Mga Organisasyon ug mga Programa sa Simbahan

Pasiuna

Samtang nagpadayon ang Simbahan sa paglambo, ang Ginoo midasig sa mga lider ug mga miyembro sa Simbahan sa pag-implementar og mga organisasyon ug mga programa sulod sa Simbahan aron mapanalanginan ang mga Santos. Sa dihang ang pipila niining mga organisasyon ug mga programa unang naestablisar, wala kaayo kini kinahanglana, apan samtang mitubo ang Simbahan nahimo kining mahinungdanon sa buhat sa Ginoo alang sa kaluwasan sa Iyang mga anak.

Mga Sugyot alang sa Pagtudlo

Ang mga organisasyon ug mga programa sa Simbahan nakatabang kanato sa pagpangandam ug pag-uswag paingon sa kinabuhing dayon

Sugdi ang klase pinaagi sa paghangyo sa mga estudyante sa paghunahuna nga ang usa ka higala dili gustong moadto sa iyang mga miting ug sa mga kalihokan sa Young Women. Nag-ingon siya nga dili kini kaayo makalingaw ug mag-usik lang kini sa iyang panahon.

Human nimo mapresentar kining ehemplo, hangyoa ang mga estudyante sa pagkonsiderar og hilum kon unsa kaha ang ilang isulti aron matabangan kining higala nga masabtan ang katuyoan sa iyang mga miting ug mga kalihokan sa Young Women.

Unsa may inyong isulti nga katuyoan sa mga organisasyon sa Young Men ug Young Women?
Sa unsang paagi nga ang pagkahibalo sa katuyoan sa usa ka organisasyon makatabang niadtong kinsa kabahin niini?

Dapita ang mga estudyante sa pagbasa og hilum sa Moises 1:39, nga mangita sa katuyoan sa Langitnong Amahan sa tanan nga Iyang gibuhat. Dapita ang mga estudyante sa pag-report kon unsay ilang makit-an. Mahimong kinahanglan nimong pahinumduman ang mga estudyante nga ang pagka-imortal nagpasabut sa pagkabuhi sa kahangturan diha sa nabanhaw nga kahimtang. Pinaagi sa Pag-ula ni Jesukristo, ang tanang mga tawo mabanhaw, walay bali sa ilang kadautan o kamatarung niining kinabuhi. Ang kinabuhing dayon nagpasabut sa pagkabuhi hangtud sa kahangturan isip mga pamilya diha sa presensya sa Dios ug mahimong sama Kaniya. Sama sa pagka-imortal, ang kinabuhing dayon nahimong posible pinaagi sa Pag-ula ni Jesukristo. Hinoon, nagkinahanglan kini sa atong “pagsunod sa mga balaod ug mga ordinansa sa Ebanghelyo” (Mga Artikulo sa Hugot nga Pagtuo 1:3).

Kon ang katuyoan sa Langitnong Amahan mao ang pagpahinabo sa pagka-imortal ug kinabuhing dayon sa Iyang mga anak, unsa ang katuyoan sa Simbahan?

Human makatubag ang mga estudyante, isulat ang mosunod nga kamatuoran diha sa pisara: Ang Simbahan ni Jesukristo sa mga Santos sa Ulahing mga Adlaw nagtabang sa Langitnong Amahan sa pagpahinabo sa kinabuhing dayon sa Iyang mga anak. Dayon ipangutana:

Unsay pipila ka mga paagi nga ang Simbahan nagtabang sa pagpahinabo sa pagka-imortal ug sa kinabuhing dayon sa mga anak sa Langitnong Amahan?

Ipasabut nga ang Simbahan adunay pipila ka organisasyon—gitawag og mga auxiliary sa priesthood—ug ubang mga programa nga makatabang kanato sa pag-uswag ngadto sa kinabuhing dayon. Dapita ang kada estudyante sa paghingalan og pipila niini. (Ang mga tubag mahimong maglakip sa Relief Society, Young Men, Young Women, Primary, ug Sunday School ug mga programa sama sa family home evening ug Seminaries and Institutes of Religion.)

Aron matabangan ang mga estudyante nga masabtan kon sa unsang paagi nga ang mga organisasyon ug mga programa sa Simbahan makatabang kanato sa pagkat-on ug pag-uswag diha sa ebanghelyo aron nga kita makadawat sa kinabuhing dayon, dapita ang usa ka estudyante sa pagbasa og kusog sa mosunod nga pamahayag ni Presidente Boyd K. Packer sa Korum sa Napulog Duha ka mga Apostoles. Ipasabut nga kining pamahayag mahitungod sa mga programa sa seminary ug institute, apan ang baruganan nga gitudlo niini mahimo usab nga magamit ngadto sa ubang auxiliary ug mga programa sa Simbahan.

Imahe
President Boyd K. Packer

“Kini nga mga programa gisugdan sa dihang kini maanindot apan wala kaayo kinahanglana. Gitugutan kini og usa ka panahon sa paglambo ug pagtubo ngadto sa usa ka panalipod alang sa Simbahan. Kini karon nahimong usa ka panalangin alang sa kaluwasan sa modernong Israel sa labing mahagiton nga takna” (“Teach the Scriptures” [pakigpulong ngadto sa mga CES religious educator, Okt. 14, 1977], 3, LDS.org).

Sa unsang paagi nga ang seminary nakatabang kaninyo nga maandam sa pipila ka mga hagit sa kinabuhi?

Ipasabut nga ang Ginoo nagdasig og daghang mga programa ug mga organisasyon diha sa Simbahan aron sa pag-andam kanato alang sa mga hagit sa kinabuhi ug sa pagtabang kanato nga mouswag ngadto sa kinabuhing dayon. Aron matabangan ang mga estudyante nga mahisgutan ang tabang nga ilang madawat gikan sa pipila ka mga organisasyon ug mga programa sa Simbahan, bahina ang klase sa unom ka mga grupo. Hatagi ang matag grupo og kopya sa mosunod nga mga pangutana (o isulat kini sa pisara) ug usa sa mosunod nga makasaysayong mga summary. Hangyoa ang mga estudyante sa pagtuon sa mga summary sa ilang mga grupo ug mangandam sa pagtubag sa mga pangutana.

Sa unsang paagi nagsugod kining organisasyon o programa?

Sa unsa kaha nga paagi nga makaandam kini kanato sa pag-atubang sa mga pagsulay ug mga hagit sa atong panahon?

Sa unsa kaha nga paagi nga makatabang kini kanato nga mouswag ngadto sa kinabuhing dayon?

Sunday School

Niadtong 1849 usa ka miyembro sa Simbahan nga ginganlan og Richard Ballantyne mibati nga ang mga bata nagkinahanglan og dapit nga makakat-on sa ebanghelyo panahon sa adlaw nga Igpapahulay. Ang mga Santos sa Great Britain nagpahigayon na og mga klase sa Sunday School, ug gisugdan ni Brother Ballantyne ang unang klase sa Sunday School sa Utah sa iyang ward sa Siyudad sa Salt Lake niadtong Disyembre 1849. Sa wala madugay human niana, ang ubang mga ward nagsugod sa paghimo sa samang buhat, matag usa naggamit sa kaugalingon niining kurikulum. Niadtong 1867, giporma sa mga lider sa Simbahan ang Deseret Sunday School Union, nga nag-awhag nga magkaparehas ang kurikulum. Pag-abot sa 1870, kapin sa 200 ka mga klase sa Sunday School ang naporma. Karon, ang mga ward ug mga branch adunay daghang klase sa Sunday School.

Young Women

Si Presidente Brigham Young nakigmiting uban sa iyang mga anak nga babaye sa iyang panimalay niadtong Nobyembre 28, 1869, ug mihangyo kanila nga mahimong mga lider aron matabangan ang ilang mga kaedad nga makabaton og mga pagpamatuod sa ebanghelyo, mahimong ligdong sa ilang mga sinina ug sa ilang mga buhat, ug maglikay sa mga uso ug mga pamatasan sa kalibutan. Niadtong 1870 pormal nga giorganisar ang mga batan-ong babaye sa pagdasig niining mga tumong. Kini nga organisasyon sa katapusan nahimong inila isip Young Women’s Mutual Improvement Association (YWMIA), nga sa wala madugay giusab ngadto sa Young Women. Sa sayo nga bahin sa 1970, gipaila sa mga lider ang programa sa Personal nga Kauswagan. Niadtong 1985 ilang gipaila ang mga mithi ug tema sa Young Women.

Young Men

Ang Young Men’s Mutual Improvement Association (YMMIA) giorganisar niadtong Hunyo 10, 1875, ubos sa direksyon ni Presidente Brigham Young. Kini nga organisasyon gituyo aron sa pagtabang sa mga batan-ong lalaki nga molambo sa espirituhanon ug makinaadmanon nga paagi ingon man makahatag kanila og makalingaw nga mga kalihokan. Niadtong 1913, ang Simbahan nakigtambayayong sa Boys Scouts of America sa Estados Unidos. Sa tibuok kalibutan, mga pakigtambayayong sa ubang mga programa sa Scouting naporma kon asa kini nahimong posible. Mi-evolve usab ang ngalan sa organisasyon, una giusab ngadto sa Aaronic Priesthood–MIA, dayon Aaronic Priesthood, ug dayon Young Men. Niadtong 2001, ang mga lider sa Simbahan mipaila sa programa sa Katungdanan ngadto sa Dios.

Primary

Niadtong 1877, si Aurelia Spencer Rogers “kusganong mibati nga kinahanglang adunay buhaton mahitungod sa kinaiya sa mga batang lalaki sa kasilinganan nga gawasnong magdagan-dagan bisan sa tibuok lungsod sa adlaw ug gabii. Mibati siya nga kadaghanan niining mga bataa wala matudloi sa sukaranang mga baruganan ug mga mithi [aron maandam sila] diha sa kahibalo o kinaiya nga mapadayon ang pagdala sa ebanghelyo, o gani aron mahimong maayong mga ginikanan o mga lumulupyo (“History of Primary,” lds.org/callings/primary/getting-started/history-of-primary). Nakigmiting siya ni Eliza R. Snow, kinsa nianang higayuna nagserbisyo isip ang kinatibuk-ang presidente sa Relief Society, ug nakakuha sila og pagtugot gikan ni Presidente John Taylor aron maorganisar ang Primary didto sa Farmington, Utah, ubos sa direksyon ni Bishop John Hess. Ang unang miting sa Primary, gipahigayon niadtong Agosto 25, 1878, nga gilangkuban sa 224 ka mga batang lalaki ug mga batang babaye. Niadtong 1880, ang kinatibuk-ang presidente sa Primay gitawag, ug ang mga klase sa primary gisugdan sa pag-organisar sa daghang mga ward.

Seminaries ug Institutes of Religion

Niadtong 1888 ang Simbahan miestablisar sa usa ka kinatibuk-ang Board og Education ug mga akademya sa Simbahan ug mimugna og mga klase sa relihiyon aron sa paghatag og espiritwal nga pundasyon alang sa sekular nga pagkat-on ug niadtong wala motambong sa mga akademya sa Simbahan. Niadtong 1912 si Joseph F. Merrill, usa ka propesor ug miyembro sa Simbahan, mitanyag og usa ka plano nga magtugot sa mga estudyante sa pangpubliko nga mga eskwelahan sa pagtambong og mga klase sa relihiyon isip kabahin sa ilang pag-eskwela. Gitawag kadto og seminary, ug ang unang mga klase gipahigayon duol sa Granite High School didto sa Siyudad sa Salt Lake, Utah, nga dunay 70 ka mga estudyante nga na-enrol. Sa pagkatap sa programa sa seminary, usa ka susamang programa ang giestablisar para sa mga kabatan-onan sa kolehiyo. Ginganlan kadto og Latter-day Saint Institute of Religion, ug ang mga klase sa institute gisugdan niadtong 1926 didto sa Moscow, Idaho. Sa sayo nga bahin niadtong mga 1950 ang programa sa early-morning seminary nasugdan didto sa California, ang programa sa home-study seminary nasugdan niadtong mga 1960, ug ang seminaries and institutes of religion nagpadayon sa pagkatap sa tibuok kalibutan.

Family Home Evening

Si Presidente Joseph F. Smith nagtudlo nga ang mga programa sa Simbahan kinahanglan “mahimo nga mga suplemento sa atong mga pagtudlo ug pagbansay diha sa panimalay. Walay usa ka bata sa usa ka gatus ang mahisalaag, kon ang kahimtang sa panimalay, ehemplo, ug pagbansay, nahiuyon sa kamatuoran sa Ebanghelyo ni Kristo” (“Worship in the Home,” Improvement Era, Dis. 1903, 138). Niadtong 1909 ang Granite Stake sa Siyudad sa Salt Lake, Utah, misugod sa sinemana nga programa sa gabii sa panimalay, nga giingon ni Presidente Smith nga dinasig. Niadtong 1915 ang Unang Kapangulohan mirekomendar nga ang binulan nga mga gabii sa panimalay buhaton sa tibuok Simbahan. Misaad ang Unang Kapangulohan nga: “Kon ang mga Santos mosunod niini nga tambag, [sa paghimo og mga gabii sa panimalay], isaad namo nga dakong panalangin ang moresulta. Paghigugmaay diha sa panimalay ug pagkamasulundon ngadto sa mga ginikanan modugang. Hugot nga pagtuo mahimo nga mapalambo sa mga kasingkasing sa kabatan-onan sa Israel, ug makabaton sila og gahum sa pagpakigbatok sa dautan nga mga impluwensya ug mga tintasyon nga nagsamok kanila” (sa James R. Clark, comp., Messages of the First Presidency of The Church of Jesus Christ of Latter-day Saints, 6 vols. [1965–75], 4:339). Singkwenta ka tuig ang milabay, ang Simbahan mimantala og mga manwal para magamit sa mga pamilya sa sinemana nga pagtudlo sa ebanghelyo. Niadtong 1970 ang mga lider sa Simbahan migahin sa mga gabii sa Lunes alang sa family home evening ug mipahibalo nga walay laing mga kalihokan sa Simbahan ang ipahigayon niana nga gabii.

Human sa igong panahon, hangyoa ang mga estudyante sa matag grupo sa pag-summarize sa kasaysayan sa organisasyon o programa nga gi-assign ngadto nila ug ipasabut ang ilang mga tubag sa mga pangutana nga ilang nahisgutan.

Ipasabut nga matag usa sa organisasyon ug programa sa Simbahan independente nga naglihok kaniadto. Samtang nagkadako ang Simbahan niadtong mga tuig 1950, nakita sa mga lider sa Simbahan ang panginahanglan sa pagtimbang-timbang kon sa unsang paagi nga nakab-ot sa mga organisasyon sa Simbahan ang mga tumong sa Simbahan. Nakahukom sila nga hiusahon ug i-coordinate ang tanang organisasyon ug mga programa sa Simbahan diha sa administrasyon ug sa pagpili og kurikulum. Kini nga mga kausaban nakatabang sa mga organisasyon ug mga programa aron mas makab-ot ang komplikadong mga panginahanglan sa nagkadako nga Simbahan ug sa pagpalig-on sa pamilya. Ubos niining correlation nga paningkamot, ang tanang mga organisasyon sa Simbahan naglihok ubos sa direksyon sa mga lider sa priesthood, kinsa naggunit sa mga yawe sa pagdumala.

Dapita ang usa ka estudyante sa pagbasa og kusog sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles:

Imahe
Elder Bruce R. McConkie

“Ang correlation mao kana nga sistema sa administrasyon sa simbahan diin atong gikuha ang tanang programa sa Simbahan, gidala kini ngadto sa usa ka importante nga punto, hiusahon kini, ipadagan kini isip usa ka programa, ilambigit ang tanang mga miyembro sa Simbahan diha sa pagpadagan—ug buhaton ang tanan ubos sa direksyon sa priesthood” (Let Every Man Learn His Duty [booklet, 1976], 2).

Isulat ang mosunod nga baruganan diha sa pisara: Sa pag-apil nato sa mga organisasyon ug mga programa sa Simbahan, makadawat kita og mga panalangin nga anaa pinaagi niini. Dayon isulat ang mosunod nga mga pangutana diha sa pisara, ug dapita ang mga estudyante sa pagtubag niini diha sa ilang mga class notebook o mga scripture study journal.

Sa unsang paagi nga ang mga organisasyon ug mga programa sa Simbahan nakapanalangin sa inyong kinabuhi? Sa unsang paagi nga ang Katungdanan ngadto sa Dios o Personal nga Kauswagan nakapanalangin sa inyong kinabuhi?

Sa unsang paagi nga kamo mas makasalmot diha sa Young Men o sa Young Women? Sa Sunday School? Sa family home evening? Sa seminary?

Human sa igong panahon, dapita ang pipila ka mga estudyante nga ipakigbahin kon unsay ilang gisulat. Mahimo usab nimong ipakigbahin ang imong mga hunahuna mahitungod kon sa unsang paagi nga ang mga organisasyon sa Simbahan nakapanalangin sa imong kinabuhi ug nakatabang nimo ug sa imong pamilya nga mouswag ngadto sa kinabuhing dayon.

Komentaryo ug Background nga Impormasyon

Ang kaimportante sa seminary

Si Presidente Thomas S. Monson mihulagway sa kaimportante sa seminary:

Imahe
President Thomas S. Monson

“Gawas sa pagtambong og mga miting sa Dominggo ug mga kalihokan sa semana, kon makahigayon mo sa seminary, sa sayo sa buntag o human sa klase sa eskwelahan, pahimusli kana nga oportunidad. Daghan ninyo ang nagtambungan og seminary karon. Ang inyong makuha gikan sa mga kasinatian sa seminary mag-agad sa inyong kaandam nga matudloan. Unta magmapainubsanon kamo ug magtinguha sa pagkat-on. Mapasalamaton kaayo ko sa kahigayunan sa batan-on pa ko nga nakatambong og sayo sa buntag nga seminary, kay duna kini importanting bahin sa kalamboan sa akong pagpamatuod. Ang seminary makausab sa kinabuhi” (“Motuo, Mosunod, ug Molahutay,” Liahona, Mayo 2012, 128).