Sa Agosto 1830, si Newel Knight ug ang iyang asawa, si Sally, mibiyahe ngadto sa Harmony, Pennsylvania, aron sa pagbisita ni Propeta Joseph Smith. Si Sally Knight ug Emma Smith nabunyagan nianang ting-init apan wala pa nakumpirmahan tungod sa pagpanggukod sa panon sa mga manggugubot. Panahon sa pagbisita sa mga Knights sa Harmony, nahukman nga si Sally ug Emma kinahanglang makumpirmahan ug nga ang grupo, uban ni John Whitmer, dungan nga moambit sa sakrament. Sa dihang migawas si Joseph aron mokuha og bino alang sa sakrament, gisugat siya sa usa ka langitnong mensahero kinsa mihatag sa pinadayag nga narekord karon sa Doktrina ug mga Pakigsaad 27.
Ang Ginoo mihatag og mga instruksyon kalabut sa mga simbolo sa sakrament
Kon anaa, pagpakita og mga panit sa patatas ug hangyoa ang mga estudyante sa pagtag-an kon unsa ang espirituhanong katuyoan nga mahimo kini nga magamit. Human sa pipila ka mga tubag, dapita ang usa ka estudyante sa pagbasa sa mosunod nga pamahayag gikan sa panumduman ni Presidente Ezra Taft Benson sa iyang pagbisita sa nagun-ob nga Europa human sa Ikaduhang Gubat sa Kalibutan:
Imahe
Presidente Ezra Taft Benson
“Dili nako makalimtan ang mga Santos nga French kinsa, tungod kay wala makaangkon og tinapay, migamit sa mga panit sa patatas isip mga simbolo sa sakrament” (“Prepare for the Days of Tribulation,” Ensign, Nob. 1980, 33–34).
Unsa ang imong mahunahuna kon makakita ka sa mga panit sa patatas nga gigamit alang sa sakrament?
Ngano kaha nga mahimo ra nga ang mga Santos nga French mogamit og laing butang imbis nga pan isip mga simbolo sa sakrament?
Aron ang mga estudyante mahatagan sa kasaysayan nga konteksto sa pinadayag nga narekord sa Doktrina ug mga Pakigsaad 27, i-summarize ang impormasyon nga gihatag sa pasiuna sa leksyon. Dapita ang usa ka estudyante sa pagbasa og kusog sa Doktrina ug mga Pakigsaad 27:1–2. Hangyoa ang klase sa pagsunod, nga mangita kon unsay gisulti sa anghel ngadto ni Joseph Smith mahitungod sa mga simbolo sa sakrament.
Unsa ang gitudlo sa sinugo ngadto ni Joseph Smith mahitungod sa unsay angay natong kaonon ug imnon sa atong pag-ambit sa sakrament? (Unsay atong gigamit isip mga simbolo sa sakrament dili sama ka importante sa unsay gitabang niadto nga mga simbolo nga atong hinumduman.)
Sumala niini nga mga bersikulo, unsa ang angay natong tutukan samtang moambit kita sa sacrament? (Ang mga estudyante mahimong mogamit og lain-laing mga pulong, apan ang ilang mga tubag kinahanglang maghulagway sa mosunod nga baruganan: Sa atong pag-ambit sa sakrament, kinahanglan natong hinumduman ang maulaong sakripisyo ni Jesukristo. Mahimo nimong isugyot nga markahan sa mga estudyante kini nga kamatuoran diha sa Doktrina ug mga Pakigsaad 27:2. Isip kabahin sa diskusyon, tingali kinahanglan nimong ipasabut nga kita adunay “bug-os nga tinguha ngadto sa … himaya [sa Ginoo]” kon nakatutok kita Kaniya ug gipahiuyon ang atong kabubut-on sa Iyaha.)
Aron matabangan ang mga estudyante nga mobati sa kaimportante niining kamatuoran ug ikonsiderar kon sa unsang paagi kini magamit sa ilang kinabuhi, hisguti ang mosunod nga mga pangutana:
Unsa ang inyong nasinati sa dihang namalandong kamo sa maulaong sakripisyo sa Manluluwas panahon sa pagpahigayon sa sakrament?
Unsay atong mabuhat aron mapalambo ang atong abilidad sa paghinumdom sa sakripisyo ni Jesukristo ug sa pag-ambit sa sakrament “uban sa bug-os nga tinguha ngadto sa [Iyang] himaya”?
Dapita ang mga estudyante sa pagsulat sa ilang mga class notebook o mga scripture study journal kon unsay ilang buhaton aron mangandam sa pag-ambit sa sakrament matag semana. Awhaga sila sa pagkonsiderar og mga paagi sa paghinumdom ni Jesukristo ug sa kahulugan luyo sa mga simbolo sa sakrament. Mahimo nimong dapiton ang pipila kanila sa pagpaambit sa unsay ilang gisulat.
I-summarize ang Doktrina ug mga Pakigsaad 27:3–4 pinaagi sa pagpasabut nga ang Ginoo mipasidaan ni Joseph Smith nga dili mopalit og bino o isug nga ilimnon (bisan unsang ilimnon nga makahubog) gikan sa mga kaaway sa Simbahan aron gamiton sa sakrament. Kinahanglang mogamit lamang sila og bino nga “gihimo nga bag-o” sa mga Santos. Mahimong makatabang nga masayud ang imong mga estudyante nga moabut pa og duha ka tuig ug tunga una mapadayag ang Pulong sa Kaalam (tan-awa sa D&P 89) ug nga sa Simbahan karon naggamit kita og tubig alang sa sakrament.
Ang Ginoo moambit pag-usab sa sakrament dinhi sa yuta
Hangyoa ang mga estudyante sa pagpamalandong kon sa unsang paagi ang ilang kasinatian sa pag-ambit sa sakrament mausab kon sila nag-ambit niini diha sa presensya sa Manluluwas. Dapita ang pipila ka mga estudyante sa pagpaambit sa ilang mga kasinatian.
Pahinumdumi ang mga estudyante nga ang Manluluwas mipaila sa ordinansa sa sakrament ngadto sa Iyang mga Apostoles sa Katapusang Panihapon. Niini nga okasyon, si Jesukristo nanagna sa panahon nga Siya mobalik dinhi sa yuta ug moambit pag-usab sa sakrament uban sa Iyang mga disipulo (tan-awa sa Mateo 26:26–29).
Ipasabut nga sa Doktrina ug mga Pakigsaad 27:5–12, ang Ginoo piho nga mihingalan sa pipila ka mga indibidwal kinsa motambong niini nga miting. Dapita ang mga estudyante sa pagbasa niini nga mga bersikulo ug ilhon kon (1) kinsa kini nga mga indibidwal ug (2) kon gihisgutan, unsa ang ilang mga yawe o mga responsiblidad. Dapita ang usa ka estudyante sa pagsulat niini nga impormasyon diha sa pisara samtang ang tibuok klase mo-report sa unsay ilang nakit-an. (Mahimo nimong ipasabut nga sa tibuok kasaysayan sa kalibutan ang Ginoo mihatag sa awtoridad sa priesthood ngadto sa matarung nga mga tawo aron motabang sa pagdumala sa Iyang ebanghelyo. Gihatagan usab Niya og mga yawe sa priesthood ang mga lider sa priesthood aron makagiya, makakontrolar, ug makadumala sila sa paggamit sa Iyang priesthood dinhi sa yuta.)
Kon makompleto na ang lista, dapita ang usa ka estudyante sa pagbasa og kusog sa Doktrina ug mga Pakigsaad 27:12–13. Hangyoa ang klase sa pagsunod ug ilhon ang mga yawe nga gihatag sa Ginoo ngadto ni Propeta Joseph Smith.
Unsa man nga mga yawe ang gisalig, o gihatag, sa Ginoo ngadto ni Propeta Joseph Smith? (Dapita ang usa ka estudyante sa pagdugang sa Joseph Smith ug mga yawe sa gingharian sa Ginoo sa lista diha sa pisara.)
Ipasabut nga daghan sa mga propeta kansang mga ngalan makita diha sa Doktrina ug mga Pakigsaad 27 mibisita ni Joseph Smith aron sa pagtugyan og mga yawe kaniya.
Mahimo nimong isugyot nga markahan sa mga estudyante ang mga pulong nga “dispensasyon [kapaigoan] sa ebanghelyo alang sa katapusan nga mga panahon; ug alang sa kahingpitan sa mga panahon” sa Doktrina ug mga Pakigsaad 27:13.
Sumala niini nga bersikulo, unsa ang giingon sa Ginoo nga Iyang buhaton atol sa dispensasyon sa kahingpitan sa panahon? (“Mopundok ngadto sa usa sa tanan nga mga butang.”)
Isulat ang mosunod nga doktrina diha sa pisara ubos sa lista: Ang dispensasyon sa kahingpitan sa panahon nagpundok sa tanang mga yawe, mga ordinansa, ug mga kamatuoran sa ebanghelyo sa nangaging mga dispensasyon.
Ipasabut nga ang usa ka dispensasyon mao ang “usa ka yugto sa panahon diin ang Ginoo adunay usa ka sulugoon nga gitugyanan dinhi sa yuta nga naghupot sa mga yawe sa balaan nga pagkapari [priesthood] … ug kinsa adunay balaang sugo sa pagsangyaw sa ebanghelyo ug sa pagpahigayon sa mga ordinansa niini” (Giya ngadto sa mga Kasulatan, “Kapaigoan”) ug sa pagpahigayon sa mga ordinansa niini. Kon ang Ginoo mag-organisar og usa ka dispensasyon, “ang ebanghelyo ipadayag pag-usab aron nga ang mga katawhan niana nga [dispensasyon] dili magsalig sa nangagi nga mga [dispensasyon] alang sa kasayuran sa laraw sa kaluwasan” (Giya ngadto sa mga Kasulatan, “Kapaigoan”). Si Adan, Enoch, Noe, Moises, ug uban pa maoy mga pangulo sa mga dispensasyon sa ebanghelyo. Si Joseph Smith mao ang pangulo sa dispensasyon nga atong gipuy-an—ang dispensasyon sa kahingpitan sa panahon. Kini nga katapusang dispensasyon gisugdan sa Pagpahiuli sa ebanghelyo pinaagi ni Propeta Joseph Smith. Gitawag kini og dispensasyon sa kahingpitan sa panahon tungod kay ang tanang yawe nga gipadayag sa Ginoo sa pagpanalangin sa Iyang mga anak gipahiuli na ug ang tanang plano ug katuyoan sa Ginoo sukad sa sinugdanan sa kalibutan sa tanan matuman.
Dapita ang usa ka estudyante sa pagbasa og kusog sa Doktrina ug mga Pakigsaad 27:14. Hangyoa ang klase sa pagsunod ug pag-ila kinsa pa ang maanaa sa sakrament miting nga gihulagway niini nga seksyon.
Kinsa kaha ang gipasabut sa mga pulong nga “tanan kinsa ang akong amahan mihatag kanako pinaagi sa kalibutan”?
Dapita ang usa ka estudyante sa pagbasa sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles:
Imahe
Elder Bruce R. McConkie
“Ang matag matinud-anon nga tawo sa tibuok kasaysayan sa kalibutan, matag tawo nga nagpakabuhi nga takus sa kinabuhing dayon sa gingharian sa Amahan motambong ug moambit, uban sa Ginoo, sa sakrament” (The Promised Messiah: The First Coming of Christ [1978], 595).
Idugang ang ikaw ug ako diha sa lista sa pisara.
Sumala ni Elder McConkie, sa unsang paagi kita magpakabuhi aron makatambong niining espesyal nga sakrament miting?
Ang Ginoo misugo sa Iyang katawhan sa pagsul-ob sa tibuok nga hinagiban sa Dios
Ipasabut nga ang Doktrina ug mga Pakigsaad 27:15–18 naglangkob og tambag nga makatabang kanato nga mahimong takus alang sa mga panalangin sa Ginoo, lakip ang panalangin sa pagtambong sa sakrament miting nga gihisgutan diha sa mga bersikulo 4–14.
Pangutan-a ang mga estudyante kon unsay gusto nilang isul-ob kon nasayud sila nga padulong sila sa gubat. Dayon dapita ang usa ka estudyante sa pagbasa og kusog sa Doktrina ug mga Pakigsaad 27:15. Hangyoa ang klase sa pagsunod ug sa pagpangita (1) unsa ang gisugo kanato sa Ginoo nga buhaton aron sa pagpangandam alang sa espirituhanong pakiggubat ug (2) unsa nga panalangin ang Iyang gisaad kanato kon mosunod kita sa Iyang direksyon.
Unsa ang gitambag sa Ginoo nga atong buhaton aron maandam alang sa espirituhanong mga gubat? (I-summarize ang mga tubag sa mga estudyante pinaagi sa pagsulat sa mosunod diha sa pisara: Kon atong isul-ob ang tibuok hinagiban sa Dios …)
Unsa nga panalangin ang gisaad sa Ginoo niadtong mosul-ob sa tibuok hinagiban sa Dios? (Samtang motubag ang mga estudyante, kompletuha ang baruganan sa pisara: Kon atong isul-ob ang tibuok hinagiban sa Dios, makahimo kita sa pagbuntog sa dautan.
Imahe
person in armor
Kopyaha ang kauban nga ilustrasyon diha sa pisara, nga dunay mga linya nga gidrowing padulong sa matag piraso sa hinagiban nga gihisgutan sa Doktrina ug mga Pakigsaad 27:15–18. Bahina ang klase ngadto sa gagmay nga mga grupo, ug pag-assign sa matag grupo og usa sa mga piraso sa hinagiban. Hatagi ang matag grupo og kopya sa mosunod nga pamahayag ni Presidente Harold B. Lee ug sa impormasyon ug mga pangutana sa mosunod nga seksyon kalabut sa gi-assign kanila nga piraso sa hinagiban. Dapita ang mga estudyante sa pagtrabaho sulod sa ilang mga grupo sa pagtubag sa mga pangutana alang sa gi-assign kanila nga piraso sa hinagiban ug mangandam sa pagpaambit sa ilang mga tubag diha sa klase.
Imahe
President Harold B. Lee
“Naangkon nato ang upat ka bahin sa lawas nga giingon ni Apostol Pablo nga [mga] pinakatumong nga bahin sa mga pwersa sa kangitngit. Ang mga bat-ang [hawak], nagsimbolo sa hiyas, kaputli. Ang kasingkasing, nga nagsimbolo sa atong kinaiya. Atong mga tiil, atong mga tumong o katuyoan sa kinabuhi ug sa katapusan ang atong ulo, atong mga hunahuna” (Harold B. Lee, Feet Shod with the Preparation of the Gospel of Peace, Brigham Young University Speeches of the Year [Nob. 9, 1954], 2).
“Bat-ang [nga] gibaksan uban sa kamatuoran” (tan-awa sa D&P 27:15–16):
Miingon si Presidente Lee, “Ang bat-ang mao kanang parte sa lawas taliwala sa gusok ug hita diin inyong mailhan ang mahinungdanong mga organ nga may kalabutan sa pagpasanay” (Feet Shod, 2). Ang pagbakus nagpasabut sa hugot nga pagkahigut sa usa ka bakus.
Ngano kaha nga si Satanas moataki sa atong kalunsay, hiyas, ug kaputli?
Sa unsang paagi kaha ang pagkasayud sa sumbanan sa Dios sa moralidad makatabang kanato nga magpabiling lunsay, mahiyason, ug putli?
Ang mga tabang sa pagtuon sa kasulatan mobakus kanato sa kamatuoran ug nagtabang sa pagpanalipod sa hiyas ug kaputli.
Sumala ni Presidente Lee, unsa ang gipanalipdan sa taming sa pagkamatarung [breastplate]?
Sa unsang paagi kaha ang pagkamatarung sa atong mga kasingkasing (atong mga lihok ug mga tinguha) moimpluwensya sa atong abilidad sa pakig-away sa atong espirituhanong mga away?
“Mga tiil hinapinan uban sa pagpangandam sa ebanghelyo sa kalinaw” (D&P 27:16):
Ang “hinapinan” ninyo nga tiil nagpasabut nga nagsul-ob og sapatos o proteksyon sa inyong mga tiil.
Sumala ni Presidente Lee, unsa ang girepresentar sa atong mga tiil?
Sa unsang paagi nga si Satanas moataki sa atong mga tumong ug mga katuyoan sa kinabuhi?
Unsa ang nahatag sa Dios ngari kanato nga “gunitan” aron sa pagtabang kanato nga magpadayon ang atong mga tiil sa pagsubay sa dalan sa kinabuhi paingon sa atong mga tumong? (Tan-awa sa 1 Nephi 8:24.)
Sa unsang paagi ang pagtutok sa matarung nga mga tumong ug katuyoan makatabang kanato sa pagbuntog sa tintasyon?
Sa unsang paagi nga ang Espiritu makatabang kanato sa pagbuntog sa mga pagpang-ataki ni Satanas?
Unsay binhata nga mahatag kon ang Espiritu anaa kanato diha sa atong pagkig-away batok sa dautan?
Sa unsang paagi nga ang pulong sa Dios makatabang kanato sa paggamit sa espada sa Espiritu?
Unsay inyong mabuhat aron mas madapit pa ang Espiritu diha sa inyong kinabuhi?
Human mareport sa mga estudyante ang ilang mga tubag, basaha ang mosunod nga pamahayag ni Elder M. Russell Ballard sa Korum sa Napulog Duha ka mga Apostoles, ug hangyoa ang mga estudyante sa pagpaminaw kon unsaon nato pagsul-ob ug paglig-on sa taming sa Dios:
Imahe
Elder M. Russell Ballard
“Gusto nakong hunahunaon nga kini nga espirituhanong hinagiban dili usa ka tibuok nga piraso sa metal nga gihulma aron mohaum sa lawas apan mas sama sa usa ka ginagmayng kinadena nga puthaw. Ang usa ka kinadena nga puthaw naglangkob og mga puthaw nga gitapot aron ang mogamit niini sayon rang makalihok nga dili mawad-an sa panalipod. Makaingon ko niana tungod kay kasinatian na nako kini nga wala kitay dako ug mahinungdanong butang nga mahimo aron maarmasan ang atong kaugalingon sa espirituhanong paagi. Ang tinuod nga espirituhanong gahum nag-agad sa daghang ginagmay nga lihok nga gisapid pinaagi sa hilo sa espirituhanong pagpalig-on nga mopanalipod ug mosagang sa tanang dautan” (“Be Strong in the Lord,” Ensign, Hulyo 2004, 8).
Unsa ang pipila ka gagmayng buhat nga, inubanan sa kalig-on niini, makatabang kanato nga mapanalipdan batok sa tintasyon ug dautan?
Dapita ang mga estudyante sa pagtan-aw og balik sa pangbukas nga mga linya sa Doktrina ug mga Pakigsaad 27:15. Dayon ipangutana ang mosunod:
Unsa nga kinaiya ang angay natong batunan kon kita mosul-ob sa taming sa Dios? (Kinahanglan atong “ipataas ang [atong] mga kasingkasing ug magmaya.”) Nganong kinahanglang magbaton kita niini nga kinaiya?
Hangyoa ang mga estudyante sa pagkonsiderar kon unsay ilang nakat-unan sa leksyon karon, ug dapita sila sa pagpili og usa ka piho nga butang nga ilang mahimo aron mas maayong masul-ob ang hinagiban sa Dios. Awhaga sila sa pagsulat kon unsay ilang buhaton diha sa usa ka piraso nga papel nga kanunay nilang matan-aw isip usa ka pahinumdom sa ilang pasalig.
Sa pagtapos niini nga leksyon, hangyoa ang pipila ka estudyante nga mopakigbahin sa ilang mga pagpamatuod sa mga kamatuoran nga gitudlo niini nga leksyon.
Komentaryo ug Background nga Impormasyon
Doktrina ug mga Pakigsaad 27:2. “Dili igsapayan unsa ang imong kan-on o unsa ang imong imnon kon ikaw moambit sa sakrament”
Si Presidente Joseph Fielding Smith mipasabut nganong gihatag ang pinadayag sa Doktrina ug mga Pakigsaad 27:2 ug unsay gipasabut niini:
Imahe
President Joseph Fielding Smith
“[Usa ka] langitnong mensahero misulti kang Joseph Smith nga dili mahinungdanon kon unsay gamiton sa Sakrament, ug kinahanglang dili siya mopalit og bino o isug nga ilimnon gikan sa iyang mga kaaway. Ang rason niini klaro kaayo, tungod kay ang Propeta adunay daghang mga kaaway. Hinoon, kini nga rason sobra pa kay sa pagpanalipod lamang batok sa iyang mga kaaway, kay usa kini ka pasidaan batok sa mga dautan ug maliputong mga tawo kinsa buot mohugaw niini nga mga butang. (Tan-awa ang Pulong sa Kaalam sa, Sek. 89.) Gisultihan usab si Joseph Smith nga kinahanglang dili mogamit og bino alang sa Sakrament gawas kon kini hinimo sa mga Santos, ug kinahanglang bag-o diha kanila. Samtang ang Simbahan wala mosagup sa pamaagi nga mogamit lamang og tubig diha sa Sakrament nianang unang panahon, apan gikan niini nga panahon nga ang tubig gigamit isip puli sa bino, nga labing gigamit niadto tungod sa pagkaagid-agid niini sa dugo. Karon sa tibuok Simbahan tubig ang gamiton diha sa Sakrament agi og handumanan sa dugo ni Jesukristo nga gipaagas alang sa kapasayloan sa mga sala alang sa tanan nga maghinulsol ug modawat sa Ebanghelyo” (Church History and Modern Revelation, 2 vols. [1953], 1:132; tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 55).
Si President Russell M. Nelson sa Korum sa Napulog Duha ka mga Apostoles mihulagway kon unsaon nato sa pagpalambo og bug-os nga tinguha ngadto sa himaya sa Dios:
Imahe
President Russell M. Nelson
“Paghunahuna, kon buot nimo, og usa ka parisan sa gamhanang teleskopyo. Duha ka magkabulag nga sistema nga optikal gihiusa gamit ang usa ka himan aron matutok ang duha ka managlahi nga mga imahe ngadto sa usa ka tulo-ka-dimensyon nga panan-aw. Sa paggamit niini nga analohiya, himoa nga ang talan-awon sa wala nga bahin sa inyong teleskopyo nagrepresentar sa inyong panglantaw sa inyong buluhaton. Himoa nga ang imahe sa tuo nga bahin nagrepresentar sa panglantaw sa Ginoo sa inyong buluhaton—ang bahin sa Iyang plano nga Iyang gisalig kaninyo. Karon, ikonektar ang inyong sistema ngadto Kaniya. Pinaagi sa mental nga pagpaangay, ipahaum ang inyong panglantaw sa Iyang panglantaw. Usa ka talagsaong butang mahitabo. Ang inyong panglantaw ug ang Iyaha managsama na karon. Nakapalambo na kamo og ‘bug-os nga tinguha ngadto sa himaya sa Dios’ (D&P 4:5tan-awa usab sa Mormon 8:15“With God Nothing Shall Be Impossible,” Ensign, Mayo 1988, 34).