buot mosulod sa templo, walay pagsapayan sa edad, kinahanglan nga mangandam niining sagrado nga kasinatian. May ipangutana ang inyong bishop, ug stake president, nga naghupot sa mga yawe sa katungod sa priesthood ug mga maghuhukom sa Simbahan. Kining mahinungdanon nga mga pangutana naglakip sa: Matinuoron ka ba? Limpyo ka ba og dungog? Nagsunod ka ba sa Pulong sa Kaalam? Nagsunod ka ba sa balaod sa ikapulo? Ug nagsuporta ka ba sa may mga awtoridad sa Simbahan? Ang mga tubag niining mahinungdanong mga pangutana magpadayag sa inyong kinaiya ug mga binuhatan.

“… Ang mga sumbanan nga gihatag sa Ginoo diha sa mga pangutana sa rekomend sa templo susama gayud sa mga sumbanan nga makita sa Alang sa Kalig-on sa mga Kabatan-onan” (“Tan-awa ang Katapusan gikan sa Sinugdanan,” Liahona, Mayo 2006, 44).