Joseph Smith—Kasaysayan 1:21–26

Pasiuna

Human madawat ni Joseph Smith ang Unang Panan-awon sa 1820, gipakigbahin niya ang iyang kasinatian sa usa ka tigsangyaw kinsa misalikway sa iyang pagpamatuod. Agi og dugang, ang ubang mga tawo diha sa komunidad milutus sa batan-ong Joseph Smith. Ang mga tawo nga tag-as og ranggo naningkamot og maayo aron sa pagsaway niya sa publiko. Bisan pa niini nga oposisyon, mipabilin si Joseph Smith nga matinud-anon sa iyang pagpamatuod.

Mga Sugyot alang sa Pagtudlo

Joseph Smith—Kasaysayan 1:21–23

Ang mga tigsangyaw ug ang ubang mga tawo nga tag-as og ranggo mikutaw og pagpanggukod batok ni Joseph Smith

Sugdi ang klase pinaagi sa pagbasa og kusog sa mosunod nga istorya ni Presidente Gordon B. Hinckley mahitungod sa pakig-istorya niya sa usa ka batan-ong lalaki sa London, England. Sa dili pa nimo basahon ang unang bahin niini nga istorya, dapita ang klase sa pagpamalandong kon unsa kaha ang ilang buhaton kon sila ang anaa sa kahimtang niining batan-ong lalaki. (Mahimo nimong sultihan ang klase nga ang katapusan niini nga istorya moabut sa kadugayan sa leksyon.)

“Miingon siya, ‘Kinahanglan akong makig-istorya sa usa ka tawo. Nag-inusara ako. …’

“Ug miingon ako, ‘Unsay imong problema?’

“Ug miingon siya, ‘Sa dihang mipasakop ako sa Simbahan dul-an na usa ka tuig ang milabay, gihinginlan ako sa akong amahan ug dili na gyud pabalikon. Ug wala gayud ako mibalik.’

“Mipadayon siya, ‘Pipila ka bulan ang milabay ang cricket club nga ako usa ka miyembro mitangtang kanako gikan sa lista niini, nagdili kanako sa pagka-miyembro uban sa mga lalaki nga kauban kog tubo nga akong nasuod pag-ayo ug naamigo.’

“Dayon siya miingon, ‘Sa miaging bulan gitaktak ko sa akong boss tungod kay ako miyembro niini nga simbahan, ug ako wala makakita og laing trabaho. …

“‘Ug kagabii ang babaye nga akong gikauban sulod sa usa ka tuig ug tunga miingon nga dili gayud siya makigminyo kanako tungod kay ako Mormon’” (“The Loneliness of Leadership” [Brigham Young University pakigpulong sa debosyonal, Nob. 4, 1969], 3, speeches.byu.edu).

Human mabasa kini nga istorya, dapita ang pipila ka mga estudyante sa pagtubag sa mosunod nga mga pangutana:

Mibati ba kamo sukad nga kamo gitagad og dili maayo o gisaway tungod sa inyong relihiyosong mga tinuohan? Unsa ang sitwasyon? (Mahimo usab nga mopakigbahin ka og kaugalingong kasinatian ngadto sa klase.)

I-display ang litrato Ang Unang Panan-awon (Libro sa Hulagway sa Ebanghelyo [2009], nu. 90; tan-awa usab sa LDS.org). Ipasabut nga bisan tuod si Joseph Smith napanalanginan og maayo tungod sa pagpamatuod nga iyang nadawat isip usa ka resulta sa Unang Panan-awon, grabe usab ang iyang pagsulay. Awhaga ang mga estudyante sa pagkonsiderar unsa kaha ang ilang makat-unan gikan sa tubag ni Joseph Smith sa oposisyon nga iyang nasinati tungod sa iyang pagpamatuod.

Ipares-pares ang mga estudyante sa pagtrabaho. Dapita ang kada pares sa pagpuli-puli sa pagbasa og kusog sa Joseph Smith—Kasaysayan 1:21–23. Hangyoa sila sa pagpangita og mga pulong nga naghulagway sa oposisyon nga giatubang ni Joseph Smith tungod sa iyang pagpamatuod. (Mahimo nimong isugyot nga markahan sa mga estudyante ang mga pulong nga ilang nakit-an.) Human mabasa sa mga estudyante, ipangutana ang mosunod:

Unsa nga mga pulong ang nagpatigbabaw diha kaninyo?
Kinsa ang grabeng mipasiugda sa pagpanggukod batok ni Joseph Smith niining panahona? (Ang mga tawo nga tag-as og ranggo sa komunidad kinsa miangkon nga mga Kristiyanos.)
Samtang imong hunahunaon ang edad ug mga sitwasyon sa kinabuhi ni Joseph Smith, sa unsa nga paagi nga ang mga pagpanggukod gikan niini nga mga tawo labihan ka lisud alang kaniya?

Itudlo ang hugpong sa mga pulong duol sa katapusan sa Joseph Smith—Kasaysayan 1:20 nga nagsugod, “Kini ingon og. …” Dapita ang mga estudyante sa pagsugod niini nga mga pulong ug sa pagbasa sa hilum sa nahibilin sa bersikulo, nga mangita sa rason nga gihatag ni Joseph Smith kon nganong gisinati niya kini nga pagpanggukod sa ingon ka batan-ong edad.

Sumala ni Joseph Smith, nganong gisinati niya kini nga pagpanggukod sa ingon ka batan-ong edad? (Nakahibalo si Satanas nga si Joseph Smith mahimong “usa ka tigsamok-samok ug usa ka tighasol-hasol sa iyang gingharian” [Joseph Smith—Kasaysayan 1:20].)

Ipasabut nga samtang ang mga estudyante nagpadayon sa ilang pagtuon karon sa Joseph Smith—Kasaysayan, makat-unan nila ang importanting mga kamatuoran nga motabang kanila sa pag-atubang sa oposisyon ug sa pagpanggukod nga mahimo nilang masinati tungod sa ilang matarung nga mga tinuohan ug mga lihok.

Joseph Smith—Kasaysayan 1:24–26

Bisan og si Joseph Smith gikasilagan ug gigukod, nagpabilin siyang matinud-anon sa iyang pagpamatuod

Ipataas ang imong mga kasulatan, ug ipangutana ang mosunod:

Kinsa ang usa ka tawo diha sa kasulatan kinsa inyong gidayeg tungod sa iyang kinaiya o kalig-on sa iyang ehemplo? (Dapita ang mga estudyante sa pagpasabut og dali sa ilang mga tubag.)

Dapita ang usa ka estudyante sa pagbasa og kusog sa Joseph Smith—Kasaysayan 1:24. Hangyoa ang klase sa pagsunod, nga mangita sa pangalan sa usa ka tawo kinsang mga kasinatian susama sa kang Joseph Smith.

Nganong si Joseph Smith nakahimo sa paghinumdom sa iyang mga kasinatian ug mipakigsama kang Apostol Pablo? (Si Pablo gibiay-biay tungod sa iyang pagpamatuod ni Jesukristo ug gani mipabiling matinud-anon ngadto niini.)
Sa unsang paagi kaha makatabang kini kang Joseph Smith nga tan-awon ang mga butang nga anaa niya sama sa kang Apostol Pablo? (Tan-awa sa 2 Mga Taga-Corinto 11:23–27 alang sa usa ka paghulagway sa mga kasakit ni Pablo.)
Unsa nga leksyon ang atong makat-unan gikan sa ehemplo ni Joseph Smith sa pagtuon ug sa pagpamalandong sa mga kasinatian ni Pablo? (Tabangi ang mga estudyante sa pag-ila sa mosunod nga baruganan: Atol sa malisud nga mga panahon, kita makakuha og kalig-on gikan sa mga ehemplo sa matinud-anong mga indibidwal diha sa mga kasulatan.)

Isulat kini nga kamatuoran diha sa pisara, ug ipasabut nga kini usa ka ehemplo sa baruganan. Mahimo nimong pahinumduman ang mga estudyante nga ang mga doktrina ug mga baruganan sa ebanghelyo mga sukaranan, dili mausab nga mga kamatuoran nga naggiya sa atong mga kinabuhi. Aron matabangan ang mga estudyante nga masusama kini nga baruganan sa ilang mga kinabuhi ug mobati sa kamatuoran ug kaimportante niini, ipangutana ang mosunod:

Kanus-a kamo nalig-on pinaagi sa pagtuon sa kasinatian sa usa ka matinud-anong indibidwal diha sa mga kasulatan? (Mahimo usab kang makigbahin og usa ka kasinatian.)

Awhaga ang mga estudyante sa pag-adto sa mga kasulatan alang sa kalig-on sa panahon nga sila nag-atubang og mga kalisud.

Isulat ang mosunod nga pamahayag diha sa pisara: “Ako nakakita og usa ka panan-awon; ako nasayud niini, ug ako nasayud nga ang Dios nasayud niini, ug ako dili makalimud niini” (Joseph Smith—Kasaysayan 1:25).

Unsa ang gitudlo niini nga mga pulong diha kaninyo mahitungod sa pagpamatuod ni Joseph Smith sa Unang Panan-awon?
Sa unsa nga paagi kamo makaangkon og saksi nga si Joseph Smith sa tinuod nakakita sa Dios Amahan ug ni Jesukristo?

Dapita ang mga estudyante sa pagbasa og hilum sa Joseph Smith—Kasaysayan 1:24–25. Hangyoa sila sa pagpangita og mga doktrina o mga baruganan nga makatabang kanato kon nag-atubang kita og oposisyon o nagduha-duha sa atong mga pagpamatuod…Dapita sila sa pagrekord unsay ilang nakit-an diha sa ilang mga class notebook o mga scripture study journal. Ang mga ehemplo sa mga kamatuoran nga mahimong ilhon sa mga estudyante naglakip sa mosunod:

Ang kahibalo nga atong nadawat gikan sa Dios tinuod bisan og ang kalibutan mosalikway niini.

Kinahanglan kita nga mas mabalaka mahitungod sa unsay gihunahuna sa Dios kanato kay sa unsay gihunahuna sa mga tawo.

Bisan kon kita gikasilagan ug gigukod tungod sa atong mga pagpamatuod, kinahanglan gayud nga magpabilin kitang matinud-anon ngadto niini.

Dapita ang mga estudyante sa pagpakigbahin sa kamatuoran nga ilang nailhan. Awhaga sila sa pagpaminaw og maayo sa usag usa. Mahimo nimong isugyot nga i-rekord nila ang mga kamatuoran nga ilang nakat-unan gikan sa usag usa diha sa ilang mga class notebook o mga scripture study journal. Samtang ang mga estudyante nakigbahin sa mga kamatuoran nga ilang nadiskubre, ipangutana ang mosunod:

Sa unsa nga paagi si Joseph Smith usa ka ehemplo niana nga kamatuoran?
Sa unsa nga paagi kana nga kamatuoran makatabang kaninyo?
Sa unsa nga paagi nga ang pagpuyo niana nga kamatuoran mag-impluwensya sa atong mga pagpili?

Basaha og kusog ang nahibiling istorya ni Presidente Hinckley mahitungod sa batan-ong lalaki sa London, England, kinsa nag-atubang og grabe nga oposisyon tungod sa iyang relihiyosong mga tinuohan:

“Miingon ako, ‘Kon kini nakahasol kanimo og maayo, nganong dili ka mobiya sa Simbahan ug mobalik ngadto sa panimalay sa imong amahan ug ngadto sa imong cricket club ug sa trabaho nga importante kaayo kanimo ug sa babaye nga imong gihunahuna nga imong gihigugma?’

“Naghilom siya sulod sa dugay nga panahon. Dayon, gibutang ang iyang ulo diha sa iyang mga kamot, mibakho siya pag-ayo. Sa katapusan, mihangad siya nga nagtulo ang luha ug miingon, ‘Ako dili makahimo niana. Ako nahibalo nga kini tinuod, ug kon kini mokuha sa akong kinabuhi, dili gayud ako makabiya niini’” (“The Loneliness of Leadership,” 3–4).

Dapita ang mga estudyante sa pagpili og usa sa mga kamatuoran nga ilang gilista ug sa pagsulat unsay ilang buhaton sa paggamit niana nga kamatuoran diha sa ilang mga kinabuhi.

Taposa ang leksyon pinaagi sa pagdapit og usa ka estudyante sa pagbasa og kusog sa Joseph Smith—Kasaysayan 1:26. Hangyoa ang mga estudyante sa pagsunod ug sa pag-ila sa baruganan nga nakita ni Joseph Smith nga tinuod.

Unsa nga mga panalangin ang miabut ni Joseph Smith tungod kay mituo siya sa saad gikan ni Santiago? (Nakat-unan niya nga kon kita mangayo sa Dios diha sa hugot nga pagtuo alang sa kaalam, siya walay pagpugong nga mohatag niini kanato. Nakat-unan usab niya nga kon kita molihok sa mga saad diha sa mga kasulatan, makabaton kita og pagpamatuod sa kamatuoran niini.)

Ipakigbahin ang imong pagpamatuod nga samtang kita mosalig sa Dios ug motuo ug molihok sa mga gisaad diha sa mga kasulatan, atong madawat ang mga tubag gikan sa Dios ug makabaton og kalig-on sa pagbuntog sa mga hagit nga atong giatubang.